Tang-pō͘ thoân-tō kiàn-bûn-kì_01
|
東部傳道見聞記_01 |
|---|---|
| Tân Kàng-Siông | 陳降祥 |
|
Sū
|
序 |
|
“Lín kiám bô kóng, iáu ū sì ge̍h ji̍t, chiū siu-koah ê sî kàu mah? Góa kā lín kóng, kia̍h-ba̍k khòaⁿ hn̂g í-keng se̍k, thang koah lah.” Oán-tong-kui-chú phài goán tī Tang-pō͘ 13 ge̍h ji̍t kú ê thoân-tō, hō͘ góa ná tông-kám Chú tùi ha̍k-seng só͘ kà-sī ê chit kúi kù ōe. In-ūi Tang-pō͘ iáu chōe-chōe hiaⁿ-ché m̄ bat khì, koh Tang-pō͘ ê san-tē kàu-hōe, sī tē-it hoat-tián, só͘-í góa chiū bô siūⁿ ka-kī ê ham-bān, hó-táⁿ gia̍h-pit lâi siá “Tang-pō͘ thoân-tō kiàn-bûn-kì”, pò siau-sit hō͘ koan-sim Tang-pō͘ kàu-hōe ê hiaⁿ-ché chai, sòa ūi-tio̍h in lâi kî-tó.
|
「Lín kiám無講，iáu有四月日，就收割ê時到mah？我kā lín講，kia̍h目看園已經熟，thang割lah。」遠東歸主派阮tī 東部13月日久ê傳道，hō͘ 我那同感主對學生所教示ê這幾句話。因為東部iáu濟濟兄姐 m̄ bat去，koh東部ê山地教會，是第一發展，所以我就無想家己ê ham-bān,好膽gia̍h筆來寫「東部傳道見聞記，」報消息hō͘關心東部教會ê兄姐知，續為著in來祈禱。 |
|
Tī kiàn-bûn-kì ê lāi-bīn, ū sî ū siá “goán” jī, sī teh chí goán hōe-n̍i̍h ê tâng-kang, in-ūi tâng-kang, in-ūi Khó͘ Lêng-khu sian-siⁿ ū kap góa tī Thài-môa-lí, Hù-lí, Tang-tek, Tāi-lí, Gio̍k-lí téng kàu-hōe tâng-kang, koh chi̍t-ūi Si Khiam-iok sian-siⁿ bat tī Hong-tiân, Siū-hong, Sin-siâⁿ, Hoa-liân, Khèng-hong, kap tē-jī hôe ê Thài-môa-lí téng kàu-hōe, só͘-í nā tha̍k goán ê sî, lán ōe thang siūⁿ tio̍h chit nn̄g ūi tâng-kang. Siat-sú lán tha̍k-liáu nā ōe thang siū kó͘-lē, ji̍t-ji̍t ūi Chú chò kiàn-chèng, chiū siá ê lâng í-keng ta̍t bo̍k-tek lah. Goān lán tī Chú un-ài ê lāi-bīn saⁿ bián-lē, saⁿ thè kî-tó, chiong só͘ chhun ê kong-im lâi êng-iāu Chú, sī sim só͘ goān.
|
Tī見聞記ê內面，有時有寫「阮」字，是teh指阮會n̍i̍h ê同工，因為許Lêng-khu先生有kap我tī太麻里、富里、東竹、大里、玉里頂教會同工，koh一位施Khiam-iok先生bat tī 豐田、壽豐、新城、花蓮、慶豐，kap第二回ê太麻里頂教會，所以若讀阮ê時，咱會thang想著這兩位同工。設使咱讀了若會thang受鼓勵，日日為主做見證，就寫ê人已經達目的lah。願咱tī主恩愛ê內面相勉勵，相替祈禱，將所chhun ê光陰來榮耀主，是心所願。 |
|
Tân Kàng-siông 1960 nî 8 ge̍h 2 ji̍t Pîⁿ-Tōe Kàu-Hōe |
陳降祥 1960年8月2日 平地教會 |
|
Niū Kok-Ông Kòe-Lō͘
|
讓國王過路 |
|
Siūⁿ tio̍h beh khì Tang-pō͘ thoân hok-im, hō͘ góa ê sim oa̍h khí--lâi, só͘-í kin-nî thâu chi̍t-pái, beh khì Tang-pō͘ chò kang, chiū tī lō͘-tiong tú-tio̍h I-lông kok-ông lâi Lâm-pō͘ chham-koan khong-kun piáu-ián, che sī 1959 nî 3 ge̍h 14 ji̍t siōng-ngó͘ ê sū. In-ūi án-ni góa chē ê khì-chhia, tio̍h tī Kiú-khiok-tông hioh-khùn 2 tiám-cheng, tán kok-ông khòaⁿ piáu-ián soah, niū I kòe-lō͘ chiah koh khui-chhia.
|
想著beh去東部傳福音，hō͘ 我ê心活起--來，所以今年頭一擺，beh去東部做工，就tī路中tú著伊朗國王來南部參觀空軍表演，che是1959年3月14日上午ê事。因為án-ni我坐ê汽車，著tī 九曲堂歇睏2點鐘，等國王看表演煞，讓伊過路才 koh開車。 |
|
Āu-Soaⁿ Lō͘ Chin Gûi-Hiám
|
後山路真危險 |
|
Ta̍k-pái nā tùi Ko-hiông chē chhia beh khì Tâi-tang lóng ū thiaⁿ-kìⁿ lú-kheh teh tâm-lūn āu-soaⁿ lō͘ chin gûi-hiám. In-ūi soaⁿ-lō͘ sòe-tiâu, nā lo̍h-hō͘ koh ōe pang soaⁿ, chó͘-tòng kau-thong. Tī 6 ge̍h tiong chí ū 2 ji̍t-kú, chiū péng 3 chiah hòe-bu̍t-chhia, sí 3 miâ, tāng-siong kúi-nā ê, kî-tiong Tâi-tang kàu-hōe chi̍t ūi chip-sū sī su-ki, i ê chhia péng kúi-nā lìn, lo̍h soaⁿ-phiâⁿ, pún-sin tio̍h tāng-siong. Koh ta̍k pái chē chhia ê sî, ōe tú-tio̍h lú-kheh hîn-chhia lo̍k-lo̍k thò͘. Góa pún-sin iā bat thò͘, chóng-sī óng-ho̍k chē 25 pái (chi̍t pái chē hui-ki) lóng bô kak-tit gûi-hiám. Āu-lâi ū kim-má-hō khoài-chhia, si̍t-chāi chē liáu chin su-ho̍k, chóng-sī tio̍h chē 6 tiám cheng chó-iū, iā sī ōe ià-siān.
|
逐擺若tùi高雄坐車beh去台東攏有聽見旅客teh談論後山路真危險。因為山路細條，若落雨koh會崩山，阻擋交通。Tī 6月中只有2日久，就péng 3隻貨物車，死3名，重傷幾若個，其中台東教會一位執事是司機，伊ê車péng幾若lìn,落山坪，本身著重傷。Koh逐擺坐車ê時，會tú著旅客眩車lo̍k-lo̍k吐。我本身也bat吐，總是往復坐25擺（一擺坐飛機）攏無覺得危險。後來有金馬號快車，實在坐了真舒服，總是著坐6點鐘左右，也是會厭siān。 |
|
Tang-Pō͘ Kàu-Hōe Tāi-Pún-Iâⁿ
|
東部教會大本營 |
|
Tâi-tang kàu-hōe tùi tē-lí siōng, á-sī kau-thong siōng lâi khòaⁿ lóng sī chin iàu-kín ê só͘-chāi, só͘-í góa chheng i chò tāi-pún-iâⁿ. Tī 13 ge̍h-ji̍t kú ê Tang-pō͘ thoân-tō, lóng tùi chia chhut ji̍p, tit-tio̍h bo̍k-su, tióng-chip hōe-iú chin chhin-chhiat ê chiau-thāi. Un Êng-chhun bo̍k-su tī chia bo̍k-hōe chiâⁿ cha̍p-nî-kú, chò lâng un-hô, gâu hia̍p-chō͘ tâng-kang, góa tit-tio̍h i choân-ke ê ài-kò͘ chin-chōe, m̄ nā án-ni, siông tùi góa kang-chok ê chí-tō, thòe góa bóe chhia-phiò, tàu chài hêng-lí, i lóng bô hiâm hùi-khì, hoaⁿ-hí pang-chān, eng-kai tio̍h tùi in seh-siā, Un bo̍k-su si̍t-chāi sī thoân-tō-jîn ê hó bô͘-hoān.
