Kám-tōng ê Kò͘-sū_07
|
感動ê故事_07 |
| Tâi-oân soan-tō-siā |
台灣宣道社 |
|
Chi̍t Ê Bí-su̍t-ka Kap Chi̍t Ê Sì-kòe Phiau-liû Ê Lú-chú
|
一個美術家KAP 一個四界飄流Ê 女子 |
|
Kúi-nā nî-chêng, tī Tek-sū-to-hu siâⁿ, ū chi̍t ê bí-su̍t-ka miâ kiò Sū-tan-pó. Ū lâng chhiáⁿ i ūi chit-pak Chú tèng si̍p-jī-kè ê tô͘ ūi, i ê ōe hit ê tô͘-ūi, pèng m̄-sī in-ūi sìn Chú, thiàⁿ Chú, chiū-sī siūⁿ beh tit-tio̍h kim-chîⁿ kap bêng-ū.
|
幾若年前，tī Tek-sū-to-hu 城，有一個美術家名叫Sū-tan-pó。有人請伊為一幅主釘十字架ê 圖 畫，伊ê 畫hit ê 圖畫，並m̄ 是因為信主、疼主，就是想beh 得著金錢 kap 名譽。 |
|
Tī chi̍t ê bí-lē chhun-thiⁿ ê chheng-chá, Sū-tan-pó sàn-pō͘ tī chhiū-nâ tiong, i khòaⁿ-kìⁿ chi̍t ê sì-kè phiau-liû ê lú-chú tī hia teh phian-chit chháu-nâ, i ê bīn-māu chin súi, hit ê bí-su̍t-ka tiāⁿ-tio̍h ì-sù beh ēng i ê bīn-māu lâi ūi chi̍t-pak Se-pan-gâ bú-lú ê siōng. Tùi án-ni iok-tēng chit ê lú-chú Phê-pí-tāi, chhiáⁿ i tī múi lé-pài ê pài-saⁿ khì i ê ūi-tô͘-sek, hō͘ i khòaⁿ iūⁿ thang ōe.
|
Tī 一個美麗春天ê 清早，Sū-tan-pó 散布tī 樹林中，伊看見一個四界飄流ê 女子tī-hia teh 編織草籃，伊ê 面貌真súi,hit 個美術家定著意思beh 用伊ê 面貌來畫一幅西班牙舞女ê 像。Tùi án-ni 約定這個女子Phê-pí-tāi ，請伊tī 每禮拜ê 拜三去伊ê 畫圖室，hō͘ 伊看樣thang 畫。 |
|
Hit ê lú-chú chiàu-sî kàu ūi-tô͘-sek. I khòaⁿ-kìⁿ sek-lāi chin chōe tô͘-ūi, i te̍k-pia̍t chù-sîn khòaⁿ Chú tèng si̍p-jī-kè hit-pak tōa ê tô͘-ūi. Tùi án-ni ēng chhiú-kí, kiong-kèng mn̄g kóng: “I sī sím-mi̍h lâng.”
|
Hit 個女子照時到畫圖室。伊看見室內真濟圖畫，伊特別注神看主釘十字架hit 幅大 ê 圖畫。Tùi án-ni 用手kí,恭敬問講：「伊是甚mi̍h人。」 |
|
Sū-tan-pó chin sûi-piān ìn kóng: “Sī Ki-tok.”I koh-chài mn̄g: “Lâng cháiⁿ-iūⁿ tùi-thāi Ián-ni? ” I kóng: “In chiong I tèng tī Si̍p-jī-kè.” Hiah ê bīn-māu hiong-ok ê lâng sī sím-mi̍h lâng?” I mn̄g.
|
Sū-tan-pó 真隨便應講：「是基督。」 伊koh 再問：「人怎樣對待伊 án-ni?」 伊講：「In 將伊釘tī 十字架。」 「Hiah-ê 面貌凶惡ê 人是甚mi̍h人？」伊問。 |
|
Góa m̄ ài kap lí koh kóng, lí m̄-bián koán kî-thaⁿ ê sū, lí chí-ū chiàu góa ê hoan-hù khiā teh chiū hó.”
|
「我m̄ ài kap 你koh講，你m̄ 免管其他ê 事，你只有照我ê 吩咐企 teh 就好。」 |
|
Hit ê sì-kè phiau-liû ê lú-chú m̄-káⁿ koh-chài chhut-siaⁿ. Chóng-sī i iû-goân chù-ba̍k khòaⁿ hit-pak tô͘-ūi teh kî-koài. I múi-pái kàu hit ê ūi-tô͘-sek, sim-lāi siông-siông hō͘ hit-pak tô͘ khip-ín. I chin siūⁿ ài chai-iaⁿ hit-pak tô͘ ê ì-sù, tùi án-ni i koh-chài mn̄g: “In, ūi sím-mi̍h tèng I tī si̍p-jī-kè? I sī chi̍t ê chin pháiⁿê lâng á m̄-sī?”
|
Hit ê 四界飄流ê 女子m̄ 敢koh 再出聲。總是伊猶原注目看hit幅圖畫teh 奇怪。伊每擺 到hit 個畫圖室，心內常常hō͘ hit 幅圖吸引。伊真想ài 知影hit幅圖ê 意思，tùi án-ni 伊koh 再問：「In，為甚mi̍h釘伊tī 十字架？伊是一 個真歹ê 人抑m̄ 是？」 |
|
“M̄-sī, I sī hui-siông hó ê lâng.” Hit ê bí-su̍t-ka hôe-tap. Chit-kù ōe ke-thiⁿ i tùi hit-pak tô͘ ê hòⁿ-kî-sim.
|
「M̄ 是，伊是非常好ê 人。」Hit 個美術家回答。這句話加添伊tùi hit 幅圖ê 好 奇心。 |
|
Āu-lâi bí-su̍t-ka in-ūi chai-iáⁿ i chin ài bêng-pe̍k chit-pak tô͘ ê ì-sù, chiū tùi i kóng: “Lí thiaⁿ! Góa hiān-chāi beh chiong chit tiuⁿ tô͘ ê ì-sù lóng kā lí kóng, í-āu lí m̄-thang koh-chài mn̄g *lah.” Tùi án-ni i chiong Iâ-so͘ tèng si̍p-jī-kè ê kò͘-sū kóng hō͘ i thiaⁿ, bí-su̍t-ka lia̍h chit ê kò͘-sū chòe pêng-siông, kóng ê sî ka-kī choân-jiân bô só͘ kám-tōng, sui-jiân iōe thang ōe chhut Chú siū sí ê chhám-chōng, sim lóng bô só͘ kám-kak, chóng-sī Chú ê hi-seng siū-khó͘ Phê-pí-tāi kám-kak chin sîn-kî, i tōa siū kám-tōng, chêng put-chū-kìm lâu chhut ba̍k-sái.
