69 Hôe-ek-lio̍k_02
|
69回憶錄_02 |
|---|---|
| Liāu Tit | 廖得 |
|
Góa Tī Tang-kiaⁿ Thoân-tō
|
我Tī東京傳道 |
|
Góa 28 hòe ê 5 goe̍h 9 hō, chá-khí 6 tiám kàu Tang-kiaⁿ ia̍h. Hit ē-po͘ kàu Siōng-iá kong-hn̂g: lāi-bīn sī jîn-san jîn-hái; chhut-ji̍p-kháu ū chi̍t tōa-tīn ê lâng teh pò͘-tō; chhut-ji̍p kòe-lō͘ ê lâng, chò i kòe-khì bô khiā teh thiaⁿ, chóng-sī pò͘-tō ê lâng, lóng tōa-siaⁿ chhut-la̍t gîm-si, kap chi̍t-ê kóng kòe chi̍t-ê, kóng liáu sòa pek-chhiat kî-tó !!!
|
我28歲ê 5月9號，早起6點到東京驛。Hit e晡到上野公園：內面是人山人海；出入口有一大陣ê人teh佈道；出入過路ê人，做伊過去無企teh聽，總是佈道ê人，攏大聲出力吟詩，kap一個講過一個，講了續迫切祈禱！！！ |
|
Góa khòaⁿ liáu tōa siū kám-kek !!! Siūⁿ--tio̍h lán Tâi-oân pò͘-tō ê hó ki-hōe! Bô-lūn tó-ūi, khì kóng lóng? kúi-cha̍p kúi-pah ê lâng teh thiaⁿ!! Tio̍h kín tńg-khì Tâi-oân kó͘-bú pò͘-tō, m̄-thang sit-lo̍h ki-hōe !!!
|
我看了大受感激！！！想--著咱台灣佈道ê好機會！無論tó位，去講攏有幾十幾百ê人teh聽！！著緊轉去台灣鼓舞佈道，m̄-thang失落機會！！！ |
|
In pì-hōe ê sî, góa chiū the̍h bêng-chhì khì hō͘ hit ê su-hōe-chiá (Li̍p-tiân Kó, khì Bí-kok liû-ha̍k--ê, i sī Chìm-lé-hōe ê chū-iû thoân-tō, i ê sian-seⁿ-niû sī Hù-sū-kiàn-teng Si̍t-chhoan Bo̍k-su ê hōe-iú), kā i kóng, Góa tùi Tâi-oân lâi chong-kàu kiàn-ha̍k--ê! I kóng, Án-ne chin hó! Lí iā tio̍h lâi kóng!!! Góa kóng, Góa Ji̍t-pún ōe bô kàu-gia̍h bat! I kóng, Ōe bô iàu-kín!! Kò-pe̍h líe sìn-gióng chiū hó!!! Góa ìn i hó! I kóng, Chhiáⁿ lí ē-hng 7 tiám-pòaⁿ, lâi khì Put-jím-tî piⁿ ê Kiàn-to͘ 50 nî kì-liām Phok-lám-hōe chêng ê Ki-tok-kàu káng-ián hōe-tiûⁿ hia kóng !!!
|
In閉會ê時，我就提名誌去ho͘hit7個司會者 （立田谷，去美國留學--ê,伊是浸禮會ê自由傳道，伊ê先生娘是富士見丁實村牧師ê會友），kā伊講：我tùi台灣來宗教見學--ê!伊講：「Án-ne真好！你也著來講！！！」我講：「我日本會無夠額bat！」伊講：「話無要緊！！告白你ê信仰就好！！！我應伊好！」伊講：「請你e昏7點半，來去不忍池邊ê建都50年紀念博覽會前ê基督教講演會場hia講！！！」 |
|
Góa thiaⁿ liáu sim-koaⁿ tio̍h chi̍t-kiaⁿ! Góa Sîn-Ha̍k it-liân ê sî, mn̄g hāu-tiúⁿ Pa Phok-sū, Tō-lí khòaⁿ án-chóaⁿ kóng? I kóng, Káng-tō bē kà--tit !!! Chit pang koh kā góa kóng, Góa m̄-bat Ji̍t-pún ōe, khì Ji̍t-pún bô lō͘-ēng !!! Taⁿ chá-khí kàu Tang-kiaⁿ, chit-tia̍p lâng beh chhiáⁿ khì ē-hng thoân-tō! Pún sī siūⁿ nā bē the--titkap in tòa tī lō͘-piⁿ, kóng kúi-kù-á, tio̍h m̄-tio̍h khah bô iàu-kín. Taⁿ sī beh khì hōe-tiûⁿ kóng--ê, beh án-chóaⁿ kái-koat?
|
我聽了心肝著一驚！我神學一年ê時，問校長巴博士，道理看án-chóaⁿ講？伊講：「講道bē教--tit！！！」這幫koh kā我講：「我m̄-bat日本話，去日本無路用！！！今早起到東京，chit-tia̍p人beh請去e昏傳道！本是想若bē推tit kap in tòa tī路邊，講幾--句-仔，著m̄著較無要緊。今是beh去會場講--ê,beh án-chóaⁿ解決？」 |
|
Tio̍h! góa it-liân ê sî, tī kiû-tiâⁿ chhéng-kàu Ko Kim-seng bo̍k-su hit pō͘ the̍h khí lâi iōng: Bat--ê kóng! m̄-bat--ê m̄-thang kóng!!! Tê-ba̍k tio̍h lâi kóng Tâi-oân kap Ki-tok-kàu; thèng-chiòng bô-lūn ū chóng-lí tāi-sîn, á-sī tāi-ha̍k chóng-tiúⁿ tī-teh, iā bô iàu-kín, chit-hāng góa bat!
|
著！我一年ê時，tī球埕請教高金聲牧師hit步提起來用：「Bat--ê講！m̄-bat--ê m̄-thang講！！！」題目著來講台灣kap基督教；聽眾無論有總理大臣，或是大學總長tī-teh，也無要緊，這項我bat！ |
|
Iā ōe beh án-chóaⁿ pān-hoat! Tio̍h! Ē-hng tio̍h koh ēng Gō͘-sûn-cheh ê sîn-jiah! Hō͘ Sèng Sîn chhiong-móa!! Lâi kóng thèng-chiòng ê sim-giân!!! Chiū khì kong-hn̂g lāi phian-phiah, bô lâng kiâⁿ kàu ê só͘-chāi, choan-bū kî-tó.
|
也會beh án-chóaⁿ辦法！著！E昏著koh用五旬節ê神蹟！hō͘聖神充滿！！來講聽眾ê心言！！！就去公園內偏僻，無人行到ê所在，專務祈禱。 |
|
Kàu 6 tiám-gōa khì chia̍h tiám-sim, chún-pī hù7 tiám-pòaⁿ khui-hōe.
