An-lo̍k ke_03
|
安樂街_03 |
| Bô chù-bêng |
無注明 |
|
Tē saⁿ Chiuⁿ
|
第三章 |
|
Tok-hui tùi poa̍h-tó liau-āu pēⁿ lóng bē-ē khah hó. Sui-jiân ē lim ē chia̍h ē chē, iáu-kú bē-tit thang lo̍h lâu-thui, ia̍h bē-tit-thang giâ khîm Chi̍t ji̍t pí chi̍t ji̍t thàn-chîⁿ lâi tō͘ oa̍h. Nā-s i ū ji̍t-ji̍t chiūⁿ ke, bô chhin-chhiūⁿ thâu-chi̍t-pá ê hô-hèng.
|
Tok-hui 對跋倒了後病攏 bē會較好。雖然會lim會食會坐，iáu-kú bē得thang落樓梯，亦bē得thang舉琴一日比一日趁錢來度活。若是有日日上街，無親像頭一擺 ê hô-hèng。 |
|
Ū chi̍t ji̍t hong ê siaⁿ put-chí thàu, chhoe--tio̍h i-ê bīn thàng-thiàⁿ chhin-chhiūⁿ to siah chi̍t iūⁿ ia̍h ū hō͘ ti̍h--tio̍h thâu-bīn, ia̍h ū tōa bū ba̍t-ba̍t 13 tà tī sin--ni̍h; chit-hō ê thiⁿ-khì bat gū-tio̍h.
|
有一日風 ê 聲不止透，吹--著伊 ê 面疼痛親像刀削一樣亦有雨滴--著頭面，亦有大霧 ba̍t-ba̍t tà tī 身--ni̍h；這號 ê 天氣bat 遇--著。 |
|
Ji̍t-ji̍t teh choān-khîm, sî-chūn kú-tn̂g chiū put-chí ià, hīn bē-tit ōaⁿ tē it, jī saⁿ tè ê khek- tiāu. Sui jiân ka-tī ū án-ni teh siūⁿ, khiok m̄-káⁿ kā Tok-hui kóng; nā-sī chit-ê khîm ia̍h bē koh ōaⁿ--tit, iū-koh bô hoat-tō͘; to̍k-to̍k ū tē sì tè ê khek-tiāu éng-éng bē ià. Thiaⁿ kàu chit tè, chiū hóng-hut chhin-chhiūⁿ thiaⁿ lāu-bó teh chhiùⁿ chi̍t-iūⁿ.
|
日日teh 轉琴，時陣久長就不止厭，恨bē得換第1，2、3塊 ê 曲調。雖然家己有 án-ni teh 想，卻m̄敢kā Tok-hui 講；若是這個琴亦bē koh 換--得，又koh無法度；獨獨有第4塊 ê 曲調往往 bē 厭。聽到這塊，就彷彿親像聽老母 teh 唱一樣。 |
|
Bô-lōa-kú tang-thiⁿ í-keng kòe, chhun-thiⁿ kàu lah, ji̍t khah tn̂g tām-po̍h, Lī-su-tē kàu siâⁿ-gōa khì khah-hn̄g ê tē-hng; hit só͘-chāi sī lâng ê khiā-ke, ke-lō͘ khui-khoah, choān-khîm ê lâng khah m̄-bat kàu. Só͘-í kàu chiah hi-hán, lâng to ài thiaⁿ, the̍h chîⁿ hō͘ i, hoan-hù i bî-á-ji̍t koh lâi.
|
無偌久冬天已經過，春天到lah，日較長淡薄，Lī-su-tē 到城外去較遠 ê 地方；hit所在是人 ê企家，街路開闊，轉琴 ê 人較m̄-bat 到。所在到chiah 稀罕，人都ài 聽，提錢 hō͘ 伊，吩咐伊明仔日koh 來。 |
|
Ū chi̍t ji̍t ji̍t-thâu chin joa̍h, pha̍k kàu seng- khu ē jia̍t, iū-koh só͘ khòa ê khîm ia̍h sī tāng, chiū cháu kúi-pō͘ khì hioh-khùn, kàu chi̍t só͘-chāi ū tōa ê the̍h, sì-ûi lóng sī hoe-hn̂g, chêng-bīn ûi lî-pa. lāi-bīn ū ta̍k-iūⁿ ê hoe-ba̍k, khui kàu put- chí súi; ū n̂g--ê, ū âng--ê,ia̍h ū pe̍h--ê.
