Sèng-ke̍k tē 4 chi̍p_01
|
聖劇第四集_01 |
| N̂g Hoâi-un |
黃懷恩 |
|
Chok-chiá Ê Ōe
|
作者ê話 |
|
Tī chē-chē khùn-lân ê tiong-kan Sèng-ke̍k tē-sì-chi̍p koh ióng-kám lâi chhut-pán, in-ūi pún-lâng sin-thé khiàm an, só͘-í keng-kòe chi̍t-nî kú ê léng-chông, tī kin-nî chiah koh hù ìn. Taⁿ pún-chi̍p sī Sèng-keng kò͘-sū só͘ kái-phian ê, sui sī thong-sio̍k iáu kú chin sêng-tōng pek-chin, tī ta̍k ê sî chiū hō͘ lâng kám-kak chhù-bī óng-e̍k.
|
Tī濟濟困難ê 中間聖劇第四集koh勇敢來出版，因為本人身體欠安，所以經過一年久ê冷藏，tī今年才koh付印。今本集是聖經故事所改編--ê,雖是通俗猶koh真生動逼真，tī讀ê時就hō͘人感覺趣味óng-e̍k。 |
|
Keng-kòe kúi-nî kú ê tù-chok keng-giām, só͘-í pí-kàu chêng ê chok-pín iā sī khah chhiong-si̍t láu-liān. Chit ê ke̍k-pún m̄-nā kan-ta sek-ha̍p tī lán Tâi-oân kàu-hōe lō͘-ēng, nā chò tho̍k-pún iā-sī chin hó, koh kīn-lâi kóng-pó su-kong ê hoat-tián, nā lī-ēng chò kóng-pò oa̍h-ke̍k ê lō͘-ēng sī chin hó. Tī pún-lâng ê chok-phín tiong lóng sī ū chin bêng-hián ê bo̍k-tek kap tiong-sim, chiū-sī hō͘ lâng bat Iâ-so͘, chí ū bêng-khak ê chú-tê kap tiong-sim, chiah ōe thang hun-bêng chong-kàu bûn-gē ê te̍k-sek, chē-chē chok-phín chhin-chhiūⁿ ū hūn-loān chit ê sū, só͘-í chin sio̍k-khì bô ū giâm-siok ê khì-hun, ǹg-bāng lán tī tâi-téng beh ián ê sî, iā ōe thang tùi-tiōng hit ê goân chok-chiá ê cheng-sîn.
|
經過幾年久ê著作經驗，所以比較前ê作品也是較充實老練。這個劇本 m̄ 若kan-ta適合tī 咱台灣教會路用，若做讀本也是真好，koh近來公報事工ê發展，若利用做公報話劇ê路用是真好。Tī本人ê作品中攏是真明顯ê目的kap中心，就是hō͘人bat耶穌，只有明確ê主題kap中心，才會thang分明宗教文藝ê特色，濟濟作品親像有混亂這個事，所以真俗氣無有嚴肅ê氣氛，向望咱tī台頂beh演ê時，猶會thang tùi重hit-ê原作者ê精神。 |
|
Ēng án-ni lâi chiok tāi-ke ū khoài-lo̍k ê Sèng-tàn.
|
用án-ni來祝大家有快樂ê聖誕。 |
|
1960.10.15 N̂g Hoâi-in tī Chúi-siōng.
|
1960.10.15.黃懷恩tī水上 |
|
好的撒瑪利亞人 二幕
|
好ê撒瑪利亞人 二幕 |
|
人物 : 撒瑪利亞人 希百、猶太人 巴拿、巴拿之父 迦米、巴拿之妻 西西拉、祭司 約西、利末人 謝拉、強盜 a、強盜 b。
|
人物 ：撒瑪利亞人 希百、猶太人 巴拿、巴拿之父 迦米、巴拿之妻 西西拉、祭司 約西、利末人 謝拉、強盜 a、強盜 b。 |
|
第一幕
|
第一幕 |
|
出場人物:迦米 西西拉 巴拿
|
出場人物：迦米 西西拉 巴拿 |
|
場 面:一個猶太的窮家庭裡，奧後有一位患病臥床的老 人,右前面一中年小婦背嬰孩正在織布。
|
場面： 一個猶太ê散hiong家庭，奧後有一位破病在床ê老 人，正爿面一個中年婦女āiⁿ嬰仔當teh織布。 |
|
開 幕:老人臥在床上嗽喘吟呻著，小婦人一面搖背後 的小孩一面織布。
|
開幕：老人倒tī眠床leh嗽、喘，有艱苦ê 聲，中年婦女一面搖背後ê嬰仔，一面織布。 |
|
1. 迦米 : (Ná sàu ná lī-hāi, chiū khí-lâi chē tī chhn̂g-téng)Ai-ah,thiⁿ-khì iū-koh tńg léng lah(嗽且喘),chin thó-iàm, m̄-chai beh koh kôaⁿ kàu tī-sî chiah ōe chún-sǹg(嗽).
|
1.迦米：(那嗽那厲害，就起來坐tī 床頂) Ai-ah，天氣又koh 轉冷lah (嗽且喘)，真討厭，m̄知beh koh 寒到tī 時才準算(嗽) 。 |
|
2. 西西拉: (站起來,走近老人) A-pa, lí án-ni kan-khó͘ hiah kú, bô chhiáⁿ i-seng lâi khòaⁿ pēⁿ sī bōe ēng-tit lah (loa̍h lāu-lâng ê背後). Thiaⁿ kóng Iâ-lō͘-sat-léng ū chi̍t-ūi chin gâu ê i-seng, kiò-chòe Má-kiat, lán lâi khì chhiáⁿ i lâi khòaⁿ pēⁿ m̄-chai hó bô?
|
2.西西拉：(站起來，走近老人) 阿爸，你an-ni艱苦hiah 久，無請醫生來看是bōe用--tit lah(loa̍h老人ê背後)。聽講耶路撒冷有一位醫生，叫做 Má-kiat，咱來去請伊來看病m̄知好--無？ |
|
3. 迦米: Mi̍h-sái tio̍h án-ni lōng-hùi, lán ê ka-têng iā m̄ sī teh hó-kòe, saⁿ-tǹg to teh bōe kò͘-tit, pàng chhut-chāi i khì.(嗽且喘).
|
3.迦米：Mi̍h使著an-ni浪費，咱ê 家庭也m̄是teh好過，三頓就teh bōe 顧--tit，放出在伊去。(嗽且喘)。 |
|
4. 西西拉: A-pa, lí lóng sī án-ni kheh-khì, Chú Iâ-hô-hoa tek-khak ōe thòe lán khui-lō͘, bô-lūn án-chóaⁿ bô chhiáⁿ i-seng lâi khòaⁿ sī bōe ēng-tit.
|
4.西西拉：阿爸，你攏是an-ni客氣，主耶和華的確會替咱開路，無論án-chóaⁿ無請醫生來看是bōe用--tit。 |
|
5. 迦米: Chú Iâ-hô-hoa nā si-lo̍h chû-pi, kín tiàu góa ê lêng-hûn kui tī góa ê chó͘, án-ni chiū m̄-bián ke-thiⁿ lín ê tāng-tàⁿ kap khùn-lân, hō͘ lín ū chiân-tô͘ ê ǹg-bāng(嗽且喘), góa án-ni bô sí sī chin thoa-lūi tio̍h lín.
|
5.迦米：主耶和華若施落慈悲，緊召我ê 靈魂跪tī我ê 祖，an-ni就m̄免加添lín ê 重擔kap困難，hō͘ lín 有前途ê 向望(嗽且喘)，我an-ni無死是真拖累著lín 。 |
|
6. 西西拉: A-pa, chhiáⁿ lí m̄-thang án-ni kóng, Pa-ná kap góa lóng chin su-iàu lí, lí tùi goán ū chin tōa ê pang-chān kap chí-tō, (khòaⁿ eⁿ-á) Iok-hān mā chin ài A-kong, lí ū kap goán tī teh goán chiah ū khoài-lo̍k kap hēng-hok.
|
6.西西拉：阿爸，請你m̄-thang an-ni講，巴拿kap我攏真需要你，你對阮有真大ê 幫贊kap指導，(看嬰仔)約翰mā 真愛阿公，你有kap阮tī--teh阮才有快樂kap幸福。 |
|
7. 迦米: Tō-siā, Se-se-la̍h, góa chai-iáⁿ Pa-ná kap lí ê hàu-sūn, che sī góa tī chit ê khùn-khó͘ ê jîn-seng tiong chòe tōa ê an-ùi. Goān Siōng-tè pò-tap lín, lâi sù-hok lín. Taⁿ hó, taⁿ hó, góa khah khùiⁿ-oa̍h lah, m̄-bián koh lô-hoân lí lah. (西西拉放手,老人行倚台前,西西拉扶之).
|
7.迦米：多謝，西西拉，我知影巴拿kap你ê 孝順，che 是我tī 這個困苦ê 人生中最大ê 安慰。願上帝報答lín,來賜福lín。今好，今好，我較快活lah，m̄ 免koh 勞煩你--lah 。(西西拉放手，老人行倚台前，西西拉扶之)。 |
|
8. 西西拉 : A-pa, lí chhēng án-ni ū kàu sio bô? Lí ài lim tām-po̍h sio-tê bô?
|
8.西西拉：阿爸，你穿an-ni有夠燒--無？你ài lim 淡薄燒茶--無？ |
|
9. 迦米: Se-se-la̍h, lí m̄-bián ūi-tio̍h góa khòa-lū sím-mi̍h, góa í-keng hō͘ lí kàu-gia̍h siū-khó͘ lah. Lí án-ni bô chi̍t-sî-khek ê an-hioh teh chit-pò͘, pang- chān ka-têng, si̍t-chāi hō͘ lí kàu-gia̍h lô-khó͘, góa si̍t-chāi chin bōe kòe-sim.
|
9.迦米：西西拉，你m̄免為著我掛慮甚mi̍h，我已經hō͘ 你夠額受苦--lah。你an-ni無一時刻ê 安歇teh織布，幫贊家庭，實在hō͘ 你夠額勞苦，我實在真bōe 過心。 |
|
10.西西拉: A-pa, lí lóng sī kóng hit-khoán kheh-khì ōe, che lóng bōe thang sǹg chòe sím-mi̍h lô-khó͘. Góa chin hoaⁿ-hí án-ni chò kang, ūi-tio̍h lán chit ke, ūi-tio̍h beh chhēng chit-niá saⁿ ê lâng. (回到原位,再開始織布,老人行倚小婦的機邊)
|
10.西西拉 ：阿爸，你攏是講hit款客氣話，che 攏bōe-thang算做甚mi̍h勞苦。我真歡喜an-ni做工，為著咱這家，為著beh穿這領衫ê人。(回到原位，再開始織布，老人行倚小婦的機邊) |
|
11.迦米: Chin súi, chin bí-biāu ê sek-tī! Ta̍k ê sòaⁿ-kat lóng ū thiàⁿ kap chêng ê kì-hō, chhēng chiah ê saⁿ ê lâng si̍t-chāi ū hok-khì.