|
後來美術家因為知影伊真ài 明白這幅圖ê意思，就tùi 伊講：「你聽！我現在beh 將這張圖ê 意思攏kā 你講，以後你m̄-thang koh 再問--lah 。」Tùi án-ni 伊將耶穌釘十字架ê 故事講hō͘ 伊聽，美術家掠這個故事做平常，講ê 時家己全然無所感動，雖然伊會thang 畫出主受死ê 慘狀，心攏無所感覺，總是主ê 犧 牲受苦Phê-pí-tāi 感覺真神奇，伊大受感動，情不自禁流出目屎。 |
|
I chòe-āu chi̍t-pái lâi kàu ūi-tô͘-sek ê sî, i khiā tī hit-pak tô͘ ê thâu-chêng chù-sîn teh khòaⁿ, teh siūⁿ. Hit ê bí-su̍t-ka kóng: “Lâi ah! góa chiong chîⁿ hō͘ lí, góa ke sàng lí chi̍t-kho͘-gûn.”
|
伊最後一擺來到畫圖室ê 時，伊企 tī hit 幅圖前注神teh 看、teh 想。Hit 個美術家講：「來ah！我將錢hō͘ 你，我加送你一箍銀。」 |
|
Sian-siⁿ ah! To-siā.” I koh oa̍t-tńg-sin bīn￠g hit-pak tô͘-ōa. I kóng: “I kì-jiân ūi-tio̍h lí chò-chiâⁿ che it-chhè, lí tek-khak chin kèng-thiàⁿ I, sī m̄-sī?”
|
「先生--ah！多謝。」伊koh越轉身面向 hit幅圖畫。伊講： 「伊既然為著你做成che 一切， 你的確真敬疼伊，是m̄ 是？」 |
|
Sū-tan-pó chēng-chēng bô ìn-tap, Phê-pí-tāi sim-lāi iu-chhiû chiū tò-khì, chóng-sī i só kóng ê ōe chhin-chhiūⁿ chìⁿ chha̍k thàu Sū-tan-pó ê sim. Siōng-tè ēng chit ê sì-kè piau-liû ê lú-chú só͘ kóng ê ōe, chhim-ji̍p i ê sim-lāi, “I kì-jiân ūi-tio̍h lí chò-chiâⁿ che it-chhè!” Chit-kù ōe sî-siông tī i ê hī-khang piⁿ tehchhut-siaⁿ, tì-kàu hō͘ i ê sim bōe thang an-tiāⁿ, I chai-iáⁿ ka-kī tùi tī siū-khó͘ ê Chú lóng bô kèng-thiàⁿ ê sim. Sim-lāi iā bōe-batū Siōng-tè ê pêng-an.
|
Sū-tan-pó 靜靜無應答，Phê-pí- tāi 心內憂愁就倒去，總是伊所 講ê 話親像箭chha̍k 透Sū-tan-pó ê 心。上帝用這個四界飄流 ê 女子所講ê 話，深入伊ê 心內， 「伊既然為著你做成che 一切！」 這句話時常tī 伊ê 耳空邊teh 出聲，致到hō͘ 伊ê 心bē-thang 安 定，伊知影家己tùi tī 受苦ê 主攏無敬疼ê 心。心內也bē-bat 有上帝ê 平安。 |
|
Kòe bô lōa-kú, Sū-tan-pó kap chi̍t-kóa sòng-hiong lâng kàu chi̍t ê an-chēng ê só͘-chāi thiaⁿ Hok-im. I sī thâu chi̍t-pái kap hiah ê us7…t-chāi sìn-sim ê lâng siong-hōe, i í-keng bêng-pe̍k Chú tī si̍p-jī-kè thè i taⁿ chōe. Siōng-tè ín-chhōa hit ê bí-su̍t-ka bêng-pe̍k kiù-un, ichai-iáⁿ Ki-tok ê thiàⁿ, chiū kóng: “I sī thiàⁿgóa, ūi-tio̍h góa pàng-sak ka-kī.”
|
過無偌久，Sū-tan-pó kap 一寡散hiong人到一個安靜ê 所在聽福音。伊是頭一擺 kap hiah-ê 有實在信心ê 人相會，伊已經明白主tī 十字架替伊擔罪。上帝引 chhōa hit 個美術家明白救恩，伊知影基督ê 疼，就講：「伊是疼我，為著我放sak 家己。」 |
|
I chhiat-chhiat ǹg-bāng ōe thang chiong chit ê kî-biāu ê thiàⁿ thoân-iông, chóng-sī beh cháiⁿ-iūⁿ thoân leh? Hut-jiân siūⁿ kàu iōe ūi-tô͘, thang ēng i só͘ ūi ê tô͘ lâi kóng-khí Chú ê thiàⁿ. Óa-khò Siōng-tè ê pang-chān, i koh-chài ūi Chú tèng Si̍p-jī-kè ê tô͘. Chit tiuⁿ tô͘ āu-lâi tîn-lia̍t tī Tek-sū-to-hu siâⁿ ū miâ ê Bí-su̍t tián-lám-sek, tô͘ ê ē-bīn siá kóng: “Góa ūi-tio̍h lí chòe che it-chhè, lí beh ūi-tio̍h góa chòe sím-mi̍h?”
|
伊切切向望會thang 將這個奇妙ê 疼傳揚，總是beh 怎樣傳leh ？忽然想到伊 畫畫圖，thang 用伊所畫ê 圖來講 起主ê 疼。倚靠上帝ê 幫贊，伊koh 再為主釘十字架ê 圖。這張圖後來陳列tī Tek-sū-to-hu 城有名ê 美術展覽室，圖ê 下面寫 講：「我為著你做che 一切，你beh 為著我做甚mi̍h？」 |
|
Ū chi̍t-ji̍t, Sū-tan-pó khòaⁿ-kìⁿ chi̍t ê chhēng-chhah sòng-hiong ê lú-chú khiā tī hit-pak tô͘ ê piⁿ-*à chhi-chhi chhngh3-chhngh3 tehháu. Chit ê lú-chú chiū-sī Phê-pí-tāi.
|
有一日，Sū-tan-pó 看見一個 穿chhah 散hiong ê 女子企 tī hit幅圖ê 邊--à chhi-chhi chhngh3-chhngh3 teh 哮。這個女子就是Phê-pí-tāi 。 |
|
“Sian-sīⁿ ah! hīn bē-tit I iā án-ni thiàⁿ góa, ”i ná háu ná kóng.
|
「先生--ah ！恨bē-tit 伊也án-ni 疼我。」 伊那哮那講。 |
|
Hit ê bí-su̍t-ka tùi i kóng: “Chú iā-sī ūi lis2i, sui-jiân lí sī chi̍t ê pîn-khó͘ sì-kè phiau-liû ê lâng, Chú hó khoán-thāi lí kap khoán-thāi hiah ê hù-kùi ê tōa jîn-bu̍t lóng bô koh-iūⁿ.” Sū-tan-pó bô chhin-chhiūⁿ í-chêng ê khoán-sit ìn-tap i ê būn-tôe, sī chin sêng-khún jia̍t-chhiat tùi i kóng-khí Ki-tok ê thiàⁿ. I chin siū kám-tōng lâi chiap-siū, i chhut-khì ê sî í-keng chiâⁿ chòe tit-kiù ê lâng lah. I him-sióng Chú kî-biāu ê thiàⁿ khoài-lo̍k kàu-kek. Chú ēng Phê-pí-tāi ê giân-gú khip-ín hit-ūi bí-su̍t-ka kàu I ê bīn-chêng, koh ēng bí-su̍t-ka ê giân-gú ín-chhōa Phê-pí-tāi jīn-bat i.