|
到6點外去食點心，準備赴7點半開會。 |
|
Hit ê su-hōe-chiá Li̍p-tiân sian-seⁿ ê khui-hōe-sû Kóng, Ē-hng ū chi̍t ê Tâi-oân só͘ thiàⁿ ê hiaⁿ-tī beh lâi kóng; chóng-sī i kóng lán Tang-kiaⁿ-gú, m̄ sī i ê pē-bó ōe: sī chhin-chhiūⁿ lán o̍h eng-gú cha̍p-nî peh-nî, bô-lūn lōa chhut-la̍t ha̍k-si̍p, kàu Bí-kok teh kóng-ōe ê sî, to sī kám-kak chin ûi-lân; só͘-í chhiáⁿ tāi-ke chù-ithiàⁿ, chiah thiaⁿ ū !!!
|
Hit個司會者立田先生ê開會詞講：「E昏有一個台灣所疼ê兄弟beh來講；總是伊講咱東京語，m̄是伊ê父母話：是親像咱學英語十年八年，無論偌出力學習，到美國teh講話ê時，都是感覺真為難；所以請大家注意聽，chiah聽有！！！」 |
|
Hit sî góa chiap-sòa khiā tī tâi-téng kóng: Siáu-seng chá-khí 6 tiám, thâu-pái kàu kùi chhī; ē-po͘ siū--tio̍h su-hōe-chiá sian-seⁿ ê hó-ì, bēng-lēng phí-jîn ē-hng tio̍h lâi chit ê Ki-tok-kàu káng-ián hōe-tiûⁿ, kò-pe̍h sìn-gióng. Put-châi tùi 7 nî chêng í-lâi, ū chia̍p-chia̍p teh tha̍k Hô-bûn ê chong-kàu su-pò; chóng-sī siá kap kóng, sī khah hán--tit; chit-tia̍p chiong góa tha̍k-chheh só͘ ē kì--tit ê ōe-kù, tī chia lâi kài-siāu kúi-kù Tâi-oân kap Ki-tok-kàu!
|
Hit時我接續企tī台頂講：「小生早起6點，頭擺到貴市；e晡受--著司會者先生ê好意，命令鄙人e昏著來這個基督教講演會場，告白信仰。不才tùi 7年前以來，有捷捷teh讀和文ê宗教書報；總是寫kap講是較罕--tit；chit-tia̍p將我讀冊所會記--tit ê話句，tī chia來介紹幾句台灣kap基督教！ |
|
Tâi-oân ū Sù-kok ê 2 pōe tōa! thó͘-sán chin hong-hù!! Chá Sai-iûⁿ lâng chheng-ho͘ Tâi-oân chò Bí-lē tó !!!
|
台灣有四國ê 2倍大！土產真豐富！！早西洋人稱呼台灣做美麗島！！！ |
|
Ū ūi ê khì-hāu chin joa̍h; kāu pēⁿ-thiàⁿ, ū ma-la-li-á. Ū ê só͘-chāi ê khì-hāu chin hó! Lâng ióng-kiāⁿ tn̂g-miā !!!
|
有位ê氣候真熱；厚病痛，有馬拉利仔。有ê所在ê氣候真好！人勇健長命！！！ |
|
Jîn-kháu ū 360 bān! iok ū 40 bān ê pún-tē lâng: tòa óa pêⁿ-iûⁿ--ê kiò-chò Pêⁿ-po͘ lâng, ū siū--tio̍h Hàn-bûn-hòa; khiā kīn soaⁿ--ê hō-chò A-mî cho̍k, sī chhin-chhiūⁿ goân-sí khiā-khí tī Ai-tiân hn̂g ê lâng, chin liông-siān; óa 20 bān bi̍h tī chhim-soaⁿ, ē thâi-lâng ê chéng-cho̍k, lâng kā i thó͘-hō chò chheⁿ-hoan. Chóng-sī tī goán ê tē-hng, lóng bô chit khoán pún-tē lâng; khah chē kúi-tāi lâng to͘ m̄-bat khòaⁿ--tio̍h !!!
|
人口有360萬！約有40萬ê本地人：tòa倚平洋--ê叫做平埔人，有受--著漢文化；企近山--ê號做阿美族，是親像原始企起tī伊甸園ê人，真良善；倚20萬bi̍h tī深山，會thâi人ê種族，人kā伊土號做生番。總是tī阮ê地方，攏無這款本地人；較濟幾代人都m̄-bat看--著！！！ |
|
Í-gōa 320 bān lâng, ū-ê sī 256 nî chêng (Se-le̍k 1661 nî), Tēⁿ Sêng-kong só͘ chhōa m̄ hâng Chheng ê 100 chiah chûn, só͘ chài ê 10 bān Bêng ê tiong-sîn gī-bîn, cháu lâi Tâi-oân ê hō͘-è; kap í-āu bô ài chò Chhiang-koh-loh ê lâng poaⁿ lâi Tâi-oân ê lâng ê kiáⁿ-sun: Kî-tiong sio̍k Kńg-tang cho̍k, kiò-chò Kheh-ka, iok ū 50 bān lâng, sio̍k Hok-kiàn cho̍k--ê chheng chò Hoh-ló lâng, ū 270 bān.
|
以外320萬人，有--ê是256年前（西曆1661年），鄭成功所chhōa m̄降清ê100隻船，所載ê 10萬明ê忠臣、義民，走來台灣ê後裔；kap以後無ài做Chhiang-koh-loh ê人搬來台灣ê人ê子孫：其中屬廣東族，叫做客家，約有50萬人，屬福建族--ê稱做Hoh-ló人，有270萬。 |
|
Tī 50 nî chêng, Eng-kok Tiúⁿ-ló-hōe phài Má I-seng lâi Tâi-oân thoân-tō ê sî; koaⁿ-thiaⁿ, ha̍k-kài, siā-hōe, lóng hoán-tùi pâi-thek. Hit-tia̍p beh sòe-chhù bé-tē, lóng chin ûi-lân, tio̍h hit-khoán kúi-á-chhù, ko͘-khu̍t-tē kap phian-phiah bô lâng ài--ê chiah ū thang sòe lâi chò thoân-tō-só͘, á sī bé lâi khí lé-pài-tn̂g; chóng-sī 50 nî āu ê kin-á-ji̍t, tī ta̍k ê po͘-thâu ê tiōng-iàu-tē, lóng ū chin chiâⁿ-mi̍h ê tōa keng lé-pài-tn̂g: kap góa kin-á-ji̍t tī kùi-chhī, só͘ ū khòaⁿ--tio̍h--ê chha-put-to.
