Si̍p-jī-kè Ê Kau-chiàn_04
|
十字架Ê 交戰_04 |
| Tân Kim-jiân e̍k |
Tân Kim-jiân譯 |
|
13. Lêng Jio̍k Ê Kau-chiàn
|
13. 靈肉Ê交戰 |
|
“Hit sî Iâ-so͘ hō͘ Sèng Sîn chhōa kàu khòng-iá, beh siū Mô͘-kúi chhì.” (Má-thài 4:1) Iâ-so͘ siū sóe-lé, Sèng Sîn chhin-chhiūⁿ chíⁿ-á chhiong-móa I, chek-sî khì khòng-iá kìm-chia̍h 40 mî-ji̍t, siū Mô͘-kúi chhì, oân-choân tek-sèng. Taⁿ góa bô koh ēng kìm-chia̍h ê kî-tó, sī chiàu-siông chia̍h lâi thoân-tō, tùi chia khí ū kiâⁿ sîn-jiah, lāu-bú hó khì lah, chóng-sī bē thang tí-khòng Mô͘-kúi thong-kè jio̍k-thé ê iú-he̍k. “Nā m̄ sī ēng kî-tó, chit lūi chiū bōe tit i chhut.” (Má-khó 9:29) Sî-siông hō͘ jio̍k-thé só͘ chòe ù-òe, io̍k-bōng ê iú-he̍k khah iâⁿ, tī Chú ê bīn-chêng kiû chín-kiù.
|
「Hit時耶穌hō͘聖神chhōa到曠野，beh受魔鬼試。」(馬太4：1) 耶穌受洗禮，聖神親像chíⁿ-á充滿I，即時去曠野禁chia̍h 40暝日，受魔鬼試，完全得勝。Taⁿ我無koh用禁chia̍h ê祈禱，是照常chia̍h來傳道，tùi chia起有行神跡，老母好去lah，總是bē thang抵抗魔鬼通過肉體ê誘惑。「若m̄是用祈禱，chit類就bōe得i出。」(馬可9：29) 時常hō͘肉體所做污穢，欲望ê誘惑khah贏，tī主ê面前求拯救。 |
|
Hôe-kò͘ pún-sin ê loán-jio̍k kap ù-òe, chin chiàⁿ bô pān-hoat, chiū koat-ì sûn-hôe thoân-tō. Chi̍t-niá thán-á, chi̍t-pún Sèng-keng, khai-sí kî-tó thoân-tō, tāi-seng tī Sîn-hō͘ ê hū-kīn, āu-lâi sûn-hôe Kiú-chiu ê kok-tōe, tī siâⁿ-chhī tī lông-chhoan, pôaⁿ-soaⁿ kè-niá chhēng thap-bi̍h8 thoân hok-im. Ū sî kap cheng-sîn-pēⁿ lâng ná kóng ná kiâⁿ Tiông-kiā koān Kàn-chó hái-kîⁿ. Ū sî khiā tī Tiok-hō khe-hōaⁿ hôe-sióng kè-khì, iā kap hóe-chhia pîⁿ-pîⁿ kiâⁿ A-so soaⁿ-phiáⁿ. Án-ni siū Chú ín-chhōa lâi kàu Tâi-oân. Góa ê chú-gī sī bô ài kā lâng kiû-khit chîⁿ, bô ài kiû chia̍h-mi̍h, bô tòa chîⁿ, bô tòa piān-tong, to̍k-to̍k kiû Siōng-tè, lia̍h I só͘ kā góa pī-pān--ê, chòe kàu-gia̍h.
|
回顧本身ê軟弱kap污穢，真正無辦法，就決意巡迴傳道。Chi̍t領毯á、chi̍t本聖經，開始祈禱傳道，tāi先tī神戶ê附近，後來巡迴九州ê各地，tī城市tī農村，盤山過嶺穿thap-bi̍h8傳福音。有時kap精神病人ná講ná行長崎縣Kàn-chó海kîⁿ。有時khiā tī Tiok-hō溪岸回想過去，也kap火車平平行阿蘇山phiáⁿ。Án-ni受主引chhōa來到台灣。我ê主義是無愛kā人求乞錢、無愛求chia̍h-mi̍h、無tòa錢、無tòa便當，獨獨求上帝，lia̍h I所kā我備辦--ê，最夠額。 |
|
Ēng Kiong-kiā ê sìn-tô͘ ê hiàn-kim bóe kàu Tâi-oân ê chûn-phiò, chi̍t chōa 23 kho͘. Chûn sī Ko-chhian-hūi-oân 8,000 tùn chin súi ê chûn, lâng-kheh lóng sī teh lâi-óng Tâi-oân ê lâng, lóng chin chhai-hoa, siūⁿ tio̍h pún-sin chiah sòng-hiong si̍t-chāi khó͘-siong, mî--sî chiū chhu thán-á tī kah-pán-téng, chiàu sim só͘ ài kî-kiû Siōng-tè. Chûn kàu Ke-lâng bé-thâu ba̍k-chiu só͘ khòaⁿ jia̍t-tài ê kéng-tì si̍t-chāi chin kám-kek. Gêng-chiap ê lâng jîn-san jîn-hái, góa chhēng thap-bi̍h8 peh-chiūⁿ Ke-lâng soaⁿ, kî-kiû Siōng Chú pó-siú thâu-chêng ê lō͘-chām. Jia̍t-tài ê soaⁿ-hong ná chhe só͘ chhēng ê pe̍h-saⁿ, ná chàn-bí Chú lâi kàu Tâi-pak. Tùi lō͘-piⁿ thoân-tō khui kàu-hōe ê mn̂g-hō͘, tī ta̍k só͘-chāi thoân-tō. Te̍k-pia̍t siū ín-chhōa kàu Tâi-oân tāi-ha̍k ê koaⁿ-sià, tùi hiah ê sian-siⁿ thoân hok-im, ū lōa-chōe lâng lâi sìn, āu-lâi keng-kè tiong-pō͘ kàu lâm-pō͘, chē tī keng-chio-kha tha̍k Sèng-keng, tī ông-lâi-hn̂g ê kî-tó kàu kin-á-ji̍t iáu ū ìn-siōng. Tâi-oân thoân-tō chêng-āu ū 2 pái, kiōng 6 goe̍h-ji̍t, chiàⁿ sī piàⁿ-miā koat-sí ê thoân-tō.
|
用宮崎ê信徒ê獻金bóe到台灣ê船票，chi̍t chōa 23 kho͘。船是高千穗丸8, 000噸真súi ê船，人客lóng是teh來往台灣ê人，lóng真chhai-hoa，想tio̍h本身chiah sòng-hiong實在苦傷，暝時就chhu毯á tī甲板頂，照心所愛祈求上帝。船到基隆碼頭目chiu所看熱帶ê景致實在真感激。迎接ê人人山人海，我穿thap-bi̍h8 peh-chiūⁿ基隆山，祈求上主保守頭前ê路站。熱帶ê山風ná吹所穿ê白衫，ná讚美主來到台北。Tùi路邊傳道開教會ê門戶，tī ta̍k所在傳道。特別受引chhōa到台灣大學ê官舍，對hiah ê先生傳福音，有lōa-chōe人來信，後來經過中部到南部，坐tī keng蕉kha讀聖經，tī ông-lâi園ê祈禱到今á日iáu有印象。台灣傳道前後有2 pái，共6月日，正是拚命決死ê傳道。 |
|
14. Tiàu-bēng
|
14. 召命 |
|
Tē 2 hôe Tâi-oân thoân-tō ê sî Chú ū hián-chhut I ê koân-lêng, tāi-ha̍k ê koaⁿ-sià chòe tiong-sim hoat-khí sió-hêng ê ho̍k-heng. Góa khah siông kàu ē-po͘-sî chiū kàu Chúi-goân-tōe chheng-chhiū kha kî-tó. Ū sî ka-kī chi̍t lâng, ū sî kap tiông-chì saⁿ-kap kūi-lo̍h jia̍t-sim kî-tó, chhin-chhiūⁿ Í-lī-a tī Hô-lia̍t soaⁿ-tōng thiaⁿ Siōng-tè khin koh sòe ê siaⁿ, Sèng Sîn iā lîm-chāi tī chong-giâm kî-tó ê tiûⁿ-bīn, góa tī Chú ê bīn-chêng gī-gī-chhoah. Ū chi̍t ē-po͘ góa thiaⁿ-kìⁿ Siōng-tè tiàu-bēng ê siaⁿ.
|
第2回台灣傳道ê時主有顯出I ê權能，大學ê官舍做中心發起小型ê復興。我khah常到ē-po͘時就到水源地榕樹kha祈禱。有時ka-kī chi̍t人，有時kap同志saⁿ-kap跪落熱心祈禱，親像Í-lī-a tī Hô-lia̍t山洞聽上帝輕koh細ê聲，聖神也臨在tī莊嚴祈禱ê場面，我tī主ê面前gī-gī-chhoah。有chi̍t ē-po͘我聽見上帝召命ê聲。 |
|
“Kiáⁿ ah! Góa hō͘ lí tì-hūi ê un-sù, koh hō͘ lí i-pīⁿ ê un-sù, in-ūi lí ê sìn tōa, Góa hoaⁿ-hí lí ê sìn-gióng, lí ūi-tio̍h phòa-siùⁿ ê lâng, lân-pīⁿ ê lâng kî-tó, góa beh i-hó i, chōe-jîn nā bô sîn-jiah m̄-sìn Góa, khòaⁿ ah, Góa chiong Góa ê koân-lêng hō͘ lí, lí khì tōe-chiūⁿ, Góa chhòng-chō tōe, nā-sī sè-kan m̄ bat Góa, ah! Góa khòa-lū!”
|
「Kiáⁿ ah！我hō͘你智慧ê真正恩賜，koh hō͘你醫病ê真正恩賜，因為你ê信大，我歡喜你ê信仰，你為tio̍h phòa-siùⁿ ê人、lân病ê人祈禱，我beh醫好i，罪人若無神跡m̄信我，看ah，我將我ê權能hō͘你，你去地chiūⁿ，我創造地，若是世間m̄ bat我，ah！我掛慮！」 |
|
Góa thiaⁿ-kìⁿ chú ê siaⁿ, choân sim gī-gī chhoah, kiám ū chit hō sū. Phòa-siùⁿ ê lâng, lân-pīⁿ ê lâng, ū chhiⁿ-mî ê, pái-kha ê, ū gâm ū chhàu-bī ê, ū siáu ê, iā ū thái-ko ê, hiān-chāi kiám chin-chiàⁿ ū chit hō sîn-jiah? Nā ū kiâⁿ sîn-jiah kiám m̄ sī Chú Iâ-so͘ chāi sè tong-sî? Kap Sù-tô͘ Hêng-toān sio-siâng, chhin-chhiūⁿ góa chit ê bô lêng-le̍k ê lâng, Chú cháiⁿ-iūⁿ chiong chit hō thiⁿ ê tāi-bēng hō͘ góa? Góa hoán-hok án-ni chū-būn chū-tap. Bô-lūn ōe chiâⁿ bōe chiâⁿ, kì-jiân sêng-siū chit hō tiàu-bēng, góa siū tio̍h kiâⁿ sìn-gióng ê lō͘, lī-khui hit só͘-chāi, chek-sî tī chū-hōe lâi kiàn-chèng chit ê sū. Tùi án-ni ū lâng iau-kiû kî-tó, chiū tī sìn, tī Chú ê miâ lâi kî-tó. Hit ê kiat-kó; chi̍t ê hiaⁿ-tī tī(痔) thó͘ 5 kong-lî, hui-siông thòng-khó͘, keh-ji̍t beh ji̍p-īⁿ, chiap-siū kî-tó tńg-khì chhù-n̍i̍h, tī bô khì oân-choân hó khì, chi̍t ê chí-bē hoān tio̍h kú-nî e̍k-hiù (腋臭sī chi̍t khoán ê chhàu-kōaⁿ-sng, hō͘ lâng chin thó-iàm) i-io̍h lóng bô kong-hāu chiap-siū kî-tó, kúi tiám-cheng āu hit ê lân-pīⁿ hó khì, chèng-lâng chin tio̍h-kiaⁿ, tāi-ha̍k ê sian-siⁿ tùi in ê ha̍k-būn thâu-khak tēng sìn bōe lo̍h, sìn si̍t-chāi ê Siōng-tè, m̄ sìn Kiáⁿ Siōng-tè Ki-tok, chóng-sī khòaⁿ chiah ê sîn-jiah chiū sìn siōng-tè ê Kiáⁿ Iâ-so͘ Ki-tok, bô tiâu-kiāⁿ sìn I ê si̍p-jī-kè kap I ê koh-oa̍h.
|
我聽見主ê聲，全心gī-gī chhoah，kiám有chit hō事。Phòa-siùⁿ ê人、lân病ê人，有chhiⁿ-mî ê、pái-kha ê、有癌有臭味ê、有siáu ê，也有thái-ko ê，現在kiám真正有chit hō神跡？若有行神跡kiám m̄是主耶穌在世當時？Kap使徒行傳sio-siâng，親像我chit ê無能力ê人，主cháiⁿ樣將chit hō天ê大命hō͘我？我反覆án-ni自問自答。無論ōe chiâⁿ bōe chiâⁿ，既然承受chit hō召命，我受tio̍h行信仰ê路，離開hit所在，即時tī聚會來見證chit ê事。Tùi án-ni有人要求祈禱，就tī信、tī主ê名來祈禱。Hit ê結果；chi̍t ê兄弟痔thó͘ 5公厘，非常痛苦，隔日beh入院，接受祈禱tńg去厝n̍i̍h，痔無去完全好去，chi̍t ê姊妹患tio̍h久年腋臭(是chi̍t款ê臭kōaⁿ酸，hō͘人真討厭)醫藥lóng無功效接受祈禱，幾點鐘後hit ê lân病好去，眾人真tio̍h驚，大學ê先生tùi in ê學問頭殼tēng信bōe落，信實在ê上帝，m̄信Kiáⁿ上帝基督，總是看chiah ê神跡就信上帝ê Kiáⁿ耶穌基督，無條件信I ê十字架kap I ê koh活。 |
|
“Chèng lâng thiaⁿ-kìⁿ koh khòaⁿ-kìⁿ só͘ kiâⁿ ê sîn-jiah, chiū tâng-sim ì-hiòng Hui-le̍k ê ōe, in-ūi chōe-chōe lâng ū hoān-tio̍h siâ-sîn, hiah ê siâ-sîn tōa-siaⁿ âu-kiò chhut-khì; piàn-sūi ê, pái-kha ê, iā chōe-chōe tit-tio̍h i-hó.” (Sù-tô͘ Hêng-toān 8:6-7)
|
「眾人聽見koh看見所行ê神跡，就同心意向Hui-le̍k ê話，因為chōe-chōe人有犯tio̍h邪神，hiah ê 邪神大聲âu叫出去；piàn-sūi ê、pái-kha ê，也chōe-chōe得tio̍h醫好。」(使徒行傳8：6-7) |
|
15. Sòng-hiong Sin-niû
|
15. SOⁿG3-HIOⁿG新娘 |
|
Hit sî góa tòa tī tāi-ha̍k ê koaⁿ-sià, chiàu-siông thàu-chá khí-lâi chhut-khì chē-teh chēng-chēng kî-tó, hit sî thiaⁿ-kìⁿ Chú ê siaⁿ.