|
Hit 個美術家tùi 伊講：「主也是為你 死，雖然你是一個貧苦四界漂流ê 人，主好款待你kap 款待hiah-ê 富貴ê 大人物攏無各樣。」Sū-tan-pó 親像以前ê 款式應答伊ê 問題，是真誠懇熱切tùi 伊講起基督ê 疼。伊真受感動來接受，伊出去 ê 時已經成做得救ê 人lah。伊欣賞主奇妙ê 疼快樂到 極。主用Phê-pí-tāi ê 言語吸引 hit 位美術家到伊ê 面前，koh 用美術家ê 言語引chhōa Phê-pí-tāi 認 bat 伊。 |
|
Bô Ha̍k-būn Ê Sìn-gióng Kap Tōa Kho-ha̍k-ka
|
無學問Ê 信仰 KAP 大科學家 |
|
Chin chōe nî-chêng ū chi̍t ê Hoat-kok ê tōa kho-ha̍k-ka, beh keng-kòe A-la̍h-pekê soa-bô͘, i ū chhiàⁿ chi̍t ê A-la̍h-pek lâng kāi chhōa-lō͘. Nn̄g-lâng saⁿ-kap beh keng-kòe A-la̍h-pek ê soa-bô͘, ū chi̍t-pái tú-tú ji̍t chhiâ sai-soaⁿ ê sî, chit ê A-la̍h-pek lâng, the̍h chi̍t-tè tiām-á chhu tī thô͘-kha, kūi tī hit téng-bīn teh kî-tó.
|
真濟年前有一個法國ê 大科學家，beh 經過阿拉伯 ê 沙漠，伊有倩一個阿拉伯人kā 伊chhōa 路。兩人相kap beh 經過阿拉伯 ê 沙漠，有一擺tú-tú日斜西山ê 時，這個阿拉伯人，提一 塊墊仔chhu tī 塗腳，跪tī hit 頂面 teh 祈禱。 |
|
Chit ê kho-ha̍k-ka khòaⁿ-kìⁿ i teh kî-tó, Chiū ēng chi̍t-chióng kheng-sī ê ba̍k-chiu lâi kā i khòaⁿ. Tng-tán i kî-tó liáu, chiah kā imn̄g kóng: “Lí teh chò sím-mi̍h?” I kóng “Goateh2 kî-tó” “Kî-tó? Lí sī tùi sím-mi̍h lâng teh kî-tó?” I ìn kóng “Tùi Siōng-tè.”
|
這個科學家看見伊teh 祈禱， 就用一種輕視ê 目珠來 kā 伊看。當等伊祈禱了，才kā 伊 問講：「你teh 做甚mi̍h？」伊講：「我 teh 祈禱」「祈禱？你是tùi 甚mi̍h人teh 祈禱？」伊應講：「Tùi 上帝。」 |
|
Chit ê kho-ha̍k-ka thiaⁿ-kìⁿ i án-ni kóng, sim-lāi chin kheng-sī chit ê A-la̍h-pek lâng. I chiū koh mn̄g i kóng “Lí bat khòaⁿ-kìⁿ Siōng-tè sī bô?” I kóng “Bô.” “Á-sī lí bat thiaⁿ-kìⁿ Siōng-tè ê siaⁿ sī bô?” I kóng “Bô.” “Á sī libat2 bong-tio̍h Siōng-tè sī bô?” I koh kóng “Bô.” Chit ê kho-ha̍k-ka thiaⁿ-kìⁿ i lóng kongb2o, sòa chhiò chhut--lâi. Chiū tùi chit ê A-la̍h-pek lâng kóng: “Gōng-lâng ah! Lí sìn hit khoán m̄-bat khòaⁿ-tio̍h, iā m̄-bat thiaⁿ-tio̍h, koh m̄-bat bong-tio̍h ê Siōng-tè, si̍t-chāi lí sī sè-kan tē-it gōng ê lâng.” Chóng-sī chit ê A-la̍h-pek lâng sui-jiân siū chit khoán ê thí-chhiò, i lóng chēng-chēng bô ìn chi̍t kù ōe.
|
這個科學家聽見伊án-ni 講，心內真輕視這個阿拉伯人。伊就koh 問伊講「你bat 看見上帝是無？」伊講：「無。」「抑是你bat 聽見 上帝ê 聲是無？」伊講：「無。」「抑是你 bat 摸著上帝是無？」伊koh 講 ：「無。」這個科學家聽見伊攏講無，續笑出--來。就tùi 這個阿拉伯人講：「憨人--ah ！你信hit 款m̄-bat 看著、iā m̄-bat 聽著、koh m̄-bat 摸著ê 上帝，實在你是世間第一憨ê 人。」總--是這個阿拉伯人雖然受這款ê 恥笑，伊攏靜靜無應這句話。 |
|
Āu-lâi in nn̄g lâng chiū saⁿ-kap tī soa-bô͘ keng-kè o͘-àm-mî, kàu thiⁿ phú-kng in chiū beh koh chhut-hoat. Beh chhut-hoat ê sî chit ê kho-ha̍k-ka kóng “Cha-mî tāi-khài ū lo̍k-tô tùi chia kòe ê khoán, chit ê A-la̍h-pek lâng thiaⁿ liáu chiū mn̄g chit ê kho-ha̍k-ka kóng “Lí cha-mî sī ū khí-lâi khòaⁿ-tio̍h sī bô?” Kho-ha̍k-ka kóng “Bô.” “Á-sī lí ū thiaⁿ-kìⁿ lo̍k-tô ê siaⁿ sī--bô?” I kóng “Bô”. I chiū koh mn̄g i kóng “Á-sī lí ū bong-tio̍h sī bô?” I iā-sī kóng “Bô”. Chit ê A-la̍h-pek lâng tùi chit ê kho-ha̍k-ka kóng “Lí chit ê gōng-lâng, lí iā bô khòaⁿ-kìⁿ lo̍k-tô, iā bô thiaⁿ-tio̍h, koh iā bô bong-tio̍h lo̍k-tô, lí cháiⁿ-iūⁿ sìn ū lo̍k-tô tùi chia kòe? Chit ê kho-ha̍k-ka tùi i kóng “Chóng-sī tī chia ū lo̍k-tô ê kha-jiah thanghō͘ lán sìn.”
|
後來in 兩人就相kap tī 沙漠 經過烏暗暝，到天phú 光in 就 beh-koh 出發。Beh 出發ê 時這 個科學家講：「昨暝大概有駱駝 tùi chia 過ê款」，這個阿拉伯人聽了就問這個科學家講： 「你昨暝是有起來看著是無？」 科學家講「無。」「抑是你有聽見駱駝ê 聲是--無？」伊講：「無」。伊就koh 問伊講：「抑是你有摸著是無？」伊也是講：「無」。這個阿拉伯人tùi 這 個科學家講：「你這個憨人，你也無看見駱駝、也無聽著、koh 也無摸著駱駝，你怎樣信有駱駝 tùi chia 過？」這個科學家tùi 伊講：「總是tī-chia 有駱駝ê 腳跡thang hō͘ 咱信。」 |
|
Chit ê sî, tú-tú thài-iông tùi tang-pêng khí lâi, siā chhut kî-biāu ê kong-hui chiàu-iāu tī hn̄g-hn̄g ê tē-pêng soaⁿ-téng, A-la̍h-pek lâng chhiò-chhiò, chhiú kí thài-iông tùi kho-ha̍k-ka kóng, “Pêng-iú ah! Lí khòaⁿ chō-bu̍t Chú ê kha-jiah, I só͘ chhòng-chō ê thài-iông”. I koh kóng “In-ūi chiah ê kha-jiah só͘-í góa bē thang bô sìn Siōng-tè oa̍h-oa̍h ê chûn-chāi.
