Keh-piah pûn Teng-hóe
|
隔壁pûn燈火 |
|---|---|
| Tân Kàng-siông | 陳絳祥 |
|
Keh-piah Pûn Teng-hóe
|
隔壁Pûn燈火 |
|
一幕劇
|
一幕劇 |
|
人物: 溫柔伯，子:和平；朋友:博愛、善良、謙卑；大憨伯孫:天福
|
人物：溫柔伯；子和平：朋友：博愛、善良、謙卑；大憨伯孫天福 |
|
溫柔: Eh-hm̀, Eh-hm̀, Eh-hm̀. (teh sàu ê siaⁿ)
|
溫柔：Eh-hm̀、Eh-hm̀、Eh-hm̀。（Teh嗽ê聲） |
|
和平: A-pa, lí sàu kah án-ni, chhiáⁿ Ông sian siⁿ lâi khòaⁿ hó bô?
|
和平：阿爸，你嗽kah án-ni,請王--先-生來看好--無？ |
|
溫柔: M̄ bián, lāu-lâng pīⁿ pàng kù-chāi i khì, sio̍k-gú kóng: he-ku tio̍h chām thâu chiah ōe hó, eh-hm̀, eh-hm̀, lí ê a-bú iū-koh chá lī-khui sè-kan khì thian-tông, lí ê a-hiaⁿ cha̍p gōa nî chêng khì gōa-kok, kàu chím-má lóng bô siau-sit, ka-têng iū-koh chiah-n̍i̍h sàn-hiong ---- eh-hm̀, eh-hm̀.
|
溫柔：M̄免，老人病放據在伊去，俗語講：『he-ku著斬頭才會好。』eh-hm̀、eh-hm̀,你ê阿母又koh早離開世間去天堂，你ê阿兄十外年前去外國，到chím-má攏無消息，家庭又koh chiah-n̍i̍h散hiong----- eh-hm̀、eh-hm̀。 |
|
和平: A-pa! lí m̄-thang khòa-ì, Siōng-tè bô choa̍t lâng ê seⁿ-lō͘, chit sè-kan sī khó͘-hái, Iâ-so͘ kóng, thun-lún kàu lō͘-bóe ê lâng ū hok-khì.
|
和平：阿爸！你m̄-thang掛意，上帝無絕人ê生路，這世間是苦海，耶穌講：『吞忍到路尾ê人有福氣。』 |
|
溫柔: Ē-hng sī Sèng-tàn mê, Hô-pêng! lí kiám m̄-sī tio̍h khì kàu-hōe hù chiok-hō-hōe?
|
溫柔：E昏是聖誕暝，和平！你kiám m̄是著去教會赴祝賀會？ |
|
和平: Sī! m̄-kú lí ê sin-thé chiah-n̍i̍h loán-jio̍k, góa khah-bān chiah khì bô iàu-kín.
|
和平：是！m̄-kú你ê身體chiah-n̍i̍h軟弱，我較慢chiah去無要緊。 |
|
溫柔: M̄-thang, lí tio̍h kín-khì, eh-hm̀, eh-hm̀.
|
溫柔：M̄-thang，你著緊去，eh-hm̀、eh-hm̀。 |
|
大憨伯: Chhá-sí--ah! Kap chit hō he-ku kang-chhiúⁿ chò keh-piah chin-chiàⁿ soe. Oeh! (cheng-piah) mó͘-tah nā beh pháng mā chò chi̍t-khùn pháng hō͘ hoat-pōng, m̄-thang pháng kah hi̍h-hiuh háu.
|
大憨伯：吵死--ah！Kap這號he-ku工廠做隔壁真正衰。Oeh！（cheng壁）mó͘-tah若beh紡mā做一khùn紡hō͘發磅，m̄-thang紡kah hi̍h-hiuh哮。 |
|
和平: Tōa-gōng peh, chin sit-lé, in-ūi he-ku bē lún-tit sàu, chhiáⁿ lí goân-liōng.
|
和平：大憨伯，真失禮，因為he-ku bē忍--tit嗽，請你原諒。 |
|
大憨伯: Sím-mi̍h! bōe lún-tit sàu, goán hōe-siā nî-bóe ê khang-khòe chin chōe, bô chò bōe ēng tit, lí chai bô? Kā góa lún-teh m̄-thang sàu, oa̍h beh chhá-sí. (thêng chi̍t-ē) Thian-hok ah, phàu chi̍t poe tê lâi.
