Si̍p-jī-kè Ê Kau-chiàn_01
|
十字架Ê 交戰_01 |
|---|---|
| Tân Kim-jiân e̍k | Tân Kim-jiân譯 |
|
Chó-tîn Eng-gān tù Tân Kim-jiân e̍k Tâi-oân Soan-tō-siā Chhut-pán |
Chó-tîn Eng-gān著 Tân Kim-jiân譯 台灣宣道社出版 |
|
Chhéng-an
|
請安 |
|
Góa bat tī Chú chi̍t ê chí-bē, chit ê chí-bē 15 nî chêng tit-tio̍h Chú ê kiù-un, hit sî chí-bē siū Sèng Sîn ê kng chiò, chai ka-kī ê chōe, tī Siōng-tè ê bīn-chêng iu-siong thòng-hóe thî-khàu lâu ba̍k-sái, chit sî hut-jiân hn̄g-hn̄g khòaⁿ-kìⁿ si̍p-jī-kè ê Chú, I ê hêng-siōng chin sòe, chóng-sī bêng-bêng sī khó͘-lān ê Chú ê hêng-siōng, tùi Chú ê chhùi só͘ chhut ê siaⁿ “Kiáⁿ ah, an lí ê sim, lí ê chōe sià lah.” (Má-thài 9:2) Tùi choa̍t-bāng tiong o͘-àm ê tiong-kan, bô phah-sǹg thang thiaⁿ-kìⁿ Chú ê siaⁿ, ah Chú Iâ-so͘ kin-á-ji̍t iáu-kú oa̍h-oa̍h tī-teh, Chú sī chōe-jîn ê Kiù-chú, kin-á-ji̍t iû-goân tùi si̍p-jī-kè téng teh chhut-siaⁿ, chí-bē tī bô hān-liōng Siōng-tè ê thiàⁿ ê bīn-chêng, ha̍p siang-chhiú kám-kek lâu ba̍k-sái.
|
我bat tī主chi̍t ê姊妹，chit ê姊妹15年前得tio̍h主ê救恩，hit時姊妹受聖神ê光照，知ka-kī ê罪，tī上帝ê面前憂傷痛悔啼哭流目屎，chit時忽然間hn̄g-hn̄g看見十字架ê主，I ê形象真細，總是明明是苦難ê主ê形象，tùi主ê嘴所出ê聲 「Kiáⁿ ah，an你ê心、你ê罪赦lah。」 (馬太9：2) Tùi絕望中烏暗ê中間，無phah算thang聽見主ê聲，ah主耶穌今á日iáu-kú活活tī-teh，主是罪人ê 救主，今á日iû-goân tùi十字架頂teh出聲，姊妹tī無限量上帝ê疼ê面前，合雙手感激流目屎。 |
|
Si̍p-jī-kè! Si̍p-jī-kè! Éng-oán bōe bia̍t-bô Kiù-chú Iâ-so͘ si̍p-jī-kè ê thiàⁿ, choân jîn-lūi î-it ê ǹg-bāng si̍p-jī-kè ê ōe, si̍p-jī-kè ê pó-hui̍h, ah! Hô-téng ê pó-kùi ah! Kok-kok-thaⁿ ê si̍p-jī-kè kó͘-chá hiān-kim tâng chi̍t-iūⁿ ê sū-si̍t.
|
十字架！十字架！永遠bōe滅無救主耶穌十字架ê疼，全人類唯一ê ǹg望十字架ê話，十字架ê寶血，ah！何等ê寶貴ah！Kok-kok-thaⁿ ê十字架古早現今同chi̍t樣ê事實。 |
|
“Thiⁿ tōe beh hòe-bô, Góa ê ōe bōe hòe-bô.” (Má-khó 13:31) Sī! Si̍p-jī-kè ê ōe sī éng-oán put-bia̍t Siōng-tè ê ōe, chit ê chí-bē ēng sîn-lêng ê ba̍k-chiu gióng-bōng si̍p-jī-kè, iā ēng sîn-lêng ê hī-khang thiaⁿ Chú ê siaⁿ. Góa jio̍k-thé khó͘-thàng ê ji̍t, kiû chit ê chí-bē kî-tó, chí-bē jia̍t-sim ūi-tio̍h góa kî-tó, hit sî tùi Siōng-tè lâi ê ōe “Góa bat kap Ki-tok tâng tèng si̍p-jī-kè; góa iáu-kú teh oa̍h, m̄-sī iû-goân góa, chiū-sī Ki-tok tiàm tī góa teh oa̍h.” (Lō͘-ka 2:20) Góa hō͘ koh-iūⁿ ê lêng-kám chhiong-móa, hôe-kò͘ góa pún-sin ê hiān-chāi kap kè-khì, siū tio̍h si̍p-jī-kè ê kng chiò, lâi hoán-séng ka-kī ê seng-gâi. Góa iā sī si̍p-jī-kè ê pó-hui̍h só͘ sio̍k-hôe chi̍t ê chōe-jîn, bô si̍p-jī-kè chiū bô ǹg-bāng ê jîn-seng. Só͘-í Chú tùi góa tit-tio̍h kiù ê tong-chho͘, chiū ēng si̍p-jī-kè ê ōe ín-chhōa góa.
