![]() |
聖劇第三集_01 |
---|---|
N̂g Hoâi-un | 黃懷恩 |
![]() |
浪子回頭 |
![]() |
刺中花 |
![]() |
黃懷恩著 |
![]() |
作者ê 話 |
![]() |
扑算咱會發見著第3集ê 風格有kap前1、2集較無像。這是因為ài beh應付地方教會ê 要求來寫--ê,扑算會hō͘ 咱濟濟教會感覺較適合。人物也m̄免著真濟人,tī 各方面會較實用。 |
![]() |
咱中會ê 構成是地方教會佔有三分ê 二分,所以向望地方教會會thang 利用。 |
![]() |
若是劇本m̄-tiāⁿ 是beh 演ê 路用,做讀也不止好,親像讀小說抑是故事一般hō͘ 咱會感覺真趣味。 |
![]() |
若是用語無合ê 所在向望家己koh 改正,較好若會thang tī 野外作佈道用來演是較安全。 |
![]() |
向望上帝賜福咱今年有真快樂有意義ê 聖誕節。 |
![]() |
1958. 7. 15.黃懷恩 梅山 |
![]() |
浪子回頭 |
![]() |
浪子回頭 二幕 |
![]() |
人物:阿婆、雪花、醫師、英傑、老板、福哥、市民a、市民b、警官。 |
![]() |
第一幕 |
![]() |
出場人物:阿婆、雪花、醫師、英傑 |
![]() |
場面:一個赤貧ê 家裡 |
![]() |
開幕:阿婆倒tī 正爿ê 床頂,醫師tú 好用診察器診察伊,小女雪花tī 一爿事奉伊,倒爿有一個細桌仔,頂面有醫師ê 皮包。 |
![]() |
1. 醫師:Hng,心臟較無力,操勞較過頭ê 款。 |
![]() |
(醫師轉去桌仔收伊ê 物件) |
![]() |
2. 小女:先生,阮阿母ê 病體m̄ 知有要緊無?你看了怎樣? |
![]() |
3. 醫師:無甚mi̍h 要緊。老人較軟弱,所以若較靜養就liam-pīⁿ 好勢。你chiah來我hia提藥。 |
![]() |
4. 小女:好,我chiah 隨時來去提,先生,勞煩你行chiah 遠ê 路,真多謝你。 |
![]() |
5. 醫師:Bōe,bōe!(行倚阿婆)阿婆,無甚mi̍h代誌,食藥liam-pīⁿ 就好,著放心m̄-thang 煩惱。 |
![]() |
6. 阿婆:先生,真多謝你,(起身) 勞煩你行chiah 遠ê 路,實在真bōe 過心。 |
![]() |
7. 醫師:你m̄-thang án-ne講,你著是án-ne gâu kāu操煩--lah! |
![]() |
8. 阿婆:我今仔日身體會致此án-ne 攏--是為著我一個不肖子ê 緣故。 |
![]() |
9. 醫師:你ê子是án-chóaⁿ 著無?! |
![]() |
10. 阿婆:我有一個獨生ê後生,大漢續變相,暝日攏放蕩tī 外面,lām-sám做匪類。我若想著我ê子我ê 心就疼痛到beh 死去。(流目屎)。 |
![]() |
11. 醫師:Ho͘,原來是án-ne。總--是阿婆,你m̄-thang 煩惱,你著替伊祈禱,上帝就會改變伊。 |
![]() |
12. 阿婆:上帝kiám 有法度thang 改變伊,he 實在是一個歹到出髓 ê 物。 |
![]() |
13. 醫師:阿婆,你若來信耶穌,拜上帝,上帝就有法度--lah 。 |
![]() |
14. 阿婆:上帝若會改變伊,我真歡喜來信,實在我是已經進無步退無路--lah 。 |
![]() |
15. 醫師:Án-ne好,我禮拜日chiah 來chhōa lín 去禮拜。 |