|
Hit時我tòa tī大學ê官舍，照常透早起來出去坐teh靜靜祈禱，hit時聽見主ê聲。 |
|
“Lí sī góa ê sòng-hiong sin-niû.” Chit kù ōe kú-kú khó͘-chhó͘ góa, góa chiong só͘ ū ê châi-sán lóng hō͘ góa ê sió-tī, tī chit sè-kan bô chi̍t hun-bûn, sī bô tòa chîⁿ-tē sòng-hiong ê thoân-tō-chiá, kàu kin-á-ji̍t iáu m̄ bat niá tio̍h ge̍h-hōng, chiong hó-gia̍h ê chhim-ian, pún-sin kap chit sè-kan bô koan-hē, chóng-sī góa iā chhim-chai sòng-hiong ê kan-khó͘. Ha̍k-seng sî-tāi nā khiàm-ēng chîⁿ, phoe siá khì, lāu-pē liâm-piⁿ kià lâi, chóng-sī Thiⁿ-pē kéng-kài I só͘ thiàⁿ ê, piⁿ-phah I só͘ hoaⁿ-hí--ê, só͘-í koat-toàn bô hō͘ i ū chhun, iā bô chek-sî hō͘ i, hō͘ i kî-tó kàu kha thâu-u thiàⁿ, cha-chhat liáu chiah hō͘ i. Bô chîⁿ ko͘-put-chiong tio̍h kìm-chia̍h, kî-tó, án-ni ù-òe ê jio̍k-thé chiah tit-tio̍h chheng-khì, Thiⁿ-pē iā chhim-chai chiah ê sū, só͘-í beh kéng Iâ-so͘ Ki-tok ê cheng-chiat chhim-sìn ê sin-niû, iā chiàu án-ni teh kàu-io̍k.
|
「你是我ê sòng-hiong新娘。」Chit句話句句苦楚我，我將所有ê財產lóng hō͘我ê小弟，tī chit世間無chi̍t分文，是無tòa錢袋sòng-hiong ê傳道者，到今á日iáu m̄ bat領tio̍h月俸，將好額ê深淵，本身kap chit世間無關係，總是我也深知sòng-hiong ê艱苦。學生時代若欠用錢，phoe寫去，老pē liâm-piⁿ寄來，總是天pē警誡I所疼ê，鞭phah I所歡喜--ê，所以決斷無hō͘ i有chhun，也無即時hō͘ i，hō͘ i祈禱到kha頭u疼，cha-chhat了chiah hō͘ i。無錢ko͘-put-chiong tio̍h禁chia̍h、祈禱，án-ni污穢ê肉體chiah得tio̍h清氣，天pē也深知chiah ê事，所以beh kéng耶穌基督ê掙扎深信ê新娘，也照án-ni teh教育。 |
|
Chheng-pîn (清貧) khak-si̍t sī chòe sin-niû thâu chi̍t hāng ê tiâu-kiāⁿ, tham-loân n̂g-kim bí-si̍t (美食) ê sî, Siōng-tè bô thiaⁿ hit lâng ê kî-tó, iā bōe thang sêng-siū sèng-kiat ê un-hūi. In-ūi án-ni Chú ài góa chòe sòng-hong ê sin-niû, chóng-sī nā siūⁿ tio̍h kàu sûn-kàu ê ji̍t kúi-cha̍p-nî kú, tio̍h kūi teh kî-tó chiah thang tit-tio̍h só͘ khiàm-ēng ê, chiū bô ài oa̍h, chài-saⁿ loân-bō͘ lo̍k-hn̂g, hūn bōe kín sûn-kàu, kín kui Pē tau. Í-lī-a tī lô-thêng chhiū-kha tùi Siōng-tè kiû “Iâ-hô-hoa ah, kiû Lí chhú góa ê sìⁿ-miā” góa iā án-ni tùi Siōng-tè kî-tó. Tio̍h chhēng chhin-chhiūⁿ thiⁿ-sài bí-lē ê jîn-ài kap sèng-kiat ê gī-phàu. Sìn ê cheng-chiàn ke̍k chhim-khek, ōe tit piàⁿ-miā kau-chiàn kàu bé á bōe? Góa sòa m̄ káⁿ khak-sìn.
|
清貧確實是做新娘頭chi̍t項ê條件，貪戀黃金美食ê時，上帝無聽hit人ê祈禱，也bōe thang承受聖潔ê恩惠。因為án-ni主愛我做sòng-hong ê新娘，總是若想tio̍h到殉教ê日幾cha̍p年久，tio̍h跪teh祈禱chiah thang得tio̍h所欠用ê，就無愛活，再saⁿ戀慕樂園，恨bōe緊殉教、緊歸Pē tau。Í-lī-a tī lô-thêng樹kha對上帝求「耶和華ah，求你取我ê性命」我也án-ni對上帝祈禱。Tio̍h穿親像天使美麗ê仁愛kap聖潔ê義袍。信ê爭戰極深刻，ōe得拚命交戰到尾á bōe？我sòa m̄敢確信。 |
|
“Taⁿ liáu-āu ū gī ê bián-liû kā góa pī-pān hē teh.” (II Thê-mô͘-thài 4:8)
|
「Taⁿ了後有義ê冕liû kā我備辦hē teh。」(II Thê-mô͘-thài 4：8) |
|
16. Tūi-lo̍h Ê Lō͘
|
16. 墮落Ê路 |
|
Góa lâi Tâi-oân hit sî 26 hè, siū tiàu ê ji̍t khí chiū kā chōe-chōe pīⁿ-lâng kî-tó, kā 10 lâng kî-tó, ū 5 lâng hó. Ta̍k-ji̍t chiūⁿ soaⁿ-téng, 2-3 tiám cheng-kú lâu kōaⁿ kî-tó, tī ke-n̍i̍h bô hun mî--ji̍t ke-thâu pò͘-tō, ín-chhōa lêng-hûn kàu lé-pài-tn̂g. Ū chi̍t-ji̍t chiap tio̍h tiān-pō. “Lāu-pē gûi-tok tńg-lâi.” Tōa-chúi ê pò-èng tiòng-hong (tn̄g náu-kin), beh sí ê kan-khó͘, kiò góa tńg khì, kūi-tī lāu-pē ê chhn̂g-piⁿ kî-tó kúi-nā ji̍t, lāu-pē hó khí-lâi, ū chi̍t ji̍t i-seng lâi chín-chhat, góa gō͘-kái tùi Siōng-tè ê tiong-sìn, sòa tùi i-seng sit-giân. “Chit khoán tiòng-hong chù-siā chia̍h-io̍h lóng bô kong-hāu, chhiáⁿ lí m̄-bián lâi, kiû Siōng-tè i-tī gōa bô ǹg-bāng, góa beh tùi Ki-tok kî-tó, só͘-í m̄-bián i-seng.” I-seng tōa siū-khì, tōa-tōa tùi-hù ka-cho̍k chhin-chhek, ke-lāi ê lâng tòng bōe-tiâu lāu ba̍k-sái, chit khoán ê cheng-chiàn kè-sio̍k nî-gōa kú. Kàu-bé góa chiū kā i-seng pôe-chōe, siu-khí Sîn-jú ê kî. Koat-sim m̄ ūi pīⁿ-lâng kî-tó, chí-ū thoân hok-im chiū hó, chóng-sī án-ni sī pōe-ge̍k Siōng-tè.
|
我來台灣hit時26歲，受召ê日起就kā chōe-chōe病人祈禱，kā 10人祈禱，有5人好。Ta̍k日chiūⁿ山頂，2-3點鐘久流kōaⁿ祈禱，tī街n̍i̍h無分暝日街頭佈道，引chhōa靈魂到禮拜堂。有chi̍t日接tio̍h電報。「老pē gûi-tok tńg來。」大水ê報應中風(斷腦筋)，beh死ê艱苦，叫我tńg去，跪tī老pē ê床邊祈禱幾nā日，老pē好起來，有chi̍t日醫生來診察，我誤解對上帝ê忠信，sòa對醫生失言。「Chit款中風注射chia̍h藥lóng無功效，請你m̄免來，求上帝醫治外無ǹg望，我beh對基督祈禱，所以m̄免醫生。」醫生大siū-khì，大大對付家族親戚，家內ê人擋bōe-tiâu流目屎，chit款ê爭戰繼續年外久。到尾我就kā醫生陪罪，收起神諭ê旗。決心m̄為病人祈禱，只有傳福音就好，總是án-ni是背逆上帝。 |
|
“In-ūi Siōng-tè ê un-sù kap tiàu lâng lóng bô thè-hóe.” (Lô-má 11:29) Sui ū hô-téng ê khùn-lân, ûi-pōe Siōng-tè ê tiàu-bêng bô lâng siū chiok-hok, lóng pîⁿ-pîⁿ kiâⁿ tūi-lo̍h ê lō͘, sit-lo̍h sìn-gióng, kî-tó bô le̍k-liōng, Siōng-tè ê ōe pau-khì khǹg, chin chiàⁿ sī khó-lîn tūi-lo̍h ê thoân-tō-chiá, chòe jio̍k-io̍k ê lô͘-châi, lêng-hûn bô chū-chú. Siōng-tè pī-pān i-seng io̍h-hng lâi i-tī it-poaⁿ phó͘-thong ê lâng, koh ūi-tio̍h kan-chèng Ki-tok ê koh-oa̍h, lâi kiâⁿ Sîn-jú ê sîn-jiah, nn̄g-hāng lóng sī tùi Siōng-tè chhut, tú chhin-chhiūⁿ chiàⁿ-chhiú kap tò-chhiú. Sîn-jú thoân-tō-chiá tio̍h chun-tiōng i-seng, i-seng iā tio̍h sêng-jîn Sîn-jú ê sîn-jiah. Góa sui-jiân piàⁿ-miā kun-tè Ki-tok, tùi chin-lí ê kng iáu chin so͘-oán, khiàm-kheh tì-hūi, sit-pāi liáu koh sit-pāi. Siūⁿ-khí kè-khì pi-siong ê só͘ chòe, kám-kak bô chu-keh koh chòe thoân-tō-chiá. To̍k-to̍k tī Chú Iâ-so͘ Si̍p-jī-kè ê pó-hui̍h, chòe chi̍t ê chòe khiam-pi ê kiàn-chèng-jîn, lâi hō͘ Chú ēng.
|
「因為上帝ê真正恩賜kap召人lóng無體會。」(Lô-má 11：29)雖有何等ê困難，違背上帝ê召命無人受祝福，lóng平平行墮落ê路，失落信仰、祈禱無力量，上帝ê話包去khǹg，真正是可憐墮落ê傳道者、做肉欲ê奴才、靈魂無自主。上帝備辦醫生藥方來醫治一般普通ê人，koh為tio̍h kan證基督ê koh活，來行神諭ê神跡，nn̄g項óng是tùi上帝出，tú親像正手kap tò手。神諭傳道者tio̍h尊重醫生，醫生也tio̍h 承認神諭ê神跡。我雖然拚命跟tè基督，tùi真理ê光iáu真疏遠，欠格智慧，失敗了koh失敗。想起過去悲傷ê所做，感覺無資格koh做傳道者。獨獨tī主耶穌ê十字架ê寶血，做chi̍t ê最謙卑ê見證人，來hō͘主用。 |
|
“Kè-sit tit-tio̍h sià-bián, chōe-kòa tit-tio̍h jia-khàm--ê, che lâng ū hok-khì.” (Si-phian 32:1)
|
「過失得tio̍h赦免，罪過得tio̍h jia-khàm--ê，che人有福氣。」(詩篇32：1) |
|
17. Beh Hoa Ê Teng-sim
|
17. Beh Hoa Ê燈心 |
|
Góa chin khoài jia̍t khoài léng, ta̍uh-ta̍uh sit-pāi poa̍h-tó, chin-chiàⁿ sī beh hoa ê teng-sim, beh chi̍h8 ê lô͘-úi, chiàu khòaⁿ sui-jiân lōa jia̍t-sim thoân-tō, nā pōe-ge̍k Siōng-tè, put-kò sī teh khí Pa-piat ê thah. Só͘-í sui-jiân iā lōa chōe chéng-chí, iā bô ū lêng-hûn ê siu-sêng, chèng-bêng bô ū Siōng-tè chiok-hok ê chhiú. Boán-chiu sū-piàn í-lâi, khong-khì chiām-chiām hiám-ok, lō͘-piⁿ pò͘-tō hō͘ lâng phah kàu chhùi bōe tín-tāng, in-ūi kóng hui chiàn-lūn hō͘ lâng tùi ke-n̍i̍h kóaⁿ chhut-khì, siūⁿ kóng he m̄-sī pān-hoat, chiū chio tâng-sìn ê pêng-iú chiūⁿ soaⁿ-téng khui pêng-hô te̍k-pia̍t kî-tó-hōe. Ná kî-tó ná ta̍h-ji̍p chōe-ok ê chōng-thāi, kàu-bé chiâⁿ-chòe Tāi Tang-a chiàn-chêng. Tī hit-khoán hoân-ló ê tiong-kan, Sèng-keng ê chin-lí hō͘ chhim-khek ê lêng-tek o͘-àm jia-pè sòa khòaⁿ bōe bêng. Chi̍t bīn chū-jiân-tek lí-kái Sèng-keng ê bûn-jī, si̍t-hêng tī seng-oa̍h, chi̍t bīn thòng-kám su-iàu khah ò-biāu oh lí-kái Siōng-tè ê ōe. Chiū khai-sí tha̍k Bí-kok Sin kàu-hōe Sîn-ha̍k-hāu (New churlh college) ê thong-sìn káng-chō (函授課程). Gō͘-sûn-cheh tek sìn-gióng ê lâng, hoat-kiàn chi̍t khoán chēng-chēng ha̍k-si̍p chin-lí ū úi-tāi ê pang-chān. Chóng-sī che iā bô kúi nî chiū in-ūi tāi-chiàn put-tek-put thêng-chí.