|
「天地beh毀無，我ê話bōe毀無。」(馬可13：31) 是！十字架ê話是永遠不滅上帝ê話，chit ê姊妹用神靈ê目仰望十字架，也用神靈ê耳khang聽主ê聲。我肉體苦痛ê日，求chit ê姊妹祈禱，姊妹熱心為tio̍h我祈禱，hit時tùi上帝來ê話「我bat kap基督同釘十字架；我iáu-kú teh活，m̄是iû-goân我，就是基督tiàm tī我teh活。」(Lō͘-ka 2：20) 我hō͘各樣ê靈感充滿，回顧我本身ê現在kap過去，受tio̍h十字架ê光照，來反省ka-kī ê生涯。我也是十字架ê寶血所贖回chi̍t ê罪人，無十字架就無ǹg望ê人生。所以主tùi我得tio̍h救ê當初，就用十字架ê話引chhōa我。 |
|
“Lâng nā ài tè Góa tio̍h khòaⁿ bô ka-kī, giâ i ê si̍p-jī-kè, lâi tè Góa. In-ūi kìⁿ-nā ài kiù i ê sìⁿ-miā ê, beh sit-lo̍h i, kìⁿ-nā ūi-tio̍h góa lâi sit-lo̍h i ê sìⁿ-miā ê beh tit-tio̍h i.” (Má-thài 16:24, 25)
|
「人若愛tè我tio̍h看無ka-kī，giâ i ê十字架，來tè我。因為kìⁿ-nā愛救i ê性命ê，beh失落i，kìⁿ-nā為tio̍h我來失落i ê性命ê beh得tio̍h i。」 (馬太16：24，25) |
|
Pek-hāi ê sî, siū kóaⁿ-tio̍k ê sî, phòa-pīⁿ loán-jio̍k ê sî, koh tī it-chhè ê hoān-lān, sòng-hiong ê tiong-kan só͘ gióng-bōng ê, chí-ū Chú Iâ-so͘ ê si̍p-jī-kè. Chú pàng-sak Siōng-tè ê tōe-ūi tèng tī si̍p-jī-kè, pàng-sak I ka-kī ê sìⁿ-miā. Tāng-chōe ê góa óa-khò I tùi tē-ge̍k kiù chhut. Taⁿ kì-jiân siū kiù-chhut ê góa, giâ si̍p-jī-kè tè I ê kha-pō͘ sī eng-kai, chit ê si̍p-jī-kè sī hō͘ góa thiⁿ lâi ê biāu-io̍k, sèng-kiat ê chí-chiam.
|
迫害ê時，受趕逐ê時，phòa病軟弱ê時，koh tī一切ê患難，sòng-hiong ê中間所仰望ê，只有主耶穌ê十字架。主放sak上帝ê地位釘tī十字架，放sak I ka-kī ê性命。Tāng-chōe ê我óa靠I tùi地獄救出。Taⁿ既然受救出ê我，giâ十字架tè I ê kha步是應該，chit ê十字架是hō͘我天來ê妙io̍k、聖潔ê指針。 |
|
30 nî chêng góa siū chhe kàu Tâi-oân chi̍t ê chheng-liân thoân-tō-chiá, góa bô chîⁿ-tē, chí-ū chi̍t pún Sèng-keng, ēng Tâi-pak tāi-ha̍k ê koaⁿ-sià chòe kun-kù tōe, mî-ji̍t chīn-la̍t thoân-tō, ū chi̍t-ji̍t tī chū-hōe ê se̍k-siōng ià-siān, iûⁿ-àm-bîn tó lo̍h-khì, chhiáⁿ khí-lâi chi̍t khòaⁿ, hiaⁿ-ché ûi-lûi góa lóng lâu ba̍k-sái chīn-la̍t ūi góa kî-tó, góa tùi Siōng-tè tit-tio̍h khùi-la̍t, chiū khí-lâi, chú-chhî chū-hōe. Āu-lâi Siáu-le̍h-goân (小笠原) sian-siⁿ (tia̍t-ha̍k kàu-siū) án-ni kiàn-chèng, “kî-tó ê tiong-kan, góa khòaⁿ-kìⁿ sian-siⁿ ê hêng-siōng, chhēng pe̍h-saⁿ, sim-chōng li̍h8-khui, heng-pō͘ ū tōa hui̍h-jiah, lí chiū siang chhiú gia̍h koân, chiūⁿ thiⁿ khì, í-āu khòaⁿ-kìⁿ kúi-pah, kúi-chheng chhēng pe̍h-saⁿ ê sèng-tô͘ chiūⁿ thiⁿ khì” góa sìn chit ê īⁿ-siōng ōe si̍t-hiān, sûn-kàu sī Thiⁿ-pē hō͘ góa ê èng-ún, che sī góa ê si̍p-jī-kè.