|
台東教會tùi地理上，抑是交通上來看攏是真要緊ê所在，所以我稱伊做大本營。Tī 13月日久ê東部傳道，攏tùi chia出入，得著牧師，長執會友真親切ê招待。溫榮春牧師tī chia牧會成十年久，做人溫和，gâu協助同工，我得著伊全家ê愛顧真濟，m̄ 若án-ni，常對我工作ê指導，替我買車票，鬥載行李，伊攏無嫌費氣，歡喜幫贊，應該著對in說謝，溫牧師實在是傳道人ê好模範。 |
|
Āu-Soaⁿ Thô͘ Chin Liâm
|
後山塗真黏 |
|
Khì Tang-pō͘ ê lâng lóng sī tī Sai-pō͘ tú-tio̍h seng-oa̍h hoat-seng khùn-lân, poaⁿ khì ê khah chōe, khiok iā ū ê sī ū chîⁿ, ū tē-ūi ê lâng khì hia chò sū-gia̍p. Put-lūn sī ūi sím-mi̍h iân-kò͘ khì Tang-pō͘ lóng hó, put-kò ū chi̍t-hāng, in khì liáu chiū bô siūⁿ beh tńg-lâi Sai-pō͘, in-ūi hia hó thàn-chia̍h, thó͘-tē khoah, thang chèng-choh lâi î-chhî seng-oa̍h; iā ū chin-chōe hiaⁿ-tī, khì hia thàn tio̍h chîⁿ, seng-oa̍h hù-jū. Góa nā mn̄g hia ê hiaⁿ-tī kóng, “Lín ū siūⁿ beh koh tńg-lâi Sai-pō͘ á-bô?” In kóng, “Siūⁿ sī ōe siūⁿ, chóng-sī āu-soaⁿ thô͘ chin liâm”, ì-sù sī kiâⁿ bōe khui-kha, in-ūi hó thàn-chia̍h, thái ū iáⁿ āu-soaⁿ ê thô͘ ū liâm leh?
|
去東部ê人攏是tī 西部tú著生活發生困難，搬去ê較濟，卻也有ê是有錢，有地位ê人去hia做事業。不論是為甚mi̍h緣故去東部攏好，不過有一項，in去了就無想beh轉來西部，因為hia好趁食，土地闊，thang種作來維持生活；也有真濟兄弟，去hia趁著錢，生活富裕。我若問hia-e兄弟講。「Lín有想beh koh轉來西部抑無？」In講：「想是會想，總是後山塗真黏，」意思是行bōe開腳，因為好趁食，thái有影後山ê塗有黏leh？ |
|
Khoân-Keng Iu-Ngá ê Kàu-Hōe
|
環境優雅ê教會 |
|
Tī 5 ge̍h tiong góa khì Sin-káng (成功鎮) kàu-hōe chò kang, chit keng kàu-hōe tùi Tâi-tang tio̍h koh chē khì-chhia, 50 gōa kong-lí chiah ōe kàu. Nā kóng khí Sin-káng kàu-hōe, chiū siūⁿ tio̍h kàu-kài ê lāu sian-pòe Ko Tok-hêng bo̍k-su, i kong-ho̍k āu lâi Sin-káng siat kàu-hōe, āu-lâi ū chhiáⁿ Lîm Chhoan- bêng bo̍k-su lâi bo̍k-hōe. Tùi in 2 ūi kap hiaⁿ-ché ê ló͘-le̍k, chit keng kàu-hōe chiâⁿ-chò chi̍t keng Tang-pō͘ ū la̍t ê kàu-hōe, kàu-hōe ê tē-tiám sī Tang Tiong tē-it hó, só͘-chāi an-chēng, tùi-bīn ū tōa-hái, kiâⁿ lo̍h kia-á chiū ū káng-kháu, chin-chōe hî-chûn tī hia chhut-ji̍p, khong-khì koh hó, si̍t-chāi sī sió thian-tông chi̍t-iūⁿ. Chia ê hî chin sio̍k, kúi-thâu-to chi̍t kong-kin bōe kàu 1 kho͘ 8 kak, góa tī chia chi̍t lé-pài kú, chia̍h chin chōe ???. Chu-ūi tho̍k-chiá, lín nā ài chia̍h chhiⁿ-hî, chhiáⁿ lí lâi Sin-káng. Tī chia ū Kán bo̍k-su teh khui i-koán, sòa pang-chān san-tē kàu-hōe ê kang.
|
Tī 5月中我去新港（成功鎮）教會做工，這間教會tùi台東著koh坐汽車，50外公里才會到。若講起新港教會，就想著教界ê老先輩高篤行牧師，伊光復後來新港設教會，後來有請林川明牧師來牧會。對in 2位kap兄姐ê努力，這間教會誠做一間東部有力ê教會，教會ê地點是東中第一好，所在安靜，對面有大海，行落kia-á就有港口，真濟漁船tī hia出入，空氣koh好，實在是小天堂一樣。Chia-e魚真俗，鬼頭刀一公斤賣到1箍8角，我tī chia一禮拜久，食真濟???。諸位讀者，lín若ài食chhiⁿ 魚，請你來新港。Tī chia有簡牧師teh開醫館，續幫贊山地教會ê工。 |
|
Góa Bô Kháu-châi
|
我無口才 |
|
Tī Sin-káng kàu-hōe, góa ài koh kóng chi̍t ê hiaⁿ-tī ê sū, i sī Ko bo̍k-su ê tē 4 kong-chú, Ko Toân-li̍p tiúⁿ-ló, i tī chia khui i-koán, hoān-chiá chin chōe, i ê chhù tī kàu-hōe keh-piah, kiàn-tio̍k-bu̍t bí-koan, góa chheng i chò Sin-káng ê ông-kiong. Ko tiúⁿ-ló tùi Lēng-chun Ko bo̍k-su ê kau-tāi, chīn-tiong tī kàu-hōe, i kò͘-khiam tùi góa kóng, góa lóng bô kháu-châi, iā bōe hiáu kóng tō-lí, i koh kóng kap i tòa ê lâm-lú kang-lâng, í-keng ū 5 miâ lâi ji̍p kàu, niá sóe-lé, chin kám-siā Chú. Chu-ūi tho̍k-chiá, lán bô kháu-châi bô iàu-kín, nā ōe chhōa lâng sìn Chú chiū hó.