|
有一日日頭真熱，pha̍k 到身軀會熱，又koh 所khòa ê 琴亦是重， 就走幾步去歇睏，到一所在有大ê 宅，四圍攏是花園，前面圍籬笆。內面有逐樣ê 花木，開到不止súi；有黃--ê，有紅--ê，亦有白--ê。 |
|
Lī-su-tē to̍k-to̍k tiàm tī chit-tah thêng-kha, m̄- chai sī sím-mi̍h iân-kò͘; he̍k-sī ài-sioh hoe-ba̍k,á- sī siūⁿ--tio̍h in lāu-bó tī-teh ê sî ū chi̍t-pái hō͘ i tām-po̍h chîⁿ, bé kúi-ki-hoe chhah tī hoe-pân-lāi; āu-lâi nge̍h tī chheh--n̍i̍h teh kàu tâ-lâ--khì; āu-lâi nge̍h tī chheh--n̍i̍h teh kàu tâ-lâ--khì, kàu kin-á-ji̍t iáu-bōe hiat-ka̍k,in-ūi ài hē-teh chò kì- liām. Siūⁿ kàu hiàng-sî ê tāi-chì liáu, chiū koh choān kúi-nā kòe ê khîm, kia̍h-thâu khòaⁿ-kìⁿ lâu- thang-lāi ū nn̄g-ê sè-hàn gín-ná; tōa-hàn ê ū tài- chhiò-iông, thàm-thâu lo̍h-lâi khòaⁿ; koh thiaⁿ-kìⁿ in chi̍t-ê mn̄g, chi̍t-ê ìn, teh kóng-ōe.
|
Lī-su-tē 獨獨 tiàm tī 這tah 停腳，m̄知是啥物緣故；或是愛惜花木，抑是想--著 in 老母 tī-teh ê 時有一擺 hō͘ 伊淡薄錢，買幾枝花插 tī 花瓶內；後來nge̍h tī 冊--n̍i̍h teh 到tâ-lâ--去，到今仔日 iáu-bōe 發覺，因為ài hē-teh 做紀念。想到hiàng時 ê 事誌了，就koh 轉幾若kòe ê 琴，舉頭看見樓窗內有2個細漢囡仔；大漢 ê 有帶笑容，探頭落來看；koh 聽見 in一個問，一個應，teh 講話。 |
|
Cha-bó͘-gún-ná tùi cha-po͘-gín-ná kóng, “Cha-lí ah, i choān ê khîm hó m̄-hó?”
|
查某囡仔對查甫囡仔講：「Cha-liah2，伊轉ê 琴好m̄好？」 |
|
In kóng, “Chin hó, nā-sī chit-ê khîm-tiāu pún- jiân sī hó thiaⁿ.”
|
應講：「真好，若是這個琴調本然是好聽。」 |
|
Tē it jī saⁿ tè ê khek-tiāu lóng liáu lah; kàu tē sì tè in tāi-ke chê-chê tah chhiú, hoaⁿ-hí kàu bē-kò͘--tit, in-ūi chit tè khek-tiāu sī i lāu-bó bat kapin tāi-ke chhiùⁿ--ê. Khîm kap khek kàu têng-tha̍h ê kù, gín-ná ia̍h tòe chhùi chhiùⁿ-- chhut-lâi kóng, “Góa ê ke chiū-sī An-lo̍k-ke, bô tè thang pí góa ê ke.”
|
第1、2、3塊 ê 曲調攏了lah；到第4塊 in 大家齊齊 tah 手，歡喜到bē顧--得，因為這塊曲調是伊老母 bat 佮 in 大家唱--ê。琴佮曲到重複 ê句，囡仔亦退出唱--出來講：「我ê 街就是安樂街，無地thang比我ê 街。」 |
|
Thiaⁿ-liáu chit kúi-kù ê ōe, Lī-su-tē kia̍h-thâu khòaⁿ-kìⁿ lâu-pâng ke̍k koân, ke̍k thé-bīan,siūⁿ in tāi-ke chhùi-lāi só͘ chhiùⁿ ê An-lo̍k-ke kap hiān- sî só͘ khiā-khí-ê bô chha chi̍t-tiám-á, chiū ka-tī teh siūⁿ kóng, “Góa chi̍t-ê gín-ná só͘ tú-tio̍h ê kéng-hóng, ūi-tio̍h sím-mi̍h iân-kò͘ chha kàu hiah-n̍i̍h-hn̄g.”
