Jī-cha̍p Sè-kí ê Chú-ji̍t-o̍h_09
|
20世紀Ê主日學_09 |
|---|---|
| Tamura | Tamura |
|
Tē 2 Phiⁿ Koán-lí-hoat
|
第2篇管理法 |
|
Tē 1 chiuⁿ Koán-lí ê ì-gī.
|
第1章管理ê意義。 |
|
Chú-ji̍t-o̍h sī chong-kàu-tek ê jî-tông kàu-io̍k ê tōa ki-koan, só͘-í tek-khak tio̍h kin-kù ha̍k-lí-tek, sim-lí-tek kap sin kàu-io̍k-ha̍k ê tōa goân-lí lâi si-hêng kàu-io̍k, Chú-ji̍t-o̍h ê koán-lí-hoat kap phó͘-thong ê ha̍k-hāu ê koán-lí-hoat lóng bô cheng-chha. Chiū-sī tio̍h siông-sè gián-kiù jî-tông ê sū kap kàu-io̍k, ēng chòe chìn-pō͘ ê hoat-tō͘ lâi koán-lí Chú-ji̍t-o̍h. Taⁿ koan-hē chiah ê sū-hāng, tī ē-bīn chiām-chiām lâi kóng khí.
|
主日學是宗教的ê兒童教育ê大機關，所以的確tio̍h根據學理的、心理的kap新教育學ê大原理來施行教育，主日學ê管理法kap普通ê學校ê管理法攏無曾差。就是tio̍h詳細研究兒童ê事kap教育，用最進步ê法度來管理主日學。Taⁿ關係chiah ê事項，tī下面漸漸來講起。 |
|
Tē 2 chiuⁿ Kui-chek
|
第2章規則 |
|
Siōng tē-it iàu-kín ê sī kui-chek, che sī kap siat-li̍p Chú-ji̍t-o̍h tông-sî bô bē ēng-tit ê. Hāu-tiúⁿ sī sím-mi̍h lâng soán-chhut? Kàu-oân kap ia̍h-oân beh án-chóaⁿ kā in chiok-thok? Sím-mi̍h khoán lâng beh chò ha̍k-seng? Koan-hē chiah ê sū ê kui-chek nā bô, kiat-kio̍k ha̍k-hāu bē sêng-li̍p. Kin-á-ji̍t Ji̍t-pún ê Chú-ji̍t-o̍h, chí-ū chhin-chhiūⁿ chū-chi̍p jî-tông, iā kā in kà sím-mi̍h nā-tiāⁿ, bô ū chit-khoán ê ha̍k-hāu. Bô-lūn tó-ūi ê ha̍k-hāu tek-khak tio̍h ū kui-chek, tùi án-ni chiū ū tia̍t-sū. Nā bô kui-chek, bô tia̍t-sū ê ha̍k-hāu, sī chí-ū chia̍h miâ, bē thang kóng sī chin-chiàⁿ ê ha̍k-hāu. Kìⁿ-nā ē-thang kiò-chò ha̍k-hāu, ha̍k-seng iā tio̍h ū chu-keh, kàu-oân iā ū chek-jīm, koh ha̍k-seng kap kàu-su tio̍h hō͘ chi̍t ê kui-chek lâi koán-hat. Chóng-sī kui-chek m̄-sī it-tēng ê hêng-sek. Sûi ê ha̍k-hāu ē-thang chū-iû lâi chò, ē-bīn pâi-lia̍t Sukiyabasbi kàu-hōe ê Chú-ji̍t-o̍h ê kui-chek, chò lia̍t-ūi ê chham-khó.
