Sèng-ke̍k tē 3 chi̍p_01
|
聖劇第三集_01 |
|---|---|
| N̂g Hoâi-un | 黃懷恩 |
|
Lōng-chú Hôe-thâu
|
浪子回頭 |
|
Cchhì-Tiong Hoe
|
刺中花 |
|
N̂g Hoâi-in Chok
|
黃懷恩著 |
|
Chok-chiá Ê Ōe
|
作者ê 話 |
|
Phah-sǹg lán ōe hoat-kiàn tio̍h tē-saⁿ-chi̍p ê hong-keh風格ū kap chêng 1,2 chi̍p khah bô siâng. Che sī in-ūi ài beh èng-hù tōe-hng kàu-hōe ê iau-kiû lâi siá ê, phah-sǹg ōe hō͘ lán chē-chē kàu-hōe kám-kak khah sek-ha̍p. Jîn-bu̍t iā m̄-bián tio̍h chin chē lâng, tī kok hong-bīn ōe khah si̍t-ēng.
|
扑算咱會發見著第3集ê 風格有kap前1、2集較無像。這是因為ài beh應付地方教會ê 要求來寫--ê,扑算會hō͘ 咱濟濟教會感覺較適合。人物也m̄免著真濟人，tī 各方面會較實用。 |
|
Lán tiong-hōe ê ko͘-sêng sī tōe-hng kàu-hōe chiàm ū saⁿ-hūn ê nn̄g-hūn, só͘-í ǹg-bāng tōe-hng kàu-hōe ōe-thang lī-ēng.
|
咱中會ê 構成是地方教會佔有三分ê 二分，所以向望地方教會會thang 利用。 |
|
Nā-sī ke̍k-pún m̄-tiāⁿ sī beh ián ê lō͘-ēng, chò tha̍k iā put-chí hó, chhin-chhiūⁿ tha̍k siáu-soat á-sī kò͘-sū chi̍t-poaⁿ hō͘ lán ōe kám-kak chin chhù-bī.
|
若是劇本m̄-tiāⁿ 是beh 演ê 路用，做讀也不止好，親像讀小說抑是故事一般hō͘ 咱會感覺真趣味。 |
|
Nā-sī ēng-gú bô ha̍h ê só͘-chāi ǹg-bāng ka-kī koh ké-chèng, khah hó nā ōe-thang tī iá-gōa chò pò͘-tō ēng lâi ián sī khah an-choân.
|
若是用語無合ê 所在向望家己koh 改正，較好若會thang tī 野外作佈道用來演是較安全。 |
|
Ǹg-bāng Siōng-tè sù-hok lán kin-nî ū chin khoài-lo̍k ū ì-gī ê Sèng-tàn cheh.
|
向望上帝賜福咱今年有真快樂有意義ê 聖誕節。 |
|
1958.7. 15. N̂g Hoâi-in 梅山
|
1958. 7. 15.黃懷恩 梅山 |
|
Lōng-chú Hôe-thâu
|
浪子回頭 |
|
浪子回頭 二幕
|
浪子回頭 二幕 |
|
人物：老婆、雪花、醫師、英傑、老板、福哥、市民a、市民b、警官。
|
人物：阿婆、雪花、醫師、英傑、老板、福哥、市民a、市民b、警官。 |
|
第一幕
|
第一幕 |
|
出場人物：老婆、雪花、醫師、英傑
|
出場人物：阿婆、雪花、醫師、英傑 |
|
場 面：一個赤貧的家裡
|
場面：一個赤貧ê 家裡 |
|
開 幕：老婆躺在右邊的床上，醫師正用診察器診察她，小女雪花在一旁仕奉之，左邊有一個小桌子，上面有醫師的皮包
|
開幕：阿婆倒tī 正爿ê 床頂，醫師tú 好用診察器診察伊，小女雪花tī 一爿事奉伊，倒爿有一個細桌仔，頂面有醫師ê 皮包。 |
|
1. 醫師: Hng, sim-chōng khah bô-la̍t, chhau-lô khah kòe-thâu ê khoán.
|
1. 醫師：Hng，心臟較無力，操勞較過頭ê 款。 |
|
(醫師回到桌子收他的東西)
|
(醫師轉去桌仔收伊ê 物件) |
|
2. 小女: Sian-seⁿ, goán a-bú ê pēⁿ-thé m̄-chai ū iàu-kín bô? Lí khòaⁿ liáu cháiⁿ-iūⁿ?
|
2. 小女：先生，阮阿母ê 病體m̄ 知有要緊無？你看了怎樣？ |
|
3. 醫師: Bô sím-mi̍h iàu-kín. Lāu-lâng khah loán-jio̍k, só͘-í nā khah chēng-ióng chiū liam-piⁿ hó-sè. Lí chiah lâi góa hia the̍h io̍h.
|
3. 醫師：無甚mi̍h 要緊。老人較軟弱，所以若較靜養就liam-pīⁿ 好勢。你chiah來我hia提藥。 |
|
4. 小女: Hó, góa chiah sûi-sî lâi khì the̍h, sian-seⁿ,lô-hoân lí kiâⁿ chiah hn̄g ê lō͘, chin to-siā lí.
|
4. 小女：好，我chiah 隨時來去提，先生，勞煩你行chiah 遠ê 路，真多謝你。 |
|
5. 醫師: Bōe, bōe! (kiâⁿ óa a-pô)A-pô, bô sím-mi̍h tāi-chì, chia̍h io̍h liam-piⁿ tio̍h hó, tio̍h pàng-sim m̄-thang hoân-ló.
|
5. 醫師：Bōe,bōe!(行倚阿婆)阿婆，無甚mi̍h代誌，食藥liam-pīⁿ 就好，著放心m̄-thang 煩惱。 |
|
6. 老婆: Sian-seⁿ, chin to-siā lí, (起身)lô-hoân lí kiâⁿchiah hn̄g ê lō͘, si̍t-chāi chin bōe kòe sim.
|
6. 阿婆：先生，真多謝你，(起身) 勞煩你行chiah 遠ê 路，實在真bōe 過心。 |
|
7. 醫師: Lí m̄-thang án-ne kóng, lí tio̍h sī án-ne gâu kāu-chhau-hoân lah!
|
7. 醫師：你m̄-thang án-ne講，你著是án-ne gâu kāu操煩--lah！ |
|
8. 老婆: Góa kin-á-ji̍t sin-thé ōe tì-chhú án-ne lóng- sī ūi-tio̍h góa chi̍t ê put-siàu kiáⁿ ê iân-kò͘.
|
8. 阿婆：我今仔日身體會致此án-ne 攏--是為著我一個不肖子ê 緣故。 |
|
9. 醫師: Lí ê kiáⁿ sī án-chóaⁿ tio̍h bô?!
|
9. 醫師：你ê子是án-chóaⁿ 著無？! |
|
10. 老婆: Góa ū chi̍t ê to̍k-seⁿ ê hāu-seⁿ, tōa-hàn sòa pìⁿ-siàng, mê-ji̍t lóng hòng-tōng tī gōa-bīn, lām-sám chò húi-lūi. Góa nā siūⁿ-tio̍h góa ê kiáⁿ góa ê sim chiū hàng-thiàⁿ kàu beh sí-khì. (lâu ba̍k-sái).