|
11.迦米：真súi,真美妙ê 色緻！逐個線結攏有疼kap情ê 記號，穿chia-ê 衫ê 人實在有福氣。 |
|
12.西西拉: Góa chit-niá chit liáu chiū saⁿ-niá lah; chit saⁿ-niá sī beh sàng hō͘ A-pa ê lé-mi̍h.
|
12.西西拉：我這領織了就3領--lah；這3 領是beh送hō͘ 阿爸ê 禮物。 |
|
13.迦米: Lí kóng án-ni sī sím-mi̍h ì-sù?
|
13.迦米：你講an-ni是甚mi̍h意思？ |
|
14.西西拉: Chiong chit saⁿ-niá saⁿ só͘ bē ê chîⁿ khì chhiáⁿ i-seng, the̍h io̍h, ǹg-bāng A-pa kóaⁿ-kín hó khí--lâi.
|
14.西西拉：將這3 領衫所賣ê 錢去請醫生，提藥，向望阿爸趕緊好--起來。 |
|
15.迦米: Bōe ēng-tit, góa bô ún-chún lí án-ni chòe! Ēng lí ê sim-hui̍h lâi chò góa ê io̍h-chîⁿ, oh, góa lēng-khó͘ sí, iā bô ài lín ūi-tio̍h án-ni hi-seng, che kan-ta sī hō͘ góa ê pēⁿ ná tîm-tāng.(嗽且喘)
|
15.迦米：Bōe用--tit，我無允准你an-ni做！用你ê 心血來做我ê 藥錢，oh，我寧可死，也無愛lín 為著 我an-ni犧牲，che kan-ta 是hō͘ 我ê 病愈沈重。(嗽且喘) |
|
16.西西拉 : A-pa, chhiáⁿ lí kín-kín khì tó-leh, án-ni siuⁿ léng lah! (扶助老人到床邊,且撫他背後). A-pa, lí m̄-thang án-ni kheh-khì, goán khòaⁿ lí án-ni kan-khó͘ sī chin siong-sim.
|
16.西西拉：阿爸，請你緊緊去倒--leh，an-ni siuⁿ冷lah！(扶助老人到床邊，且撫他背後)。阿爸，你m̄-thang an-ni客氣，阮看你an-ni艱苦是真傷心。 |
|
17.迦米: Án-ni hó lah, jîn-seng chóng-sī lô-lo̍k khó͘-thàng, án-ni hó lah, bô iàu-kín lah.(西西拉停手). Pa-ná thái iáu bōe tńg-lâi? Chiah n̍i̍h kôaⁿ soaⁿ-iá ê pak-hong sī chin léng.
|
17.迦米：Án-ni好--lah，人生總是勞碌苦痛，an-ni好--lah，無要緊--lah。(西西拉停手)。巴拿thái iáu bōe轉--來？Chiah n̍i̍h寒山野ê 北風是真冷。 |
|
18.西西拉: A-pa, lí kín tó leh, m̄-bián khòa-lū Pa-ná, i phah-sǹg liâm-piⁿ ōe tńg-lâi lah.(老人臥床,小婦給他施棉被,然後回到原位,開始織布. 巴拿出場)
|
18.西西拉：阿爸，你緊倒--leh，m̄免掛慮巴拿，伊扑算liâm-piⁿ會轉--來lah。(老人臥床，小婦給他施棉被，然後回到原位，開始織布。 巴拿出場) |
|
19.巴拿: (解他覆在頭上的布,和背後的羊皮) Chin kôaⁿ, chin kôaⁿ, soaⁿ-iá ê hong ná to ōe koah lâng ê bah, liân iûⁿ-kûn tio̍h siūⁿ beh tńg-lâi tiâu-lāi bi̍h sio.(去探嬰孩) Iok-hān lí ōe kôaⁿ bōe?! Hiah n̍i̍h kó͘-chui teh khùn.(問西西拉) A-pa án-chóaⁿ, ū khah hó sè bô?
|
19.巴拿：(解他覆在頭上的布，和背後的羊皮) 真寒，真寒，山野ê 風若刀會割人ê 肉，連羊群著 想beh轉來tiâu內bi̍h燒。(去探嬰孩) 約翰你會寒--bōe?！Hiah-mi̍h古錐teh睏。(問西西拉) 阿爸án-chóaⁿ，有較好勢--無？ |
|
20.西西拉: Sàu kàu chin lī-hāi koh chin chhoán, góa siūⁿ bô chhiáⁿ i-seng sī bōe ēng-tit, chit pái sī pí í-chêng khah siong-tiōng ê khoán.
|
20.西西拉：嗽到真厲害hoh 真喘，我想無請醫生是bōe用--tit，這擺是比以前較傷重ê 款。 |
|
21.巴拿: Góa siūⁿ iā sī tio̍h chhiáⁿ i-seng (沉默片刻). Chóng-sī beh án-chóaⁿ siat-hoat io̍h-chîⁿ?! Bōe lán só͘ ū ê iûⁿ, che sī choa̍t-lō͘, a-pa it-tēng m̄- khéng, bōe liáu bîn-á-ji̍t khí chiū bô ū iûⁿ-mn̂g thang bē lah.
|
21.巴拿：我想也是著請醫生(沉默片時) 。總是beh án-chóaⁿ設法藥錢？！賣咱所有ê 羊，che是絕路，阿爸一定m̄肯，賣了明仔日起就無有羊毛thang賣--lah。 |
|
22.西西拉: Pa-ná, lí chin sió-sìn, Siōng-tè kiám ōe pàng-sak lán mah! (西西拉拿織布起來)Lí thang chiong chiah ê saⁿ the̍h khì bē lâi ōaⁿ io̍h chîⁿ.
|
22.西西拉：巴拿，你真小信，上帝kiám會放sak 咱--mah！(西西拉拿織布起來) 你thang將chiah-ê 衫提去賣來換藥錢。 |
|
23.巴拿: Chit-pái kiám m̄ sī ūi-tio̍h lán chit ke ê lâng só͘ chit ê saⁿ? Án-ni kiám ōe ēng-tit, lán ê saⁿ lóng chin kū lah?!
|
23.巴拿：這擺kiám m̄是為著咱這家ê 人所織ê 衫？Án-ni kiám會用--tit，咱ê 衫攏真舊--lah？！ |
|
24.西西拉: Ū sím-mi̍h bōe ēng-tit, góa ōe-thang koh khai-sí lâi chit, kin-nî ê kôaⁿ-thiⁿ bô thang chhēng, lán khah jím-siū leh, kàu mê-mî chiū ū thang chhēng lah.
|
24.西西拉：有甚mi̍h bōe用--tit，我會thang koh 開始來織，今年ê 寒天無thang穿，咱較忍受--leh，到明年就有thang穿--lah。 |
|
25.巴拿: (接衣布過來) Chit liáu chin súi, án-ni sī chin hi-seng lí! Se-se-la̍h, góa chin kám-kek lí ê thiàⁿ. (吻衣服)
|
25.巴拿：(接衣布過來) 織了真súi,an-ni是真犧牲你！西西拉，我真感激你ê 疼。(吻衣服) |
|
26.西西拉: (微笑,後來開始整理織機) Thiaⁿ kóng ū chi̍t ūi Sat-má-lī-a ê seng-lí lâng, kiò chòe Hi-pek choan-bûn kiâⁿ-se̍h tī chit ê sì-hng teh bé-chi̍p hū-jîn-lâng só͘ chit ê saⁿ, lán thang chhōe hit ê lâng lâi bē hō͘ i.
|
26.西西拉 ：(微笑，後來開始整理織機)聽講有一位撒瑪利亞ê 生理人，叫做希百專門行se̍h tī 這個四方teh 買集婦人人所織ê 衫，咱thang chhōe hit ê人來賣hō͘伊。 |
|
27.巴拿: Sat-má-lī-a lâng Hi-pek!? Án-ni sī bōe-ēng-tit, lí kiám m̄-chai lán ê chông-cho̍k sī choa̍t-tùi bô kap Sat-má-lī-a lâng lâi-óng, á-sī chòe bé-bē, che sī kiàn-siàu ê sū, bú-jio̍k lán chó͘-sian ê miâ-siaⁿ.
|
27.巴拿：撒瑪利亞人希百！？Án-ni是bōe用--tit，你kiám m̄知咱ê 宗族是絕對無kap撒瑪利亞人來往，抑是做買賣，che 是見笑ê 事，侮辱咱祖先ê 名聲。 |
|
28.西西拉: Pa-ná, chit khoán ê siūⁿ hoat sī chòe khó-lîn ê phian-kiàn, chòe gû-gōng ê koan-liām, Sat-má-lí-a lâng kiám m̄ sī Siōng-tè ê kiáⁿ-lūi? Kiám m̄ sī Iû-thài lâng ê kut-jio̍k?
|
28.西西拉：巴拿，這款ê 想法是最可憐ê 偏見，最愚憨ê 觀念，撒瑪利亞人kiám m̄是上帝ê 子類？Kiám m̄是猶太人ê 骨肉？ |
|
29.巴拿: Sat-má-lī-a lâng sī Siōng-tè só͘ khì-sak ê''', sī pōe-ge̍k ê kiáⁿ. Lán ê chó͘ Tāi-pi̍t ê ông-kok chiū-sī hō͘ in chhiúⁿ-toa̍t khì, lâi tì-kàu hun-lī, Sat-má-lī-a lâng sī lán ê kiu-siû! Sī lán ê tùi-te̍k! Bô-lūn jû-hô lán choa̍t-tùi bô kap in lâi-óng, lán iā iàm-chiān hia ê kap in lâi-óng ê lâng.