|
我真快熱快冷，ta̍uh-ta̍uh失敗poa̍h倒，真正是beh hoa ê燈心，beh chi̍h8 ê蘆葦，照看雖然lōa熱心傳道，若背逆上帝，不過是teh起Pa-piat ê塔。所以雖然iā lōa chōe種子，也無有靈魂ê收成，證明無有上帝祝福ê手。滿州事變以來，空氣漸漸險惡，路邊佈道hō͘人phah到嘴bōe tín動，因為講非戰論hō͘人tùi街n̍i̍h趕出去，想講he m̄是辦法，就招同信ê朋友chiūⁿ山頂開平和特別祈禱會。Ná祈禱ná踏入罪惡ê狀態，到尾chiâⁿ做大東亞戰爭。Tī hit款煩惱ê中間，聖經ê真理hō͘深刻ê能德烏暗jia-pè sòa看bōe明。Chi̍t面自然的理解聖經ê文字，實行tī生活，chi̍t面痛感需要khah奧妙oh理解上帝ê話。就開始讀美國新教會神學校(New churlh college) ê通信講座。Gō͘-sûn節得信仰ê人，發見chi̍t款靜靜學習真理有偉大ê幫贊。總是che也無幾年就因為大戰不得不停止。 |
|
Teng-iōng-lēng (徵用令) lâi lah, kî-tó Siōng-tè koat-sim khì Jiáu-a. 10 gōa chiah ê un-sàng chûn, koh ū chiâⁿ 10 chiah ê hō͘-ōe chûn, kiâⁿ oan-lâi oan-khì ê sòaⁿ-lō͘, ǹg Sin-ka-pho chhut hoat. Bûn-si chhut-hoat ê sî chiū siū-tio̍h B29 ê po̍k-kek, hiám chi̍t-hiám, thêng tī Ko-hiông káng ê sî, koh siū tio̍h B29 ê kong-kek, chòng-lia̍t ê khong, lio̍k iā chiàn, kiaⁿ kàu phòa-táⁿ. Ta̍k ê-hng ê chiâm-chúi lām kéng-pò iā chin thang kiaⁿ, chûn chi̍t chiah chi̍t chiah teh tîm lo̍h khì, ji̍t--sî tī kah-pán téng hui-ki ê si̍t-ē tha̍k Sèng-keng, mî--sî 2 tiám khí-lâi ǹg hái-bīn kî-tó kàu thiⁿ-kng, bêng-chai nā m̄ sī Chú ê pó-siú koat-toàn bē tit an-jiân kàu ūi. “Chú ah, Lí kéng-tiàu góa sī beh ho̍k-heng góa, chit ê tāi-jīm iáu bōe oân, Chú ah! Kiû Lí pó-siú góa kàu oân-sêng chit ê thian-bēng.” Ta̍k-mî ǹg thiⁿ án-ni kî-tó. Só͘ chhun bô kúi chiah chûn ji̍p Sin-ka-pho káng ê sî oán-jiân ná bîn-bāng, bē-kìm-tit kám-siā o-ló Siōng-tè. Chek-sî khì Pit-sū-tāi kàu-hōe siú lé-pài, hiàn kám-siā ê hiàn-kim.
|
徵用令來lah，祈禱上帝決心去Jiáu-a。10外隻ê運送船，koh有chiâⁿ 10隻ê護衛船，行彎來彎去ê線路，ǹg新加坡出發。Bûn-si出發ê時就受tio̍h B29 ê po̍k-kek，險chi̍t險，停tī高雄港ê時，koh受tio̍h B29 ê攻擊，chòng列ê khong，lio̍k也戰，驚到破膽。Ta̍k ê-hng ê潛水艦警報也真thang驚，船chi̍t隻chi̍t隻teh沉落去，日時tī甲板頂飛機ê翅下讀聖經，暝時2點起來ǹg海面祈禱到天光，明知若m̄是主ê保守決斷bē得安然到位。「主ah，你kéng召我是beh復興我，chit ê大任iáu bōe完，主ah！求你保守我到完成chit ê天命。」Ta̍k暝ǹg天án-ni祈禱。所chhun無幾隻船入新加坡港ê時宛然ná眠夢，bē禁得感謝o-ló上帝。即時去Pit-sū-tāi教會守禮拜，獻感謝ê獻金。 |
|
Tī Jiáu-a tio̍h siū lông-gia̍p chí-tō-oân kap tóe-kî kun-sū kàu-liān, in-ūi kè-thâu jia̍t-sim phah-piàⁿ, sòa siong-tio̍h hia̍p-kut, tio̍h ji̍p-īⁿ, koh-khah khó-siong sī chiap-tio̍h pāi-chiàn ê siau-sit, tī pīⁿ-sek ê chi̍t-kak chhám-chheh kî-kiû Siōng-tè, chit sî Chú ê ōe; “Kiáⁿ ah! Bo̍k-tit ūi-tio̍h pāi-chiàn lâi pi-siong, tio̍h siūⁿ chin-si̍t sī sèng-lī, tio̍h chai bô Ki-tok ê kun kok chú-gī soah lah, sin ê chó͘-kok khai-sí lah, lí tio̍h ūi án-ni kî-tó.” Bô jōa-kú goán lóng chòe pāi-chiàn kok-bîn, siu-iông tī soaⁿ-téng ê chi̍p-tiong-iâⁿ, cha-ji̍t hiah ióng-khí, kin-á-ji̍t chiah bô téng-bīn, góa ji̍t--sî tī ko-phi chhiū-kha tha̍k Sèng-keng, mî--sî kia̍h thâu khòaⁿ lâm si̍p-jī ê chhiⁿ, pek-chhiat kî-tó, kiû Chú ín-chhōa thâu-chêng ê lō͘-chām. Chi̍t mî bāng-kìⁿ pe̍h-thâu-mn̂g ê lāu-lâng the̍h chi̍t kńg chheh hō͘ góa kóng “Lí chòe tōa ê khoat-tiám sī kip-sèng, lí nā kín-sīn chit ê chiū beh chòe chheng-liân ê chí-tō-chiá.” Góa bô ài phah-pâi (Mahjong) ài hián-chhut kî-tó, tha̍k Sèng-keng Ki-tok-tô͘ ê hó bô͘-iūⁿ, chiū lâu-kōaⁿ phah-piàⁿ chò kang bô-thêng. In-ūi beh chō chúi-lō, chiū chiūⁿ soaⁿ khì chhò tek, kng jia̍t-tài ê tek (Ji̍t-pún-tek ê 10 gōa ki tōa) kng kàu tó-lo̍h-khì, sòa khak hui̍h, khai-sí léng-ho̍k ê liâu-ióng seng-oa̍h.
|
Tī Jiáu-a tio̍h受農業指導員kap短期軍事訓練，因為過頭熱心phah拚，sòa傷tio̍h hia̍p骨，tio̍h入院，koh-khah khó傷是接tio̍h敗戰ê消息，tī病室ê chi̍t角chhám冊祈求上帝，chit時主ê話；「Kiáⁿ ah！莫得為tio̍h敗戰來悲傷，tio̍h想真實是勝利，tio̍h知無基督ê軍國主義soah lah，新ê祖國開始lah，你tio̍h為án-ni祈禱。」 無jōa久goán lóng做敗戰國民，收容tī山頂ê集中營，cha日hiah ióng起，今á日chiah無頂面，我日時tī ko-phi樹kha讀聖經，暝時kia̍h頭看南十字ê星，迫切祈禱，求主引chhōa頭前ê路站。Chi̍t 暝夢見白頭毛ê老人the̍h chi̍t捲冊hō͘我講「你最大ê缺點是急性，你若謹慎chit ê就beh做青年ê指導者。」 我無愛phah牌(Mahjong)愛顯出祈禱，讀聖經基督徒ê好模樣，就流kōaⁿ phah拚做工無停。因為beh造水lō，就chiūⁿ山去chhò竹，kng熱帶ê竹(日本竹ê 10外支大) kng到倒落去，sòa khak血，開始冷ho̍k ê療養生活。 |
|
Bô kú chiūⁿ chûn lēng kàu, tùi tang-pō͘ Jiáu-a chē chûn se̍h kàu Sin-ka-kho, tùi hia ǹg chó͘-kok chhut-phâng, kā Bí-kok chiah ê chûn bô thang-á àm bong-bong ná tōe-hā-sek, lo̍h chûn-chhng ū chhu tiū-chháu ná gû-tiâu, hia chiū-sī goán ê chhn̂g-pho͘, Sin-ka-pho ê joa̍h sī 100 tō͘ khah ke, só͘-í tòa hit khoán chûn chhn̂g bô su chē tī tē-ge̍k ê hé-ni̍h, kàu Tāi-tek (大竹) káng ê tiong-kan só͘ khòaⁿ chó͘-kok ê hong-hòe, put-kìm sim-sng. Tùi hé-chhia-lāi khòaⁿ-tio̍h Kóng-tó (廣島) khó-lîn ê chêng-hêng, put-tek-put pi-thàn ngó͘-siōng kok, kun-kok ê boa̍t-lō͘. Chú Iâ-so͘ tùi Ka-ná-soaⁿ téng ūi-tio̍h Iâ-lô͘-sat-léng lâu ba̍k-sái thó͘-khùi, nā sī Iû-thài lâng m̄ bat Chú ê chí-ì chiong I tèng si̍p-jī-kè, in ê boa̍t-lō͘, iā sī án-ni. Ta̍k ê chhia-chām móa-móa to sī bóe-bōe ê lâng, chhēng ôe tùi hé-chhia ê thang-á chhut-ji̍p, tī chó͘-kok to-gī oân-choân siau-bô, chí-ū san-hô chiàu kū tī-teh, m̄-sìn Sèng-keng ê kok-bîn si̍t-chāi khó-lîn.
|
無久chiūⁿ船令到，tùi東部Jiáu-a坐船se̍h到新加坡，tùi hia ǹg祖國出帆，kā美國chiah ê船無窗á暗bong-bong ná地下室，落船艙有chhu稻草ná牛tiâu，hia就是goán ê床舖，新加坡ê joa̍h是100度khah低，所以tòa hit款船艙無輸坐tī地獄ê火ni̍h，到大竹港ê中間所看祖國ê hong-hòe，不禁心酸。Tùi火車內看tio̍h廣島可憐ê情形，不得不悲嘆偶像國、軍國ê末路。主耶穌tùi Ka-ná山頂為tio̍h耶路撒冷流目屎吐氣，若是猶太人m̄ bat主ê旨意將I釘十字架，in ê末路，也是án-ni。Ta̍k ê車站滿滿都是買賣ê人，穿鞋tùi火車ê窗á出入，tī祖國道義完全消無，只有山河照舊tī-teh，m̄信聖經ê國民實在可憐。 |
|
“Kong-gī hō͘ pang-kok seng-koân, kìⁿ ū chōe-ok ê peh-sìⁿ siū lêng-jio̍k.” (Chim-giân 14:34) Góa keng-kè beh hoa ê teng-sim ê sìn-gióng seng-oa̍h, sī Siōng-tè só͘ hō͘ góa thiⁿ lâi ê kàu-hùn, kap hêng-hoa̍t. Si̍t-chāi sī khang-hi khó-lîn ê thoân-tō-chiá, put-phòe siū Siōng-tè ê lô͘-po̍k Lûn-tun Sèng-keng ha̍k-īⁿ-tiúⁿ Khá-tah (Kater) Bo̍k-su ê àn-chhiú lé.
|
「公義hō͘邦國seng-koân，見有罪惡ê百姓受凌辱。」(Chim-giân 14：34) 我經過beh hoa ê燈心ê信仰生活，是上帝所hō͘我添來ê教訓，kap刑罰。實在是空虛可憐ê傳道者，不配受上帝ê奴僕倫敦聖經學院長Khá-tah (Kater)牧師ê àn手禮。 |
|
18. Chài Khí
|
18. 再起 |
|
Tng-sî ê Ji̍t-pún kok-bîn, ūi-tio̍h chi̍t-tǹg-chia̍h cheng-thâu kha̍p-hia̍h ê chêng-hêng, si̍t-chāi chin khó-lîn. Ū chi̍t-ji̍t khòaⁿ-kìⁿ kui-kûn ê Ji̍t-pún hū-jîn tī pùn-sò-tui teh chhiau teh chhē sím-mi̍h, tē 3 kok-bîn phòe-kip ka-la̍uh chham tī pùn-sò ê phû-tô-koaⁿ, in tī hia teh chhiau-chhē, bē-su teh chhē pó-chio̍h.
|
Tng時ê日本國民，為tio̍h chi̍t頓chia̍h爭頭kha̍p靴ê情形，實在真可憐。有chi̍t日看見kui群ê日本婦人tī pùn-sò堆teh chhiau teh chhē sím-mi̍h，第3國民配給ka-la̍uh chham tī pùn-sò ê葡萄koaⁿ，in tī hia teh chhiau-chhē，bē輸teh chhē寶石。 |
|
“Pháiⁿ lâng bô ū pêng-an.”
|
「Pháiⁿ人無有平安。」 |
|
“Hoān-chōe ê lêng-hûn tio̍h sí.”
|
「犯罪ê靈魂tio̍h死。」 |
|
“Kia̍h to--ê beh in-ūi to lâi bia̍t-bô.”
|
「Kia̍h刀--ê beh因為刀來滅無。」 |
|
Sèng-keng ê ōe hô-téng ê hiān-si̍t, thòng-kám hiān-kim chiàⁿ sī ūi-tio̍h hok-im phoe-miā kau-chiàn ê sî. Góa ūi-tio̍h seng-oa̍h, chòe ìn-soat ê gōa-kau, khai-sí lō͘-piⁿ pò͘-tō, sòa pang-chān chhī-lāi ê bó͘ kàu-hōe, siūⁿ ài hō͘ khah chōe lâng ū hūn Ki-tok ê hok-im. Chiū hóng-būn kang-chhiúⁿ, ha̍k-hāu, pīⁿ-īⁿ, khu-liû-só͘ téng lâi thoân hok-im. Tùi Sam-lêng (三菱) tiān-ki ê chit-gia̍p ha̍k-hāu 300 ê ha̍k-seng jia̍t-jia̍t thoân-tō, chóng-sī it-khài bô siu siā-lé. Tng sî góa tòa tī peng-sià ê hong-khong-tōng, mî--sî ū chin-chōe giâ-kang, iû-iân (蚰蜒, kap giâ-kang siāng-lūi) ê khó͘-chhó͘, nā lo̍h hō͘ chúi ōe lâu-ji̍p lâi, mî-sî bē khùn-tit, tio̍h ēng poa̍h-tháng hò͘ chúi chhut khì, chóng-sī Siōng-tè só͘ pī-pān chi̍t-keng siok-sià ū kám-siā put-chīn ê un-sù. Góa ê si̍p-koàn sī pòaⁿ-mi khí-lâi kî-tó, ū chi̍t-mî 2 tiám-cheng kî-tó ê sî, Chú kā góa kóng “Lí tio̍h khai-pān Sèng-keng ha̍k-hāu, ióng-sêng thoân-tō-chiá, thang siu-sêng ê chōe, kang lâng chió, Góa kiám bô bēng-lēng lí, tio̍h ióng-kám, tio̍h chòng-táⁿ.” Keh chá-khí góa chiong chit ê sū tùi hū-jîn-lâng kóng iau-kiû i kî-tó. Bô chîⁿ, bô kiàn-tio̍k-bu̍t, koat-sim tùi bô pòaⁿ-hāng lâi ióng-sêng thoân-tō-chiá, chhin-chhiūⁿ Chú Iâ-so͘ kà-sī 12 ê ha̍k-seng ê khoán. Siōng-tè í-gōa bô só͘ óa-khò, it-khài bo̍h-tit khòa-lū, to̍k-to̍k bān-sū tio̍h ēng kî-tó khún-kiû kap kám-siā, chiong lín só͘ kiû--ê pâi-lia̍t tī Siōng-tè. (Hui-li̍p-pí 4:6)
|
聖經ê話何等ê現實，痛感現今正是為tio̍h福音phoe命交戰ê時。我為tio̍h生活，做印刷ê外交，開始路邊佈道，sòa幫贊市內ê某教會，想愛hō͘ khah chōe人有份基督ê福音。就訪問工廠、學校、病院、拘留所等來傳福音。Tùi三菱電機ê職業學校300 ê學生熱熱傳道，總是一概無收謝禮。Tng時我tòa tī兵舍ê防空洞，暝時有真chōe蜈蚣、蚰蜒(ka蜈蚣siāng類) ê苦楚，若落雨水ōe流入來，暝時bē khùn得，tio̍h用poa̍h桶hò͘水出去，總是上帝所備辦chi̍t間宿舍有感謝不盡ê真正恩賜。我ê習慣是半暝起來祈禱，有chi̍t暝2點鐘祈禱ê時，主kā我講「你tio̍h開辦聖經學校，養成傳道者，thang收成ê chōe，工人少，我kiám無命令你，tio̍h勇敢、tio̍h壯膽。」隔早起我將chit ê事tùi 婦jîn人講要求i祈禱。無錢、無建築物，決心tùi無半項來養成傳道者，親像主耶穌教示12 ê學生ê款。上帝以外無所óa靠，一概莫得掛慮，獨獨萬事tio̍h用祈禱懇求kap感謝，將lín所求--ê排列tī上帝。(Hui-li̍p-pí 4：6) |
|
Chóng-sī tī 4 thiap-pòaⁿ ê hong-khong-tōng beh khui Sèng-keng ha̍k-hāu, si̍t-chāi sī gōng-siūⁿ, kóng-bêng sū-chêng sì-kòe pài-thok chioh chi̍t-keng sio bô liáu ê chhù, tng-sî siāng khiàm chhù (房荒), só͘-í chi̍t ê bô miâ ê thoân-tō-chiá lóng bô lâng beh chhap góa. Tùi thó͘-khùi ê tiong-kan khiā khí-lâi, koh ha̍k-si̍p khiam-pi ê lō͘, tùi Siōng-tè ê pang-chān, tùi Gu-lé (Gray) sian-siⁿ tit-tio̍h chi̍t chō thian-bō͘ (天幕) chiū tī Ki-tok-kàu sin-bûn kóng kò bō͘-chi̍p ha̍k-seng. Chì-goān chiá ū 70 lâng, ēng kî-tó lâi soán 6 lâng. Chiah ê lâng ū tùi Chheng-sim (青森) ū ê tùi Lo̍k-jî-tó (鹿兒島) tùi choân-kok ta̍k só͘-chāi lâi--ê, lóng hia̍p-le̍k chòe í-á, chòe-bîn-chhn̂g, tah thian-bō͘, āu-pòaⁿ khǹg 4 tòe bîn-chhn̂g chòe siu-ióng seng ê khùn-pâng, chêng-pòaⁿ chòe kàu-sek kiam chi̍p-hōe-só͘, kā chi̍t ê kiat-hu̍t hoān-chiá kî-tó, chiâⁿ-chòe kî-iân (奇緣) chi̍t ê sòng-hiong lâng chiong sin-khí 8 thiap ê peng-pang (Barrack) bô tiâu-kiāⁿ chioh goán. Tùi che it-chhè ê un-hūi goán tâng-sim jia̍t-jia̍t hiàn kám-siā ê kî-tó.