|
聽了這幾句 ê 話， Lī-su-tē 舉頭 看見樓房極懸，極體面，想in 大家嘴內所唱 ê 安樂街佮現時所企起ê無差一點仔，就家己teh想講：「我一個囡仔所抵著 ê 景況，為著啥物緣故差到hiah-n̍i̍h遠。」 |
|
Tú-tú teh siūⁿ ê tiong-kan, hit nn̄g ê gín-ná kín-kín lo̍h lâu--lâi tùi in lāu-bó thó chîⁿ; bô lōa-kú gín-ná tùi lâu-thang-téng tìm--lo̍h kúi ê chîⁿ ka-la̍uh tī hoe-tî-lāi, lìn kàu tī pe̍h-hoe-kha. Lī- su-tē sak-khui lî-pa mn̂g ûn-ûn-á kiâⁿ kòe-khì chháu-á tē, kàu hit-ê hoe-tî ê só͘-chāi chhōe chîⁿ; khiok chhōe bô tio̍h, in nn̄g lâng ia̍h lâi kap i tàu-chhōe, chhōe-tio̍h chiū the̍h hō͘ i. Lī-su-tē thǹg bō-á kiâⁿ-lé, chiong chîⁿ hē tī tē-á-lāi, iáu-kú teh iân-chhiân bōe khì, tùi ko͘-niû kóng, “Chit-ê hoe si̍t-chāi sī hó khòaⁿ.”
|
抵抵teh 想 ê 中間，hit二個囡仔緊緊落樓--來對 in 老母討錢；無偌久囡仔對樓窗頂 tìm--落幾個錢 ka落 tī 花池內，lìn 到tī 白花腳。Lī-su-tē sak開籬笆門勻勻仔行過去草仔地，到hit個花池 ê 所在 chhōe 錢；卻chhōe無著，in 二人亦來佮伊tàu-chhōe，chhōe著就提 hō͘ i。Lī-su-tē 褪帽仔行禮，將錢 hē tī 袋仔內，iáu-kú teh iân-chhiân bōe 去，對姑娘講：「這個花實在是好看。」 |
|
Ko͘-niû mn̄g i, “Lí ài chi̍t pha mah?”
|
姑娘問伊：「你愛一pha mah？」 |
|
Lī-su-tē ìn kóng, “Lí khéng ho͘ū--góa bô?”
|
Lī-su-tē應講：「你肯hō͘--我無？」 |
|
Gín-ná chiū khì mn̄g i-ê lāu-bó; tiap-á-kú chiū tò-tńg-lâi kóng, “Hō͘ lí sì ki, chhut-chāi lí kéng.”
|
囡仔就去問伊 ê老母；tiap仔久就倒轉來講：「Hō͘ 你4枝，出在你揀。」 |
|
Lī-su-tē kéng--chhut-lâi, ko͘-niû chiū kā pa̍k chò chi̍t pé. Lī-su-tē kóng, “chit-iūⁿ ê hoe chiông-chêng góa lāu-bó bat hō͘ góa.”
|
Lī-su-tē 揀--出來，姑娘就kā 縛做一把。Lī-su-tē 講：「這樣 ê 花 從前我老母 bat hō͘ 我。」 |
|
Hit-ê ko͘-niû miâ-kiò Bí-lī kóng, “Lí ê lāu-bó chit-tia̍p bat koh hō͘--lí bô?”
|
Hit個姑娘名叫 Bí-lī 講：「你ê 老母 這tia̍p bat koh hō͘--你無？」 |
|
Lī-su-tē kóng, “Lāu-bó í-keng sí lah, chī-chūi- á beh hō͘ góa ê hoe?”
|
Lī-su-tē 講：「老母已經死lah，是誰仔beh hō͘ 我ê花？」 |
|
Bí-lī kóng, “Khó-liân chit-ê choān-khîm ê gín-ná!”
|
Bí-lī 講：「可憐這個轉琴 ê 囡仔！」 |
|
Lī-su-tē giâ khîm siūⁿ beh tò-khì. Bí-lī tùi Cha-lí sè-á-siaⁿ teh kóng, “Lí mn̄g i kiò-chò sím- mi̍h miâ-jī.”
|
Lī-su-tē舉琴想 beh 倒--去。Bí-lī 對 Cha-lí 細仔聲 teh 講：「你問伊叫做甚物名字。」 |
|
Cha-lí kóng, “M̄ ah, lí khì mn̄g.”
|
Cha-lí 講：「M̄ ah， 你去問。」 |
|
Bí-lī chiah koh iang Cha-lí khì mn̄g, Cha-lí thâu-khak àⁿ-àⁿ, bīn-māu âng-âng, sè-á-siaⁿ mn̄g i, “Lí kiò sím-mi̍h miâ?”