|
Tī 50年前，英國長老會派馬醫生來台灣傳道ê時；官廳、學界、社會，攏反對排斥。Hit-tia̍p beh稅厝買地，攏真為難，著hit款鬼仔厝，孤倔地kap偏僻無人ài--ê chiah有thang稅來做傳道所，或是買來起禮拜堂；總是50年後ê今仔日，tī逐個埔頭ê重要地，攏有真成mi̍h ê大間禮拜堂：kap我今仔日tī貴市，所有看--著-ê差不多。 |
|
Khí-thâu lâi ji̍p Ki-tok-kàu--ê, tōa pō͘-hūn sī siā-hōe ê lo̍k-ngó͘-chiá, phòa-pīⁿ--ê, sàn-hiong--ê, khoeh-kiáⁿ--ê, m̄-bat-jī--ê, hō͘ lâng khòaⁿ-khin khi-hū--ê; chóng-sī hiān-kim choân jîn-kháu ê chi̍t-pah-hūn-chi̍t tiong ê Ki-tok-kàu-tô͘, pêng-kin tī kok-ka tng kong-chit, tī siā-hōe chò léng-tō-chiá, kiān-khong tn̂g-miā, hù-jū, chhut-teng, ha̍k-būn, lóng pí siā-hōe khah hoat-ta̍t chìn-pō͘.
|
起頭來入基督教--ê,大部份是社會ê落伍者，破病--ê,散hiong--ê,缺子--ê,m̄-bat字--ê,hō͘人看輕欺負--ê;總是現今全人口ê一百分一中ê基督教徒，平均tī國家當公職，tī社會做領導者，健康長命、富裕、出丁、學問，攏比社會較發達進步。 |
|
Sím-mi̍h in-toaⁿ thái ē án-ne? In-ūi lâng lâi sìn Ki-tok-kàu:
|
甚mi̍h因端thái會án-ne?因為人來信基督教： |
|
Bô bê-sìn! Sim-koaⁿ chheng!!! Bô chò-pháiⁿ! Ū ōe-seng!!! Khîn-khiām ū sìn-iōng! Hoat-châi koh thiam-teng!!! Bān-lêng Lô-má 18 jī! Beh bat kúi tiám-cheng!!! Jîn-keh ho̍k-tò! Chu-keh ko-seng!!! Thé-keh ióng-chòng! Kok-kiông ka-heng!!! Thāi-jîn khek-kí! Kèng Sîn hi-seng!!! Hōng-khoàn chu-kun sìn-tô͘! Lêng-hûn tit-tio̍h éng-seng!!! Hiān-sè ji̍t-iā an-sim li̍p-bēng! Lâi-seng kap Chú kiōng-chûn kiōng-êng !!! |
無迷信！心肝清！！！ 無做歹！有衛生！！！ 勤儉有信用！發財koh添丁！！！ 萬能羅馬18字！Beh bat幾點鐘！！！ 人格復到！資格高升！！！ 體格勇壯！國強家興！！！ 待人克己！敬神犧牲！！！ 奉勸諸君信徒！靈魂得著永生！！！ 現世日夜安心立命！來生kap主共存共榮！！！」 |
|
Hit mê só͘ kóng chi̍t tiám-cheng! Kán iōng í-Siōng lâi piáu-bêng !!!
|
Hit暝所講一點鐘！簡用以上來表明！！！ |
|
Su-hōe-chiá pì-hōe-sû:
|
司會者閉會詞： |
|
Chu-kun! Lán tú-á thiaⁿ-tio̍h Ki-tok-kàu tī Tâi-Oân ê lêng-le̍k! M̄-nā tī Tâi-oân, tī sè-kài iā sī án-ne!!! Lán lóng teh kiû sè-kài ê bûn-bêng! Beh khip-siu ta̍k bîn-cho̍k ê cheng-chhóe!! Tān-sī sè-kài bô lūn toh chi̍t khoán ê bûn-bêng, to sī tùi Ki-tok-kàu ê khùi-la̍t !!!
|
「諸君！咱tú仔聽著基督教tī台灣ê能力！M̄若tī台灣，tī世界也是án-ne!！！咱攏teh求世界ê文明！beh吸收逐民族ê精髓！！但是世界無論toh一款ê文明，都是tùi基督教ê氣力！！！」 |
|
Hiān-sî ê siā-hōe lâng, ji̍t mê lóng sī jia̍t-sim khì Khòaⁿ oa̍h-tāng siá-chin, bô ài khì lé-pài-tn̂g! Ài tha̍k siáu-soat, bô ài tha̍k Sèng-chheh. Só͘-í siā-hōe chiah ē chia̍h-chiú, sio-phah, chà-khi, ang-bó͘ oan-ke lī-iân.
|
現時ê社會人，日暝攏是熱心去看活動寫真 ，無ài去禮拜堂！Ài讀小說，無ài讀聖冊。所以社會才會食酒、相扑、詐欺、翁某冤家離緣。 |
|
Ē-hng Tâi-oân só͘ thiàⁿ ê hiaⁿ-tī kóng-khí Tâi-Oân Ki-tok-kàu ê lêng-le̍k, iā khún-chhéng lia̍t-ūi tio̍h sìn Ki-tok, lâi tit-tio̍h I ê lêng-le̍k chín-kiù !!!
|
E昏台灣所疼ê兄弟講起台灣基督教ê能力，也懇請列位著信基督，來得著伊ê能力拯救！！！ |
|
Taⁿ lia̍t-ūi! Lín nā him-bō͘ ài sìn Ki-tok-kàu ê lâng, tī chia ū chin-lí-toaⁿ kap Sèng-chheh, chhiáⁿ lín bé khì gián-kiù, chi̍t cho͘ 5 chiam-chîⁿ.
|
今列位！Lín若欣慕ài信基督教ê人，tī chia有真理單kap聖冊，請lín買去研究，一組5 chiam錢。 |
|
Hit mê ê thèng-chiòng, ná thiaⁿ ná chē lâng; lāi-té chē bô ūi, chē-chē lâng khiā tī gōa-bīn; kóng tio̍h chhiáⁿ in bé tō-lí chheh khì gián-kiù, chē-chē lâng e-e tīn-tīn ji̍p khì bé. Kám-siā Chú ê in-tián, Sèng Sîn ê koân-lêng, su-hōe-chiá ê jia̍t-chhiat kó͘-bú, kap sì-mn̂g-thâu koaiⁿ khì chin oân-choân !!!
|
Hit暝ê聽眾，那聽那濟人；內底坐無位，濟濟人企tī外面；講著請in買道理冊去研究，濟濟人e-e陣陣入去買。感謝主ê恩典，聖神ê權能，司會者ê熱切鼓舞，kap四門頭關去真完全！！！ |
|
Hit mê-hng khì tòa tī Tè-kok Tāi-ha̍k Ki-tok-kàu Chheng-liân-hōe-koán, khùn tī thi̍h-bîn-chhn̂g, kah chiáu-mn̂g-phōe, chhin-chhiūⁿ Hui-le̍k chē tio̍h Thài-kàm-chhia, tùi Tâi-oân kàu Tang-kiaⁿ, chûn-chhia ê ià-siān lóng bô khì !!!
