Kim-kù Ê Kò͘-sū_02
|
金句Ê故事_02 |
|---|---|
| Bô chù-bêng | 無註明 |
|
Kim-kù Ê Kò͘-sū 1959 2 Ge̍h |
金句Ê故事 1959 2月 |
|
2 Ge̍h 1 Ji̍t
|
2月1日 |
|
Kim-kù: Lín tio̍h chiong Kai-sat ê mi̍h la̍p hō͘ Kai-sat, chiong Siōng-tè ê mi̍h la̍p hō͘ Siōng-tè. (Lō͘-ka 20:25).
|
金句：Lín tio̍h將Kai-sat ê mi̍h納hō͘ Kai-sat，將上帝ê mi̍h納hō͘上帝。(Lō͘-ka 20：25)。 |
|
Chêng ji̍t Ngá-hūi kap Êng-chong in pa-pa chhōa in 2 hiaⁿ-moāi-á khì Ji̍t-hoa̍t-thâm thit-thô. In chē chhia se̍h chin tn̂g ê soaⁿ-lō͘ chiah kàu-ūi. Lō͘-tiong Êng-chong mn̄g pa-pa kóng, “Chiah-ni̍h hn̄g ê lō͘ sī sáⁿ lâng lâi chō ê.” Pa-pa kóng che sī lán kok ê chèng-hú ēng chîⁿ chhiàⁿ kang-lâng chō-ê. Ji̍t-hoa̍t-thâm chin tōa, ná chhin-chhiūⁿ hái, pa-pa kā in kóng, “Chiah ê chúi sī beh chò hoat-tiān ê lō͘-ēng. Hit pêng ū chi̍t ê hoat-tiān-só͘, lán chhù-ni̍h ê tiān-hóe, thiān-hong, siu-im-ki, ut-táu ê tiān lóng sī tùi chia sàng chhut-khì ê.” In lo̍h-khì chē chûn-á, Ngá-hūi thiaⁿ pa-pa án-ni kóng ná siūⁿ, tàu-tí sī sáⁿ-lâng hiah-n̍i̍h hó-sim chò chit ê hoat-tiān-só͘, ún-tàng tio̍h khai chin chōe chîⁿ, chiū mn̄g in pa-pa, in pa-pa kóng, “Che sī kok-ka ê chîⁿ lâi khí ê.”
|
前日Ngá-hūi kap Êng-chong in爸爸chhōa in 2兄妹á去日月潭thit-thô。In坐車se̍h真長ê山路chiah到位。路中Êng-chong問爸爸講，「Chiah-ni̍h遠ê路是sáⁿ人來造ê。」爸爸講che是lán國ê政府用錢chhiàⁿ工人造ê。日月潭真大，ná親像海，爸爸kā in講，「Chiah ê水是beh做發電ê路用。Hit pêng有chi̍t ê發電所，lán厝ni̍h ê電火、電風、收音機、ut斗ê電攏是對chia送出去ê。」In落去坐船á，Ngá-hūi聽爸爸án-ni講ná想，到底是sáⁿ人hiah-n̍i̍h好心做chit ê發電所，穩當tio̍h開真chōe錢，就問in爸爸，in爸爸講，「Che是國家ê錢來起ê。」 |
|
Chûn-á ti̍t-ti̍t chìn-chêng, āu-bīn ê chhù ná sè-keng khì. In pa-pa koh kóng, “Lán tit-tio̍h kok-ka ê pó-hō͘ kap un-hūi chin chōe, m̄-nā chō tōa-lō͘, m̄-nā chō hoat-tiān-só͘, iā ū khí ha̍k-hāu, iā ū kun-tūi pó-hō͘ lán bián-siū gōa-kok ê chhim-hāi, iā ū kéng-chhat lia̍h pháiⁿ lâng, hō͘ hó-lâng an-sim kòe-ji̍t.” Êng-chong kóng, “Pa-pa! Kok-ka thài ū hiah-n̍i̍h chōe chîⁿ.” Pa-pa ìn kóng, “Chiū-sī chòe peh-sìⁿ ê lâng ta̍k ê la̍p-sòe, kok-ka chiah ū chîⁿ, só͘-í lán la̍p-sòe iā sī teh hō͘ lán hióng-siū khah hó ê seng-oa̍h.
