Tang-pō͘ thoân-tō kiàn-bûn-kì_03
|
東部傳道見聞記_03 |
| Tân Kàng-Siông |
陳降祥 |
|
Khó-chhì Tiong 3 Lâng Khí-siáu
|
考試中3人起痟 |
|
Tī Koan-san kàu-hōe chò-kang ê sî, ū khì chham-koan Sun bo̍k-su-niû siat ê san-tē hì-lô liâu-ióng só͘, che lóng sī bián-hùi ji̍p-īⁿ, san-tē lâng chin chōe tio̍h hì-pīⁿ, si̍t-chāi ū khó-lîn, ǹg-bāng Chú ōe i-tī chiah ê lâng, hō͘ in sim-sîn jio̍k-thé lóng siū i-tī. Góa koh kúi-nā pái khì chham-koan san-tē pó-bó ha̍k-hāu, tī hia chò kang ê sî, in tú teh kî-khó, 40 miâ ê ha̍k-seng, ūi-tio̍h khó-chhì piàⁿ kàu bô mê bô ji̍t, khó-tê si̍t-chāi chin chhián, chóng-sī tī chit kúi-ji̍t kú ū 3 ê ha̍k-seng khí-siáu, hō͘ kî-û ê ha̍k-seng kap sian-siⁿ tio̍h tōa-kiaⁿ. Góa mn̄g in, hoat siáu tio̍h lōa-kú chiah ōe hó? In kóng khó-chhì liáu chiū hó khì lah, thang chai khó-chhì sī in chin tōa ê kiaⁿ-hiâⁿ kap tāng-tàⁿ.
|
Tī 關山教會做工ê時，有去參觀孫牧師娘設ê山地肺癆療養所，che攏是免費入院，山地人真濟著肺病，實在有可憐，向望主會醫治chiah-e人，hō͘ in心神肉體攏受醫治。我koh幾若擺去參觀山地保母學校，tī hia做工ê時，in tú teh期考，40名ê學生，為著考試拚到無暝無日，考題實在真淺，總是tī 這幾日久有3個學生起痟，hō͘其餘ê學生kap先生著大驚。我問in，發痟著偌久才會好？In講考試了就好去lah，thang知考試是in真大ê驚惶kap重擔。 |
|
Iáu Bōe Chi̍t-nî Ōe Chhiùⁿ Hallelujah Chorus
|
Iáu未一年會唱Hallelujah Chorus |
|
Iû-goân tī Koan-san ê sî tī lé-pài-ji̍t ū ???? cho̍k ê soan-tō-su, tùi Hoa-liân koān Bān-lêng hiong chhōa 18 miâ lâm-lú chheng-liân lâi chham-koan pó-bó ha̍k-hāu, kap hóng-būn Koan-san kàu-hōe, hit ē-po͘ kap kàu-hōe T.K.C. chhin-bo̍k-hōe, hōe-tiong in ū chhēng hoan-saⁿ thiàu-bú, gîm-si, iû-hì, koa-sû sī “Chú tī si̍p-jī-kè téng siū-khó͘ chhám-sí.” In iû-hì pâi chòe si̍p-jī-hêng chin súi, tiāu iā sī in ê tiāu, in ê sian-siⁿ ná soat-bêng hō͘ góa thiaⁿ, hō͘ góa siū tōa kám-tōng. In koh ha̍p-chhiùⁿ chin chōe si, chi̍t ūi thǹg chhiah-kha ê chheng-liân tam-jīm chí-hui kap khí-tiāu, chin oa̍h-phoat, chòe-āu in ū chhiùⁿ Hallelujah Chorus, siaⁿ koân koh chéng-chê, hui-siông gâu chhiùⁿ koh chin chāi-táⁿ, góa mn̄g in o̍h jōa-kú, in kóng goán ê sèng-koa-tūi sêng-li̍p iáu bōe chi̍t-nî, chin chiàⁿ sī pún-sū, bōe chi̍t-nî ōe hiah gâu chhiùⁿ. In ê lâm-chú khòaⁿ khí-lâi chhēng-chhah khah bōe hiah chéng-chê, nā sī lú-chú chin liû-hêng, chhēng nî-liông (????) ê saⁿ, bīn-bah pe̍h koh súi, bô su pîⁿ-tōe lâng, in chin ài lâi Sai-pō͘ lú-hêng.
|
猶原tī關山ê時tī禮拜日有????族ê宣道師，tùi花蓮縣萬寧鄉chhōa 18名男女青年來參觀保母學校，kap訪問關山教會，hit e晡kap教會T.K.C.親牧會，會中in有穿番衫跳舞、吟詩、遊戲、歌詞是「主tī十字架頂受苦慘死。」In遊戲排做十字形真súi,調也是in ê調，in ê先生那說明hō͘ 我聽，hō͘我受大感動。In koh合唱真濟詩，一位褪赤腳ê青年擔任指揮kap起調，真活潑，最後in有唱Hallelujah Chorus，聲懸koh整齊，非常gâu唱koh真在膽，我問in學偌久，in講阮ê聖歌隊成立iáu bōe一年，真正是本事，bōe一年會hiah gâu唱。In ê男子看起來穿插較bōe hiah整齊，若是女子真流行，穿尼龍（????）ê衫，面肉白koh súi,無輸平地人，in真愛來西部旅行。 |
|
Tī Sai-pō͘ Kiám Iáu Ū Tiúⁿ-ló-hōe
|
Tī 西部Kiám Iáu有長老會 |
|
Thian-chú-kàu tī tang-pō͘ ēng chin chōe pún-chîⁿ khí pài-tn̂g, in sòa soan-thoân Sai-pō͘ bô Tiúⁿ-ló-kàu lah, lóng hoán-lâi sìn Thian-chú. Só͘-í chōe-chōe sìn-tô͘ mn̄g góa kóng, tàu-tí sī sū-si̍t á m̄ sī? Hō͘ góa siūⁿ-liáu chin hó chhiò, góa ēng Sin-heng kàu-hōe chò lé-pài ê hoàn-teng-phìⁿ hō͘ in khòaⁿ, kap khì Kah-sian khai-bō͘ tián-lé chhiàⁿ 7 tâi iû-lám chhia ê hoàn-teng-phìⁿ hō͘ in khòaⁿ, in chiū bêng-pe̍k Thian-chú-kàu ê pe̍h-chha̍t soan-thoân. Góa chin ài Sai-pō͘ to͘-chhī ê kàu-hōe, chiau-thāi chiah ê kó͘-chíⁿ lāi ê sìn-tô͘, kòe-lâi chham-koan thang ke-thiⁿ in ê sìn-sim kap kiàn-sek, bián siū pa̍t kàu-phài ê ín-iú, lâi iô-tāng in ê sìn-sim. Koh khah iàu-kín ê, chiū-sī tī san-tē kàu-hōe ê kang-chok jîn-oân, tio̍h siông-siông ēng kang lâi chō͘-chiū in ū sì-chiàⁿ ê sìn-gióng, hō͘ in ū kian-kò͘ ê sìn-sim tī hong-hiám ê ji̍t tí-tng ōe tiâu.
