Jîn-lūi ê chai-lān iáu bē soah mah
|
人類ê災難iáu未煞--mah? |
| Phian-chip-sek |
編輯室 |
|
Jîn-lūi tùi ū le̍k-sú í-lâi, sím-mi̍h lâng sī tē-it pù-ū? Mûi-iû tāi-ông mah? Khì-iû tāi-ông mah? A-lí-hàn ông-chú mah? Á-sī hit ê siat-li̍p hô-pêng chióng-kim ê Lo̍k-pôe-ní mah? M̄-sī, lóng-chóng m̄-sī! Nā-sī án-ni sī chī-chūi? Chiū-sī Iû-thài lâng ê ông Tāi-pi̍t!
|
人類tùi有歷史以來，甚mi̍h人是第一富有？煤油大王mah？汽油大王mah？阿里罕王子mah？或是hit個設立和平獎金ê樂裴爾mah？M̄是，攏總m̄是！若是án-ni是是誰？就是猶太人ê王大衛！ |
|
Tàu-tí Tāi-pi̍t ông ê châi-sán ū lōa-chē? Ū n̂g-kim cha̍p-bān saⁿ-chheng liân te̍k, pe̍h-kim chi̍t-pah-bān chhit-chheng liân-te̍k (1 liân-te̍k sī 81 kin 10 niú) Chóng-kè sī hiān-chāi Bí-kim 1,200 ek kho͘.
|
到底大衛王ê財產有偌濟？有黃金十萬三千liân-te̍k,白金一百萬七千liân-te̍k(1 liân-te̍k是81斤10兩）總價是現在美金1,200億箍。 |
|
Tāi-pi̍t ông ê kiáⁿ Só-lô-bûn ông sêng-chiap chiah tōa ê châi-pó, koh sòa-chiap lāu-pē ê chì-goān, tī Iâ-lō͘-sat-léng ū kiàn-li̍p sèng-tiān. Koan-hē sèng-tiān cháiⁿ-iūⁿ ê hô-hôa tông-hông, chí ēng kúi-kù ōe chiū thang sióng-siōng. Tē-pîⁿ 2 bān bó͘, chhù-téng, mn̂g thang, ti̍t-kàu chè-tôaⁿ ēng-khū, lóng-chóng sī tāi-lí chio̍h ji̍p chu-pó kap n̂g-kim, kiàn-tio̍k hùi 60 ek Bí-kim, tōng ēng kang-lâng 18 bān lâng, kan-ta tok-kang pō͘-hūn, chiū ēng 3800 lâng.
|
大衛王ê子所羅門王承接chiah大ê財寶，koh續接老父ê志願，tī耶路撒冷有建立聖殿。關係聖殿怎樣ê豪華堂皇，只用幾句話就thang想像。地坪2萬畝、厝頂、門窗，直到祭壇用具，攏總是大理石入珠寶kap黃金，建築費60億美金，動用工人18萬人，kan-ta督工部份，就用3800人。 |
|
Sèng-tiān tī Chú-chêng 967 nî oân-sêng, chiâⁿ-chòe só͘ ū Iû-thài lâng sìn-gióng ê tiong-sim bo̍k-phiau. Lāi-bīn ū khí-chō chì-sèng-só͘, sī chòe sîn-sèng ê tiûⁿ-só͘, tī hia ū an-tì Iok-kūi, lāi-bīn ū khǹg Mô͘-se só͘ tiau-khek 10 tiâu-kài ê chio̍h-pán.
|
聖殿tī主前967年完成，成做所有猶太人信仰ê中心目標。內面有起造至聖所，是最神聖ê場所，tī hia有安置約櫃，內面有囥摩西所雕刻10條戒ê石板。 |
|
Āu-lâi Pa-pí-lûn ông chhim-ji̍p Iâ-lō͘-sat-léng ê sî, sèng-tiān-lāi chì-sèng-só͘ ê Iok-kūi tī Pa-pí-lûn kun-tūi iáu bē kàu ê í-chêng chiū sit-chong lah. Ū lâng kóng sī hō͘ teh pó-hō͘ iok-kūi ê 2 ê thiⁿ-sài tòa cháu, chóng-sī it-poaⁿ lâng lóng lia̍h chòe sī sèng-tiān---lāi ê chè-si, in-ūi khòaⁿ-kìⁿ sè-bīn gûi-hiám kóaⁿ-kín chiong Iok-kūi chhàng-ji̍p-khì chì-sèng-so͘t2?-hā pì-bi̍t tōng-lāi.