|
船á直直進前，後面ê厝ná細間去。In爸爸koh講，「Lán得tio̍h國家ê保護kap恩惠真chōe，m̄-nā造大路，m̄-nā造發電所，也有起學校，也有軍隊保護lán免受外國ê侵害，也有警察掠pháiⁿ人，hō͘好人安心過日。」Êng-chong講，「爸爸！國家thài有hiah-n̍i̍h chōe錢。」爸爸應講，「就是做百姓ê人ta̍k ê納稅，國家chiah有錢，所以lán納稅也是teh hō͘ lán享受khah好ê生活。 |
|
I chē ê chûn-á sái kàu Ji̍t-hoa̍t-thâm ê tiong-ng, Ngá-hūi oa̍t-thâu sì-kho͘-liàn-tńg khòaⁿ, in-ūi kéng-tì chin súi hui-siông kám-kek, kā in ko-ko kóng, “Ko-ko lí khòaⁿ! Hiah ê soaⁿ, hiah-ê chúi-iáⁿ! Si̍t-chāi chin súi.” Êng-chong siūⁿ khí Sèng-si tē 3 siú “Chhiū-ba̍k chhân-hn̂g chúi-chôaⁿ, kiong-chhong tōa-hái koân-soaⁿ......” Chiū tī chhùi-lāi sè-siaⁿ gîm, (chhiáⁿ kàu-oân gîm tē-it chat iā hó), Ngá-hūi iā tòe i gîm, gîm liáu in pa-pa chhiò-chhiò kā in kóng, “Lín lóng chai, chiah ê soaⁿ, chiah ê thian-jiân sī Siōng-tè chhòng-chō ê, Siōng-tè m̄-nā chhòng-chō chiah ê iā hō͘ lán oa̍h-miā, hō͘ bān-mi̍h sêng-tióng, lán chiah ū thang chia̍h, ū thang chhēng, ū thang tòa, Siōng-tè ê un pí kok-ka khah tōa. Lán tùi kok-ka la̍p-sòe, iā tio̍h koh-khah hoaⁿ-hí hiàn-kim hō͘ Siōng-tè.”
|
I坐ê船á駛到日月潭ê中央，Ngá-hūi越頭sì-kho͘-liàn-tńg看，因為景致真súi非常感激，kā in哥哥講，「哥哥你看！Hiah ê山、hiah-ê水影！實在真súi。」Êng-chong想起聖詩第3首「樹木田園水泉，kiong-chhong大海koân山……」就tī嘴內細聲吟，(請教員吟第一節也好)，Ngá-hūi也tòe i吟，吟了in爸爸笑笑kā in講，「Lín攏知，chiah ê山、chiah ê天然是上帝創造ê，上帝m̄-nā創造chiah ê也hō͘ lán活命，hō͘萬mi̍h成長，lán chiah有thang食、有thang穿、有thang tòa，上帝ê恩比國家khah大。Lán對國家納稅，也tio̍h koh-khah歡喜獻金hō͘上帝。」 |
|
Êng-chong siūⁿ kóng, Siōng-tè ài lán ê hiàn-kim m̄-chai beh chò sím-mi̍h lō͘-ēng? Pa-pa chiah kóng, “Siōng-tè ài lán sè-kan lâng lóng tit-tio̍h kiù, ū kiò chin chōe lâng choan-sim thoân tō-lí, ìn Sèng-keng, siá tō-lí ê chheh, khí lé-pài-tn̂g, iáu ū chin chōe lâng, chiah ê lóng tio̍h ēng chin chōe chîⁿ, lán tio̍h hōng-hiàn thang hō͘ Siōng-tè só͘ ài chò ê kang ū chîⁿ thang chò.” Êng-chong kap Ngá-hūi thiaⁿ tio̍h án-ni chiū koat-sim chit lé-pài beh khiām khah chē chîⁿ thang tī Chú-ji̍t-o̍h ê sî hiàn-kim.
|
Êng-chong想講，上帝ài lán ê獻金m̄知beh做sím-mi̍h路用？爸爸chiah講，「上帝愛lán世間人攏得tio̍h救，有叫真chōe人專心傳道理、印聖經、寫道理ê冊、起禮拜堂，iáu有真chōe人，chiah ê攏tio̍h用真chōe錢，lán tio̍h奉獻thang hō͘上帝所ài做ê工有錢thang做。」Êng-chong kap Ngá-hūi聽tio̍h án-ni就決心chit禮拜beh khiām khah chē錢thang tī主日學ê時獻金。 |
|
Ji̍t-thâu ê kng chiò lâi, liâng-hong bî-bî-á chhoe-lâi, in chē ê sè-chiah chûn bān-bān-á tī chúi téng teh sái, in ê sim móa-móa ê kám-siā. (T. T. T. siá)
|
日頭ê光照來，涼風微微á吹來，in坐ê細隻船慢慢á tī水頂teh駛，in ê心滿滿ê感謝。(T. T. T. 寫) |
|
2 Ge̍h 8 Ji̍t
|
2月8日 |
|
Kim-kù: I m̄ sī sí-lâng ê Siōng-tè, sī oa̍h-lâng ê Siōng-tè. (Lō͘-ka 20:38)
|
金句：I m̄是死人ê上帝，是活人ê上帝。(Lō͘-ka 20：38) |
|
Chha-put-to 100 nî-chêng, tī Au-lô-pa ê chi̍t-kok Ò-tāi-lī-a ê sū. Tī hit ê kok ū chi̍t ê hiuⁿ-siā kiò-chò He-lu-tō-ki-luh.