|
Tī新港教會，我ài koh講一個兄弟ê事，伊是高牧師ê第4公子，高傳立長老，伊tī chia開醫館，患者真濟，伊ê厝tī教會隔壁，建築物美觀，我稱伊做新港ê王宮。高長老tùi令尊高牧師ê交代，盡忠tī教會，伊顧謙對我講：「我攏無口才，也bōe曉講道理。」伊koh講kap伊tòa ê男女工人，已經有5名來入教，領洗禮，真感謝主。諸位讀者，咱無口才無要緊，若會chhōa人信主就好。 |
|
Goán Chia Ná M̄ Siat Kàu-hōe
|
阮Chia那 M̄ 設教會 |
|
Tùi Sin-káng koh khì 20 kong-lí ê só͘-chāi, ū chi̍t-keng Tek-ô͘ kàu-hōe, khai-siat 2 nî gōa kú, chò lé-pài ū 4, 5 cha̍p lâng, sìn-tô͘ lóng sī tùi pa̍t-ūi poaⁿ lâi ê, te̍k-pia̍t ū Po͘-lí hong-bīn ê hiaⁿ-tī, kúi-nā ūi tī chit keng kàu-hōe teh oa̍h-tāng. Chit keng kàu-hōe khí tī tōa-lō͘-piⁿ, thâu-chêng ǹg Thài-pêng-iûⁿ, āu-bīn ū soaⁿ, nā khiā tī tâi-téng káng-tō, ū khòaⁿ-tio̍h tōa-hái, ū sî iā ōe thiaⁿ-tio̍h hái-éng hōa-hōa háu ê siaⁿ, chhin-chhiūⁿ khòaⁿ-tio̍h chi̍t-pak ōe chhut-siaⁿ ê tô͘-ūi.
|
Tùi新港koh去20公里ê所在，有一間竹湖教會，開設2年外久，做禮拜有4、5十人，信徒攏是tùi別位搬來--ê,特別有埔里方面ê兄弟，幾若位tī 這間教會teh活動。這間教會起tī大路邊，頭前向太平洋，後面有山，若企tī 台頂講道，有看著大海，有時也會聽著海湧hōa-hōa哮ê聲，親像看著一幅會出聲ê圖畫。 |
|
Chit keng kàu-hōe khai-siat í-lâi lóng bô tn̂g-kî chū-chāi ê kang-lâng, in chin ài chi̍t ūi sian-siⁿ, chóng-sī chhiàⁿ lóng bô, nā-sī tióng-chip chin hia̍p-le̍k chò Chú ê kang, hōe-iú sì-sòaⁿ tī soaⁿ-téng khiā-khí, lâi kàu kàu-hōe tio̍h kiâⁿ 2 tiám cheng ê lō͘, nā sī in chi̍t lé-pài kú óng-lâi kiâⁿ bô siān.
|
這間教會開設以來攏無長期駐在ê工人，in真ài一位先生，總是倩攏無，若是長執真協力做主ê工，會友四散tī 山頂企起，來到教會著行2點鐘ê路，若是in一禮拜久往來行無siān。 |
|
Tī 3 àm pò͘-tō-hōe, in ài góa khì Tiông-pin pò͘-tō, chia lī Tek-ô͘ 8 kong-lí, sī hiong só͘-chāi tōe, tī tang-hái-gān tē 2 lāu-jia̍t ê só͘-chāi, hia ê bîn-chiòng chin ài thiaⁿ pò͘-tō, ta̍k-àm ū 3, 4 pah lâng lâi thiaⁿ, ū chhoan-tiúⁿ, á sī hiong tāi-piáu, choan-kang tùi chng-kha lâi thiaⁿ, góa pò͘-tō liáu in iáu m̄ sòaⁿ, chhoan-tiúⁿ iau-kiû kóng, chhiáⁿ kè-sio̍k lâi goán ê chhoan tiong thoân-tō, tiûⁿ-só͘ kap kiò lâng góa hū-chek, khó-sioh góa bô kang thang khì, chin phah-sńg. Hia ê bîn-chiòng mn̄g kóng, “goán chia ná m̄ siat kàu-hōe?” Hō͘ góa bōe hiáu ìn-tap. Tek-ô͘ ê tióng-chip chin koan-sim chit só͘-chāi, khó-sioh in ê keng-chè le̍k-liōng iú-hān, kang-lâng koh khah sī tōa būn-tê, nā m̄ sī Tiong-hōe khì khai-thok, si̍t-chāi ū khùn-lân. Chú kóng, “Thang siu-sêng ê sī chōe, chò kang ê lâng chió.” Chin ū iáⁿ.
|
Tī 3暗佈道會，in ài我去長濱佈道，chia離竹湖8公里，是鄉所在地，tī 東海岸第2鬧熱ê所在，hia-e民眾真ài聽佈道，逐暗有3、4百人來聽，有村長，抑是鄉代表，專工tùi庄腳來聽，我佈道了in iáu m̄ 散，村長要求講：「請繼續來阮ê村中傳道，」場所kap叫人我負責，可惜我無工thang去，真扑損。Hia-e民眾問講：「阮chia那 m̄ 設教會？」hō͘我bōe曉應答。竹湖ê長執真關心這所在，可惜in ê經濟力量有限，工人koh較是大問題，若 m̄ 是中會去開拓，實在有困難。主講：「Thang收成ê是濟，做工ê人少，」真有影。 |
|
Nî-ko͘ Piàn Chò Lú Thoân-tō
|
尼姑變做女傳道 |
|
Góa kàu Chho͘-lo̍k kàu-hōe chò kang ê sî, ū tú-tio̍h chi̍t-ūi nî-ko͘ chhut-sin ê lú thoân-tō, kiò chò Lâm tiúⁿ-ló. Chu-ūi tho̍k-chiá, lín m̄ thang gō͘-hōe góa kóng ōe mâu-tún, i sī lú-sèng chóng-sī sèⁿ Lâm, Tang-pō͘ ê hōe-iú lóng kiò i Lâm tiúⁿ-ló, i iā sī lú tiong-i-su, i tùi góa kóng, i lâi Tâi-tang ê bo̍k-tek, sī beh thoân Hu̍t-kàu, bô phah-sǹg sòa lâi sìn Iâ-so͘, āu-lâi koh khì tha̍k hū-o̍h chò lú thoân-tō, lâi Chho͘-lo̍k chò i-seng kiam thoân-tō. I chin gâu thiàⁿ kàu-hōe, thiàⁿ Chú ê kang-lâng, ū chi̍t-ūi Siā sian-siⁿ kap i hia̍p-le̍k khí lé-pài-tn̂g, siok-sià lóng chin hó-sè, keng-chè to̍k-li̍p, chò lé-pài 6,7 cha̍p lâng ài chhiáⁿ choan-jīm ê kang-lâng, m̄ chai sím-mi̍h lâng, ū thiaⁿ-tio̍h Chú ho͘-tiàu ê siaⁿ, hoaⁿ-hí ìn kóng, “Góa tī chia, chhe góa, chhe góa!”
|
我到初鹿教會做工ê時，有tú著一位尼姑出身ê女傳道，叫做南長老。諸位讀者，lín m̄ thang誤會我講話矛盾，伊是女性總是姓南，東部ê會友攏叫伊南長老，伊也是女中醫師，伊對我講，伊來台東ê目的，beh傳佛教，無打算續來信耶穌，後來koh去讀婦學做女傳道，來初鹿做醫生兼傳道。伊真gâu疼教會，疼主ê工人，有一位謝先生kap伊協力起禮拜堂，宿舍攏真好勢，經濟獨立，做禮拜6、70人ài請專任ê工人，m̄ 知甚mi̍h人，有聽著主呼召ê聲，歡喜應講：「我tī chia，差我！差我！」 |
|
Kàu-Hōe Kaⁿ-Ga̍k Chò Chhù-Piⁿ
|
教會監獄做厝邊 |
|
2 nî chêng Tâi-tang kàu-hōe bat chhiáⁿ góa lâi pò͘-tō, chit pái koh lâi sī tē-jī pái. Tâi-tang ū chhut-miâ ê hong-poe-soa, tāi-khài sī chhin-chhiūⁿ Lo̍k-káng ê khì-hāu. Kàu-hōe sī Tâi-tang koān tē-it tōa-keng koh chē lâng, chit keng kàu-hōe sī Ji̍t-jîn sî-tāi ê O͘-the-lah (才寺), chêng-jīm ê Tân-san bo̍k-su tī kong-ho̍k ê sî, tùi in chiap-siu lâi chò pài-tn̂g, tiûⁿ-só͘ chin khoah koh hó-sè, chóng-sī chin tú-hó kap Tâi-tang kaⁿ-ga̍k chò keh-piah. Góa tī hia pò͘-tō bat kóng, lín ài khì thian-tông á-sī tē-ga̍k? Nā ài khì thian-tông, tio̍h lâi kàu-hōe m̄-thang khì kaⁿ-ga̍k. Chhin-ài ê hiaⁿ-ché, Chú kā lán kóng, sè-kan ū 2 tiâu lō͘, chi̍t-tiâu kàu éng-oa̍h, chi̍t tiâu thàu kàu bia̍t-bông, lán tio̍h ín-chhōa lâng kiâⁿ oa̍h-lō͘.