|
大憨伯：甚mi̍h！bōe忍--tit嗽，阮會社年尾ê工課真濟，無做bōe--用-得，你知--無？Kā我忍--teh m̄-thang嗽，活beh吵死。（停一下）天福ah，泡一杯茶來。 |
|
天福: Hó! (下台再上) A-kong, bô tê-sim lah, kún-chúi hó-bô?
|
天福：好！（下台再上）阿公，無茶心--lah，滾水好--無？ |
|
大憨伯: Khó-o͘N3! bô tê-sim án-chóaⁿ m̄-bián kóng, góa chhī lí chit-hō, kin-sio̍k bô chhái-kang, bô siūⁿ lí ê lāu-pē kap lí ê lāu-bú sí liáu-āu, lín án-kong tio̍h lāu pháiⁿ-miā, thàn-chîⁿ hō͘ lí chia̍h, chhēng, sòa tha̍k-chheh, lín kong-a ài limchit-poe tê, m̄ bián chún-pī tê-sim hō͘ piān, chhī lí chit hog7?ng-tōa-tai. (tùi thâu-khak tuh chi̍t ē) Kóaⁿ-kín khib3oe--lâi.
|
大憨伯：可惡！無茶心án-chóaⁿ m̄免講：我飼你這號，kin-sio̍k無采工，無想你ê老父kap你ê老母死了後，lín俺公著老歹命，趁錢hō͘你食、穿，續讀冊，lín公--仔ài lim這杯茶，m̄免準備茶心hō͘便，飼你這號憨大呆。（Tùi頭殼tuh一下）趕緊去買--來。 |
|
天福: Hó! (the̍h chîⁿ lo̍h-tâi)
|
天福：好！（提錢落台） |
|
(朋友三人: chiūⁿ-tâi)
|
（朋友三人上台） |
|
博愛: Siān-liông hiaⁿ! Hô-pêng hiaⁿ ê chhù kiám kàu ūi lah?
|
博愛：善良兄！和平兄ê厝kiám到位lah？ |
|
善良: Kàu ūi lah! hit keng phòa chháu-liâu-á chiū sī lah.
|
善良：到位--lah！hit間破草寮仔就是--lah。 |
|
謙卑: Si̍t-chāi chin khó-lîn, chiah sòng-hiong, Un-jiû peh-ah koh phòa-pīⁿ.
|
謙卑：實在真可憐，chiah散hiong，溫柔伯--ah koh破病。 |
|
博愛: Hô-pêng hiaⁿ! Ū lâng tī teh bô?
|
博愛：和平兄！有人tī teh無？ |
|
和平: Ū lah! chhiáⁿ ji̍p lâi.
|
和平：有--lah！請入來。 |
|
朋友三人: Kiù-chú Sèng-tàn kiong-hí!
|
朋友三人：救主聖誕恭喜！ |
|
父子: Kiong-hí, kiong-hí, hō͘ lín chin hùi-sîn.
|
父子：恭喜！恭喜！hō͘ lín真費神。 |
|
和平: A-pa, chit saⁿ-ūi sī kap góa pêⁿ-pêⁿ teh Sèng-keng kho ê pêng-iú, chit ūi Phok-ài hiaⁿ, chit ūi Siān-liông hiaⁿ, chit ūi khiam-pi hiaⁿ.
|
和平：阿爸，這三位是kap我平平teh聖經科ê朋友，這位博愛兄，這位善良兄，這位謙卑兄。 |
|
溫柔: Hò͘! án-ni haⁿh! chin hó, chin-hó.
|
溫柔：Hò͘!án-ni haⁿh！真好、真好。 |
|
朋友三人: Un-jiû peh, bān-sū pài-thok.
|
朋友三人：溫柔伯，萬事拜託。 |
|
溫柔: Ah! lín chiah ê chin chhong-bêng, nā-sī góa lāu-lâng he-ku tōa-khùi tū, nā ōe thang kín tńg lâi thian-tông kín hó. Chóng-sī góa nā lī-khui sè-kan, Hô-pêng ê a-hiaⁿ cha̍p-gōa nî chêng khì gōa-kok, iáu bōe tńg-lâi, chhun Hô- pêng chi̍t ê lâng iā sī chin khó-lîn.