|
天主教tī東部用真濟本錢起拜堂，in續宣傳西部無長老教--lah，攏返來信天主。所以濟濟信徒問我講，到底是事實抑m̄是？Hō͘ 我想了真好笑，我用新興教會做禮拜ê幻燈片hō͘ in看，kap去甲仙開幕典禮倩7台遊覽車ê幻燈片hō͘ in看，in就明白天主教ê白賊宣傳。我真ài西部都市ê教會，招待chiah-e古井內ê信徒，過來參觀thang加添in ê信心kap見識，免受別教派ê引誘，來搖動in ê信心。Koh較要緊--ê,就是tī山地教會ê工作人員，著常常用工來助就in有四正ê信仰，hō͘ in有堅固ê信心tī風險ê日抵當會tiâu。 |
|
Sîn-siā Piàn-chò Pài-tn̂g
|
神社變做拜堂 |
|
Ji̍t-pún lâng gâu soán-te̍k sîn-siā tē, tī Tang-pō͘ chē-chē sī Ji̍t-pún lâng ê î-bîn-chhoan, kìⁿ-nā sī î-bîn-chhoan, it-tēng ū sîn-siā. Ū só͘-chāi, î-bîn-chhoan tī kong-ho̍k āu, hō͘ pún-séng lâng chiap-siu lâi, chiū chiong sîn-siā kái chò biō hō͘ lâng kèng-pài ngó͘-siōng, nā sī sîn-siā san-tē lâng chiap-siu lâi, in chiū kái-chò lé-pài-tn̂g. Tī Siū-hong A-mī-cho̍k ê kàu-hōe chiū-sī sîn-siā kái-chō ê, chin lí-sióng, khoân-kéng hó, koh ha̍h-ēng, nā bô soaⁿ-kha hit ki tōa sîn-siā mn̂g (???) bô lâng chai chit-keng pài-tn̂g sī sîn-siā kái ê, in-ūi in koh ēng kúi-nā bān kho͘, ēng chúi-nî thi̍h-kin, kái-kiàn kàu hoàn-jiân it-sin, hō͘ beh khì chò lé-pài ê lâng ōe seⁿ-chhut chong-giâm ê sim. Goán tī lé-pài āu khì chham-ka in ê lé-pài, sian-siⁿ káng-tō tiong, khòaⁿ goán ji̍p-khì chin hoaⁿ-hí, āu-lâi ū chhiáⁿ góa tùi in kóng ōe, góa ū kóng kúi-kù ê chhéng-an, in chin hoaⁿ-hí, si̍t-chāi iā ū su-iàu lán siông-siông tùi in kó͘-lē.
|
日本人gâu選擇神社地，tī東部濟濟是日本人ê移民村，見若是移民村，一定有神社。有所在，移民村tī光復後，hō͘本省人接收來，就將神社改做廟hō͘人敬拜偶像，若是神社山地人接收來，in就改做禮拜堂。Tī壽豐阿美族ê教會就是神社改造--ê,真理想，環境好，koh合用，若無山腳hit支大神社門（???）無人知這間拜堂是神社改--ê,因為in koh用幾若萬箍，用水泥鐵筋，改建到煥然一新，hō͘ beh去做禮拜ê人會生出莊嚴ê心。阮tī禮拜後去參加in ê禮拜，先生講道中，看阮入去真歡喜，後來有請我對in講話，我有講幾句ê請安，in真歡喜，實在也有需要咱常常對in鼓勵。 |
|
Tē-it Tōa Keng Ê Tiúⁿ-ló-hōe
|
第一大間ê長老會 |
|
Lán nā siūⁿ-tio̍h Tâi-pak, Tâi-tiong, Tâi-lâm, Ko-hiông, Pîn-tong téng ê hó kàu-hōe, chiū beh siūⁿ kóng sī Tiúⁿ-ló-hōe ê tōa kàu-hōe, chóng-sī sū-si̍t Tâi-oân Tiúⁿ-ló-hōe, tē-it tōa keng ê kàu-hōe sī Tang-pō͘ A-mī-cho̍k ê Kong-ho̍k kàu-hōe, chit keng kàu-hōe chò lé-pài chí téng-po͘ ū 600 lâng í-siōng, kî-tó-hōe ū 300 gōa lâng, lán pîⁿ-tē ê kàu-hōe ū 95 nî ê le̍k-sú, ū chi̍t-keng kui-bô͘ chiah tōa ê kàu-hōe á bô? In hiān-chāi tī sîn-siā tē khí chi̍t keng tn̂g 100 chhioh, khoah 40 chhioh, chúi-nî thi̍h-kin ê lé-pài-tn̂g, in só͘ ēng ê thi̍h-ki chin tōa, in-ūi kiaⁿ tē-tāng kap hong-thai ê koan-hē, chit ê kū sîn-siā tē sī chi̍t-lia̍p ê sió-soaⁿ, tī Kong-ho̍k chòe koân ê só͘-chāi, khoân-kéng chin hó, chē khì-iû-chhia khòaⁿ tit chin chheng-chhó, beh peh chiūⁿ soaⁿ-téng ê ji̍p-kháu, iā sī ū chi̍t ê tōa sîn-siā ê mn̂g, tú hó kap Siū-hong kàu-hōe saⁿ-tâng ê khoân-kéng, put-kò chit keng pài-tn̂g chiah khí kàu thang-téng ê só͘-chāi, hiān-sî iáu bô chîⁿ thang kè-sio̍k chìn-hêng kang-sū, góa mn̄g in kang-sū-hùi ū-tēng jōa-chē? In kóng goán bōe-hiáu ū-sǹg, chí-ū khí kàu hó ûi-chí. Chit khoán sìn-sim kap hōng-hiàn ê cheng-sîn, kiám ū khah su pîⁿ-tē kàu-hōe mah? Kiaⁿ-liáu “chōe-chōe tāi-seng ê beh chò lō͘-bóe, iā chōe-chōe lō͘-bóe ê beh chò tāi-seng” góa sìn chit kù ōe ōe si̍t-hiān tī san-tē kàu-hōe.