|
Hit暝昏去tòa tī帝國大學基督教青年會館，睏tī鐵眠床，kah鳥毛被，親像Hui-le̍k坐著太監車 ，tùi台灣到東京，船車ê厭倦攏無--去！！！ |
|
(khiàm 1958 nî 6-7 ge̍h)
|
(欠1958年6-7月) |
|
Sai Ji̍t-pún Kiàn-bûn-kì
|
西日本見聞記 |
|
7 goe̍h 6 mê, tī Chóng-bū-kio̍k khui chi̍t ê kán-tan ê Tê-piáⁿ-hōe, lâi chhiáⁿ Tang-kiaⁿ kap Hoâiⁿ-pin kàu-kài, hiah ê tī 59 ji̍t kú, chiau-hu góa ê 10 gōa el5eng-siù; tùi in sî-pia̍t kap soeh-siā.
|
7月6暝，tī總務局開一個簡單ê茶餅會，來請東京kap橫濱教界，hiah ê tī 59日久，招呼我--ê 10外個領袖；tùi in辭別kap說謝。 |
|
7 goe̍h 7 hō kàu Sîn-hō͘, khì hóng-būn Sîn-káng kàu-hōe ê bo̍k-su, Ko͘-khó͘ phok-sū, i iā sī Sîn-hō͘ Sîn-ha̍k-hāu ê kàu-siū, i siat-hoat hō͘ góa, tòa tī Sîn-ha̍k-hāu ê hāu-sià.
|
7月7號到神戶，去訪問神港教會ê牧師，辜許博士，伊也是神戶神學校ê教授，伊設法hō͘我，tòa tī神學校ê校舍。 |
|
Keh ji̍t tī hia hù Koan-sai thoân-kàu-su Siu-ióng-hōe. Kúi-nā-ji̍t kú, tit-tio̍h kap chē-chē tông-liâu kau-pôe. Hō-chhoan Hong-gān sian-seⁿ, iā chhōa góa khì i ê pîn-bîn-khut ê só͘-chāi; i tòa ê chhù, pí hit sî Mûi bo̍k-su tī Chiong-hòa, khí hō͘ Mûi bo̍k-su-niû tòa, hit ê chhin-chhiūⁿ hún-chiáu-tiâu-á--ê, iáu khah bái; tha-tha-mi̍h bô kún-kîⁿ, sī ēng áu--ê; lāi-bīn bô chong-sek, iā bô chheh-tû, chí-ū toh-téng chi̍t pún “Ji̍t-iāu ha̍k-hāu kàu-siū-hoat,” sī i hoan-e̍k--ê; iā chi̍t pún “Pîn-bîn sim-lí ê gián-kiù,” sī i tù--ê. I ê sian-seⁿ-niû í-chêng sī kang-tiûⁿ ê chit-kang, bô siáⁿ ha̍k-būn, āu-lâi hō͘ i kà kàu ē tù-chheh. I chhōa góa khì i ê chhù ê sî, ū chi̍t-ê pîn-bîn-khut ê gín-ná lâi chhōe--i, i tùi hit ê gín-ná ê thâu-khak so-so--leh, sòa the̍h chi̍t téng le̍h-á kā i lap tī thâu-khak hō͘ i tì tńg-khì.
|
隔日tī hia赴關西傳教師修養會。幾若日久，得著kap濟濟同僚交陪。賀川豐彥先生，也chhōa我去伊ê貧民窟ê所在；伊tòa ê厝，比hit時梅牧師tī彰化，起hō͘梅牧師娘tòa,hit個親像粉鳥寮仔--ê,iáu較bái;tha-thah-mi̍h無滾墘，是用拗--ê;內面無裝飾，也無冊櫥，只有桌頂一本「日曜學校教授法，」是伊翻譯--ê;也一本「貧民心理ê研究，」是伊著--ê。伊ê先生娘以前是工場ê職工，無啥學問，後來hō͘伊教到會著冊。伊chhōa我去伊ê厝ê時，有一個貧民窟ê囡仔來chhōe--伊，伊tùi hit個囡仔ê頭殼so-so--leh，續提一頂笠--仔kā伊lap tī頭殼hō͘伊戴轉--去。 |
|
Tang-kiaⁿ kap Sîn-hō N̄g ūi ê Pîn-bîn-khut, pêⁿ-pêⁿ sī ù-òe, m̄ chiâⁿ chhù, m̄ chiâⁿ lâng; lō͘-thâu lō͘-bóe lâng lóng chek kui-tui teh poa̍h-kiáu.
|
東京kap神戶兩位ê貧民窟，平平是污穢，m̄成厝，m̄成人；路頭路尾人攏積歸堆teh poa̍h-kiáu。 |
|
-- Kiaⁿ-to͘ --
|
--京都 -- |
|
Hia sī kó͘-to͘, khah bô lāu-jia̍t, hong-sio̍k khah hó; chóng-sī sī-biō chin-chē! Kai-chài lán ū chi̍t-keng Tông-chì-siā tī-hia !!!
|
Hia是古都，較無鬧熱，風俗較好；總是寺廟真濟！佳哉咱有一間同志社tī-hia!！！ |
|
Hia ū lán ê liû-ha̍k-seng chin-chē! Hit sî siāng chió-hòe sī Ko Thian-sêng phok-sū; siāng chē hòe sī Gô͘ Khó͘-bián tiúⁿ-ló; i tī hia tha̍k siong-gia̍p, i kap góa khì bé chi̍t niá a-sah khò͘ sì-kho͘-pòaⁿ, chin ióng, chhēng kúi-cha̍p-nî bô phòa.
|
Hia有咱ê留學生真濟！Hit時上少歲是高天成博士；上濟歲是吳許勉長老；伊tī hia讀商業，伊kap我去買一領a-sah褲四箍半，真勇，穿幾十年無破。 |
|
-- Tāi-pán --
|
--大阪 -- |
|
Hia sī kang-tiûⁿ tē, chí-ū Kiong-chhoan Keng-hui bo̍k-su ê cho͘-ha̍p kàu-hōe, lé-pài kúi-nā-pah lâng, siāng-chē, iā kúi-nā-cha̍p ê chip-sū, chin oa̍h-tāng, tī pài-tn̂g sì-bīn lāi-gōa, teh chiap-thāi kap iok-sok.
|
Hia是工場地，只有宮村京輝牧師ê組合教會，禮拜幾若百人，siāng濟，也幾若十個執事，真活動，tī拜堂四面內外，teh接待kap約束。 |
|
-- Bêng-kó͘-ok --
|
--名古屋 -- |
|
Hia ê jîn-kháu sì-gō͘-cha̍p bān. Chóng-sī Tiúⁿ-ló-hōe (Ji̍t-Ki) Chú-ji̍t lé-pài sī chiâⁿ-pah-lâng: kap Tāi-pán, Kiaⁿ-to͘, chha-put-to.