|
10. 阿婆：我有一個獨生ê後生，大漢續變相，暝日攏放蕩tī 外面，lām-sám做匪類。我若想著我ê子我ê 心就疼痛到beh 死去。(流目屎)。 |
|
11. 醫師: Ho͘, goân-lâi sī án-ne. Chóng-sī a-pô, lí m̄- thang hoân-ló, lí tio̍h thòe i kî-tó, Siōng-tè chiū ōe kái-piàn i.
|
11. 醫師：Ho͘，原來是án-ne。總--是阿婆，你m̄-thang 煩惱，你著替伊祈禱，上帝就會改變伊。 |
|
12. 老婆: Siōng-tè kiám ū hoat-tō͘ thang kái-piàn i, he si̍t-chāi sī chi̍t ê pháiⁿ kàu chhut-chhóe ê mi̍h.
|
12. 阿婆：上帝kiám 有法度thang 改變伊，he 實在是一個歹到出髓 ê 物。 |
|
13. 醫師: A-pô, lí nā lâi sìn Iâ-so͘, pài Siōng-tè, Siōng-tè chiū ū hoat-tō͘ lah.
|
13. 醫師：阿婆，你若來信耶穌，拜上帝，上帝就有法度--lah 。 |
|
14. 老婆: Siōng-tè nā ōe kái-piàn i, góa chin hoaⁿ-hí lâi sìn, si̍t-chāi góa sī í-keng chìn bô pō͘ thòe bô lō͘ lah.
|
14. 阿婆：上帝若會改變伊，我真歡喜來信，實在我是已經進無步退無路--lah 。 |
|
15. 醫師: Án-ne hó, góa lé-pài-ji̍t chiah lâi chhōa lín khì lé-pài.
|
15. 醫師：Án-ne好，我禮拜日chiah 來chhōa lín 去禮拜。 |
|
16. 老婆: Sian-seⁿ, chin to-siā , tit tio̍h lí chin tōa ê pang-chān, chin ló͘-la̍t.
|
16. 阿婆：先生，真多謝，得著你真大ê 幫贊，真ló͘力。 |
|
17. 醫師: Lí tio̍h tō-siā Siōng-tè, che lóng sī Siōng-tè ê thiàⁿ. Án-ne hó góa lâi khì, pêng-an.
|
17. 醫師：你著多謝上帝，這攏--是上帝ê 疼。Án-ne好我來去，平安。 |
|
18. 小女: Sian-seⁿ, chit ê io̍h-chîⁿ góa lēng-ji̍t chiah lâi kiáu-la̍p m̄-chai ōe sái-tit bōe? In-ūi hiān-chāi chhù-lāi tú-tn̄g bô chîⁿ.
|
18. 小女：先生，這個藥錢我另日才來繳納m̄ 知會使得bōe?因為現在厝內tú-tn̄g 無錢。 |
|
19. 醫師: Bô iàu-kín! m̄-thang khòa-lū hit ê sū, tio̍h lâi the̍h io̍h.(醫師退場)
|
19. 醫師：無要緊！m̄-thang 掛慮hit ê事，著來提藥(醫師退場)。 |
|
20. 老婆: Soat-hoa, góa tio̍h kā lí kóng m̄-bián kiò i-seng lâi, lí thái beh án-ne, lí bô siūⁿ lán chhù-lāi lóng bô chîⁿ, liān chia̍h pn̄g tio̍h bōe kò͘-tit.
|
20. 阿婆：雪花，我著kā 你講m̄免叫醫生來，你thái beh án-ne，你無想咱厝內攏無錢，liān食飯著bōe 顧--得。 |
|
21. 小女: A-bú, lí m̄-bián khòa-ì chit ê sū, lí tio̍h pàng-sim lâi chia̍h io̍h thang kóaⁿ-kín hó, í-gōa ê sū góa chiah siat-hoat, nā siat-sú lóng bô chîⁿ góa chiah chiong góa chit kha kim chhiú-chí lâi piàn-bē lâi la̍p io̍h-chîⁿ lah.
|
21. 小女：阿母，你m̄免掛意這個事，你著放心來食藥thang 趕緊好，以外ê事我才設法，若設使攏無錢我才將我這kha金手指來變賣來納藥錢--lah 。 |
|
22. 老婆: Soat-hoa, si̍t-chāi hō͘ lí chin lô-khó͘ tio̍h-bôa, a-bú lóng bōe-thang kā lí chai-pôe, hoán-tńg tit-tio̍h lí chin tōa ê pang-chān. Siat-sú lí ê a-hiaⁿ nā bô pháiⁿ-kiáⁿ, á-sī lí ê a-pa nā bô chá kòe-sin lán bó-kiáⁿ tio̍h m̄-bián chiah-n̍i̍h pháiⁿ-miā(háu).
|
22. 阿婆：雪花，實在hō͘ 你真勞苦著磨，阿母攏bōe-thang kā 你栽培，反轉得著你真大ê 幫贊。設使你ê 阿兄若無歹子，抑是你ê 阿爸若無早過身咱母子著m̄免chiah-n̍i̍h歹命(哮)。 |
|
23. 小女: A-bú, chhiáⁿ lí m̄-thang koh siūⁿ-tio̍h hiah ê sū lâi ka-kī kek-sim iu-būn. Lí bô thiaⁿ hit ê sian-seⁿ teh kóng lán nā sìn Iâ-so͘ kî-tó Siōng-tè,Siōng-tè chiū ōe kái-piàn a-hiaⁿ, lán iàu-kín tio̍h kín-kín lâi khì thiaⁿ tō-lí lah.
|
23. 小女：阿母，請你m̄-thang koh 想著hiah-ê 事來家己激心憂悶。你無聽hit ê 先生teh 講咱若信耶穌祈禱上帝，上帝就會改變阿兄，咱要緊著緊緊來去聽道理--lah 。 |
|
24. 老婆: Sī lah, tû-khì sìn Iâ-so͘ pài Siōng-tè í-gōa iā bô lō͘ lah..................Taⁿ lí ê a-hiaⁿ m̄-chai kúi-ji̍t bô tńg-lâi lah ho͘N3?
|
24. 阿婆：是--lah，除去信耶穌拜上帝以外也無路lah……今你ê 阿兄m̄知幾日無轉來--lah ho͘N3？ |
|
25. 小女: Chha-put-to cha̍p gōa-ji̍t bô tńg-lâi lah!
|
25. 小女：差不多十外日無轉來--lah ! |
|
26. 老婆: M̄-chai tī sím-mi̍h só͘-chāi? m̄-chai ū pêng-an á bô? seⁿ tio̍h hit-khoán pháiⁿ-kiáⁿ, si̍t-chāi it-seng oàn-thàn.