|
差不多100年前，tī Au-lô-pa ê chi̍t國Ò-tāi-lī-a ê事。Tī hit ê國有chi̍t ê鄉社叫做He-lu-tō-ki-luh。 |
|
Hit-sî tú-tú sī hit ê chhut-miâ ê Ná-pho-lûn Tāi-tè kap Ò-tāi-lī-a teh sio-chiàn ê sî, só͘-í Ná-pho-lûn kéng chit ê sió hiuⁿ-siā iā tio̍h chiàm khí-lâi chiah ōe ēng-tit, só͘-í bēng-lēng chi̍t ê tāi-chiòng chhōa 1 bān 8 chheng miâ ê tāi-kun kong lâi kàu chit ê hiuⁿ-siā.
|
Hit時tú-tú是hit ê出名ê Ná-pho-lûn Tāi-tè kap Ò-tāi-lī-a teh相戰ê時，所以Ná-pho-lûn kéng chit ê小鄉社也tio̍h占起來chiah ōe用得，所以命令chi̍t ê大將chhōa 1萬8千名ê大軍攻來到chit ê鄉社。 |
|
Hit sî tú-tú sī Koh-oa̍h-cheh ê chìn-chêng mê. Keh-chá-khí chit ê hiuⁿ-siā ê lâng ūi-tio̍h kóng kin-á-ji̍t sī Koh-oa̍h-cheh, só͘-í thàu-chá, chin hoaⁿ-hí khí-lâi, seng khòaⁿ tang-pêng ê soaⁿ. Ūi-tio̍h hō͘ ji̍t-thâu ê kng chiò tio̍h, ū kim-si̍h-si̍h, ōe siā lâng ê ba̍k-chiu ê mi̍h tī soaⁿ móa-móa sī. In tio̍h chi̍t-kiaⁿ, chim-chiok khòaⁿ, chiū-sī Ná-pho-lûn ê kun-tūi í-keng kong lâi kàu hia lah.
|
Hit時tú-tú是Koh活節ê進前暝。隔早起chit ê鄉社ê人為tio̍h講今á日是Koh活節，所以透早，真歡喜起來，先看東pêng ê山。為tio̍h hō͘日頭ê光照tio̍h，有金si̍h-si̍h、ōe射人ê目chiu ê mi̍h tī山滿滿是。In tio̍h chi̍t驚，斟酌看，就是Ná-pho-lûn ê軍隊已經攻來到hia lah。 |
|
Tāi-ke m̄-sī teh Koh-oa̍h-cheh ê hoaⁿ-hí lah, hiuⁿ-siā lóng tōa iô-choah, tōa iô-tāng, m̄-chai án-chóaⁿ khah hó. Hiuⁿ-siā ê gâu-lâng saⁿ-kap chham-siông kóng, Lán ê hiuⁿ-siā iā bô bú-khì, iā bô peng, bōe-thang chò sím-mi̍h, chí-ū tâu-hâng.
|
大家m̄是teh Koh活節ê歡喜lah，鄉社攏大搖choah、大搖動，m̄知án-chóaⁿ khah好。鄉社ê gâu人saⁿ-kap參詳講，Lán ê鄉社也無武器、也無兵，bōe-thang做sím-mi̍h，只有投降。 |
|
Tāi-ke siūⁿ beh koat-tēng ê sî, hit tiong-kan ū chi̍t ê bo̍k-su khiā khí-lâi kóng: “Chu-ūi, kin-á-ji̍t sī lán chi̍t-nî tiong tē-it hoaⁿ-hí ê Koh-oa̍h-cheh. Chit-khoán ê ji̍t m̄-thang siūⁿ chit-khoán siong-sim ê sū. Kin-á-ji̍t sī Kiù-chú koh-oa̍h ê ji̍t, lán tāi-ke tē-it tāi-seng tio̍h lâi pài-tn̂g lé-pài, o-ló kám-siā oa̍h-oa̍h ê Siōng-tè. Só͘-í lín tio̍h chiàu-siông kòng tōa-cheng, thang lóng lâi lé-pài. Oa̍h ê Siōng-tè beh chhin-chhiūⁿ kó͘-chá pó-hō͘ Mô͘-se, Tāi-pi̍t, Í-sài-á, tek-khak iā beh pó-hō͘ lán.”
|
大家想beh決定ê時，hit中間有chi̍t ê牧師khiā起來講：「諸位，今á日是lán chi̍t年中第一歡喜ê Koh活節。Chit款ê日m̄-thang想chit款傷心ê事。今á日是救主koh活ê日，lán大家第一代先tio̍h來拜堂禮拜，o-ló感謝活活ê上帝。所以lín tio̍h照常kòng大鐘，thang攏來禮拜。活ê上帝beh親像古早保護摩西、Tāi-pi̍t、Í-sài-á，的確也beh保護lán。」 |
|
Thiaⁿ che, ū chi̍t-pòaⁿ-ê-á bô sìn-gióng ê lâng thí-chhiò i, chóng-sī chòe-āu tāi-ke koat-tēng chiàu -bo̍k-su só͘ kóng ê lâi chò. Khong, khong, khong......... hiuⁿ-siā ê lâng tī chit-khoán chin gûi-hiám ê sî ê Koh-oa̍h-cheh lé-pài, só͘-í tùi tang, tùi sai, tùi hia tùi chia, tōa-lâng, gín-ná lóng chū-chi̍p lâi pài-tn̂g. Tùi soaⁿ-téng khòaⁿ chit ê khoán-sit ê tāi-chiòng siūⁿ-lâi siūⁿ-khì, siūⁿ kóng, “Che tek-khak ū tōa ê kè-ōe, tī chit ê hiuⁿ-siā m̄-chai ū bi̍h lōa-chē ê peng iā bô tek-khak; nā bô in thài ōe hiah-ni̍h pêng-an, chiàu pêng-siông teh lé-pài.” Só͘-í kóaⁿ-kín hoat bēng-lēng lī-khui chit ê hiuⁿ-siā. Khong, khong, khong. Pài-tn̂g ê tōa-cheng tân liáu ê sî, soaⁿ-téng í-keng bô khòaⁿ-kìⁿ chhiuⁿ, kiàm, lâng ê iáⁿ.