|
Bí-lī chiah koh 央Cha-lí去問，Cha-lí頭殼 àⁿ-àⁿ，面貌紅紅，細仔聲問伊：「你叫啥物名？」 |
|
Lī-su-tē kā i kóng-liáu chiū cháu. Hiah-ê gín- ná hoan-hù i kóng, “Lí koh kúi-ji̍t chiah koh lâi;” liân-liân kóng saⁿ pái.
|
Lī-su-tē kā 伊講了就走。Hiah-ê囝仔吩咐伊講：「你koh 幾日 chiah koh 來；」連連講三擺。 |
|
Lī-su-tē tò-lâi lau8--n̍i̍h, khòaⁿ-kìⁿ hoe bô sím- mi̍h chhiⁿ, lóng ta-lâ--khì, bē-chhah-tit hoe-pân, chiū chiàu i lāu-bó ê hoat-tō͘ nge̍h tī chheh--n̍i̍h.
|
Lī-su-tē 倒--來 lau8--n̍i̍h，看見花無甚物生，攏 ta-lâ--去，bē插得花瓶，就照伊老母 ê 法度 nge̍h tī 冊--n̍i̍h。 |
|
Kòe kúi ji̍t kú, Lī-su-tē koh lâi kàu téng-ji̍t hit-ê koân-lâu hoe-hn̂g ê só͘-chāi, chiong sì tè ê khîm-tiāu teh choān, choān liáu nn̄g piàn bô khòaⁿ-kìⁿ hit nn̄g ê gín-ná chhut-lâi, in-ūi in tòe lāu-pô khì tī chhiū-nâ-lāi teh chhit-thô; só͘-í Lī- su-tē chhōe-bô-tio̍h.
|
過幾日久， Lī-su-tē koh 來到頂日 hit個懸樓花園 ê 所在，將4塊 ê 琴調 teh 轉，轉了2遍無看見hit二個囡仔出來，因為 in tòe 老婆去 tī 樹林內 teh chhit-thô；所在 Lī-su-tē chhōe無著。 |
|
Chit kúi-ji̍t Tok-hui to̍k-to̍k ka-tī chi̍t lâng tiàm tī lâu-téng, sim-koaⁿ chhin-chhiūⁿ hóe teh sio, ài siū-khì, bô lâng an-ùi í, liân chit-ê khîm ia̍h bô tī i sin-piⁿ. Lī-su-tē ū-sî thàn-chîⁿ khah- chió tò--lâi. Tok-hui chiū thó͘-khùi kóng, “Iáu m̄-ta̍t--tio̍h ka-tī chhut-khì chò seng-lí khah-hó.”
|
這幾日Tok-hui 獨獨家己一人 tiàm tī 樓頂，心肝親像火 teh 燒，愛受氣，無人安慰伊，連這個琴亦無tī 伊身邊。Lī-su-tē 有時趁錢較少倒--來。 Tok-hui 就吐氣講：「Iáu m̄值--著家己出去作生理較好。」 |
|
Lī-su-tē thun-lún bô ìn i, in-ūi tùi chiông- chêng lāu-bó sí liáu-āu só͘ chhin-ài--ê ko͘-toaⁿ chi̍t- ê Tok-hui nā-tiāⁿ; siūⁿ-lâi siūⁿ-khì kóng, “Góa thang ēng sím-mi̍h hoat-tō͘ khì an-ùi i chiah hó, he̍k-sī chhiáⁿ sin-seⁿ lâi táⁿ-tia̍p i.”
|
Lī-su-tē 吞忍無應伊，因為對從前老母死了後所親愛--ê 孤單一個 Tok-hui nā-tiāⁿ；想來想去講：「我thang用啥物法度去安慰伊才好，或是請sin-seⁿ來 táⁿ-tia̍p 伊。」 |
|
Ū chi̍t mê-hng kóng, “Tok-hui lāu-peh ah! góa kā lí chhiáⁿ chi̍t ūi i-seng lâi khòaⁿ pēⁿ hó m̄-hó?” Tok-hui ìn kóng, “m̄-sái, m̄-sái, bo̍h-tit kiáu- jián góa, góa ài an-chēng lah.”
|
有一暝昏講：「Tok-hui 老伯--ah！我kā 你請一位醫生來看病好m̄好？」Tok-hui應講：「M̄-sái，m̄-sái，莫得攪擾我，我ài 安靜--lah。」 |
|
Lī-su-tē sim-lāi m̄ pêng-an, kiaⁿ i lāu-lâng ē sí--khì, chhun i chi̍t lâng beh cháiⁿ-iūⁿ hó. Tiàm tī chit-ê lâu-téng khiā-khí, sui-jiân bē-pí-tit ke- lāi, chóng-sī I chit-ê Tok-hui teh koán-kò͘, ia̍h khah-hó ko͘-toaⁿ chi̍t-ê lâng.