|
兩年前台東教會bat請我來佈道，這擺koh來是第二擺。台東有出名ê風飛沙，大概是親像鹿港ê氣候。教會是台東縣第一大間koh濟人，這間教會是日人時代ê O͘-the-lah(才寺)，前任ê陳瑞山牧師tī光復ê時，tùi in接收來做拜堂，場所真闊koh好勢，總是真tú好kap台東監獄做隔壁。我tī hia佈道bat講：lín ài去天堂或是地獄？若ài去天堂，著來教會 m̄-thang去監獄。親愛ê兄姐，主kā咱講：「世間有2條路，一條到永活，一條thàu到滅亡，咱著引chhōa人行活路。」 |
|
Jia̍t-sim Ê Tiong-chip
|
熱心ê長執 |
|
Tī hiong-chhoan ê kàu-hōe tiong keng-chè hó, tióng-chip jia̍t-sim thiàⁿ kàu-hōe ê, góa siūⁿ sī Tî-siōng kàu-hōe. Chia ê tióng-chip chin thiàⁿ Chú, koh jia̍t-sim, tī hia pò͘-tō ê sî tú-tio̍h hong-thai, iáu-kú in chhut-la̍t, ín-chhōa lâng lâi thiaⁿ pò͘-tō, góa khòaⁿ in ê jia̍t-sim chin kám-kek, in ta̍k lâng ê sū-gia̍p iā chin sêng-kong, chin-chiàⁿ thiàⁿ Chú ê lâng, beh siū Chú ê sù-hok. Chia ê hōe-iú tōa-pòaⁿ sī kheh-lâng, chóng-sī chin gâu kóng hō-ló ōe, thiaⁿ kóng le̍k-tāi to̍k-sin ê thoân-tō nā lâi chia chò kang, chiū kiat-sok to̍k-sin seng-oa̍h (chiū kiat-hun), che sī to̍k-sin kang-lâng ê hó siau-sit, chhin-ài to̍k-sin ê tâng-kang, chhiáⁿ lín tio̍h hāu-pó͘ lâi chia chò kang, m̄ thang sit liáu hó ki-hōe.
|
Tī鄉村ê教會中經濟好，長執熱心疼教會--ê,我想是池上教會。Chia-e長執真疼主，koh熱心，tī hia佈道ê時tú著風颱，iáu-kú in出力，引chhōa人來聽佈道，我看in ê熱心真感激，in逐人ê事業也真成功，真正疼主ê人，beh受主ê賜福。Chia-e會友大半是客人，總是真gâu講河洛話，聽講歷代獨身ê傳道若來chia做工，就結束獨身生活（就結婚），che是獨身工人ê好消息，親愛獨身ê同工，請lín著候補來chia做工，m̄ thang失了好機會。 |
|
Tán-hāu Beh Chhut-sì Ê Kàu-hōe
|
等候Beh出世ê教會 |
|
Thài-môa-lí, tī Tāi-bú kàu Tâi-tang ê chi̍t-pòaⁿ-lō͘, tùi chia chē khì-chhia khì Tâi-tang tio̍h chi̍t-tiám cheng, chhia chîn 10 kho͘. Tī chia ū kok só͘-chāi lâi ê hōe-iú 15 hō͘, chóng-sī si̍t-chāi khì lé-pài ê lâng bô kúi ê, in-ūi lâi Tâi-tang lé-pài, chi̍t ê lâng tio̍h khai 30 kho͘ ê só͘-hùi, si̍t-chāi keng-chè kap sî-kan m̄ iông-ún. Ū chi̍t ūi Tâi-lâm lâi ê Tân hiaⁿ-tī, chin ì-ài siat-kàu-hōe, thang hō͘ hia ê lâng lī-piān kèng-pài Siōng-tè, só͘-í i tāi-seng ka-kī bóe chi̍t keng tiàm, chò pài-tn̂g, sòa chhiáⁿ Tâi-tang kàu-hōe tio̍h khì pang-chān in chhut-sì, in-ūi Tâi-tang kàu-hōe 2,3 nî kú ū siat Chho͘-lo̍k, Kiàn-hô, Ti-pún 3 keng kàu-hōe, ū ê bô sím-mi̍h chiâⁿ-mi̍h, só͘-í chiū tiû-tû, kàu 8 ge̍h 3 ji̍t bo̍k-su, tióng-chip, chheng-liân kap goán saⁿ-kap khì pò͘-tō, khòaⁿ-kìⁿ sìn-tô͘ jia̍t-chhiat ài siat kàu-hōe, chiū tī pò͘-tō āu ê lé-pài-ji̍t, khai-bō͘ tián-lé, Tùi siat kàu-hōe kàu kin-á-ji̍t (8 ge̍h ji̍t kú) múi lé-pài siōng-ngó͘ ū 60 miâ chó-iū, hā-ngó͘ 3,4 cha̍p miâ chū-hōe, chin kám-siā Chú. In chhiàⁿ sian-siⁿ ê sin-kim kap kàu-hōe cha̍p-hùi lóng ka-kī hū-tam, hōe-iú sui-jiân sàn-hiong, iáu-kú ū lâng chin kam-sim hōng-hiàn. Nā ēng chit keng kàu-hōe chò bô͘-hoān, ta̍k keng kàu-hōe lóng ōe thang keng-chè to̍k-li̍p chiap tio̍h. Goán tī 1960 nî 3 ge̍h tiong koh lâi pò͘-tō chi̍t-pái, án-ni lâi chò kang 2 pái, góa pún-sin ū khì 2 hō͘ bī-sìn-chiá ê ka-têng, chú-chhî chò lé-pài tû ngó͘-siōng, kî-tiong chi̍t ūi sī Hiong-kong-só͘ ê chú-kè, i ê kiáⁿ tī Sin-tek Sèng-keng su-īⁿ tha̍k-chheh, i kóng kiáⁿ beh thoân Chú ê hok-im, góa tio̍h kín hoán-hóe sìn Iâ-so͘. Chin kám-siā Chú, Chú hō͘ tit-kiù ê lâng ji̍t-ji̍t ná ke-thiⁿ.
|
太麻里，tī大武到台東ê一半路，tùi chia坐汽車去台東著一點鐘，車錢10箍。Tī chia有各所在來ê會友15戶，總是實在去禮拜ê人無幾個，因為來台東禮拜，一個人著開30箍ê所費，實在經濟kap時間 m̄容允。有一位台南來ê 陳兄弟，真意愛設教會，thang hō͘ hia-e人利便敬拜上帝，所以伊代先家己買一間店，做拜堂，續請台東教會著去幫贊in出世，因為台東教會2、3年久有設初鹿、建和、知本3間教會，有ê無甚mi̍h成mi̍h，所以就躊躇，到8月3日牧師、長執、青年kap阮相kap去佈道，看見信徒熱切ài設教會，就tī 佈道後ê禮拜日，開幕典禮。Tùi設教會到今仔日（8月日久）每禮拜上午有60名左右，下午3、4十名聚會，真感謝主。In倩先生ê薪金kap教會雜費攏家己負擔，會友雖然散hiong，iáu-kú有人真甘心奉獻。若用這間教會做模範，逐間教會攏會thang經濟獨立才著。阮tī 1960年3月中koh來佈道一擺，án-ni來做工2擺，我本身有去2戶未信者ê家庭，主持做禮拜除偶像，其中一位是鄉公所ê主計，伊ê子tī 新竹聖經書院讀冊，伊講子beh傳主ê福音，我著緊反悔信耶穌。真感謝主，主hō͘ 得救ê人日日那加添。 |
|
Hiong-chhoan Ê Tōa Kiàn-tio̍k-bu̍t
|
鄉村ê大建築物 |
|
Hù-lí kàu-hōe sī tī Tang-pō͘ hiong-chhoan chòe tōa keng ê kàu-hōe, Tiuⁿ bo̍k-su siàu-liân hoa̍t-phoat, hōe-iú chōe, kàu-hōe khí chin tōa keng, sī kúi nî chêng khí-ê, khai beh kàu 20 bān kho͘, thang kóng sī Tang-pō͘ sǹg ū tio̍h ê kàu-hōe. Chia ê sìn-tô͘ chin chōe chú-lú teh tha̍k tāi-ha̍k, sīm-chì ū pó-sàng-seng, chin-chiàⁿ “kèng-ùi Iâ-hô-hoa sī tì-sek ê kun-pún”.