|
26. 阿婆：M̄ 知tī 甚mi̍h 所在？m̄ 知有平安抑無？生著hit 款歹囝，實在一生怨嘆。 |
|
27. 小女: A-bú, lí m̄-bián koh kā i siūⁿ lah, nā ū sèⁿ-miā i chiū ōe koh tńg-lâi lah, koh hit-khoán lâng tńg-lâi lóng bô hó tāi-chì, lí siàu-liām i ū sím-mi̍h lō͘-ēng.(浪子英傑出場)
|
27. 小女：阿母，你m̄ 免koh kā 伊想--lah ，若有生命伊就會koh 轉來--lah，koh hit 款人轉來攏無好代誌，你數念伊有甚mi̍h 路用。(浪子英傑出場) |
|
28. 浪子: Lâng nā bô chîⁿ chiū kiâⁿ bô lō͘ ........ Góa nā lâi kàu chit ê mn̂g-kháu, chiū tit-tit beh áu-náu khí-lâi. Sàn kàu kúi tio̍h m̄-káⁿ óa-lâi, nā siūⁿ-tio̍h chit-khoán sàn-chhiah ê ka-têng sim-lāi chin thòng-hūn, khòaⁿ chheng khòaⁿ bān mā bô lâng chhin-chhiūⁿ chit-khoán ê ka-têng, si̍t-chāi chhut-sì tī chit-khoán ka-têng sī soe-bái kàu-ke̍k........O͘-í, góa tńg-lâi lah, khui-mn̂g lah! (phah mn̂g, 小女lâi khui-mn̂g).
|
28. 浪子：人若無錢就行無路……我若來到這個門口，就直直beh 懊惱起來。散到鬼著m̄ 敢倚來，若想著這款散赤ê 家庭心內真痛恨，看千看萬mā 無人親像這款ê 家庭，實在出世tī 這款家庭是衰bái 到極。……O͘-í,我轉來--lah，開門--lah！(扑門，小女來開門)。 |
|
29. 小女: Ah, A-hiaⁿ! A-bú, A-hiaⁿ tńg-lâi lah!
|
29. 小女：Ah，阿兄!阿母，阿兄轉來--lah ! |
|
30. 老婆: Eng-kiat, lí tńg-lâi tio̍h bô, lí sī khì tó-ūi lah, chiah-n̍i̍h kú lóng bô tńg-lâi.
|
30. 阿婆：英傑，你轉來著--無，你是去tó位--lah，chiah-n̍i̍h 久攏無轉來。 |
|
31. 浪子: Góa ê sū lí m̄-bián kā góa kan-sia̍p, kiat-kio̍k lí iā bô thang hō͘ lí ê kiáⁿ hēng-hok lah............ Ū tê bô?
|
31. 浪子：我ê 事你m̄ 免kā 我干涉，結局你也無thang hō͘ 你ê子幸福--lah …………有茶無？ |
|
32. 老婆: Soat-hoa, lí khì thin chi̍t-poe tê chhut-lâi ho͘ lín a-hiaⁿ lim.(A-hoa bô goān-ì ê khoán khì phâng-tê chhut-lâi).
|
32. 阿婆：雪花，你去thîn一杯茶出來hō͘ lín 阿兄飲。(阿花無願意ê 款去捧茶出來)。 |
|
33. 小女: A-hiaⁿ, chhiáⁿ lí ēng tê,(chi̍h tê ê sî hut-jiân khòaⁿ-tio̍h).
|
33. 小女：阿兄，請你用茶。(chi̍h 茶ê 時忽然看著)。 |
|
34. 浪子: Ah, lí kòa che sī sím-mi̍h? Pak khí-lâi, pak khí-lâi!!
|
34. 浪子：Ah，你掛這是甚mi̍h？剝起來，剝起來!! |
|
35. 小女: A-hiaⁿ, lí sī beh chhòng sím-mi̍h lah! chit ê m̄-sī lí ê lah, che sī góa chò khó͘-kang só͘ khiām lâi hak ê mi̍h lah!
|
35. 小女：阿兄，你是beh 創甚mi̍h lah！這個m̄ 是你ê --lah ，這是我做苦工所儉來hak ê 物--lah ! |
|
36. 浪子: Lí m̄-bián ke kóng ōe, kín pak khí-lâi, nā bô sī beh phah hō͘ lí sí ô͘(nn̄g-lâng saⁿ chhiúⁿ,老婆óa khì chiàm).
|
36. 浪子：你m̄ 免加講話，緊剝起來，若無是beh 扑hō͘ 你死ô͘ (兩人相搶，阿婆倚去chiàm ) 。 |
|
37. 老婆: Soat-hoa, pak khí-lâi hō͘ i lah, pak khí-lâi hō͘ i lah!
|
37. 阿婆：雪花，剝起來hō͘ 伊mlah5,剝起來hō͘ 伊--lah ! |
|
38. 浪子: Góa teh bô chîⁿ thang ēng, lí chiah chiong chit ê kòa tī chhiú-n̍i̍h, pak-tó͘ pa̍k teh iau lí chiah teh ài súi. (chhiú-chí pak khí-lâi) Chit ê chòe chió mā ū nn̄g-pah gōa kho͘. Lâng sī chîⁿ teh chò lâng, nā bô chîⁿ chiū ū si̍t mā bô hoat-tō͘ thang poe thiⁿ, ū chîⁿ chiah ū chhin, bô chîⁿ chiū m̄ chún lí sī sím-mi̍h lâng, che chiū-sī kiò chòe sè-kan lâng lah.
|
38. 浪子：我teh 無錢thang 用，你chiah 將這個掛tī 手n̍i̍h ，腹肚縛teh 枵你chiah teh 愛水。(手指剝起來)這個最少mā 有二百外箍。人是錢 teh 做人，若無錢就有翼mā 無法度thang 飛天，有錢才有親，無錢就m̄准你是甚mi̍h人，這就是叫做世間人--lah 。 |
|
39. 小女: A-hiaⁿ, lí choân-jiân long bô liông-sim, lán ka-têng hiān-chāi lóng bô thang chia̍h, lí chai bô? A-bú ūi-tio̍h lí mê-ji̍t thòng-khó͘ tì-kàu sin-thé tài pēⁿ bōe khí chhn̂g, lí chai bô? Lí kàu chit ê sî iáu m̄-chai thang chhé-ngō͘ hoán-tńg chiong goán só͘ óa-khò ê chhiú-chí kā goán pak khì, lí choân-jiân lóng bô thian-liông.
|
39. 小女：阿兄，你全然攏無良心，咱家庭現在攏無thang 食，你知無？阿母為著你暝日痛苦致到身體帶病bōe 起床，你知無？你到這個時iáu m̄ 知thang 醒悟反轉將阮所倚靠ê 手指kā 阮剝去，你全然攏無天良。 |
|
40. 浪子: Sím-mi̍h! Lí teh ke kóng ōe! sím-mi̍h kiò-chò liông-sim, sím-mi̍h kiò-chò thian-liông, ū chîⁿ siōng iàu-kín lah, chhin-chhiūⁿ chit-khoán sàn phí-phí ê ka-têng eng-kai siū chiù-chó͘ hó lah,chit-khoán ê ka-têng ū sím-mi̍h hó thang hō͘ lâng liû-sim? Lú-khòaⁿ lú àu-náu, lú siūⁿ lú chheh.