|
Hia ê人口四、五十萬。總是長老會（日支）主日禮拜是成百人：kap大阪、京都，差不多。 |
|
Kai-chài kàu-hōe ū chiâⁿ-mi̍h ê Kim-siâⁿ Lú-o̍h tī hia.
|
佳哉教會有成mi̍h ê金城女學tī hia。 |
|
Hit sî ê Kiat-chhoan bo̍k-su-niû, ū khì Bí-kok liû-ha̍k--ê: ang-bó͘ lóng chin chhin-chhiat.
|
Hit時ê吉村牧師娘，有去美國留學--ê:翁某攏真親切。 |
|
-- Tang-soaⁿ-chng --
|
--東山莊 -- |
|
Tī Hù-sū-soaⁿ kha (Gū-tiān-tiûⁿ ia̍h lo̍h chhia) ê Tang-soaⁿ-chng, Chheng-liân-hōe khí chē-chē chhù ti̍hiā, joa̍h-thiⁿ chē-chē khoán hōe tī hia chū-chi̍p, góa hù 3 ê.
|
Tī富士山腳（御甸場驛落車）ê東山莊，青年會起濟濟厝ti̍hiā,熱天濟濟款會tī hia聚集，我赴3個。 |
|
(1) Hia̍p-tông Thoân-tō Tāi-hōe: Hit sî Ki-tok-kàu Liân-bêng, kok phài liân-ha̍p, phài bêng-sū tī Ji̍t-pún choân-kok ta̍k to͘-chhī, pò͘-tō 3 nî kú liáu; chòe-āu lâi hia kiat-sok chū-hōe. Choân Ji̍t-pún kok kàu-phài ê ta̍k kàu-hōe ê lâm-lú tāi-piáu kap Soan-kàu-su kúi-nā-pah lâng chhut-se̍k, chin sēng-hóng!
|
（1）協同傳道大會：Hit時基督教聯盟，各派聯合，派盟士tī日本全國逐都市，佈道3年久了；最後來hia結束聚會。全日本各教派ê逐教會ê男女代表kap宣教師幾若百人出席，真盛況！ |
|
Khó-sioh 3 nî kú ê “lô-bîn siong-châi” chin chē! iā kiat-kó bô hó !!!
|
可惜3年久ê「勞民傷財」真濟！也結果無好！！！ |
|
Kóng ū só͘-chāi pò͘-tō soah, thèng-chiòng tńg-khì, tī lō͘-n̍i̍h teh o-ló kóng, “Ē-hng káng-su kóng liáu chin hó! Lóng bô kóng ‘Iâ-so͘!! Iâ-so͘!!!’ Sin-bûn kóng-kò, ke-lō͘ pun soan-thoân-toaⁿ, hōe-tiûⁿ ê pâi-pián, lóng siá “Ki-tok-kàu Tōa Káng-ián-hōe”. Chóng-sī káng-su ū káng-kiù ha̍k-būn kóng ha̍k-lí; bô keng-giām Iâ-so͘, bē hiáu kóng Iâ-so͘. “Soan-pin toa̍t-chú!” “Tiàu iûⁿ-thâu, bē káu-bah!!!” Bo̍k-koài kàu-hōe ná tōa ūn-tōng! Lé-pài ná chió-lâng!!! Ná chhiáⁿ tōa-miâ bo̍k-su ê kàu-hōe, hōe-iú ná bô ài kî-tó !!!
|
講有所在佈道煞，聽眾轉--去，tī路--n̍i̍h teh o-ló講：「E昏講師講了真好！攏無講『耶穌！！耶穌！！！』新聞廣告，街路分宣傳單，會場ê牌匾，攏寫「基督教大講演會」。總是講師有講究學問講學理；無經驗耶穌，bē曉講耶穌。「喧賓奪主！」「吊羊頭，賣狗肉！！！」莫怪教會那大運動！禮拜那少人！！！那請大名牧師ê教會，會友那無ài祈禱！！！ |
|
Sòa pìⁿ-chò chhin-chhiūⁿ Se-iûⁿ sio̍k-gú kóng--ê,“Ki-tok kàu-hōe bô Ki-tok !!!”
|
續變做親像西洋俗語講--ê,「基督教會無基督！！！」 |
|
-- Ki-tok-kàu Tāi-chiòng --
|
-- 基督教大眾 -- |
|
Tī hōe-tiong ū chi̍t ê choân Ji̍t-pún chhut-miâ ê pò͘-tō-ka, Bo̍k-chhoan Chheng-siông, Ji̍t-pún sin-bûn chhut i ê pò͘-tō siau-sit, chheng i chò “Ki-tok-kàu Hiau-chiòng”. I tú-á tùi Lâm-iûⁿ, Ji̍t-pún úi-jīm thóng-tī-léng, ùi-būn thoân-tō, kóaⁿ tńg-lâi hù-hōe--ê. Thiaⁿ i kóng hiah ê chāi-tē lâng, chē-chē chhù-bī ê ōe; i kap góa siāng khùn-pâng: khòaⁿ i teh tha̍k chi̍t pún “Ji̍t-pún gûi-ki” ê chheh, kóng liáu chin thiat-té.
|
Tī會中有一個全日本出名ê佈道家，木村清祥，日本新聞出伊ê佈道消息，稱伊做「基督教驍將」。伊tú仔tùi南洋，日本委任統治嶺，慰問傳道，趕轉來赴會--ê。聽伊講hiah ê在地人，濟濟趣味ê會；伊kap我上睏房：看伊teh讀一本「日本危機」ê冊，講了真徹底。 |
|
Chit ê lâng, bat tù chi̍t-pún “Sè-kài it-chiu thoân-tō lú-hêng” ê chheh, chin sim-sek.
|
這個人，bat著一本「世界一周傳道旅行」ê冊，真心適。 |
|
I chheng-liân ê sî, ū tha̍k Sian-tâi Tang-pak Ha̍k-īⁿ (Tiúⁿ-ló-hōe siat--ê) kúi-nā nî kú, i tùi i lāu-pē thó beh khì Bí-kok tha̍k-chheh; i ê lāu-pē bô kàu khùi-la̍t thang chàn-sêng--i.
|
伊青年ê時，有讀仙台東北學院（長老會設--ê)幾若年久，伊tùi伊老父討beh去美國讀冊；伊ê老父無到氣力thang贊成--伊。 |
|
I tùi i lāu-bó kóng, “Lāu-pē nā bô chîⁿ, thang hō͘ góa chē-chûn khì Bí-kok tha̍k-chheh, góa chiū beh siû kòe Thài-pêng-iûⁿ!!!” I ê lāu-bó thiaⁿ-tio̍h i ê koat-sim, chiū ng-iap só͘-hùi hō͘--i.