|
後來巴比倫王侵入耶路撒冷ê時，聖殿內至聖所ê約櫃tī巴比倫軍隊iáu bē到ê以前就失蹤--lah。有人講是hō͘ teh保護約櫃ê 2個天使帶走，總是一般人攏掠做是聖殿內ê祭司，因為看見勢面危險趕緊將約櫃藏入去至聖所地下秘密洞內。 |
|
Ū chi̍t-hāng chin khó-lêng ê sū, chiū-sī Só-lô-bûn ông ê châi-pó tī 2500 nî lâi, it-ti̍t kap Iok-kūi bâi-chòng tī hit ê pì-bi̍t tōng-lāi. Siat-sú ū chi̍t-jitchi̍t ê tōng-lāi ê lōe-iông nā kìⁿ-tio̍h chheng-thian pe̍h-ji̍t, án-ni Siōng-tè ê Iok-kūi hoat-hiān, Mô͘-se ê 10 tiâu-kài chhut-hiān, Só-lô-bûn ông ê pó-chông hián-hiān, che thang kóng sī jîn-lūi iú-sú í-lâi ê tōa sin-bûn! Chóng-sī khó-sioh it-chhè ê mō͘-hiám-ka ēng chīn chhiú-tōaⁿ, kàu taⁿ iā lóng bô hoat thang tit-tio̍h chhōe tio̍h chia ê kó͘-chek.
|
有一項真可能ê事，就是所羅門王ê財寶tī 2500年來，一直kap約櫃埋葬tī hit個秘密洞內。設使有一日這個洞內ê內容若見著青天白日，án-ni上帝ê約櫃發現，摩西ê 10條戒出現，所羅門王ê寶藏顯現，che thang講是人類有史以來ê大新聞！總是可惜一切ê冒險家用盡手段，到今也攏無法thang得著chhōe著chia ê古蹟。 |
|
Sím-mi̍h goân-in chiah-n̍i̍h chhong-bêng ê jîn-lūi, kúi chheng-nî lâi bô hoat-tō͘ thang hoat-hiān tio̍h chit ê pì-bi̍t ni̍h?
|
甚mi̍h原因chiah-n̍i̍h聰明ê人類，幾千年來無法度thang發現著這個秘密ni̍h？ |
|
Tī Ai-ki̍p kìⁿ-nā sī Kim-jī-thah ê só͘-chāi lóng tek-khak ū chō chi̍t-chiah “lâng-thâu sai-sin” ê siōng, chit-khoán ê kiàn-tio̍k-bu̍t, tī tng-sî ū hoa-hùi siong-tong tōa ê châi-le̍k kap jîn-le̍k. Hiān-chāi iáu-kú lâu--teh, chi̍t-chō tē-it tōa ê, chiū-sī Ai-ki̍p tē 4 ông-tiâu ê sî khí-chō ê. Tng-sî ū tōng-oân 10 bān lâng kong-chok 40 nî chiah oân-sêng chit ê kiàn-tio̍k-bu̍t. Ūi-tio̍h beh ūn-poaⁿ chio̍h-thâu kap khui-lō͘ 10nî, ku̍t tē-hā-sek 10 nî, chiong chio̍h-thâu thia̍p kàu téng-tiám tio̍h 20 nî. Chiàu chit ê phiau-chún, lanchí? thang sióng-siōng Kim-jī-thah kap lâng-thâu sai-sin sī lōa-n̍i̍h tōa!
|
Tī埃及見若是金字塔ê所在攏的確有造一隻「人頭獅身」ê像，這款ê建築物，tī當時有花費相當大ê財力kap人力。現在iáu-kú留--teh，一座第一大--ê,就是埃及第4王朝ê時起造--ê。當時有動員10萬人工作40年才完成這個建築物。為著beh運搬石頭kap開路10年，掘地下室10年，將石頭疊到頂點著20年。照這個標準，咱就thang想像金字塔kap人頭獅身是偌n̍i̍h大！ |
|
Chóng-sī chit khoán ê kiàn-tio̍k-bu̍t m̄ sī kan-ta Ai-ki̍p chiah ū, chiū-sī tī kó͘ Hi-lia̍p chiū thoân-pò chin khoah, thang chèng bêng tng-sî ê bûn-hòa chiū ū hō͘-siōng ê kau-liû.
|
總是這款ê建築物m̄是kan-ta埃及才有，就是tī古希臘就傳播真闊，thang証明當時ê文化就有互相ê交流。 |
|
1920 nî gián-kiù Kim-jī-thah ê So͘-kek-lân hông-ka khó-kó͘ ha̍k-chiá Su-bi̍t-su, ū hoat-piáu chi̍t-hāng lâng só͘ bē-bat chù-ì ê sū, chiū-sī, Kim-jī-thah lāi-pō͘ ê tē-hā-lō͘ ê piah-n̍i̍h ū khek tiōng-iàu ê ū-giân“1930 nî kàu 1940 nî sè-kài teh beh ū tōa chai-lān -----” Kiat-kó 1940 nî sè-kài tē-jī chhù sè-kài tāi-chiàn po̍k-hoat.