|
富里教會是tī 東部鄉村最大間ê教會，張牧師少年活潑，會友濟，教會起真大間，是幾年前起--ê,開beh到20萬箍，thang講是東部算有著ê教會。Chia-e信徒真濟子女teh讀大學，甚至有保送生，真正「敬畏耶和華是智識ê根本」。 |
|
6 Ji̍t Kú Seⁿ 6 Ê Kiáⁿ
|
6日久生6個子 |
|
Goán khì tang-tek chò kang 6 ji̍t kú, in-ūi hia bô thoân-kàu-chiá, kàu-hōe chiū siat-hoat tī Chhòa tiúⁿ-ló ê ke hō͘ goán ho̍k-si̍p. Chhòa tiúⁿ ló chin jia̍t-sim chiàu-kò͘ kàu-hōe, tiúⁿ-ló-niû chò sán-pô, seng-lí sī phó͘-thong. Goán khì 3 ji̍t i ū kā lâng khioh 3 ê gín-ná, goán khì chia̍h-pn̄g ê sî, i chiū kā goán pò-kò, góa ū kā tiúⁿ-ló-niû kóng, goán beh koh tòa 3 ji̍t, lí ōe koh kā lâng khioh 3 ê gín-ná, i tùi góa kóng, thài ū hiah hó, chia sī sió só͘-chāi, chi̍t lé-pài nā chiâu-ûn khioh 3 ê chiū chin hó lah, chóng-sī kàu goán beh lī-khui, chiàⁿ-si̍t koh khioh 3 ê, kiōng tú 6 ê. Chhòa tiúⁿ-ló-niû tī chit 6 ji̍t-kú, ūi-tio̍h Chú ê kang kap ka-kī ê sū-gia̍p chin bô-êng, chóng-sī i lóng bô chhut oàn-giân, chhiò gī-gī. Tī hia pò͘-tō chin hó sêng-chek, ū 300 gōa lâng lâi thiaⁿ, chóng-sī chin khó-sioh kè-ji̍t chiū liân-sòa lo̍h tōa-hō͘, sòa bōe thang kè-siok, só͘-í lán tio̍h siông-siông thàn ki-hōe chò kang.
|
阮去東竹做工6日久，因為hia無傳教者，教會就設法tī 蔡長老ê家hō͘ 阮復習。蔡長老真熱心照顧教會，長老娘做產婆，生理是普通。阮去3日伊有kā人拾3個囡仔，阮去食飯ê時，伊就kā阮報告，我有kā長老娘講：「阮beh koh tòa 3日，你會koh kā人拾3個囡仔。」伊對我講：「thài有hiah好，chia是小所在，一禮拜若齊勻拾3個就真好lah。」總是到阮beh離開，正實koh拾3個，共tú 6個。蔡長老娘tī 這6日久，為著主ê工kap家己ê事業真無閒，總是伊攏無出怨言，笑議議。Tī hia佈道真好成績，有300外人來聽，總是真可惜隔日就連續落大雨，續bōe thang繼續，所以咱著常常趁機會做工。 |
|
Má-tāi Ché Ê Chhiú-lō͘ Chhài
|
馬大姐ê手Lō͘菜 |
|
Tāi-lí kàu-hōe sī Tang-pō͘ chhut-miâ ê kàu-hōe, hōe- iú chōe, keng-chè hó, chheng-liân oa̍h-tāng, sèng-koa-tūi gâu chhiùⁿ, ū kúi-ūi tióng-chip chin koan-sim kàu-hōe, iā ū Má-tāi ché ōe chhut chhiú-lō͘-chhài. Góa saⁿ-nî chêng bat lâi pò͘-tō, chit pái sī tē-jī hôe, góa kap in lóng chin se̍k-sāi, Hū-jîn-hōe siat-hoat ê hóe-si̍t tǹg-tǹg hó, si̍t-chāi m̄-bián tio̍h án-ni, ōe phah-phái chhùi-táu. Tī chia ū chi̍t-ūi Chiam tiúⁿ-ló, chiū-sī ōe chú chhiú-lō͘-chhài ê Má-tāi ché, sio̍k-gú kóng, “Cho-liāu kàu iā tio̍h sim-pū gâu”, chin chiàⁿ ū iáⁿ. Chia ê hōe-iú kóng-ōe ū koh-iūⁿ, “ch” kap “s” kóng siong-hoán, in kiò “Ông sian-seⁿ” sī kiò chò “Ông chian-cheⁿ,” gîm-si “Chú ah, góa sim thiàⁿ Lí” in gîm chò “Sú ah, góa chim thiàⁿ Lí”, chóng-sī kap in chò-hóe kú, thiaⁿ koàn-sì chiū hó. Te̍k-pia̍t tī chia góa ài thê-khí ê, sī chia ê chheng-liân chin gâu hia̍p-chō͘ pò͘-tō ê kang-chok, bô-lūn pun thoân-toaⁿ, pûn ga̍k-khì, chhiùⁿ-koa, lâm-lú chheng-liân lóng chin ióng-kám, ta̍k ē-po͘ khì chò, só͘-í góa khì 2 hôe ê pò͘-tō, lóng chin hó sêng-chek, múi àm ū 300 lâng í-siōng, góa iā ài kó͘-lē kok kàu-hōe ê chheng-liân, tio̍h án-ni lâi chīn-la̍t tī Chú ê kang, in-ūi Pó-lô kóng “Lín bo̍h-tit in-ūi lín ê siàu-liân hō͘ lâng khòaⁿ khin, ----- tio̍h chò sìn ê lâng ê bô͘-hoān.”