|
這個時，tú-tú太陽tùi 東爿起 來，射出奇妙ê 光輝照耀tī 遠遠ê 地平山頂，阿拉伯人笑笑，手kí 太陽tùi 科學家講：「朋友--ah ！你看造物主 ê 腳跡，伊所創造ê 太陽。」伊 koh 講：「因為chiah-ê 腳跡所以我bē- thang 無信上帝活活ê 存在。」 |
|
Ióng-kám Ê Iâ-bí-tô-kek-su
|
勇敢Ê IÂ-BÍ-TÔ-KEK-SU |
|
Tī iáu-bē kóng Iâ-bí-tô-kek-su ê kò͘-sū í-chêng, góa beh seng kóng tām-po̍h koan-hē So͘-kek-lân tng-sî ê chong-kàu chêng-hêng. Tng Cha-lí tē-it chòe ông ê sî, sin-kàu-tô͘ ūi-tio̍h beh chó͘-chí pài ngó͘-siōng ê sū (chiū-sī Thian-chú-kàu ê sîn-hū kiông-pek lâng khì kèng-pài chòe mî-sat ê sî só͘ ēng ê piáⁿ, in-ūi in kóng hiah ê piáⁿ tī hōng-hiàn hō͘ Sîn ê sî, í-keng piàn chiâⁿ Ki-tok ê sin-thé, só͘-í in ēng hit ê piáⁿ chòe ngó͘-siōng lâi kèng-pài), kap ūi-tio̍h ko-kú Sèng-keng, chiong Sèng-keng chòe it-chhè sìn-gióng ê kun-kù, So͘-kek-lân ê peh-sìⁿ chiong chit nn̄g hāng li̍p chòe giâm-siok ê khè-iok, chham-ka tī chit khoán li̍p-iok ê lâng kiò chòe “Li̍p-iok chiá.”
|
Tī iáu-bē 講 Iâ-bí-tô-kek-su ê 故事以前，我beh 先講淡薄關係蘇格蘭當時ê 宗教情形。當查理第一做王ê 時，新教徒為著beh 阻止拜偶像ê 事（就是天主教ê 神父強迫人去敬拜做彌撒 ê 時所用ê 餅，因為 in 講hiah-ê 餅tī 奉獻hō͘ 神ê 時，已經變成基督ê 身体，所以 in 用hit 個餅做偶像來敬拜），kap 為著ko-kú 聖經，將聖經做一切信仰ê 根據，蘇格蘭 ê 百姓將這2 項立做嚴肅ê 契約，參加tī 這款立約ê 人叫做「立約者。」 |
|
Chiah ê Li̍p-iok-chiá kap tī in tiong-kan ūi Chú chòe kang ê lâng, lóng tī kok-ông ê chhiú-lāi, tú-tio̍h chân-jím ê ap-pek kap khó͘-hāi. In chū-hōe ê sî, tio̍h bi̍h tī chin pì-bi̍t ê só͘-chāi, ta̍k ê ūi Chú chòe kang ê thoân-tō-chiá lóng tio̍h ūi ka-kī chhē chi̍t ê pì-bi̍t ê só͘-chāi chòe tô-siám ê lō͘-ēng. In-ūi in lóng siū kóaⁿ chhut hōe-tn̂g, koh tò-chhù siū kàm-sī kap siū-lia̍h.
|
Chiah-ê 立約者kap tī in 中間為主做工ê 人，攏tī 國王ê 手內，tú著殘忍ê 壓迫kap 苦 害。In 聚會ê 時，著 bi̍h tī 真祕密ê 所在，逐個為主做工ê 傳道者攏著為家己chhē 一個祕密ê 所在做逃閃ê 路用。因為in 攏受趕出會堂，koh 到處受監視kap 受掠。 |
|
Ū lâng bi̍h tī soaⁿ-tōng *n̍i̍h, iā ū lâng bi̍h tī pì-bi̍t ê chhù-lāi, ū ê bi̍h tī khòng-iá, á-sī chhiū-nâ lāi, ta̍k ê Li̍p-iok-chiá tio̍h siông chún-pī pang-chān pó-hō͘ chiah ê tô-cháu ê thoân-tō-chiá. Che sī ke̍k-kî mō͘-hiám ê tāi-chì, in-ūi nā hō͘ chèng-hú chai ū teh pang-chān thoân-tō-chiá, in ka-kī iā ōe siū lia̍h, siū hāi sí. Chóng-sī in khiok iû-goân chīn só͘ ōe teh pang-chān Chú ê lô͘-po̍k. Tī 45 nî kú ê tiong-kan (1643－1688), ū chin chōe chheng-liân lâm-lú kap gín-ná ióng-kám chòe chit khoán pang-chān ê kang.
|
有人bi̍h tī 山洞--n̍i̍h,也有人bi̍h tī 祕密ê 厝內，有ê bi̍h tī 曠野，抑是樹林內，逐個立約者著常準備幫贊保護chiah-ê 逃走ê 傳道者。Che 是極其冒險ê 代 誌，因為若hō͘ 政府知有teh 幫贊傳道者，in 家己也ē 受掠，受害死。總是in 卻猶原盡所會 teh 幫贊主ê 奴僕。Tī 45 年久 ê 中間（1643-1688），有真濟青年男女kap 囡仔勇敢做這款幫贊ê 工。 |
|
Chiah ê Li̍p-iok-chiá ê seng-oa̍h chin giâm-siok, iā sī chin khó-lîn. Pē-bú kap hiaⁿ-tī chí-bē siông-siông siū hun-sòaⁿ, phiau-liû tī ta̍k só͘-chāi. Ū sî siū-tio̍h iau, kôaⁿ, á-sī siū hāi-sí. Ta̍k-ji̍t in lóng m̄-chai beh tú-tio̍h sím-mi̍h gûi-hiám.
|
Chiah-ê 立約者ê 生活真嚴肅，也是真可憐。父母kap 兄弟姊妹常常受分散，飄流tī 逐所在。有時受著枵、寒、抑是受害死。逐日in 攏m̄ 知beh tú著甚mi̍h 危險。 |
|
Taⁿ hiān-chāi lâi kóng sòe-hàn Iâ-bí ê kò͘-sū, lí chiū ōe chin khoài bêng-pe̍k.