|
1920年研究金字塔ê蘇格蘭皇家考古學者斯密斯，有發表一項人所bē-bat注意ê事，就是，金字塔內部ê地下路ê壁--n̍i̍h有刻重要ê預言「1930年到1940年世界teh beh有大災難-----」結果1940年世界第二次世界大戰爆發。 |
|
1953 nî 8 ge̍h Hoat-kok ê ha̍k-chiá Kiâu-tī A-liâm phok-sū tī teh ku̍t lâng-thâu sai-sin ê sî, ū hoat-kiàn tio̍h lāi-pō͘ iā ū khek ū-giân “1930 nî kàu 1940 nî, sè-kài teh beh ū liân-sio̍k 10 nî kú ê tōa chai-lān í-āu Ai-ki̍p ōe bián-tû sok-pa̍k, chóng-sī chí ū ōe thang pêng-an keng-kè 10 nî kú nā-tiāⁿ, āu-lâi ōe koh tú-tio̍h chi̍t-pái chhi-chhám ê chai-hō, chit ê chai-hō sī in-ūi chi̍t-tiâu sè-tiâu hô, tang-pak īⁿ-kàu ê sió kok kong ji̍p pún thó͘ -------” Tī tng-sî jîn-lūi tùi chit ê ū-giân bē bat chù-ì, chit ê ū-giân só͘ chíe ji̍t-kî sī 1956 nî, chai-hō sī So͘-ui-su ūn-hô, kong ji̍p pún-thó͘--ê sī chí kap Hôe-kàu kok ê Ai-ki̍p bōe-thang saⁿ iông-la̍p ê Í-sek-lia̍t.
|
1953年8月法國ê學者喬治亞廉博士tī teh掘人頭獅身ê時，有發見著內部也有刻預言「1930年到1940年，世界teh beh有連續10年久ê大災難以後埃及會免除束縛，總是只有會thang平安經過10年久nā-tiāⁿ，後來會koh tú著一擺淒慘ê災禍，這個災禍是因為一條細條河，東北異教ê小國攻入本土-------」 Tī當時人類tùi這個預言bē bat注意，這個預言所指ê日期是1956年，災禍是蘇威士運河，攻入本土--ê是指kap回教國ê埃及bōe-thang相容納ê以色列。 |
|
It-chhè lóng piàn chiâⁿ chòe sū-si̍t --- Ai-ki̍p hôe-ho̍k to̍k-li̍p, tiàm tī So͘-ui-su ūn-hô khu-he̍k ê Eng-kin, tī 1956 nî 6 ge̍h choân-pō͘ thiat-thè, chi̍t ge̍h ji̍t āu La̍p-sek soan-pò͘ ūn-hô siu-kui kok-iú, 10 ge̍h 29 ji̍t Í-sek-lia̍t chìn-kong Ai-ki̍p, koh in-ūi “sè-tiâu hô” chit ê chai-hō ê goân-in, Eng Hoat liân-kun tī kúi ji̍t āu tùi Ai-ki̍p chhái-chhú kun-sū hêng-tōng.
|
一切攏變成做事實---埃及回復獨立，tiàm tī蘇威士運河區域ê英軍，tī 1956年6月全部撤退，一月日後納瑟宣布運河收歸國有，10月29日以色列進攻埃及，koh因為「細條河」這個災禍ê原因，英法聯軍tī幾日後tùi埃及採取軍事行動。 |
|
Chit khoán chún-khak ê ū-giân, kî-tiong ò-pì ê só͘ chāi si̍t-chāi hō͘ lâng oh-tit liáu-kái. Sèng-keng kóng “Jîn-lūi tiām-tiām ê sî, chio̍h-thâu beh kóng-ōe.” Chhiáⁿ khòaⁿ tùi “Lâng-thâu sai-sin ê chio̍h-thâu koài-bu̍t ū chhut-siaⁿ teh kóng ū-giân!”