|
29.巴拿：撒瑪利亞人是上帝所棄sak--ê …，是背逆ê 子。咱ê 祖大衛ê 王國就是hō͘ in 搶奪去，來致到分離，撒瑪利亞人是咱ê kiu仇！是咱ê 對敵！無論如何咱絕對無kap in來往，咱也厭賤hia-e kap in來往ê 人。 |
|
30.西西拉: Che sī jîn-lūi pi-ke̍k chòe mâu-tún, chòe thang siong-sim ê chhò-gō͘, góa bōe thang lí-kái chit khoán ê kiu-oan sī chèng-tong ê sū. (老人由 床起身)
|
30.西西拉：che 是人類ê 悲劇最矛盾、最thang傷心ê 錯誤，我bōe-thang理解這款ê kiu冤是正當ê 事。(老人由床起身) |
|
31.迦米: Góa ǹg-bāng Chú Iâ-hô-hoa kín hō͘ góa sí, m̄-thang tì-kàu hō͘ góa ê kiáⁿ-sun kiâⁿ tio̍h hoān-hoat ê lō͘, góa choa̍t-tùi bô ún-chún lán khì kau chhap jīm-hô ê Sat-má-lī-a lâng, in-ūi in sī pōe-ge̍k pāi-lō͘ ê kiáⁿ-jî, lán ê chó͘ í-keng siū-chīn liáu in ê khùn-khó͘ lah, lí chai sím-mi̍h lâng phò-hāi lán ê chó͘ tùi chhian-khó͘ bān-khó͘ só͘ kiàn-li̍p nn̄g-chheng gōa nî Hi-pek-lâi ông-kok ê bîn-bāng?! Kiám m̄ sī Sat-má-lī-a lâng ê chó͘-sian. Sím-mi̍h lâng liân-ha̍p put-sìn ê gōa-pang lâi kong-kek, kiáu-jiáu lán ê chó͘ kap sèng-siâⁿ Iâ-lō͘-sat-léng!? Kiám m̄ sī khó͘-o͘N3 ê Sat-má-lī-a lâng!? Ūi sím-mi̍h iân-kò͘ Tāi-pi̍t ê ông-kok kin-á-ji̍t chiâⁿ-chò chit khoán ê pāi-lo̍h, hō͘ gōa-pang lâng chò chia̍h-mi̍h, siū chīn in ê lêng-jio̍k kap khùn-khó͘ ah? Chiū-sī Sat-má-lī-a lâng ê chó͘ ê pōe-poān! Lán ê chó͘ chiù-chōa bô beh koh kap Sat-má-lī-a lâng óng-lâi, chhùi-khí pôe chhùi-khí, ba̍k-chiu pôe ba̍k-chiu! Lán ǹg-bāng ū chi̍t ji̍t, chit ê pōe-poān ê jîn-bîn ōe tú-tio̍h Chú Iâ-hô-hoa ê tōa siū-khì lâi bia̍t-bông!
|
31.迦米：我向望主耶和華緊hō͘ 我死，m̄-thang致到hō͘ 我ê 子孫行著犯法ê 路，我絕對無允准咱去交chhap任何ê 撒瑪利亞人，因為in是背逆敗lō͘ ê 子兒，咱ê 祖已經受盡了in ê 困苦--lah，你知甚mi̍h人破害咱ê 祖tùi千苦萬苦所建立兩千外年希伯來王國ê 眠夢？！Kiám m̄是撒瑪利亞人ê 祖先。甚mi̍h人聯合不信ê 外邦來攻擊，攪擾咱ê 祖kap聖城耶路撒冷！？Kiám m̄是可惡ê 撒瑪利亞人！？為甚mi̍h緣故大衛ê 王國今仔日成做這款ê 敗落，hō͘ 外邦人做食物，受盡in ê 凌辱kap困苦--ah？就是撒瑪利亞人ê 祖ê 背叛！咱ê 祖咒誓無beh koh kap撒瑪利亞人往來，嘴齒賠嘴齒，目珠賠目珠！咱向望有一日，這個背叛ê 人民會tú著主耶和華ê 大受氣來滅亡！ |
|
32.西西拉: A-pa, góa bōe thang lí-kái, sui-jiân sī án-ni, góa bōe thang lí-kái tī lán ê chó͘-sian só͘ chò ê tāi-chì, ū koan-hē tī lán kap Sat-má-lī-a lâng Hi-pek ê sū. Lán sī Siōng-tè ê kiáⁿ, chóng-sī Sat-má-lī-a lâng iā sī Siōng-tè ê soán-bîn, Sat-má-lī-a lâng nā siū khì-sak lâi bia̍t-bông, che kiám m̄ sī lán ê pi-ai kap hoân-ló, lán sī tâng chi̍t ê chó͘-sian ê kut-jio̍k, tâng chi̍t ê Siōng-tè ê soán-bîn, tâng miā-ūn ê tông-pau.
|
32.西西拉：阿爸，我bōe-thang理解，雖然是an-ni，我bōe-thang理解tī 咱ê 祖先所做ê 代誌，有關係tī 咱kap撒瑪利亞人希百ê 事。咱是上帝ê 子，總是撒瑪利亞人也是上帝ê 選民，撒瑪利亞人若受棄sak來滅亡，che kiám m̄是咱ê 悲哀kap煩惱，咱是同一個祖先ê 骨肉，同一個上帝ê 選民，同命運ê 同胞。 |
|
33.迦米: Se-se-lah, góa chóng bô siūⁿ tio̍h lí tī chit chân sū hō͘ góa chiah-n̍i̍h siong-pi koh chò that-gāi, án-ni góa beh án-chóaⁿ tùi-tit-khí góa ê chó͘-sian!! (嗽且喘)
|
33.迦米：西西拉，我總無想著你tī 這chân事hō͘ 我chiah-n̍i̍h傷悲koh 做塞礙，an-ni我beh án-chóaⁿ對得起我祖先！！( 嗽且喘) |
|
34.巴拿: Se-se-lah, lí bô eng-kai koh giâu-gî, in-ūi che sī thoân-thóng, sī ui-bēng, lán chí ū tio̍h kè-sio̍k lán ê chó͘ só͘ hō͘ lán ê cheng-sîn.(向迦米) A-pa lí só͘ kóng ê sī tio̍h, goán tek-khak bô ûi-pōe lí ê ì-sù, chhiáⁿ lí pàng-sim, iā kín-kín tò leh hioh-khùn, m̄-thang koh kôaⁿ tio̍h.
|
34.巴拿：西西拉，你無應該koh giâu疑，因為che 是傳統，是遺命，咱只有著繼續咱ê 祖所hō͘ 咱ê 精神。(向迦米)阿爸你所講--ê 是著，阮的確無違背你ê 意思，請你放心，也緊緊倒leh歇睏，m̄-thang koh 寒著 。 |
|
35.(老人臥床,嗽且喘真利害)
|
35.(老人臥床，嗽且喘真厲害) |
|
36.西西拉: (對巴拿) Nā sī án-ni lán iáu ū sím-mi̍h hoat-tō͘ thang tit-tio̍h chîⁿ?! A-pa hiah-n̍i̍h kan-khó͘ bô kín-kín chhiáⁿ i-seng sī bōe ēng-tit.
|
36.西西拉：(對巴拿) 若是an-ni咱iáu有甚mi̍h法度thang得著 錢？！阿爸hiah-n̍i̍h艱苦無緊緊請醫生是bōe用--tit。 |
|
37.巴拿: (Siūⁿ bô pān-hoat teh沉思) Kiám m̄ sī iáu ū chi̍t ê Iâ-lī-ko lâng kiò chòe Sui-lī iû-goân teh siu bé chi̍t khoán ê pò͘-kiāⁿ mah?! Lán thang chhōe i lâi bē hō͘ i!
|
37.巴拿：(想無辦法teh沉思) Kiám m̄ 是iáu有一個耶利哥人叫做Sui-lī猶原teh收買這款ê 布件--mah?！咱thang chhōe 伊來賣hō͘ 伊！ |
|
38.西西拉: (Chhin-chhiūⁿ chin sit-bāng koh kiâⁿ-óa khì beh siu-si̍p i ê織器) Sui-lī ū teh kā lâng bé, chóng-sī í-keng chiâⁿ-ge̍h-ji̍t bô koh khòaⁿ i tī Iâ-lō͘-sat-léng lah, m̄-chai ū sím-mi̍h piàn-tōng.
|
38.西西拉：(親像真失望koh 行倚去beh收拾伊ê織器)Sui-lī有teh kā人買，總是已經成月日無koh 看伊tī 耶路撒冷--lah，m̄ 知有甚mi̍h變動。 |
|
39.巴拿 : (Kat-ba̍k koh沉想) Án-ni góa tòa chiah ê saⁿ lâi khì Iâ-lī-ko chhōe i, bô án-ni chò sī bōe kái-koat, góa chit-tiap sûi-sî chhut-hoat, án-ni kim- mê góa chiū ōe thang kàu hia, tī bîn-á-ji̍t tiong-tàu góa chiū ōe-thang koh tò-tńg-lâi lah. (khai-sí koh teh chhēng phôe-saⁿ, 西西拉tio̍h-kiaⁿ).
|
39.巴拿：(結目koh沉想)Án-ni我帶chiah ê衫來去耶利哥chhōe 伊，無an-ni做是bōe 解決，我這tiap 隨時出發，an-ni今暝我就會thang到hia，tī 明仔日中晝我就會thang koh 倒轉--來lah。(開始koh teh穿皮衫，西西拉著驚)。 |
|
40.西西拉: Sím-mi̍h! Lí beh khì Iâ-lī-ko!? Pa-ná, lí kiám m̄-chai Iâ-lī-ko ê lō͘-chiūⁿ chin gûi-hiám,siông-siông ū kiông-tō bâi-ho̍k tī soaⁿ-kan teh chhiúⁿ- kiap lâng,sat-hāi lâng! Lí kiám thang án-ni chòe? Hô-hòng chit ê sî-chūn í-keng beh àm lah, Pa-ná lí ūi-tio̍h goán ê iân-kò͘ m̄-thang án-ni chòe!
|
40.西西拉：甚mi̍h！你beh去耶利哥！？巴拿，你kiám m̄ 知耶利哥ê 路上真危險，常常有強盜埋伏tī 山腳teh搶劫人！你kiám thang an-ni做？何況這個時陣已經beh暗--lah，巴拿你為著阮ê 緣故m̄-thang an-ni做！ |
|
41.巴拿: Che sī ūi-tio̍h a-pa chòe-āu ê chi̍t-tiâu lō͘, góa ǹg-bāng Chú Iâ-hô-hoa bô pàng-sak lán, lán ê chó͘ kì-jiân chiù-chōa bô beh kap Sat-má-lī-a lâng óng-lâi, lán tio̍h tām-po̍h chia̍h-khó͘ iā koat-toàn m̄-thang ū só͘ ûi-pōe sian-jîn ê cheng-sîn. (chhēng hó-sè koh phak thâu-kin)
|
41.巴拿：Che 是為著阿爸最後ê 一條路，我向望主耶和華無放sak 咱，咱ê 祖既然咒誓無beh kap撒瑪利亞人往來，咱著淡薄食苦也決斷m̄-thang有所違背先人ê 精神。(穿好勢koh 縛[pa̍k]頭巾) |
|
42.西西拉: Pa-ná, lán kiám bô ū pa̍t ê hoat-tō͘? Lí beh khì Iâ-lī-ko góa ê sim chin bōe thang pàng-sim, koh bô it-tēng lí chhōe ōe tio̍h Sui-lī, kiám- chhái lí chhōe ōe tio̍h i, chóng-sī i í-keng kái-gia̍p ōaⁿ-chit lah, Pa-ná lí koh siūⁿ-khòaⁿ án-ni thài gûi-hiám, lán kiám bô pa̍t ê hoat-tō͘?