|
30年前我受差到台灣chi̍t ê青年傳道者，我無錢袋，只有chi̍t本聖經，用台北大學ê官舍做根據地，暝日盡力傳道，有chi̍t日tī聚會ê席上ià-siān，iûⁿ-àm-bîn倒落去，且起來chi̍t看，兄姊圍lûi我lóng流目屎盡力為我祈禱，我tùi上帝得tio̍h氣力，就起來，主持聚會。後來小笠原先生(哲學教授) án-ni見證，「祈禱ê中間，我看見先生ê形象，穿白衫，心臟li̍h8開，胸部有大血跡，你就雙手gia̍h koân，chiūⁿ天去，以後看見幾百、幾千穿白衫ê聖徒chiūⁿ天去」我信chit ê異象ōe實現，殉教是天pē hō͘我ê應允，che是我ê十字架。 |
|
Tn̂g-sî tī lōe-tē, mî-ji̍t teh hiàn ke̍k-lia̍t ê kî-tó, góa thoân-tō liáu tńg-khì ê sî, tī kàu-hōe thiaⁿ-kìⁿ kiàn-chèng; sī tī kî-tó tiong chi̍t ê sèng-tô͘, tùi Chú só͘ siū ê, siá tī chia chòe chham-khó. Koân tú thiⁿ, kiā ná piah ê soaⁿ-lō͘, chiàⁿ-pêng sī hiám-iàu ê soaⁿ, tò-pêng sī chheng-tn̄g ê soaⁿ-kok, ba̍k-chiu lóng ian-n̄g, soaⁿ ê pòaⁿ-tô͘, chí ū chi̍t tiâu sòe koh oe̍h oa̍h-miā ê sió-lō͘, lím-lím-á chi̍t ê lâng ōe thang kiâⁿ nā-tiāⁿ, hut-jiân thâu-chêng ū êng-kng chhàn-lān ê Chú Ki-tok chìn-chêng teh kiâⁿ ê hêng-siōng, tī I ê āu-bīn ū thí-khui siang-chhiú hoaⁿ-hí ê móa-bīn, chhiong-móa kám-siā, tè I teh kiâⁿ sòng-hiong ê thoân-tō-chiá Chó-tîn ê hêng-siōng, chiū-sī bô tòa chîⁿ-tē, chí-ū só͘ chhēng chit seng-khu ê góa. Khak-sìn che sī só͘ hō͘ góa si̍p-jī-kè ê lō͘, só͘-í pún-su ê tôe-miâ kiò chòe “si̍p-jī-kè ê kau-chiàn” ūi-tio̍h Chú Iâ-so͘ Ki-tok ê êng-kng, kap chí-bē hia̍p-le̍k siá pún-su.
|
長時tī內地，暝日teh獻激烈ê祈禱，我傳道了tńg去ê時，tī教會聽見見證；是tī祈禱中chi̍t ê聖徒，tùi主所受ê，寫tī chia做參考。Koân tú天，kiā ná壁ê山路，正pêng是險要ê山，tò-pêng是千丈ê山谷，目chiu lóng掩n̄g，山ê半途，只有chi̍t條細koh oe̍h活命ê小路，lím-lím-á chi̍t ê人ōe thang行nā-tiāⁿ，忽然間頭前有榮光燦爛ê主基督進前teh行ê形象，tī I ê後面有thí開雙手歡喜ê滿面，充滿感謝，tè I teh行sòng-hiong ê傳道者Chó-tîn ê形象，就是無tòa錢袋，只有所穿chit身軀ê我。確信che是所hō͘我十字架ê路，所以本書ê題名叫做「十字架ê交戰」，為tio̍h主耶穌基督ê榮光，kap姊妹協力寫本書。 |
|
1961 nî 3 goe̍h 8 ji̍t Chó-tîn Eng-gān |
1961年3月8日 Chó-tîn Eng-gān |