|
上第一要緊ê是規則，che是kap設立主日學同時無bē用得ê。校長是sím-mi̍h人選出？教員kap役員beh án-chóaⁿ kā in chiok-thok？Sím-mi̍h款人beh做學生？關係chiah ê事ê規則若無，結局學校bē成立。今á日日本ê主日學，只有親像聚集兒童，iā kā in教sím-mi̍h nā-tiāⁿ，無有chit款ê學校。無論tó位ê學校的確tio̍h有規則，對án-ni就有秩序。若無規則，無秩序ê學校，是只有食名，bē thang講是真正ê學校。Kìⁿ-nā ē-thang叫做學校，學生也tio̍h有資格，教員也有責任，koh學生kap教師tio̍h hō͘ chi̍t ê規則來管轄。總是規則m̄是一定ê形式。隨ê學校ē-thang自由來做，下面排列Sukiyabasbi教會ê主日學ê規則，做列位ê參考。 |
|
Chú-ji̍t-o̍h ê hiàn-hoat
|
主日學ê憲法 |
|
Tē 1 tiâu Bêng-chheng: Pún-hāu chheng-chò Ji̍t-pún To̍k-li̍p Tiúⁿ-ló Sukiyabasbi kàu-hōe Chú-ji̍t-o̍h.
|
第1條名稱：本校稱做日本獨立長老Sukiyabasbi教會主日學。 |
|
Tē 2 tiâu Bo̍k-tek: Pún-hāu ūi-tio̍h pôe-iúⁿ oân-choân ê Ki-tok-tô͘ ê sìn-gióng, kap chiàu án-ni seng-oa̍h, gián-kiù kap kà Sèng-keng chò bo̍k-tek.
|
第2條目的：本校為tio̍h培養完全ê基督徒ê信仰，kap照án-ni生活、研究kap教聖經做目的。 |
|
Tē 3 tiâu Ha̍k-seng: Lâi pún-hāu chhut-se̍k 2 pái í-siōng, koh sē-iok beh kè-sio̍k chhut-se̍k ê lâng thang chò pún-hāu ê ha̍k-seng. Pún-hāu ê ha̍k-seng lóng ū tâu-phiò-koân.
|
第3條學生：來本校出席2 pái以上，koh誓約beh繼續出席ê人thang 做本校ê學生。本校ê學生攏有投票權。 |
|
Tē 4 tiâu Ia̍h-oân: Pún-hāu siat ē-bīn só͘-kì ê ia̍h-oân. Hāu-tiúⁿ, Hù hāu-tiúⁿ, Su-kì, Kòe-kè, Su-che̍k-cho͘, Im-ga̍k-cho͘, Chiap-thāi hóng-būn cho͘. Pún kàu-hōe ê bo̍k-su éng-oán sī Chú-ji̍t-o̍h ê bo̍k-su. (Tàn-sī chiah ê ia̍h-oân khó-í kiam-jīm) Ia̍h-oân kap kàu-oân cho͘-chit hia̍p-gī-hōe, iā hāu-tiúⁿ chò chit ê hōe-tiúⁿ, chiah ê chit lóng sī 1 nî-kú boán-jīm. Tàn nā bô hō͘-jīm-chiá tio̍h kè-sio̍k chāi-chit. |
第4條役員：本校設下面所舉ê役員。 校長、副校長、書記、會計、書籍組、音樂組、接待訪問組。 本教會ê牧師永遠是主日學ê牧師。(但是chiah ê役員可以兼任) 役員kap教員組織協議會，iā校長做chit ê會長，chiah ê職攏是1年久滿任。但若無後任者tio̍h繼續在職。 |
|
Tē 5 tiâu Soán-kú: Hāu-tiúⁿ sī múi-nî tī 4 goe̍h tē-it ê Chú-ji̍t, tī kàu-hōe ê hô-hōe soán-kú, kî-thaⁿ ê ia̍h-oân sī tī hia̍p-gī-hōe soán-kú.
|
第5條選舉：校長是每年tī 4月第一ê主日，tī教會ê和會選舉，其他ê役員是tī協議會選舉。 |
|
Tē 6 tiâu Ia̍h-oân ê gī-bū.
|
第6條役員ê義務。 |
|
1. Hāu-tiúⁿ: Chiáng-lí choân-poaⁿ ê chit-bū, kam-tok chi̍p-hōe, koat-tēng seng-kip, koh tio̍h chīn choân-la̍t, put-lūn ha̍k-hāu lāi-gōa, tio̍h tô͘-bô͘ pún-hāu ê lī-ek.