|
42.西西拉：巴拿，咱kiám無有別ê 法度？你beh去耶利哥我ê 心真bōe-thang放心，koh無一定你chhōe 會著 Sui-lī,kiám-chhái你chhōe 會著伊，總是伊已經改業換職--lah，巴拿你koh 想看an-ni太危險，咱kiám無別ê 法度？ |
|
43.巴拿: Se-se-la̍h, lí kiám bōe kì-tit Chú Iâ-hô-hoa sī lán tī hoān-lān tiong kip-sî ê pang-chān? Nā ū chhut sū, Siōng-tè tek-khak ōe kiâⁿ kî-sū sîn- jiah lâi chín-kiù, lí tio̍h pàng-sim, góa bîn-á-ji̍t chiū ōe tńg-lâi lah, nā chhōe bô Sui-lī lán chiah koh phah-sǹg pa̍t ê hoat-tō͘.
|
43.巴拿：西西拉，你kiám bōe 記得主耶和華是咱tī 患難中及時ê 幫贊？若有出事，上帝的確會行奇事神蹟來拯救，你著放心，我明仔日就會轉--來lah，若chhōe無Sui-lī咱才koh 扑算別ê 法度？ |
|
44.西西拉: Góa iû-goân chin bōe hiáu lí-kái! Siōng-tè kiám ài I ê kiáⁿ-jî in-ūi hō͘-siong phāu-oàn lâi chia̍h bô eng-kai chia̍h ê khó͘, che sī gû-gōng kàu-ke̍k, chin-lí kiám sī seⁿ chò án-ni?!
|
44.西西拉：我猶原真bōe 曉理解！上帝kiám愛伊ê 子兒因為互相抱怨來食無應該食ê苦，che是愚憨到極，真理kiám是生做an-ni？！ |
|
45.巴拿: Lí iu sī chit ê khoán-sit! Lán iàm-chiān Sat-má-lí-a lâng, che sī kin-pún ê cheng-sîn! Lán iàm-chiān in, m̄-kiaⁿ sím-mi̍h sún-sit kap hi-seng! Góa tek-khak tio̍h khì Iâ-lī-ko, che bô thang koh khó-lū, Se-se-la̍h, lí tùi goán thài hó chhiáⁿ lí m̄ thang koh ū sím-mi̍h giâu-gî, chhiáⁿ lí an-sim lâi tán-hāu góa, hó-hó chiàu-kò͘ a-pa, góa beh lâi--khì lah!
|
45.巴拿：你又是這個款式！咱厭賤撒瑪利亞人，che 是根本ê 精神！咱厭賤in，m̄驚甚mi̍h損失kap犧牲！我的確著去耶利哥，che 無thang koh考慮，西西拉，你對阮太好請你m̄-thang koh 有甚mi̍h giâu 疑，請你安心來等候我，好好照顧阿爸，我beh來去--lah！ |
|
46.西西拉: Góa í-keng chai-iáⁿ góa bô hoat-tō͘ thang chó͘-tòng lí, góa chí ū chiong lí kau-thok tī Siōng-tè ê chhiú, góa tek-khak thong-mê ūi lí kî-tó ti̍t-kàu koh khòaⁿ lí ê bīn, ǹg-bāng Siōng-tè tòa-niá lí, pó-siú lí chi̍t-lō͘ péng-an. Pa-ná chhiáⁿ lí tio̍h khah sió-sim leh! (Pa-ná chim eⁿ-á, khòaⁿ 西西拉chiū退場,西西拉心情恐懼不安sàng i tī 門口, āu-lâi kūi teh kî-tó).
|
46.西西拉： 我已經知影我無法度thang阻擋你，我只有將你交託tī 上帝ê 手，我的確通暝為你祈禱直到koh 看你ê 面，向望上帝帶領你，保守你一路平安。巴拿請你著較小心leh ！( 巴拿chim 嬰仔，看西西拉就退場，西西拉心情恐懼不安送伊tī 門口，後來跪teh祈禱)。 |
|
-幕-
|
-幕- |
|
第二幕
|
第二幕 |
|
出場人物: 巴拿 強盜a 強盜b 祭司約西 利未人謝拉 撒瑪利亞人希百
|
出場人物：巴拿 強盜a 強盜b 祭司約西 利未人謝拉 撒瑪利亞人希百 |
|
場 面 : 耶利哥的山路
|
場 面：耶利哥ê 山路 |
|
開 幕 : 黑夜淒然的山林中, (用佈景,電光,音樂表示)
|
開 幕：黑夜淒然ê 山林中，( 用佈景，電光，音樂表示) |
|
1.巴拿: Ji̍t-thâu í-keng lo̍h-soaⁿ lah, o͘-àm pau-ûi sí-kéng, chheⁿ-chhìn ê soaⁿ-iá, sì-bīn lóng sī chhiū-nâ, cha̍p-chháu, hân-léng ê pak-hong siū-siū háu, thâu-chêng it-bōng bu-chè ê o͘-àm, soaⁿ-lō͘ hiám-iàu, che chiū-sī chhut-miâ Sin-but kúi chhut ê Iâ-lī-ko soaⁿ-téng, lō͘ iáu chin hn̄g, í-keng cháu kàu chin ià-siān lah, chóng-sī m̄-káⁿ thêng kha, ná kiâⁿ sim-lāi ná tio̍h-kip kiaⁿ-hiâⁿ, goān Chú Iâ-hô-hoa ê lîn-bín chhōa góa pêng-an thoat-lī chit ê gûi-hiám ê só͘-chāi, hō͘ góa ê lāu-pē góa ê bó͘-kiáⁿ m̄-bián tú-tio̍h pi-chhám ê kéng-gū.(強盜二人出現在前面)
|
1.巴拿：日頭已經落山--lah，烏暗包圍四境，chheⁿ-chhìn ê 山野，四面攏是樹林，雜草，寒冷ê 北風siū-siū哮，頭前一望無際ê 烏暗，山路險要，che 就是出名神沒鬼出ê 耶利哥山頂，路iáu 真遠，已經走到真厭siān lah，總是m̄ 敢停腳，那行心內那著急驚惶，願主耶和華ê 憐憫chhōa我平安脫離這個危險ê 所在，hō͘ 我ê 老父我ê 某子m̄ 免tú著悲慘ê 境遇。(強盜二人出現在前面) |
|
2.強盜: Hiaⁿ-tī ah, beh khì tó-ūi? Ū sím-mi̍h tōa-sū, hiah-n̍i̍h thang kín-kip.
|
2.強盜：兄弟ah，beh 去tó位？有甚mi̍h大事，hiah-n̍i̍h thang 緊急。 |
|
3.巴拿: He! Lín, lín sī sím-mi̍h lâng? ū sím-mi̍h tāi-chì?
|
3.巴拿：He！Lín…，lín 是甚mi̍h人？有甚mi̍h代誌？ |
|
4.強盜b : Lí kiám m̄-chai goán sī sím-mi̍h lâng! Goán sī chit ê soaⁿ ê chú-lâng, kìⁿ-nā keng-kòe chit ê soaⁿ ê lâng eng-kai tio̍h ài bat goán.
|
4.強盜b：你kiám m̄ 知阮是甚mi̍h人！阮是這個山ê 主人，見若經過這個山ê 人應該著ài bat 阮。 |
|
5.巴拿: Khó-o͘N3 ê kiông-tō!!
|
5.巴拿：可惡ê 強盜！！ |
|
6.強盜a : Lí ê chhiú só͘ the̍h ê mi̍h-kiāⁿ kap lí ê sin-khu só͘ ū ê chîⁿ lóng kau chhut--lâi hō͘ goán!
|
6.強盜a：你ê 手所提 ê 物件kap你ê 身軀所有ê 錢攏交出來hō͘ 阮！ |
|
7.巴拿: Góa lóng bô tòa chîⁿ tī sin-khu, lín khòaⁿ chhò lah! Góa ūi-tio̍h iàu-kín ê sū-chêng tek-khak tio̍h ài kàu Iâ-lī-ko, chhiáⁿ lín bo̍h-tit kiáu-jiáu góa.
|
7.巴拿：我攏無帶錢tī 身軀，lín 看錯--lah！我為著要緊ê 事情的確著ài 到耶利哥，請lín莫得攪擾我。 |
|
8.強盜b: Goán tek-khak bōe kiáu-jiáu lí, siat-sú lí nā hoaⁿ-hí ho̍k-chiông, chiong só͘ ū ê pàng tī goán ê kha-ē.
|
8.強盜b：阮的確bōe 攪擾你，設使你若歡喜服從，將所有--ê 放tī 阮ê 腳下。 |
|
9.巴拿: Góa kí Iâ-hô-hoa chiù-chōa, góa choa̍t-tùi bōe thang án-ni chò!
|
9.巴拿：我指耶和華咒誓，我絕對bōe-thang án-ni做！ |
|
10.強盜a : Gōng-lâng ah, lí chai-iáⁿ Iâ-hô-hoa chá chiū tiāⁿ tio̍h lí tio̍h ji̍p tī goán ê chhiú-lāi, lí lóng m̄-chai! Lí nā bô ài miā chiah lâi chhì khòaⁿ lí ê tám-liōng!
|
10.強盜a：憨人--ah 你知影耶和華早就定著你著入tī 阮ê 手內，你攏m̄ 知！你若無ài命才來試看你ê 膽量！ |
|
11.巴拿: Hiaⁿ-tī ah, lín tio̍h siūⁿ khòaⁿ māi leh, Siōng-tè ê lô͘-po̍k Tāi-pi̍t ê ke án-chóaⁿ lûn-bông kàu chit khoán ê tē-pō͘, kok-pāi bîn-bông, chhù- chhù sī kiông-pō kap siong-sat ê kong-kéng, sìn-sim pāi lo̍h, liông-sim bâ-pì, thiàⁿ-sim léng-tām, chiâⁿ-chò ke̍k-toan ê lí-kí chú-gī! Chhiáⁿ siūⁿ khòaⁿ che kiám m̄ sī Í-sek-lia̍t ê boa̍t-bóe mah!!