|
今現在來講細漢Iâ-bí ê 故事，你就會真快明白。 |
|
Chin chōe nî chêng, ū chi̍t ê So͘-kek-lân ê ta-po͘ gín-ná miâ chòe Iâ-bí-tô-kek-su, i sī tiàm tī chin súi ê khòng-iá *n̍i̍h, ū chi̍t-ji̍t ichin sió-sim teh kiâⁿ chi̍t tiâu sòe-tiâu lō͘. Cháiⁿ-iūⁿ tio̍h chiah-n̍i̍h sió-sim? Ū nn̄g ê goân-in. Chi̍t-hāng sī in-ūi i tio̍h kiâⁿ kàu chi̍t ūi pì-bi̍t ê só͘-chāi, bōe-ēng-tit hō͘ lâng hoat-kak tio̍h. Koh chi̍t hāng goân-in sī in-ūi tī i ê saⁿ-á-lāi ū khǹg chi̍t pau chia̍h mi̍h. I chin sió-sim ǹg thâu-chêng kiâⁿ, keng-kè chi̍t ê tōa chhiū-nâ, koh oan kàu chi̍t tè tōa chio̍h ê āu-bīn, tiap-á-kú bô khòaⁿ-kìⁿ, tiap-á-kú chiū koh khòaⁿ-kìⁿ, kiâⁿ chi̍t tōaⁿ chin oan-khiau koh chin tn̂g ê soaⁿ-lō͘.
|
真濟年前，有一個蘇格蘭 ê 查甫囡仔名做Iâ-bí-tô-kek-su，伊是 tiàm tī 真súi ê 曠野--n̍i̍h,有一日伊真小心teh 行一條細條路。怎樣著 chiah-ni̍h 小心？有兩個原因。一項是因為伊著行到一位祕密ê 所在，bē 用得hō͘ 人發覺著。Koh 一項原因是因為tī 伊 ê 衫仔內有囥一包食物。伊真小心向頭前行，經過一個大樹林，koh 彎到一塊大石 ê 後面，tiap仔久無看見、tiap仔久就 koh 看見，行一段真彎曲 koh 真長ê 山路。 |
|
Tī bô jōa hn̄g ê soaⁿ, chêng-bīn ū chi̍t-ê tōng lāi-bīn ū chi̍t-ūi So͘-kek-lân bo̍k-su, miâ kiò Thong-bú-lô-ai, i teh thèng-hāu Iâ-bil2ai chhē i.
|
Tī 無偌遠ê 山，前面有一 個洞內面有一位蘇格蘭牧師，名叫Thong-bú-lô-ai，伊teh 聽候 Iâ-bí 來chhē 伊。 |
|
Kek-lâi-hô-su sī chi̍t ê ū tōa koân-sè koh chân-jím ê lâng, i tī soaⁿ-iá bâi-ho̍k chin chōe peng-teng, bo̍k-tek sī beh lia̍h hiah ê Li̍p-iok-chiá.
|
Kek-lâi-hô-su 是一個大權勢koh 殘忍ê 人，伊tī 山野埋伏真濟兵丁，目的是beh 掠hiah ê 立約者。 |
|
Án-ni, lí chiū ōe bêng-pe̍k Iâ-bí cháiⁿ-iūⁿ tio̍h hiah-n̍i̍h sió-sim teh siám-pī lâng khòaⁿ-kìⁿ. I tek-khak tio̍h chiong hit pau chia̍h-mi̍h sàng hō͘ Thong-bú-lô-ai, koh bōe-ēng-tit lāu-siat chit ê lāu-lâng teh bi̍h ê só͘-chāi. I chai, kiám-chhái ū chin chōe peng-teng bâi-ho̍k tiī ê chiu-ûi, chóng-sī i iû-goân chīn i só͘ ōe beh chòe kàu chiâⁿ.
|
Án-ni，你就會明白Iâ-bí 怎樣著 hiah-ni̍h 小心teh 閃避人看 見。伊的確著將hit 包食物送hō͘ Thong-bú-lô-ai，koh bōe 應tit漏洩這個老人teh bi̍h ê 所在。伊知， kiám-chhái 有真濟兵丁埋伏伊ê 周圍，總是伊猶原盡伊所會beh 做到成。 |
|
I kè-sio̍k ǹg thâu-chêng kiâⁿ, hiān-chāi í-keng chhun chin té ê lō͘-chām. I pê chiūⁿchi̍t tè tōa chio̍h-thâu ê téng-bīn, sì-kòe koan khòaⁿ, i ka-kī kóng: “Bô iàu-kín, lóng bô lâng.” I ka-kī siūⁿ kóng chin kai-chài, chóng-sī tng i kiâⁿ kàu chio̍h-thâu ê ē-bīn, teh oanê sî, Ah! Ū peng-teng teh thèng-hāu i lah!
|
伊繼續向頭前行，現在已經chhun 真短ê 路站。伊爬上 一塊大石頭ê 頂面，四界觀看，伊家己講：「無要緊，攏無人。」伊家己想講真佳哉，總是當伊行到石頭ê 下面，teh 彎 ê 時，Ah！有兵丁teh 聽候伊lah ！ |
|
Liam-piⁿ ū kúi-nā ki chho͘-tōa ê chhiuchióng i lia̍h khí--lâi, i só͘ tòa lâi ê chi̍t-pau chia̍h-mi̍h hiám-hiám tùi siū thiah-phòa ê saⁿlak chhut--lâi. “Hà! Sió-kúi! Lí beh sàng chiahm8…h hō͘ Thong-bú-lô-ai chia̍h á m̄ sī?” Iâ-bí ê bīn chek-sî piàn chin chhiⁿ-pe̍h, i lóng bô chhut-siaⁿ, chóng-sī choân sin-khu ti̍t-ti̍t chhoah. “Lâi khì kìⁿ goán ê thâu-lâng!”Hiah ê lia̍h i ê lâng ná kóng ná chhia i kàu chi̍t ê chin hiông-ok ê lâng ê bīn-chêng.
|
Liam-piⁿ 有幾若支粗大ê 手將伊掠起--來，伊所tòa 來ê 一包食物險險tùi 受拆破ê 衫 lak 出--來。「Hà ！小鬼！你beh 送食物hō͘ Thong-bú-lô-ai 食抑 m̄ 是？」 Iâ-bí ê 面即時變真青白，伊攏無出聲，總是全身軀 直直chhoah。「來去見阮ê 頭人！」 Hiah-ê 掠伊ê 人那講那chhia 伊到 一個真雄惡ê 人ê 面前。 |
|
Hit ê thâu-lâng chē tī chi̍t tè chio̍h-thâu, i khòaⁿ-kìⁿ Iâ-bí chiū kóng: “Kā góa kóng hitê lāu Thong-bú bi̍h tī sím-mi̍h só͘-chāi?” Ìn kóng: “Góa m̄ kā lí kóng.”
|
Hit 個頭人坐tī 一塊石頭， 伊看見Iâ-bí 就講：「Kā 我講hit 個老Thong-bú bi̍h tī 甚mi̍h所在？」應講：「我m̄ kā 你講。」 |
|
“Nā góa khéng pàng lí chū-iû, lí iā m̄-khéng kóng mah?” “M̄”! Hit ê lâng tōa siū-khì, i khîⁿ Iâ-bí ê keng thâu, tùi i tōa siaⁿ hoah kóng: “Lí káⁿ m̄ kā góa kóng mah? Lí nā kū-choa̍t góa ê ōe, tio̍h seng thí-khui ba̍k-chiu khòaⁿ lí ka-kī ê kiat-kio̍k!”
