Lāu-bú kóng hō͘ gín-ná thiaⁿ_Thun-lún ê Khó-giām
|
老母講hō͘ 囡仔聽：吞忍 ê 考驗 |
| E̍k-sū |
E̍k-sū |
|
A-sêng, A-gī, A-hô chit 3 ê siàu-liân gín-ná ǹg Tiong-heng kó͘-hūn iú-hān kong-si teh kiâⁿ. In múi chi̍t ê sim-lāi lóng ū phāu chi̍t ê hi-bāng, chiū-sī siūⁿ kóng nā khó ōe tiâu, thang hō͘ lâng chhái-iōng chò kong-si ê chit-oân m̄ chin hó. Án-ni in chiū ōe-thang chē tī chin súi ê pān-kong-sek lâi pān-kong, thiaⁿ sǹg-pôaⁿ ti̍t-tiak ti̍t-tiak ê siaⁿ, in iā ōe-thang ha̍k-si̍p chin chōe hāng ê sū. A-gī kóng “A-sêng, lí kóng kin-á-ji̍t ōe khó sím-mi̍h?” A-sêng kóng “Kiám m̄-sī Kok-bûn, Soàn-su̍t, Siông-sek”, chit 3 kho sī A-sêng chòe tek-ì ê 3 kho, i ka-kī siūⁿ kóng nā khó chit 3 kho, i it-tēng ōe tiâu. A-gī kóng “Tio̍h, góa iā sī án-ni siūⁿ, put-kò kiám-chhái iáu ōe khó sǹg-pôaⁿ,” in-ūi tùi sǹg-pôaⁿ ê sêng-chek lâi khòaⁿ, i sī pí chit 2 ê tông-ha̍k khah hó.
|
阿誠、阿義、阿豪這3個少年囡仔向中興股份有限公司teh行。In每1個心內攏有抱1個希望，就是想講若考會tiâu,thang hō͘人採用做公司ê職員m̄真好。Án-ni in就會thang坐tī真súi ê辦公室來辦公，聽算盤ti̍t-tiak ti̍t-tiakê聲，in也會thang學習真濟項ê事。阿義講：「阿誠，你講今仔日會考甚mi̍h？」阿誠講：「Kiám m̄是國文、算術、常識」，這3科是阿誠最得意ê 3科，伊家己想講若考這3科，伊一定會tiâu。阿義講：「著，我也是án-ni想，不過kiám-chhái iáu會考算盤，」因為tùi算盤ê成績來看，伊是比這2個同學較好。 |
|
In ji̍p kong-si ê tōa-mn̂g kiâⁿ ji̍p keng-lí-sek, keng-lí khòaⁿ-tio̍h in ji̍p-khì, chiū chhiò-chhiò kóng “Lín sī beh lâi khó liān-si̍p-seng ho͘N3”. In chi̍t chôe ìn-tap kóng “Sī”, keng-lí chiū chí piah-kak ê 3 teh toh-á, kóng, “lín chē tiàm hia, toh-téng ê khà-phìⁿ seng kā góa sǹg chi̍t ē, nā sǹg liáu chiah pò góa chai hit ê sò͘-bo̍k”. In lóng tìm-thâu chiū chē tī hia sǹg. Chóng-sī in chin tio̍h-kiaⁿ toh-téng ê khà-phìⁿ hui-siông chē, múi toh chì-chió ū 3 bān tiuⁿ. A-sêng sim-lāi teh siūⁿ “sǹg che ū sím-mi̍h lō͘-ēng? Goán sī lâi chham-ka liān-si̍p-seng ê khó-chhì ê, iā m̄-sī lâi chò kang, ūi sím-mi̍h kiò goán sǹg che?” I jú sǹg sim-lāi jú hoân-cha̍p. A-gī iā sī án-ni siúⁿ “A̍i̍h! Chit ê keng-lí sī m̄-sī kap goán teh sńg-chhiò? Goán sǹg chiah ê khà-phìⁿ, ū sím-mi̍h lō͘-ēng, ná m̄ kā goán khó?” Chí-ū A-hô kám-kak che sī chi̍t ê ū ì-gī ê sū, i sǹg chi̍t pah tiuⁿ chiū chò kì-hō khǹg chò-hóe, chi̍t-pō͘ chi̍t-pō͘ ûn-ûn-á chò.