|
咱若想著台北、台中、台南、高雄、屏東等ê好教會，就beh想講是長老會ê大教會，總是事實台灣長老會，第一大間ê教會是東部阿美族ê光復教會，這間教會做禮拜只頂晡有600人以上，祈禱會有300外人，咱平地ê教會有95年ê歷史，有一間規模chiah大ê教會抑無？In現在tī 神社地起一間長100尺，闊40尺，水泥鐵筋ê禮拜堂，in所用ê鐵支真大，因為驚地動kap風颱ê關係，這個舊神社地是一粒ê小山，tī光復最懸ê所在，環境真好，坐汽油車看得真清楚，beh爬上山頂ê入口，也是有一個大神社ê門，tú好kap壽豐教會相同ê環境，不過這間拜堂才起到窗頂ê所在，現時iáu無錢thang繼續進行工事，我問in工事費預定偌濟？In講阮bōe曉預算，只有起到好為止。這款信心kap奉獻ê精神，kiám有較輸平地教會mah？驚了「濟濟代先--ê beh做路尾，也濟濟路尾--ê beh做代先」我信這句話會實現tī山地教會。 |
|
Khí Sin Pài-tn̂g Jia̍t
|
起新拜堂熱 |
|
Tang-pō͘ ê san-tē kàu-hōe, hiān-chāi sī kiàn-tn̂g chòe ko-tiâu ê sî-kî, góa tī kū-nî chhin-ba̍k khòaⁿ-kìⁿ ê, ū 12 keng, chiah ê lóng sī pîⁿ-tē ê san-tē kàu-hōe, m̄-bián ji̍p-soaⁿ-chèng, in só͘ chè ê nâ-tô͘ lóng sī hiān-tāi-sek ê kiàn-tio̍k-bu̍t, tùi chiâⁿ-cha̍p bān-kho͘, khí kàu kúi-cha̍p-bān kho͘ put-téng, in ōe thang ēng séng chîⁿ khí súi koh ióng ê chhù, hit ê khí hoat sī án-ni: chúi-nî, thi̍h-tiâu, hiā, ēng chîⁿ khì bóe, bo̍k-liāu, soa lóng hōe-iú ka-kī chhut-kang chhái-chi̍p, sai-hū-kang chhiáⁿ hōe-iú chò, chóng-sī kang-chîⁿ chin sio̍k, sió-kang it-khài hōe-iú chò kong-kang, só͘-í ōe thang séng 3 hūn 1 ê hùi-iōng, si̍t-chāi chin thang chò lán ê bô͘-hoān, in múi-keng chí ū tit-tio̍h San-tē-chhù sió pō͘-hūn ê pang-chān, í-gōa bô tàng tê-chîⁿ, chí-ū ka-kī lia̍p-chek hōng-hiàn. Phì-jū lâi kóng, 3 nî chêng góa khì thàm-hóng Bān-lêng kàu-hōe, hit sî chí-ū chi̍t keng phòa-chháu-liâu ê pài-tn̂g, in khòaⁿ-kìⁿ keh-piah chi̍t-keng bo̍k-chō phín-khì (???) chin súi ê Thian-chú-tn̂g, chiū koat-sim beh khí sin pài-tn̂g, te̍k-pia̍t Hū-jîn-hōe múi chi̍t ê hōe-oân, gī-koat chhī chi̍t chiah ti lâi hōng-hiàn, kàu góa kū-nî 9 ge̍h koh khì hóng-būn in ê sî, chiū khòaⁿ-tio̍h chi̍t keng tú khí hó ê, chúi-nî thi̍h-kin ê sin pài-tn̂g, hō͘ góa siū chin tōa ê kám-kek, tī keh-piah ê Thian-chú-tn̂g liân ōe thang pí-tit to͘ bōe, hō͘ lán chai in khí pài-tn̂g ê jia̍t-sêng, chì-khì sī jōa-n̍i̍h tōa?
|
東部ê山地教會，現在是建堂最高潮ê時期，我tī 舊年親目看見--ê,有12間，chiah-e攏是平地ê山地教會，m̄ 免入山証，in所製ê藍圖攏是現代式ê建築物，tùi成十萬箍，起到幾十萬箍不等，in會thang用省錢起súi koh勇ê厝，hit個起法是án-ni：水泥、鐵條、瓦，用錢去買，木料、沙攏會友家己出工採集，師父工請會友做，總是工錢真俗，小工一概會友做公工，所以會thang省3份1 ê費用，實在真thang做咱ê模範，in每間只有得著山地處小部份ê幫贊，以外無tàng tê錢，只有家己粒積奉獻。譬如來講：3年前我去探訪萬寧教會，hit時只有一間破草寮ê拜堂，in看見隔壁一間木造品氣（???）真súi ê天主堂，就決心beh起新拜堂，特別婦人會每一個會員，議決飼一隻豬來奉獻，到我舊年9月koh去訪問in ê時，就看著一間tú起好--ê,水泥鐵筋ê新拜堂，hō͘我受真大ê感激，tī 隔壁ê天主堂連會thang比得都bōe,hō͘咱知in起拜堂ê熱誠，志氣是偌n̍i̍h大？ |
|
Chhàu Sim-koaⁿ-hiàn Nōa Chhâi-liāu
|
臭心肝獻爛材料 |
|
Sin-káng Lîm bo̍k-su, chhōa góa thàm-hóng hù-kīn chi̍t-keng A-mī-cho̍k ê kàu-hōe, in chí-ū 20 gōa hō͘, iā khí chi̍t-keng 7, 8 bān-kho͘ ê sin pài-tn̂g, thiaⁿ kóng hiàn chîⁿ hiàn kang í-gōa, chi̍t ê hōe-iú tio̍h koh hiàn chi̍t ê thang-liāu, kî-tiong chi̍t ê thang-kheng sī í-keng pháiⁿ khì lah. Goán kóng chit ê thang-liāu bô hó, chi̍t-ūi tiúⁿ-ló kóng, chit ê hōe-iú sìn-gióng chhàu khì, só͘-í hiàn chit ê nōa ê thang-liāu (??信者?信仰?臭?????臭??????獻上 ??) chit kù ōe iā hō͘ góa siū tōa kám-tōng, lán m̄ chai bat ēng nōa ê mi̍h. hiàn hō͘ Chú á m̄ bat? Lán tio̍h chin kín-sīn.
|
新港林牧師，chhōa我探訪附近一間阿美族ê教會，in只有20外戶，也起一間7、8萬箍ê新拜堂，聽講獻錢獻工以外，一個會友著koh獻一個窗料，其中一個窗框是已經歹去lah。阮講這個窗料無好，一位長老講，這個會友信仰臭去，所以獻這個爛ê窗料。（??信者?信仰?臭?????臭??????獻上 ??）這句話也hō͘我受大感動，咱m̄知bat用爛ê物。獻hō͘主抑m̄ bat？咱著真謹慎。 |
|
Chi-oán (???) Kì-Liām-tn̂g
|
Chi-oán(???）紀念堂 |
|
Chi-oán chit-ūi hok-im ê lú chiàn-sū, sī Thai-ia-lu cho̍k (????) tiong bô lâng m̄ bat ê, tī Ji̍t-chèng sî-tāi i chin hoaⁿ-hí lô-khó͘ thoân hok-im tī tâng-cho̍k ê tiong-kan, kong-ho̍k āu ū lâng siá chi̍t pún chheh kiò chòe “I chhōa in chhut”, iā thang kóng sī “Chi-oán toān”. Sun bo̍k-su ūi-tio̍h beh siàu-liām i thoân hok-im hi-seng ê cheng-sîn, tī Thài-ló͘-kok ji̍p kháu ê soaⁿ-kha ūi i khí chi̍t keng “Chi-oán kì-liām lé-pài-tn̂g” sui-jiân khí bô tōa-keng, chóng-sī chin gē-su̍t ê khí-hoat (chhin-chhiūⁿ Tâi-oân Sîn-ha̍k-īⁿ ēng chio̍h-thâu, thi̍h-kin, chúi-nî khí) ê chit keng kàu-hōe, iā thang kóng le̍k-sú siōng ta̍t-tit kì-liām ê kàu-hōe, tī chia khoân-kéng súi, thang hō͘ hoâiⁿ-koàn, So͘-hoa nn̄g kong-lō͘ ê lú-kheh tám-gióng (瞻仰) Ki-tok-tô͘ ê thoân-kàu cheng-sîn, chin-chiàⁿ thoân hok-im ê lâng, in ê kha-pō͘ súi kàu cháiⁿ-iūⁿ?” Goán chi̍t-hêng sì-miâ ji̍p Thài-ló͘-kok oán-chiok, tú-hó hoâiⁿ-koàn kong-lō͘ siū chúi-chai tōa sún-hāi, kui-tiâu ê chúi-nî lō͘, lóng lâu pháiⁿ, ko͘-put-chiong tio̍h koh ēng pōng-chí pōng soaⁿ-phiâⁿ. Kúi-nā pah lâng teh chò kong-kéng hō͘ goán tio̍h-kiaⁿ, ūi-tio̍h beh khui chit tiâu lō͘ hiah khó͘-sim mah? Thang chai lán ê Chú thè lán khui chi̍t-tiâu éng-oa̍h ê lō͘, só͘ chhut ê tāi-kè jōa-tōa, lán iā tio̍h án-ni bô hiâm lô-khó͘ thàn ki-hōe thoân tō-lí hō͘ hiah ê bī tit-kiù ê lâng lâi pò-tap Chú ê tōa un. Thài-ló͘-kok ê kéng-tì chin súi, góa ài chhiáⁿ chu-ūi tho̍k-chiá ū ki-hōe khì thit-thô, lí chiū beh kám-kak Siōng-tè chhòng-chō ê kî-biāu kap úi-tāi. Thiaⁿ kóng Thian-siông ê kéng-tì koh khah súi, chóng-sī hit sî lō͘ pháiⁿ bōe tit ji̍p.
