Sió-sū
|
小事 |
|---|---|
| Phian-chip-sek | 編輯室 |
|
A-jîn tī ha̍k-hāu khó-chhì ê sî, thâu khòaⁿ chheh, sim lāi siūⁿ, che put-kò sī sió-sū.
|
阿仁tī學校考試ê時，偷看冊，心內想，che不過是小事。 |
|
Se̍k-bêng kun tī chi̍t ê lé-pài-ji̍t ē-po͘, liu khì hì-hn̂g khòaⁿ tiān-iáⁿ, sim lāi siūⁿ, che put-kò sī sió-sū.
|
碩明君tī一個禮拜日e晡，溜去戲園看電影，心內想，che不過是小事。 |
|
Lîm sian-siⁿ chiong èng-kai hōng-hiàn ê 10 hūn 1, àm-chīⁿ ūi ka-kī lâu tām-po̍h, sim lāi siūⁿ, che put-kò sī sió-sū.
|
林先生將應該奉獻ê十份一，暗靜為家己留淡薄，心內想，che不過是小事。 |
|
Tiuⁿ lú-sū khì tiàm-n̍i̍h bóe pò͘, thàn lâng bô teh chù-ì ê sî, sūn chhiú thau-the̍h chi̍t-tè pò͘-thâu lok tī tē-á lāi, sim lāi siūⁿ, che put-kò sī sió-sū.
|
張女士去店--n̍i̍h買布，趁人無teh注意ê時，順手偷提一塊布頭lok tī 袋仔內，心內想，che不過是小事。 |
|
Tân sian-siⁿ-niû kap keh-piah ê lâng kóng êng-ōe ê sî, kóng i bat khòaⁿ-kìⁿ kàu-hōe ê chip-sū tùi chîⁿ-hāng ū ài-māi. I án-ni phoe-phêng lâng, sim lāi siūⁿ, che put-kò sī sió-sū.
|
陳先生娘kap隔壁ê人講閒話ê時，講伊bat看見教會ê執事tùi錢項有曖昧。伊án-ni批評人，心內想，che不過是小事。 |
|
Hā-oa chhun chhiú beh bán hit lia̍p ké-chí ê sî, iā sī chhin-chhiūⁿ án-ni tī sim siūⁿ, che put-kò sī sió-sū!
|
夏娃伸手beh挽hit粒果子ê時，也是親像án-ni tī心想，che不過是小事！ |
|
(Oa̍h-miā ê Bí-niû tē 33 kî,1957 nî 2 ge̍h)
|
(活命ê米糧第33期，1957年2月) |