![]() |
16. 阿婆:先生,真多謝,得著你真大ê 幫贊,真ló͘力。 |
![]() |
17. 醫師:你著多謝上帝,這攏--是上帝ê 疼。Án-ne好我來去,平安。 |
![]() |
18. 小女:先生,這個藥錢我另日才來繳納m̄ 知會使得bōe?因為現在厝內tú-tn̄g 無錢。 |
![]() |
19. 醫師:無要緊!m̄-thang 掛慮hit ê事,著來提藥(醫師退場)。 |
![]() |
20. 阿婆:雪花,我著kā 你講m̄免叫醫生來,你thái beh án-ne,你無想咱厝內攏無錢,liān食飯著bōe 顧--得。 |
![]() |
21. 小女:阿母,你m̄免掛意這個事,你著放心來食藥thang 趕緊好,以外ê事我才設法,若設使攏無錢我才將我這kha金手指來變賣來納藥錢--lah 。 |
![]() |
22. 阿婆:雪花,實在hō͘ 你真勞苦著磨,阿母攏bōe-thang kā 你栽培,反轉得著你真大ê 幫贊。設使你ê 阿兄若無歹子,抑是你ê 阿爸若無早過身咱母子著m̄免chiah-n̍i̍h歹命(哮)。 |
![]() |
23. 小女:阿母,請你m̄-thang koh 想著hiah-ê 事來家己激心憂悶。你無聽hit ê 先生teh 講咱若信耶穌祈禱上帝,上帝就會改變阿兄,咱要緊著緊緊來去聽道理--lah 。 |
![]() |
24. 阿婆:是--lah,除去信耶穌拜上帝以外也無路lah……今你ê 阿兄m̄知幾日無轉來--lah ho͘N3? |
![]() |
25. 小女:差不多十外日無轉來--lah ! |
![]() |
26. 阿婆:M̄ 知tī 甚mi̍h 所在?m̄ 知有平安抑無?生著hit 款歹囝,實在一生怨嘆。 |
![]() |
27. 小女:阿母,你m̄ 免koh kā 伊想--lah ,若有生命伊就會koh 轉來--lah,koh hit 款人轉來攏無好代誌,你數念伊有甚mi̍h 路用。(浪子英傑出場) |
![]() |
28. 浪子:人若無錢就行無路……我若來到這個門口,就直直beh 懊惱起來。散到鬼著m̄ 敢倚來,若想著這款散赤ê 家庭心內真痛恨,看千看萬mā 無人親像這款ê 家庭,實在出世tī 這款家庭是衰bái 到極。……O͘-í,我轉來--lah,開門--lah!(扑門,小女來開門)。 |
![]() |
29. 小女:Ah,阿兄!阿母,阿兄轉來--lah ! |
![]() |
30. 阿婆:英傑,你轉來著--無,你是去tó位--lah,chiah-n̍i̍h 久攏無轉來。 |
![]() |
31. 浪子:我ê 事你m̄ 免kā 我干涉,結局你也無thang hō͘ 你ê子幸福--lah …………有茶無? |
![]() |
32. 阿婆:雪花,你去thîn一杯茶出來hō͘ lín 阿兄飲。(阿花無願意ê 款去捧茶出來)。 |
![]() |
33. 小女:阿兄,請你用茶。(chi̍h 茶ê 時忽然看著)。 |
![]() |
34. 浪子:Ah,你掛這是甚mi̍h?剝起來,剝起來!! |
![]() |
35. 小女:阿兄,你是beh 創甚mi̍h lah!這個m̄ 是你ê --lah ,這是我做苦工所儉來hak ê 物--lah ! |
![]() |
36. 浪子:你m̄ 免加講話,緊剝起來,若無是beh 扑hō͘ 你死ô͘ (兩人相搶,阿婆倚去chiàm ) 。 |
![]() |
37. 阿婆:雪花,剝起來hō͘ 伊mlah5,剝起來hō͘ 伊--lah ! |