|
Lī-su-tē 心內 m̄ 平安，驚伊老人會死--去，偆伊一人 beh 怎樣好。Tiamt3? 這個樓頂企起，雖然 bē比得街內，總--是伊這個 Tok-hui teh 管顧，亦較好孤單一個人。 |
|
Chit-ê lāu-lâng chi̍t-ji̍t chi̍t-ji̍t lám, sin-thé put-chí sán, bīn-sek ia̍h m̄-hó khòaⁿ, chhiú iū-koh ngia̍uh-ngia̍uh-chhoah, liân khîm ia̍h bē choān. Lī-su-tebat7 thiaⁿ lâng kóng-kòe, chē-hòe ê lāu- lâng hoān-tio̍h chit-hō mâu-pēng chiū tōa-tōa thang kiaⁿ; chá-àm bē phah-sǹg-tit, put-jû chhiáⁿ i-seng lâi táⁿ-tia̍p khah-hó.
|
這個老人一日一日 lám，身體不止瘦，面色亦m̄好看，手又koh ngia̍uh-ngia̍uh-chhoah，連琴亦bē 轉。Lī-su-tē bat 聽人講過，濟歲 ê 老人犯著這號毛病就大大thang驚；早晚 bē 打算得，不如請醫生來 táⁿ-tia̍p 較好。 |
|
Chin chhàu-khiáu tú-tio̍h lâu-chú ū phòa-pēⁿ, ta̍k-ji̍t chhiáⁿ i-seng lâi khòaⁿ, kiám-chhái thang kiò i sòa kā Tok-hui táⁿ-tia̍p; koh teh phah-sǹg Tok-hui tiàm ê só͘-chāi lī lâu-chú bô lōa-hn̄g, tam- koh bô lōa-chē ê kang-hu; nā kó-jiân sin-seⁿ lâi, góa ài mn̄g sím-mi̍h pēⁿ, khòaⁿ ē-hó á-bē. Lī-su- tē tó-teh bē-khùn-tit, hoan-lâi hoan-khì, kan-ta teh siūⁿ, sim-koaⁿ to bē an-jiân. Ū goe̍h-kng chiò--ji̍p-lâu, i chiū tī bîn-chhn̂g-téng peh-khí-lâi, chhiú thèⁿ thâu-khak khòaⁿ Tok-hui ê sîn-chhái tōa m̄ thò-tòng, chhin-chhiūⁿ chêng nî lāu-bó beh sí ê khoán-sit, teh-beh éng-oán lī-pia̍t.
|
真 chhàu-khiáu抵著樓主有破病，逐日請醫生來看，kiám-chhái thang 叫伊續 kā Tok-hui táⁿ-tia̍p；koh teh 打算 Tok-hui tiàm ê 所在離樓主無 lōa遠，tam-koh無偌濟 ê 功夫；若果然 sin-seⁿ 來，我ài 問啥物病，看會好抑bē。Lī-su-tē 倒teh bē睏得，翻來翻去，kan-ta teh 想，心肝就bē 安然。有月光照入樓，伊就 tī 眠床頂 peh起來，手 thèⁿ 頭殼看 Tok-hui ê 神彩大m̄妥當，親像前年老母 beh 死 ê 款式，teh-beh 永遠離別。 |
|
Lī-su-tē ba̍k-sái chia̍p-chia̍p ti̍h, chiū chiām- chiām sòa khùn--khì.
|
Lī-su-tē 目屎 chia̍p-chia̍p 滴，就漸漸續睏--去。 |
|
Tē-jī-ji̍t tī lâu-thui-piⁿ teh thèng-hāu i-seng lâi. Tok-hui khòaⁿ-kìⁿ i m̄ chiūⁿ ke choān-khîm, giâu- gî i sī pîn-tōaⁿ; Lī-su-tē kóng kúi-kú the-sî ê ōe, khui thang-á-mn̂g khòaⁿ-kìⁿ i-seng lo̍h chhia ji̍p lâu-chú ê chhù. I chiū chē tī tōa-mn̂g-kháu teh thèng-hāu i-seng chhut--lâi. Nā-sī chit-ê i-seng tú-tú chhut mn̂g-kháu,thiaⁿ-kìⁿ āu-piah ū siaⁿ kiò kóng, “Chhiáⁿ sin-seⁿ, chhiáⁿ sin-seⁿ.”