|
聽che，有chi̍t半ê-á無信仰ê人恥笑i，總是最後大家決定照牧師所講ê來做。Khong、khong、khong…………鄉社ê人tī chit款真危險ê時ê Koh活節禮拜，所以對東、對西、對hia對chia，大人、gín-ná攏聚集來拜堂。對山頂看chit ê款式ê大將想來想去，想講，「Che的確有大ê計畫，tī chit ê鄉社m̄知有bi̍h lōa-chē ê兵也無的確；若無in thài ōe hiah-ni̍h平安，照平常teh禮拜。」所以趕緊發命令離開chit ê鄉社。Khong、khong、khong。拜堂ê大鐘tân了ê時，山頂已經無看見槍、劍、人ê影。 |
|
Sió-pêng-iú, lán ê Siōng-tè sī oa̍h ê Siōng-tè, lán bô-lūn pi-siong ê sî, thang kiaⁿ ê sî, tio̍h ōe kì-tit, oa̍h ê Siōng-tè teh pó-hō͘ lán, chiàu-kò͘ lán, put-sî kap lán saⁿ-kap tī-teh.
|
小朋友，lán ê上帝是活ê上帝，lán無論悲傷ê時、thang驚ê時，tio̍h ōe記得，活ê上帝teh保護lán、照顧lán，不時kap lán saⁿ-kap tī-teh。 |
|
Saⁿ-kap liām kin-á-ji̍t ê kim-kù. (T. H. C. siá)
|
Saⁿ-kap唸今á日ê金句。(T. H. C. 寫) |
|
2 Ge̍h 15 Ji̍t
|
2月15日 |
|
Kim-kù: Lí tio̍h chīn sim, chīn sèng, chīn ì, chīn la̍t thiàⁿ Chú, chiū-sī lí ê Siōng-tè......koh tio̍h thiàⁿ lí ê chhù-piⁿ chhin-chhiūⁿ ka-kī. (Má-khó 12:29,30)
|
金句：你tio̍h盡心、盡性、盡意、盡力疼主，就是你ê上帝……koh tio̍h疼你ê厝邊親像家己。(馬可12：29，30) |
|
Tng lán ê Chú Iâ-so͘ iáu tī sè-kan ê sî ū keng-ha̍k-sū, kap kà lu̍t-hoat ê sian-siⁿ, in chin ài chhōe phāng lâi ki-chhì, á-sī po̍k-tó Iâ-so͘. Ū chi̍t-pái in ēng sím-mi̍h sī chòe tōa ê kài lâi mn̄g Iâ-so͘. In ê ì-sù sī ài hián-bêng in ka-kī ê hó, kî-si̍t in ê só͘-chòe chē-chē sī chin sio̍k-hòa, chin ké-hó.
|
Tng lán ê主耶穌iáu tī世間ê時有經學士，kap教律法ê先生，in真愛chhōe縫來ki-chhì，á是駁倒耶穌。有chi̍t-pái in用sím-mi̍h是做大ê誡來問耶穌。In ê意思是ài顯明in家己ê好，其實in ê所做chē-chē是真俗化、真假好。 |
|
Góa bat ū chi̍t-pái tha̍k chi̍t ê kò͘-sū, kak-tit chin ū hâm-khǹg kà-sī, góa tī chia lâi kóng hō͘ lín thiaⁿ. Ū chi̍t ê tōa seng-lí lâng, i sī tiàm tī Hi-lia̍p ê Ko-lîm-to, Ko-lîm-to sī tong-sî ê tōa káng-kháu. I pêng-sî sī chòe bō͘-e̍k-siong, chiū-sī tùi pún-kok the̍h chē-chē bu̍t-sán khì gōa-kok, iā tùi gōa-kok chiah bé chē-chē gōa-kok-hòe tò-lâi pún-kok. Put-chí hō͘-lī, put-chí hoat-châi, ka-kī chéng-chûn, bé chin chē lô͘-châi, ēng in chòe chúi-siú lâi kò-chûn. Tong-sî ê kau-thong sī ēng kòa-phâng ê chûn lâi kòe-hái, bô hong ê sî chiū kúi-nā cha̍p-lâng lâi iô-ló͘, kò-chûn, ēng án-ni lâi kau-thong.