|
溫柔：Ah！Lín chiah ê真聰明，若是我老人he-ku大氣tū,若會thang緊轉來天堂緊好。總是我若離開世間，和平ê阿兄十外年前去外國，iáu bōe轉來，chhun和平一個人也是真可憐。 |
|
博愛:Un-jiû peh, lí m̄-thang hoân-ló, sè-kan sī khó͘-hái, iā-sī chiām-sî ê, lán ê ǹg-bāng sī thian-tông éng-oán ê hok-khì, Hô pêng hiaⁿ chiong-lâi ún-tàng ū sêng-kong ê ji̍t-chí, nā-sī i ê hiaⁿ bô-kú tek-khak ū hó ê siau-sit chiah-tio̍h.
|
博愛：溫柔伯，你m̄-thang煩惱，世間是苦海，也是暫時--ê,咱ê向望是天堂永遠ê福氣，和平兄將來穩當有成功ê日子，若是伊ê兄無久的確有好ê消息才著。 |
|
善良: Un-jiû peh! sī, Phok-ài hiaⁿ teh kóng sī bô-chhò, taⁿ goán ū tòa tām-po̍h ê gû-ni kap ke-N̄g-ko, beh hō͘ lí chòe Sèng-tàn ê lé-mi̍h, chhiáⁿ lí siu khí-lâi.
|
善良：溫柔伯！是，博愛兄teh講是無錯，今阮有tòa淡薄ê牛奶kap雞卵糕，beh hō͘你做聖誕ê禮物，請你收起來。 |
|
溫柔: Ah! hō͘ lín ke khai-chîⁿ, lín chiah ê ū iáⁿ chin koai koh ū thiàⁿ-sim.
|
溫柔：Ah！Hō͘ lín加開錢，lín chiah ê有影真乖koh有疼心。 |
|
謙卑: Un-jiû peh! goán lâi chhiùⁿ chi̍t siú si hō͘ lí thiaⁿ.
|
謙卑：溫柔伯！阮來唱一首詩hō͘你聽。 |
|
四人唱: (Sèng-si 195 siú)
|
四人唱：（聖詩195首） |
|
大憨伯: Ài, mó͘-tah bô teh pháng, ōaⁿ siu-im-ki teh hòng-sàng, bêng-bêng sī teh nāu ê Oeh! tiām khì lah! Iâ-so͘, Siōng-tè, ji̍p-kàu-kúi-ah!
|
大憨伯：Ài,mó͘-tah無teh紡，換收音機 teh放送，明明是teh鬧--ê Oeh！恬去--lah！耶穌、上帝，入教鬼--ah！ |
|
博愛: Hô-pêng hiaⁿ, keh-piah teh hoah--ê, sī sím-mi̍h lâng?
|
博愛：和平兄，隔壁teh 喝--ê,是甚mi̍h人？ |
|
和平: Sī Tōa-gōng peh, i sī chin pháiⁿ-sèng-tē ê lâng, m̄ ài lâng chhá.
|
和平：是大憨伯，伊是真歹性地ê人，m̄ ài人吵。 |
|
善良: Hè! chhiò-sí-lâng, m̄-sī khì in tau, i iā teh kā lâng koán.
|
善良：Hè!笑死人，m̄是去in兜，伊也teh kā人管。 |
|
謙卑: Ah! lâng kóng keh-piah pûn teng-hé, phah-sǹg sī án-ni.
|
謙卑：Ah！人講隔壁pûn燈火，打算是án-ni。 |
|
大憨伯: Ke kóng ōe, sím-mi̍h keh-piah pûn teng-hé.(打璧)
|
大憨伯：加講話，甚mi̍h隔壁pûn燈火。（打璧） |
|
溫柔: Tōa-gōng hiaⁿ chin sit-lé, in-ūi chiah ê siàu-liân gín-ná khah bōe hiáu tit.