|
大里教會是東部出名ê教會，會友濟，經濟好，青年活動，聖歌隊gâu唱，有幾位長執真關心教會，也有馬大姐會出手lō͘菜。我三年前bat來佈道，這擺是第二回，我kap in攏真熟悉，婦人會設法ê伙食頓頓好，實在m̄免著án-ni，會扑歹嘴斗。Tī chia有一位詹長老，就是會煮手路菜ê馬大姐，俗語講：「Cho料夠也著新婦gâu」，真正有影。Chia-e會友講話有各樣，「Ch」 kap「S」講相反，in叫「王先生」是叫做「王chian-cheⁿ，」吟詩「主ah！我心疼你」，in吟做「使ah！我chim疼你」，總是kap in做伙久，聽慣勢就好。特別tī chia我ài提起--ê,是chia-e青年真gâu協助佈道ê工作，無論分傳單、pûn樂器、唱歌，男女青年攏真勇敢，逐e晡去做，所以我去2回ê佈道，攏真好成績，每暗有300人以上，我也ài鼓勵各教會ê青年，著án-ni來盡力tī主ê工，因為保羅講：「Lín莫得因為lín ê少年hō͘人看輕，----- 著做信ê人ê模範。」 |
|
Kàu-hōe Sòe Chhì-liān Tōa
|
教會細試煉大 |
|
Sūi-hūi tī Hoa-liân koān, iā sī lāu-jia̍t ê hiong-tìn, khó-sioh kàu-hōe khí tī hōe-iú kam-á-the̍h ê chi̍t-kak, chin phian-phiah, chò lé-pài ê hōe-iú 20 lâng chó-iū, chóng-sī ū 2, 3 ê tióng-chip chin jia̍t-sim, kàu-hōe keng-chè sui-jiân jio̍k chóng-sī in ū phāu tōa ê kè-ōe, beh bóe tōe khah kīn koe-bīn, thang khí pài-tn̂g, só͘-í hōe-iú chiū chhut pún chèng kam-á, í-keng nî gōa kú, nā kàu 3 nî chiū ū siu-sêng chin tōa, khó-sioh góa khì ê sî, kam-á chhiū tú-á tio̍h pīⁿ, hō͘ chia ê hōe-iú ūi-tio̍h siau-to̍k ê kang-chok, chò kàu bô-êng chhì-chhaⁿ, m̄ nā án-ni, tióng-chip chin kî-thāi góa tī pò͘-tō kî-kan thang tōa soan-thoân hok-im tī koe-bīn, khó-sioh kàu sî lóng lo̍h tōa hō͘, chí-ū ōe thang tī Khó͘ tiúⁿ-ló ê tiàm-lāi pò͘-tō, kai-chài Khó͘ tiúⁿ-ló chin jia̍t-sim, khiú chhù-piⁿ keh-piah ê lâng lâi thiaⁿ, chiah ū 5, 60 miâ ê thiaⁿ-chiòng. M̄ kú Sèng Sîn chò kang, mô͘-kúi iā chò kang, tī pò͘-tō ê tē-jī àm, Ko tiúⁿ-ló ê sim-pū āiⁿ gín-ná kap i ê ta-ke beh lâi hù-hōe, hit sî ji̍t-thâu àm lah, koh tú-tn̄g lo̍h-hō͘, in teh kóaⁿ-lō͘ lâi hù-hōe, hut-jiân tī āu-bīn chi̍t ê chùi-hàn, khiâ chhia tōng-tó Ko tiúⁿ-ló ê sim-pū, lâng tó tī tōe-n̍i̍h, sí-sí hūn-hūn khì, pa̍t lâng kóaⁿ-kín kng i lâi hō͘ i-seng chù-siā, kàu góa pò͘-tō soah iáu m̄-chai lâng, goán tâng-sim thòe i kî-tó, kàu góa lī-khui Sūi-hūi ê sî, sin-thé ū hó-sè, kám-siā Chú ê lîn-bín, kai-chài hū-jîn-lâng āiⁿ ê iù-eⁿ lóng bô sím-mi̍h sū, si̍t-chāi sī put-hēng tiong ê tāi-hēng. “Bān-hāng sū ta̍uh-ta̍uh lâi, sī beh hō͘ thiaⁿ Siōng-tè ê lâng tit-tio̍h lī-ek”, goān Chú pó-siú chit keng bî-sè ê kàu-hōe.
|
瑞穗tī花蓮縣，也是鬧熱ê鄉鎮，可惜教會起tī 會友柑仔宅ê一角，真偏僻，做禮拜ê會友20人左右，總是有2、3個長執真熱心，教會經濟雖然弱總是in有抱大ê計畫，beh買地較近街面，thang起拜堂，所以會友就出本種柑仔，已經年外久，若到3年就有收成真大，可惜我去ê時，柑仔樹tú仔著病，hō͘ chia-e會友為著消毒ê工作，做到無閒chhì-chhaⁿ，m̄ 若án-ni，長執真期待我tī 佈道期間thang大宣傳福音tī 街面，可惜到時攏落大雨，只有會thang tī 許長老ê店內佈道。佳哉許長老真熱心，khiú厝邊隔壁ê人來聽，才有5、60名ê聽眾。M̄-kú聖神做工，魔鬼也做工，tī 佈道ê第二暗，高長老ê新婦āiⁿ 囡仔kap伊ê ta-ke beh來赴會，hit時日頭暗--lah，koh tú-tn̄g落雨，in teh趕路來赴會，忽然tī後面一個醉漢，騎車撞倒高長老ê新婦，人倒tī地--n̍i̍h,死死暈暈去，別人趕緊扛伊來hō͘醫生注射，到我佈道煞iáu m̄知人，阮同心替伊祈禱，到我離開瑞穗ê時，身體有好勢，感謝主ê憐憫，佳哉婦人人āiⁿ ê幼嬰攏無甚mi̍h事，實在是不幸中ê大幸。「萬項事ta̍uh-ta̍uh來，是beh hō͘ 聽上帝ê人得著利益」，願主保守這間微細ê教會。 |
|
Hū-Jîn-Hōe Kap 30 Gōa Chiah Ke
|
婦人會kap 30外隻雞 |
|
Koan-im-soaⁿ kàu-hōe ê tiúⁿ-ló kóng, goán chin ài chhut-miâ ê bo̍k-su lâi pò͘-tō, chóng-sī bô lâng beh lâi, che sī in ê thó͘-khùi, chhin-ài ê tâng-kang, lán kiám m̄ tio̍h kèng-ka ài chit hō jio̍k-siáu phian-phiah ê kàu-hōe mah? Tī Tāi-ú lo̍h chhia, tio̍h koh kiâⁿ 40 hun-cheng ê khe-po͘, chiah ōe kàu pài-tn̂g, chóng-sī kàu-ūi lí khòaⁿ tio̍h chit-keng 3 chàn koân-thah ê sin pài-tn̂g, chiū bōe kì-tit kiâⁿ khe-po͘ ê ià-siān, chit keng pài-tn̂g í-keng khí 3 nî kú, iáu bōe Sī-á-geh (???), ū chi̍t-ūi Chhòa tiúⁿ-ló, bô mê bô ji̍t hū-chek chit ê kang-chok, thô͘-chúi kap sió-kang lóng sī hōe-iú ka-kī chò, Hū-jîn-hōe chin chhut-la̍t chò sió-kang, in thiaⁿ góa beh khì chò kang, chit ūi lú tiúⁿ-ló kóng, “Chian-cheⁿ beh lâi pò͘-tō, kàu-hōe bô sîⁿ beh án-sóaⁿ?” (Sian-siⁿ beh lâi pò͘-tō, kàu-hōe bô chîⁿ beh án-chóaⁿ?) Goân-lâi in kóng ōe “ch” kap “s” iā sī kóng siong-hoán, chit ūi lú tiúⁿ-ló, chiū tùi tióng-chip-hōe thê-gī, pò͘-tō it-chhè hùi-iōng, in Hū-jîn-hōe beh hū-chek, lâm ê tióng-chip mn̄g kóng, lín kiám ōe thàn chîⁿ? In kóng, goán bōe thàn-chîⁿ iáu-kú ōe siūⁿ pān-hoat. Kiat-kiok in kó͘-lē chi̍t ê chí-mōe hiàn chi̍t chiah ke, á-sī ah, in chóng-kiōng hiàn 30 gōa chiah, ēng kàu ū chhun, thang choán ji̍p chò kàu-hōe ê lō͘-ēng, chin chiàⁿ “chi̍t-pé mī-hún, chi̍t-tiám iû ēng bōe oân”, chit hō sìn-sim ê hōng-hiàn, ū tōa kong-hāu.