|
我bat有chi̍t-pái讀chi̍t ê故事，覺得真有hâm勸教示，我tī chia來講hō͘ lín聽。有chi̍t ê大生理人，i是tiàm tī Hi-lia̍p ê Ko-lîm-to，Ko-lîm-to是當時ê大港口。I平時是做貿易商，就是對本國提chē-chē物產去外國，也對外國chiah買chē-chē外國貨倒來本國。不止獲利、不止發財，家己整船，買真chē奴才，用in做水手來kò船。當時ê交通是用掛帆ê船來過海，無風ê時就幾nā cha̍p人來搖櫓、kò船，用án-ni來交通。 |
|
Ū chi̍t pái i tùi Ai-ki̍p bé tio̍h boán-chài ê tiû-toān pò͘-phit, í-ki̍p chin chē ê tōa-be̍h, kap kî-thaⁿ ê hó-mi̍h, beh tò-khì in Hi-lia̍p. Pêng-sî i kàu-ke̍k ge̍k-thāi hiah ê chúi-siú, siat-súū bô ha̍p i ê ì-sù ê, siông-siông ēng kùn, á-sī phôe-piⁿ kā in phah, ū sî hō͘ i thâi sí hiat-lo̍h hái ê iā ū. Si̍t-chāi khoán-thāi hiah ê lô͘-châi tú-tú chhin-chhiūⁿ khoán-thāi gû, bé chi̍t-iūⁿ, tùi lâng iā-sī ke̍k khek-po̍k, pàng tāng-lī, kau-kiat pháiⁿ-lâng lâi le̍k-sek lâng.
|
有chi̍t pái i對埃及買tio̍h滿載ê綢緞布匹，以及真chē ê大麥，kap其他ê好mi̍h，beh倒去in Hi-lia̍p。平時i到極虐待hiah ê水手，設使有無合i ê意思ê，常常用棍，á是皮鞭kā in phah，有時hō͘ i thâi死hiat落海ê iā有。實在款待hiah ê奴才tú-tú親像款待牛、馬chi̍t樣，對人也是極刻薄，放重利，勾結pháiⁿ人來le̍k-sek人。 |
|
Taⁿ chit pái chûn kiâⁿ kàu pòaⁿ hái, hut-jiân tú-tio̍h hong-thai, kúi-nā ji̍t lóng bô khòaⁿ-kìⁿ ji̍t, goe̍h, chhiⁿ ê kng. M̄-nā lo̍h-phâng, iā í-keng hiat-ka̍k chi̍t-pō͘-hūn khah tāng ê mi̍h, í-ki̍p chi̍t-pō͘-hūn ê tōa-be̍h. Nā-sī hong lóng bô khah tiām, tōa éng iû-goân chi̍t-ē, chi̍t-ē phoah kòe i ê chûn-pho téng, put-lūn i ēng piⁿ lâi phah, ēng kùn lâi kòng hiah ê lô͘-châi, sīm-chì ū ê hō͘ i phah-sí, to-sī sái bē chìn-chêng. Hit sî i chiū tùi i ê sîn-bêng lú-sîn, ná-chún lán Tâi-oân sè-sio̍k lâng só͘ sìn ê Má-chó͘-pô lâi hē-goān. I kóng i nā ē-tit kiù pêng-an kàu chhù ū miā chiū hó, i kam-goān chiong chûn só͘ ū ê lâi hiàn, beh koh kā lú-sîn têng khí biō.
|
Taⁿ chit pái船行到半海，忽然tú-tio̍h風颱，幾nā日攏無看見日、月、星ê光。M̄-nā落帆，也已經hiat-ka̍k chi̍t部份khah重ê mi̍h，以及chi̍t部份ê大麥。若是風攏無khah tiām，大湧猶原chi̍t-ē、chi̍t-ē潑過i ê船pho頂，不論i用鞭來phah、用棍來kòng hiah ê奴才，甚至有ê hō͘ i phah死，都是駛bē進前。Hit時i就對i ê神明女神，ná準lán台灣世俗人所信ê媽祖婆來下願。I講i若ē得救平安到厝有命就好，i甘願將船所有ê來獻，beh koh kā女神重起廟。 |
|
Kó-jiân ū-iáⁿ hong chiām-chiām tiām khì, éng iā pêⁿ lah. Hit sî i chin hō͘-hóe, kóng beh chai iā mài hiàn hiah chē. Āu-lâi i chiū kā lú-sîn kóng, góa sìn lí m̄ ài tē-chú hiah lōng-hùi, biō to iáu hó-hó, to iáu ē tòa tit, góa lâi kā lí iû-chhat chiū hó lah.