|
40. 浪子：甚mi̍h！你teh 加講話! 甚mi̍h叫做良心，甚mi̍h叫做天良，有錢上要緊--lah，親像這款散phí-phí ê 家庭應該受咒詛好--lah，這款ê 家庭有甚mi̍h好thang hō͘ 人留心？愈看愈懊惱，愈想愈chheh 。 |
|
41. 老婆: Eng-kiat, lí tio̍h sià-bián góa bô kàu-gia̍h chīn góa ê pún-hūn chai-pôe lí, hō͘ lí thang tit-tio̍h hēng-hok. Lí mā chai, lín a-pa tī lín sòe-hàn ê sî chiū kòe-sin, a-bú chiū ēng góa loán-jio̍k cha-bó͘ lâng ê chhiú lâi iúⁿ-chhī lín nn̄g-lâng. Bô-lūn hong-hō͘ bô-lūn kôaⁿ-joa̍h, góa lóng sī phoe-miā lâi teh chò kang, chi̍t ê āiⁿ tī kha-chiah, chi̍t ê khan tī chhiú-n̍i̍h khì kā lâng sóe saⁿ, ū sî tio̍h àm-mê iā bô khùn lâi kā lâng chò saⁿ, ū sî tio̍h ji̍p khì chhim-soaⁿ táu-té khì khioh tek-hio̍h chhut-lâi bē, hit ê kan-khó͘ si̍t-chāi bô hoat-tō͘ thang kóng. Khiok a-bú bô oàn-thàn, in-ūi góa chin hoaⁿ-hí ūi-tio̍h lín nn̄g lâng án-ne chò, sī ǹg-bāng lín nn̄g-lâng chiong-lâi ōe kap lâng saⁿ chhin-chhiūⁿ, ōe-thang hēng-hok, chóng-sī bô gî-ngō͘, ē chiâⁿ-chò kin-á-ji̍t chit-khoán ê chhám-kéng(háu), góa ê lô-khó͘ lóng kui tī o͘-iú, góa ê bîn-bāng lóng soah khì lah!
|
41. 阿婆：英傑，你著赦免我無夠額盡我ê 本分栽培你，hō͘ 你thang 得著幸福。你mā 知，lín 阿爸tī lín 細漢ê 時就過身，阿母就用我軟弱查某人ê 手來養飼lín 兩人。無論風雨無論寒熱，我攏--是phoe 命來teh 做工，一個背tī 腳脊，一個牽tī 手n̍i̍h 去kā 人洗衫，有時著暗暝也無睏來kā 人做衫，有時著入去深山斗底去拾竹葉出來賣，hit ê 艱苦實在無法度thang 講。卻阿母無怨嘆，因為我真歡喜為著lín 兩人án-ne做，是向望lín 兩人將來會kap人相親像，會thang幸福，總--是無疑誤，會成做今仔日這款ê慘景(哮)，我ê 勞苦攏歸tī 烏有，我ê 眠夢攏煞去--lah ! |
|
42. 浪子: Chit khoán sī thang kiàn-siàu, thang iàm-ò͘ ê le̍k-sú, lí m̄-thang koh hō͘ góa thiaⁿ-kìⁿ chit-khoán ōe, lú thiaⁿ sī lú kan-khó͘ sim. Góa beh lâi khì lah, góa kap chit-khoán siū chiù-chó͘ ê ka têng éng-oán sī bô kan-sia̍p lah(退場).
|
42. 浪子： 這款是thang 見笑，thang 厭惡ê 歷史，你m̄-thang koh hō͘ 我聽見這款話，愈聽是愈艱苦心。我beh 來去--lah，我kap 這款受咒詛ê 家庭永遠是無干涉--lah (退場) 。 |
|
43. 小女: A-bú, taⁿ lán beh án-chóaⁿ, chhù-lāi lóng bô chîⁿ, koh io̍h-chîⁿ mā sòa bô hoat-tō͘ thang la̍p lah.
|
43. 小女：阿母，今咱beh án-chóaⁿ，厝內攏無錢，koh 藥錢mā 續無法度thang納--lah。 |
|
44. 老婆: Bô iàu-kín lah, chhut-chāi thiⁿ ê an-pâi lah, góa chêng-sì m̄-chai hoān-tio̍h sím-mi̍h tōa-chōe, kim-seng chiah lâi tú-tio̍h chiah-n̍i̍h pháiⁿ-miā.
|
44. 阿婆：無要緊--lah，出在天ê 安排--lah，我前世m̄ 知犯著甚mi̍h大罪，今生chiah 來tú 著chiah-n̍i̍h 歹命。 |
|
45. 小女: A-bú, lí m̄-thang kòe-thâu oàn-thàn lah, hit ê sian-seⁿ ū beh chhōa lán khì sìn Iâ-so͘, lán nā khì sìn kiám-chhái ōe-thang khah hó-sè lah.
|
45. 小女：阿母，你m̄-thang 過頭怨嘆--lah，hit ê 先生有beh chhōa 咱去信耶穌，咱若去信kiám-chhái 會thang較好勢--lah。 |
|
46. 老婆: Sī lah, taⁿ tio̍h bāng Iâ-so͘ lâi chín-kiù lán lah.(吟詩聖詩222首之調).
|
46. 阿婆：是--lah，今著望耶穌來拯救咱--lah。(吟詩聖詩222首ê 調) |
|
1. Chò lâng tiàm chit sè-kan Si̍t-chāi iu-būn khó͘-thàng Óa-khò Iâ-so͘ hû-chhî pó-hō͘ Ǹg-bāng sim-lāi an-lo̍k |
1. 做人tiàm 這世間 實在憂悶苦痛 倚靠耶穌扶持保護 向望心內安樂 |
|
2. Siūⁿ kàu góa ê kiáⁿ-jî Tì-kàu mê-ji̍t ai-oàn Siáⁿ-sî i ōe hôe-thâu tńg-ì Chí ū bāng Chú lîn-bín. |
2. 想到我ê 子兒 致到暝日哀怨 啥時伊會回頭轉意 只有望主憐憫 |
|
─Bō͘─
|
--幕-- |
|
第二幕
|
第二幕 |
|
出場人物：浪子、老板、福哥、醫師、市民a、市民b、警官。
|
出場人物：浪子、老板、福哥、醫師、市民a、市民b、 警官。 |
|
場 面：公園內
|
場 面：公園內 |
|
開 幕：公園黃昏的光影，浪子束手靠在樹幹
|
開 幕：公園黃昏ê 光影，浪子束手靠tī 樹身 |
|
1.浪子: Lâng nā bô chîⁿ chiū kiâⁿ bô lō͘, lâng beh chò tāi-chì bô chîⁿ chiū bô piàn-pō͘, ū chîⁿ lí-hiaⁿ góa-tī chi̍t tōa-tīn, bô chîⁿ chiū bô lâng káⁿ óa-lâi,sè-kan si̍t-chāi sī thài bô chêng.......Ah, chîⁿ ēng liáu sim chin ut-chut, thâu-khak siūⁿ chîⁿ siūⁿ kàu îⁿ-tîⁿ. Taⁿ tio̍h tiàm chit ê chhiū-kha lâi chò khòaⁿ ū sím-mi̍h n̂g-kim-bāng á-bô.(坐下)
|
1. 浪子：人若無錢就行無路，人beh 做代誌無錢就無變步，有錢你兄我弟一大陣，無錢就無人敢倚來，世間實在是太無情………Ah，錢用了心真鬱卒，頭殼想錢想到îⁿ-tîⁿ 。今著tiàm 這個樹腳來做看有甚mi̍h 黃金夢抑無。(坐下) |
|
2.老板: Chit ê lâng koh bīn-se̍k bīn-se̍k, goân-lâi chiū-sī Eng-kiat-á. O͘-í, Eng-kiat, chin chhàu-khám, góa tú-tú teh chhōe lí.