|
第二日 tī 樓梯邊 teh 聽候醫生來。Tok-hui 看見伊 m̄上街 轉琴，giâu疑伊是貧憚；Lī-su-tē 講幾句推辭 ê 話，開窗仔門看見醫生落車入 樓主 ê 厝。伊就坐 tī大門口 teh 聽候醫生出--來。若是這個醫生抵抵出門口，聽見後壁有聲叫講：「請 sin-seⁿ，請 sin-seⁿ。」 |
|
I-seng hoan-sin mn̄g kóng, “Lí chit-ê gín-ná ài sím-mi̍h?”
|
醫生翻身問講：「你這個囡仔 ài 啥物？」 |
|
Lī-su-tē ìn kóng, “Chhiáⁿ lí chiūⁿ lâu-téng khòaⁿ ū pēⁿ ê lâng; ū chi̍t-ê lāu-lâng miâ-kiò Tok-hui, i-ê pēⁿ put-chí siong-tiōng.”
|
Lī-su-tē應講：「請你上樓頂 看有病 ê 人；有一個老人名叫 Tok-hui，伊 ê病不止傷重。」 |
|
I-seng mn̄g kóng, “Tok-hui sī sím-mi̍h lâng.”
|
醫生問講：「Tok-hui 是啥物人？」 |
|
Lī-su-tē kóng, “Sī góa ê sin-seⁿ, i chiàu-kò͘ góa, góa chiū chiàu-kò͘ i.”
|
Lī-su-tē 講：「是我 ê sin-seⁿ，伊照顧我，我就照顧伊。」 |
|
I-seng bē bêng-pe̍k chit-ê ōe, phah-sǹg seng khì khòaⁿ pēⁿ, chiū mn̄g Tok-hui sī sím-mi̍h pēⁿ. Lī-su-tē kóng, “I nî-hòe put-chí lāu, góa m̄-chai i sī sím-mi̍h pēⁿ, chi̍t-ji̍t kòe chi̍t-ji̍t thoa-tîⁿ chiah kú,kiaⁿ-liáu i bē-hó, só͘-í chhiáⁿ lí lâi khòaⁿ; Tok- hui iáu m̄ chai lí lâi, góa khì kā i kóng--chi̍t-siaⁿ.
|
醫生bē 明白這個話，扑算先去看病，就問Tok-hui 是啥物病。 Lī-su-tē 講：「伊年歲不止老，我m̄知 伊是啥物病，一日過一日 thoa-tîⁿ chiah 久，驚了醫bē好，所在請你來看；Tok- hui iáu m̄知你來，我去 kā 伊講--一聲。 |
|
Chiū cháu chìn-chêng teh kiò, “Lāu-peh ah, lâu- chú só͘ chhiáⁿ ê i-seng lâi lah, ài-beh lâi khòaⁿ lí.”
|
就走進前teh叫：「老伯 ah，樓 主所請 ê 醫生來lah，ài-beh 來看你。」 |
|
Tok-hui haiⁿ chi̍t siaⁿ. Lī-su-tē khí-thâu kiaⁿ- liáu Tok-hui m̄-ài hō͘ i-seng khòaⁿ pēⁿ, kàu chit- tia̍p khòaⁿ i lóng bô chó͘-tòng, chiū chhōa sin-seⁿ saⁿ-kap chiūⁿ lâu khì. I-seng kìⁿ-tio̍h Tok-hui chiū mn̄g i tì pēⁿ ê goân-thâu. I chi̍t-hāng chi̍t- hāng kā i kóng; i-seng iok i bîn-á-chá-khí beh sàng io̍h lâi hō͘ i.
|
Tok-hui haiⁿ 一聲。Lī-su-tē 起頭聽 了Tok-hui m̄愛 hō͘醫生看病，到這 tia̍p 看伊攏無阻擋，就 chhōa sin-seⁿ 相佮上樓去。醫生見著 Tok-hui 就問伊致病 ê 源頭。伊一項一項 kā 伊講；醫生約伊明仔早起 beh 送藥來 hō͘ 伊。 |
|
Kóng-liáu beh tò-khì, teh-beh chiūⁿ chhia ê sî Lī- su-tē tùi chhiú khan-teh mn̄g i, “Beh lōa-chē chîⁿ?”
|
講了 beh 倒去，teh-beh 上車 ê 時 Lī- su-tē 對手牽teh 問伊：「Beh 偌濟錢？」 |
|
Sin-seⁿ kóng, “Sím-mi̍h chîⁿ ?"
|
Sin-seⁿ 講：「啥物錢？」 |
|
Lī-su-tē ìn kóng, “Kā góa lāu-peh khòaⁿ pēⁿ ê chîⁿ, chit-tia̍p seng hō͘ lí tām-po̍h-á, nā bô kàu- gia̍h bîn-á-chài koh pó͘-chiok.”