|
伊tùi伊老母講：「老父若無錢，thang hō͘我坐船去美國讀冊，我就beh泅過太平洋！！！」伊ê老母聽著伊ê決心，就ng-iap所費hō͘--伊。 |
|
I kàu Bí-kok chhun N̄g-kak-gōa gîn. I khì chhōe chi̍t-ê Kiù-sè-kun ê sū-koaⁿ. Sū-koaⁿ mn̄g sím-mi̍h lâng kā i siāu-kài? I kóng, “Siōng-tè kā góa siāu-kài!” Sū-koaⁿ mn̄g i kóng, “I ē chò sím-mi̍h?” I kóng, “Góa beh ūi-tio̍h Ki-tok pàng-sak sèⁿ-miā! Iā chit-tia̍p piān-piān !!!”
|
伊到美國chhun兩角外銀。伊去chhōe一個救世軍ê士官。士官問甚mi̍h人kā伊紹介？伊講：「上帝kā我紹介！」士官問伊講：「伊會做甚mi̍h？」伊講：「我beh為著基督放sak生命！也chit-tia̍p便便！！！」 |
|
Kiù-sè-kun ê Sū-koaⁿ chiū siat-hoat hō͘ i khì tha̍k Tiong-o̍h, āu-lâi tha̍k Tōa-o̍h.
|
救世軍ê士官就設法hō͘伊去讀中學，後來讀大學。 |
|
(2) Chheng-liân-hōe ê Hā-lēng-hōe: Tùi choân Ji̍t-pún kap gōa-kok, kúi-nā-pah ê chheng-liân, tī hia chū-chi̍p cha̍p-gōa ji̍t. Ji̍t-mê chia̍h khùn, káng-ián, hōe-gī, á-sī thit-thô; lóng ná chhin-chhiūⁿ tī Thian-tông !!!
|
（2）青年會ê夏令會：Tùi全日本kap外國，幾若百個青年，tī hia聚集十外日。日暝食睏、講演、會議，抑是thit-thô;攏那親像tī天堂！！！ |
|
(3) Ji̍t-Ki Tāi-hōe (Tiúⁿ-ló-chong): Tùi Ji̍t-pún choân-kok ê kàu-su, tiúⁿ-ló, soan-kàu-su, pah-gōa lâng hù-hōe.
|
（3）日支大會（長老莊）：Tùi日本全國ê教師、長老、宣教師，百外人赴會。 |
|
Khui-hōe ê lé-pài kap Sèng-chhan-sek, lóng chin chong-giâm! Ná chhin-chhiūⁿ thian-kok lîm-kàu !!!
|
開會ê禮拜kap聖餐式，攏真莊嚴！那親像天國臨到！！！ |
|
Tī hōe-gī tiong, ū khui chi̍t-ê “Tùi pa̍t bîn-cho̍k thoân-tō ê Hia̍p-gī-hōe.”
|
Tī會議中，有開一個「Tùi別民族傳道ê協議會。」 |
|
Iā tòa tī Tiau-sian ê Chéⁿ-kháu bo̍k-su, kóng-khí Ko-lê lâng ê hong-sio̍k bîn-chêng kap kàu-hōe:
|
也tòa tī朝鮮ê井口牧師，講起高麗人ê風俗民情kap教會： |
|
Ko-lê lâng 2 chheng gōa bān, iā Ki-tok-tô͘ ū 50bān; kî-tiong 45 bān sī tiúⁿ-ló-hōe--ê (hiān-sî 75 bān)
|
高麗人2千外萬，也基督徒有50萬；其中45萬是長老會--ê(現時75萬） |
|
Hia chin kôaⁿ! Chin kan-kia̍t!!! Khí-thâu Pêng-jióng ū chi̍t-ê sàn-hiong hū-jîn-lâng, chhōa i ê kiáⁿ khì Thian-tin, kā lâng sé-saⁿ chú-pn̄g thàn-chia̍h. Sòa ti̍hiā tit-tio̍h tō-lí!
|
Hia真寒！真艱竭！！！起頭平壤有一個散hiong婦人人，chhōa伊ê子去天津，kā人洗衫煮飯趁食。續tī hia得著道理！ |
|
Sìn Chú liáu-āu, chiū chhōa i ê kiáⁿ tńg-khì chó͘-ke pò͘-tō!! Tùi án-ni Pêng-jióng kàu-hōe chiū pìⁿ-chò chhin-chhiūⁿ Ko-lê ê An-thê-o !!!
|
信主了後，就chhōa伊ê子轉去祖家佈道！！Tùi án-ni平壤教會就變做親像高麗ê安提阿！！！ |
|
Hia ê kàu-hōe ū siat Sió-o̍h, Tiong-o̍h, Tōa-o̍h, Ko͘-jî-īⁿ, Ióng-ló-īⁿ kap I-koán!!! Ū ê chi̍t-tiâu ke kúi-nā keng lé-pài-tn̂g! lóng chin tōa keng! saⁿ-gō͘-chhit pah-pah lâng!!! Khah chē bô choan-jīm ê thoân-kàu-ka, lóng sī hōe-iú ka-tī chú-chhî!! Bo̍k-su sī choan-bū tehsûn kàu-hōe, siat jīm-chit-chiá, kú-hêng Sèng-lé-tián !!!
|
Hia ê教會有設小學、中學、大學、孤兒院、養老院kap醫館！！！有ê一條家幾若間禮拜堂！攏真大間！三五七百百人！！！較濟無專任ê傳教家，攏是會友家己主持！！牧師是專務teh巡教會，設任職者，舉行聖禮典！！！ |
|
Hōe-iú ū ê chhù-téng ê hiā, thiah khì khàm pài-tn̂g! Ka-tī ê chhù, ōaⁿ khàm-chháu !!!
|
會友有ê厝頂ê瓦，拆去蓋拜堂！家己ê厝，換蓋草！！！ |
|
Ū-ê hiaⁿ-tī ê choh-sit gû, bē khì hiàn-kim! Iā kiáⁿ tī chêng thoa!! Lāu-pē tī āu-bīn sak !!!
|
有ê兄弟ê作穡牛，賣去獻金！也子tī前拖！！老父tī後面sak！！！ |
|
Ū ê chí-mōe, thâu-khak-sim ê thâu-mn̂g ka khì bē lâi hōng-hiàn !!!
|
有ê姊妹，頭殼心ê頭毛剪去賣來奉獻！！！ |
|
Iā chí-mōe chián-pò͘, bé-chhài, chú-pn̄g! Thoân-kàu-ka ê gia̍h !! lóng chhûn-khí-lâi !!!
|
也姊妹剪布、買菜、煮飯！傳教家ê額！！攏存起來！！！ |
|
(khiàm 1958 nî 9-10 ge̍h)
|
(欠1958年9-10月) |
|
Chò Sū-gia̍p Sêng-kong Hoat
|
做事業成功法 |
|
Góa 28 hòe ê sin-le̍k 5 goe̍h chhe, chhut-hoat khì Ji̍t-pún Chong-kàu kiàn-ha̍k, kàu 8 goe̍h bóe tńg-lâi Bān-tan; 4 goe̍h-ji̍t kú, kiōng hùi-iōng góa tòa chāi-sin ê 105 kho͘: bô ke-kiám.