|
2. 老板：這個人koh 面熟面熟，原來就是英傑仔。O͘-í,英傑，真chhàu-khám ，我tú-tú teh chhōe 你。 |
|
3.浪子: O͘h, lí sī chhài-tiàm ê láu-pán! lí chhōe góa ū sím-mi̍h kùi-sū.
|
3. 浪子：O͘h，你是菜店ê 老板！你chhōe 我有甚mi̍h 貴事。 |
|
4.老板: Taⁿ lí sòa teh ké gōng, lí sòa m̄-chai góa chhōe lí beh án-chóaⁿ, lí chêng-ji̍t khiàm hiah ê chîⁿ tàu-té sī sím-mi̍h sî chiah beh hêng lah?!
|
4. 老板：今你續 teh 假憨，你續 m̄ 知我chhōe 你beh án-chóaⁿ，你前日欠hiah-ê 錢到底是甚mi̍h 時才beh 還--lah？! |
|
5.浪子: Láu-pán, lí m̄-bián khòa-lū, góa bōe cháu lí hiah ê chîⁿ lah. Góa lēng-ji̍t nā ū chîⁿ chiū ōe kap lí sǹg chheng-chhó lah, chhiáⁿ lí koh hō͘ góa khiàm chi̍t-ē lah.
|
5. 浪子：老板，你m̄免掛慮，我bōe 走你hiah-ê 錢--lah。我另日若有錢就會kap 你算清楚--lah，請你koh hō͘ 我欠一下--lah。 |
|
6.老板: Lí só͘ kóng ê ōe bô chi̍t kù ōe sìn tit, siàu-liân lâng m̄-tam su-iâⁿ, káⁿ chò tio̍h káⁿ tam-tng chiah hó, góa sī hō͘ lí bōe phiàn tit ê lâng, hān-kàu nî-bóe lí nā bô lâi sǹg siàu, góa chiū ū pān-hoat!(退場)
|
6. 老板：你所講ê 話無一句會信--得，少年人m̄-tam 輸贏，敢做著敢擔當才好，我是hō͘ 你bōe 騙--得 ê 人，限到年尾你若無來算帳，我就有辦法！(退場) |
|
7.浪子: Soe-ūn bô tan hêng, lâng bô chîⁿ sim-lāi chin ut-chut koh tú-tio̍h chit ê oa̍h-kúi lâi teh kiáu-jiáu. Ah, chit sè-kan lóng sī hû-khí bô hû-tó, it-tàn nā sit-pāi chiū hō͘ lâng khòaⁿ-khin, siūⁿ-lâi siūⁿ-khì lóng sī oàn-chheh ka-kī ê kéng-gū.
|
7 .浪子：衰運無單行，人無錢心內真鬱卒koh tú--著這個活鬼來teh 攪擾。Ah，這世間攏--是扶起無扶倒，一旦若失敗就hō͘ 人看輕，想來想去攏--是怨慼家己ê 境遇。 |
|
(福哥仔出場)
|
(福哥仔出場) |
|
8.福哥: A̍i̍h, hiaⁿ-tī ah, chin tú-hó, góa kú-kú teh chhōe lí bô, lí kiat-kio̍k sī cháu bô lō͘ lah.
|
8. 福哥：A̍i̍h，兄弟ah，真tú 好，我久久teh chhōe 你無，你結局是走無路--lah。 |
|
9.浪子: Oh, A-hok-hiaⁿ, kiú-kiàn kiú-kiàn. Góa chòe-kīn tio̍h khì chhut-gōa sòa bōe-thang khì pài-hóng lí, chin sit-lé, m̄-chai lí ū sím-mi̍h kùi-sū?
|
9. 浪子：Oh，阿福兄，久見久見。我最近著去出外續 bōe-thang 去拜訪你，真失禮，m̄ 知你有甚mi̍h貴事？ |
|
10.福哥: Lí sòa m̄-chai sím-mi̍h kùi-sū, lí sòa teh ké-khong ké-gōng, chêng-ji̍t hiah ê kiáu chîⁿ lí sī àn-sǹg m̄-hêng tio̍h bô? Siàu-liân lâng chò hit hō hô͘-tô͘ sū!
|
10.福哥：你續 m̄ 知甚mi̍h 貴事，你續 teh 假khong 假憨，前日hiah-ê kiáu 錢你是按算m̄ 還著無？少年人做hit 號糊塗事！ |
|
11.浪子: A-hok-hiaⁿ, m̄-bián án-ne siū-khì lah, lán goân-lâi kiám m̄-sī kiat-pài hiaⁿ-tī ê pêng-iú mah!Lí mā tòa-liām chit ē.
|
11.浪子：阿福兄，m̄ 免án-ne 受氣--lah，咱原來kiám m̄ 是結拜兄弟ê 朋友--mah！你mā帶念一下。 |
|
12.福哥: Lí poa̍h-su kiáu m̄-hêng teh kóng sím-mi̍hkia̍t-pài ê pêng-iú! Pêng-iú iā-sī tio̍h chiàu khí-kang, bô chîⁿ lâi pho͘-pâi chiū góa kap lí bô kan-sia̍p.
|
12.福哥：你poa̍h 輸kiáu m̄ 還teh 講甚mi̍h 結拜ê 朋友！朋友也是著照起工，無錢來鋪排就我kap 你無干涉。 |
|
13.浪子: Ōe lah, góa ōe hêng lí lah, lí m̄-bián khòa-lū lah, góa chai-iáⁿ chit ê sè-kan bô ū chi̍t ê si̍t-chāi ū chêng ê lâng, lóng sī lī-kí chú-gī, kim-chîⁿ chú-gī lah.
|
13. 浪子：會--lah，我會還你--lah，你m̄ 免掛慮--lah，我知影這個世間無有一個實在有情ê 人，攏--是利己主義，金錢主義--lah。 |
|
14.福哥: Sī lah, lí kàu-taⁿ chiah chai-iáⁿ(tio̍h-bô?!) bô-lūn jû-hô lí tio̍h kín-kín the̍h lâi hêng, nā bô góa sī ū góa ê pān-hoat.(退場)
|
14 . 福哥：是--lah，你到今才知影(著無？！) 無論如何你著緊緊提 來還，若無我是有我ê 辦法。(退場) |
|
15.浪子: Choa̍t-chêng o͘-àm ê sè-kài, ná siūⁿ ná thó-iàm, lâng nā it-tàn sit-pāi chiū chhin-iú iā pìⁿ chhut pháiⁿ-bīn, sòa iàm-chiān lán. Ah, chit khoán ê sè-kài sī thái choa̍t-chêng khó͘-o͘N3 lah! Chí-ū nā ū chîⁿ chiū ōe-thang cheng-ho̍k chit ê sè-kài, sio̍k-gú kóng, ū chîⁿ sái kú mā ōe oe-bō.!hia koh ū chi̍t ê sin-sū nge̍h chi̍t ê phôe-pau tùi chia lâi, phah-sǹg hit ê phôe-pau sī té chîⁿ chiah tio̍h. Koh chit sî lóng bô lâng teh khòaⁿ?? Hó, góa tio̍h lâi kā i chhiúⁿ hit ê phôe pau-á?