|
這款準確ê預言，其中奧祕ê所在實在hō͘人oh-tit了解。聖經講「人類恬恬ê時，石頭beh講話。」請看tùi「人頭獅身ê石頭怪物有出聲teh講預言！」 |
|
Kiâu-tī A-liâm phok-sū tī 1936 nî só͘ chhut-pán ê sè-kài-sú tiong ū ē-bīn chi̍t-tōaⁿ kî-koài ê kì-chài:“Tī lâng-thâu sai-sin ê thâu-chêng kha, góa hoat-kiàn chi̍t-tōaⁿ kó͘-tāi ê bûn-jī, gián-kiù ê kiat-kó hoat-hiān tio̍h sī ū-giân ---“ 1960 nî chêng āu, Ai-ki̍p koan-hē sè-kài miā-ūn ê “sè-tiâu hô” teh beh po̍k-chà, ōe hō͘ Ai-ki̍p hām ji̍p tī khong-chiân kiaⁿ-hiâⁿ ê sî-tāi tiong -----. 1970 nî, jîn-lūi teh beh tú-tio̍h khong-chiân ê tōa chai-lān ------. 1980 nî Ai-ki̍p kap tang-pak īⁿ-kàu sió kok beh piàn-chiâⁿ chòe hiaⁿ-tī ê kok-ka, kiōng-tông ha̍p-chok ku̍t Só-lô-bûn ông ê pó-chông lâi kiàn-siat sin ê Iû-thài kàu kap Hôe-kàu liân-ha̍p kok -----” Chia ê ná chhin-chhiūⁿ sī bû-khe-chi-tâm, bē-thang hō͘ lâng sìn-tit. Chóng-sī siat-sú lán nā chham-khó koan-hē ai-ki̍p hôe-ho̍k to̍k-li̍p ūn-tōng í-ki̍p Í-sek-liat kap Eng Hoat chìn-kong Ai-ki̍p ê ū-giân, ū án-ni ê èng-giām, chiū kî-thaⁿ ê ū-giân iā ū khó-lêng si̍t-hiān.
|
喬治亞廉博士tī 1936年所出版ê世界史中有下面一段奇怪ê記載：「Tī人頭獅身ê頭前腳，我發見一段古代ê文字，研究ê結果發現著是預言---1960年前後，埃及關係世界命運ê「細條河」teh beh爆炸，會hō͘埃及陷入tī空前驚惶ê時代中-----。1970年，人類teh beh tú著空前ê大災難------。1980年埃及kap東北異教小國beh變誠做兄弟ê國家，共同合作掘所羅門王ê寶藏來建設新ê猶太教kap回教聯合國-----」 Chia ê那親像是無稽之談，bē-thang hō͘人信--tit。總是設使咱若參考關係埃及回復獨立運動以及以色列kap英法進攻埃及ê預言，有án-ni ê應驗，就其他ê預言也有可能實現。 |
|
1954 nî Bí-kok Ka-lí-hok-lī-a Tāi-ha̍k khó-kó͘-ha̍k chú-jīm kàu-siū Ài-tek-hôa. Pin-sun, khì Iâ-lō͘-sat-léng ūi-tio̍h Só-lô-bûn ông sèng-tiān ê khó-chek gián-kiù í-āu, ū hoat-hiān tio̍h kúi-kù ū-giân, kî-tiong ū chi̍t-kù kéng-jiân kap Ai-ki̍p ê lâng-thâu sai-sin thâu-chêng kha só͘ khek ê jī saⁿ tùi-èng, chiū-sī “1970 nî jîn-lūi khong-chiân ê tōa chai-lān teh beh kàng-lîm ----- 1980 nî kàu 1990 nî Iû-thài-lâng kap sai-lâm pêng ê īⁿ-kàu kó͘-kok liân-ha̍p, ha̍p-chok ku̍t Só-lô bûn ông ê pó-chông, kiàn-siat sin kok-ka ------” Kóng kàu Ai-ki̍p kap Í-sek-lia̍t tī 30 nî āu ōe piàn chiâⁿ chòe liân-pang kok-ka, sui-jiân ū tām-po̍h bē-thang siong-sìn, chóng-sī lán só͘ tiōng-sī ê sī 1970 nî sī m̄-sī jîn-lūi bē-thang tô-thoat chòe-āu chit ê ke̍k-tōa ê chai-lān?
|
1954年美國加利福尼亞大學考古學主任教授愛德華賓孫，去耶路撒冷為著所羅門王聖殿ê考蹟研究以後，有發現著幾句預言，其中有一句竟然kap埃及ê人頭獅身頭前腳所刻ê字相對應，就是「1970年人類空前ê大災難teh beh降臨-----1980年到1990年猶太人kap西南爿ê異教古國聯合，合作掘所羅門王ê寶藏，建設新國家------」講到埃及kap以色列tī 30年後會變成做聯邦國家，雖然有淡薄bē-thang相信，總是咱所重視ê是1970年是m̄是人類bē-thang逃脫最後這個極大ê災難？ |
|
(Chiàu Sèng-keng ê ū-giân, tī Ki-tok kàng-lîm tōe-chiūⁿ í-chêng beh ū ke̍k-tōa ê chai-lān, Ki-tok kàng-lîm tōe-chiūⁿ í-āu sè-kài beh ū chin hô-pêng, bîn-cho̍k kap bîn-cho̍k hô-hó ha̍p-chok.)
|
（照聖經ê預言，tī基督降臨地上以前beh有極大ê災難，基督降臨地上以後世界beh有真和平，民族kap民族和好合作。） |
|
(Oa̍h-miā ê Bí-niû tē 53 kî,1959 nî 10 ge̍h)
|
(活命ê米糧第53期，1959年10月) |