|
Lī-su-tē應講：「Kā 我老伯看病 ê 錢，這tia̍p 先 hō͘ 你淡薄仔，若無到 額明仔再koh 補足。」 |
|
Sin-seⁿ kóng, “Góa m̄-ài chîⁿ, bîn-á-ji̍t góa ia̍h lâi kā lâu-chú khòaⁿ-pēⁿ, sūn-piān chiah koh lâi khòaⁿ Tok-hui.”
|
Sin-seⁿ 講：「我m̄愛錢，明仔日我亦來 kā 樓主看病，順便 chiah koh 來看Tok-hui。」 |
|
Hit-chi̍t-sî Lī-su-tē chhùi-lāi sui-jiân bô kóng to-siā, sim-tiong khiok àm-àm kám-kak, sòa chhiáⁿ-mn̄g sin-seⁿ kóng, “Góa lāu-peh ê pēⁿ tàu- té sī àn-cháiⁿ-iūⁿ?”
|
Hit一時 Lī-su-tē 嘴內雖然無講多謝，心中卻暗暗感覺，續請問 sin-seⁿ 講：「我老伯 ê 病到底是àn- cháiⁿ-iūⁿ？」 |
|
I-seng kóng, “I tiàm chit-tah ê ji̍t-chí bô lōa- kú lah,put-kò chi̍t-goe̍h-ji̍t lāi-gōa.”
|
醫生講：「伊tiàm 這tah ê 日子無偌久lah，不過一月日內外。」 |
|
Lī-su-tē tò-tńg chiūⁿ lâu khì, bān-bān teh kiâⁿ, chū-giân chū-gí kóng, “Chi̍t-goe̍h-ji̍t, chi̍t-goe̍h-ji̍t, “put-chí iu-būn, siūⁿ kàu chi̍t-goe̍h-ji̍t í-āu iû- goân sī ko͘-toaⁿ chi̍t lâng, bô pêng-iú thang chiàu- èng, bô ke-lāi thang óa-khò. Khui-liáu lâu-mn̂g, Tok-hui mn̄g kóng, "I-seng tùi lí kóng sím-mi̍h?"
|
Lī-su-tē 倒轉上樓去，慢慢 teh 行，自言自語講：「一月日，一月日：「不止憂悶，想到一月日以後猶原是孤單一人，無朋友thang照應，無 ke內thang 倚靠。開了樓門，Tok-hui 問講：「醫生對你講啥物？」 |
|
Lī-su-tē ìn i kóng, "Lí iáu ē oa̍h chi̍t-goe̍h- gōa-ji̍t." Kóng-tio̍h chiū tōa siaⁿ khàu--khí-lâi, sòa kóng, "Chiông-lâi chhun góa chi̍t-ê lâng, àn- cháiⁿ-iūⁿ hó leh?"
|
Lī-su-tē應伊講：「你iáu 會活一月外日。」講著就大聲哭--起來， 續講：「從來偆我一個人，àn- cháiⁿ-iūⁿ好leh？」 |
|
Tok-hui bô ìn-tap, sim-lāi siūⁿ āu-lâi lī-khui lâu- pâng, kap Lī-su-tē ia̍h pàng-soah, ì-ài ê khîm m̄- chai beh tùi tó-lo̍h-khì. Chit-chi̍t-ji̍t i m̄-ài kóng-ōe.
|
Tok-hui無應答，心內想後來離開樓房，佮 Lī-su-tē亦放煞，意愛 ê 琴m̄ 知beh 對佗落去。這一日伊m̄愛講話。 |
|
Lī-su-tē pàng bē-tit-lī, chiū bô chiūⁿ ke, chē tī piⁿ-á teh su-hāu, ia̍h bô kóng-ōe; in nn̄g-ê lâng chū thiaⁿ-kìⁿ chi̍t-goe̍h-ji̍t chit-kù-ōe, í-āu ná siūⁿ ná kiaⁿ, ná m̄-káⁿ bē-kì-tit, sî-siông chhin-chhiūⁿ chit-kù-ōe tiàm tī hī-khang-piⁿ. Kàu ê-hng to̍k to̍k ū hóe-lô͘ ê kng, Tok-hui mn̄g Lī-su-tē kóng, "Kòe-liáu chi̍t-goe̍h-ji̍t, góa m̄-chai beh khì sím- mi̍h só͘-chāi."