|
溫柔：大憨兄真失禮，因為chiah ê少年囡仔較bōe曉得。 |
|
大憨伯: Góa m̄ thiaⁿ, hī-khang lé-pài. (cheng-tân)
|
大憨伯：我m̄聽，耳空禮拜。（鐘tân) |
|
博愛: Ah! kàu-hōe ê cheng teh tân lah, Sèng-tàn ê chiok-hō hōe khai-bō͘ lah.
|
博愛：Ah！教會ê鐘teh tân--lah，聖誕ê祝賀會開幕--lah。 |
|
和平: A-pa, goán beh lâi-khì, chhiáⁿ lí sin-thé tio̍h sè-jī.
|
和平：阿爸，阮beh來去，請你身體著細膩。 |
|
朋友三人: Un-jiû peh, goān Chú chiok-hok lí pêng-an.
|
朋友三人：溫柔伯，願主祝福你平安。 |
|
溫柔: To-siā, to-siā, tio̍h ûn-ûn-á kiâⁿ, chiah koh lâi thit-thô hè. (四人下台)
|
溫柔：多謝！多謝！著勻勻仔行，chiah koh來thit-thô hè。（四人下台） |
|
大憨伯: Hè! khó-o͘N3---sí, oa̍h beh chhùi-ta sí, koh khì bé chit pau tê-sim, bé kúi nā tiám cheng kú (四人kng天福上台)
|
大憨伯：Hè!可惡--死，活beh嘴礁死，koh去買這包茶心，買幾若點鐘久（四人扛天福上台） |
|
天福: A-kong à! a-kong-à! (哭)
|
天福：阿公--à!阿公--à!（哭） |
|
大憨伯: Kiò sím-mi̍h! (oa̍t-thâu khòaⁿ, tio̍h chi̍t-kiaⁿ) Thian-hok à, lí sī cháiⁿ-iūⁿ? ná hō͘ lâng kng tńg--lâi; khì bé chit pau tê-sim bé hiah kú.
|
大憨伯：叫甚mi̍h！（越頭看，著一驚）天福--à,你是怎樣？那hō͘人扛--轉-來；去買這包茶心買hiah久。 |
|
天福: A-kong, góa khì ke-ni̍h bé tê-sim tò tńg-lâi tú-tio̍h pêng-iú sòa hō͘ i chio khì thit-thô, kàu siūⁿ tio̍h a-kong teh chhùi ta, kóaⁿ-kín beh tńg-lâi, āu-bīn chi̍t-tiuⁿ chhia kā góa cheng-tó, sái-lè chò i khì. (âⁿ âⁿ âⁿ âⁿ)
|
天福：阿公，我去街--ni̍h買茶心倒轉來tú著朋友續hō͘伊招去thit-thô,到想著阿公teh嘴礁，趕緊beh轉來，後面一張車kā我cheng倒，sái-lè做伊去。（âⁿ âⁿ âⁿ âⁿ） |
|
大憨伯: Hè! sái chhia ê mā sī teh chhiⁿ-mê, iā sím-mi̍h lâng chhōa lí khì kô͘-io̍h?
|
大憨伯：Hè!駛車--ê mā是teh青瞑，也甚mi̍h人chhōa你去kô͘藥？ |
|
天福: Góa tó-lo̍h--khì ê sî chiū án-ni m̄ chai lâng. Kàu sian-siⁿkā góa kô͘-io̍h hó-sè góa chiah chhéⁿ khí--lâi, khòaⁿ-tio̍h Hô-pêng hiaⁿ kap chit saⁿ-ūi pêng-iú, chiū-sī in sì-ūi kng góa tńg--lâi.
|
天福：我倒--落-去ê時就án-ni m̄知人。到先生kā我kô͘藥好勢我才醒--起-來，看著和平兄kap這三位朋友，就是in四位扛我轉--來。 |
|
和平: Tōa-gōng peh, goán thiaⁿ-kìⁿ kàu-hōe ê cheng-siaⁿ teh tân, kóaⁿ-kín beh khì hù Sèng-tàn ê chiok-hō-hōe, kàu Tiong-san-lō͘ ê si̍p-jī-lō͘ thâu khòaⁿ-kìⁿ ûi chin-chōe lâng. Goán khì khòaⁿ chiah chai Thian-hok hō͘ chū-tōng-chhia cheng-tó, thâu-khak kap kha tio̍h-siong, goán kóaⁿ-kín kng khì Lō͘-ka i-īⁿ hō͘ Âng sian-siⁿ kô͘-io̍h, taⁿ hui̍h iā chí lah, phah-sǹg bô sím-mi̍h iàu-kín.