|
總是tī 4 thiap半ê防空洞beh開聖經學校，實在是gōng想，講明事情sì-kòe拜託借chi̍t間燒無了ê厝，tng時siāng欠厝，所以chi̍t ê無名ê傳道者lóng無人beh chhap我。Tùi吐氣ê中間khiā起來，koh學習謙卑ê路，tùi上帝ê幫贊，tùi Gu-lé (Gray)先生得tio̍h chi̍t座天幕就tī基督教新聞廣告募集學生。志願者有70人，用祈禱來選6人。Chiah ê人有tùi青森有ê tùi鹿兒島tùi全國ta̍k所在來--ê，lóng協力做椅á、做眠床、搭天幕，後半khǹg 4 tòe眠床做修養身ê khùn房，前半做教室兼集會所，kā chi̍t ê結核患者祈禱，chiâⁿ做奇緣chi̍t ê sòng-hiong人將新起8 thiap ê peng-pang (Barrack) 無條件借goán。Tùi che一切ê恩惠goán同心熱熱獻感謝ê祈禱。 |
|
Téng-po͘ tha̍k Sîn-hak, ē-po͘ tio̍k-ka hóng-būn, phó͘-kip Sèng-keng, àm-sî ta̍k-àm kè-sio̍k thian-bō͘ pò͘-tō. Chia̍h-mi̍h put-kò sī thang chí-ki ê thêng-tō͘, chóng-sī tāi-ke saⁿ pun-pheⁿ chia̍h lóng bô lâng kóng put-chiok, tī sòng chiong ê tiong-kan chiong só͘ ū ê chîⁿ saⁿ-pun chòe só͘-hùi, lóng bô siū chia̍h-hùi á-sī ha̍k-hùi. Chú kóng lí khòaⁿ khong-tiong ê pe-chiáu, khòng-iá ê pek-ha̍p-hoe, goán oân-choân sìn-khò chit ê Chú Ki-tok.
|
頂po͘讀神學，ē-po͘逐家訪問，簿記聖經，暗時ta̍k暗繼續天幕佈道。Chia̍h-mi̍h不過是thang止ki ê程度，總是大家saⁿ分pheⁿ chia̍h lóng無人講不足，tī sòng chiong ê中間將所有ê錢saⁿ分做所費，lóng無受chia̍h費á是學費。主講你看空中ê飛鳥，曠野ê百合花，goán完全信靠chit ê主基督。 |
|
“Kî-tiong bô khiàm-kheh ê lâng.” (Sù-tô͘ Hēng-toān 4:34) Gu-lé (Gray) sian-siⁿ sī kî-tó ê sèng-tô͘, siông-siông siá-phoe bián-lē goán “tio̍h sèng-kiat, tio̍h siū Sîn chhiong-móa, tio̍h tui-kiû ho̍k-heng,” koh kià chōe-chōe i-ho̍k hō͘ goán, chiàu ta̍k lâng só͘ su-iàu hun-phòe, koh bōe lâi chòe hé-si̍t. In-ūi chám-jiân khó-khoan ê thoân-tō, só͘-í sin-bûn kì-chiá lâi hóng-būn góa khan tī sin-bûn. Chóng-sī góa iáu-kú tōa-tōa su-iàu sèng-kiat, chōe ê kun iáu tèng-tiâu tī góa lāi-bīn, ù-òe ê io̍k-chêng iáu ū tōa sè-le̍k teh koán-hat góa, sui-jiân lâu-kōaⁿ chīn-la̍t chí-ū Siōng-tè chai, Chú chhun I Sèng Sîn ê kiàm kat-lé góa lāi-bīn ê lâng, hō͘ góa ha̍p I ê lō͘-ēng. Ū chi̍t-ji̍t tī thian-bō͘ siū sèng-chhan, chhin-chhiūⁿ Sat-léng ê chè-si Be̍k-ki-sé-tek hō͘ A-pek-la̍h-hán ê sèng-chhan, chhù-lāi kî-tó kóng “Góa sī bî-sòe, chhin-chhiūⁿ piáⁿ-chhùi, chhiáⁿ tē-it sòe ê un-hūi hō͘ góa” chiū the̍h tē-it sòe-tè ê piàⁿ, nā-sī êng-kng chhàn-lān ê Chú hián-hiān I ê téng pòaⁿ sin, i lâu ba̍k-sái án-ni kiàn-chèng. Nā-sī tī góa ê sim-té ū thiaⁿ-kìⁿ Chú ê siaⁿ. “Kiáⁿ ah! Góa si̍p-jī-kè ê poe lí ōe siū mah?” Góa chin tōa khiam-pi kóng “Chú ah! Hit ê khó͘-lān ê poe hō͘ góa, góa hoaⁿ-hí sêng-siū.”
|
「其中無欠缺ê人。」(使徒行傳4：34) Gu-lé (Gray)先生是祈禱ê聖徒，常常寫phoe勉勵goán「tio̍h聖潔、tio̍h受神充滿、tio̍h追求復興，」koh寄chōe-chōe衣服hō͘ goán，照ta̍k人所需要分配，koh賣來做伙食。因為chám然khó-khoan ê傳道，所以新聞記者來訪問我刊tī新聞。總是我iáu-kú大大需要聖潔，罪ê kun iáu釘tiâu tī我內面，污穢ê欲望iáu有大勢力teh管轄我，雖然流kōaⁿ盡力只有上帝知，主chhun I聖神ê劍kat-lé我內面ê人，hō͘我ha̍p I ê路用。有chi̍t日tī天幕受聖餐，親像Sat-léng ê祭司Be̍k-ki-sé-tek hō͘ A-pek-la̍h-hán ê聖餐，厝內祈禱講「我是bî-sòe，親像piáⁿ嘴，請第一細ê恩惠hō͘我」就the̍h第一細tè ê餅，若是榮光燦爛ê主顯現I ê頂半身，i流目屎án-ni見證。若是tī我ê心底有聽見主ê聲。「Kiáⁿ ah！我十字架ê杯你ōe受mah？」我真大謙卑講「主ah！Hit ê苦難ê杯hō͘我，我歡喜承受。」 |
|
Teh siūⁿ sī sím-mi̍h sū? Chú beh hō͘ góa ê khó͘-poe sī sím-mi̍h? Chiū-sī kàu-taⁿ m̄-bat keng-giām tio̍h, hui-siông thòng-khó͘ sèng-giân (Siōng-tè ê ōe) ê chhì-liān, kiat-chēng lêng-hûn ê hé-iām. Tng-sî ū chi̍t ê chheng-liân khòaⁿ Ki-tok-kàu sin-bûn lâi beh ji̍p-ha̍k, chit ê chheng-liân ê sin-hūn sī chiân kho 2 hoān, iā bē thang tńg-khì kìⁿ pē-bú ê. Chóng-sī kā i kóng ū chiân-kho ê lâng m̄-chún ji̍p-o̍h, bô-lūn án-chóaⁿ kā i kóng to m̄ lī-khui, tùi án-ni góa chiū kā chòe pó-chèng-jîn hō͘ i khì iû-chhat-tiàm chia̍h thâu-lō͘, chóng-sī m̄-khì iû-chhat-tiàm, chài saⁿ ài kiû hō͘ i ji̍p-o̍h, bōe kham-tit i ko͘-chiâⁿ chiū chún i ji̍p-o̍h. Án-ni siu-ióng-seng pìⁿ chòe 7 ê lâng, hun-chòe 2 ūi tòa, khai-sí siū-gia̍p. Bô lōa-kú chit ê chheng-liân siū iú-he̍k koh chòe pháiⁿ-sū, sim bê loān sòa phah chi̍t ê siu-ióng-seng. Tùi án-ni ha̍k-īⁿ koat-tēng thêng-pān, hō͘ ha̍k-seng lóng tńg-khì.
|
Teh想是sím-mi̍h事？主beh hō͘我ê苦杯是sím-mi̍h？就是到taⁿ m̄-bat經驗tio̍h，非常痛苦聖言ê試煉，kiat-chēng靈魂e火焰。Tng時有chi̍t ê青年看基督教新聞來beh入學，chit ê青年ê身份是前科2犯，也bē thang tńg去見pē母ê。總是kā i講有前科ê人m̄准入學，無論án-chóaⁿ kā i講都m̄離開，tùi án-ni我就kā做保證人hō͘ i去油漆店chia̍h頭路，總是m̄去油漆店，再saⁿ愛求hō͘ i入學，bōe堪得i ko͘-chiâⁿ就准i入學。Án-ni修養生pìⁿ做7 ê人，分做2位tòa，開始受業。無lōa久chit ê青年受誘惑koh做pháiⁿ事，心迷亂sòa phah chi̍t ê修養生。Tùi án-ni學院決定停辦，hō͘學生lóng tńg去。 |
|
Chiông-chêng Kó͘-kok (古谷) hiaⁿ i-seng khòaⁿ i chòe choa̍t-chèng teh thèng-hāu sí, tit-tio̍h i-hó, chit pái ū hiàn tōa pit ê chîⁿ, só͘-í hō͘ chiah ê hiaⁿ-tī lóng ū kàu-gia̍h ê lō͘-hùi. Goán chin thòng-sim, kiû Siōng-tè lîn-bín; teh thèng-hāu chài khai-pān ê ji̍t. Nā-sī chit ê chheng-liân ná pháiⁿ, sòa kia̍h to chiong goán só͘ ū ê chîⁿ kap mi̍h lóng chhiúⁿ khì, chòe-āu ê koan-thâu kéng-chhat chhut-chhiú, chheng-liân koaiⁿ lo̍h kaⁿ. Sui-jiân taⁿ bô pòaⁿ-hāng, iáu-kú jia̍t-sim kî-tó ǹg-bāng chit ê chheng-liân ōe hóe-kái, ah! Si̍p-jī-kè si̍t-chāi chin tāng.
|
Chiông-chêng Kó͘-kok兄醫生看i做絕症teh thèng候死，得tio̍h醫好，chit pái有獻大筆ê錢，所以hō͘ chiah ê兄弟lóng有夠額ê路費。Goán真痛心，求上帝憐憫；teh thèng候再開辦ê日。若是chit ê青年ná pháiⁿ，sòa kia̍h刀將goán所有ê錢kap mi̍h lóng搶去，最後ê關頭警察出手，青年關落監。雖然taⁿ無半項，iáu-kú熱心祈禱ǹg望chit ê青年ōe悔改，ah！十字架實在真重。 |
|
“Góa bat kap Ki-tok tâng tèng Si̍p-jī-kè, góa iáu kú teh oa̍h, m̄ sī iû-goân góa, chiū-sī Ki-tok tiàn-tī góa teh oa̍h.” (Ka-lia̍p-thài 2:20) Pó-lô chit-khoán ê sìn-gióng kò-pe̍k, chiâⁿ-chòe góa hiān-sî ê kò-pe̍k, chi̍t-ji̍t kúi 10 pái ná liām chiah ê ōe ná kî-kiû Siōng-tè, kap chhù-lāi saⁿ-kap kìm-chia̍h kî-tó. Tāi-pi̍t siám-pī Ap-sa-liông lo̍h-lān, goán chit-sî hiahN phōe lâi pī-pān. Mî--sî kúi-nā pái in-ūi kè-thâu ê kan-khó͘ sim-loān kàu beh choa̍t-khùi thong-mî bē khùn-tit. Lōa chōe sin-bûn kì-chái ūi-tio̍h beh the̍h chu-liāu, sì-kòe chhē goán, sin-bûn teng-chhut m̄ hó ê kì-sū, goán chha-put-to bô bīn thang koh kìⁿ lâng. Ū lâng kóng “Chó-tîn pòe-āu iû-goân ū o͘-àm, chiah ū chit hôe sū.” Chin chiàⁿ sī án-ni, góa sī hui-siông am-cham ê iá-sim-ka, hi-êng-sim tāng, khó͘-o͘N3 tē-ge̍k ê lô͘-châi, só͘-í tio̍h sêng-siū Siōng-tè ê hêng-hoa̍t ê kiàm, sím-phòaⁿ ê kiàm, kiat-chēng ê si̍p-jī-kè. “Chú ah, Lí sī hó, só͘ kiâⁿ iā sī hó.” (Si 119:68)
|
「我bat kap基督同釘十字架，我iáu kú teh活，m̄是iû-goân我，就是基督tiàn-tī我teh活。」(Ka-lia̍p-thài 2：20) Pó-lô chit款ê信仰告白，chiâⁿ做我現時ê告白，chi̍t日幾10 pái ná唸chiah ê話ná祈求上帝，kap厝內saⁿ-kap禁chia̍h祈禱。Tāi-pi̍t閃避Ap-sa-liông落難，goán chit時hiahN被來備辦。暝時幾nā pái因為過頭ê艱苦心亂到beh絕氣thong暝bē khùn得。Lōa chōe新聞記者為tio̍h beh the̍h資料，sì-kòe chhē goán，新聞登出m̄好ê記事，goán差不多無面thang koh見人。有人講「Chó-tîn背後iû-goân有烏暗，chiah有chit回事。」真正是án-ni，我是非常am-cham ê野心家、虛榮心重、可惡地獄ê奴才，所以tio̍h承受上帝ê刑罰ê劍，審判ê劍，kiat-chēng ê十字架。「主ah，你是好，所行也是好。」(Si 119：68) |
|
19. Iâ-hô-hoa Í-le̍k
|
19. 耶和華Í-le̍k |
|
Thian-bō͘ tī chi̍t só͘-chāi tah pòaⁿ-nî, tang-thiⁿ kàu chiū siu khí-lâi. Tùi Siōng-tè ê un-hūi chhun-thiⁿ ha̍k-īⁿ chiū koh khai-sí, tī 4 thiap ê pâng-keng tha̍k-chheh, siú lé-pài, tī ke-lō͘ lō͘-piⁿ pò͘-tō, lóng bô lâng kóng put-pêng, chi̍t keng lé-pài-tn̂g sī ná bōng-tōng (calacombs, chho͘-tāi ê kàu-hōe tng Lô-má tè-kok tōa khún-tio̍k ê sî, sìn-tô͘ chiū bi̍h tī bōng-tōng lāi lé-pài) ê hong-khong-hô, 10 gōa lâng chiū tīⁿ khí-lâi, kan-ta hōe-chiòng ê chhoán-khùi, chhù-lāi to ōe hō͘ hip-joa̍h. Bû-ì tiong tùi Siōng-tè ai-kiû “Siúⁿ-sù chhù-the̍h” chit sî khí tāi-ke kî-kiû lâng teh chiok-hok, lōa chōe lâng kìm-chia̍h thang ji̍t tī Mô͘-iâ-soaⁿ (摩耶山) kî-tó, á-sī thong-mî tī soaⁿ-lāi kî-kiû Siōng-tè, chiah ê hiaⁿ-tī kî-tó kàu sau-siaⁿ, iáu-kú piàⁿ-miā teh kî-tó, tì-kàu kè-lō͘-lâng thêng-kha lâi thiaⁿ, kéng-koaⁿ lia̍h hún sī sat-jîn sū-kiāⁿ chù-sîn teh thiaⁿ. Tui-kiû hóe-kái kap sèng-kiat, tāi-ke lóng bē kì-tit chit sè-kan, it-ti̍t chìn-chêng ǹg thian-tn̂g. Ū chi̍t ji̍t chi̍t ê pêng-iú chhiáⁿ góa khì biān-hōe, sī chi̍t ūi bī-sìn-chiá si̍p-gia̍p-ka siū Siōng-tè kám-tōng. “Lín jia̍t-sim teh chong-kàu ūn-tōng, bô chhù chin khó͘-sim ho͘N3! Lóng-tî lō͘ (籠池通) tī iûⁿ-chhâi ha̍k-īⁿ ê hāu-sià, khì khòaⁿ-māi, nā hó chiū poaⁿ ji̍p-khì.”
