首頁 >文學作品
文學作品
回上一頁
本篇文章總共有5個段落,20個語句,448個語詞,660個音節
Chéng-pún ê chiat-koat 整本ê捷訣
Phian-chip-sek 編輯室
Tī chit kúi-cha̍p-nî ê tiong-kan, lūn thiⁿ-ē ê kok heng-ōng, káⁿ sī Hoe-kî-kok tē it khoài; put-lūn sī lâng-gia̍h á-sī chîⁿ-châi; Hoe-kî-kok ná-kú ná chìn-pō͘, pí pa̍t kok iā khah kín. Sī chit jī-cha̍p- nî-lāi koh khah khoài thàn, siông- siông ū ki-hōe thang chhut-pún tek- châi, ū-sî sió-pún to-lī. Phì-jū hit kok ê siâⁿ nā ū chi̍t-bān teng ê gia̍h chiông- tiong ū chē-chē tōa châi-chú, ū-ê hoat kàu ū chiâⁿ pah-bān gîn. In-ūi Hoe-kî- kok ê sai-pêng chiah-ê siâⁿ khoài-khí, bô lōa kú, chiū ū chhù-the̍h chhân-hn̂g, thang chhut cho͘-gia̍p sǹg-bē-liáu. Tī這幾10年ê中間, 論天下ê國興旺, káⁿ是花旗國 第一快; 不論是人額抑是錢財,花旗國那久那進步,比別國也較緊。是這20 年來koh 較快趁,常常有機會thang出本得財,有時小本多利。譬如hit國ê 城若有一萬町 ê 額從中有濟濟大財主,有ê發到有成百萬銀, In有花旗國 ê西爿chiah ê城快起,無外久,就有厝體田園,thang出租業算bē了。
Taⁿ lūn Chú ê kang, ū lâng hoaⁿ-hí hē tāng-pún; nā thiaⁿ-kìⁿ hok-im heng-ōng ê siau-sit, chiū it-ti̍t chhin-chhiūⁿ thiaⁿ-- kìⁿ thàn-chîⁿ ê hâng-chêng. Phì-jū sì- chap-nî chêng tī Liû-iok-siâⁿ ū chi̍t-ê sìn Chú ê lâng chhut chi̍t chheng gîn kià-kàu Í-lī-nôaⁿ séⁿ, thang tī-hia siat Chú-ji̍t- o̍h lâi kà gín-ná; tī hit séⁿ-lāi khí chē-chē keng. Ū chi̍t ji̍t kà-o̍h ê sin-seⁿ chhōa chi̍t-ê sè-hàn ê chá-bó͘-gín-ná ji̍p o̍h; khòaⁿ hit-ê chá-bó͘-gín-ná bô sím-mi̍h chhang-miâ; chóng-sī bô laō-kú hit-ê gín-ná chhōa i-ê lāu-pē lâi thiaⁿ tō-lí, thiaⁿ-liáu put-chí ji̍p-sim, i-ê lāu-pē jīn- chōe lâi sìn Kiù-chú. Āu-lâi in lāu-pē pún-sin chò sin-seⁿ, tī Chú-ji̍t-o̍h lâi kà. I put-chí chhut-la̍t, tī Í-lī-nôaⁿ Mî-su-lī hit-nn̄g séⁿ ê tiong-kan, lâi siat o̍h khí lōa-chē keng, ín-chhōa gín-ná chhit-bān- ê lâi tit-tio̍h chin-lí ê kà-sī; chiah-ê gín- ná ê sī-tōa-lâng lóng-sī m̄-bat-sū-ê. Hit Liû-iok siâⁿ ê lâng ê chi̍t chheng gîn, kám-m̄-sī hó-thàn mah? 今論主ê工,有人歡喜下重本;若聽見福音興旺 ê消息,就一直親像聽見趁錢ê行情。譬如是 10年前tī紐約城有1個信主ê人出1千銀寄到伊利諾城,thang tī hia設主日學來教囡仔;tī hit省內起濟濟間。 有一日教學ê先生chhōa 1個細漢ê查某囡仔入學;看hia ê查某囡仔無甚mi̍h聰明;總是無外久hit個囡仔chhōa伊ê老父來聽道理,聽了不只入心, 伊ê老父認罪來信救主。 後來in老父本身做先生,tī主日學來教。伊不只出力,tī伊利諾密蘇里hit兩省ê中間來設學起偌濟間,in chhōa囡仔7萬個來得著真理ê教示; chiah ê囡仔ê序大人攏是m̄ bat事ê。 hit 紐約城ê人ê 1千銀,kám m̄是好趁mah?