|
我28歲ê新曆5月初，出發去日本宗教見學，到8月尾轉來萬丹；4月日久，共費用我tòa在身ê 105箍：無加減。 |
|
Taⁿ chiong góa tī Bān-tan 2 goe̍h-ji̍t kú, tùi Lí Tiōng-gī Tiúⁿ-ló pún-sin, kap í-gōa só͘ thiaⁿ-kìⁿ--ê, í-ki̍p só͘ khòaⁿ-kìⁿ--ê, siá tām-po̍h tī ē-bīn: Tī Tâi-oân Lâm Pak-pō͘, chá-nî ū 2 ê Lí Tiúⁿ-losí?ng hó-gia̍h: Hit ê Pak-pō͘ Lí Tiúⁿ-ló ê sêng-kong pì-koat, í-keng chhut tī Kong-pò ê Tâi-oân Sèng Sîn noal5?i, “Láu-si̍t hó chò pún” liáu; taⁿ chhut chit ê Lâm-pō͘ Lí Tiúⁿ-ló ê sêng-kong pì-koat: Lí Tiúⁿ-ló siàu-liân ê sî sàn-hiong, i ê lāu-bó the̍h gîn-chhiú-khoân khì tǹg 2 kho͘-gîn, hō͘ i chò bē iû ê seng-lí pún.
|
今將我tī萬丹2月日久，tùi李重義長老本身，kap以外所聽見--ê,以及所看見--ê,寫淡薄tī下面：Tī台灣南北部，早年有2個李長老上好額：Hit個北部李長老ê成功祕訣，已經出tī公報ê台灣聖神欄內，「老實好做本」了；今出這個南部李長老ê成功祕訣：李長老少年ê時散hiong，伊ê老母提銀手環去當2箍銀，hō͘伊做賣油ê生理本。 |
|
Lí Tiúⁿ-ló tióng-sêng ê sî beh kiat-hun, bô chîⁿ thang chhiàⁿ chi̍t-téng o͘-kiō-á hō͘ sin-niû chē, sio̍k-guk2ong: “Bô kòe tì pû-hia, bô kiō chē gû-chhia”; chóng-sī Lí Tiúⁿ-ló bô chîⁿ thang chhiàⁿ gû-chhia! Sin-niû sit7oe môe-lâng kiâⁿ--khì !!!
|
李長老長成ê時beh結婚，無錢thang倩一頂烏轎--仔hō͘新娘坐，俗語講：「無芥戴匏瓠，無轎坐牛車」；總是李長老無錢thang倩牛車！新娘是tòe媒人行--去！！！ |
|
Lí Tiúⁿ-ló khí-thâu hiah-ni̍h sàn, ē pìⁿ-chò hiah hó-gia̍h, ū kúi-nā hāng ê pì-koat:
|
李長老起頭hiah-ni̍h散，會變做hiah好額，有幾若項ê祕訣： |
|
1. Ū thàn chiū hó
|
1、有趁就好 |
|
“Tâi-oân bô 3 ji̍t hó kong-kéng.” “Seng-lí lâng jiok khí, bô jiok lo̍h.” Seng-lí tōa hó, chiū ē tōa tó.!!
|
「台灣無3日好光景。」「生理人jiok起，無jiok落。」生理大好，就會大倒！！ |
|
Lí Tiúⁿ-ló ê seng-lí hoat: Lâng ài! i bē !!! lâng m̄ ài! i bé !!!
|
李長老ê生理法：人ài!伊賣！！！人m̄ ài!伊買！！！ |
|
Seng-lí ē ēng-tit thàn! Bē ēng-tit liáu !!! Chē-chioth2an! Ū thàn chiū hó!! I m̄-bat liáu !!!
|
生理會用得趁！Bē用得了！！！濟少趁！有趁就好！！伊m̄-bat了！！！ |
|
2. Hó kau-pôe
|
2、好交陪 |
|
Lí Tiúⁿ-ló ê hō͘-tēng chin kē! I ê chhù-the̍h pêng-siông!! Chhēng-chhah phó͘-thong !!! Thiaⁿ-thâu chhin-chhiūⁿ tiàm-thâu. I mê-ji̍t chē tī thiaⁿ--ni̍h, hoan-gêng lâng-kheh. Bô-lūn khit-chia̍h lô-hàn, lóng í-lé siong-thāi !!!
|
李長老ê戶錠真低！伊ê厝宅平常！！穿插普通！！！廳頭親像店頭。伊暝日坐tī廳--ni̍h，歡迎人客。無論乞食羅漢，攏以禮相待！！！ |
|
I ê pn̄g-khaⁿ tōa ê! Lâng-kheh kàu, bōe chia̍h!! kiò chia̍h !!! Khòaⁿ-tio̍h lâng-kheh kôaⁿ, hiah-saⁿ hō͘ lâng-kheh chhēng !!! Ūi--tio̍h án-ne, i ê hâng-chêng chin thang kng! I ê chîⁿ bē hō͘ lâng láu-khì!! I bé thó͘-tē bē hō͘ lâng phiàn-khì !!! I sī chhin-chhiūⁿ “Cháiⁿ-siòng bô chhut mn̂g, ē chai thiⁿ-ē sū”: Hiah ê lô-hàn-kha chiū-sī i ê pò-á.
|
伊ê飯khaⁿ大ê!人客到，bōe食！！叫食！！！看著人客寒，hiah衫hō͘人客穿！！！為著án-ne,伊ê行情真thang光！伊ê錢bē hō͘人láu去！！伊買土地bē hō͘人騙--去！！！伊是親像「宰相無出門，會知天下事」：Hiah ê羅漢腳就是伊ê報--仔。 |
|
3. Ū sìn-gióng
|
3、有信仰 |
|
Bô-lūn lâm-pak jī-lō͘, kok lāi-gōa ê hōe-iú, á-sī thoân-kàu-ka kàu i hia tê-iân; i chē-chió lóng ū hōng-hiàn.
|
無論南北二路，國內外ê會友，或是傳教家到伊hia tê-iân;伊濟少攏有奉獻。 |
|
I tùi pún-tông ê thoân-kàu-ka, bô-lūn lāu-chíⁿ, gâu ham-bān; iā lóng chun-kèng iu-thāi; pe̍h-bí chi̍t kho͘-gîn 2 táu (23 Tâi-kin).
|
伊tùi本堂ê傳教家，無論老嫩，gâu、ham-bān;也攏尊敬優待；白米一箍銀2斗（23台斤）。 |
|
Hit sî in kàu-hōe ê lé-pài lâng sò͘, téng ē-po͘ kok 70,80 lâng; hōe-iú ê chóng-sò͘ óa 200: tōa pō͘-hūn sàn-hiong, kàu-hōe ê keng-hùi, kap gō͘-la̍k chheng kho͘ ê ki-pún-kim; i hiàn tōa-thâu; i thok góa kó͘-bú in ê sian-seⁿ, hō͘ in chhiáⁿ chò bo̍k-su; in chiū beh khì Pang-liâu siat chi-hōe.