|
Lī-su-tē 放bē得離就無上街，坐tī 邊--仔 teh侍候，亦無講話；in 二個人自聽見一月日這句話，以後那 那聽，那m̄敢bē記得，時常親像這句話 tiàm tī 耳空邊。到e昏獨 獨有火爐 ê 光，Tok-hui 問Lī-su-tē 講：「過了一月日，我m̄知beh去甚物所在。」 |
|
Lī-su-tē khòaⁿ-hóe kóng, "Góa ê lâu-bó bat kóng-kòe ū chi̍t-ê Thian-tông sī ke̍k hó ê só͘-chāi'; i ài khì hit-ê ke, hit-tia̍p beh sí ê sî só͘ chhiùⁿ ê An-lo̍k-ke, góa siūⁿ chiū-sī Thian-tông."
|
Lī-su-tē 看火講：「我ê 老母 bat 講過有一個天堂是極好ê 所在；伊愛去hit個街，hit-tia̍p beh死ê時所唱 ê 安樂街，我想就是天堂。」 |
|
Tok-hui kóng," Hó sī hó, góa siūⁿ tī hit-ê só͘- chāi lóng bô sio̍k-se̍k, m̄-chai hit só͘-chāi ê lé-hoat kui-ki."
|
Tok-hui 講：「好是好，我想 tī hit個所 在攏無sio̍k-se̍k，m̄知hit所在 ê 禮法規矩。」 |
|
Lī-su-tē kóng, "Góa bat thiaⁿ-kìⁿ kóng, khiok ia̍h bô sím-mi̍h siông-sè."
|
Lī-su-tē 講：「我bat 聽見講，卻亦無啥物詳細。」 |
|
Tok-hui kóng, "Bô góa bat ê lâng, góa ê kó͘- khîm ia̍h bô tī-hia, Thian-tông m̄-chai ū choān- khîm á-bô?"
|
Tok-hui 講：「無我bat ê 人，我ê 古琴亦無tī-hia，天堂m̄知有轉琴抑無？」 |
|
Lī-su-tē kóng, "Thiaⁿ góa lāu-bó bat kóng, sī ū tôaⁿ-khîm--ê, bô thiaⁿ-kìⁿ ū choān-khîm--ê."
|
Lī-su-tē 講：「聽我老母bat講，是有彈琴--ê，無聽見有轉琴--ê。」 |
|
Tok-hui kóng,"Tôaⁿ ê khîm m̄-ta̍t--tio̍h choān ê khîm; kiaⁿ-liáu tiàm hit só͘-chāi ut-būn." Lī- su-tē bô ōe thang ìn.
|
Tok-hui 講：「彈 ê琴m̄值--著轉 ê 琴；聽了tiàm hit所在鬱悶。」Lī- su-tē無話thang應。 |
|
Tok-hui chi̍t-ē siūⁿ, hut-jiân kóng, "Lí kā góa thàm-thiaⁿ Thian-tông ê sū-chêng; chin-chiàⁿ nā ē-hiáu-tit só͘-chāi ê kong-kéng chiū m̄-sái kiaⁿ; lín lāu-bó kiám m̄-sī kóng hit só͘-chāi ē-tit-thang sǹg chò An-lo̍k-ke mah?"
|
Tok-hui 一個想，忽然講：「你kā 我探聽天堂 ê 事情；真正若會曉得所在 ê 光景就 m̄-sái 聽；lín 老母敢m̄是講hit所在會得thang 算作安樂街 mah？」 |
|
Lī-su-tē kóng, "Chiàu i só͘ kóng--ê góa phah- sǹg tek-khak sī Thian-tông."
|
Lī-su-tē 講：「照伊所講--ê 我扑算的確是天堂。」 |
|
Tok-hui chài-saⁿ thok i thàm-thiaⁿ Thian-tông, iàu-kín m̄-thang hō͘ i kòe chi̍t-goe̍h-ji̍t ê ān, nā iân-chhiân chiū kóaⁿ bē-tit-thang kàu.
|
Tok-hui 再三託伊探聽天堂，要緊 m̄-thang hō͘ 伊過一月日 ê ān，若 iân-chhiân 就趕bē得thang到。 |
|
Lī-su-tē kóng, "Góa nā ū chi̍t-tiám-á hoat-tō͘, tek-khak beh hō͘ lí kàu hit-ê só͘-chāi.'" I kóng chiah-ê ōe, í-āu kó-jiân chiàu i só͘ kóng khì kiâⁿ, m̄-káⁿ pàng-sak chit-ê tāi-chì.
|
Lī-su-tē 講：「我若有一點仔法度，的確 beh hō͘ 你到hit個所在。」伊講 chiah-ê 話，以後果然照伊所講去行，m̄敢放sak 這個事誌。 |