|
果然有影風漸漸tiām去，湧也平lah。Hit時i真後悔，講beh知也mài獻hiah chē。後來i就kā女神講，我信你m̄愛弟子hiah浪費，廟都iáu好好，都iáu ē tòa得，我來kā你油漆就好lah。 |
|
Kàu chhù ê sî chi̍t ê hóaⁿ kòe saⁿ-tang, sòa kóng chit-sî chin put kéng-khì, góa sìn lú-sîn lí ún-tàng m̄ ài lâng lōng-hùi, lô-sim, sún-chîⁿ. Góa goān hiàn chi̍t-tùi gû-iûⁿ, ǹg-bāng lí kàm-la̍p, koh bô lōa-kú, bô phah-sǹg i ê seng-lí ū sió-khóa liáu-chîⁿ, i chiū chin m̄-goān, sòa khan-thoa lú-sîn bô pó-pì, chiū chhú-siau i ê gû-iûⁿ, chí-ū the̍h tām-po̍h chhin-chhiūⁿ lán Tâi-oân lâng teh hiàn ê mī-ku khì hiàn nā-tiāⁿ.
|
到厝ê時chi̍t ê hóaⁿ過saⁿ冬，sòa講chit時真不敬去，我信女神你穩當m̄愛人浪費、勞心、損錢。我願獻chi̍t對牛羊，ǹg望你kàm納，koh無lōa久，無phah算i ê生理有sió-khóa了錢，i就真m̄願，sòa牽拖女神無保庇，就取消i ê牛羊，只有提tām-po̍h親像lán台灣人teh獻ê麵龜去獻nā-tiāⁿ。 |
|
Lí kā i khòaⁿ chit ê lâng, pêng-sî m̄-bat teh kèng-sîn, sū kàu ê sî chiū khàu-lōa i ê sîn-bêng, sū kòe-liáu ê sî i chiū bē kì-tit, jî-chhiáⁿ sòa kòe-siàu i ê sîn-bêng bô pó-pì. Chit-khoán sim ê kèng-sîn lí siūⁿ tio̍h, á m̄-tio̍h. M̄-tio̍h, chin kiàn-siàu, án-ni i ê sim sī lia̍h sîn chòe i ê lô͘-châi, sī kap i siāng-khoán pang-chān i ê tham-sim ê lâng.
|
你kā i看chit ê人，平時m̄-bat teh敬神，事到ê時就靠賴i ê神明，事過了ê時i就bē記得，而且sòa過siàu i ê神明無保庇。Chit款心ê敬神你想tio̍h，á m̄-tio̍h。M̄-tio̍h，真kiàn-siàu，án-ni i ê心是掠神做i ê奴才，是kap i siāng款幫贊i ê貪心ê人。 |
|
Iâ-so͘ ê sî-tāi ê Hoat-lī-sài lâng iā ū chit-khoán ê su-siúⁿ, kà lâng khek-po̍k pē-bó, iā chiah lâi hiàn po̍k-hô, má-khûn, ke̍k sió-khóa ê mi̍h, lâi beh piáu-sī i kèng-sîn ê jia̍t-sim. Si̍t-chāi chin kiàn-siàu, chin chha-biū Siōng-tè ê kà-sī.
|
耶穌ê時代ê Hoat-lī-sài人也有chit款ê思想，教人刻薄pē母，iā chiah來獻po̍k-hô、馬群，ke̍k sió-khóa ê mi̍h，來beh表示i敬神ê熱心。實在真kiàn-siàu，真chha-biū上帝ê教示。 |
|
Kèng-sîn m̄-sī án-ni. Tē-it sī lāi-sim, lāi-sim ū chì-sêng, chin-chiàⁿ sī chīn-sim, chīn-sèng, chīn-ì chīn-la̍t lâi thiàⁿ Chú. Koh tùi pē-bó, hiaⁿ-tī, chhù-piⁿ lâi hián-bêng bô ké ê thiàⁿ-sim. Che chiah sī chin-chiàⁿ ê kèng-sîn.
|
敬神m̄是án-ni。第一是內心，內心有至誠，真正是盡心、盡性、盡意、盡力來疼主。Koh對pē母、兄弟、厝邊來顯明無假ê疼心。Che chiah是真正ê敬神。 |
|
Taⁿ chá-khí lán tio̍h lâi hoán-séng, lán kòe-khì ê kèng-pài Sîn, Siōng-tè sī ēng sím-mi̍h khoán-sit. Lán bat ēng gōa-phôe, kî-si̍t lán ū kàu khiân-sêng á-bô? Lán nā ū-iáⁿ thiàⁿ Siōng-tè, iā ún-tàng ē thiàⁿ lâng chiah tio̍h, ū á-bô? (L. J. S. siá)
|
Taⁿ早起lán tio̍h來反省，lán過去ê敬拜神、上帝是用sím-mi̍h款式。Lán bat用外皮，其實lán有到虔誠á無？Lán若有影疼上帝，也穩當ē疼人chiah tio̍h，有á無？(L. J. S. 寫) |
|
2 Ge̍h 22 Ji̍t
|
2月22日 |
|
Kim-kù: Lín kì-jiân kiâⁿ i tī góa ê hiaⁿ-tī chì-bî-sè ê chi̍t ê, chiū-sī kiâⁿ i tī góa. (Má-thài 25:40)
|
金句：Lín既然行i tī我ê兄弟至微細ê chi̍t 5，就是行i tī我。(馬太25：40) |
|
Kó͘-chá kó͘-chá chi̍t-chheng gōa-nî chêng, kiò chòe Sū-lī-a ê kok-ka ū chi̍t ê chin-chiàⁿ jia̍t-sim pài Siōng-tè ê lāu a-peh kap lāu a-pô, Siōng-tè hō͘ in 2 ê lāu kong-pô chin hó-gia̍h, chha-put-to choân kok tē-it hó-gia̍h ê lâng, chóng-sī chin khó-sioh lóng bô seⁿ kiáⁿ, in chiū mê-ji̍t tùi Siōng-tè kiû ài beh tit-tio̍h chi̍t ê hāu-seⁿ, kó-jiân Siōng-tè ū chiâⁿ in ê kî-tó, tī a-pô lāu-lāu-lāu ê sî chiah seⁿ chi̍t ê hāu-seⁿ chin kó͘-chúi, pē-bú chin hoaⁿ-hí chiū chiong chit ê hāu-seⁿ beh hiàn hō͘ Siōng-tè ēng, iā hō-miâ kiò-chòe Ni-ko-la-su. Chóng-sī chin-chiàⁿ khó-lîn, chit ê gín-ná iáu sè-hàn ê sî pē-bú í-keng nî-lāu chiū sí khì lah.