|
天幕tī chi̍t所在搭半年，冬天到就收起來。Tùi上帝ê恩惠春天學院就koh開始，tī 4 thiap ê房間讀冊，siú禮拜，tī街路邊佈道，lóng無人講不平，chi̍t間禮拜堂是ná墓tōng (calacombs，初代ê教會tng羅馬帝國大khún-tio̍k ê時，信徒就bi̍h tī墓tōng內禮拜) ê防空壕，10外人就tīⁿ起來，kan-ta會眾ê喘氣，厝內都ōe hō͘ hip-joa̍h。無意中對上帝哀求「賞賜厝宅」chit時起大家祈求人teh祝福，lōa chōe人禁chia̍h thang日tī摩耶山祈禱，á是thong暝tī山內祈求上帝，chiah ê兄弟祈禱到sau聲，iáu-kú拚命teh祈禱，致到過路人停kha來聽，警官lia̍h hún是殺人事件注神teh聽。追求悔改kap聖潔，大家lóng bē記得chit世間，一直進前ǹg天堂。有chi̍t日chi̍t ê朋友請我去面會，是chi̍t位未信者實業家受上帝感動。「Lín熱心teh宗教運動，無厝真苦心ho͘N3！籠池通tī iûⁿ-chhâi學院ê校舍，去看māi，若好就搬入去。」 |
|
“Góa bô chîⁿ bô hoat-tō͘.”
|
「我無錢無法度。」 |
|
“Bô chîⁿ bô iàu-kín, nā ū chîⁿ chiah chōe chió hêng.” Chin-chiàⁿ tī Siōng-tè ê soaⁿ ū pī-pān Iâ-lō͘-sat-léng ê tiān. Tōa kám-siā o-ló Siōng-tè, chheng-khì sèng-tiān, iûⁿ-chhâi ha̍k-īⁿ thêng-pān, chòe thiàu-bú-tiûⁿ, sì-kè chin lah-sap, ná kî-tó ná chheng-sàu, sòa keh-keng hun chòe ha̍k-īⁿ kap lé-pài-tn̂g. Í-toh, mn̂g-thang kî-thaⁿ ta̍k-hāng lóng goán ka-kī chòe. Si̍t-chāi sī khoài-lo̍k ê thian-kok chok-gia̍p. Chóng-sī goán sī Ki-tok-tô͘, ū kám-kak tio̍h hêng-chè ê tāng-tàⁿ. Khai-sí “Kiû Chú siúⁿ-sù” iô-tāng thian-pâng ê kî-tó. Ūi-tio̍h chit keng chhù, ūi-tio̍h thó͘-tōe, kap bóe keh-piah ê tē, tián-khui kìm-chia̍h kî-tó, tōa un-hūi ê Chú ēng thun-lún thiaⁿ goán ê kî-tó, jia̍t-jia̍t ê hiàn-kim saⁿ sòa lâi, āi sī tùi kok-gōa lâi hiàn--ê, tùi bí-àng kàu tāu-iû, iâm lóng khang-khang sī siông-sū, sòng-hiong ê seng-oa̍h iā koàn-sì, chia̍h-mi̍h chí ū chhin-chhiūⁿ Í-lī-a sìn-khò siōng-tè chhe o͘-a lâi kiong-kip, che sī goán ê ji̍t-siông seng-oa̍h. Jia̍t-jia̍t ê lō͘-piⁿ thoân-tō, Chú-ji̍t-o̍h ha̍k-seng ū 300 lâng í-siōng, sī chin khó͘-koan ê thoân-tō hong-kéng. “Siōng-tè beh ka-kī pī-pān sio-chè ê iûⁿ-ko.” (Chhòng-sè-kì 22:8)
|
「無錢無要緊，若有錢chiah chōe少還。」真正tī上帝ê山有備辦耶路撒冷ê殿。大感謝o-ló上帝，清氣聖殿，iûⁿ-chhâi學院停辦，做跳舞埕，sì-kè真lah-sap，ná祈禱ná清掃，sòa隔間分做學院kap禮拜堂。椅桌、門窗其他ta̍k項lóng goán ka-kī做。實在是快樂ê天國作業。總是goán是基督徒，有感覺tio̍h還債ê重擔。開始「求主賞賜」搖動天房ê祈禱。為tio̍h chit間厝，為tio̍h土地，kap買隔壁ê地，展開禁chia̍h祈禱，大恩惠ê主用吞lún聽goán ê祈禱，熱熱ê獻金saⁿ sòa來，āi是tùi國外來獻--ê，tùi米甕到豆油、鹽lóng空空是常事，sòng-hiong ê生活也慣勢，chia̍h-mi̍h只有親像Í-lī-a信靠上帝炊芋a來供給，che是goán ê日常生活。熱熱ê路邊傳道，主日學學生有300人以上，是真苦關ê傳道風景。「上帝beh ka-kī備辦sio-chè ê羊羔。」(創世紀22：8) |
|
20. Sèng-chiàn
|
20. 聖戰 |
|
Hit sî Siōng-tè ū sàng 2 ê sòe-kiáⁿ lâi goán ê só͘-chāi. Chi̍t ê sī ín-iông-chiá chiân-kho hoān ê kiáⁿ, êng-ióng bô kàu, chin hi-jio̍k, iáu chi̍t ê sī cheng-sîn-pīⁿ hoān-chiá ê kiáⁿ, sèng-keh bē su cheng-seⁿ ê. Hit ê sin-thé soe-jio̍k ê cha-bó͘ gín-ná sim ù-jû thang khó-lîn. Tiám-sim ê sî, góa kā the̍h piáⁿ khí lâi, chiū ba̍k-chiu gîn o͘N3-o͘N3 pí kun-thâu-bú beh cheng góa. 5 ge̍h thiⁿ ê ji̍t-thâu-ē chhēng 4-5 niá saⁿ, hū-jîn-lâng kā i thǹg chi̍t niá khí-lâi, chek-sî tio̍h kám-mō͘ khí hê-ku. Hō͘ hit 2 ê gín-ná tòa tiâⁿ n̍i̍h thit-thô, hit ê hi-jio̍k ê cha-bó͘ gín-ná chok-koài, iáu hit ê chiū kā i kā chhiú, 2 ê khiú teh khàu, bē bián-tit sim-koaⁿ niû thiàⁿ. Hū-jîn-lâng chòe tiong-sim hiah ê lú-chú hiàn-sin tùi chò chō͘-chhiú, chīn-sim cheng-sîn kàu-io̍k kap kiān-khong chí-tō, Chú Iâ-so͘ ê kà-sī chòe tiong-sim, kóng Sèng-keng ê kà-sī hō͘ in thiaⁿ, ēng un-loán ê thiàⁿ lâi ióng-io̍k. Hit ê êng-ióng sit-tiāu ê gín-ná, keng-kè 6 ko-ge̍h chiū ióng khí-lâi, bīn iā ná eng-hoe ê hún-âng sek, sèng-chit iā chiām-chiām bêng-lóng, ōe gîm-si kî-tó.
|
Hit時上帝有送2 ê細kiáⁿ來goán ê所在。Chi̍t ê是ín-iông者前科犯ê kiáⁿ，營養無夠，真虛弱，iáu chi̍t ê是精神病患者ê kiáⁿ，性格bē輸cheng牲ê。Hit ê身體衰弱ê cha-bó͘ gín-ná心ù-jû thang可憐。點心ê時，我kā the̍h餅起來，就目chiu gîn o͘N3-o͘N3比拳頭母beh cheng我。5月天ê日頭下穿4-5領衫，婦jîn人kā i thǹg chi̍t領起來，即時tio̍h感冒起hê-ku。Hō͘ hit 2 ê gín-ná tòa埕n̍i̍h thit-thô，hit ê虛弱ê cha-bó͘ gín-ná作怪，iáu hit ê就kā i咬手，2 ê khiú teh哭，bē免得心肝niû疼。婦jîn人做中心hiah ê女主獻身tùi做助手，盡心精神教育kap健康指導，主耶穌ê教示做中心，講聖經ê教示hō͘ in聽，用溫暖ê疼來養育。Hit ê營養失調ê gín-ná，經過6個月就勇起來，面也ná櫻花ê粉紅色，性質也漸漸明朗，ōe吟詩祈禱。 |
|
Chóng-sī hit ê hê-ku gín-ná lóng bē ióng khí-lâi chin khòa-lū, kiat-hu̍t-sèng, nā pha̍k tio̍h ji̍t chiū hoat-jia̍t, sàu tó-chhn̂g 2, 3 lé-pài, hū-jîn-lâng chiū āiⁿ khì hō͘ i-seng khòaⁿ, i-seng hoan-hù “Chit ê gín-ná chin jio̍k, káⁿ sī kiat-hu̍t-sèng, khah hó tio̍h khì chiò kng-soaⁿ (Ronlgen ray)” mî-sî lâu chhìn-kōaⁿ chhù-lāi tio̍h kā i chhit 2, 3 piàn kā i ōaⁿ-saⁿ. Lóng bô siu siā-lé, sī pe̍h-pe̍h ê hōng-sū, chí-ū ǹg thiⁿ kî-kiû “Iâ-hô-hoa ah, sī Lí ê sòe-kiáⁿ, kiû Lí pó͘ khiàm-kheh” ū chi̍t-mî góa bāng-kìⁿ, chit-bé sòe-bé to̍k-chôa kiáⁿ tī lō͘-piⁿ, góa ēng ôe kā i that-khì, nā-sī i it-ti̍t thiàu khí-lâi, thò͘-chhut to̍k-khì kap góa tí-khòng, sui sī sè-bóe to̍k-chôa, put-lūn án-chóaⁿ kā that kā kòng to lóng bô siū siong, hoán-tńg khui-chhùi kap góa tí-khòng.
|
總是hit ê hê-ku gín-ná lóng bē勇起來真掛慮，結核性，若曝tio̍h日就發熱，sàu倒床2、3禮拜，婦jîn人就āiⁿ去hō͘醫生看，醫生吩咐「Chit ê gín-ná真弱，敢是結核性，khah 好tio̍h去照光soaⁿ (Ronlgen ray)」暝時流chhìn-kōaⁿ厝內tio̍h kā i chhit 2、3遍kā i換衫。Lóng無收謝禮，是白白ê奉侍，只有ǹg天祈求「耶和華ah，是你ê細kiáⁿ，求你補欠缺」有chi̍t暝我夢見，chit尾細尾毒蛇kiáⁿ tī路邊，我用鞋kā i踢去，若是i一直跳起來，吐出毒氣kap我抵抗，雖是細尾毒蛇，不論án-chóaⁿ kā踢kā kòng都lóng無受傷，反tńg開嘴kap我抵抗。 |
|
Siūⁿ kóng 5 chhioh ê lâm-chú-hàn khah su chi̍t bé to̍k-chôa hiah bô ióng-khì, “kìⁿ-nā óa-khò jio̍k-thé, sim lī-khui Iâ-hô-hoa ê lâng tio̍h siū chiù-chó͘” m̄-sī to̍k-chôa, sī mô͘-kúi. Tio̍h tī Chú Iâ-so͘ ê sèng-miâ kap i kau-chiàn. “Tī Iâ-so͘ Ki-tok ê sèng-miâ bēng-lēng lí thè khì” kia̍h khí chhiú án-ni hoah ê sî, to̍k-chôa chiū cháu-ji̍p chio̍h-chhiûⁿ lāi. Ah, kai-chài, thó͘ chi̍t ê tōa-khùi, chhíⁿ khí-lâi chi̍t khòaⁿ, cha-bó͘ gín-ná teh khōng-khōng sàu, ah hāi lah, koh lâi lah! Tī Sîn-ha̍k-hāu sî-tāi, hòng-ká ê ji̍t góa chiū khì hóng-būn kiat-hu̍t liâu-iông só͘, á-sī chhiah-lī, tn̂g-á piⁿ ê pīⁿ-īⁿ ūi-tio̍h pīⁿ-khó͘ ê pêng-iú hōaⁿ-chhiú kî-tó, put-lūn sím-mi̍h pīⁿ lóng m̄ kiaⁿ.