|
15 . 浪子：絕情烏暗ê 世界，那想那討厭，人若一旦失敗就親友也變出歹面，續iàm-chiān 咱。Ah，這款ê 世界是太絕情可惡--lah！只有若有錢就會thang 征服這個世界，俗語講：『有錢使鬼mā 會oe 磨。』 Hia koh 有一個紳士nge̍h 一個皮包tùi chia 來，扑算 hit ê 皮包是té 錢才著。Koh 這時攏無人teh 看？？好，我著來kā 伊搶hit ê 皮包仔。 |
|
(醫師出場由左邊走到右邊)
|
(醫師出場由倒爿行到正爿) |
|
16.浪子: A̍i̍h, bān sī lè!
|
16.浪子：A̍i̍h，慢是--lè ! |
|
17.醫師: Sím-mi̍h lâng, lí kiò góa ū sím-mi̍h kùi-sū?
|
17 .醫師：甚mi̍h 人，你叫我有甚mi̍h 貴事？ |
|
18.浪子: Kín-kín chiong lí ê phôe-pau-á pàng hē lè!
|
18 .浪子：緊緊將你ê 皮包仔放下--lè ! |
|
19.醫師: Oh, lí sī chha̍t tio̍h bô?
|
19. 醫師：Oh，你是賊著無？! |
|
20.浪子: Kóaⁿ-kín pàng hē teh, nā koh ke kóng ōe chiū beh phah hō͘ lí sí.(拿鎗出來)
|
20. 浪子：趕緊放下--teh，若koh 加講話就beh 扑hō͘ 你死。(拿銃出來) |
|
21.醫師: Chha̍t-ò͘, chha̍t-ò͘! Kiù-lâng ò͘, kiù-lâng-ò͘!
|
21. 醫師：賊ò͘,賊ò͘ !救人ò͘,救人ò͘! |
|
22.浪子: Lí kai-sí lah! (ēng chhèng tōaⁿ saⁿ mn̂g,醫師phôe-pau-á hiat hō͘ i, lâi tio̍h-siong cháu-khì.浪子khioh phôe-pau-á teh chhiau-chhōe lāi-bīn.市民a出場)
|
22.浪子：你該死--lah！(用銃彈三門，醫師皮包仔hiat hō͘ 伊，來著傷走去。浪子拾皮包仔teh chhiau-chhōe 內面。市民a出場) |
|
23.市民a: Chha̍t-ò͘! chha̍t-ò͘! Phah sí lâng ò͘!
|
23.市民a：賊ò͘!賊ò͘!!扑死人ò͘! |
|
(Cháu-óa khì kap i sio-phah)
|
(走倚去kap 伊相扑 ) |
|
24.市民b: Lia̍h chha̍t ò͘! lia̍h chha̍t ò͘!
|
24 .市民b：掠賊ò͘!掠賊ò͘! |
|
(Òa-khì tàu lia̍h, chiong浪子 lia̍h khí-lâi)
|
(倚去tàu掠，將浪子掠起來) |
|
25.市民a: Hó tōa-táⁿ, hó tōa-táⁿ, tn̂g-thâu pe̍h-ji̍t tiàm chit ê kong-chiòng ê só͘-chāi teh chhiúⁿ-kiap, chin hó táⁿ, chin hó-táⁿ!
|
25 .市民a：好大膽，好大膽，長頭白日tiàm 這個公眾ê 所在teh 搶劫，真好膽，真好膽！ |
|
26.市民b: Pa̍k khí-lâi! siàu-liân lâng m̄-thó m̄-thàn, chò chit-khoán hoâiⁿ-pà sū, tio̍h ài tōa-tōa kā i kà-sī chiah ōe sái-tit.
|
26 .市民b：縛起來！少年人m̄ 討m̄ 趁，做這款橫霸事，著ài 大大kā 伊教示才會使--得。 |
|
(警官出場)
|
(警官出場) |
|
27.警官: Án-chóaⁿ! Sím-mi̍h sū-kiāⁿ?!
|
27 . 警官：Án-chóaⁿ甚mi̍h 事件？! |
|
28.市民a: Tāi-jîn ah, chit ê hiông-hoān ēng chhèng phah-sí lâng lâi chhiúⁿ i ê phôe-pau-á lah!
|
28 . 市民a：大人--ah！這個凶犯用銃扑死人來搶伊ê 皮包仔 --lah ! |
|
29.市民b: Tāi-jîn ah, che tio̍h ài giâm-giâm lâi kā i chhú-lí chiah ōe ēng-tit, nā bô kiâⁿ liáu ōe phah-pháiⁿ lâng ê tōa-sè.
|
29. 市民b：大人--ah，這著ài 嚴嚴來kā 伊處理才會用--得，若無驚了會扑歹人ê 大細。 |
|
30.警官: Khó-o͘N3 kàu-ke̍k, pa̍k khí-lâi!(Kā pa̍k) Siàu-liân-lâng hó tōa táⁿ, káⁿ chò chit khoán khó-o͘N3 ê sū, lí sī àn-sǹg m̄ ài chò lâng tio̍h bô? lí sī ài chhōe sí-lō͘ mah?!
|
30 . 警官：可惡到極，縛起來！(Kā 縛)少年人好大膽，敢做這款可惡ê 事，你是按算m̄ ài 做人著無？你是ài chhōe 死路--mah？！ |
|
31.浪子: Tāi-jîn ah, chhiáⁿ lí sià-bián góa, góa í-āu m̄-káⁿ án-ne chò lah.
|
31. 浪子：大人--ah ，請你赦免我，我以後m̄敢án-ne 做--lah 。 |
|
(醫師出場)
|
(醫師出場) |
|
32.警官: Lí káⁿ tī chit ê pe̍h-ji̍t ê sî, tiàm chit ê kong-chiòng ê lō͘-piⁿ khui-chhèng phah lâng, sòa chhiúⁿ lâng ê mi̍h, lí ê chōe kàu-gia̍h ok-to̍k,chiàu lu̍t-hoat lí tio̍h siū ke̍k-tāng ê sí-hêng.
|
32. 警官：你敢 tī 這個白日ê 時，tiàm 這個公眾ê 路邊開銃扑人，續搶人ê 物，你ê 罪到gia̍h 惡毒，照律法你著受極重ê 死刑。 |
|
33.浪子: Tāi-jîn ah, (kūi lo̍h khì) góa chhù-n̍i̍h iáu-kú chi̍t ê loán-jio̍k tó-chhn̂g kú-kú ê lāu-bú kap chi̍t ê bōe sêng-jîn ê sió-mōe, chhiáⁿ lí tio̍h khó-lîn góa ê lāu-bú, siat-sú i nā chai-iáⁿ chit ê sū, kiaⁿ-liáu góa ê lāu-bú ōe hoân-ló sòa lâi sí.