|
古早古早chi̍t千外年前，叫做Sū-lī-a ê國家有chi̍t ê真正熱心拜上帝ê老a伯kap老a婆，上帝hō͘ in 2 ê老公婆真好額，差不多全國第一好額ê人，總是真可惜攏無生kiáⁿ，in就暝日對上帝求愛beh得tio̍h chi̍t ê後生，果然上帝有chiâⁿ in ê祈禱，tī a婆老老老ê時chiah生chi̍t ê後生真kó͘-chúi，pē母真歡喜就將chit ê後生beh獻hō͘上帝用，也號名叫做Ni-ko-la-su。總是真正可憐，chit ê gín-ná iáu細漢ê時pē母已經年老就死去lah。 |
|
Ni-ko-la-su ū tit-tio̍h pē-bú ê sìn-gióng iā koat-sim beh chòe Siōng-tè ê kang. Chóng-sī i ū siūⁿ kóng beh chòe Siōng-tè ê kang, bô su-iàu chòe hó-gia̍h ê lâng, i chiū siông-siông tòa chin chē chîⁿ chhut-khì, bóe chia̍h-mi̍h á-sī saⁿ-khò͘ sàng hō͘ chin chē khó-lîn ê lâng. I iā hoan-hù hiah ê lâng m̄-thang hō͘ lâng chai, ū sî bóe chin chē mī-pau, piáⁿ, thn̂g-á, ēng chi̍t ê chin tōa ê tē-á té leh sì-kòe kiâⁿ khòaⁿ-tio̍h sàn-hiong khó-lîn ê gín-ná lóng pun hō͘ in chia̍h. Ni-ko-la-su put-sî to ē-kì-tit Iâ-so͘ ê ōe kóng: “Lín kì-jiân kiâⁿ i tī góa ê hiaⁿ-tī chì-bî-sè ê ê chi̍t ê chiū-sī kiâⁿ i tī góa.” Iā siông-siông teh siūⁿ siat-sú Chú Iâ-so͘ nā tī chia, I tek-khak ē pang-chān chiah ê sòng-hiong lâng, góa tio̍h lâi kā Chú Iâ-so͘ chòe.
|
Ni-ko-la-su有得tio̍h pē母ê信仰也決心beh做上帝ê工。總是i有想講beh做上帝ê工，無需要做好額ê人，i就常常帶真chē錢出去，買食mi̍h á是衫褲送hō͘真chē可憐ê人。I也吩咐hiah ê人m̄-thang hō͘人知，有時買真chē麵包、餅、糖á，用chi̍t ê真大ê袋á té leh四界行看tio̍h sàn-hiong可憐ê gín-ná攏分hō͘ in食。Ni-ko-la-su不時都ē記得耶穌ê話講：「Lín既然行i tī我ê兄弟至微細ê ê chi̍t ê就是行i tī我。」也常常teh想設使主耶穌若tī chia，I的確ē幫贊chiah ê sòng-hiong人，我tio̍h來kā主耶穌做。 |
|
Ni-ko-la-su tī hōe-tn̂g tam-tng Siōng-tè ê kang í-gōa siông-siông phāiⁿ tōa-pau ê mi̍h khì pun sòng-hiong lâng, Ni-ko-la-su tī in ê tē-hng hō͘ lâng kiò-chòe gâu thiàⁿ lâng ê sian-siⁿ, āu-lâi tī kàu-hōe hō͘ lâng kéng chòe chòe-koân ê tē-ūi, i ê miâ-siaⁿ thàu-kàu ta̍k só͘-chāi, tāi-ke lóng kiò i “Siōng-tè ê Ni-ko-la-su”. Chin chun-kèng i. Bô-lūn tōa-lâng á-sī gín-ná lóng khòaⁿ i chòe sèng-jîn, só͘-í Siōng-tè ê Ni-ko-la-su ê tāi-chì tùi pa-pa thoân kàu kiáⁿ tùi kiáⁿ thoân kàu sun chi̍t-tāi chi̍t-tāi teh siàu-liām i, chiū i ê miâ hō͘ lâng kiò-chòe “Sèng ê Ni-ko-la-su”, āu-lâi i ê miâ piàn-thoân kàu choân sè-kài, chiâⁿ-chòe kiōng-tông ê miâ chiū-sī San-ta-ku-lo-su, che sī tùi Sèng ê Ni-ko-la-su lâi piàn-im ê. Lán tú-chiah kòe Sèng-tàn bô lōa-kú, Chú Iâ-so͘ ê chhut-sì hō͘ choân peh-sìⁿ lâi siàu-liām i ê kiù-un, chóng-sī in-ūi chit ê Ni-ko-la-su ū chiàu Iâ-so͘ ê kà-sī khì kiâⁿ tī I ê hiaⁿ-tī chò-bî-sè ê chi̍t ê, án-ni tī Sèng-tàn ê sî hō͘ tāi-ke siang-sî siàu-liām i ê hó só͘ kiâⁿ, te̍k-pia̍t lán sió-pêng-iú chiū-sī chin hoan-gêng chit-ūi San-ta-ku-lo-su.