|
「若我肯放你自由，你也m̄ 肯講mah？」 「M̄!」 Hit 個人大受氣，伊khîⁿ Iâ-bí ê 肩頭，tùi 伊大聲喝講：「你敢m̄ kā 我講mah？你若拒絕我ê 話，著先thí 開目珠看你家己ê 結 局！」 |
|
Án-ni kóng, i chiū chiong Iâ-bí thoa kàu soaⁿ-phiâⁿ ê piⁿ-á, ē-bīn chin chhim koh chin àm, chin-chōe chio̍h-thâu chhiū-ba̍k, khòaⁿ liáu chhin-chhiūⁿ sè châng chháu-á ê khoán.
|
Án-ni 講，伊就將Iâ-bí 拖到山坪ê 邊仔，下面真深koh 真暗，真濟石頭樹木，看了親像細châng 草仔 ê 款。 |
|
“Lí nā m̄ kā góa kóng, góa beh chiong lí hiat lo̍h khì, hia ū ōe chia̍h lâng ê eng-chiáu kap chhâi-lông, in teh thèng-hāu beh chia̍h lí ê bah.” I chiong Iâ-bí thoa khí-lâi khong-tiong, thêng tiap-á-kú chiong i tōa la̍t pàng tī thô͘-kha.
|
「你若m̄ kā 我講，我beh 將你 hiat 落去，hia 有會食人ê 鷹鳥 kap 豺狼，in teh 聽候beh 食你ê 肉。」伊將Iâ-bí 拖起來空中，停tiap仔久將伊大力放 tī 塗腳。 |
|
I koh chi̍t pái háng-hoah Iâ-bí kóng: “Hia chiū-sī lí beh khì ê só͘-chāi!” Iâ-bí ê sin-khuná chhoah ná háu kóng: “Ē-bīn chin chhim, lí beh hiah chân-jím chiong góa hiat lo̍h khìa m̄ sī?” Sui-jiân sī án-ni, Iâ-bí iû-goân m̄-khéng kóng chhut lāu bo̍k-su bi̍h tī sím-mi̍h só͘-chāi.
|
伊koh 一擺哄喝Iâ-bí 講：「Hia 就是你beh 去ê 所在！」Iâ-bí ê 身軀那 chhoah 那哮講：「下面真深，你beh hiah 殘忍將我hiat 落去抑 m̄ 是？」雖然是án-ni，Iâ-bí 猶原m̄ 肯講出老牧師bi̍h tī 甚mi̍h 所在。 |
|
Tùi án-ni hit ê thâu-lâng tōa siū-khì kóng: “Kín kā góa kóng, nā bô, góa beh liâm-piⁿ chiong lí hiat lo̍h--khì.”Chóng-sī Iâ-bí kia̍h-thâu ǹg thiⁿ, i kì-tit Chú Iâ-so͘ bat khiā khí lâi hoan-gêng Sū-thê-hoán, i chai Chú iā beh siāng-khoán hoan-gêng Iâ-bí.
|
Tùi án-ni hit 個頭人大受氣講： 「緊kā 我講，若無，我beh liâm-piⁿ 將你hiat 落--去。」總是Iâ-bí kia̍h 頭向天，伊記得主耶穌bat 企起來歡迎司提反，伊知主也beh 像款歡迎Iâ-bí 。 |
|
Chòe-āu, i ióng-kám kóng: “Chiong góa hiat lo̍h-khì, in-ūi góa bōe-ōe kā lí kóng lí só͘ ài chai ê.” Hit lâng tōa siū-khì, chiū chiong Iâ-bí ê sin-thé tōa la̍t hiat kàu kúi-nā chheng chhioh chhim ê ē-bīn. Chóng-sī kiám-chhái i ê sin-thé iáu bē kàu pòaⁿ-lō͘, i ióng-kám ê lêng-hûn í-keng pe kàu thiⁿ-téng lah! Lāu bo̍k-su tī i ê soaⁿ-tōng-kháu teh thèng-hāu Iâ-bí lâi. Iâ-bí chhin-ài ê lāu-bú iā tī mn̂g-kháu teh thèng-hāu sòe-kiáⁿ tò-tńg lâi. Chóng-sī thèng-hāu kàu thiⁿ chhiⁿ tī khong-tiong teh chiò ê sî, iû-goân bô khòaⁿ-kìⁿ Iâ-bí ê iáⁿ. Lāu-bú chai, chí ū tī thiⁿ-téng chiah ōe thang kap Iâ-bí saⁿ-kìⁿ－－Tī hit ê êng-kng ê só͘-chāi, bô koh ū pun-lī kap kan-khó͘, tī hia ū an-ùi kap chû-ài!
|
最後，伊勇敢講：「將我 hiat 落去，因為我bōe會kā 你講你 所ài 知--ê。」Hit 人大受氣，就 將Iâ-bí ê 身体大力hiat 到幾nā 千尺深ê 下面。總是kiám- chhái 伊ê 身体iáu-bē 到半路，伊勇敢ê 靈魂已經飛到天頂--lah！老牧師tī 伊ê 山洞口teh 聽候Iâ-bí 來。Iâ-bí 親愛ê 老母也tī 門口teh 聽候細子倒轉來。 總是聽候到天星tī 空 中teh 照ê 時，猶原無看見Iâ- bé ê 影。老母知，只有tī 天頂才 會thang kap Iâ-bí 相見 －－Tī hit-ê 榮光ê 所在，無koh 有分離kap 艱苦，tī hia 有安慰kap 慈愛！ |
|
Tī hia, tī tit-kiù ê lâng ê tiong-kan-－Chiū-sī éng-oán hok-khì kap khoài-lo̍k es5¯-chāi-－Chhin-ài ê ma-ma kap lāu Thong-bú bo̍k-su teh beh kìⁿ-tio̍h sòe-hàn ê Iâ-bí.
|
Tī-hia，tī 得救ê 人ê 中間 －－ 就是永遠福氣kap 快樂ê 所在－－ 親愛ê 媽媽kap 老Thong-bú 牧 師teh-beh 見著細漢ê Iâ-bí。 |
|
Í-sa-pek Kap Má-lī-an
|
Í-SA-PEK KAP MÁ-LĪ-Aⁿ |
|
Ū chi̍t ê sî-kî, So͘-kek-lân ê Ki-tok-tô͘ siū chin tōa ê khún-tio̍k, sīm-chì gín-ná iā siū khó͘-lān.
|
有一個時期，蘇格蘭 ê 基督徒受真大ê 窘逐，甚至囡仔也受苦難。 |
|
Chân-jím koh ū koân ê Kek-lâi-hô-su kap i ê pō͘-hā, ta̍k-sî lóng chún-pī beh thâi sí Ki-tok-tô͘. Chit ê thâu-lâng siông-siông tiàu-chi̍p chi̍t-kóa sòe-hàn ta-po͘ gín-ná kap cha-bó͘ gín-ná, hoan-hù peng-teng tī in ê thâu-khak téng pàng chhèng háng in, kā in kóng: “Lín nā kóng lín ê pē-bú bi̍h tī sím-mi̍h só͘-chāi, chiū beh tháu-pàng lín.” chóng-sī hiah ê gín-ná ū *ê m̄-chai in ê pē-bú bi̍h tī tá-lo̍h, ū *ê sui-jiân chai, iā m̄-khéng kóng chhut-lâi. Chiah ê gín-ná chiū-sī tī chit khoán gûi-hiám ê khoân-kéng tiong tōa-hàn-Siū ap-pek kap sí-bô só͘ pau-ûi, thiaⁿ-kìⁿ khòng-iá ê chhèng-siaⁿ-Tng in hoat-hiān lāu-pē lāu-bú kap a-hiaⁿ éng-oán bô tò-lâi ê sî, in chiū chū-jiân jî-jiân pianN3-chiâⁿ giâm-siok chhim-tîm eg5in-ná. In m̄ bat gín-ná sî-tāi ê khoài-lo̍k sī sím-mi̍h khoán chu-bī, chóng-sī in tùi sìn, ū khòaⁿ-kìⁿ thàu kàu thian-ka hit tiâu lō͘.