|
33. 浪子：大人--ah，(跪落去)我厝n̍i̍h iáu- kú一個軟弱倒床久久ê 老母kap一個bōe 成人ê 小妹，請你著可憐我ê 老母，設使伊若知影這個事，驚了我ê 老母會煩惱續來死。 |
|
34.警官: Lí m̄-bián ke kóng ōe, bô-lūn sím-mi̍h sū-chêng lí lóng bô hoat-tō͘ thang thoat-chhut hêng-hoa̍t lah, kiâⁿ, lâi-khì kéng-chhat-só͘.
|
34 . 警官：你m̄ 免加講話，無論甚mi̍h 事情你攏無法度thang 脫出刑罰--lah，行，來去警察所。 |
|
35.醫師: Chhòa kéng-koaⁿ, lô-hoân lí, lô-hoân lí!
|
35 . 醫師：蔡警官，勞煩你，勞煩你！ |
|
36.警官: Oh, Lâu i-seng, sī m̄-sī lí sī pī-hāi-jîn?
|
36 . 警官：Oh，劉醫師，是m̄ 是你是被害人？ |
|
37.醫師: Sī lah, góa sī pī-hāi-jîn, chóng-sī chin ka-chài, Siōng-tè ū pó-siú góa, hō͘ góa lóng bô siū tio̍h sím-mi̍h sún-hāi, chí-ū khang-kiaⁿ chi̍t-tiûⁿ.
|
37 . 醫師：是--lah，我是被害人，總--是真佳哉，上帝有保守我，hō͘ 我攏無受著甚mi̍h損害，只有空驚一場。 |
|
38.警官: Án-ne chin hó ka-chài, nā bô lí chi̍t-miā káⁿ tio̍h o͘-ho͘ ai-chài.
|
38 . 警官：Án-ne 真好家在，若無你一命敢著烏呼哀哉。 |
|
39.醫師: Chhòa kéng-koaⁿ, kó-jiân góa lóng bô tú-tio̍h sím-mi̍h siū siong, chit ê chheng-liân ê chōe kiám bōe thang sià-bián i ?
|
39. 醫師：蔡警官，果然我攏無tú 著甚mi̍h 受傷，這個青年ê 罪kiám bōe thang 赦免伊？ |
|
40.警官: He sī bōe ēng-tit, te̍k-piat lí sī bô eng-kai thòe i kóng chêng, chit-khoán ê hoān-chōe sī tio̍h giâm-giâm ê chhú-hoa̍t, hō͘ i āu-pái m̄-káⁿ án-ne chò.
|
40. 警官：He是bōe 用得，特別你是無應該替伊講情，這款ê 犯罪是著嚴嚴ê 處罰，hō͘ 伊後擺m̄敢 án-ne 做。 |
|
41.醫師: Lí kóng án-ne iā-sī tio̍h, put-kò lâng nā m̄-sī tùi Siōng-tè ê sîn lâi chin-si̍t kái-piàn, chiū sím-mi̍h hoat-lu̍t iā bô hoat-tō͘, hoán-tńg sī hō͘ lâng ná ke-thiⁿ chōe-ok. Nā-sī chit ê chheng-liân góa khòaⁿ sī ū sim beh hóe-kái lah, i ê lāu-bú sió-mōe lóng mê-ji̍t teh kiû-kiò Siōng-tè kín-kín kái-piàn i, góa iā-sī ta̍k-ji̍t teh thòe i kî-tó, só͘-í Siōng-tè ōe thiaⁿ goán ê kî-tó.
|
41. 醫師：你講án-ne 亦是著，不過人若m̄ 是tùi 上帝ê 神來真實改變，就甚mi̍h 法律也無法度，反轉是hō͘ 人那加添罪惡。若是這個青年我看是有心beh 悔改--lah，伊ê 老母小妹攏暝日teh 求叫上帝緊緊改變伊，我亦是teh 替伊祈禱，所以上帝會聽阮ê 祈禱。 |
|
42.警官: Lâu i-seng, lí bat chit ê lâng kap i ê ka-cho̍k mah?
|
42. 警官：劉醫師，你bat 這個人kap 伊ê 家族--mah？ |
|
43.醫師: Sī, i ê lāu-bú sī chi̍t-ūi chin khó-chhú, hán-tit khòaⁿ-kìⁿ ê hū-jîn-lâng, i ê tiōng-hu chá chiū kòe-sin, ka-kī chi̍t lâng phah-piàⁿ lâi iúⁿ-chhī nn̄g ê kiáⁿ-jî. I iā ūi-tio̍h chit ê chheng-liân hòng-tōng ê iân-kò͘, mê-ji̍t hoân-ló tì-kàu phòa-pīⁿ, góa ū khì khòaⁿ i, iā ū chhōa in lâi teh thiaⁿ tō-lí.
|
43. 醫師：是，伊ê 老母是一位真可取，罕得看見ê 婦人人，伊ê 丈夫早就過身，家己一人扑拚來養飼兩個子兒。伊也為著這個青年放蕩ê 緣故，暝日煩惱致到破病，我有去看伊，亦有chhōa in 來teh 聽道理。 |
|
44.浪子: (Cháu-óa kūi tī醫師ê bīn-chêng)sian-seⁿ,chhiáⁿ lí sià-bián góa, góa hiám-hiám hāi-sí lí ê sèⁿ-miā, chóng-sī lí iáu-kú lóng bô oàn-hūn góa,sòa thòe góa kiû-chêng. Oh, chit-khoán ê thiàⁿ-sim sī pí chîⁿ koh khah pó-pòe. Lí ê thiàⁿ ū kám-tōng góa ê sim, góa taⁿ hoaⁿ-hí hoán-hóe lâi kái-piàn, í-āu tek-khak beh tiông-sin chò lâng lâi iú-hàu góa ê lāu-bú. Góa ê lāu-bú si̍t-chāi sī chi̍t-ūi hán-tit-ū lô-khó͘ ê lāu-bú, góa kin-á-ji̍t chiah chhim-chhim bêng-pe̍k lāu-bú ūi-tio̍h góa ê hi-seng, góa taⁿ hoaⁿ-hí niá-siū hoat-lu̍t ê chè-chhâi,í-āu beh tiông-sin chò lâng lâi chiâⁿ-chò chi̍t ê Ki-tok-tô͘.(háu)
|
44. 浪子：(走倚跪tī 醫師ê 面前)先生，請你赦免我，我險險害死你ê 性命，總--是你iáu-kú 攏無怨恨我，續替我求情。Oh，這款ê 疼心是比錢koh 較寶貝。你ê 疼有感動我ê 心，我今歡喜反悔來改變，以後的確beh 重新做人來有孝我ê 老母。我ê 老母實在是一位罕得有勞苦ê 老母，我今仔日才深深明白老母為著我ê 犧牲，我今歡喜領受法律ê 制裁，以後beh 重新做人來成做一個基督徒。(哮 ) |
|
45. 醫師: Kám-siā Chú, o-ló Chú! che sī Chú kî-biāu ê tháu-pàng. Lí ê lāu-bú nā chai-iáⁿ chit ê sū m̄-chai beh lōa-n̍i̍h hoaⁿ-hí.(老婆與小女出場)
|
45. 醫師：感謝主，o-ló 主！這是主奇妙ê tháu 放。你ê老母若知影這個事m̄ 知beh偌n̍i̍h 歡喜。(阿婆kap 小女出場) |
|
46. 老婆: Eng-kiat ah, lí sī án-chóaⁿ lah? Lí phah sí lâng tio̍h bô?