![]() |
38. 浪子:我teh 無錢thang 用,你chiah 將這個掛tī 手n̍i̍h ,腹肚縛teh 枵你chiah teh 愛水。(手指剝起來)這個最少mā 有二百外箍。人是錢 teh 做人,若無錢就有翼mā 無法度thang 飛天,有錢才有親,無錢就m̄准你是甚mi̍h人,這就是叫做世間人--lah 。 |
![]() |
39. 小女:阿兄,你全然攏無良心,咱家庭現在攏無thang 食,你知無?阿母為著你暝日痛苦致到身體帶病bōe 起床,你知無?你到這個時iáu m̄ 知thang 醒悟反轉將阮所倚靠ê 手指kā 阮剝去,你全然攏無天良。 |
![]() |
40. 浪子:甚mi̍h!你teh 加講話! 甚mi̍h叫做良心,甚mi̍h叫做天良,有錢上要緊--lah,親像這款散phí-phí ê 家庭應該受咒詛好--lah,這款ê 家庭有甚mi̍h好thang hō͘ 人留心?愈看愈懊惱,愈想愈chheh 。 |
![]() |
41. 阿婆:英傑,你著赦免我無夠額盡我ê 本分栽培你,hō͘ 你thang 得著幸福。你mā 知,lín 阿爸tī lín 細漢ê 時就過身,阿母就用我軟弱查某人ê 手來養飼lín 兩人。無論風雨無論寒熱,我攏--是phoe 命來teh 做工,一個背tī 腳脊,一個牽tī 手n̍i̍h 去kā 人洗衫,有時著暗暝也無睏來kā 人做衫,有時著入去深山斗底去拾竹葉出來賣,hit ê 艱苦實在無法度thang 講。卻阿母無怨嘆,因為我真歡喜為著lín 兩人án-ne做,是向望lín 兩人將來會kap人相親像,會thang幸福,總--是無疑誤,會成做今仔日這款ê慘景(哮),我ê 勞苦攏歸tī 烏有,我ê 眠夢攏煞去--lah ! |
![]() |
42. 浪子: 這款是thang 見笑,thang 厭惡ê 歷史,你m̄-thang koh hō͘ 我聽見這款話,愈聽是愈艱苦心。我beh 來去--lah,我kap 這款受咒詛ê 家庭永遠是無干涉--lah (退場) 。 |
![]() |
43. 小女:阿母,今咱beh án-chóaⁿ,厝內攏無錢,koh 藥錢mā 續無法度thang納--lah。 |
![]() |
44. 阿婆:無要緊--lah,出在天ê 安排--lah,我前世m̄ 知犯著甚mi̍h大罪,今生chiah 來tú 著chiah-n̍i̍h 歹命。 |
![]() |
45. 小女:阿母,你m̄-thang 過頭怨嘆--lah,hit ê 先生有beh chhōa 咱去信耶穌,咱若去信kiám-chhái 會thang較好勢--lah。 |
![]() |
46. 阿婆:是--lah,今著望耶穌來拯救咱--lah。(吟詩聖詩222首ê 調) |
![]() Si̍t-chāi iu-būn khó͘-thàng Óa-khò Iâ-so͘ hû-chhî pó-hō͘ Ǹg-bāng sim-lāi an-lo̍k |
1. 做人tiàm 這世間 實在憂悶苦痛 倚靠耶穌扶持保護 向望心內安樂 |
![]() Tì-kàu mê-ji̍t ai-oàn Siáⁿ-sî i ōe hôe-thâu tńg-ì Chí ū bāng Chú lîn-bín. |
2. 想到我ê 子兒 致到暝日哀怨 啥時伊會回頭轉意 只有望主憐憫 |
![]() |
--幕-- |
![]() |
第二幕 |
![]() |
出場人物:浪子、老板、福哥、醫師、市民a、市民b、 警官。 |