|
殘忍koh 有權ê Kek-lâi-hô-su kap 伊ê 部下，逐時攏準備beh thâi 死基督徒。這個頭人常常召集一寡細漢查甫囡仔 kap 查某囡仔，吩咐兵丁tī in ê 頭殼頂放銃哄in，kā in 講：「Lín 若講lín ê 父母bi̍h tī 甚mi̍h所在，就beh tháu 放lín。」總--是hiah-ê 囡仔有--ê m̄ 知in ê 父母bi̍h tī tá落，有--ê 雖然知，也m̄ 肯講出來。Chiah- ê 囡仔就是tī 這款危險ê 環境中大漢 －受壓迫kap 死無所包圍，聽見曠野ê 銃聲 －當in 發現老父老母kap阿兄永遠無倒來ê 時，in 就自然而然變成嚴肅深沈ê 囡仔。In m̄-bat 囡仔 時代ê 快樂是甚mi̍h款滋味，總是in tùi 信，有看見透到天家hit 條路。 |
|
Í-sa-pek kap Má-lī-an lóng sī 17 hòe ê cha-bó͘ gín-ná. Nn̄g-lâng lóng sī sio̍k tī Ka-má-bûn-hōe-Chiū-sī ta̍k só͘-chāi siū lâng ap-pekê “Li̍p-iok-chiá.” (In li̍p-iok bô beh sūn-thàn sîn-hū khì pài ngó͘-siōng). In siū lia̍h, siū khún-tio̍k, bô lâng káⁿ pang-chān, á sī chiap-thāi in. Chit-nn̄g ê cha-bó͘ gín-ná ū siū liahkh8i koaiⁿ tī Ài-teng-pó ê kaⁿ-ga̍k. Sím-phòaⁿ-koaⁿ chhe chi̍t ê sîn-hū miâ chòe A-kî-pó khì hóng-būn in. Chit ūi sîn-hū chiông-chêng bat chòe Ka-má-bûn ê hōe-oân, in-ūi kiaⁿ khún-tio̍k chiū kái-chong, hiān-chāi hoán-tńg tehkhún-tio̍k pa̍t-lâng. Sîn-hū lâi kìⁿ in, kā inkóng i sī cháiⁿ-iūⁿ tò-tńg lâi Thian-chú-kàu, khó͘-khǹg in nn̄g-lâng tio̍h chhin-chhiūⁿ i. Í-sa-pek kap Má-lī-an kiat-koat kā i kū-choa̍t. A-kî-pó chēng-chēng khiā teh khòaⁿ tiap-á-kú, sim-lāi m̄-chai teh siūⁿ sím-mi̍h. M̄-chaisī teh hō͘-hóe? Á-sī chiong ka-kī ê loán-jio̍k kap chit nn̄g ê cha-bó͘ gín-ná ê kong-kiông saⁿ pí-kàu? Chòe-āu i kóng, góa beh kap lín saⁿ-kap kî-tó. Chóng-sī in iā kā i kū-choa̍t. Má-lī-an kóng: “Lí ê kî-tó tek-khak kap lí ê kóng ōe saⁿ-tâng, goán bōe thang kap lí tâng-sim kî-tó.” I ìn kóng: “Góa m̄ kóng lín ê chong-chí, chí-ū kiû Chú hō͘ lín bêng-pe̍k lín ê só͘ chòe sī m̄-tio̍h.” I-sa-pek kap Má-lī-an tâng-siaⁿ ìn kóng: “Goán m̄ sī chòe phái ê lâng, iā m̄ sī ài koán êng-sū ê lâng. Goán sī chhî-siú Sèng-keng kap Chú Iâ-so͘ ê chin-lí, goán bô m̄-tio̍h!”
|
Í-sa-pek kap Má-lī-an 攏是17 歲ê 查某囡仔。兩人攏是屬tī Ka-má-bûn 會 －就是逐所在受人壓迫 ê 「立約者。」（In 立約無beh 順趁 神父去拜偶像）。In 受掠，受窘逐，無人敢幫贊，抑是接待in 。這兩個查某囡仔有受掠去關tī 愛丁堡ê 監獄。審判官chhē 一個神父名做A-kî-pó 去 訪問in。這位神父從前bat 做Ka-má-bûn ê 會員，因為驚窘逐就改裝，現在反轉 teh 窘逐別人。神父來見in ，kā in 講伊是怎樣倒轉來天主教，苦勸in 兩人著親像伊。Í-sa-pek kap Má-lī-an 結決kā 伊拒絕。A-kî-pó 靜靜企 teh 看tiap仔久，心內m̄ 知teh 想甚mi̍h。M̄ 知 是teh 後悔？抑是將家己ê 軟弱 kap 這兩個查某囡仔 ê 剛強相比較？ 最後伊講：「我beh kap lín 相 kap 祈禱。」總是in 也kā 伊拒絕。Má-lī-an 講：「你ê 祈禱的確kap 你ê講話相同，阮bōe-thang kap 你同心祈 禱。」伊應講：「我m̄ 講lín ê 宗旨只有求主hō͘ lín 明白lín ê 所做是m̄著。」Í-sa-pek kap Má-lī-an 同聲應講：「阮m̄ 是做歹ê 人，也m̄ 是ài 管閑事ê 人。阮是持守聖經 kap 主耶穌ê 真理，阮無m̄著！」 |
|
A-kî-pó khòaⁿ-kìⁿ in bōe khó͘-khǹg tit, chiū lī-khui in. Tng i beh kiâⁿ chhut mn̂g-kháu ê sî, koh oa̍t-tńg-sin khòaⁿ in, i bêng-bêng khòaⁿ chhut i ka-kī kap in ū tōa bô siāng-khoán. Insī ūi-tio̍h liông-sim ê iân-kò͘ bīn ǹg sí-bô, chóng-sī i ka-kī ūi-tio̍h kiaⁿ sí lâi ûi-pōe liông-sim. Án-ni, i kiám ū pí chit nn̄g ê siū ap-pek ê cha-bó͘ gín-ná khah khoài-lo̍k? Bô, i ka-kī chai i bô khoài-lo̍k. I ūi-tio̍h sió-táⁿ ê iân-kò͘ koh khì pài ngó͘-siōng －Chit khoán kèng-pài sī kok-ông, Kek-lâi-hô-su kap i ê peng-teng ēng bú-le̍k teh chi-chhî ê-I án-ni choán-piàn lóng bōe pí-tit hiah ê hoaⁿ-hí hi-seng siⁿ-miā ê bo̍k-su.