|
和平：大憨伯，阮聽見教會ê鐘聲teh tân,趕緊beh去赴聖誕ê祝賀會，到中山路ê十字路頭看見圍真濟人。阮去看才知天福hō͘自動車cheng倒，頭殼kap腳著傷，阮趕緊扛去路加醫院hō͘洪先生kô͘藥，今血也止--lah，打算無甚mi̍h要緊。 |
|
大憨伯: Ho͘N3! sī án-ni hàⁿ! hó kai-chài lín lâi kiù i, hō͘ lín chin to-siā. Ah! góa pêng-sò͘ tùi lín lāu-pē kap lí chin bô-lé, lí iā bô khioh-hūn, hoán-tńg saⁿ chiàu-kò͘, ah! góa si̍t-chāi chin kiàn-siàu.
|
大憨伯：好！是án-ni hàⁿ！好佳哉lín來救伊，hō͘ lín真多謝。Ah！我平素tùi lín老父kap你真無禮，你也無拾恨，反轉相照顧，ah！我實在真見笑。 |
|
和平: Tōa-gōng peh, bô iàu-kín, goán lóng bô teh khioh-hūn lín, in-ūi Iâ-so͘ kóng: Tio̍h thiàⁿ lí ê chhù-piⁿ, chhin-chhiūⁿ ka-kī, goán án-ni chòe sī èng-kai ê.
|
和平：大憨伯，無要緊，阮攏無teh拾恨lín,因為耶穌講：著疼你ê厝邊，親像家己，阮án-ni做是應該--ê。 |
|
大憨伯: Góa tio̍h thàn chit ê ki-hōe kap lí ê lāu-pē hô-hó. (kui- tīn chhōa kòe-lâi) Lāu hiaⁿ-tī, góa siông-siông pháiⁿ-khoán-thāi lí, tùi lí chin sit-lé, ǹg-bāng lāu hiaⁿ-tī sià-bián góa ê tōa-gōng.
|
大憨伯：我著趁這個機會kap你ê老父和好。（歸陣chhōa過來）老兄弟，我常常歹款待你，tùi你真失禮，向望老兄弟赦免我ê大憨。 |
|
溫柔: Tōa-gōng hiaⁿ m̄ bián kheh-khì, sio̍k-gú kóng; kú-tn̂g chhin-chiâⁿ, bān-nî chhù-piⁿ, chhù-piⁿ tau, èng-kai tio̍h saⁿ chhin-ài, saⁿ pang-chān chiah tio̍h, góa chin ài chhin-chhiūⁿ lí chit khoán lâng kap góa chòe chhù-piⁿ.
|
溫柔：大憨兄m̄免客氣，俗語講；久長親情，萬年厝邊，厝邊兜，應該著相親愛，相幫贊才著，我真ài親像你這款人kap我做厝邊。 |
|
大憨伯: Nā sī góa chiah n̍i̍h thó͘-phiah m̄ chai cháiⁿ-iūⁿ chiah ōe kái.
|
大憨伯：若是我chiah n̍i̍h土癖m̄知怎樣才會改。 |
|
溫柔: Ho͘N3! lí nā ài kóe sèng-tē tio̍h lâi sìn Iâ-so͘ pài Siōng-tè, Iâ-so͘ ōe kā lâng têng-thâu-siⁿ, ōaⁿ lâng ê phín-hēng ké lâng ê kū-sèng.
|
溫柔：好！你若ài改性地著來信耶穌拜上帝，耶穌會kā人重頭生，換人ê品行改人ê舊性。 |
|
大憨伯: Ah! pài Siōng-tè góa chin kú tio̍h teh siūⁿ, nā-sī án-ni góa chit lé-pài beh kap lín lâi khì lé-pài.
|
大憨伯：Ah！拜上帝我真久著teh想，若是án-ni我這禮拜beh kap lín來去禮拜。 |
|
博愛: Chin-hó! chin-hó! Tōa-gōng peh, lí nā lâi sìn Iâ-so͘ chiū ōe hó sèng-tē, iā bōe koh tùi keh-piah pûn teng-hé.