|
1. 校長：掌理全般ê職務、監督集會、決定升級，koh tio̍h盡全力，不論學校內外，tio̍h圖謀本校ê利益。 |
|
2. Hù hāu-tiúⁿ: Pang-chān hāu-tiúⁿ ê chit-bū, nā hāu-tiúⁿ bô tī-teh ê sî, tāi-lí hāu-tiúⁿ.
|
2. 副校長：幫贊校長ê職務，若校長無tī-teh ê時，代理校長。 |
|
3. Su-kì: Chhú-lí ha̍k-seng ê miâ-phō͘, chèng-khak chò koan-hē ha̍k-seng ê chhut-se̍k, hiàn-kim ê chóng-gia̍h ê kì-lio̍k, put-iàu sî tī múi-chiu, múi-goe̍h, múi-nî, tio̍h pò-kò.
|
3. 書記：處理學生ê名簿，正確做關係學生ê出席、獻金ê總額ê記錄，不要時tī每周、每月、每年，tio̍h報告。 |
|
4. Kòe-kè: Pún-hāu ê hùi-iōng kap ūi-tio̍h chû-siān sū-gia̍p siu-chi̍p hiàn-kim, koh chiàu hia̍p-gī-hōe ê bēng-lēng lâi chi-chhut, tī nî-hōe pò-kò i ê koat-sǹg.
|
4. 會計：本校ê費用kap為tio̍h慈善事業收集獻金，koh照協議會ê命令來支出，tī年會報告i ê決算。 |
|
5. Su-chek-cho͘: Chiàu hia̍p-gī-hōe ê bēng-lēng koán-lí pún-hāu tô͘-su-sek só͘ ū ê kàu-kho-su, chham-khó-su, kap kî-thaⁿ ê su-che̍k.
|
5. 書籍組：照協議會ê命令管理本校圖書室所有ê教科書、參考書，kap其他ê書籍。 |
|
6. Im-ga̍k-cho͘: Chiàu hāu-tiúⁿ ê bēng-lēng, chiáng-lí pún-hāu ê im-ga̍k.
|
6. 音樂組：照校長ê命令，掌理本校ê音樂。 |
|
7. Chiap-thāi hóng-būn chō͘: Tī hau-lāi chiàu-kò͘ ha̍k-seng, koh nā in-ūi phòa-pīⁿ kap kî-thaⁿ ê sū-kò͘ ê sî liâm-piⁿ khì kā hóng-būn.
|
7. 接待訪問組：Tī校內照顧學生，koh若因為破病kap其他ê事故ê時liâm-piⁿ去kā訪問。 |
|
8. Hia̍p-gī-hōe: Jīm-bián kàu-oân, kap ia̍h-oân ê kái-soán, soán-tēng kap kó͘ bé pún-hāu tô͘-su-sek ê chham-khó-su kap kî-thaⁿ bûn-ha̍k su-lūi, koh gī-lūn hiàn-kim ê chi-chhut, chīn-la̍t tô͘-bô͘ pún-hāu ê chìn-pō͘ kap hoat-tián. Pún-hōe só͘ koat-gī ê sū-hāng, tek-khak tio̍h hō͘ pún-hāu ê hōe-gī hù-gī.
|
8. 協議會：任免教員，kap役員ê改選、選定kap購買本校圖書室ê參考書kap其他文學書類，koh議論獻金ê支出，盡力圖謀本校ê進步kap發展。本會所決議ê事項，的確tio̍h hō͘本校ê會議複議。 |
|
Tē 7 tiâu Kàu-oân ê gī-bū: Ūi-tio̍h beh kà ê ha̍k-khò tio̍h ū cha̍p-hun ê chún-pī, chhut-se̍k hia̍p-gī-hōe, pún-hāu khai-sí ê sî-kan tio̍h giâm-siú, kok pan ê kui-lu̍t tio̍h giâm, hō͘ ha̍k-seng ē chù-ì chai Chú-ji̍t-o̍h ê thiàⁿ-sioh in. Koh ūi-tio̍h án-ni thè in kî-tó, á-sī khì in tau hóng-būn, te̍k-piat nā ūi-tio̍h phòa-pīⁿ á-sī khiàm-se̍k ê sî, chek-sî khì hóng-būn, chīn-la̍t ūi-tio̍h ta̍t-sêng pún-hāu só͘ kui-tēng ê bo̍k-te̍k.