|
11.巴拿：兄弟--ah，lín著想看māi leh ，上帝ê 奴僕大衛ê 家án-chóaⁿ淪亡到這款ê 地步，國敗民亡，處處是強暴kap相殺ê 光景，信心敗落，良心麻痺，疼心冷淡，成做極端ê 利己主義！請想看che kiám m̄ 是以色列ê 末尾mah！！ |
|
12.強盜b : Sím-mi̍h, hó tōa-táⁿ ê sió-khoe! Káⁿ piān-po̍k, thâi lí!! (開始角鬥,巴拿被打倒在地上,東西被奪掠去)
|
12.強盜b：甚mi̍h，好大膽ê 小khoe！敢辯駁，你！！（開始角鬥，巴拿被打倒在地上，東西被奪掠去） |
|
13.巴拿: (Haiⁿ-chhan, móa sin tāng-siong, kiông pê khí-lâi khiā teh) Sím-mi̍h lâng siūⁿ ōe kàu A-pek- la̍h-hán ê kiáⁿ-sun, Tāi-pi̍t ê hō͘-è kin-á-ji̍t chiâⁿ-chò saⁿ siong-sat ê tùi-te̍k. Ah, ah, Chú Iâ-hô-hoa, Lí tio̍h khó-lîn góa, tio̍h chín-kiù góa. Oh, móa-sin lóng sī to-siong, góa káⁿ ōe sī tī chit ê soaⁿ-téng. (koh tó lo̍h khì. 祭司約西出場).
|
13.巴拿 ：（Haiⁿ-chhan，滿身重傷，強爬--起來企--teh）甚mi̍h人想會到亞伯拉罕ê 子孫，大衛ê 後裔今仔日成做相殺ê 對敵。Ah，ah，主耶和華，你著可憐我，著拯救我。Oh，滿身攏是刀傷，我káⁿ會死tī 這個山頂。（Koh倒--落去。祭司約西出場）。 |
|
14.約西: Chú Iâ-hô-hoa sī hoān-lān ê sî ê pī-lān-só͘, sī kiaⁿ-hiâⁿ ê sî ê koân-tâi, sī gûi-kip ê sî ê kian-kò͘ chio̍h-pôaⁿ! Iâ-hô-hoa nā kap góa tī teh sím- mi̍h lâng káⁿ tùi-te̍k góa! A-men, A-men! Chit ê soaⁿ-téng sī chhut-miâ ê chha̍t-siū, sì-bīn bô-lâng, o͘-thiⁿ tē-àm, kiaⁿ-hiâⁿ lia̍h-tiâu tī góa ê sìn. Siōng-tè ah, lí tio̍h khó-lîn góa, in-ūi góa sī Lí só͘ chhe-ēng ê lô͘-po̍k, Lí só͘ li̍p ê chè-si, kiû Lí hō͘ góa bô hām-lo̍h tī pháiⁿ lâng ê chhiú-tiong!
|
14.約西：主耶和華是患難ê 時ê 避難所，是驚惶ê 時ê 高台，是危急ê 時ê堅固石盤！耶和華若kap我tī-- teh甚mi̍h人敢對敵我！阿們，阿們！這個山頂是出名ê 賊siū,四面無人，烏天地暗，驚惶掠tiâu tī 我ê 信。上帝--ah，你著可憐我，因為我是你所差用ê 奴僕，你所立ê 祭司，求你hō͘ 我無陷落tī 歹人ê 手中！ |
|
15.巴拿: Oh, oh, lîn-bín góa, kiù góa!
|
15.巴拿：Oh，oh，憐憫我，救我！ |
|
16.約西: He! He sī sím-mi̍h? Lâng ê siaⁿ, á-sī kúi ê siaⁿ!? (發見 tio̍h 巴拿). Oh, lí sī sím-mi̍h, góa kap lí ū sím-mi̍h koan-hē!? Chhiáⁿ lí m̄-thang lâi hāi góa!
|
16.約西：He！He 是甚mi̍h？人ê 聲，抑是鬼ê聲？（發見著巴拿）。Oh，你是甚mi̍h，我kap你有甚mi̍h關係！？請你m̄-thang 來害我！ |
|
17.巴拿: Siōng-tè ê chè-si Iok-se ah, Iok-se ah, góa lah! Khó-lîn siū-siong ê kiáⁿ Pa-ná lah! Chhiáⁿ lí khó-lîn góa tú-tio̍h chit ê chai-hāi, lâi tòa góa tńg-khì Iâ-lō͘-sat-léng, góa ê pē ê ke.
|
17.巴拿：上帝ê 祭司約西--ah，約西--ah，我--lah！可憐受傷ê 子巴拿lah！請你可憐我tú著這個災害，來帶我轉去耶路撒冷，我ê父ê家。 |
|
18.約西 : Lí sī Ka-bí ê kiáⁿ Pa-ná tio̍h bô?! Lí án-chóaⁿ tú-tio̍h chit-khoán thang kiaⁿ ê sū!(Óa-khì) Oh, móa-sin lóng sī hui̍h! A-men, A-men!!
|
18.約西：你是迦米ê 子巴拿著--無？！你án-chóaⁿ tú著這款thang 驚ê 事！（倚--去）Oh，滿身攏是血！阿們，阿們！！ |
|
19.巴拿: Khó͘-o͘N3 ê kiông-tō chiong góa siong-hāi, sòa chhiúⁿ-toa̍t góa só͘ ū ê mi̍h. Kám-siā Chú, ka-chài lí ū tùi chia keng-kòe, nā bô góa chiū ōe sí tī chit ê chhiⁿ-chhìn ê só͘-chāi.
|
19.巴拿：可惡ê 強盜將我傷害，續搶奪我所有ê 物。感謝主，佳哉你有tùi chia 經過，若無我就會死tī 這個chhiⁿ-chhìn ê 所在。 |
|
20.約西:Oh, kiông-tō! O͘-àm thang kiaⁿ ê sè-kài! Goān Siōng-tè lîn-bín Í-sek-lia̍t. A-men, A-men!! Góa, góa beh kín lâi khì, góa bô hoat-tō͘ thang ūi lí chò sím-mi̍h, góa kiaⁿ-kàu sin-hûn lóng beh sòaⁿ khì lah, góa tio̍h kín lâi khì, nā bô liân góa iā cháu bōe chhut kiông-tō ê chhiú.
|
20.約西：Oh，強盜！烏暗thang 驚ê 世界！願上帝憐憫以色列。阿們，阿們！！我，我beh緊來去，我無法度thang 為你做甚mi̍h，我驚到神魂攏beh 散--去lah，我著緊來去，若無連我也走bōe 出強盜ê 手。 |
|
21.巴拿: (Pê 起身 khí--lâi)Siōng-tè ê chè-si Iok-se! Chhiáⁿ lí lîn-bín góa, m̄-thang kóng hit khoán choa̍t-chêng ê ōe. Chhiáⁿ lí tòa góa tńg-khì kìⁿ góa lāu-pē ê bīn.
|
21.巴拿：(爬起身起--來)上帝ê 祭司約西！請你憐憫我，m̄-thang 講hit款絕情ê 話。請你帶我轉去見我老父ê 面。 |
|
22.約西: Ná ōe ēng-tit án-ni chòe? Góa ū sím-mi̍h khùi-la̍t thang tòa lí tńg--khì! che sī gû-gōng ê só͘ chòe, kiaⁿ liáu góa iā tô bōe chhut pháiⁿ lâng ê to̍k-hāi. Goān Siōng-tè kap lí tī teh! Góa bōe ēng-tit koh iân-chhiân, góa ōe thong-ti hō͘ lí ê lāu-pē chai, in ōe kiò lâng lâi kng lí tńg-khì, pêng-an! A-men,a-men!!(退場)
|
22.約西：哪會用得án-ni做？我有甚mi̍h氣力thang帶你轉--去！che 是愚憨ê 所做，驚了我也逃bōe 出歹人ê 毒害。願上帝kap你tī--teh！我bōe 用得 koh 延chhiân,我會通知hō͘ 你ê老父知，in會叫人來扛你轉--去，平安！阿們，阿們！！(退場) |
|
23.巴拿: (Pê khí-lâi, khiā teh) Siōng-tè ê chè-si Iok-se ah, sîn-jîn Iok-se ah, ūi-tio̍h Iâ-hô-hoa ê miâ, chhiáⁿ lí''', chhiáⁿ lí lâi khó-lîn góa..., chhiáⁿ lí.... Ah, cháu kàu bô khòaⁿ-kìⁿ lah, choa̍t-chêng o͘-àm ê sè-tāi, góa ê chín-kiù beh tùi tó-ūi lâi, liân Siōng-tè ê lô͘-po̍k iā tô-pī góa, taⁿ ū sím-mi̍h lâng thang koh kiù góa. Oh, móa-sin thàng thiàⁿ, góa ê thâu-khak chhin-chhiūⁿ hóe teh sio! ( tó lo̍h-khì, 利未人謝拉出場).
|
23.巴拿：(爬--起來，企--teh)上帝ê 祭司約西--ah，神人約西--ah，為著耶和華ê 名，請你…，請你來可憐我…，請你…。Ah，走到無看--見lah，絕情烏暗ê 世代，我ê 拯救beh 對tó位來，連上帝ê 奴僕也逃避我，今有甚mi̍h人thang koh 救我。Oh，滿身痛疼，我ê 頭殼親像火teh燒！(倒--落去，利未人謝拉出場)。 |
|
24.謝拉: Ná kiâⁿ sòa ná àm, an-chēng, kàu ōe chhiⁿ-chhìn, ǹg-bāng tī iáu bōe ji̍p kiⁿ ê sî ōe thang kín-kín kiâⁿ chhut chit ê hiám-iàu ê soaⁿ-téng. Siōng-tè ah, chì tōa ê Iâ-hô-hoa, góa sī Lí sèng ê peh-sìⁿ, sī Lí ēng thiàⁿ te̍k-piat tùi Í-sek-lia̍t ke só͘ hun-piat chhut--lâi, beh chò Lí ê sèng-kang ê kiáⁿ-lūi, kiû Lí chiàu-kò͘ góa, hō͘ góa bô tú-tio̍h gûi-hiám chai-hō, kiû Lí poah-khui it-chhè pháiⁿ lâng ê kè-bô͘.
|
24.謝拉：那行續那暗，安靜，到會chhiⁿ-chhìn,向望tī iáu bōe 入更ê 時會thang 緊緊行出這個險要ê 山頂。上帝--ah，至大ê 耶和華，我是你聖ê 百姓，是你用疼特別tùi以色列家所分別出--來，beh 做你ê聖工ê 子類，求你照顧我，hō͘ 我無tú著危險災禍，求你撥開一切歹人ê 計謀。 |
|
25.巴拿: Hiaⁿ-tī ah, kiù-miā leh, kiù-miā leh!
|
25.巴拿：兄弟--ah，救命--leh，救命--leh ！ |
|
26.謝拉: Oh, he sī sím-mi̍h!? Sím-mi̍h lâng teh kiò?