|
Chi-oán這位福音ê女戰士，是泰雅族（????）中無人m̄ bat--ê,tī 日政時代伊真歡喜勞苦傳福音tī同族ê中間，光復後有人寫一本冊叫做《伊chhōa in出》，也thang講是《Chi-oán傳》。孫牧師為著beh數念伊傳福音犧牲ê精神，tī 太魯閣入口ê山腳為伊起一間「Chi-oán紀念禮拜堂」雖然起無大間，總是真藝術ê起法（親像台灣神學院用石頭、鐵筋、水泥起）ê這間教會，也thang講歷史上值得紀念ê教會，tī chia環境súi,thang hō͘ 橫貫、蘇花兩公路ê旅客瞻仰基督徒ê傳教精神，真正傳福音ê人，in腳步súi到怎樣？」阮一行四名入太魯閣遠足，tú好橫貫公路受水災大損害，歸條ê水泥路，攏流歹，姑不chiong著koh用磅籽磅山坪。幾若百人teh做光景hō͘ 阮著驚，為著beh開這條路hiah苦心mah？Thang知咱ê主替咱開一條永活ê路，所出ê代價偌大，咱也著án-ni無嫌勞苦趁機會傳道理hō͘ hiah-e未得救ê人來報答主ê大恩。太魯閣ê景致真súi,我ài請諸位讀者有機會去thit-thô,你就beh感覺上帝創造ê奇妙kap偉大。聽講天祥ê景致koh較súi,總是hit時路歹bōe得入。 |
|
Tha̍k Bián-chîⁿ Ê Ha̍k-hāu
|
讀免錢ê學校 |
|
Tī Tang-pō͘ ū 3 keng tha̍k-chheh bián chîⁿ ê ha̍k-hāu, chiū-sī lán Tiúⁿ-ló-hōe kap Sun bo̍k-su-niû kò-jîn só͘ siat ê. Thâu chi̍t keng sī Gio̍k-san-sîn-ha̍k-su-īⁿ, ūi-tì sī tī Siū-hong Tî-lâm-chhoan, tùi Hoa-liân kàu siū-hong, ū kong-lō͘ khì-chhia tùi Su-īⁿ keng-kòe, hia ê san-súi kéng-tì ke̍k-kî hó, Hoa-liân koān siūⁿ beh chiong hit ūi chò hong-kéng khu, tì-kàu Su-īⁿ sin hāu-sià ê kiàn-siat siū chōe-chōe ê chó͘-gāi, hiān-sî ha̍k-hāu chí-ū kúi keng tek-á-chhù tī soaⁿ-phiâⁿ, thâu-chêng ū chi̍t ê tōa-pi iā ū soaⁿ, kéng-tì chin súi, chhin-chhiūⁿ chi̍t-pak ê tô͘. Goán tī Siū-hong chò kang ê sî, ū 2 pái khì hia kò-chûn tiò-hî, iā tī ha̍k-hāu chia̍h-pn̄g, hāu-tiúⁿ Ko bo̍k-su chin jīn-chin keng-êng ha̍k-īⁿ, ha̍k-seng tī kong-khò í-gōa, ū chéng-lí ha̍k-hāu iōng-tē, koân-kē ku̍t hō͘ pêⁿ, bô lō͘ chō kàu ū lō͘, koh iā ū chō lîm, chai kam-á, lóng sī sian-siⁿ ha̍k-seng saⁿ-kap chò, ū chi̍t ūi Tiuⁿ bo̍k-su tùi chit hong-bīn chin ū keng-giām. Tī lé-pài-ji̍t ha̍k-seng siū phài kàu san-tē pún-cho̍k ê kàu-hōe khì chò kang. Chit keng ha̍k-hāu, chóng-sī sū-si̍t chiân-tô͘ iáu chin chōe khùn-lân, lán tio̍h to-to ūi chit keng ha̍k-hāu tāi-tó.
|
Tī東部有3間讀冊免錢ê學校，就是咱長老會kap孫牧師娘個人所設--ê。頭一間是玉山神學書院，位置是tī 壽豐池南村，tùi花蓮到壽豐，有公路汽車tùi書院經過，hia-e山水景致極其好，花蓮縣想beh將hit位做風景區，致到師院新校舍ê建設受濟濟ê阻礙，現時學校只有幾間竹仔厝tī 山坪，頭前有一個大埤也有山，景致真súi,親像一幅ê圖。阮tī 壽豐做工ê時，有2擺去hia划船釣魚，也tī學校食飯，校長高牧師真認真經營學院，學生tī功課以外，有整理學校用地，懸低掘hō͘ 平，無路造到有路，koh也有造林，栽柑仔，攏是先生學生相kap做，有一位張牧師對這方面真有經驗。Tī 禮拜日學生受派到山地本族ê教會去做工。這間學校，總是事實前途iáu真濟困難，咱著多多為這間學校代禱。 |
|
Koh lâi tē-jī keng sī tī Koan-san-tìn, kau-thong lī-piān, só͘-chāi ha̍p-ēng, sī Sun bo̍k-su-niû siat ê ū 40 miâ ê san-tē lú-chú tùi ta̍k-cho̍k ê só͘-chāi phài lâi tha̍k-chheh, khí-thâu sī tha̍k pòaⁿ-nî kú, chiū pit-gia̍p phài khì kok kàu-hōe kàiu-tī-hn̂g, sui-jiân chí-ū tha̍k pòaⁿ-nî, chóng-sī in ū im-ga̍k ê thian-châi, tôaⁿ-khîm, kà koa, iû-hì, lóng ū te̍k-sek, bô su pêⁿ-tē kàu-hōe iù-tī-hn̂g kà ê chiat-bo̍k. Tùi chit keng ha̍k-hāu í-keng chhut chin chōe lāu-su, hiān-chāi thiaⁿ kóng sī 2 nî chè, Ô͘ bo̍k-su kiam hāu-tiúⁿ teh liāu-lí, in iā sī tha̍k-chheh, chia̍h-pn̄g lóng bián chîⁿ, só͘-í san-tē lú-chú chin ài tha̍k.