|
第7條教員ê義務：為tio̍h beh教ê學課tio̍h有cha̍p分ê準備，出席協議會，本校開始ê時間tio̍h嚴守，各班ê規律tio̍h嚴，hō͘學生ē注意知主日學ê疼惜in。Koh為tio̍h án-ni替in祈禱，á是去in tau訪問，特別若為tio̍h破病á是欠席ê時，即時去訪問，盡力為tio̍h達成本校所規定ê目的。 |
|
Tē 8 tiâu Pun-pan: Pún-hāu î-chiàu ha̍k-seng ê ha̍k-le̍k, kap tì-sek ê thêng-tō͘ pun chò 8 pan.
|
第8條分班：本校依照學生ê學歷，kap智識ê程度分做8班。 |
|
Bōng pan: Iù-tī-hn̂g cho͘. Hí pan: Chho͘-sió lú-seng. Ài pan: Ko-sió lú-seng. Jím pan: Lú tiong ha̍k-seng. Hūi pan: Sió-ha̍k lâm-seng. Sìn pan: Chho͘-tiong lâm-seng. Lo̍k pan: Ko-tiong ha̍k-seng. Hô-pêng pan: Tōa-lâng lâm-lú. |
望班：幼稚園組。 喜班：初小女生。 愛班：高小女生。 忍班：女中學生。 惠班：小學男生。 信班：初中男生。 樂班：高中學生。 和平班：大人男女。 |
|
Tē 9 tiâu Khai-hōe: Pún-hāu múi lé-pài-ji̍t siōng ngó͘ 9 tiám khí kàu 10 tiám, lóng siū-gia̍p chi̍t-tiám-cheng kú. (Tàn chiàu kúi-chiat, ū sî to-siáu ê piàn-keng.)
|
第9條開會：本校每禮拜日上午9點起到10點，攏授業chi̍t點鐘久。(但照季節，有時多少ê變更。) |
|
Tē 10 tiâu Te̍k-piat chū-hōe: Pún-hāu múi-nî 12 goe̍h 25 ji̍t khui Kiù-chú-tàn chiok-hō-hōe, koh chi̍t-nî chi̍t-pái khui ūn-tōng-hōe.
|
第10條特別聚會：本校每年12月25日開救主誕祝賀會，koh chi̍t年chi̍t-pái開運動會。 |
|
Tē 11 tiâu Siúⁿ-hoa̍t: Chi̍t-nî ê tiong-kan nā lóng m̄-bat khiàm-se̍k ê ha̍k-seng tī Kiù-chú-tàn chiok-hō-hōe ê sî siúⁿ siúⁿ-pâi. Koh chi̍t-nî tiong chhut-se̍k siōng hó ê pan siúⁿ iu-sèng-kî. Hoān-nā pún-hāu ê ha̍k-seng, khòaⁿ chò bô sek-tòng ê sî, tùi hia̍p-gī-hōe ê koat-gī kā tû-miâ.
|
第11條賞罰：Chi̍t年ê中間若攏m̄-bat欠席ê學生tī救主誕祝賀會ê時賞賞牌。Koh chi̍t年中出席上好ê班賞優勝旗。Hoān-nā本校ê學生，看做無適當ê時，對協議會ê決議kā除名。 |
|
Tē 12 tiâu Siu-chèng: Pún hiàn-hoat nā ū iú-koân-chiá ê tâu-phiò kàu 4 hūn 3 ê sî, ē-tit thang sûi-sî kái-chèng, ke-thiⁿ.
|
第12條修正：本憲法若有有權者ê投票到4分3 ê時，ē得thang隨時改正、加添。 |