|
博愛：真好！真好！大憨伯，你若來信耶穌就會好性地，也bōe koh tùi隔壁pûn燈火。 |
|
善良: A-peh! sī lah! chit lé-pài tek-khak tio̍h lâi, m̄ nā lí lâi lé-pài, Thian-hok kun sòa hō͘ i kap goán lâi khì tha̍k Chú-ji̍t-o̍h, āu-lâi i ōe ke chin chhong-bêng koh gâu iú-hàu a-kong.
|
善良：阿伯！是--lah！這禮拜的確著來，m̄若你來禮拜，天福君續hō͘伊kap阮來去讀主日學，後來伊會加真聰明koh gâu有孝阿公。 |
|
大憨伯: Ū iáⁿ bô? án-ni chin-hó, Thian-hok iā tio̍h kap lín khì tha̍k Chú-ji̍t-o̍h, khòaⁿ ōe chhin-chhiūⁿ lín chiah koai koh chhong-bêng bōe?
|
大憨伯：有--影-無？án-ni真好，天福也著kap lín去讀主日學，看會親像lín chiah乖koh聰明bōe? |
|
郵差: Kòa-hō! chhiáⁿ the̍h ìn-á lâi tǹg. (蓋印)
|
郵差：掛號！請提印--仔來tǹg(蓋印） |
|
溫柔: Sím-mi̍h lâng kià-lâi ê?
|
溫柔：甚mi̍h人寄來--ê? |
|
和平: Tī Bí-kok goán a-hiaⁿ kià lâi ê (和平讀音信)
|
和平：Tī美國阮阿兄寄來--ê(和平讀音信） |
|
“A-pa kap sió-tī lín ū pêng-an bô? Góa chū lī-khui kàu chit sî lóng pêng-an. Góa saⁿ-nî chêng tùi Hiong-káng lâi Bí-kok, hiān-chāi keng-êng kang-chhiúⁿ, bô êng thang tńg-khì lán kok, tāi-khài mê-nî Sèng-tàn cheh ê sî-chūn ōe tńg-khì, góa chū chhut-kok kàu hiān-chāi lóng bô kià-chîⁿ tńg khì, chhiáⁿ goân-liōng. Taⁿ kià Bí-kim 5 bān-kho͘ chhiáⁿ tùi Hôa-lâm gîn-hâng niá, nā ēng-liáu siá-phoe lâi, góa ōe koh kià khì, goān Thiⁿ-pē kap lín tī-teh, pêng-an.” A-pa chit tiuⁿ sī 5 bān kho͘ ê gîn-hâng toaⁿ.
|
「阿爸kap小弟lín有平安--無？我自離開到這時攏平安。我三年前tùi香港來美國，現在經營工廠，無閒thang轉去咱國，大概明年聖誕節ê時陣會轉--去，我自出國到現在攏無寄錢轉--去，請原諒。今寄美金5萬箍請tùi華南銀行領，若用了寫批來，我會koh寄去，願天父kap lín tī-teh，平安！」阿爸這張是5萬箍ê銀行單。 |
|
大憨伯: Un-jiû hiaⁿ kiong-hí, kiong-hí, Siōng-tè ū iáⁿ teh pó-pì lín. (鐘聲)
|
大憨伯：溫柔兄恭喜！恭喜！上帝有影teh保庇lín。（鐘聲） |
|
博愛: Ah! cheng-siaⁿ koh teh tân lah, chiok-hō hōe teh beh soah lah.
|
博愛：Ah！鐘聲koh teh tân--lah，祝賀會teh beh煞--lah。 |
|
善良: Ah! bô, lán lâi tiàm chia chhiùⁿ chiok Sèng-tàn ê chiok-hō koa.
|
善良：Ah！無，咱來tiàm chia唱祝聖誕ê祝賀歌。 |
|
(Sèng-tàn cheng) S.S. Sèng-si tē 4 siú. (幕)
|
（聖誕鐘）S.S. 聖詩第4首。（幕） |
|
(Oa̍h-miā ê bí-niû tē 43 kî, 1957 nî 12 goe̍h)
|
(活命ê米糧第43期，1957年12月) |