|
想講5尺ê男子漢khah輸chi̍t尾毒蛇hiah無勇氣，「kìⁿ-nā óa靠肉體，心離開耶和華ê人tio̍h受咒詛」m̄是毒蛇，是魔鬼。Tio̍h tī主耶穌ê聖名kap i交戰。「Tī 耶穌基督ê聖名命令你退去」kia̍h起手án-ni hoah ê時，毒蛇就走入石牆內。Ah，kai-chài，吐chi̍t ê大氣，醒起來chi̍t看，cha-bó͘ gín-ná teh khōng-khōng sàu，ah害lah，koh來lah！Tī神學校時代，放假ê日 我就去訪問結核療養所，á是chhiah-lī，tn̂g-á邊ê病院為tio̍h病苦ê朋友hōaⁿ手祈禱，不論sím-mi̍h病lóng m̄驚。 |
|
Chóng-sī khòaⁿ-kìⁿ chit ê sè-kiáⁿ ji̍t-ji̍t ti̍t-ti̍t siau-sán, sim chin iu-ut. Chhù-lāi tī gín-ná ê chím-thâu piⁿ kî-tó “Siōng-tè ōe i-tī ta̍k hāng ê pīⁿ, chóng-sī kóng pe̍h-chha̍t ê, oan-ke ê, pháiⁿ-sim ê, I bô beh pang-chān, só͘-í lí tio̍h hóe-kái, góa iā tio̍h hóe-kái” kóng án-ni 2 lâng lâu ba̍k-sái kî-tó ê sî, Chú chhun sèng chhiú, hián-chhut i-tī ê sîn-jiah. Chin sī pó-pòe thiⁿ ê kà-sī, 5 nî-kú cháiⁿ-iūⁿ khó͘-sim teh ho̍k-sāi chit ê sòe-kiáⁿ? Siōng-tè chai, ū chi̍t pái góa beh chhut khì sûn-hôe thoân-tō chin chai ū Sat-tàn bi̍h tī mn̂g-piⁿ beh hō͘ goán tōa chai-è, kó-jiân chhin-chhiūⁿ Iok-pek ê ka-cho̍k hō͘ Sat-tàn phah kàu hiám-hiám sí, chhin-siⁿ ê lāu-bú lâi saⁿ-thàm, hiâm kóng “chhiàⁿ lâng io bē ēng-tit, khah kóng iā tio̍h ka-kī io” chhù-lāi àm-àm khàu koh ū chi̍t pái chi̍t ê sìn-tô͘ lâi saⁿ an-ùi, tńg-khì tùi pa̍t lâng kóng “bô ǹg-bāng lah!” tùi chit kù ōe, chin thang kiaⁿ mô͘-kúi ê hé-chìⁿ siā tùi goán lâi. Chí-ū ēng ba̍k-sái té-móa goán ê phe-lông, kî-kiû Siōng-tè ê lîn-bín. Chóng-sī chiah pó-pòe ê kàu-hùn, sī sím-mi̍h to bē thang thè-ōaⁿ siōng-tè ê un-sù, án-ni khòaⁿ-phòa sè-kan, chhin-chhiūⁿ n̂g-kim keng-kè hé ê gô-liān, chiah ē ha̍p Chú ê lō͘-ēng, sòe-kiáⁿ ióng khí-lâi lah, ê-hng chá-khí kám-siā kî-tó. 2 lâng lóng hêng in ê pē-bú.
|
總是看見chit ê細kiáⁿ日日直直消sán，心真憂鬱。厝內tī gín-ná ê枕頭邊祈禱「上帝ōe醫治ta̍k項ê病，總是講pe̍h-chha̍t ê、oan-ke ê、pháiⁿ心ê，I無beh 幫贊，所以你tio̍h悔改，我也tio̍h悔改」講án-ni 2人流目屎祈禱ê時，主chhun 聖手，顯出醫治ê神跡。真是寶貝天ê教示，5年久cháiⁿ樣苦心teh服侍chit ê細kiáⁿ？上帝知，有chi̍t pái我beh出去巡迴傳道真知有Sat-tàn bi̍h tī門邊beh hō͘ goán大災厄，果然親像Iok-pek ê家族hō͘ Sat-tàn phah到險險死，親生ê老母來saⁿ探，嫌講「chhiàⁿ人io bē用得，khah講也tio̍h ka-kī io」厝內暗暗哭koh有chi̍t pái chi̍t ê信徒來saⁿ安慰，tńg去對別人講「無ǹg望lah！」對chit句話，真thang驚魔鬼ê火箭射tùi goán來。只有用目屎té滿goán ê phe-lông，祈求上帝ê憐憫。總是chiah寶貝ê教訓，是sím-mi̍h都bē thang替換上帝ê真正恩賜，án-ni看破世間，親像黃金經過火ê gô煉，chiah ē合主ê路用，細kiáⁿ勇起來lah，ê-hng早起感謝祈禱。2人lóng還in ê pē母。 |
|
“Só͘-í lâng nā chheng-khì ka-kī thoat-lī chiah ê, chiū beh chòe kùi-khì ê khì-kū, chiâⁿ sèng, ha̍p tī Chú-lâng ê lō͘-ēng, piān-piān thang chòe ta̍k hāng ê hó-sū.” (II Thê-mô͘-thài 2:21)
|
「所以人若清氣ka-kī脫離chiah ê，就beh做貴氣ê器具、chiâⁿ聖、合tī主人ê路用，便便thang做ta̍k項ê好事。」(II Thê-mô͘-thài 2：21) |
|
21. Siōng-tè Ê Sè-Kiáⁿ
|
21. 上帝Ê細Kiáⁿ |
|
Hit-tai̍p liáu-āu chhōa chi̍t ê cha-bó͘ gín-ná lâi, lāu-pē ūi-tio̍h su-iâⁿ phò-sán, chit ê cha-bó͘ gín-ná tī hit khoán pi-ke̍k ê tiong-kan chhut-sì, chi̍t-tō͘ ê kià-seng-thâng hoān tio̍h tn̂g-iām, pàng-hui̍h, chò-lī, chin siong-tiong, chhim-sìn Sîn-jú, sìn Siōng-tè ōe i-hó chiū kā i ín-siū, ta̍k-ji̍t piàⁿ-miā kî-tó kap khàn-hō͘. Chú Iâ-so͘ ê Sèng-chhiú kiat-chēng chit ê gín-ná ê sin-thé, hián-chhut i-tī ê un-hūi.
|
Hit-tai̍p了後chhōa chi̍t ê cha-bó͘ gín-ná來，老pē為tio̍h輸贏破產，chit ê cha-bó͘ gín-ná tī hit款悲極ê中間出世，chi̍t度ê寄生蟲患tio̍h腸炎，放血、chò-lī，真傷重，深信神諭、信上帝ōe醫好就kā i引受，ta̍k日拚命祈禱kap看護。主耶穌ê聖手kiat-chēng chit ê gín-ná ê身體，顯出醫治ê恩惠。 |
|
Góa tit-kiù ê tong-chho͘ chiū kian-koat beh it-seng to̍k-sin ho̍k-sāi Siōng-tè, iā kàu 38 hè án-ni kiâⁿ si̍p-jī-kè ê lō͘, tī khó-phàⁿ Tāi Tang-a chiàn-cheng ê tiong-chām Chú chí-sī góa chi̍t-ūi chí-bē, chit-pái tī bîn-bāng, koh chi̍t-pái tī īⁿ-siōng kā góa kóng “Chit ê sī lí ê lōe-chō͘, the̍h lâi chia̍h” hit sî góa tī liān-sêng-só͘ chhéng-ká 2 tiám-cheng, kú-hêng kiat-hun-sek, chū án-ni khì Jiáu-a. Nā-sī Chú ê ōe “Siōng-tè tī hit tiong-kan, siâⁿ tek-khak bōe iô-tāng.” (Si-phian 46:5) Lâng ōe chiàn-sí, siâⁿ ōe sio-khì, chóng-sī chit ê kiat-hun sī Siōng-tè só͘ tēng--ê, bô-lūn ū sím-mi̍h chai-hō to bē phò-hoāi. 40 hè ê sî, góa chòe ín-iông-chiá kui kok kap chí-bē saⁿ-kap tòa, chi̍t-sim chi̍t-ì ho̍k-sāi Siōng-tè. Góa sêng-sim sûn-sûn tùi chí-bē kóng-bêng góa ê sim-chêng, “Kok-ka teh beh bia̍t-bô, chí-ū Chú Iâ-so͘ koh-oa̍h ê koân-lêng chiah ōe chín-kùi chit ê kok-ka, góa siū Chú ho̍k-heng ê tiàu-bēng, li̍p-sè chò Ná-sè-jíⁿ lâng, chiong-sin to̍k-sin ho̍k-sāi Siōng-tè, só͘-í lán ê kiat-hun m̄ sī jio̍k-thé ê kiat-hun, sī lêng-tek kiat-hun. Chú Iâ-so͘ pún-sin chòe mûi-lâng sèng ê kiat-hun, ēng oân-choân sèng-kiat Sèng Sîn ê ha̍p-it tōa-tōa chòe Siōng-tè ê kang.”
|
我得救ê當初就堅決beh一生獨身服侍上帝，也到38歲án-ni行十字架ê路，tī khó-phàⁿ大東亞戰爭ê中站主只指示我chi̍t位姊妹，chit-pái tī眠夢，koh chi̍t-pái tī異象kā我講「Chit ê是你ê內助，the̍h來chia̍h」hit時我tī練成所請假2點鐘，舉行結婚式，自án-ni去Jiáu-a。若是主ê話「上帝tī hit中間，城的確bōe搖動。」(詩篇46：5) 人ōe戰死，城ōe燒去，總是chit ê結婚是上帝所定--ê，無論有sím-mi̍h災禍都bē破壞。40歲ê時，我做ín-iông者歸國kap姊妹saⁿ-kap tòa，chi̍t心chi̍t意服侍上帝。我誠心sûn-sûn tùi姊妹講明我ê心情，「國家teh beh滅無，只有主耶穌koh活ê權能chiah ōe拯救chit ê國家，我受主復興ê召命，立誓做Ná-sè-jíⁿ人，終身獨身服侍上帝，所以lán ê結婚m̄是肉體ê結婚，是lêng-tek結婚。主耶穌本身做媒人聖ê結婚，用完全聖潔聖神ê合一大大做上帝ê工。」 |
|
Ū sî-kan chiū kā i ké-bêng Siōng-tè ê ōe, pī-pān chòe kau-chiàn ê lō͘-ēng, Sèng Chú hō͘ goán chi̍t ê sè-kiáⁿ, sī thiⁿ ê siúⁿ-sù, ūi-tio̍h án-ni chiū ín-chhōa sè-kiáⁿ ji̍p tī Sèng-keng ê seng-oa̍h. Khí-chho͘ tī chí-bē ê kha-thâu-u téng chi̍t-kù chi̍t-kù kà i kî-tó, nā bô kî-tó bô thang chia̍h-pn̄g, iā bô tiám-sim, chú-pn̄g ê sî-kan nā kàu, chiū lâi toh-kha liām “Men Men” (chiū-sī A-men) 3-4 hè chiū ē ka-kī kî-tó, m̄-kú ū sî iā ē put-ho̍k m̄ kî-tó, chí-bē chiū chhu thán-á hē kha-tháng hō͘ sè-kiáⁿ chē, “bô kî-tó ê gín-ná m̄ hō͘ i chia̍h chá-khí-tǹg. Chia̍h-mi̍h saⁿ-khò͘ lóng sī Iâ-so͘ só͘ sù, só͘-í bōe kî-tit kî-tó ê gín-ná m̄-hō͘ i” kóng liáu chiū kā i koaiⁿ tī chhng-khò͘, bô kú chiū tōa siaⁿ khàu, liâm-piⁿ kóng “Ma-ma, góa m̄ tio̍h, beh kî-tó lah, chhiáⁿ sià-bián góa” kóng liáu chiū kî-tó.
|
有時間就kā i ké-bêng上帝ê話，備辦做交戰ê路用，聖主hō͘ goán chi̍t ê細kiáⁿ，是天ê賞賜，為tio̍h án-ni就引chhōa細kiáⁿ入tī聖經ê生活。起初tī姊妹ê kha頭u頂chi̍t句chi̍t句教i祈禱，若無祈禱無thang chia̍h飯，也無點心，煮飯ê時間若到，就來桌kha唸「Men Men」(就是A-men) 3-4歲就ē ka-kī祈禱，m̄-kú有時也ē不服m̄祈禱，姊妹就chhu毯á hē kha-tháng hō͘細kiáⁿ坐，「無祈禱ê gín-ná m̄ hō͘ i chia̍h早起頓。Chia̍h-mi̍h衫褲lóng是耶穌所賜，所以bōe kî得祈禱ê gín-ná m̄-hō͘ i」講了就kā i關tī倉庫，無久就大聲哭，liâm-piⁿ講「Ma-ma，我m̄ tio̍h，beh祈禱lah，請赦免我」講了就祈禱。 |
|
Chit khoán sū 10 ji̍t hoán-hok chi̍t pái, nā sī chì-hó ê Siōng-tè gín-ná nā kî-tó, tek-khak ū hó ê chiok-hok, khí-chho͘ ná chhin-chhiūⁿ tùi khong-khì kóng ōe gín-ná chin bô ài, kàu 5-6 hè chiū ū kî-tó ê thé-giām, kàu 7-8 hè chiū 1 ji̍t kî-tó 5 pái. Chóng-sī iáu kú siông-siông tò-thôaⁿ pîn-tōaⁿ kî-tó.
|
Chit款事10日反覆chi̍t pái，若是至好ê上帝gín-ná若祈禱，的確有好ê祝福，起初ná親像tùi空氣講話gín-ná真無愛，到5-6歲就有祈禱ê體驗，到7-8歲就1 日祈禱5 pái。總是iáu kú常常倒彈pîn-tōaⁿ祈禱。 |
|
Ū sî chhù-lāi án-ni kóng “M̄ kî-tó ê gín-ná góa bô ài, kin-á-ji̍t ha̍k-hāu tńg-lâi, chheh-pau the̍h-lè chū án-ni khì soaⁿ-n̍i̍h, khì soaⁿ-tōng chio̍h-thâu-khang lóng hó, m̄ bián tńg-lâi,” kóng án-ni chiū sàng gín-ná chhut-khì, ē-po͘ 2 tiám ê sî, chiàu pêng-siông khui āu-mn̂g kóng “Góa tńg-lâi lah.” Chhù-lāi chiū chhut-khì kā i kóng “M̄-bián tńg-lâi hó”, “góa tī ha̍k-hāu siūⁿ-lâi siūⁿ khì, bô-lūn ū siáⁿ-sū to beh kî-tó lah, chhiáⁿ sià-bián góa.” Chhin-chhiūⁿ án-ni gín-án ê sim, chēng-chēng kui ǹg Siōng-tè. Ūi-tio̍h 6-7 ê ho̍k-heng ê hia̍p-le̍k-chiá, ūi-tio̍h Chú-ji̍t-o̍h ê pêng-iú sûi-ê kiò miâ lâi kî-tó. Hiān-kim ūi-tio̍h Bí-kok kúi cha̍p lâng kî-tó bô soah.