|
觀音山教會ê長老講：阮真ài出名ê牧師來佈道，總是無人beh來，che是in ê吐氣，親愛ê同工，咱kiám m̄ 著更加ài這號弱小偏僻ê教會mah？Tī 大禹落車，著koh行40分鐘ê溪埔，才會到拜堂總是到位你看著這間3層懸塔ê新拜堂，就bōe記得行溪埔ê厭siān,這間拜堂已經起3年久，iáu未 Sī-á-geh（???），有一位蔡長老，無暝無日負責這個工作，塗水kap小工攏是會友家己做，婦人會真出力做小工，in聽我beh去做工，這位女長老講：「Chian-cheⁿ beh來佈道，教會無sîⁿ beh án-sóaⁿ？」（先生beh來佈道，教會無錢beh án-chóaⁿ？）原來in講話「Ch」 kap「S」也是講相反，這位女長老，就對長執會提議，佈道一切費用，in婦人會beh負責，男ê長執問講：「Lín kiám會趁錢？」In講：「阮bōe趁錢iáu-kú會想辦法。」結局in鼓勵一個姊妹獻一隻雞，或是鴨，in總共獻30外隻，用到有chhun，thang轉入做教會ê路用，真正「一把麵粉，一點油用bōe完」，這號信心ê奉獻，有大功效。 |
|
Thoân Hok-im Kap Káng-hu̍t
|
傳福音Kap講佛 |
|
Hōng-lîm tìn sī lāu-jia̍t ê só͘-chāi, kàu-hōe iā ū chin kú ê le̍k-sú, Kheh-lâng ê hōe-iú tìn tōa-pō͘-hūn, lâi chia bo̍k-hōe ê Gô͘ sian-siⁿ chiah kiat-hun bô kúi ge̍h-ji̍t, in lóng ōe kóng pòaⁿ-chheⁿ-se̍k ê Kheh-ōe, chin chiàⁿ ū iáⁿ ji̍p gô͘ mn̂g, thàn gô͘ hoat, tī 3 ji̍t-kan ê pò͘-tō-hōe, in siat-hoat tiûⁿ-só͘ tī chhī-tiûⁿ kháu. Tī goán pò͘-tō ê tē-jī mê, Hu̍t-kàu iā chhiáⁿ Tâi-pak Chheng-siông hoat-su lâi biō-kháu káng hu̍t, in ê kóng-kò-chóa kap lán ê tah chò-hóe, hō͘ tìn-bîn kak-tit chhin-chhiūⁿ Ki-tok kap Hu̍t-kàu teh piàⁿ-koán, chóng-sī lán 3 àm ê thiaⁿ-chiòng, ū tùi 150 lâng chìn kàu 200 gōa lâng, kám-siā Chú. Tī chia ū chi̍t-ūi thiàⁿ Chú ê Iú tiúⁿ-ló, tī bó͘-bó͘ sū-kiāⁿ tú-tio̍h tōa oan-khut, hi-seng tiōng-hu kap 2 ê kiáⁿ (tiōng-hu kap tōa kiáⁿ sī i-seng), i iáu-kú bô sit-chì, thiàⁿ Chú kàu-tóe. Goān Chú ke-thiⁿ khùi-la̍t, hō͘ i bōe kì-tit āu-bīn ê khó͘-sū, chí-ū ǹg thâu-chêng só͘ chhah ê pio lâi cháu, thang kàu hit ji̍t, tit-tio̍h tiàu lán--ê ê siúⁿ. A-men.
|
鳳林鎮是鬧熱ê所在，教會也有真久ê歷史，客人ê會友tìn大部份，來chia牧會ê吳先生才結婚無幾月日，in攏會講半青熟ê客話，真正有影入吳門，趁吳法，tī 3日間ê佈道會，in設法場所tī市場口。Tī 阮佈道ê第二暝，佛教也請台北清祥法師來廟口講佛，in ê廣告紙kap咱--ê貼做伙，hō͘ 鎮民覺得親像基督kap佛教teh拚館，總是咱3暗ê聽眾，有tùi 150人進到200外人，感謝主。Tī chia有一位疼主ê友長老，tī 某某事件tú著大冤屈，犧牲丈夫kap 2個子（丈夫kap大子是醫生），伊iáu-kú無失志，疼主到底。願主加添氣力，hō͘ 伊bōe記得後面ê苦事，只有向頭前所插ê標來走，thang到hit日，得著召咱--ê ê賞。阿門。 |
|
Sûn Hōe-iú Sòa Sûn Ti-á
|
巡會友續巡豬仔 |
|
Góa chē chhia kàu tī Hong-tiân, chhē pài-tn̂g pòaⁿ-tiám cheng kú, chiah chhē-tio̍h cháiⁿ-iūⁿ chiah sió só͘-chāi, tio̍h chhē hiah kú? Goân-in sī kàu-hōe chiah siat chi̍t-nî kú, tah chháu-liâu tī chng-bóe, só͘-í chiah oh chhē. Chit ê kàu-hōe, sī chi̍t-ūi kàu-kài ê lāu sian-pòe Ô͘ sian-siⁿ khai-thok ê, sui-jiân chí ū siat-kàu chiah chi̍t-nî, iáu-kú chò lé-pài ū 4, 50 lâng, lóng sī sin hōe-iú. In tāi-seng bóe chi̍t tè chiaⁿ-pah pêⁿ ê pài-tn̂g-tōe, seng tah chit keng chháu-liâu, thang chò lé-pài, chóng-sī chit-keng chháu-liâu pài-tn̂g, ū tú-tio̍h tōa chai-lān, hō͘ hong-thai liân-liân ián-tó 3 pái, kàu goán khì pò͘-tō ê sî, in tùi tē 3 pái ê tó koh ián khiā khí-lâi, góa chheng chit-keng pài-tn̂g chò put-tó-ong kàu-hōe, chóng-sī in bô in-ūi só͘ tú-tio̍h ê to-lān lâi hoe-sim, in koh kè-e̍k, chiong só͘ hiàn ê chîⁿ, lia̍h ti-á kiáⁿ hō͘ lâng chhī pun, ǹg-bāng 2 nî āu ōe thang khí chi̍t keng 10 bān kho͘ í-siōng ê pài-tn̂g, in ê ǹg-bāng chin tōa, só͘-í thoân-tō sian-siⁿ tio̍h ka-pōe ê bô-êng, sûn hōe-iú, tio̍h sòa sûn kàu-hōe ê ti-á, khòaⁿ ū tōa chiah bōe? Chit khoán ê bo̍k-hōe, góa thâu chi̍t-pái khòaⁿ tio̍h, góa siong-sìn “Chīn-la̍t tī Chú ê kang-bôa m̄ sī khang-khang.” Koh thiaⁿ kóng, hia ê kéng-koaⁿ chin lo-so, nā sī goán tī hia pò͘-tō, chin hó ki-hōe, ti̍t-kàu sòa bóe àm, ū 5 ê kéng-koaⁿ lâi lîm-se̍k, ke-thiⁿ goán ê kong-êng, tio̍h o-ló Chú.