Iū-koh kúi-nā nî chêng,chi̍t lâng chhiáⁿ Sin-seⁿ, iā kā i chhut só͘-hùi, kah i khì kàu Ai-o-a séⁿ lâi siat Chú- ji̍t-o̍h. Hit-ê sin-seⁿ siat-o̍h khí nn̄g- pah-gōa keng. Ū chi̍t-nî tī bô-sím-mi̍h iàu-kín tō-lí ê chng lâi khí chi̍t keng o̍h, chhiáⁿ ko͘-niûⁿ chò sin-seⁿ. Hit só͘-chāi oàn-hīn tō-lí ê lâng pún-jiân m̄ chún sin-seⁿ tiàm-hia, teh-beh kóaⁿ i; āu-lâi in-ūi bô lōa-chē gín-ná, in phah-sǹg siat bē lo̍h, chiū pàng-leng--khì. Chóng-sī bô lōa-kú tī hit chng-n̍i̍h ū saⁿ- cha̍p-jī lâng hoán-hóe chōe, óa-khò Kiù- chú Iâ-so͘, lâi ji̍p sèng-hōe. Iū-koh tī hit o̍h--n̍i̍h thiaⁿ tō-lí ê lâng, ū-ê khì pa̍t-ūi siat-o̍h khí saⁿ-keng iā thoân tō-lí, hō͘ chē-chē tōa-lâng sìn, lâi kiàn-tì nn̄g-ê sin kàu-hōe. Koh hit chi̍t o̍h ê ha̍k-seng, chi̍t-ê siàu-liân lâng ka-tī sìn Chú, āu- lâi khì chē-chē só͘-chāi siat Chú-ji̍t-o̍h, khí pah-jī-keng. Tùi chit pah-jī keng o̍h chē-chē lâng, iā ū tōa-hàn iā ū sè-hàn, sìn Iâ-so͘ lâi kiàn-tì kàu-hōe la̍k-cha̍p-ūi; tī hiah-ê pài-tn̂g lóng-chóng ū la̍k pah lâng lâi jīn-chōe sìn Kiù-chú. Thiaⁿ chit-hō siau-sit, siáⁿ lâng m̄ kóng che sī chéng-pún hó-lī-lō͘ ê hoat-tō͘? Iū-koh幾nā年前,1人請先生,也kā伊出所費,教伊去到愛荷華城來設主日學。 Hit ê先生設學起200外間。有一年tī無甚mi̍h 要緊道理ê庄內起一間學,請姑娘做先生。Hit所在怨恨道理ê人本然m̄ 準先生tiàm-hia,teh-beh趕伊;後來因為無外濟囡仔in扑算設bē落,就放冷去。總是無外久tī hit庄裡有32 人反悔罪,倚靠救主耶穌,來入聖會。Iū-koh tī hit 學裡聽道理ê人,有ê去別位設學起3間亦傳道理,ho͘ 濟濟大人信,來建置2個新教會。Koh hit 一學ê學生,一個少年人家己信主,後來去濟濟所在設主日學,起百二間。對這百二間學濟濟人,亦有大漢亦有細漢,信耶穌來建置教會60位;tī hiah ê拜堂攏總有600 人來認罪信救主。聽這號消息,啥人m̄講這是整本好利路 ê法度?
Lán tiong-kan ū sím-mi̍h lâng beh khì o̍h án-ni lâi kiâⁿ? 咱中間有甚mi̍h人beh 去學án-ni來行?
(Tâi-oân Hú-siâⁿ Kàu-hōe-pò,tē 8 tiuⁿ, 1886 nî 3 ge̍h) (台灣府城教會報第8張,1886年3月)
回上一頁    清國時代,   1886年,   散文