Chú-ji̍t-o̍h Ha̍k-seng-koa
|
主日學學生歌 |
|---|---|
| Niû Kú-têng | 梁舉廷 |
|
1. Cha̍p ê lâi hù Chú-ji̍t-o̍h, Tāi-ke Chú-lāi chiâⁿ tong-o̍h; Chi̍t ê kóng góa bô sim-sek, Chiū chhun káu ê lâi chhut-se̍k. |
1. 10個來赴主日學， 逐家主內成同學； 1個講我無心適， 就chhun 9個來出席。 |
|
2. Káu ê gín-ná chin hoaⁿ-hí, Chú-ji̍t-o̍h lāi thiāⁿ tō-lí; Kî-tiong chi̍t ê khùn siuⁿ òaⁿ, Poeh ê ba̍k-chiu kim-kim khòaⁿ. |
2. 9個囡仔真歡喜， 主日學內聽道理； 其中1個睏siuⁿ晏， 8個目珠金金看。 |
|
3. Poeh ê gín-ná chin hēng-hok , Thiⁿ-pē ài lán ji̍p thian-kok; Chi̍t ê siū chio khì peh-soaⁿ, Hun-sòaⁿ chhit ê ê sim-koaⁿ. |
3. 8個囡仔真幸福， 天父ài咱入天國； 1個受招去peh山， 分散7個ê心肝。 |
|
4. Chhit ê gín-ná chiū koat-sim, Chú-ji̍t ha̍k-hāu tio̍h chûn-sim; Chi̍t ê kóng góa bô chhù-bī, Chhit ê kiám it la̍k chiū-sī. |
4. 7個囡仔就決心， 主日學笑著存心； 1個講我無趣味， 7個減一6就是。 |
|
5. La̍k ê gín-ná siūⁿ jia̍t-sim, Kiû Chú Iâ-so͘ thiaⁿ goán gîm; Chi̍t ê m̄-ài liām kim-kù, Kim-ji̍t sòa bô beh lâi hù. |
5. 6個囡仔想熱心， 求主耶穌聽阮吟； 1個m̄-ài唸金句， 今日續無beh來赴。 |
|
6. Gō͘ ê gín-ná siūⁿ chīn-la̍t, Hō͘ Chú-ji̍t-o̍h ōe hoat-ta̍t; Chi̍t ê cháu khì khòaⁿ iá-kiû, Sì ê tông-o̍h tiàm hia hiu. |
6. 5個囡仔想盡力， Hō͘主日學會發達； 1個走去看野球， 4個同學tiàm hia咻。 |
|
7. Sì ê gín-ná saⁿ iok-sok, Taⁿ lán m̄-thang koh lo̍h-po̍h; Hut-jiân chi̍t ê khì tiò-hî, Saⁿ ê siūⁿ tio̍h chin hi-kî. |
7. 4個囡仔相約束， 今咱m̄-thang koh lo̍h-po̍h; 忽然1個去釣魚， 3個想著真稀奇。 |
|
8. Saⁿ ê gín-ná sim bâng-bâng, Chú-ji̍t-o̍h lāi khòaⁿ bô lâng; Chi̍t ê kóng góa chhù bô êng, Chhiáⁿ lín N̄g lâng ji̍p Thian-têng. |
8. 3個囡仔心茫茫， 主日學內看無人； 1個講我厝無閒， 請lín 2人入天庭。 |
|
9. Nn̄g ê gín-ná chn hi-bî, Lí bīn khòaⁿ góa, góa khòaⁿ lí; Chi̍t ê kóng góa taⁿ m̄-khì, Āu chhiú chi̍t ê chin lóe-chì. |
9. 2個囡仔真稀微， 你面看我，我看你； 1個講我今m̄去， 後手1個真餒志。 |
|
10. Chi̍t ê gín-ná kiû Thiⁿ-pē, Khún-kiû Sèng Sîn kàng-lo̍h tōe; Góa taⁿ chhut-la̍t chio chi̍t ê, Goān Chú chiok-hok goán N̄g-ke. |
10. 1個囡仔求天父， 懇求聖神降落地； 我今出力招1個， 願主祝福阮2家。 |
|
11. Kok lâng chi̍t ē chhut-la̍t chio, Kiû Chú chān goán sim ōe sio; Chú-ji̍t-o̍h lāi piàn sì ê, Tāi-ke koat-sim lâi thê-hê. |
11. 各人一下出力招， 求主贊阮心會燒； 主日學內變4個， 大家決心來提攜。 |
|
12. Sì ê gín-ná chòe tông-ha̍k, Tāi-ke chhut-la̍t saⁿ-kap tha̍k; Lí chio, i chio, góa iā chio, Kàu-sek lāi-bīn chiū piàn sio. |
12. 4個囡仔做同學， 大家出力相kap讀； 你招，伊招，我也招， 教室內面就變燒。 |
|
13. Poeh ê ha̍k-seng chīn le̍k-liōng, Ǹg-bāng ūi Chú lâi chīn-tiong. Chi̍t lâng chhōa chi̍t sī pún-hūn, Kim-ji̍t piàn chiâⁿ cha̍p-la̍k kun. |
13. 8個學生盡力量， 向望為主來盡忠； 1人chhōa 1是本分， 今日變成16君。 |
|
14. M̄-bián koh kóng lí iā chai, Liân-liân koh-chài têng gō͘ pái; Lâng-gia̍h chi̍t-chheng jī-cha̍p-sì, Hián-bêng ha̍k-seng ê chì-khì. |
14. M̄免koh講你也知， 連連koh再重5擺； 人額一千二十四， 顯明學生ê志氣。 |
|
15. Lí góa tio̍h chìn m̄-thang thè, Lí sī gō͘-chheng góa chi̍t-chheng; Lí góa chīn-la̍t chiū ū hok, Chòe Chú chīn-tiong ê lô͘-po̍k. |
15. 你我著進m̄-thang退， 你是五千我一千； 你我盡力就有福， 做主盡忠ê奴僕。 |
|
16. Chú-ji̍t-o̍h ê Ho̍k-heng-koa, Kàu chia teh beh lâi kiat-sok; Ǹg-bāng tāi-ke tàu koan-sim, Hō͘ Chú-ji̍t-o̍h ōe ho̍k-heng. |
16. 主日學ê復興歌， 到chia teh beh來結束； 向望逐家tàu關心， Hō͘主日學會復興。 |
|
(Tâi-oân Kàu-hōe Kong-pò, Tē 896 kî, 1962 nî 1 goe̍h)
|
（台灣教會公報第896期，1962年1月） |