|
A-kî-pó 看見in bōe苦勸tit，就離開in 。當伊beh 行出門口ê 時，koh越轉身看in，伊明明看出伊家己kap in 有大無像款。In 是為著良心ê 緣故面向死無，總--是伊家己為著驚死來違背良心。Án-ni，伊kiám 有比這兩個受壓迫 ê 查某囡仔較快樂？無，伊家己 知伊無快樂。伊為著小膽ê 緣故 koh 去拜偶像 －這款敬拜是國王，Kek-lâi-hô-su kap 伊ê 兵丁用武力teh 支持--ê －伊án-ni轉變攏bōe比得hiah-ê 歡喜犧牲生命 ê 牧師。 |
|
A-kî-pó khòaⁿ-kìⁿ chit nn̄g ê cha-bó͘ gín-ná hoat kng ê bīn, sim-lāi chhì-chha̍k, i oàn-hūn ka-kī, i éng bô bōe-kì-tit in nn̄g ê ūi-tio̍h Chú só͘ hián-chhut ê ióng-kám. Āu-lâi i ū hoán-hóe lī-khui Thian-chú-kàu, tì-kàu siū chin tōa ê khún-tio̍k.
|
A-kî-pó 看見這兩個查某囡仔發光ê 面，心內刺chha̍k,伊怨恨家己，伊永無bōe記得in 兩個為著主所顯出ê 勇敢。後來伊有反悔離開天主教，致到受真 大ê 窘逐。 |
|
Tē-jī-ji̍t, Í-sa-pek kap Má-lī-an siū tòa kàu Ài-teng-pó ê hoat-têng siū sím-phòaⁿ. In kū-choa̍t kap A-kî-pó sîn-hū kî-tó ê sū, hoat-īⁿ ê lâng lóng chai-iáⁿ. Ngī-sim ê Pho-tê-seng chú-kàu ki-chhì in kóng: “Má-lī-an, lí phah-sǹg éng-oán m̄ thiaⁿ sîn-hū ê kî-tó mah? Chóng-sī góa chì-chió beh kiông-pek lí thiaⁿchi̍t-pái.” Tùi án-ni, i hoan-hù i ê chō͘-lí sîn-hū kî-tó. Hiah ê chō͘-lí sîn-hū lóng sī tùi pêng-siông lâng sûi-piān kiò lâi, in lóng chin chho͘-ló͘, koh chin gâu hióng-siū in ê koân-lī. Lí thang sióng-siōng chit khoán lâng ê kî-tó tek-khak sī kóng chho͘-ló͘ kà-sī ê ōe, pèng m̄ sī hōng Chú ê miâ ǹg Thiⁿ Pē kî-tó. Má-lī-an chai-iáⁿ chheng-chhó, só͘-í tōa-siaⁿ kiò kóng: “Chhin-ài ê Í-sa-pek, lán lâi gîm Si-phian 23 phiⁿ.” In nn̄g-lâng liam-piⁿ saⁿ-kap gîm:－－
|
第二日，Í-sa-pek kap Má-lī-an 受tòa 到愛丁堡 ê 法庭受審判。In 拒 絕kap A-kî-pó 神父祈禱ê 事，法院 ê 人攏知影。硬心ê Pho-tê-seng 主教譏刺in 講：「Má-lī-an，你扑算永遠m̄ 聽神父ê 祈禱mah？總是我至少beh 強迫你聽這擺。」Tùi án-ni，伊吩咐伊ê 助理神父祈禱。Hiah-ê 助理神父攏是tùi 平常人隨便叫來，in 攏真粗魯，koh真gâu 享受in ê 權利。你thang 想像這款人ê 祈禱 的確是講粗魯教示ê 話，並m̄ 是奉主ê 名向天父祈禱。Má-lī-an 知影清楚，所以大聲叫講： 「親愛ê Í-sa-pek，咱來吟詩篇23 篇。」In 兩人liam-piⁿ 相kap 吟：－－ |
|
Iâ-hô-hoa sī góa ê bo̍k-chiá, Góa bô khiàm-khoeh, I hō͘ góa tó tī chhiⁿ-chhùi ê chháu-po͘, Chhōa góa tī an-chēng ê chúi-piⁿ…In ná gîm ná khoài-lo̍k, tng in gîm kàu “Góa sui-jiân keng-kòe sí-ìm ê soaⁿ-kok” hitchat, siaⁿ-im te̍k-pia̍t chheng-liāng, in-ūi inbô kú beh keng-kòe chit ê soaⁿ-kok, chóng-siĪ ê thûi, I ê koáiⁿ lóng an-ùi in. In iā chai koh bô kú, in beh éng-oán khiā-khí tī Siōng-tè ê ke-lāi. Chō͘-lí sîn-hū ê kî-tó, in lóng bô thiaⁿ-kìⁿ.
|
耶和華是我ê 牧者，我無欠缺，伊hō͘ 我倒tī 青翠ê 草埔，Chhōa 我tī 安靜ê 水邊…In 那吟那快樂，當in 吟到 「我雖然經過死蔭ê 山谷」hit 節，聲音特別清亮，因為in 無久beh 經過這個山谷，總是 伊ê 槌，伊ê 枴攏安慰in。In 也知 koh 無久，in beh 永遠企起tī 上帝ê 家內。助理神父ê 祈禱，in 攏無聽見。 |
|
1681 nî I goe̍h 26 ji̍t, in siū tòa kàu chi̍te chháu-po͘, tī hia siū thâi. Chi̍t tōa kûn ê lâng ûi teh ki-chhiò in, chóng-sī in lóng bô lia̍h chòe iàu-kín. Í-sa-pek kóng: “Góa ǹg-bāng góa ōe thang chòe chi̍t ê sûn-tō-chiá, chóng-sī bô siūⁿ kàu ū kin-á-ji̍t ê sēng-hóng.”Má-lī-an tōa-siaⁿ tùi Chú kóng: “Ò! Góa êng-kng ê Chú ah, góa lâi lah!”
|
1681 年1 月26 日，in 受tòa 到一 個草埔，tī-hia 受thâi。 一大群ê 人圍teh 譏笑in，總是in 攏無掠做要緊。Í-sa-pek 講：「我向望我會thang 做這個殉道者，總是無想到有今仔日ê 盛況。」 Má-lī-an 大聲tùi 主講：「Ò!我榮 光ê 主ah，我來lah！」 |
|
Tng in ê thâu teh beh siū thâi ê sî, in gîm Si-phian tē 84 phiⁿ. Lí nā khì tha̍k, chiū ōe chai in tng-sî sī lōa-*á-n̍i̍h khoài-lo̍k! Chhin-chhiūⁿ khòaⁿ-ōe-kìⁿ in só͘ beh khì ê só͘-chāi!
|
當in ê 頭teh-beh 受thâi ê 時，in 吟 詩篇第84 篇。你若去讀，就會in 當時是偌--仔n̍i̍h 快樂！親像看會見in 所beh 去ê 所在！ |
|
Kok-ūi tho̍k-chiá, lí tha̍k chit phiⁿ ê kiàn-chèng, ū sím-mi̍h kám-sióng? Siat-sú lí tī in chit khoán ê tē-ūi, lí beh cháiⁿ-iūⁿ chòe?
|
各位讀者，你讀這篇ê 見 證，有甚mi̍h感想？設使你tī in 這款ê 地位，你beh 怎樣做？ |
