Jī-cha̍p Sè-kí ê Chú-ji̍t-o̍h_11
|
20世紀Ê主日學_11 |
|---|---|
| Tamura | Tamura |
|
Tē 2 Phiⁿ Koán-lí-hoat
|
第2篇管理法 |
|
(Sòa-chiap 10 ge̍h hūn ê Tē 6 chiuⁿ)
|
(續接10月份ê第6章) |
|
(4) Kóng-kò: (Bō͘-chi̍p ha̍k-seng ê hoat-tō͘ 3) M̄-thang bē kì-tit kóng “Hó ê ìn-soat-bu̍t siông-siông sī hó ê pang-chān.” Chiong kàu-hōe á-sī bo̍k-su ê siá-chin, ìn tī chin súi ê kāu-chóa, iā siá Chú-ji̍t-o̍h ê bo̍k-tek á-sī só͘-chāi á-sī sî-kan, pun hō͘ jî-tông, nā ēng po̍h koh sio̍k ê chóa ìn, in ē ēng khì chhèng-phīⁿ hiat-ka̍k khì, só͘-í sió-khóa ke ēng chîⁿ ìn khah súi leh khah hó. Nā án-ni in ê pó-sioh siu khí-lâi khǹg, chiū chiām-chiām pìⁿ kóng-kò, bô-kú ē pìⁿ hō͘ Chú-ji̍t-o̍h ê ha̍k-seng ke-thiⁿ ê hoat-tō͘. |
(4) 廣告：(募集學生ê法度3) M̄-thang bē記得講「好ê印刷物常常是好ê幫贊。」將教會á是牧師ê寫真，印tī真súi ê厚紙，iā寫主日學ê目的á是所在á是時間，分hō͘兒童，若用薄koh sio̍k ê紙印，in ē用去chhèng鼻hiat-ka̍k去，所以sió-khóa加用錢印khah súi leh khah好。若án-ni in ê保惜收起來khǹg，就漸漸變廣告，無久ē變hō͘主日學ê學生加添ê法度。 |
|
(5) Tiāⁿ-tio̍h chò-kang ê só͘-chāi: (Bō͘-chi̍p ha̍k-seng ê hoat-tō͘ 4) Khòaⁿ chit-lí ū kúi ê jî-tông, pa̍t-lí ū kúi ê jî-tông tio̍h siông-sè tiau-cha, hō͘ chiah ê gín-ná pun tī kok-lí lâi chò kang iā-sī chi̍t ê hoat-tō͘. Hāu-tiúⁿ ka-kī chòe su-lēng-koaⁿ, kiò kàu-oân á-sī ha̍k-seng, ín-chhōa in só͘ pun tio̍h ê lí-lāi ê jî-tông, án-ni ê chò-kang iā-sī chin hó, koh hāu-tiúⁿ tio̍h ē-kì-tit chiah ê jî-tông ê sìⁿ-miâ, sī chin iàu-kín ê sū. |
(5) Tiāⁿ-tio̍h做工ê所在：(募集學生ê法度4) 看chit里有幾ê兒童，別里有幾ê兒童tio̍h詳細調查，hō͘ chiah ê gín-ná分tī各里來做工也是chi̍t ê法度。校長家己做司令官，叫教員á是學生，引chhōa in所分tio̍h ê里內ê兒童，án-ni ê做工也是真好，koh校長tio̍h ē記得chiah ê兒童ê姓名，是真要緊ê事。 |
|
(6) Hun-pêng kēng-cheng: (Bō͘-chi̍p ha̍k-seng ê hoat-tō͘ 5) Bí-kok ū chi̍t-keng Chú-ji̍t-o̍h, ha̍k-seng hun-pêng, tiāⁿ-tio̍h sî-kî hō͘ kēng-cheng ke-thiⁿ sin ê ha̍k-seng. Ta̍k lé-pài lóng kong-kò khòaⁿ kah (甲) ê chit pêng ke kúi-ê, iā it (乙) ê chit-pêng ke kúi-ê, nā su ê hit pêng tio̍h chhiáⁿ iâⁿ ê hit pêng, khiok chit ê hoat-tō͘ m̄-sī chin hó, m̄-kú chāi-tī ūn-iōng bē kah lōa ū sún-hāi chiah tio̍h, só͘-í chò bō͘-chi̍p ha̍k-seng ê chi̍t ê hoat-tō͘ chiah ū siá tī chia. (Thāi-sio̍k) |
(6) 分pêng競爭：(募集學生ê法度5) 美國有chi̍t間主日學，學生分pêng，tiāⁿ-tio̍h時時hō͘競爭加添新ê學生。Ta̍k禮拜攏公告看甲ê chit pêng加幾ê，iā乙ê chit-pêng加幾ê，若輸ê hit pêng tio̍h請贏ê hit pêng，卻chit ê法度m̄是真好，m̄-kú在tī運用bē kah lōa有損害chiah tio̍h，所以做募集學生ê chi̍t ê法度chiah有寫tī chia。(待續) |