|
我坐車到tī 豐田，chhē拜堂半點鐘久，才 chhē著，怎樣chiah小所在，著chhē hiah久？原因是教會才設一年久，搭草寮tī庄尾，所以chiah oh chhē。這個教會，是一位教界ê老先輩胡先生開託--ê,雖然只有設教才一年，iáu-kú做禮拜有4、50人，攏是新會友。In代先買一塊成百坪ê拜堂地，先搭這間草寮，thang做禮拜，總是這間草寮拜堂，有tú著大災難，hō͘ 風颱連連ián倒3擺，到阮去佈道ê時，in tùi第3擺ê倒koh ián企起來，我稱這間拜堂做不倒翁教會，總是in無因為所tú著ê多難來灰心，in koh計劃，將所獻ê錢，掠豬仔子hō͘人飼分，向望2年後會thang起一間10萬箍以上ê拜堂，in ê向望真大，所以傳道先生著加倍ê無閒，巡會友，著續巡教會ê豬仔，看有大隻bōe?這款ê牧會，我頭一擺看著，我相信「盡力tī主ê工磨m̄是空空。」Koh聽講，hia-e警官真囉騷，若是阮tī hia佈道，真好機會，直到煞尾暗，有5個警官來臨席，加添阮ê光榮，著o-ló主。 |
|
Ka-têng Lé-pài Ū Hiàn-kim
|
家庭禮拜有獻金 |
|
Goán khì Siū-hong kàu-hōe chò kang ê sî, ū siū chhiáⁿ khì chò ka-têng lé-pài ê chú-lí, hit ê ka-têng sī gōa-séng lâng kap san-pau chí-bē kiat-hun ê ka-têng, chí ū hū-jîn-lâng ū lâi lé-pài, goán chò lé-pài liáu, chiū khòaⁿ-kìⁿ hit ê chí-bē the̍h chîⁿ hō͘ thoân-tō sian-siⁿ, góa mn̄g i sím-mi̍h ì-sù, i kóng sī ka-têng lé-pài ê hiàn-kim, sui-jiân sī 120 kho͘, chóng-sī ta̍k-hō͘ to ū chiàu án-ni, sûi-ì hōng-hiàn, thiaⁿ kóng Hong-tiân iā sī án-ni, góa siūⁿ che sī chin hó ê si̍p-koàn. Ū to͘-chhī kàu-hōe tī ka-têng chū-hōe, siông-siông chhut piáⁿ, thn̂g-á téng, ūi-tio̍h án-ni ū chin-chōe ê gī-lūn, só͘-í chiū hòe-chí chhut thn̂g-kó, ōaⁿ chò hiàn-kim, iáu-kú sī bô koàn-sì, si̍t-chāi tio̍h ǹg sió kàu-hōe lâi ha̍k-si̍p, Sūi-hong kàu-hōe í-keng ū 5 nî ê le̍k-sú, Hong-tiân chí-ū chi̍t nî, chóng-sī 2 keng kàu-hōe ê Chú-ji̍t-o̍h ha̍k-seng, lóng ū chiâⁿ pah lâng, khó-sioh nn̄g keng lóng khiàm-kheh Chú-ji̍t-o̍h kàu-oân, góa siūⁿ sin-siat ê kàu-hōe nā kèng-ka ēng kang tī Chú-ji̍t-o̍h ê kang-chok, kàu-hōe tek-khak heng-ōng, só͘-í chò thoân-kàu-chiá chin su-iàu pôe-iúⁿ chò kang ê jîn-châi, lâi saⁿ-kap hoat-tián Chú ê sèng-kang.
|
阮去壽豐教會做工ê時，有受請去做家庭禮拜ê主理，hit個家庭是外省人kap山胞姊妹結婚ê家庭，只有婦人人有來禮拜，阮做禮拜了，就看見hit個姊妹提錢hō͘ 傳道先生，我問伊甚mi̍h意思，伊講是家庭禮拜ê獻金，雖然是120箍，總是逐戶都有照án-ni，隨意奉獻，聽講豐田也是án-ni，我想che是真好ê習慣。有都市教會tī家庭聚會，常常出餅、糖仔等，為著án-ni有真濟ê議論，所以就廢止出糖果，換做獻金，iáu-kú是無慣勢，實在著向小教會來學習，瑞豐教會已經有5年ê歷史，豐田只有一年，總是2間教會ê主日學學生，攏有成百人，可惜兩間攏欠缺主日學教員，我想新設ê教會若更加用工tī主日學ê工作，教會的確興旺，所以做傳教者真需要培養做工ê人才，來相kap發展主ê聖工。 |
|
Koh Kè-sio̍k Pò͘-tō
|
Koh繼續佈道 |
|
Goán kàu Khèng-hong chò kang, chit keng kàu-hōe tióng-chip kap sian-siⁿ chin hia̍p-le̍k, só͘-í goán khì pò͘-tō, in iā chin gâu chún-pī it-chhè ê sū-kang, kiat-kó chiū-sī tit-tio̍h 200 miâ ê thiaⁿ-chiòng, chin tì-ì lâi kè-sio̍k thiaⁿ. In lâi thiaⁿ pò͘-tō, sī chū-hoat-tek chē tī thâu-chêng ê í-liâu, chiàu án-ni sūn-sū chē ūi, thâu kàu bóe lóng chin an-chēng, in-ūi pài-tn̂g bōe thang siu-iông hiah chōe lâng, chí-ū tio̍h tī pài-tn̂g chêng ê gōa-tiâⁿ chò hōe-tiûⁿ, ū sî tú-tio̍h hō͘-mī-á, iáu-kú thiaⁿ-chiòng lóng bô cháu, piáu-bêng in kiû-tō ê sim, chin jia̍t, goán pò͘-tō ê kî-kan í-keng oân, tióng-chip iau-kiû kè-sio̍k koh pò͘-tō, nā sī goán tio̍h koh kè-sio̍k khì Thài-môa-lí chò kang, tì kàu phah-sńg ki-hōe, chóng-sī chū-chāi kàu-hōe ê Tēⁿ thoân-tō, i iā sī ū pò͘-tō ê un-sù, chiū tùi chèng-lâng soan-pò͘, bîn-á-àm i pún-lâng beh kè-sio̍k pò͘-tō, chhiáⁿ chèng-lâng tio̍h koh lâi thiaⁿ, chin kám-siā Chú, goán Oán-tong Kui-chú ê hōe-tiúⁿ, Hek bo̍k-su phài goán chhut lâi pò͘-tō ê bo̍k-tek, iā sī chāi tī chia, ài kó͘-lē múi chi̍t keng kàu-hōe, pún-sin ū kè-sio̍k pò͘-tō ê cheng-sîn, lâi ín-chhōa bōe sìn ê lâng kui Chú. Só͘-í chòe thoân-kàu-chiá, á-sī sìn-tô͘ m̄ thang the-sî kóng, góa bô pò͘-tō ê un-sù, tì-kàu pîn-tōaⁿ, múi chi̍t ê lâng nā kam-goān ló͘-le̍k ha̍k-si̍p, ta̍k-lâng lóng sī pò͘-tō ka, bô ū sím-mi̍h kiò chò te̍k-pia̍t ê un-sù, góa siūⁿ chin-chiàⁿ ê un-sù, sī tùi kam-goān, ló͘-le̍k lâi ha̍k-si̍p chiū ōe tit-tio̍h. Goān Chú tùi Tâi-oân koh heng-khí chōe-chōe ài pò͘-tō ê tâng-kang kàu tī ta̍k-só͘-chāi, khì pò-thoân chín-kiù ê hok-im.
|
阮到慶豐做工，這間教會長執kap先生真協力，所以阮去佈道，in也真gâu準備一切ê事工，結果就是得著200名ê聽眾，真致意來繼續聽。In來聽佈道，是自發得坐tī 頭前ê椅寮，照án-ni順序坐位，頭到尾攏真安靜，因為拜堂bōe thang收容hiah濟人，只有著tī拜堂前ê外埕做會場，有時tú著雨mī 仔，iáu-kú聽眾攏無走，表明in求道ê心，真熱，阮佈道ê期間已經完，長執要求繼續koh佈道，若是阮著koh繼續去太麻里做工，致到扑損機會，總是駐在教會ê鄭傳道，伊也是有佈道ê恩賜，就對眾人宣布，明仔暗伊本人beh繼續佈道，請眾人著koh來聽，真感謝主，阮遠東歸主ê會長，Hek牧師派阮出來佈道ê目的，也是在tī chia，ài鼓勵每一間教會，本身有繼續佈道ê精神，來引chhōa bōe信ê人歸主。所以做傳教者，或是信徒m̄ thang推辭講，我無佈道ê恩賜，致到貧憚，每一個人若甘願努力學習，逐人攏是佈道家，無有甚mi̍h叫做特別ê恩賜，我想真正ê恩賜，是tùi甘願，努力來學習就會得著。願主對台灣koh興起濟濟ài佈道ê同工到tī逐所在，去播傳拯救ê福音。 |