|
Hit時in教會ê禮拜人數，頂e晡各70、80人；會友ê總數倚200：大部份散hiong，教會ê經費，kap五、六千箍ê基本金；伊獻大頭；伊託我鼓舞in ê先生，hō͘ in請做牧師；in就beh去枋寮設支會。 |
|
Thâu hôe ê A-kâu-thiaⁿ-ē Kàu-hōe Chū-li̍p Chhiok-chìn-hōe, tī Bān-tan chū-chi̍p ê sî; i ū thâi-ti, lâi chhiáⁿhù-hōe ê 60 gōa lâng.
|
頭回ê阿猴廳下教會自立促進會，tī萬丹聚集ê時；伊有thâi豬，來請赴會ê 60外人。 |
|
4. Kòe bí-jîn-koan
|
4、過美人關 |
|
Lí Tiúⁿ-ló chāi-lâi “Pîn-chiān put-î, hù-kùi put-îm!” Put-hēng tī 60 gōa hòe ê sî, sit-lo̍h goân-phòe.
|
李長老在來「貧賤不移，富貴不淫！」不幸tī 60外歲ê時，失落元配。 |
|
Hit sî siā-hōe lâng, ū súi cha-bó͘-kiáⁿ ê, chē-chē teh him-bō͘, khòaⁿ ē tit-tio̍h chi̍t ê kim-ku-sài, lâi hō͘ in cha-bó͘-kiáⁿ chò oân-gōe-niû; chhin-chhiūⁿ chá-sî Ka-lâm-tē 500 bān jîn-kháu ê lia̍t-ông, teh chìn-kong in 1000 ê kong-chú hō͘ Só͘-lô-bûn ê sim-chêng.
|
Hit時社會人，有súi查某子--ê,濟濟teh欣慕，看會得著一個金龜婿，來hō͘ in查某子做員外娘；親像早時迦南地500萬人口ê列王，teh進宮in 1000個公主hō͘所羅門ê心情。 |
|
Sè-sio̍k môe-lâng, it-tio̍h beh thàn tōa-tû chîⁿ, chi̍t-Ji̍t e-e tīn-tīn hō͘-tēng-thâu ta̍h kàu ui-khì! Lóng pohit3 hō cha̍p-chhit-peh-hòe cha-bó͘ gín-ná; koai! gâu!! koh súi !!!
|
世俗媒人，it-tio̍h beh趁櫥錢，一日e - e陣陣戶錠頭踏到萎--去！攏報hit號十七八歲查某囡仔；乖！gâu!！koh súi!！！ |
|
Sio-cheⁿ kóng beh ēng kiō, kng lâi hō͘ Lí Tiúⁿ-lok2éng !!!
|
相爭講beh用轎，扛來hō͘李長老揀！！！ |
|
Lí Tiúⁿ-ló sī lāu-tōa sū-gia̍p-ka, hó-chhân hó-hn̂g kúi-nā chheng-kah: ū ê tī Tâi-tang, ū ê tī Chiang-chiu. Ji̍t-sî chhau-hoân, chē kui-ji̍t. Mê-sî tó lo̍h chhn̂g, io-kut sng, kut-thâu thiàⁿ; khùn liáu sī kha-bâ chhiú-pì; cheng-sîn iū bē khùn-tit, tán bē tàng thiⁿ kng! Ū su-iàu lâng thang tâm-lūn, kái sim-būn!! í-ki̍p ū sî tûi io-kut kap kiù-kip!!! Che tio̍h lāu-pô chiah ē nāi-bîn, chai khin-tāng tông-chêng thé-thiap !!!
|
李長老是老大事業家，好田好園幾若千甲：有--ê tī台東，有--ê tī漳州。日--時操煩，坐歸日。暝--時倒落床，腰骨酸、骨頭疼；睏了是腳痲手痺；精神又bē睏得，等bē tàng天光！有需要人thang談論，改心悶！！以及有時槌腰骨kap救急！！！Che著老婆才會耐眠，知輕重同情體貼！！！ |
|
Nā-sī cha-bó͘ gín-ná kè lāu-ang, bo̍k-tek sī it-tio̍h chîⁿ !!! Ji̍t-sî chia̍h pá-pá! chng súi-súi, beh siu-si̍p lāu-ang ê miā! Beh put lāu-ang ê ke-hóe, bô iàu-kín lāu-ang ji̍t-mê ê kan-khó͘, seⁿ-kāng-sí !!!
|
若是查某囡仔嫁老翁，目的是it-tio̍h錢！！！日--時食飽飽！裝súi-súi,beh收拾老翁ê命！Beh put老翁ê家伙，無要緊老翁日暝ê艱苦，生共死！！！ |
|
Hit sî in ê Ko Thoân-tō, teh khòa-lū Lí Tiúⁿ-ló, nā hō͘ sè-sio̍k môe-lâng, ín-iú khì chhōa bô sìn-gióng ê hū-lú lâi, chhin-chhiūⁿ hiân-kun Só͘-lô-bûn, khì chhōaīⁿ-pang ê lú-chú: Lāu-ang thiàⁿ chíⁿ-bó͘! Thiàⁿ chiū thiaⁿ!!! Thiaⁿ chiū kiaⁿ !!! Án-ne ka-têng kap kàu-hōe chiū chhám !!!
|
Hit時in ê高傳道，teh掛慮李長老，若hō͘世俗媒人，引誘去chhōa無信仰ê婦女來，親像賢君所羅門，去chhōa異邦ê女子：老翁疼嫩某！疼就聽！！！聽就驚！！！Án-ne家庭kap教會就慘！！！ |
|
Só͘-í Ko Thoân-tō, chiū kóaⁿ-kín chiu-soân i ê chêng jīm-tē, ê chi̍t ê to̍k-sin 30 gōa hòe, jia̍t-sim phok-sò͘ ló-sêng ê chí-mōe; sī Chú-ji̍t-o̍h kàu-oân, kap Hū-o̍h ê sian-seⁿ. Lâi hû-chhî Lí Tiúⁿ-ló it-seng; kap pang-chān kàu-hōe kàu chit-tia̍p 70 gōa hòe, iáu teh tam-tng Tiúⁿ-ló ê kang !!!
|
所以高傳道，就趕緊周旋伊ê前任地ê一個獨身30外歲，熱心樸素老成ê姊妹；是主日學教員，kap婦學ê先生。來扶持李長老一生；kap幫贊教會到chit-tia̍p 70外歲，iáu teh擔當長老ê工！！！ |
|
(khiàm 1958 nî 12 ge̍h)
|
(欠1958年12月) |