![]() |
場 面:公園內 |
![]() |
開 幕:公園黃昏ê 光影,浪子束手靠tī 樹身 |
![]() |
1. 浪子:人若無錢就行無路,人beh 做代誌無錢就無變步,有錢你兄我弟一大陣,無錢就無人敢倚來,世間實在是太無情………Ah,錢用了心真鬱卒,頭殼想錢想到îⁿ-tîⁿ 。今著tiàm 這個樹腳來做看有甚mi̍h 黃金夢抑無。(坐下) |
![]() |
2. 老板:這個人koh 面熟面熟,原來就是英傑仔。O͘-í,英傑,真chhàu-khám ,我tú-tú teh chhōe 你。 |
![]() |
3. 浪子:O͘h,你是菜店ê 老板!你chhōe 我有甚mi̍h 貴事。 |
![]() |
4. 老板:今你續 teh 假憨,你續 m̄ 知我chhōe 你beh án-chóaⁿ,你前日欠hiah-ê 錢到底是甚mi̍h 時才beh 還--lah?! |
![]() |
5. 浪子:老板,你m̄免掛慮,我bōe 走你hiah-ê 錢--lah。我另日若有錢就會kap 你算清楚--lah,請你koh hō͘ 我欠一下--lah。 |
![]() |
6. 老板:你所講ê 話無一句會信--得,少年人m̄-tam 輸贏,敢做著敢擔當才好,我是hō͘ 你bōe 騙--得 ê 人,限到年尾你若無來算帳,我就有辦法!(退場) |
![]() |
7 .浪子:衰運無單行,人無錢心內真鬱卒koh tú--著這個活鬼來teh 攪擾。Ah,這世間攏--是扶起無扶倒,一旦若失敗就hō͘ 人看輕,想來想去攏--是怨慼家己ê 境遇。 |
![]() |
(福哥仔出場) |
![]() |
8. 福哥:A̍i̍h,兄弟ah,真tú 好,我久久teh chhōe 你無,你結局是走無路--lah。 |
![]() |
9. 浪子:Oh,阿福兄,久見久見。我最近著去出外續 bōe-thang 去拜訪你,真失禮,m̄ 知你有甚mi̍h貴事? |
![]() |
10.福哥:你續 m̄ 知甚mi̍h 貴事,你續 teh 假khong 假憨,前日hiah-ê kiáu 錢你是按算m̄ 還著無?少年人做hit 號糊塗事! |
![]() |
11.浪子:阿福兄,m̄ 免án-ne 受氣--lah,咱原來kiám m̄ 是結拜兄弟ê 朋友--mah!你mā帶念一下。 |
![]() |
12.福哥:你poa̍h 輸kiáu m̄ 還teh 講甚mi̍h 結拜ê 朋友!朋友也是著照起工,無錢來鋪排就我kap 你無干涉。 |
![]() |
13. 浪子:會--lah,我會還你--lah,你m̄ 免掛慮--lah,我知影這個世間無有一個實在有情ê 人,攏--是利己主義,金錢主義--lah。 |
![]() |
14 . 福哥:是--lah,你到今才知影(著無?!) 無論如何你著緊緊提 來還,若無我是有我ê 辦法。(退場) |
![]() |
15 . 浪子:絕情烏暗ê 世界,那想那討厭,人若一旦失敗就親友也變出歹面,續iàm-chiān 咱。Ah,這款ê 世界是太絕情可惡--lah!只有若有錢就會thang 征服這個世界,俗語講:『有錢使鬼mā 會oe 磨。』 Hia koh 有一個紳士nge̍h 一個皮包tùi chia 來,扑算 hit ê 皮包是té 錢才著。Koh 這時攏無人teh 看??好,我著來kā 伊搶hit ê 皮包仔。 |
![]() |
(醫師出場由倒爿行到正爿) |
![]() |
16.浪子:A̍i̍h,慢是--lè ! |