|
Ni-ko-la-su tī會堂擔當上帝ê工以外常常phāiⁿ大包ê mi̍h去分sòng-hiong人，Ni-ko-la-su tī in ê地方hō͘人叫做gâu疼人ê先生，後來tī教會hō͘人kéng做最koân ê地位，i ê名聲透到ta̍k所在，大家攏叫i「上帝ê Ni-ko-la-su」。真尊敬i。無論大人á是gín-ná攏看i做聖人，所以上帝ê Ni-ko-la-su ê代誌對爸爸傳到kiáⁿ對kiáⁿ傳到孫chi̍t代chi̍t代teh siàu念i，就i ê名hō͘人叫做「聖ê Ni-ko-la-su」，後來i ê名遍傳到全世界，chiâⁿ做共同ê名就是San-ta-ku-lo-su，che是對聖ê Ni-ko-la-su來變音ê。Lán tú-chiah過聖誕無lōa久，主耶穌ê出世hō͘全百姓來siàu念i ê救恩，總是因為chit ê Ni-ko-la-su有照耶穌ê教示去行tī I ê兄弟最微細ê chi̍t ê，án-ni tī聖誕ê時hō͘大家siang時siàu念i ê好所行，特別lán小朋友就是真歡迎chit位San-ta-ku-lo-su。 |
|
Lán tio̍h o̍h i ê bô͘-iūⁿ ū chiàu Iâ-so͘ ê kà-sī siông-siông pang-chān khó-lîn hiah ê bî-sè tiong ê chi̍t ê. Chiū-sī kan-khó͘ lâng sàn-hiong lâng, lāu-tōa-lâng bô pē bô bú ê pháiⁿ-miā lâng, án-ni lán chiū ū kiâⁿ tī lán ê Chú Iâ-so͘ lah. (C. S. L. siá)
|
Lán tio̍h學i ê模樣有照耶穌ê教示常常幫贊可憐hiah ê微細中ê chi̍t ê。就是艱苦人sàn-hiong人、老大人無pē無母ê pháiⁿ命人，án-ni lán就有行tī lán ê主耶穌lah。(C. S. L. 寫) |
|
Lâng nā ū phāu-tiāⁿ ko-siōng ê bo̍k-tek, gōng-lâng iā ōe piàn-chiâⁿ tōa jîn-bu̍t. (Hui-li̍p-pí 3:14)
|
人若有抱tiāⁿ高尚ê目的，gōng人也ōe變chiâⁿ大人物。(Hui-li̍p-pí 3：14) |
|
Chí-ū kiâⁿ chiàⁿ-lō͘, chí-ū chòe chèng-tong ê tāi-chì, nā án-ni chiū-sī thiⁿ poa̍h-lo̍h-lâi, á-sī chi̍t-bān ki chhèng ǹg lí teh biâu-chún, lí iā m̄-bián kiaⁿ.
|
只有行正路，只有做正當ê代誌，若án-ni就是天poa̍h落來，á是chi̍t萬支chhèng ǹg你teh瞄準，你也m̄免驚。 |
|
Chú sī góa ê po̍k-chà-la̍t, chà-chhùi góa ê sim, hō͘ góa thòng-hóe chōe, chà-chhùi góa ê kiau-ngō͘ ngī-sim. Chà khui góa ê chōe-gia̍t.
|
主是我ê爆炸力，炸碎我ê心，hō͘我痛悔罪，炸碎我ê驕傲ngī心。炸開我ê罪孽。 |
|
Ū Chú saⁿ-kap tī-teh, chiū ōe chai-iáⁿ sím-mi̍h khoán ê kî-tó sī ha̍p I ê chí-ì.
|
有主saⁿ-kap tī-teh，就ōe知影sím-mi̍h款ê祈禱是合I ê旨意。 |