|
Koh來第二間是tī 關山鎮，交通利便，所在合用，是孫牧師娘設--ê,有40名ê山地女子tùi逐族ê所在派來讀冊，起頭是讀半年久，就畢業派去各教會教幼稚園，雖然只有讀半年，總是in有音樂ê天才，彈琴、教歌、遊戲，攏有特色，無輸平地教會幼稚園教ê節目。Tùi這間學校已經出真濟老師，現在聽講是2年制，胡牧師兼校長teh料理，in也是讀冊、食飯攏免錢，所以山地女子真ài讀。 |
|
Tē saⁿ keng sī Khèng-hong lú-chú hō͘-lí ha̍k-hāu, iā sī Sun bo̍k-su-niû siat ê, chhiáⁿ Toh bo̍k-su-niû teh liāu-lí, ha̍k-seng 40 miâ, iû-goân tùi ta̍k cho̍k lâi ha̍k ê, in ta̍k chá-khí ū chó-thian kî-tó-hōe, lé-pài-ji̍t iā tio̍h khì pún-cho̍k pang-chān Chú-ji̍t-o̍h, chia ê ha̍k-seng chiām-sî tī Khèng-hong kàu-hōe lāi tha̍k-chheh, bô hāu-sià, khiok sī ū ha̍k-hāu, ha̍k-seng ê chia̍h-si̍t iā sī ha̍k-hāu hū-tam. Góa tī chia chi̍t lé-pài kú, khòaⁿ-kìⁿ in ê seng-oa̍h chin thian-chin lān-bān, in ê bo̍k-tek sī pit-gia̍p liáu, beh tńg-khì san-tē chí-tō san-tē lâng ū ōe-seng, chìn-ji̍p tī lí-sióng ê seng-oa̍h, che iā sī chi̍t kiāⁿ chin iàu-kín ê sū. Í-siōng chit saⁿ-keng ha̍k-hāu chóng-ha̍p khí-lâi, sī teh chō-chiū chong-kàu kàu-io̍k kap seng-oa̍h si̍t-chè hong-bīn ê chí-tō-chiá, siong-sìn san-tē lâng beh tùi chit 3 keng ha̍k-hāu só͘ chhut ê jîn-châi lâi tit-tio̍h chin hó ê chí-tō kap pang-chān, goān Chú pang-chān tī ha̍k-hāu chò kang ê lâng, ū thiàⁿ-sim kap thun-lún ê sim, lâi hoat-tián chit ê iàu-kín ê kang.
|
第3間是慶豐女子護理學校，也是孫牧師娘設--ê,請卓牧師娘teh料理，學生40名，猶原tùi逐族來學--ê,in逐早起有早天祈禱會，禮拜日也著去本族幫贊主日學，chia-e學生暫時tī慶豐教會內讀冊，無校舍，卻是有學校，學生ê食食也是學校負擔，我tī chia一禮拜久，看見in ê生活真天真瀾漫，in ê目的是畢業了，beh轉去山地指導山地人有衛生，進入tī理想ê生活，che也是一件真要緊ê事。以上這三間學校總合起來，是teh造就宗教教育kap生活實際方面ê指導者，相信山地人beh tùi這3間學校所出ê人才來得著真好ê指導kap幫贊，願主幫贊tī 學校做工ê人，有疼心kap吞忍ê心，來發展這個要緊ê工。 |
|
Kò-jîn Tâm-lūn Kap Siau-sit
|
個人談論Kap消息 |
|
Hòng-tōng Chò Thoân-tō
|
放蕩做傳道 |
|
Lō͘-ka 15 chiuⁿ só͘ siá ê hòng-tōng chú, tû-khì lāu-pē ê thiàⁿ, kap hòng-tōng chú ê hoán-hóe, sī bô sím-mi̍h hō͘ lán hó ê ìn-siōng, te̍k-pia̍t chit 2 jī hòng-tōng, góa thiaⁿ liáu bô kám-kak hó thiaⁿ, chóng-sī tī san-tē ê soan-tō-su tiong ū chi̍t-ūi kiò chò Ia̍p Hòng-tōng ê, Chú tiàu i chhut-lâi thoân hok-im, Un bo̍k-su kā góa kài-siāu kóng, chit ūi chiū-sī “Hòng-tōng thoân-tō”, goân-lâi sī i ê miâ kiò Hòng-tōng, i í-keng chin jia̍t-sim teh chò Chú ê kang beh chhōa hiah ê hòng-tōng ê kiáⁿ-jî, tńg-lâi kui-ho̍k tī chû-ài ê Thiⁿ-pē. In-ūi Chú bat kóng, “Pháiⁿ lâng tiong ū chi̍t lâng hoán-hóe chiū tī thiⁿ-n̍i̍h iā beh án-ni ūi-tio̍h i hoaⁿ-hí”.
|
路加15章所寫ê放蕩子，除去老父ê疼，kap放蕩子ê反悔，是無甚mi̍h hō͘ 咱好ê印象，特別這2字放蕩，我聽了無感覺好聽，總是tī 山地ê宣道師中有一位叫做葉放蕩--ê,主召伊出來傳福音，溫牧師kā我介紹講，這位就是「放蕩傳道」，原來是伊ê名叫放蕩，伊已經真熱心teh做主ê工beh chhōa hiah-e放蕩ê子兒，轉來歸服tī慈愛ê天父。因為主bat講：「歹人中有一人反悔就tī天--n̍i̍h也beh án-ni為著伊歡喜」。 |
|
Sím-mi̍h Sī Siōng-tè Ê Chí-ì
|
甚mi̍h是上帝ê旨意 |
|
Tī 1959 nî ê 7 ge̍h, goán tī Tâi-tang kàu-hōe hioh-mê, kap chi̍t ūi tùi Sai-pō͘ beh khì hù-jīm ê tâng-kang, tâng pâng-keng, i chin hùn-khài tong-kio̍k ê lâng, thàn jîn-chêng chò sū, bô chiàu hoat-tō͘, i koh kóng chiàu thiu-khau m̄ sī góa tio̍h lâi Tang Tiong chò-kang, chóng-sī in-ūi bó͘ lâng m̄ lâi chiū tu góa lâi, án-ni kiám iā sī Siōng-tè ê chí-ì mah? I si̍t-chāi chin hùn-khài, nā sī góa an-ùi i kóng, kiám-chhái hiah ê lâng án-ni chòe, iā sī ū Siōng-tè ê hó chí-ì. Keng-kòe chi̍t-ge̍h ji̍t āu, góa khì i ê kàu-hōe chò kang, thiaⁿ kóng i í-keng kap chi̍t-ūi Tang-pō͘ chhut-miâ ê bo̍k-su ê chhian-kim tēng-hun, (hit ūi sió-chiá bat chò góa ê thong-e̍k), góa koh mn̄g hit ê tâng-kang kóng, tàu-tí lí lâi Tang-pō͘ chò kang sī Siōng-tè ê chí-ì á m̄ sī? I ìn kóng, “Tek-khak sī!” Si̍t-chāi Chú ê chí-ì chin kî-biāu, kàu sî lán chiah ōe bêng-pe̍k, lán eng-kai tio̍h sūn-ho̍k Chú, chiah ōe siū chiok-hok.