|
有時厝內án-ni講「M̄祈禱ê gín-ná我無愛，今á日學校tńg來，冊包the̍h-lè自án-ni去山n̍i̍h，去山洞石頭khang lóng好，m̄免tńg來，」講án-ni就送gín-ná出去，ē-po͘ 2點ê時，照平常開後門講「我tńg來lah。」厝內就出去kā i講「M̄免tńg來好」，「我tī學校想來想去，無論有siáⁿ事都beh祈禱lah，請赦免我。」親像án-ni gín-án ê心，靜靜歸ǹg上帝。為tio̍h 6-7 ê復興ê協力者，為tio̍h主日學ê朋友隨ê叫名來祈禱。現今為tio̍h美國幾cha̍p人祈禱無soah。 |
|
Góa siūⁿ sè-chiūⁿ ê lâng it-bī koan-sim ha̍k-būn ê kàu-io̍k, tì-ì chhēng-chhah, êng-ióng, ūi-tio̍h chiong-lâi ê chhut-sin hi-seng it-chhè, tùi thian-kok choân-jiân bô-iân. Lōa-n̍i̍h ū ha̍k-būn, nā bô kèng-pài Siōng-tè, bô thiàⁿ chhù-piⁿ, hit khoán ê ha̍k-būn, kiám ōe tit-tio̍h chiok-hok? Kiáⁿ-jî kiau-ngō͘ lia̍h chòe pē-bú khah gâu. Bô ū Iâ-so͘ ê siā-hōe, ha̍k-hāu, ka-têng sī hô-téng ê khó͘-lîn. Tio̍h thiaⁿ Siōng-tè thó͘-khùi ê siaⁿ. Chit ê sè-kài sī Siōng-tè ê, ta̍k ê lâng lóng sī Siōng-tè chhòng-chō ê, khì-sak chō-bu̍t Chú Siōng-tè ê seng-oa̍h ū chai-ē, tī chit khoán ê hiān-sè, goán kian-sim beh kàu-io̍k hit hō ūi-tio̍h Siōng-tè kap jîn-ài kap sìn-gióng goān hiàn it-chhè, lâi sé chhù-piⁿ ê kha, hoaⁿ-hí hōng-sū ê gín-ná.
|
我想世chiūⁿ ê人一味關心學問ê教育，致意穿chhah、營養，為tio̍h將來ê出身犧牲一切，tùi天國全然無緣。Lōa-n̍i̍h有學問，若無敬拜上帝，無疼厝邊，hit款ê學問，kiám ōe得tio̍h祝福？Kiáⁿ兒驕傲lia̍h做pē母khah gâu。無有耶穌ê社會、學校、家庭是何等ê可憐。Tio̍h聽上帝吐氣ê聲。Chit ê世界是上帝ê，ta̍k ê人lóng是上帝創造ê，棄sak造物主上帝ê生活有災厄，tī chit款ê現世，goán堅心beh教育hit hō為tio̍h上帝kap仁愛kap信仰願獻一切，來洗厝邊ê kha，歡喜奉侍ê gín-ná。 |
|
Só͘-í goán ê ka-têng sī Siōng-tè tiong-sim seng-oa̍h. Chóng-sī gín-ná chi̍t-ē khì ha̍k-hāu chiū o̍h kóng pe̍h-chha̍t, khòaⁿ pêng-iú teh oan-ke, khòaⁿ pa̍t ê pêng-iú ài ê mi̍h chiū bóe, chiū thau-the̍h chhù-lāi gîn-tê-á ê chîⁿ khì bé só͘ ài ê mi̍h, chha-put-to ta̍k-ji̍t tī ha̍k-hāu to sī siū pháiⁿ ê kám-hòa, só͘-ì chhù-lāi tì-ì kà-sī gín-ná, ū sî 1 ji̍t bô hō͘ i khì ha̍k-hāu, kā i koaiⁿ tòa pâng-keng, bô hō͘ i chia̍h, kiò i ka-kī hoán-séng. Sè-kiáⁿ gín-ná ji̍t-ji̍t hiòng-siōng, ōe hiáu hun-piat hó pháiⁿ. Ū chi̍t ji̍t góa teh kî-tó, khòaⁿ-kìⁿ sè-kiáⁿ tī hāu-tiâⁿ hō͘ siā-hōe ok ê kiaⁿ-lâng-chúi phah lâ-sâm, siū pháiⁿ ê kám-hòa tńg-lâi, hit sî Chú kóng; “Chhin-chhiūⁿ tī Iok-tàn-hô sé seng-khu 7 pái, chhin-chhiūⁿ ēng chúi sé seng-khu, lí tio̍h ta̍k-ji̍t ēng Siōng-tè ê thiàⁿ kā lí ê sè-kiáⁿ sé-lé.”
|
所以goán ê家庭是上帝中心生活。總是gín-ná chi̍t-ē去學校就學講pe̍h-chha̍t，看朋友teh oan-ke，看別ê朋友愛ê mi̍h就bóe，就偷the̍h厝內銀袋á ê錢去買所愛ê mi̍h，差不多ta̍k日tī學校都是受pháiⁿ ê感化，所以厝內致意教示gín-ná，有時1日 無hō͘ i去學校，kā i關tòa房間，無hō͘ i chia̍h，叫i ka-kī反省。細kiáⁿ gín-ná日日hiòng-siōng，ōe hiáu分別好pháiⁿ。有chi̍t日我teh祈禱，看見細kiáⁿ tī校埕hō͘社會惡ê驚人水phah lâ-sâm，受pháiⁿ ê感化tńg來，hit時主講：「親像tī約旦河洗身軀7 pái，親像用水洗身軀，你tio̍h ta̍k日用上帝ê疼kā你ê細kiáⁿ洗禮。」 |
|
Ū chi̍t ūi hū-jîn-lâng mn̄g chhù-lāi kóng, “Cháiⁿ-iūⁿ teh kàu-io̍k gín-ná?” Chhù-lāi ìn “Chong-kàu kàu-io̍k!” Hū-jîn-lâng kóng, “Chong-kàu kàu-io̍k bô chhái-kang, mā ū m̄ chiâⁿ bo̍k-su kiáⁿ--ê.” Chin ū kè-ta̍t ê kàu-hùn, chhin-chhiūⁿ án-ni Chú Iâ-so͘ mî-ji̍t chòe goán ka-têng ê tiong-sim, goán khak-sìn koh-oa̍h ê Chú ēng I ê êng-iāu sî-sî kap góa tông-chāi. Chú kóng; “Chit ke sī sèng ka-têng, chhin-chhiūⁿ Iok-sek Má-lī-a ê ka-têng ū Chú Iâ-so͘, chiâⁿ chòe sèng ka-têng, lín ê ka-têng iā-sī an-ni.” Chàn-bí Iâ-so͘ Ki-tok ê Pē Siōng-tè. Āu-lâi ha̍k-hāu ê sian-siⁿ mn̄g kóng “Lí tōa-hàn beh chòe sím-mi̍h?” Ìn kóng “Chòe lú bo̍k-su.” Tùi thiⁿ lâi thiaⁿ chit kù ōe ê Siōng-tè, chiàⁿ sī chit ê gín-ná ê Pē.
|
有chi̍t位婦jîn人問厝內講，「Cháiⁿ樣teh教育gín-ná？」厝內應「宗教教育！」婦jîn人講，「宗教教育無chhái工，mā有m̄ chiâⁿ牧師kiáⁿ--ê。」真有價值ê教訓，親像án-ni主耶穌暝日做goán家庭ê中心，goán確信koh活ê主用I ê榮耀時時kap我同在。主講：「Chit家是聖家庭，親像Iok-sek Má-lī-a ê家庭有主耶穌，chiâⁿ做聖家庭，lín ê家庭也是an-ni。」讚美耶穌基督ê Pē上帝。後來學校ê先生問講「你大漢beh做sím-mi̍h？」應講「做女牧師。」Tùi天來聽chit句話ê上帝，正是chit ê gín-ná ê Pē。 |
|
“Iâ-so͘ ê tì-hūi kap nî-hè ná ke-thiⁿ, Siōng-tè kap lâng ná thiàⁿ i.” (Lō͘-ka 2:52)
|
「耶穌ê智慧kap年歲ná加添，上帝kap人ná疼i。」(Lō͘-ka 2：52) |
|
22. Thoân-tō Ê Choán-ki
|
22. 傳道Ê轉機 |
|
Ha̍k-īⁿ ta̍k-ji̍t teh hùn-liān thian-bō͘ pò͘-tō, lō͘-piⁿ pò͘-tō bô lâng ê-hn̂g, siu-ióng seng sī tòa tī thian-bō͘, lú-chú hiàn-sin chiá bóe-chhài, chhù-lāi pān kòe-kè kap chhui-sū. Góa tī thian-bō͘ āu àm-àm kî-tó, kiû Siōng-tè ê koân-lêng kàng-lo̍h tī siu-ióng seng ê kiàn-chèng kap soat-kàu, ū chi̍t àm bô-ì-tiong thiaⁿ-kìⁿ Sèng Sîn ê siaⁿ chhin-chhiūⁿ chheng-thian phek-le̍k chi̍t-iūⁿ; “Lí ê miâ sī Iok-hān, lí ê miâ sī Iok-hān.” “Lí tio̍h kā i hō miâ kiò Iok-hān.” Sī thiⁿ-sài kā Sat-ka-lī-a kńg ê, chóng-sī góa to bô kiû, iáu-kú Siōng-tè hō chit ê miâ “Iok-hān”. Thian-bō͘ pò͘-tō, chi̍t ê-hng kúi-nā cha̍p lâng koat-sim, nā sī chiah ê siu-ióng seng chhut-la̍t hóng-būn iā bô ké-chí, kú-kú ê thian-bō͘ pò͘-tō thêng-chí, bô-lūn lo̍h-seh ê ê-hng, á-sī iām-jia̍t ê joa̍h-thiⁿ, goán koat-toàn bô thêng-chí lō͘-piⁿ pò͘-tō. Lo̍h-sng seh tàng ê-hn̂g sî ê soat-kàu, iā lâu-kōaⁿ kàu lāi-saⁿ ē chūn-tit, piàⁿ-miā teh thoân-tō, nā-sī che sī chhin-chhiūⁿ Hô-lia̍t-soaⁿ ê tōe-tāng, Siōng-tè ê sèng chí-ì bô tī chia, iû-goân tio̍h tò-tńg kàu ēng Sîn-jú chòe bú-khì Sù-tô͘ Hêng-toān ê thoân-tō, Sèng Sîn chēng-chēng chhui-pek góa kàu ba̍k-pâng ê kî-tó.
|
學院ta̍k日teh訓練天幕佈道，路邊佈道無人ê-hn̂g，修養生是tòa tī天幕，女子獻身者買菜，厝內辦會計kap炊事。我tī天幕後暗暗祈禱，求上帝ê權能降落tī修養生ê見證kap說教，有chi̍t暗無意中聽見聖神ê聲親像青天霹靂chi̍t樣：「你ê名是Iok-hān，你ê名是Iok-hān。」「你tio̍h kā i號名叫Iok-hān。」是天使kā Sat-ka-lī-a講ê，總是我都無求，iáu-kú上帝號chit ê名「Iok-hān」。天幕佈道，chi̍t ê-hng幾nā cha̍p人決心，若是chiah ê修養生出力訪問也無果子，久久ê天幕佈道停止，無論落雪ê ê-hng，á是炎熱ê joa̍h天，goán決斷無停止路邊佈道。落霜雪凍ê-hn̂g時ê說教，也流kōaⁿ到內衫ē chūn得，拚命teh傳道，若是che是親像Hô-lia̍t山ê地動，上帝ê聖旨意無tī chia，iû-goân tio̍h tò-tńg到用神諭做武器使徒行傳ê傳道，聖神靜靜催逼我到墨房ê祈禱。 |
|
Hit sî-chūn Bí-kok Sîn-jú thoân-tō-chiá Ma-ka-li-su-tá (Macalister) lâi Ji̍t-pún tī Sîn-hō͘ khai-sí tōa ê kiù lêng Sîn-jú ê hùn-heng chū-hōe, góa chi̍t ê-hng khì khòaⁿ, thâu-khak chhin-chhiūⁿ hō͘ kòng-thûi kòng tio̍h, chin tōa ê kek-tōng, góa pí chiah ê Bí-kok ê hùn-heng ka tāi-seng siū tio̍h Siōng-tè ê tiàu-bēng, chóng-sī góa chhin-chhiūⁿ thó͘-á tuh-ku teh khùn, chhim-chhim ê thó͘-khùi. Koh tùi O-su-bóng (Osborn) ê chheh siū kà-sī, su-iàu kìm-chia̍h kî-tó, chiū ka-kī chi̍t lâng ji̍p ba̍k-pâng. 1952 nî 3 ge̍h 1 ji̍t kàu 10 ji̍t, chá-tǹg kìm-chia̍h chún-pī kî-tó. 11 ji̍t khí khai-sí chèng-sek ê kìm-chia̍h kî-tó, khí-chho͘ kúi-nā ji̍t ū kám-kak iau kàu tòng bē tiâu ê iú-he̍k, chóng-sī chiap-sòa bô-thêng ê kî-tó ū khah-iâⁿ chit ê iú-he̍k. Tē 6 ji̍t khí chiū sim-sîn ū kóng bōe chīn ê pêng-an, sèng-kiat kap hoaⁿ-hí, Sèng Sîn hō͘ góa ê kî-tó chhin-chhiūⁿ chúi-chôaⁿ ti̍t-ti̍t chhèng chhut-lâi. “Sìn Góa ê lâng, chhin-chhiūⁿ Sèng-keng só͘ kóng, ū oa̍h-chúi ê khoe, beh tùi i ê pak-lāi lâu-chhut.” (Iok-hān 7:38)
|
Hit時chūn美國神諭傳道者Ma-ka-li-su-tá (Macalister)來日本tī神戶開始大ê救靈神諭ê奮興聚會，我chi̍t ê-hng去看，頭殼親像hō͘ kòng鎚kòng-tio̍h，真大ê激動，我比chiah ê美國ê奮興家tāi先受tio̍h上帝ê召命，總是我親像兔á tuh-ku teh khùn，深深ê吐氣。Koh tùi O-su-bóng (Osborn) ê冊受教示，需要禁chia̍h祈禱，就ka-kī chi̍t人入墨房。1952年3月1日到10日，早頓禁chia̍h準備祈禱。11日起開始正式ê禁chia̍h祈禱，起初幾nā日有感覺iau到擋bē tiâu ê誘惑，總是接續無停ê祈禱有khah贏chit ê誘惑。第6日起就心神有講bōe盡ê平安、聖潔kap歡喜，聖神hō͘我ê祈禱親像水泉直直chhèng出來。「信我ê人，親像聖經所講，有活水ê溪，beh tùi i ê腹內流出。」(Iok-hān 7：38) |
|
Chú ê ōe sī khak-si̍t, keng-kè 10 ji̍t chin ê kî-tó, ho̍k-heng ê kî-tó ti̍t-ti̍t chhèng-chhut, hōng-hiàn tī Siōng-tè ê bīn-chêng. Chú kóng: “Ah! Ho̍k-heng ê hé, ho̍k-heng ê hé, tùi thiⁿ kàng lo̍h Sèng Sîn ê hé, to̍h tī lí ê téng-bīn” kìm chia̍h beh soah ê tāi-seng Chú kóng; “Chài khui Sîn-jú thoân-tō.” Tùi chia khí-gâm, tiòng-hong (tn̄g náu-kin) iā tit-tio̍h i-hó, chóng-sī iáu bōe khui chhiⁿ-mî lâng ê ba̍k-chiu, chài-saⁿ khó-lū, chiū koh koat-tēng kìm chia̍h, chhiat-si̍t thé-giām tio̍h Siōng-tè ū thiaⁿ kìm-chia̍h ê kî-tó, chit pái ê kìm-chia̍h seng-khu koh khah sán, kha khiā bē khí-lâi, thâu-mn̂g lak, khak hui̍h, tì-kàu chhù-lāi lâu ba̍k-sái pek góa thêng-chí kìm-chia̍h, góa soan-giân sui-jiân tio̍h kap chhù-lāi lī-hun, it-chhè ê mi̍h lóng bô khì, kàu sí iā beh si̍t-hêng. Iau liáu phīⁿ-khang khah lāi, kám-kak tiâu tī pn̄g-tiàm ê po-lé, bat tī tiàm-n̍i̍h chia̍h mi̍h ê bī, chhin-chhiūⁿ san-tin hái-bī, ap-tó teh iú-he̍k góa, hit sî tùi góa kóng “Lí ê só͘-chòe tek-khak ū pò-siúⁿ” seng-khu léng ki-ki, mî-sî 3 tiám cheng í-siōng bē khùn-tit, beh peh khí-lâi, ba̍k-chiu ian-n̄g, sim-chōng ná chún beh tiām-khì, ti̍t-ti̍t beh tó lo̍h-khì.