|
46 . 阿婆：英傑--ah，你是án-chóaⁿ --lah？你扑死人著無？! |
|
47. 醫師: A-pô, lí m̄-bián hoân-ló, phah bô sí, chí-ū tām-po̍h siong tī chhiú-n̍i̍h nā-tiāⁿ.
|
47 . 醫師：阿婆你m̄ 免煩惱，扑無死，只有淡薄傷tī 手n̍i̍h nā-tiāⁿ 。 |
|
48. 老婆: Sian-seⁿ, góa ê kiáⁿ phah tio̍h lí tio̍h bô?! Ah, lí sī goán ê tōa un-jîn, chóng-sī goán hoán-tńg ēng chit-khoán ê pháiⁿ lâi pò lí, khòaⁿ góa ū sím-mi̍h bīn lâi kìⁿ lí, góa taⁿ ū sím-mi̍h hoat-tō͘ thang pôe lí ê chōe(háu).
|
48 . 阿婆：先生，我ê子扑著你著無？！!Ah，你是阮ê 大恩人，總--是阮反轉用這款ê 歹來報你，看我有甚mi̍h 面來見你，我今有甚mi̍h 法度thang 賠你ê 罪。(哮) |
|
49.醫師: A-pô, lí m̄-bián khó͘-sim, che sī Siōng-tè ê hó ì-sù, beh hō͘ lí ê kiáⁿ thang hoán-hóe oat-tńg thâu lah.
|
49. 醫師：阿婆，你m̄ 免苦心，這是上帝ê 好意思，beh hō͘ 你ê子thang 反悔越轉頭--lah 。 |
|
50.浪子: A-bú, lí tio̍h sià-bián góa kòe-khì ê tāng-chōe, góa si̍t-chāi tùi lí chin pōe-ge̍k, put-hàu, lóng sī kiâⁿ tī o͘-àm ê bê-lō͘, chhiáⁿ lí tio̍h sià-bián góa. Taⁿ góa í-keng chai-iáⁿ góa ê chhò-gō͘,góa í-āu tek-khak beh hóe-kái lâi chīn góa chòe kiáⁿ ê pún-hūn lah, góa tio̍h ài khì koaiⁿ-kaⁿ, m̄-chai tio̍h lōa-kú, chóng-sī A-bú lí tio̍h hoaⁿ-hí lâi tán-hāu góa koh tńg-lâi ê ji̍t, lí tio̍h ǹg-bāng, lâi chiàu-kò͘ lí ê sin-thé.
|
50. 浪子：阿母，你著赦免我過去ê 重罪，我實在tùi 你真背逆，不孝，攏--是行tī 烏暗ê 迷路，請你著赦免我。今我已經知影我ê 錯誤，我以後的確beh 悔改來盡我做子ê 本分--lah，我著ài 去關監，m̄ 知著偌久，總--是阿母你著歡喜來等候我koh 轉來ê 日，你著向望，來照顧你ê 身體。 |
|
51.老婆: Eng-kiat, lí chin-chiàⁿ chhéⁿ-gō͘ lah, tio̍h bô! Oh, góa ê Eng-kiat, lí ê a-bú taⁿ sí iā kam-goān lah, góa ê lô-khó͘ lóng bô kui tī khang-khang lah. Che thang kóng lóng sī Siōng-tè ê lîn-bín kap Lâu i-seng ê pang-chān, góa chin hoaⁿ-hí lâi tán-hāu lí tńg-lâi, bô lūn 5 nî á-sī 10 nî.
|
51. 阿婆：英傑，你真正醒悟--lah！著無！Oh，我ê 英傑，你ê 阿母今死也甘願--lah，我ê 勞苦攏無歸tī 空空--lah。這thang 講攏--是上帝ê 憐憫kap 劉醫師ê 幫贊，我真歡喜來等候你轉來，無論五年抑是十年。 |
|
52.警官: Lâu i-seng, góa ōe chīn-liōng lâi thòe chit ê chheng-liân kiû-chêng, só͘-í ǹg-bāng i tī 1 nî kú ê tiong-kan chiū ōe-thang tńg-lâi, in-ūi góa khòaⁿ chit ê chêng-hêng hō͘ góa siū chin tōa ê kám-tōng, góa í-āu iā beh kap lí lâi khì sìn Iâ-so͘ thiaⁿ tō-lí. Nā m̄-sī sìn Iâ-so͘ ê lâng tek-khak bô ū chit-khoán thiàⁿ ê kám-hòa la̍t.
|
52. 警官：劉醫師，我會盡量來替這個青年求情，所以向望伊tī 一年久ê 中間就會thang 轉來，因為我看這個情形hō͘ 我受真大ê 感動，我以後也beh kap 你來去信耶穌聽道理。若m̄ 是信耶穌ê 人的確無有這款疼ê 感化力。 |
|
53.醫師: Chhòa kéng-koaⁿ, to-siā lí ê pang-bâng, ǹg-bāng chhiáⁿ lí tōa-tōa thòe goán chhut-la̍t, si̍t-chāi tio̍h kám-siā Siōng-tè ê thiàⁿ-thàng, chit ê thiàⁿ ê khùi-la̍t sī tùi Siōng-tè lâi ê. Lán nā sìn-khò Iâ-so͘, pài Siōng-tè, lán ū bô-hān ê hok-khì, pháiⁿ-kiáⁿ pìⁿ hó-kiáⁿ, pháiⁿ-lâng pìⁿ hó-lâng, o͘-àm pìⁿ kng-bêng, tōe-ge̍k pìⁿ thian-tông, chai-hō pìⁿ hēng-hok, hō͘ lán put-sî tō ū khoài-lo̍k hoaⁿ-hí pêng-an ê seng-oa̍h.
|
53. 醫師：蔡警官，多謝你ê 幫忙，向望請你大大替阮出力，實在感謝上帝ê 疼痛，這個疼ê 氣力是tùi 上帝來--ê。咱若信靠耶穌，拜上帝，咱有無限ê 福氣，歹子變好子，歹人變好人，烏暗變光明，地獄變天堂，災禍變幸福，hō͘ 咱不時就有快樂歡喜平安ê 生活。 |
|
(幕後鳴鐘的聲)
|
(幕後鳴鐘ê 聲) |
|
Ah, tú-hó kim-mê chiū-sī Kiù-sè-chú Iâ-so͘ kàng-seng ê ji̍t, choân sè-kài ke-ke hō͘-hō͘ lóng sī teh hoaⁿ-hí khèng-chiok Sèng-tàn, taⁿ lán iā lâi gîm chi̍t tè si lâi saⁿ-kap hoaⁿ-hí.
|
Ah，tú 好今暝就是救世主耶穌降生ê 日，全世界家家戶戶攏--是teh 歡喜慶祝聖誕，今咱也來吟一tè詩來相kap 歡喜。 |
|
(吟聖詩14首或是22首)
|
(吟聖詩十四首抑是二十二首) |
|
─幕─ 終
|
--幕-- 終 |