|
In入公司ê大門行入經理室，經理看著 in入去，就笑笑講：「Lín是beh來考練習生ho͘N3。」In一齊應答講：「是」，經理就chí壁角ê 3 teh桌仔，講：「lín坐tiàm hia,桌頂ê卡片先kā我算1下，若算了才報我知hit ê數目。」In攏tìm頭就坐tī hia算。總--是in真著驚桌頂ê卡片非常濟，每桌至少有3萬張。阿誠心內teh想：「算這有甚mi̍h路用？ 阮是來參加練習生ê考試ê,也m̄是來做工，為甚mi̍h叫阮算這？」伊愈算心內愈繁雜。阿義也是án-ni想：「A̍i̍h！ 這個經理是m̄是kap阮teh sńg笑？阮算chiah ê卡片，有甚mi̍h路用，哪m̄ kā阮考？」只有阿豪感覺這是1個有意義ê事，伊算1百張就做記號囥做伙，1步1步勻勻仔做。 |
|
Sǹg tiap-á kú, A-sêng thun-lún bōe tiâu chiū khì mn̄g keng-lí kóng “Keng-lí sian-siⁿ, góa í-keng sǹg kàu chi̍t chheng tiuⁿ lah, lí beh kā goán khó bōe?” Keng-lí iô-thâu kóng “Iáu-chá, iáu-chá, lí koh khì sǹg”. I gia̍h thâu khòaⁿ sî-cheng, sî-kan í-keng 11 tiám pòaⁿ lah. A-gī sui-jiân bô kóng ōe, chóng-sī i ê ba̍k-chiu siông-siông teh khòaⁿ keng-lí, ì-sù ná chhin-chhiūⁿ teh mn̄g kóng “Hó bōe? Góa thang kiat-sok bōe?” Sî-kan teh beh kàu 12 tiám lah, A-sêng khòaⁿ sî-cheng, pak-tó͘ iā kám-kak iau lah, chóng-sī keng-lí iáu bōe kā in khó-chhì, in iáu tī hia teh sǹg. A-gī iā jím bōe tiâu, i siūⁿ ài khì gōa-kháu chhoán chi̍t-ē khùi, m̄-bat chē hiah kú ê sî-kan, chi̍t sim iā siūⁿ kóng lâi pài-thok keng-lí seng kā in khó, chóng-sī bô ióng-khì, in-ūi kì-tit i lāu-pē kā i kóng “Lí tio̍h hó-hó khì khó, nā khó ōe ji̍p kong-si, lí ê chiân-tô͘ chiū ōe kng-bêng,” bān-it nā hō͘ keng-lí siū-khì, khó bōe ji̍p chiū chhiⁿ-chhám. Só͘-í i chí-ū thun-lún koh sǹg, chóng-sī i ê thâu-náu teh siūⁿ pa̍t hāng bô choan-sim teh sǹg, soah bōe kì-tit sǹg kàu gōa chōe, i koh chài têng-sǹg. Chóng-si A-hô lóng m̄ bat gia̍h-thâu, chí-ū tī hia jin-chin teh sǹg, “tang, tang, tangi8” sî-chêng tân 12 tiám lah. A-sêng sim chin tio̍h-kip, giōng beh khiā-khí--lâi. A-gī iā-sī án-ni, in 2 lâng lóng thêng-chí kang-chok, chí-ū A-hô iáu teh sǹg. A-sêng kap A-gī lóng teh khòaⁿ keng-lí, tán khòaⁿ i ōe kóng “Lín ē-po͘ chiah lâi khó”, chóng-sī keng-lí àⁿ-thâu teh khòaⁿ sin-bûn, bô beh chhap in. In lóng teh kî-koài, chí ū tī hia teh tán khòaⁿ, keng-lí ōe khui-chhùi bōe? Chi̍t hun-cheng kòe-khì, 2 hun-cheng kòe-khì, 10 hun-cheng kòe-khì lah, keng-lí iáu teh khòaⁿ sin-bûn. “Keng-lí!” A-sêng tòng bōe tiâu chiū tōa siaⁿ kiò, “O͘h!” keng-lí ìn liáu chiū gia̍h-thâu khí-lâi, A-sêng mn̄g “Í-keng 12 tiám lah, goán thang tńg-khì chia̍h pn̄g, ē-po͘ chiah koh lâi?” Keng-lí ìn kóng “M̄-bián, m̄-bián, hiān-chāi í-keng khó liáu lah”, “goán lóng iáu bōe khó lah?” “Chóng-sī góa í-keng lóng kā lín khó lah, lâi, lín lâi”. A-sêng A-gī chiū khì, A-hô iáu tī hia teh sǹg. “A-hô! Kín lâi!” A-sêng kiò, “tán chi̍t ē góa chit pah tiuⁿ sǹg chi̍t-ē”, A-hô ìn-tap chiū iáu tī hia teh sǹg, A-hô kóaⁿ-kín sǹg liáu chiū kiâⁿ óa-lâi.
