O͘-ku chē Hui-ki
|
O͘-ku 坐飛機 |
| Lōa Jîn-seng |
賴仁聲 |
|
Bó͘ só͘-chāi chi̍t-chiah o͘-ku, múi-ji̍t tī tē-bīn teh pê, pê tio̍h chin bān, ka-kī chin thó-iàm chit khoán bān sô-sô ê seng-oa̍h. Gia̍h-thâu khòaⁿ tōa-eng poe tī khong-tiong, àⁿ-lo̍h--lâi khòaⁿ ē-bīn ê bān-mi̍h kap it-chhè ê kéng-tì, sim seⁿ khí chin soān-bō͘. Tùi án-ni chu-chu siūⁿ khòaⁿ ū sím-mi̍h pān-hoat thang pn̄g lāu-eng ê le̍k-liōng lâi hui-thêng ko-khong iû-oán sù-hong á-bô? Ū chi̍t-ji̍t hō͘ i siūⁿ-tio̍h, chiū kā chi̍t-ki chhôe-á lâi pài-hāu lāu-eng hiaⁿ. Kā i kóng, “Lāu-eng hiaⁿ pài-thok lí chhōa góa lâi-khì kàu khong-tiong iû-siúⁿ, thang àⁿ lo̍h khòaⁿ hā-kài ê kong-kéng hó bô?” Lāu-eng kóng, “Che sī chin ûi-lân ê sū.” Lāu-ku kā i kóng, “Bē”, chiū chiong i tòa--lâi ê chhôe-á hō͘ lāu-eng khòaⁿ, kóng, “Chhiáⁿ lí ēng lí ê kha gia̍p chit ki chhôe-á ê chi̍t-thâu, iā góa chiah ēng chhùi kā iáu chi̍t-thâu, án-ni lí ûn-ûn-á poe khí--lâi, góa chiū ē tit pn̄g lí ê hok-khì thang khì khong-tiong iû-oán.” Lāu-eng thiaⁿ liáu chin ū lí-khì, chiū bô thoe-sî lâi giú i kàu khong-tiong. Lāu-ku kó-jiân kak-tit hui-siông ê sóng-khoài, ē-bīn chin chē lâng khòaⁿ-kìⁿ chit ê hi-kî ê sū, tāi-ke chin chheng-chàn, lóng cháu chhut-lâi khòaⁿ, phah chhiú kā i hat-chhái. Chèng-lâng tōa-tōa o-ló chit ê pān-hoat chin thong chin hó, tàu-tí m̄-chai siáⁿ lâng siūⁿ-tio̍h--ê? Lāu-ku sim-lāi chin hoaⁿ-hí, chin kiau-ngō͘, chek-sî khui-chhùi kóng, “Sī góa lah” Ah! Bô phah-sǹg chhùi chi̍t-ē khui, sòa tùi chhôe-á lut-khì, hit chiah o͘-ku chū án-ni tùi chin koân ê khong-tiong siak tùi tē-chiūⁿ lo̍h--lâi, siak chi̍t-ē kut-chi̍t bah-li̍h8 chhùi kô͘-kô͘, chin khó-lîn.
|
某所在1隻烏龜，每日tī地面teh爬，爬tio̍h真慢，家己真討厭這款慢趖趖ê生活。Gia̍h頭看大鷹飛tī空中，àⁿ落--來看下面 ê 萬物kap一切ê景緻，心生起真soān慕。Tùi án-ni chu-chu想看有甚mi̍h辦法thang pn̄g老鷹ê 力量來飛騰高空、遊玩四方抑無？有1日hō͘伊想著，就咬1支chhôe仔來拜候老鷹兄。Kā伊講：「老鷹兄拜託你chhōa我來去到空中遊賞，thang àⁿ落看下界 ê 光景好無？」老鷹講：「這是真為難 ê 事。」老龜kā伊講：「Bē」，就將伊帶--來 ê chhôe仔hō͘老鷹看，講：「請你用你ê腳gia̍p這支chhôe仔ê 1頭，iā我才用嘴咬iáu 1頭，án-ni你勻勻仔飛起--來，我就會得pn̄g你ê福氣thang去空中遊玩。」老鷹聽了真有理氣，就無推辭來giú伊到空中。老龜果然覺得非常ê爽快，下面真濟人看見這個稀奇ê事，大家真稱讚，攏走出來看，扑手kā伊喝采。眾人大大o-ló這個辦法真thong真好，到底m̄知啥人想著--ê? 老龜心內真歡喜、真驕傲，即時開嘴講：「是我lah」Ah！無扑算嘴1下開，續tùi chhôe仔lut去，hit隻烏龜chū án-ni tùi真懸 ê 空中siak tùi地上落--來，siak一下骨折肉裂碎kô͘-kô͘,真可憐。 |
|
Io̍k-bōng ōe hō͘ lâng sí!
|
慾望會hō͘人死！ |
|
(Ka-têng ê pêng-iú tē 30 kî, 1960 nî 8 ge̍h)
|
(家庭ê朋友第30期，1960年8月) |