|
主ê話是確實，經過10日真ê祈禱，復興ê祈禱直直chhèng出，奉獻tī上帝ê面前。主講：「Ah！復興ê火，復興ê火，tùi天降落聖神ê火，to̍h tī你ê頂面」禁chia̍h beh soah ê tāi先主講：「再開神諭傳道。」Tùi chia起癌、中風(斷腦筋)也得tio̍h醫好，總是iáu bōe開chhiⁿ-mî人ê目chiu，再saⁿ考慮，就koh決定禁chia̍h，切實體驗tio̍h上帝有聽禁chia̍h ê祈禱，chit pái ê禁chia̍h身軀koh khah sán，kha khiā bē起來、頭毛lak、khak血，致到厝內流目屎逼我停止禁chia̍h，我宣言雖然tio̍h kap厝內離婚，一切ê mi̍h lóng無去，到死也beh實行。Iau了鼻khang khah利，感覺tiâu tī飯店ê玻璃，bat tī店n̍i̍h chia̍h mi̍h ê味，親像山珍海味，壓倒teh誘惑我，hit時對我講「你ê所做的確有報賞」身軀冷ki-ki，暝時3點鐘以上bē khùn得，beh peh起來，目chiu ian-n̄g心臟ná準beh tiām去，直直beh倒落去。 |
|
Siūⁿ kóng góa ê sim-chōng cháiⁿ-iūⁿ chiah kan-khó͘? Góa ê ba̍k-chiu cháiⁿ-iūⁿ bô khòaⁿ-kìⁿ? Ah! Sī lah, góa teh kìm-chia̍h kî-tó lah! Chiū phak tī bîn-chhn̂g chiap-sòa kî-tó kóng “Chú ah! Hùn-khí ho̍k-heng, chhin-chhiūⁿ Sù-tô͘ Hêng-toān só͘ kiâⁿ ê sîn-jiah, kiû Lí kiat-chēng góa” mî-sî 12 tiám kàu thiⁿ kng 6 tiám ê tiong-kan lâi thé-hōe sian-ti Í-sek-lia̍t tó-teh ēng gû-sái pek piáⁿ ê sim. (Í-se-kiat 4:) tī chit keng àm-sek hoat-chhut ko͘-n̂g pi-ai ê siaⁿ, koh ná thiaⁿ tùi Lio̍k-kah-soaⁿ (六甲山) ê hô͘-lî chhut-lâi chhē chia̍h-mi̍h hn̄g-hn̄g teh pūi chhin-chhiūⁿ ê siaⁿ, góa kî-tó bô thêng, “sī lah Chú ah! Góa beh kî-tó kàu sí, kàu chia sui-jiân pe̍h-kim ê liān-á tn̄g khì, góa iā bô siūⁿ m̄ kam, kám-siā Chú!”
|
想講我ê心臟cháiⁿ樣chiah艱苦？我ê目chiu cháiⁿ樣無看見？Ah！是lah，我teh禁chia̍h祈禱lah！就phak tī眠床接續祈禱講「主ah！奮起復興，親像使徒行傳所行ê神跡，求你kiat-chēng我」暝時12點到天光6點ê中間來體會先知Í-sek-lia̍t倒teh用牛屎pek餅ê心。(Í-se-kiat 4：) tī chit間暗色發出ko͘黃悲哀ê聲，koh ná聽tùi六甲山ê狐狸出來chhē chia̍h-mi̍h hn̄g-hn̄g teh吠親像ê聲，我祈禱無停，「是lah主ah！我beh祈禱到死，到chia雖然白金ê鍊á斷去，我也無想m̄甘，感謝主！」 |
|
Tn̂g-tn̂g ê mî kè-khì, chá-khí ê 9 tiám-cheng, hn̄g-hn̄g chhiū-bé eng-ko ê siaⁿ sī lo̍k-hn̂g chhun-thiⁿ lêng chiáu ê chàn-bí, chit ê kìm-chia̍h ê bé-chām Chú tùi góa kóng, “Lí ê kìm-chia̍h liáu lah! Í-āu tio̍h 1 ji̍t 1 chia̍h chú-gī lâi cheng-chiàn” Sîn-jù ê sîn-jiah ná khó-koan chiân-chìn.
|
長長ê暝過去，早起ê 9點鐘，hn̄g-hn̄g樹尾鶯哥ê聲是樂園春天靈鳥ê讚美，chit ê禁chia̍h ê尾站主對我講，「你ê禁chia̍h了lah！以後tio̍h 1日1 chia̍h主義來爭戰」神諭神跡ná考關前進。 |
|
“Hó ê mi̍h góa bô chia̍h, bah kap chiú bô ji̍p góa ê chhùi, iā bô ēng iû boah góa ê seng-khu, ti̍t-kàu móa 3 ê 7 ji̍t kî.” (Tān-í-lí 10:3)
|
「好ê mi̍h我無chia̍h，肉kap酒無入我ê嘴，也無用油抹我ê身軀，直到滿3 ê 7日期。」(Tān-í-lí 10：3) |
|
23. Thâu Chúi Ê Ké-chí
|
23. 頭水Ê果子 |
|
Kiat-tiân hiaⁿ-tī tùi Chheng-sim-koān (青森縣) siū tiàu thâu chi̍t-hôe lâi ka-ji̍p, chho͘ kìⁿ-bīn ê sî hiaⁿ-tī kóng “Chit keng ha̍k-hāu tha̍k liáu, góa siūⁿ beh koh tha̍k 2-3 keng Sîn-ha̍k-hāu,” góa thiaⁿ-liáu bô siáⁿ hoaⁿ-hí, chóng-sī Chú oân-choân lia̍h-tio̍h chit ê hiaⁿ-tī, hō͘ i ū móa-móa sêng-sim ho̍k-sāi Siōng-tè, lâu hui̍h-kōaⁿ ê hōng-sū. Tio̍k-ka hóng-būn pun Sèng-keng ê sî, bē kò͘-tit chia̍h, chi̍t sî iā bô hioh-khùn, phah-lâng ê mn̂g soan-thoân Iâ-so͘ Ki-tok. Ūi-tio̍h án-ni ji̍t-ji̍t ná soe-jio̍k, thok i khì Tāi-pán siu-lí tōa-kó͘, āu-lâi góa khì the̍h ê sî, thâu-ke-niû chin kám-kek kóng “Góa iáu m̄-bat tú-tio̍h chiah jia̍t-sim ê chheng-liân, khiā tī chit ê mn̂g-kháu 2 tiám-cheng kú kōaⁿ lâu chiap ti̍h tùi góa thoân Iâ-so͘ Ki-tok, khó͘-khǹg góa tio̍h sìn.”
|
Kiat-tiân兄弟tùi青森縣受召頭chi̍t回來加入，初見面ê時兄弟講「Chit間學校讀了，我想beh koh讀2-3間神學校，」我聽了無siáⁿ歡喜，總是主完全lia̍h-tio̍h chit ê兄弟，hō͘ i有滿滿誠心服侍上帝，流血kōaⁿ ê奉侍。獨家訪問分聖經ê時，bē顧得chia̍h，chi̍t時也無hioh-khùn，phah人ê門宣傳耶穌基督。為tio̍h án-ni日日ná衰弱，託i去大阪修理大鼓，後來我去the̍h ê時，頭家娘真感激講「我iáu m̄-bat tú-tio̍h chiah熱心ê青年，khiā tī chit ê門口2點鐘久kōaⁿ流接滴對我傳耶穌基督，苦勸我tio̍h信。」 |
|
Ha̍k-īⁿ thêng-pān ê sî, hiaⁿ-tī kóng m̄-tńg khì, kiông-kiông kiò i tńg-khì in tau, lī-pia̍t āu hiaⁿ-tī tio̍h hì-pīⁿ tó-chhn̂g bô siū Chú ê chín-tiàu. Āu-lâi tùi i ê lāu-pē chiap-tio̍h kám-siā-chn̄g. “Kiáⁿ-jî jia̍t-sim ê kî-tó kap tùi Ki-tok ê thiàⁿ, lâu ba̍k-sái tùi goán thoân-tō, ka-cho̍k tāi-ke khòaⁿ kah kám-kek lâu ba̍k-sái.” Tùi che thang chai hiaⁿ-tī kàu-sí ê sùn-kan, ū lōa jia̍t-sim soan-thoân Siōng-tè ê kok, hiaⁿ-tī tī goán ê tiong-kan chīn-tiong kàu sí ho̍k-sāi Siōng-tè, kap lâng ê bô͘-hoān-seng, chit hō sûn-kiat ê hiaⁿ-tī siū kéng chòe thâu chi̍t ê sûn-kàu-chiá chin kám-siā.
|
學院停辦ê時，兄弟講m̄-tńg去，kiông-kiông叫i tńg去in tau，離別後兄弟tio̍h肺病倒床無受主ê chín召。後來tùi i ê老pē接tio̍h感謝狀。「Kiáⁿ兒熱心ê祈禱kap對基督ê疼，流目屎對goán傳道，家族大家看kah感激流目屎。」Tùi che thang知兄弟到死ê瞬間，有lōa熱心宣傳上帝ê國，兄弟tī goán ê中間盡忠到死服侍上帝，kap人ê模範生，chit hō純潔ê兄弟受kéng做頭chi̍t ê殉教者真感謝。 |
|
Koh tùi Chu-hō-koān (滋賀縣) ū Hô-tiân hiaⁿ-tī the̍h hui̍h-su ê ji̍p-ha̍k goān lâi thàn-goān, hiaⁿ-tī pàng-sak ba̍k-kang ê hó thâu-lō͘, lâi ji̍p chheng-pîn siu-hēng ê lō͘, chit ê hiaⁿ-tī chiong pún-sin ê tōa-i (Over-coat) kā tîm-tāng ê hì-lô pīⁿ-chiá chhēng, āiⁿ i lâi hù ha̍k-īⁿ ê Sîn-jú-hōe. Chit ê kiû-jú-chiá kám-kek Siōng-tè ê un-hūi, phak-pài tī káng-tôaⁿ ê bīn-chêng lâu ba̍k-sái ná lo̍h-hō͘. Ū chi̍t pái Hô-tiân hiaⁿ-tī bô tī teh, āu-lâi hoat-kiàn tio̍h ûi-su (遺書) “Nā bô siū Sèng Sîn chhiong-móa m̄ tńg-lâi ha̍k-īⁿ” hiaⁿ-tī ji̍p-soaⁿ khai-sí kìm-chia̍h kî-tó. Goán chhim-chhim kám-kak chek-jīm, ūi-tio̍h hiaⁿ-tī kî-tó, chòe-āu khai-sí chhau-soaⁿ. Chiah ê chí-bē tī lo̍h-hō͘ ê ji̍t kiâⁿ 20 kong-lí ê soaⁿ-lō͘, hun-lō͘ ná kiâⁿ ná kiò “Hô-tiân hiaⁿ, Hô-tiân hiaⁿ!” Kha-sng sau-siaⁿ bô ta̍t bo̍k-tek, kàu ê-hng tāi-ke pāi-hèng tńg--lâi. Hiaⁿ-tī kúi-nā ji̍t-kú bô-chia̍h bô lim ê kî-tó, sī hán-iú khiam-sùn ê pêng-iú, khì pun Sèng-keng iā chiong só͘ ū it-chīn bōe. Tùi chhiú iā siū hiaⁿ-tī ê jia̍t-sim kám-tōng, koh ū hiaⁿ-tī kōaⁿ-tê ji̍p hé-thòaⁿ iô, kìm-chia̍h kî-tó, tńg-lâi kìm-chia̍h 10 ji̍t kú, chhut mn̂g ê sî chiū hîn-gông tó-lo̍h-khì, Sîn-hō͘ Sèng-keng ha̍k-īⁿ m̄-sī beh kiû ha̍k-būn, sī chiàu Sèng-keng ê seng-oa̍h, chiàu án-ni ióng-sêng thoân-tō jîn-châi ê só͘-chāi, ūi-tio̍h beh ióng-sêng ēng Sîn-jú chòe bú-khì. Sù-tô͘ Hêng-toān tek thoân-tō-chiá, Siōng-tè khai-pān ê, só͘-í bô chi̍t-lâng bô kìm-chia̍h kî-tó.
|
Koh tùi滋賀縣有Hô-tiân兄弟the̍h血書ê入學願來thàn願，兄弟放sak木工ê好頭路，來入清貧修行ê路，chit ê兄弟將本身ê大衣(Over-coat) kā沉重ê肺癆病者穿，āiⁿ i來赴學院ê神諭會。Chit ê求諭者感激上帝ê恩惠，phak拜tī講壇ê面前流目屎ná落雨。有chi̍t pái Hô-tiân兄弟無tī teh，後來發見tio̍h遺書「若無受聖神充滿m̄ tńg來學院」兄弟入山開始禁chia̍h祈禱。Goán深深感覺責任，為tio̍h兄弟祈禱，最後開始抄山。Chiah ê姊妹tī落雨ê日行20公里ê山路，分路ná行ná叫「Hô-tiân兄，Hô-tiân兄！」Kha酸sau聲無達目的，到ê-hng大家敗興tńg--來。兄弟幾nā日久無chia̍h無lim ê祈禱，是罕有謙遜ê朋友，去分聖經也將所有一盡賣。對手也受兄弟ê熱心感動，koh有兄弟kōaⁿ-tê入火炭窯，禁chia̍h祈禱，tńg來禁chia̍h 10日久，出門ê時就hîn-gon5倒落去，神戶聖經學院m̄是beh求學問，是照聖經ê生活，照án-ni養成傳道人才ê所在，為tio̍h beh養成用神諭做武器。使徒行傳的傳道者，上帝開辦ê，所以無chi̍t人無禁chia̍h祈禱。 |
|
“Sìn ê lâng beh ū chiah ê sîn-jiah tè-in, chiū-sī thok-tiōng góa ê miâ kóaⁿ-kúi, kóng sin ê khiuⁿ-kháu; lia̍h-chôa á-sī lim-tio̍h sím-mi̍h to̍k, iā bô siong-hāi; koh ēng chhiú hōaⁿ phòa-pīⁿ ê lâng, in chiū hó.” (Má-khó 16:17-18)
|
「信ê人beh有chiah ê神跡tè蔭，就是拓漲我ê名趕鬼，講新ê腔口；lia̍h蛇á是lim-tio̍h sím-mi̍h毒，也無傷害；koh用手hōaⁿ phòa病ê人，in就好。」(馬可16：17-18) |
|
Goán chiàu án-ni sìn án-ni thoân.
|
Goán照án-ni信án-ni傳。 |