|
26.謝拉：Oh，he 是甚mi̍h！？甚mi̍h人teh叫？ |
|
27.巴拿: Góa lah, góa sī siū tāng siong teh beh sí ê Iâ-lō͘-sat-léng lâng, In-ūi tú-tio̍h kiông-tō siū chhiúⁿ-kiap, sòa móa-sin ê tāng-siong.
|
27.巴拿：我--lah，我是受重傷teh beh 死ê 耶路撒冷人，因為tú著強盜受搶劫，續滿身ê 重傷。 |
|
28.謝拉: He!! Lí sī siū chai-lān ê Iâ-lō͘-sat-léng lâng?! (kiâⁿ óa khì) Lí kiám m̄ sī Ka-bí ê kiáⁿ Pa-ná?!
|
28.謝拉：He！！你是受災難ê 耶路撒冷人？！(行倚--去)你kiám m̄ 是迦米ê 子巴拿？！ |
|
29.巴拿: Oh, Lī-bī lâng Siā-la̍h! Án-ni chin tú hó, kám-siā Siōng-tè! Siā-lah a-peh, chhiáⁿ lí pang-chān góa tńg-khì Iâ-lō͘-sat-léng, góa ōe chin kám-kek lí.
|
29.巴拿：Oh，利未人謝拉！Án-ni真tú 好，感謝上帝！謝拉阿伯，請你幫贊我轉去耶路撒冷，我會真感激你。 |
|
30.謝拉: Góa ū tāi-chì beh khì Iâ-lī-ko chhōe lâng, chin sit-lé, góa bô hoat-tō͘ thang koh tòa lí tò-tńg khì Iâ-lō͘-sat-léng, góa tio̍h kóaⁿ-kín góa ê lō͘, góa ū chin iàu-kín ê tāi-chì.
|
30.謝拉：我有代誌beh 去耶利哥chhōe 人，真失禮，我無法度thang koh 帶你倒轉去耶路撒冷，我著趕緊我ê 路，我有真要緊ê 代誌。 |
|
31.巴拿: Siā-la̍h a-peh, lí kiám jím-sim khòaⁿ góa bô pang-chān lâi sí tī chit ê choa̍t-kéng ê soaⁿ-téng? Góa ai-kiû lí, chhiáⁿ in-ūi Siōng-tè ê miâ, lí m̄- thang pàng-sak góa, góa nā sí tī chia góa ê lāu-pē kap bó͘-kiáⁿ chiū hām-lo̍h choa̍t-kéng, in ê pi-chhám ōe chin tōa.
|
31.巴拿：謝拉阿伯，你kiám忍心看我無幫贊來死tī 這個絕境ê 山頂？我哀求你，請因為上帝ê 名，你m̄-thang 放sak 我，我若是tī chia 我ê老父kap某子就陷落絕境，in ê悲慘會真大。 |
|
32.謝拉 : (Kiâⁿ lī-khui, hut-jiân koh khiā tiām, bīn ǹg i ê lō͘) Góa chin ài pang-chān lí, chóng-sī che sī góa chòe bōe tit kàu ê sū, hoán-tńg góa nā án- ni tī chia iân-chhiân, kiaⁿ liáu góa iā ōe siū liân-lūi lâi tú-tio̍h chhám-hāi. Lí chhiáⁿ, góa ōe kî-tó Siōng-tè pó-siú lí pêng-an.(退場).
|
32.謝拉：( 行離開，忽然koh 企恬，面向伊ê 路) 我真愛幫贊你，總是che 是我做bōe得到ê 事，反轉我若án-ni tī chia 延chhiân,驚了我也會受連累來tú著慘害。你請，我會祈禱上帝保守你平安。(退場) 。 |
|
33.巴拿: (起身) Siā-la̍h a-peh ah, góa ê hiaⁿ-tī, góa ê kut-jio̍k; Siōng-tè sèng ê peh-sìⁿ ah! Chhiáⁿ lí khui lí ê chû-sim....., chhiáⁿ lí lîn-bín góa,.....ah, khì lah, bô ǹg-bāng lah, góa káⁿ tio̍h sí tī chia. Ah, chin chhùi-ta, ài lim-chúi! sim-chong pho̍k-pho̍k-chhéng, kui sin-khu lóng bô la̍t lah. Ah,ah!(gia̍h chhiú ǹg thiⁿ). Siōng-tè ah, kiû Lí chiàu-kò͘ góa khó-lîn ê lāu-pē, kap Lí só͘ siúⁿ-sù hō͘ góa ê hō͘ góa ê hū-jīn-lâng siū-khó͘ ê Se-se-la̍h,(háu) Se-se-la̍h chhiáⁿ lí sià-bián góa! góa hō͘ lí ê sim phòa-chhùi! Góa chhin-chhiūⁿ ū khòaⁿ-kìⁿ lí lâu ba̍k-sái ê bīn, ū thiaⁿ-kìⁿ lí kî-tó ê siaⁿ, Se-se-la̍h, lī ūi-tio̍h Í-sek-lia̍t put-hēng ê cho-gū, ūi-tio̍h peh-sìⁿ ê pōe-ge̍k lâu lōa chē ba̍k-sái, chóng-sī tī lí chhám-kiò ê bīn-chêng Í-sek-lia̍t ke í-keng chiām-chiām tîm lo̍h-khì. Góa ê sìⁿ-miā iā kap chit ê Í-sek-lia̍t tâng chi̍t-iūⁿ ê miā-ūn, beh siau-bia̍t khì lah. (tó-lo̍h khì, 撒瑪利亞人希百出場).
|
33.巴拿：(起身)謝拉阿伯--ah ，我ê 兄弟，我ê 骨肉；上帝聖ê 百姓ah！請你開你ê 慈心……，請你憐憫我，……ah，去lah ，無向望lah，我káⁿ 著死tī chia。Ah，真嘴礁，ài lim水！心臟pho̍k-pho̍k-chhéng,歸身軀攏無力--lah。Ah，ah！(gia̍h手向天)。上帝--ah，求你照顧我可憐ê 老父，kap你所賞hō͘ 我ê 婦人人受苦ê 西西拉，(哮) 西西拉請你赦免我！我hō͘ 你ê 心破碎！我親像有看見你流目屎ê 面，有聽見你祈禱ê 聲，西西拉，你為著以色列不幸ê 遭遇，為著百姓ê 背逆流偌濟目屎，總是tī 你慘叫ê 面前以色列家已經漸漸沈落去。我ê 生命也kap這個以色列同一樣ê 命運，beh 消滅去lah 。(倒--落去，撒瑪利亞人希百出場)。 |
|
34.希百: (Ná kiâⁿ ná kóng)Siōng-tè kiám chin-chiàⁿ ōe pàng-sak I ê peh-sìⁿ, tùi Ai-ki̍p chhōa chhut-lâi, tī khòng-iá hùn-liān sì-cha̍p nî, āu-lâi chhōa-ji̍p Ka-lâm, kiàn-chō êng-kng chhàn-lān ê Hi-pek-lâi ông-kok, chiong chit ê sì-chheng nî ê le̍k-sú ê Í-sek-lia̍t bîn-cho̍k lâi pàng-sak tī gōa-pang hiông-ok, khó͘-o͘N3 ê chhiú-tiong!? Siōng-tè kiám kam-sim khòaⁿ I ê peh-sìⁿ ê tîm-lûn kap bia̍t-bông?! Tek-khak bô chit ê sū, Siōng-tè kì-jiân tùi Pa-pí-lûn ê chhiú koh hôe-ho̍k lû-thài ke, kiám ōe tī Lô-má lâng ê chhiú lâi bia̍t-bông i mah?! Siōng-tè tek-khak ōe chín-kiù, ōe kiâⁿ sîn-jiah, chòe-kīn tī Iu-thài kap Sat-má-lī-a tōe-hng só͘ teh hong-siaⁿ ê kî-iⁿ ê jîn-bu̍t Iâ-so͘ kiám m̄ sī hián-jiân ê tiāu-thâu?! Bô ū sian-ti chhin-chhiūⁿ I ê koân-pèng, I bat chek-pī hong kap hái, kiò sí-lâng koh-oa̍h, hō͘ pái-kha, piàn-sūi ê khí-lâi kiâⁿ, chheⁿ-mê ê tit khòaⁿ-kìⁿ, ta̍k só͘-chāi thoân kóng thian-kok kūn-lah, tio̍h hóe-kái, che si̍t-chāi sī Bí-sài-a ê chhut-hiān, sī Í-sek-lia̍t ê ǹg-bāng!
|
34.希百：(那行那講)上帝kiám 真正會放sak 伊ê百姓，tùi埃及chhōa--出來，tī 曠野訓練40年，後--來chhōa 入迦南，建造榮光燦爛ê 希伯來王國，將這個四千年ê 歷史ê 以色列民族來放sak tī 外邦凶惡，可惡ê 手中！？上帝kiám甘心看伊ê 百姓ê 沈淪kap滅亡？！的確無這個事，上帝既然tùi巴比倫ê 手koh 回復猶太家，kiám 會tī 羅馬人ê 手來滅亡伊mah？！上帝的確會拯救，會行神蹟，最近tī 猶太kap撒瑪利亞地方所teh風聲ê 奇異ê 人物耶穌kiám m̄ 是顯然ê 兆頭？！無有先知親像伊ê 權柄，伊bat 責備風kap海，叫死人復活，hō͘ 跛腳、piàn-sūi--ê起來行。青瞑--ê 得看--見，逐所在傳講天國近--lah，著悔改，che 實在是彌賽亞ê 出現，是以色列ê 向望！ |
|
35.巴拿: (Haiⁿ-chhan) O! o! o!
|
35.巴拿：( Haiⁿ-chhan) O！o！o！ |
|
36.希百: Oh! Sī sím-mi̍h??? (hoat-kiàn tio̍h, kín cháu óa-khì) Ū lâng tio̍h-siong tó tī chia!? (khu lo̍h-khì beh kā i hû) Oh, móa-sin sī hui̍h! Iáu-kú ū oa̍h ê ǹg-bāng ê khoán, góa tio̍h kín-kín lâi kiù i. (tùi i ê sin-khu tò chúi lâi chhit i ê siong, thiah phòa i ê gōa-saⁿ lâi pau i ê sin-khu).
|
36.希百：Oh！是甚mi̍h？？？( 發見--著 ，緊走倚--去)有人著傷倒tī chia！？( Khû--落去beh kā 伊扶) Oh，滿身是血！iáu-kú 有活ê 向望ê 款，我著緊緊來救伊。(tùi伊ê 身軀倒水來chhit 伊ê 傷，thiah 破伊ê 外衫來包伊ê 身軀)。 |
|
37.巴拿: (Koh haiⁿ-chhan) Oh! o! o!