|
Tī 1959年ê 7月，阮tī台東教會歇暝，kap一位tùi西部beh去赴任ê同工同房間，伊真憤慨當局ê人，趁人情做事，無照法度，伊koh講照抽khau m̄ 是我著來東中做工，總是因為某人 m̄ 來就tu我來，án-ni kiám也是上帝ê旨意mah？伊實在真憤慨，若是我安慰伊講，kiám-chhái hiah-e人án-ni做，也是有上帝ê好旨意。經過一月日後，我去伊ê教會做工，聽講伊已經kap一位東部出名ê牧師ê千金訂婚，（Hit位小姐bat做我ê通譯），我koh問hit個同工講，到底你來東部做工是上帝ê旨意抑 m̄ 是？伊應講：「的確是！」實在主ê旨意真奇妙，到時咱才會明白，咱應該著順服主，才會受祝福。 |
|
Bêng-khián Thau Kā Ê
|
名犬偷咬鞋 |
|
Hù-lí ê Tiuⁿ bo̍k-su, chhī chi̍t chiah 4 chheng kho͘ ê káu-á kiáⁿ, i ēng chin chōe cheng-sîn kap hong-hoat teh kà, iā tùi Ji̍t-pún bóe chheh lâi tha̍k, í-keng ū kà chin chōe pō͘-sò͘ lah! Chóng-sī chit chiah káu-á ta̍k-àm to͘ lâi goán ê bîn-chhn̂g-kha kā phôe-ê, goán chiū kā bo̍k-su kóng, bo̍k-su chiū kà káu m̄ thang kā lâng-kheh thau kā ê, nā sī káu-á lóng m̄ thiaⁿ chú-lâng ê ōe, chin-chiàⁿ Bêng-khián thau kā ôe. Kin-á-ji̍t chōe-chōe Ki-tok-tô͘ iā sī chhin-chhiūⁿ Bêng-khián ōe thau kā ê, in iáu ōe lim-chiú, chia̍h-hun, chhoh-pháiⁿ chhùi, khah kóng to m̄ kóe.
|
富里ê張牧師，飼一隻4千箍ê狗仔子，伊用真濟精神kap方法teh教，也tùi日本買冊來讀，已經有教真濟步數lah！總是這隻狗仔逐暗都來阮ê眠床腳咬皮鞋，阮就kā牧師講，牧師就教狗 m̄ thang kā人客偷咬鞋，若是狗仔攏 m̄ 聽主人ê話，真正名犬偷咬鞋。今仔日濟濟基督徒也是親像名犬會偷咬鞋，in iáu會lim酒、食薰、chhoh歹嘴，khah講都m̄改。 |
|
Ki-su̍t Būn-tôe
|
技術問題 |
|
Hōng-lîm kàu-hōe lâng-kheh-thiaⁿ ê mn̂g chin kē, chóng-pho͘ téng kàu mn̂g-bâi chiah 4 chhioh gōe, só͘-í beh chhut pâng-keng nā bô chù-ì ōe kho̍k tio̍h thâu-khak, Í-chêng chi̍t ūi bo̍k-su khì chò kang, sian-siⁿ kóng tio̍h chù-ì, m̄ thang kòng tio̍h thâu-khak, hit ūi bo̍k-su kóng, bōe lah! che sī ki-su̍t būn-tôe, chóng-sī bô chi̍t-sî-á-kú kòng tio̍h 2 pái. Góa khì chò kang ê sî, sian-siⁿ kap thài-thài iā sī seng kā góa thong-ti, góa kóng góa ê ki-su̍t ún-tàng khah hó, chhiáⁿ bián khòa-ì, kàu khùn tiong-tàu khí-lâi, sûi-sî thâu-khak kòng chi̍t-lûi, sian-siⁿ hu-hū tī in ê pâng-keng chhiò kàu ha̍h ha̍h kiò, sòa kóng lí ê ki-su̍t ū iáⁿ bōe bái to-tio̍h, chhin-chhiūⁿ án-ni Ki-tok-tô͘ nā bô kín-sīn, chí khò ka-kī chiū beh sit-pāi, nā ū iáⁿ ki-su̍t jōa-hó?
|
鳳林教會人客廳ê門真低，總鋪頂到門眉才 4尺外，所以beh出房間若無注意會磕著頭殼，以前一位牧師去做工，先生講著注意，m̄ thang摃著頭殼，hit位牧師講：「Bōe lah！che是技術問題。」總是無一時仔久摃著2擺。我去做工ê時，先生kap太太也是先kā我通知，我講我ê技術穩當較好，請免掛意，到睏中晝起來，隨時頭殼摃一lûi,先生夫婦tī in ê房間笑到哈哈叫，續講你ê技術有影bōe bái都著，親像án-ni基督徒若無謹慎，只靠家己就beh失敗，那有影技術偌好？ |
|
Khòng Kâu Ka
|
炕猴ka |
|
Iā sī tī Hōng-lîm kàu-hōe só͘ tú-tio̍h ê sū, thoân-tō sian-siⁿ hu-hū, ūi-tio̍h góa khì ta̍k àm to hiâⁿ e̍k-tháng chúi hō͘ góa sóe sin-khu, chóng-sī in hiâⁿ chúi sī ēng chit ê tōa seⁿ-tiáⁿ, chhin-chhiūⁿ e̍k-tháng hiah tōa, chit khoán tiáⁿ tāi-khài sī lông-chhoan ê lâng sa̍h ti-liāu teh ēng ê, tiáⁿ tóe ēng pang chū teh, chóng-sī nā lo̍h khì chìm, bô sòe-jī, pang cháu khì lī-khui tiáⁿ-té ōe ù-tio̍h sin-khu, sio-tio̍h chin thiàⁿ, in-ūi góa sī siùⁿ kâu, só͘-í ta̍k-pái nā beh lo̍h khì chìm, chiū kám-kak beh lo̍h-khì khòng kâu-ka chi̍t-iūⁿ, āu-lâi hō͘ sian-siⁿ in chai-iáⁿ, kàu sî-chūn chiū kiò kóng, “Tân sian-siⁿ chhiáⁿ lí lâi khòng kâu-ka.”
|
也是tī 鳳林教會所tú著ê事，傳道先生夫婦，為著我去逐暗都hiâⁿ 浴桶水hō͘ 我洗身軀，總是in焚水是用這個大seⁿ 鼎，親像浴桶hiah大，這款鼎大概是農村ê人sa̍h豬料teh用--ê,鼎底用枋chū teh，總是若落去浸，無細膩，枋走去離開鼎底會污著身軀，燒著真疼，因為我是相猴，所以逐擺若beh落去浸，就感覺beh落去炕猴ka一樣，後來hō͘先生in知影，到時陣就叫講：「陳--先生請你來炕猴ka。」 |
|
Góa Iā Sī Bô Pâi Ê
|
我也是無牌--ê |
|
Gio̍k-lí kàu-hōe Chhòa tiúⁿ-ló, tī Tang-pō͘ ê kàu-hōe tāi-khài lâng lóng bat i, i chò i-seng, i-su̍t te̍k-pia̍t hó, tī kàu-hōe koh jia̍t-sim, i mn̄g góa kóng “Lí sī tó-ūi ê Sîn-ha̍k-hāu pit-gia̍p ê ”, góa sêng-si̍t tùi i kóng, “Góa bô tha̍k sím-mi̍h Sîn-ha̍k, nā chiàu it-poaⁿ lâi khòaⁿ, sī bô pâi ê.” I chin pháiⁿ-sè ê khoán, sûi-sî ìn kóng “Bô iàu-kín, góa chò i-seng iā sī bô pâi ê”. Si̍t-chāi sī tông-pēng siong-lîn.