![]() |
17 .醫師:甚mi̍h 人,你叫我有甚mi̍h 貴事? |
![]() |
18 .浪子:緊緊將你ê 皮包仔放下--lè ! |
![]() |
19. 醫師:Oh,你是賊著無?! |
![]() |
20. 浪子:趕緊放下--teh,若koh 加講話就beh 扑hō͘ 你死。(拿銃出來) |
![]() |
21. 醫師:賊ò͘,賊ò͘ !救人ò͘,救人ò͘! |
![]() |
22.浪子:你該死--lah!(用銃彈三門,醫師皮包仔hiat hō͘ 伊,來著傷走去。浪子拾皮包仔teh chhiau-chhōe 內面。市民a出場) |
![]() |
23.市民a:賊ò͘!賊ò͘!!扑死人ò͘! |
![]() |
(走倚去kap 伊相扑 ) |
![]() |
24 .市民b:掠賊ò͘!掠賊ò͘! |
![]() |
(倚去tàu掠,將浪子掠起來) |
![]() |
25 .市民a:好大膽,好大膽,長頭白日tiàm 這個公眾ê 所在teh 搶劫,真好膽,真好膽! |
![]() |
26 .市民b:縛起來!少年人m̄ 討m̄ 趁,做這款橫霸事,著ài 大大kā 伊教示才會使--得。 |
![]() |
(警官出場) |
![]() |
27 . 警官:Án-chóaⁿ甚mi̍h 事件?! |
![]() |
28 . 市民a:大人--ah!這個凶犯用銃扑死人來搶伊ê 皮包仔 --lah ! |
![]() |
29. 市民b:大人--ah,這著ài 嚴嚴來kā 伊處理才會用--得,若無驚了會扑歹人ê 大細。 |
![]() |
30 . 警官:可惡到極,縛起來!(Kā 縛)少年人好大膽,敢做這款可惡ê 事,你是按算m̄ ài 做人著無?你是ài chhōe 死路--mah?! |
![]() |
31. 浪子:大人--ah ,請你赦免我,我以後m̄敢án-ne 做--lah 。 |
![]() |
(醫師出場) |
![]() |
32. 警官:你敢 tī 這個白日ê 時,tiàm 這個公眾ê 路邊開銃扑人,續搶人ê 物,你ê 罪到gia̍h 惡毒,照律法你著受極重ê 死刑。 |
![]() |
33. 浪子:大人--ah,(跪落去)我厝n̍i̍h iáu- kú一個軟弱倒床久久ê 老母kap一個bōe 成人ê 小妹,請你著可憐我ê 老母,設使伊若知影這個事,驚了我ê 老母會煩惱續來死。 |
![]() |
34 . 警官:你m̄ 免加講話,無論甚mi̍h 事情你攏無法度thang 脫出刑罰--lah,行,來去警察所。 |
![]() |
35 . 醫師:蔡警官,勞煩你,勞煩你! |
![]() |
36 . 警官:Oh,劉醫師,是m̄ 是你是被害人? |
![]() |
37 . 醫師:是--lah,我是被害人,總--是真佳哉,上帝有保守我,hō͘ 我攏無受著甚mi̍h損害,只有空驚一場。 |
![]() |
38 . 警官:Án-ne 真好家在,若無你一命敢著烏呼哀哉。 |
![]() |
39. 醫師:蔡警官,果然我攏無tú 著甚mi̍h 受傷,這個青年ê 罪kiám bōe thang 赦免伊? |
![]() |
40. 警官:He是bōe 用得,特別你是無應該替伊講情,這款ê 犯罪是著嚴嚴ê 處罰,hō͘ 伊後擺m̄敢 án-ne 做。 |
![]() |
41. 醫師:你講án-ne 亦是著,不過人若m̄ 是tùi 上帝ê 神來真實改變,就甚mi̍h 法律也無法度,反轉是hō͘ 人那加添罪惡。若是這個青年我看是有心beh 悔改--lah,伊ê 老母小妹攏暝日teh 求叫上帝緊緊改變伊,我亦是teh 替伊祈禱,所以上帝會聽阮ê 祈禱。 |
