Sûn-kàu-chiá ê thài-thài
|
殉教者ê 太太 |
| Tiong-ga̍k-seng |
中樂生 |
|
Sió tê-ba̍k, sió kò͘-sū
|
小題目，小故事 |
|
1956 nî ê 2 goe̍h 20 ji̍t hoat-hêng ê Bí-kok tōa cha̍p-chì “Seng-oa̍h ōe-pò”ū chhut kúi tiuⁿ siōng, teh soeh-bêng 5 ê soan-kàu-su khì Lâm Bí-chiu Ò-ka cho̍k (Augas) Ek-koa-tô kok thoân tō-lí. Ò-ka cho̍k san-tē ê só͘-chāi iáu sī bô chhēng saⁿ, bô chhēng khò͘ ê iá-bân cho̍k, siông-siông ū thâi-lâng chò chè-sū ê cho̍k.
|
1956年ê 2月20日發行ê美國大雜誌「生活畫報」。有出幾張像，teh 說明5個宣教師去南美洲奧加族( Augas )厄瓜多國傳道理。奧加族山地ê 所在iáu是無穿衫，無穿褲ê 野蠻族，常常有thâi 人做祭祀ê 族。 |
|
Gō͘ ê soan-kàu-su kàu chit ê só͘-chāi sòa hō͘ hiah ê chheⁿ-hoan thâi-sí, hip tī siōng-ni̍h ê chēng-hêng, sī hui-ki ê thàm-hiám-tūi só͘ hip ê, iā ū sin-si phû tī khe-ni̍h, hō͘ lâng hoat-kiàn--tio̍h ê.
|
五個宣教師到這所在煞hō͘ hiah ê生番thâi 死，hip tī像--ni̍h ê情形，是飛機ê探險隊所hip--ê,也有身屍浮tī溪--ni̍h，hō͘人發見--著ê。 |
|
Kàu 1957 nî 8 goe̍h, bô phah-sǹg chiah ê soan-kàu-su ê chi̍t ê thài-thài kap eⁿ-á tú chhut-sì chi̍t nî gōa ê, saⁿ-chhōa khì hiah ê chheⁿ-hoan ê só͘-chāi beh khì thoân-kàu. Hiah ê siau-sit kap siōng koh chhut tī Sēng-oa̍h ōe-pò-ni̍h, lēng-gōa iā ū siū thâi-sí ê chi̍t ê soan-kàu-su ê sió-mōe iā koh khì hia thoân tō-lí, hit ê siōng kap siau-sit iā ū chhut tī Seng-oa̍h cha̍p-chì--n̍i̍h.
|
到1957年8月，無扑算chiah ê 宣教師ê 一個太太kap嬰仔tú出世一年外--ê,相chhōa去hiah ê 生番ê 所在beh去傳教。Hiah ê 消息kap像koh出tī 生活畫報--ni̍h，另外也有受thâi死ê一個宣教師ê 小妹也koh去hia傳道理，hit ê 像kap消息也有出tī 生活畫報雜誌--ni̍h。 |
|
Kàu 1958 nî ê 12 goe̍h hō ū koh chhut in ê siōng tī Seng-oa̍h cha̍p-chì--ni̍h. Taⁿ hiah ê siōng ū chhut 3 tiuⁿ tī pún Pò, chhiáⁿ tho̍k-chiá iā khòaⁿ, iā siūⁿ, tùi hia lâi siū kà-sī kap kek-lē.
|
到1958年ê 12月號有koh出in ê 像tī 生活雜誌--ni̍h。今hiah ê 像有出3 張tī本報，請讀者也看，也想，tùi hia來受教示kap激勵。 |
|
(Tâi-oân Kàu-hōe-kong-pò tē 843 hō, 1959 nî 3 ge̍h)
|
(台灣教會公報第843號，1959年3月) |