|
玉里教會蔡長老，tī東部ê教會大概人攏bat伊，伊做醫生，醫術特別好，tī 教會koh熱心，伊問我講「你是tó位ê神學校畢業--ê」，我誠實對伊講：「我無讀甚mi̍h神學，若照一般來看，是無牌--ê。」伊真歹勢ê款，隨時應講「無要緊，我做醫生也是無牌--ê」。實在是同病相憐。 |
|
Kó͘-bú Chia̍h Káu Bah
|
鼓舞食狗肉 |
|
Tī Gio̍k-lí kàu-hōe iáu chi̍t ūi Lí tiúⁿ-ló, sī Kńg tang lâng, iā sī tiong i-su, i ê bīn kap hêng-thé, kap Chhòa tiúⁿ-ló chin saⁿ-tâng, bô saⁿ-tâng ê sī chí-ū kóng ōe. Ū chi̍t ji̍t goán 4 ūi tâng-kang khì thàm-hóng i, i chin hoaⁿ-hí, sûi-sî kiò tiúⁿ-ló-niû khì kiò 2 tōa phiat ê bah-pau, pún-sin khì chàu-kha phâng chi̍t tiáⁿ káu-bah, kó͘-bú goán chia̍h bah-pau, phòe káu-bah, góa í-gōa ê tâng-kang iáu m̄ bat chia̍h káu-bah, khí-thâu m̄ káⁿ chia̍h, chóng-sī bōe kham-tit i kó͘-bú, tāi-ke chiū o̍h chia̍h, chí-ū chi̍t ūi m̄ káⁿ chia̍h bah, iáu-kú káu-bah thng lim kàu pá, Lí tiúⁿ-ló kóng, Tâi-oân ê káu-bah chi̍t-kin 10 kho͘ chó-iū, nā sī Kńg-tang 3 kin ti-bah chiah ōe thang ōaⁿ chi̍t kin káu-bah, nā tī Tâi-oân bōe hiáu chia̍h káu-bah sī chin gōng, i tùi goán kóng ê goán lóng ū tông-ì ê khoán. Lia̍t-ūi tho̍k-chiá, lán kó͘-bú lâng sìn Iâ-so͘, ū chit-khoán ê jia̍t-chêng á-bô? Kiám m̄ sī khah su Lí tiúⁿ-ló teh kó͘-bú lâng chia̍h káu-bah mah?
|
Tī 玉里教會iáu一位李長老，是廣東人，也是中醫師，伊ê面kap形體，kap蔡長老真相同，無相同--ê是只有講話。有一日阮4位同工去探訪伊，伊真歡喜，隨時叫長老娘去叫2大phiat ê肉包，本身去灶腳捧一鼎狗肉，鼓舞阮食肉包，配狗肉，我以外ê同工iáu m̄ bat食狗肉，起頭m̄ 敢食，總是bōe堪得伊鼓舞，大家就學食，只有一位m̄ 敢食肉，iáu-kú狗肉湯lim到飽，李長老講：「台灣ê狗肉一斤10箍左右，若是廣東3斤豬肉才會thang換一斤狗肉，若tī台灣bōe曉食狗肉是真憨。」伊對阮講--ê阮攏有同意ê款。列位讀者，咱鼓舞人信耶穌，有這款ê熱情抑無？Kiám m̄是較輸李長老teh鼓舞人食狗肉mah？ |
|
Góa M̄-tio̍h Chhōa 4 Chhioh Pòaⁿ Ê
|
我M̄著娶4尺半--ê |
|
Tī Tang-pō͘ thoân-tō ê sî, bat tī 3 keng kàu-hōe káng-ián “Chheng-liân kap kiat-hun būn-tê”, múi hôe hù-hōe ê lâng ū chi̍t pah gōa, nn̄g pah, saⁿ pah, chit khoán ê sēng-hóng. Tī káng-ián tiong góa bat kóng-khí beh chò chhin ê lâm-lú, sin-thé ê koân-kē tio̍h ū phòe-ha̍p lâm ê tio̍h koân lú ê 3 chhùn chì 5 chhùn ê tiong-kan, góa káng-ián soah ê sî, ū chi̍t-ūi chheng-liân cháu lâi mn̄g góa kóng “Sian-siⁿ chiàu lí kóng, góa m̄ tio̍h chhōa 4 chhioh pòaⁿ ê? nā án-ni kiám m̄ sī ná seⁿ ná sòe-hàn?” Góa khòaⁿ i chin put-ho̍k góa ê soat, in-ūi i khah bô 4 chhioh 9, góa kā i kóng, “Nā sī lí kiám-chhái chhōa pí lí khah tōa-hàn ê khah hó”, in-ūi chit hō put-chāi tī lu̍t-hoat ē, sī tī un-tián ē.
|
Tī東部傳道ê時，bat tī 3間教會講演「青年kap結婚問題」，每回赴會ê人有一百外、兩百、三百，這款ê盛況。Tī 講演中我bat講起beh做親ê男女，身體ê懸低著有配合男--ê著懸女--ê 3寸至5寸ê中間，我講演煞ê時，有一位青年走來問我講「先生照你講，我m̄著娶4尺半--ê?若án-ni kiám m̄是那生那細漢？」我看伊真不服我ê說，因為伊較無4尺9，我kā伊講：「若是你kiám-chhái娶比你較大漢--ê較好」，因為這號不在tī律法下，是tī 恩典下。 |
|
Góa Hō͘ Lí Chhiáⁿ Chin Pá
|
我Hō͘你請真飽 |
|
Iáu tī bó͘ kàu-hōe, siāng-khoán káng-ián chit ê tôe-ba̍k, hit àm iok ū 3 pah miâ ê thiaⁿ-chiòng, iû-goân sī kóng-khí beh chò chhin ê lâm-lú, thé-keh ê soán-te̍k tio̍h ū sek-ha̍p, lâm-lú ê pûi, sán, tio̍h ū sù-phòe, chhin-chhiūⁿ pûi ê phòe sán ê, sán-ê chhōa pûi ê sī chin pháiⁿ khòaⁿ, kap o͘-chhiu chhōa súi-gû bô koh-iūⁿ, chóng-sī kiat-hun āu chiah piàn hêng ê put-chāi chhú-hān, thiaⁿ-chiòng tāi-ke lóng chhiò chhut-siaⁿ sòa chù-ba̍k khòaⁿ chi̍t ūi iok 130 kin ê tiúⁿ-ló-niû, in-ūi i ê tiōng-hu chin sán, kàu káng-ián soah, tiúⁿ-ló-niû chhiò-chhiò tùi góa kóng “sian-siⁿ chin to-siā, góa ē-hng hō͘ lí chhiáⁿ chin pá”, góa sûi-sî kā i hōe sit-lé, chhiáⁿ i goân-liōng, i koh kā góa kóng, “góa sī teh kap lí kóng-chhiò, koh góa iā sī kiat-hun āu chiah pûi ê, chhiáⁿ lí an-sim,” góa thiaⁿ liáu sim chiah khui, kak-tit kóng ōe sī chi̍t kiāⁿ khùn-lân ê sū.