|
37.巴拿：(Koh haiⁿ-chhan)Oh！o！o！ |
|
38.希百: Hiaⁿ-tī ah, lí cheng-sîn khí-lâi lah tio̍h bô?
|
38.希百：兄弟--ah，你精神起--來lah 著--無？ |
|
39.巴拿: Lí sī sím-mi̍h lâng? Lí sī Iok-se? Á-sī Siā-la̍h?
|
39.巴拿：你是甚mi̍h人？你是約西？抑是謝拉？ |
|
40.希百: (Kè-sio̍k teh ka pau-siong) Hiaⁿ- tī ah, góa lóng m̄ sī lí só͘ kóng ê lâng.
|
40.希百：(繼續teh ka 包傷)兄弟--ah，我攏m̄ 是你所講ê 人。 |
|
41.巴拿: Lí sī Iâ-lō͘-sat-léng lâng tio̍h bô? Lí sī Iû-thài lâng ê cho̍k-chhin tio̍h bô?
|
41.巴拿：你是耶路撒冷人著--無？你是猶太人ê 族親著--無？ |
|
42.希百: Khó-lîn ê hiaⁿ-tī ah, góa lóng bô sio̍k lí só͘ kóng ê.
|
42.希百：可憐ê 兄弟ah，我攏無屬你所講--ê 。 |
|
43.巴拿: Góa lóng m̄-bat lí, lí sī sím-mi̍h lâng?
|
43.巴拿：我攏m̄-bat--你，你是甚mi̍h人？ |
|
44.希百: Góa sī Sat-má-lī-a ê seng-lí lâng kiò chòe Hi-pek, beh khì Iâ-lī-ko chòe seng-lí, chhàu-khám tùi chia keng-kòe.
|
44.希百：我是撒瑪利亞ê 生理人叫做希百，beh 去耶利哥做生理，chhàu-khám tùi chia 經過。 |
|
45.巴拿: Hâⁿ, Sat-má-lī-a lâng Hi-pek!?
|
45.巴拿：Hâⁿ，撒瑪利亞人希百！？ |
|
46.希百: Hiaⁿ-tī ah, lí án-chóaⁿ tio̍h-kiaⁿ? (沉默) Taⁿ phah-sǹg bô iàu-kín lah, nā ū kóaⁿ-kín tī-liâu liâm-piⁿ ōe hôe-ho̍k chiah tio̍h.
|
46.希百：兄弟ah，你án-chóaⁿ著驚？(沉默) 今扑算無要緊lah，若有趕緊治療liâm-piⁿ會回復才著。 |
|
47.巴拿: (起身) Lí....,lí chai góa sī sím-mi̍h lâng bô? Góa sī Iû-thài lâng! sī Bí-ka ê kiáⁿ Pa-ná!
|
47.巴拿：(起身)你…，你知我是甚mi̍h人--無？我是猶太人！是米迦ê 子巴拿！ |
|
48.希百: (Chhiò-chhiò) Góa bô koán lí sī sím-mi̍h lâng, góa chí-ū chai-iáⁿ lí su-iàu góa ê pang-chān, só͘-í góa ū gī-bū ài pang-chān lí, bô-lūn lí sī Iû-thài lâng á-sī Sat-má-lī-a lâng lóng sī sio-siâng.
|
48.希百：(笑笑)我無管你是甚mi̍h人，我只有知影你需要我ê 幫贊，所以我有義務ài 幫贊你，無論你是猶太人抑是撒瑪利亞人攏是相像。 |
|
49.巴拿: Lí kiám m̄-chai Iû-thài lâng kap Sat-má-lī-a lâng sī choa̍t-tùi bô lâi-óng ê koan-hē? Lí án-chóaⁿ beh kiù góa, góa í-keng tùi lí kóng, góa sī Iû-thài lâng, lí án-chóaⁿ bô pàng-sak góa chòe lí khì.
|
49.巴拿：你kiám m̄ 知猶太人kap撒瑪利亞人是絕對無來往ê 關係？你án-chóaⁿ beh 救我，我已經對你講，我是猶太人，你án-chóaⁿ無放sak 我做你去。 |
|
50.希百: Khó-lîn ê hiaⁿ-tī ah, chit khoán ê phāu-oàn kiù-hun sī chin thang siong-sim ê chhò-gō͘, Iû-thài kap Sat-má-lī-a kiám m̄ sī lóng sio̍k tī A- pek-la̍h-hán ê kiáⁿ-sun mah?! Kiám m̄ sī lóng sio̍k Siōng-tè ê soán-bîn mah? Chit khoán ê phian-kiàn nā bô kái-siau, Tāi-pi̍t ê ông-kok tek-khak bōe-tit koh ho̍k-heng, put-hēng kap pi-chhám tek-khak éng-oán tòe tī chit nn̄g ê peh- sìⁿ ê téng-bīn.
|
50.希百：可憐ê 兄弟ah，這款ê 抱怨糾紛是真thang 傷心ê 錯誤，猶太kap撒瑪利亞kiám m̄是攏屬tī 亞伯拉罕ê 子孫mah？！Kiám m̄ 是攏屬上帝ê 選民mah？這款ê 偏見若無解消，大衛ê 王國的確bōe 得 koh 復興，不幸kap悲慘的確永遠tòe tī 這兩個百姓ê 頂面。 |
|
51.巴拿: Ai-iò! ai-iò! chin thiàⁿ, chin thiàⁿ!!
|
51.巴拿：哀iò!哀iò!真疼，真疼！！ |
|
52.希百: Sè-kiáⁿ ah, lí ê siong chin siong-tiōng, lí tio̍h ài khah thun-lún leh, hō͘ góa thang kā lí boah io̍h. (kā i kè-sio̍k boah io̍h)
|
52.希百：細子ah，你ê 傷真傷重，你著ài 較吞忍leh，hō͘ 我thang kā 你抹藥。(kā 伊繼續抹藥) |
|
53.巴拿: Lí chiong lí ê chiú ēng chīn tī góa ê sin-khu, chiong lí ê io̍h lóng boah tī góa ê siong-hûn, chiong lí ê saⁿ thiah-phòa lâi pau góa ê sin-thé, lí tàu-té ū sím-mi̍h ì-sù, góa bōe thang lí-kái!
|
53.巴拿：你將你ê 酒用盡tī 我ê 身軀，將你ê 藥攏抹tī 我ê 傷痕，將你ê 衫拆破來包我ê 身體，你到底有甚mi̍h意思，我bōe-thang 理解！ |
|
54.希百: Sè-kiáⁿ ah, chhiáⁿ lí pàng-sim hō͘ góa pang-chān lí, nā bô kiaⁿ-liáu lí ê siong ōe tì-kàu sí, góa bô ū sím-mi̍h ì-sù, chí ū sī lí su-iàu góa kā lí án-ni chòe, āu-lâi góa ōe hû-chhî lí kàu Iâ-lī-ko ê lú-koán khì, lí thang tī hia kè-sio̍k tī-liâu, kàu oân-choân hôe-ho̍k, góa ōe khì chhiáⁿ khah ū chhut-miâ ê i-seng lâi thòe lí i pīⁿ, hia ê hùi-ēng góa ōe siat-hoat lí m̄-bián khòa-ì. Góa iáu ū tām-po̍h sū-chêng tī Iâ-lī-ko ê siâⁿ-gōa, só͘-í góa ōe chiong lí kau-thok tī lú-koán ê chú-lâng kap i-seng, āu-lâi góa tùi siâⁿ-gōa ê kok chng-siā tńg-lâi ê sî góa ōe tòa lí tńg-khì Iâ-lō͘-sat-léng.
|
54.希百：細子ah，請你放心hō͘ 我幫贊你，若無驚了你ê 傷會致到死，我無有甚mi̍h意思，只有是你需要我kā 你án-ni 做，後來我會扶持你到耶利哥ê 旅館去，你thang tī hia 繼續治療，到完全回復，我會去請較有出名ê 醫生來替你醫病，hia-e 費用我會設法你m̄ 免掛意。我iáu 有淡薄事情tī 耶利哥ê 城外，所以我會將你交託tī 旅館ê 主人kap醫生，後來我tùi城外ê 各庄社轉--來ê 時我會帶你轉去耶路撒冷。 |
|
55.巴拿: Lí án-chóaⁿ bô chhin-chhiūⁿ tú chiah tùi chia kòe hit ê chè-si kap hit ê Lī-bī lâng lâi pàng hē góa chòe lí khì, in-ūi lí nā án-ni chòe chiah sī eng-kai ê, chóng-sī lí hoán-tńg ēng chit khoán lâi tùi-thāi góa, góa bōe thang lí-kái!
|
55.巴拿：你án-chóaⁿ無親像tú chiah tùi chia 過hit ê祭司kap hit ê利未人來放下我做你去，因為你若án-ni 做才是應該--ê,總是你反轉用這款來對待我，我bōe-thang 理解！ |
|
56.希百: Ū sím-mi̍h thang hō͘ lí bōe thang lí-kái? Sè-kiáⁿ ah, lí kiám bô ài sìⁿ-miā mah?! Lí kiám ài án-ni bô lâng pang-chān lâi sí tī chit ê chhiⁿ-chhìn ê só͘-chāi mah? Lí kiám bô pē-bó hiaⁿ-tī mah? Lí kiám bô͘ bó͘-kiáⁿ mah? Nā ū lí chai in án-chóaⁿ teh su-liām lí, teh khòa-lū lí. Bô-lūn ū sím-mi̍h chè-si á-sī Lī-bī lâng án-chóaⁿ khoán-thāi lí, góa chóng-sī bōe thang bô pang-chān lí, che sī Siōng-tè ê chí-ì, sī lâng-lâng ê gī-bū.
|
56.希百：有甚mi̍h thang hō͘ 你bōe-thang 理解？細子--ah，你kiám 無愛生命mah？！你kiám 愛án-ni無人幫贊來死tī 這個chhiⁿ-chhìn ê 所在mah？你kiám 無父母兄弟mah？你kiám無某子mah？若有你知in án-chóaⁿ teh思念你，teh 掛慮你。無論有甚mi̍h祭司抑是利未人án-chóaⁿ看待你，我總是bōe-thang 無幫贊你，che 是上帝ê 旨意，是人人ê 義務。 |
|
57.巴拿: Kám-siā lí ê hó-ì, tō-siā lí ê pang-chān, che sī tī Í-sek-lia̍t ê chi̍t-kiāⁿ kî-sū, iā sī Sat-má-lí-a lâng tiong thâu chi̍t ê iô-tāng góa ê sim-liām ê lâng.