|
算tiap-á久，阿誠吞忍bōe tiâu就去問經理講：「經理先生，我已經算到1千張--lah，你beh kā阮考bōe?」經理搖頭講：「Iáu早、iáu早，你koh去算。」伊gia̍h頭看時鐘，時間已經11點半--lah。阿義雖然無講話，總--是伊ê目珠常常teh看經理，意思ná親像teh問講：「好bōe?我thang結束bōe?」時間teh beh到12點--lah，阿誠看時鐘，腹肚也感覺枵--lah，總--是經理iáu bōe kā in考試，in iáu tī hia teh算。阿義也忍bōe tiâu,伊想ài去外口喘1下氣，m̄-bat坐hiah久ê時間，1心也想講來拜託經理先kā in考，總--是無勇氣，因為記得伊老父kā伊講：「你著好好去考，若考會入公司，你ê前途就會光明，」萬一若hō͘經理受氣，考bōe入就淒慘。所以伊只有吞忍koh算，總--是伊ê頭腦teh想別項無專心teh算，續bōe記得算到偌濟，伊koh再重算。 總--是阿豪攏m̄ bat gia̍h頭，只有tī hia認真teh算：「tang、tang、tang...」時鐘tân 12點--lah。阿誠心真著急，giōng beh企起--來。阿義也是án-ni,in 2人攏停止工作，只有阿豪iáu teh算。阿誠kap阿義攏teh看經理，等看伊會講：「Lín ē晡才來考」，總--是經理àⁿ頭teh看新聞，無beh chhap in。In攏teh奇怪，只有tī hia teh等看：經理會開嘴bōe?1分鐘過去，2分鐘過去，10分鐘過去--lah，經理iáu teh看新聞。「經理！」 阿誠tòng bōe tiâu就大聲叫，「O͘h」經理應了就gia̍h頭起來，阿誠問：「已經12點lah，阮thang轉去食飯，e晡才koh來？」經理應講：「M̄免、m̄免，現在已經考了lah」，「阮攏iáu bōe考lah？」「總--是我已經攏kā lín考lah，來，lín來。」阿誠、阿義就去，阿豪iáu tī hia teh算。「阿豪！緊來！」阿誠叫，「等1下我這百張算1下」，阿豪應答就iáu tī hia teh算，阿豪趕緊算了就行倚來。 |
|
Keng-lí chiū kóng “Taⁿ, lín kin-á-ji̍t í-keng khó liáu lah, goán ê kong-si hiān-chāi só͘ khiàm-ēng ê liān-si̍p-seng iā í-keng chhōe tio̍h lah. Lín tāi-iok iā ōe chai. Chi̍t ê lâng bô lūn chò sím-mi̍h tāi-chì, lóng sī chin tiōng-tāi ê chek-jīm, tùi chit ê chek-jīm tio̍h ài ū thun-lún ê sim, koh tio̍h ōe choan sim khì chòe, chiah ōe sêng-kong. Kin-á-ji̍t, 3 ūi lâi khó-chhì, góa chai-iáⁿ lín ê ha̍k-gia̍p lóng chin hó, chóng-sī góa khiok m̄ chai lín ū chit khoán ê cheng-sîn á-bô. Hiān-chāi chhì-giām ê kiat-kó, chí-ū Ông A-hô ū ta̍t-tò chit ê phiau-chún, goán sī su-iàu chit khoán ê jîn-châi. Taⁿ goán ê kong-si koat-tēng beh phèng i lâi kang-chok. ” In 3 ê tùi kong-si chhut-lâi, sim-chêng lóng bô siâng. Te̍k-pia̍t sī A-sêng kap A-gī sim-lāi chin kan-khó͘, A-sêng kóng “Beh nā chai-iáⁿ án-ni, góa it-tēng ōe hó-hó tī hia sǹg”. A-gī iā kóng “sī, góa chin hō͘-hóe, góa ê lāu-pē it-tēng ōe mē góa”. A-hô kóng “M̄-bián hō͘-hóe, iā m̄ bián kan-khó͘ sim, keng-lí teh kóng iā chin tio̍h, lán tio̍h ài ū thun-lún ê sim kap choan-sim, chiah ōe sêng-kong”. A-sêng, A-gī thiaⁿ liáu lóng tìm-thâu. Sèng-keng kóng “Tī chì sió-khóa ê sū chīn-tiong ê, tī tōa ê iā chīn-tiong, tī chì sió-khóa ê sū put-gī ê, tī tōa ê iā put-gī ! ” (Lō͘-ka 16:10)
|
經理就講：「今，lín今仔日已經考了lah，阮ê公司現在所欠用ê練習生也已經chhōe tio̍h lah。Lín大約也會知。1個人無論做甚mi̍h代誌，攏是真重大ê責任，tùi這個責任著 ài有吞忍ê心，koh tio̍h會專心去做，才會成功。今仔日，3位來考試，我知影lín ê學業攏真好，總--是我卻m̄知lín有這款ê精神抑無。現在試驗ê結果，只有王阿豪有達到這個標準，阮是需要這款ê人才。今阮ê公司決定beh聘伊來工作。」In 3個tùi公司出來，心情攏無siâng。特別是阿誠kap阿義心內真艱苦，阿誠講：「Beh nā知影án-ni,我一定會好好tī hia算。」阿義也講：「是，我真後悔，我ê老父一定會mē我。」阿豪講：「M̄免後悔，也m̄免艱苦心，經理teh講也真tio̍h,咱著 ài有吞忍ê心kap專心，才會成功。」阿誠、阿義聽了攏tìm頭。聖經講：「Tī至小可ê事盡忠ê,tī大ê也盡忠，tī至小可ê事不義ê,tī大ê也不義！」（路加福音16章10節） |
|
(Ka-têng ê pêng-iú tē 54 kî, 1962 nî 8 goe̍h)
|
(家庭ê朋友第54期，1962年8月) |