|
Iáu tī某教會，siāng款講演這個題目，hit暗約有3百名ê聽眾，猶原是講起beh做親ê男女，體格ê選擇著有適合，男女ê肥、瘦，著有適配，親像肥--ê配瘦--ê,瘦--ê娶肥--ê是真歹看，kap烏鶖娶水牛無各樣，總是結婚後才變形--ê不在此限，聽眾大家攏笑出聲續注目看一位約130斤ê長老娘，因為伊ê丈夫真瘦，到講演煞，長老娘笑笑對我講「先生真多謝，我e昏hō͘ 你請真飽」，我隨時kā伊會失禮，請伊原諒，伊koh kā我講：「我是teh kap你講笑，koh我也是結婚後才肥--ê,請你安心，」我聽了心才開，覺得講話是一件困難ê事。 |
|
Chèng Chhiū-á Chai Chio̍h-Thâu
|
種樹仔栽石頭 |
|
Hoa-liân Tiong-san kàu-hōe, chin chōe tióng-chip chhù-bī oân-gē (園藝), chèng koaⁿ-lân, á sī chhiū-á, ū ê khioh chio̍h-thâu pâi tī tiâⁿ-n̍i̍h, chin ū gē-su̍t. Sèng-keng Kong-hōe ê Gūi tiúⁿ-ló, koh khah sī chhù-bī, i iā ū chhōa góa khì Chiu chip-sū ê chhù khòaⁿ lân, i só͘ chèng ê lân, ū ê chi̍t-châng 5 chheng chí chi̍t-bān put-téng, góa khòaⁿ lóng m̄ chai ū hit ê kè-ta̍t, i iā chèng chin chōe kó͘-tóng-chhêng, múi-châng ū 1, 2 chheng-kho͘ ê kè-ta̍t, i kóng ū ê tiau 2, 3 cha̍p nî kú, ēng chin chōe kang, chóng-sī iáu kú tī pôaⁿ-n̍i̍h sòe-sòe châng, teh pâi kó͘-tóng, hō͘ góa siūⁿ kàu tī kin-á-ji̍t ê kàu-hōe, iû-goân ū pâi chin chōe lêng-miā bô tióng-chìn ê hiaⁿ-ché, chhin-chhiūⁿ Chiu chip-sū ê kó͘-tóng chhiū chi̍t-iūⁿ. Pó-lô iā bat tùi Ko-lîm-to ê sìn-tô͘ kóng “Góa bat ēng lin chhī lín, bô ēng bí-niû, in-ūi chêng bōe kham-tit, kàu-taⁿ iáu bōe ōe”. Lia̍t-ūi tho̍k-chiá, kó͘-tóng ū khòaⁿ súi ê kè-ta̍t, kó͘-tóng sìn-tô͘ kiám ū sím-mi̍h kè-ta̍t mah? Gūi tiúⁿ-ló koh chhōa góa khì chi̍t ūi, chham-koan pâi chio̍h-thâu ê tiâⁿ, pâi kàu ū hoe ū jī, i kóng pâi chio̍h-thâu tē-it séng-kang, in-ūi m̄-bián ak-chúi, góa siūⁿ liáu chin ū-thong, í-āu nā chhut-gōa ū khòaⁿ tio̍h koh-iūⁿ ê chio̍h-thâu, chiū khioh tńg--lâi, tâng-kang ê Si sian-siⁿ kóng, “Lí iā teh chio̍h-thâu siáu mah?”
|
花蓮中山教會，真濟長執趣味園藝種官蘭，抑是樹仔，有--ê拾石頭排tī 埕--n̍i̍h,真有藝術。聖經公會ê魏長老，koh較是趣味，伊也有chhōa我去周執事ê厝看蘭，伊所種ê蘭，有--ê一欉5千至一萬不等，我看攏m̄知有hit個價值，伊也種真濟古董松，每欉有1、2千箍ê價值，伊講有--ê刁2、3十年久，用真濟工，總是iáu久tī盤n̍i̍h細細欉，teh排古董，hō͘ 我想到tī 今仔日ê教會，猶原有排真濟靈命無長進ê兄姐，親像周執事ê古董樹一樣。保羅也bat 對哥林多ê信徒講：「我bat用乳飼lín,無用米糧，因為前bōe堪得，到今iáu未會」。列位讀者，古董有看súi ê價值，古董信徒kiám有甚mi̍h價值mah？魏長老koh chhōa我去一位，參觀排石頭ê埕，排到有花有字，伊講排石頭第一省工，因為 m̄ 免沃水，我想了真有通，以後若出外有看著各樣ê石頭，就拾轉--來，同工ê施先生講：「你也teh石頭痟mah？」 |
|
Lán Sìn Iâ-so͘ M̄ Thang Pháiⁿ Sim
|
咱信耶穌M̄ Thang歹心 |
|
Iû-goân tī Hoa-liân kàu-hōe só͘ thiaⁿ-tio̍h ê sū, ū chi̍t ūi Tiuⁿ chip-sū sī teh chò bí-siong, i tī 6 nî chêng lâi sìn Iâ-so͘, tùi 6 nî chêng saⁿ bat kàu-taⁿ i lóng kiò góa “Hiong-chhin--ê”, in-ūi i sī Lo̍k-káng lâng, góa sī Hô-bí lâng, tùi án-ni lâi khan chhin. I kā góa kóng, í-chêng lóng kap pháiⁿ-sim ê Ki-tok-tô͘ chò chhù-piⁿ, chi̍t-ê sī thè-jīm ê lāu thoân-tō (hiān-sî koh chhut-lâi chò kang) chi̍t-ê sī tiúⁿ-ló, in lóng chin pháiⁿ-sim, ka-kī oa̍h chiū hó, pa̍t-lâng sí liáu-liáu bô iàu-kín, góa mn̄g i, “in sī ū sím-mi̍h phiⁿ-khàm lí á m̄ sī?” I kóng, “He m̄ sī nò͘!” “Nā bô sī cháiⁿ-iūⁿ pháiⁿ-sim?” I ìn kóng, “Sìn Iâ-so͘ ê lâng ōe chiūⁿ thian-tông, bô sìn ê lâng ōe lo̍h tē-ge̍k, in kap góa chò chhù-piⁿ, m̄ bat chio góa sìn Iâ-so͘, án-ni bô pháiⁿ-sim mah?” Góa thiaⁿ-liáu siū tōa kám-kek. Chit-ūi chip-sū hu-hū sìn Chú 6 nî, í-keng chhōa kúi-nā hō͘ lâi sìn Chú, i kóng góa tek-khak m̄ ài chò chi̍t ê pháiⁿ-sim ê Ki-tok-tô͘. Chu-ūi Chú-lāi ê hiaⁿ-ché, lí sī pháiⁿ-sim ê, á sī hó-sim ê Ki-tok-tô͘? Pó-lô kóng “Hok-im góa nā bô thoân chiū ū chai-ē,” lán eng-kai tio̍h o̍h Tiuⁿ chip-sū ji̍t-ji̍t ūi Chú chò kiàn-chèng, hō͘ bān kok lóng kui Ki-tok sī sim só͘ goān.
|
猶原tī 花蓮教會所聽著ê事，有一位張執事是teh做米商，伊tī 6年前來信耶穌，tùi 6年前相bat到今攏叫我「鄉親--ê」，因為伊是鹿港人，我是和美人，tùi án-ni來牽親。伊kā我講：以前攏kap歹心ê基督徒做厝邊，一個是退任ê老傳道（現時koh出來做工）一個是長老，in攏真歹心，家己活就好，別人死了了無要緊，我問伊，「In是有甚mi̍h phiⁿ-khàm 你抑 m̄ 是？」伊講：「He m̄是nò͘!」「若無是怎樣歹心？」伊應講：「信耶穌ê人會上天堂，無信ê人會落地獄，in kap我做厝邊，m̄ bat招我信耶穌，án-ni無歹心mah？」我聽了受大感激。這位執事夫婦信主6年，已經chhōa幾若戶來信主，伊講我的確m̄ ài做一個歹心ê基督徒。諸位主內ê兄姐，你是歹心--ê,或是好心ê基督徒？保羅講：「福音我若無傳就有災禍，」咱應該著學張執事日日為主做見證，hō͘萬國攏歸基督是心所願。 |
