Sèng-tàn Chiok-koa
|
聖誕祝歌 |
|---|---|
| Teng Êng-lîm | 丁榮林 |
|
1. Kiong-hí, kiong-hí, chin kiong-hí, Kin-á-ji̍t sī hó ji̍t-chí; Khèng-chiok Iâ-so͘ lâi chhut-sì, Chit ê hok-khì tōa bô pí. |
1. 恭喜，恭喜，真恭喜， 今仔日是好日子； 慶祝耶穌來出世， 這個福氣大無比。 |
|
2. Iâ-so͘ pún-lâi sī Siōng-tè, Ūi-tio̍h beh kiù lán tāi-ke; Hoaⁿ-hí tùi thiⁿ lâi kàng-sè, Beh kiù sè-kan múi chi̍t ê. |
2. 耶穌本來是上帝， 為著beh救咱逐家； 歡喜tùi天來降世， Beh救世間每一個。 |
|
3. Iâ-so͘ chhut-sì hit chi̍t sî, Thiⁿ-sài tī thiⁿ iā hoaⁿ-hí; Pòaⁿ-mî lo̍h-lâi tàu gîm-si, Pò lâng chai-iáⁿ I chhut-sì. |
3. 耶穌出世hit一時， 天使tī天也歡喜； 半暝落來tàu吟詩， 報人知影伊出世。 |
|
4. Khòng-iá bo̍k-chiá teh kò͘-iûⁿ, Khòaⁿ-kìⁿ thiⁿ-téng ū koh-iūⁿ; Hut-jiân thiⁿ-sài chiū chhut-siaⁿ, Kiò in an-sim m̄-bián kiaⁿ. |
4. 曠野牧者teh顧羊， 看見天頂有各樣； 忽然天使就出聲， 叫in安心m̄免驚。 |
|
5. Pò lín sè-jîn lóng chai-iáⁿ, Kim-ji̍t tī Tāi-pi̍t ê siâⁿ; Siōng-tè chhe-khián I Sèng-kiáⁿ, Hō͘ lín tit-tio̍h sin oa̍h-miā. |
5. 報lín世人攏知影， 今日tī大衛ê城； 上帝差遣伊聖子， Hō͘ lín得著新活命。 |
|
6. Bo̍k-chiá thiaⁿ-liáu chin hoaⁿ-hí, Sûi-sî chiū khì chhē-tio̍h I ; Chhē-tio̍h kám-kak chin hok-khì, Sûi-sî tńg-khì pò chhù-piⁿ. |
6. 牧者聽了真歡喜， 隨時就去chhōe著伊； Chhōe著感覺真福氣， 隨時轉去報厝邊。 |
|
7. Iâ-so͘ chhut-sì chin pi-bî, Bô chhù khùn tī bé-chô ni̍h; Ūi-tio̍h beh kiù góa kap lí, Kam-goān pìⁿ chòe án-ni-siⁿ. |
7. 耶穌出世真卑微， 無厝睏tī馬槽--ni̍h； 為著beh救我kap你， 甘願變做án-ni-siⁿ。 |
|
8. Tang-hng phok-sū in iā chai, Sè-kan í-keng ū hó-tāi; Chiū-sī Kiù-chú í-keng lâi, Só͘-í tiau-kang beh lâi pài. |
8. 東方博士in也知， 世間已經有好代； 就是救主已經來， 所以tiau-kang beh來拜。 |
|
9. Lâi kàu lō͘-ni̍h sòa bê lō͘, Kiâⁿ-lâi kiâⁿ-khì bô hoat-tō͘; Kai-chài tit-tio̍h chhiⁿ chhōa-lō͘, Chiah ū kìⁿ-tio̍h Chú Iâ-so͘. |
9. 來到路mni̍h5煞迷路， 行來行去無法度； 佳哉得著星chhōa路， 才有見著主耶穌。 |
|
10.Phok-sū kàu-ūi chin hoaⁿ-hí, Sûi-sî kūi-lo̍h lâi pài I; Phah khui lé-mi̍h chin kùi-khì, Hiàn hō͘ Iâ-so͘ piáu kèng-ì. |
10. 博士到位真歡喜， 隨時跪落來拜伊； 扑開禮物珍貴氣， 獻hō͘耶穌表敬意。 |
|
11.Taⁿ lán khèng-chiok Chú Sèng-tàn, Hoaⁿ-hí Iá-so͘ lâi sè-kan; I beh siúⁿ-sù lán pêng-an, Thoat-lī thòng-khó͘ kap hām-hāi. |
11. 今咱慶祝主聖誕， 歡喜耶穌來世間； 伊beh賞賜咱平安， 脫離痛苦kap陷害。 |
|
12.Lán tiàm sè-kan ū lô-khó͘, Nā beh tit-tio̍h ū óa-khò; Góa pò lín chi̍t tiâu oa̍h-lō͘, Chhiáⁿ lín lóng lâi sìn Iâ-so͘. |
12. 咱tiàm世間有勞苦， 若beh得著有倚靠； 我報lín一條活路， 請lín攏來信耶穌。 |
|
(Tâi-oân Kàu-hōe Kong-pò, Tē 900 kî, 1962 nî 12 goe̍h)
|
（台灣教會公報第900期，1962年12月） |