|
57.巴拿：感謝你ê 好意，多謝你ê 幫贊，che 是tī 以色列ê 一件奇事，也是撒瑪利亞人中頭一個搖動我ê 心念ê 人。 |
|
58.希百: Lí kóng án-ni iā sī tio̍h, chóng-sī lí eng-kai chai-iáⁿ Í-sek-lia̍t ê tē-it kiāⁿ kî-sū sī tùi Ná-sat-le̍k lâng Iâ-so͘ ê só͘-chòe lâi khai-sí ê, khiok iô- tāng lí ê sim ê sǹg m̄ sī sio̍k tī Sat-má-lī-a lâng, eng-kai sī Iû-thài lâng Iâ-so͘, in-ūi Iâ-so͘ bat ēng I ê thiàⁿ kap chin-lí, ēng I ê sí kap siū-khó͘ lâi kám-tōng góa, kám-tōng chē-chē Í-sek-lia̍t peh-sìⁿ, beh hō͘ in thang koh tò-tńg kàu tī khí-chho͘ ê thiàⁿ-sim.
|
58.希百：你講án-ni 也是著，總是你應該知影以色列ê 第一件奇事是tùi 拿撒勒人耶穌ê 所做來開始--ê,卻搖動你ê 心ê 算m̄ 是屬tī 撒瑪利亞人，應該是猶太人耶穌，因為耶穌bat 用伊ê 疼kap真理，用伊ê 死kap受苦來感動我，感動濟濟以色列百姓，beh hō͘ in thang koh 倒轉到tī 起初ê 疼心。 |
|
59.巴拿: Lí só͘ kóng hit ūi Iâ-so͘ kiám m̄ sī ba̍k-kang Iok-sek ê kiáⁿ?
|
59.巴拿：你所講hit 位耶穌kiám m̄ 是木工約瑟ê 子？ |
|
60.希百: Sī! Chóng-sī I khak-si̍t sī Siōng-tè só͘ èng-ún ê kiù-sè Chú Bí-sài-a! In-ūi tùi I kî-biāu ê koh-oa̍h thang chai....., án-ni hó, chhiáⁿ lí tó tī góa ê keng-thâu, í-keng chin àm lah, lán tio̍h kóaⁿ-kín chhut chit ê hiám-iàu ê soaⁿ-lāi. (hû-chhah i khí-lâi, phāiⁿ i tī kha-chiah téng)
|
60.希百：是！總是伊確實是上帝所應允ê 救世主彌賽亞！因為tùi 伊奇妙ê 復活thang 知……，án-ni 好，請你倒tī 我ê 肩頭，已經真暗lah，咱著趕緊出這個險要ê 山野。(扶chhah 伊起來，phāiⁿ伊tī kha-chiah頂 ) |
|
61.巴拿: Ai-iò! ai-iò! góa bô hoat-tō͘ thang tín-tāng lah, kui sin-khu lóng chin thàng-thiàⁿ.
|
61.巴拿；哀iò!哀iò!我無法度thang 振動lah，歸身軀攏真痛疼。 |
|
62.希百: Chhiáⁿ lí jím-nāi, liâm-piⁿ ōe kàu ūi, ēng lí ê chhiú pan tī góa ê ām-kún, án-ni tio̍h, án-ni tio̍h! (kiâⁿ kúi pō͘)
|
62.希百；請你忍耐，liâm-piⁿ會到位，用你ê 手pan tī 我ê ām-kún,án-ni著，án-ni著！(行幾步) |
|
63.巴拿: Sat-má-lī-a lâng Hi-pek, lí nā chai lí só͘ kiù, só͘ pang-chān ê lâng tùi lí só͘ phāu ê siû-oàn, m̄-chai lí ōe chiàu án-ni pang-chān i, āiⁿ i tī lí ê kha-chiah téng á-bōe?
|
63.巴拿：撒瑪利亞人希百，你若知你所救，所幫贊ê 人tùi 你所抱ê 仇怨，m̄ 知你會照án-ni 幫贊伊，āiⁿ 伊tī 你ê kha-chiah 頂抑bōe? |
|
64.希百: Iâ-so͘ kóng lí tio̍h thiàⁿ chhù-piⁿ chhin-chhiūⁿ ka-kī, iā tio̍h thiàⁿ lí ê tùi-te̍k, sím-mi̍h chêng-hêng tio̍h bōe thang kái-piàn góa ê sim.
|
64.希百：耶穌講你著疼厝邊親像家己，iā著疼你ê 對敵，甚mi̍h情形著bōe-thang 改變我ê 心。 |
|
65.巴拿: Sat-má-lī-a lâng Hi-pek, chhiáⁿ lí tāi-seng hō͘ góa chē tī chit ê só͘-chāi, góa ū ōe ài beh tùi lí kóng bêng.
|
65.巴拿：撒瑪利亞人希百，請你代先hō͘ 我坐tī 這個所在，我有話ài beh tùi 你講明。 |
|
66.希百: Lí ū sím-mi̍h tāi-chì beh kóng? (pàng-lo̍h i tī piⁿ kak ê chi̍t-tè chio̍h téng hō͘ i chē tī hia)
|
66.希百：你有甚mi̍h代誌beh 講？( 放落伊tī 邊角ê 一塊石頂hō͘ 伊坐tī hia ) |
|
67.巴拿: Góa ê sim chin kan-khó͘, góa chin chhàm-hóe góa sī án-chóaⁿ ê gû-gōng chhò-gō͘, chit ê chhò-gō͘ nā m̄-sī tī chit ê hoān-lān siū-siong ê Iâ-lī-ko soaⁿ-téng chhàu-khám ū tú-tio̍h lí, chiū éng-oán sī bô hoat-tō͘ thang siu-si̍p, thang kái-siau. Góa tùi-put-khí lí, chhiáⁿ lí sià-bián góa! (kūi lo̍h khì pho͘ i ê kha), góa í-chêng oàn-hūn it-chhè ê Sat-má-lī-a lâng, chun-chiàu chó͘-sian ê cheng-sîn, choa̍t-tùi bô beh kap Sat-má-lī-a lâng kau-óng, chit ê kiù-hun iā chò chiâⁿ kin-á-ji̍t chit téng-hō ê chai-lān! Chóng-sī lí hoán-tńg piáu-bêng lí ê thiàⁿ lâi pang-chān chín-kiù góa, tng góa só͘ kèng-thiàⁿ só͘ chun-tiōng ê chè-si kap Lī-bī lâng lóng pàng-sak góa tī sí tōe, bô lîn-bín góa ê sî, to̍k-to̍k góa tī sim-lāi só͘ iàm-chiān só͘ oàn-hūn ê, lí sòa lâi kiù góa, lí m̄ nā kiù góa. lí iā ū kiù góa ê choân-ke, góa beh án-chóaⁿ lâi tùi lí pôe chōe? Góa chin kiàn-siàu, góa chin tùi-pû-khí lí, chhiáⁿ lí sià-bián góa. (háu)
|
67.巴拿：我ê 心真艱苦，我真懺悔我是án-chóaⁿ ê 愚憨錯誤，這個錯誤若m̄ 是tī 這個犯難受傷ê 耶利哥山頂chhàu-khám 有tú著你，就永遠是無法度thang 收拾，thang 解消。我對不起你，請你赦免我！(跪落去pho͘伊ê 腳)，我以前怨恨一切ê 撒瑪利亞人，遵照祖先ê 精神，絕對無beh kap撒瑪利亞人交往，這個糾紛也做成今仔日這téng-hō ê災難！總是你反轉表明你ê 疼來幫贊拯救我，tng 我所敬疼所尊重ê 祭司kap利未人攏放sak 我tī 死地，無憐憫我ê 時，獨獨我tī 心內所厭賤所怨恨--ê,你續來救我，m̄但救我。你也有救我ê 全家，我beh án-chóaⁿ 來tùi 你陪罪？我真見笑，我真對不起你，請你赦免我。(哮) |
|
68.希百: Kám-siā Chú ū kiò chhíⁿ lí ê sim, Kiù-sè Chú Iâ-so͘, ēng I ê thiàⁿ kap I ê sí lâi beh kái-piàn chit ê hú-pāi tò-hūn ê sè-kài. Tī Iâ-so͘ thiàⁿ ê lāi-bīn bô ū kiù-hun, bô ū keh-mo̍͘h, beh hō͘ Í-sek-lia̍t ho̍k-heng, tek-khak tio̍h ū chiap-siū Iâ-so͘ ê thiàⁿ sī tùi lán khai-sí, āu-lâi kàu tī choân-kok, sím-chì kàu choân sè-kài, Iâ-so͘ ê thiàⁿ bat kám-tōng góa iô-tāng góa kái-piàn góa, chhin- chhiūⁿ án-ni lí nā chiap-siū Iâ-so͘, lí iā beh tit-tio̍h hit ê thiàⁿ ê kám-kek, iô-tāng kap kái-piàn, ǹg-bāng chit ê thiàⁿ bô kú ōe cheng-ho̍k choân-kok, cheng-ho̍k choân sè-kài, hō͘ Siōng-tè ê kok kín-kín thang lîm-kàu tī chit ê tē-chiūⁿ.
|
68.希百：感謝主有叫醒你ê 心，救世主耶穌，用伊ê 疼kap伊ê 死來beh 改變這個腐敗妒恨ê 世界。Tī 耶穌疼ê 內面無有糾紛，無有隔膜，beh hō͘ 以色列復興，的確著有接受耶穌ê 疼是tùi 咱開始，後--來到tī 全國，甚至到全世界，耶穌ê 疼bat 感動我搖動我改變我，親像án-ni 你若接受耶穌，你也beh 得著hit-e 疼ê感激，搖動kap改變，向望這個疼無久會征服全國，征服全世界，hō͘ 上帝ê 國緊緊thang 臨到tī 這個地上。 |
|
69.巴拿: Góa chin hoaⁿ-hí chiap-siū Iâ-so͘ tī góa ê sim-lāi, góa iā beh hó táⁿ tùi góa ê ka-têng lâi kan-chèng chit ê thiàⁿ ê siau-sit.
|
69.巴拿；我真歡喜接受耶穌tī 我ê 心內，我也 beh 好膽對我ê 家庭來干證這個疼ê 消息。 |
|
70.希百: Kám-siā Chú, o-ló Chú!! Che sī kî-biāu ê an-pâi, taⁿ hó í-keng ji̍p kiⁿ lah, lán tio̍h kín-kín chìn lán ê lō͘. (Hi-pek hû-chhî i kiâⁿ se̍h, liáu-āu thè tiûⁿ)
|
70.希百：感謝主，o-ló 主！！Che 是奇妙ê 安排，今好已經入更lah，咱著緊緊進咱ê 路。(希百扶持伊行se̍h,了後退場) |
|
-幕-
|
-幕- |