![]() |
42. 警官:劉醫師,你bat 這個人kap 伊ê 家族--mah? |
![]() |
43. 醫師:是,伊ê 老母是一位真可取,罕得看見ê 婦人人,伊ê 丈夫早就過身,家己一人扑拚來養飼兩個子兒。伊也為著這個青年放蕩ê 緣故,暝日煩惱致到破病,我有去看伊,亦有chhōa in 來teh 聽道理。 |
![]() |
44. 浪子:(走倚跪tī 醫師ê 面前)先生,請你赦免我,我險險害死你ê 性命,總--是你iáu-kú 攏無怨恨我,續替我求情。Oh,這款ê 疼心是比錢koh 較寶貝。你ê 疼有感動我ê 心,我今歡喜反悔來改變,以後的確beh 重新做人來有孝我ê 老母。我ê 老母實在是一位罕得有勞苦ê 老母,我今仔日才深深明白老母為著我ê 犧牲,我今歡喜領受法律ê 制裁,以後beh 重新做人來成做一個基督徒。(哮 ) |
![]() |
45. 醫師:感謝主,o-ló 主!這是主奇妙ê tháu 放。你ê老母若知影這個事m̄ 知beh偌n̍i̍h 歡喜。(阿婆kap 小女出場) |
![]() |
46 . 阿婆:英傑--ah,你是án-chóaⁿ --lah?你扑死人著無?! |
![]() |
47 . 醫師:阿婆你m̄ 免煩惱,扑無死,只有淡薄傷tī 手n̍i̍h nā-tiāⁿ 。 |
![]() |
48 . 阿婆:先生,我ê子扑著你著無?!!Ah,你是阮ê 大恩人,總--是阮反轉用這款ê 歹來報你,看我有甚mi̍h 面來見你,我今有甚mi̍h 法度thang 賠你ê 罪。(哮) |
![]() |
49. 醫師:阿婆,你m̄ 免苦心,這是上帝ê 好意思,beh hō͘ 你ê子thang 反悔越轉頭--lah 。 |
![]() |
50. 浪子:阿母,你著赦免我過去ê 重罪,我實在tùi 你真背逆,不孝,攏--是行tī 烏暗ê 迷路,請你著赦免我。今我已經知影我ê 錯誤,我以後的確beh 悔改來盡我做子ê 本分--lah,我著ài 去關監,m̄ 知著偌久,總--是阿母你著歡喜來等候我koh 轉來ê 日,你著向望,來照顧你ê 身體。 |
![]() |
51. 阿婆:英傑,你真正醒悟--lah!著無!Oh,我ê 英傑,你ê 阿母今死也甘願--lah,我ê 勞苦攏無歸tī 空空--lah。這thang 講攏--是上帝ê 憐憫kap 劉醫師ê 幫贊,我真歡喜來等候你轉來,無論五年抑是十年。 |
![]() |
52. 警官:劉醫師,我會盡量來替這個青年求情,所以向望伊tī 一年久ê 中間就會thang 轉來,因為我看這個情形hō͘ 我受真大ê 感動,我以後也beh kap 你來去信耶穌聽道理。若m̄ 是信耶穌ê 人的確無有這款疼ê 感化力。 |
![]() |
53. 醫師:蔡警官,多謝你ê 幫忙,向望請你大大替阮出力,實在感謝上帝ê 疼痛,這個疼ê 氣力是tùi 上帝來--ê。咱若信靠耶穌,拜上帝,咱有無限ê 福氣,歹子變好子,歹人變好人,烏暗變光明,地獄變天堂,災禍變幸福,hō͘ 咱不時就有快樂歡喜平安ê 生活。 |
![]() |
(幕後鳴鐘ê 聲) |
![]() |
Ah,tú 好今暝就是救世主耶穌降生ê 日,全世界家家戶戶攏--是teh 歡喜慶祝聖誕,今咱也來吟一tè詩來相kap 歡喜。 |
![]() |
(吟聖詩十四首抑是二十二首) |
![]() |
--幕-- 終 |