Sèng-ke̍k tē 2 chi̍p_03
|
聖劇第二集_03 |
|---|---|
| N̂g Hoâi-un | 黃懷恩 |
|
Bōe Koân
|
賣 權 |
|
2幕6場：
|
2幕6場： |
|
1幕 1場 賣權 2場 父與子 3場 母與子 4場 祝福 5場 逃走 2 幕 1場 曠野 |
1 幕 1場 賣權 2場 父與子 3場 母與子 4場 祝福 5場 逃走 2 幕 1場 曠野 |
|
A.人物：1.雅各、2.以掃、3.以撒、4.利百加、5.天使a、6天使b、7.天使c。
|
A. 人物：1.雅各、2.以掃、3.以撒、4.利百加、5.天使a、6.天使b、7.天使c。 |
|
B. 主題歌：1. Jno. R. Sweneg;“Nearer My God to Thee”
|
B. 主題歌：1. Jno. R. Sweneg;“Nearer My God to Thee” |
|
2. 聖詩277 首。
|
2. 聖詩277 首。 |
|
第一幕 第一場 賣權
|
第一幕 第一場 賣權 |
|
場所 屋內
|
場所 屋內 |
|
Ngá-kok tī bú-tâi chiàⁿ-pêng chia̍h tāu-á-thng. Í-sò tùi tò-pêng chhut-tiûⁿ, chhiú ū the̍h phah-la̍h ê khì-khū.
|
雅各tī舞台正爿食豆仔湯。以掃tùi倒爿出場，手有提扑腊ê器具。 |
|
1 雅各：Oh! Chin hó-chia̍h, chin hó-chia̍h. Chia̍h-tio̍h pî-thó͘ khui, ba̍k-chiu koh ē kim.
|
1.雅各：Oh！真好食，真好食。食著脾thó͘開，目珠koh 會金。 |
|
2 以掃：Ngá-kok, lí teh chia̍h sím-mi̍h?
|
2.以掃：雅各，你teh食甚mi̍h？ |
|
3 雅各：Án-chóaⁿ lah, góa teh chia̍h sím-mi̍h kap lí ū sím-mi̍h kan-sia̍p lah.
|
3.雅各：Án-chóaⁿ--lah，我 teh食甚mi̍h kap你有甚mi̍h干涉--lah。 |
|
4 以掃：Bô-lah, góa kin-ná-ji̍t hohN, pháu khòng-iá pháu chi̍t ji̍t siūⁿ kóng beh lia̍h khòaⁿ ū sím-mi̍h cheng-seⁿ thang lâi chú chheⁿ-chhau chhiáⁿ lí, koh soah chin pháiⁿ-ūn lia̍h lóng bô pòaⁿ-hāng.
|
4.以掃：無lah，我今仔日hohN，跑曠野跑一日想講beh 掠看有甚mi̍h精牲thang 來煮chheⁿ-chhau請--你，koh煞真歹運掠攏無半項。 |
|
5 雅各：Oh-ah, kin-á-ji̍t a-hiaⁿ lí sī hō͘ sím-mi̍h kā lí kám-tōng tio̍h thah chiah-n̍i̍h chhin-chhiat leh, chēng kàu-taⁿ góa nā lâu chhùi-khí-nōa teh khòaⁿ lí chia̍h ê sî-chūn lí liān chi̍t-tè kut-á to m̄-bat phah-ka-la̍uh. Taⁿ lí sī beh ài góa kā lí chòe sím-mi̍h?
|
5.雅各：Oh-ah，今仔日阿兄你是hō͘甚mi̍h kā你感動著thah chiah-n̍i̍h 親切--leh，chēng到今我若流嘴齒瀾teh看你食ê時陣你連一塊骨仔都m̄-bat扑ka落。今你是beh ài我kā你做甚mi̍h? |
|
6 以掃：Bô lah, góa to ūi-tio̍h án-ni pháu kui-ji̍t, pháu kah nńg-siô-siô pak-tó͘ chin-chiàⁿ iau lah.
|
6.以掃：無--lah，我都為著án-ni跑歸日，跑kah軟siô siô腹肚真正枵--lah。 |
|
7 雅各：Án-ni sī án-chóaⁿ? Lí sī kiò góa beh kā lí chhòng sím-mi̍h hòe. Lí pak-tó͘ iau kap góa ū sím-mi̍h koan-hē.
|
7.雅各：Án-n是ián-chóaⁿ？你是叫我beh kā你創甚mi̍h貨。你腹肚枵kap我有甚mi̍h關係。 |
|
8 以掃：Hó-sim leh lah, Ngá-kok, a-hiaⁿ pak-tó͘ hui-siông ê iau lah. Chhin-chhiūⁿ teh beh sí-khì, pài-thok leh lah, hō͘ góa chia̍h chi̍t-ê hó bô?
|
8.以掃：好心--leh lah，雅各，阿兄腹肚非常ê 枵--lah。親像teh beh死--去，拜託--leh-lah，hō͘ 我食一下好--無? |
|
9 雅各：Bô lah, góa bô teh chia̍h sím-mi̍h hòe lah. A-hiaⁿ lí chin kaⁿ-siû ê khoán. Ah! Chin hó-chia̍h, chin hó-chia̍h. Chit ê thng khì-bī hui-siông ê hó. Chia̍h tio̍h liān chi̍h8 ia̍h giōng beh lak khí-lâi.
|
9.雅各：無--lah，我無teh食甚mi̍h貨--lah。阿兄你真監囚ê款。Ah！真好食，真好食。這個湯氣味非常ê好。食著連舌亦強beh落--起來。 |
|
10 以掃：Sím-mi̍h hòe lah? Hō͘ góa chia̍h chi̍t-chhùi khòaⁿ-māi-á hó m̄?
|
10.以掃：甚mi̍h貨--lah？Hō͘我食一嘴看māi仔好--m̄? |
|
11 雅各：Bē-tàng lah, hō͘ lí chia̍h chi̍t-chhùi soah liáu tōa-chîⁿ.
|
11.雅各：Bē tàng--lah，hō͘你食一嘴煞了大錢。 |
|
12 以掃：Bô, khòaⁿ chi̍t-óaⁿ beh bē góa-chē góa kā lí bé lah.
|
12.以掃：無，看一碗beh賣偌濟我kā你買--lah。 |
|
13 雅各：Góa m̄ bē lah.
|
13.雅各：我m̄賣--lah。 |
|
14 以掃：Liān gōa-chē lí ia̍h m̄ bē tio̍h m̄?
|
14.以掃：連偌濟你亦m̄賣著--m̄? |
|
15 雅各：Tong-jiân ê no̍h.
|
15.雅各：當然--ê no̍h。 |
|
16 以掃：Góa iōng chi̍t-ki chhâi-lông ê kha kā lí bé lah hó m̄? Bîn-á-chài góa nā lia̍h-tio̍h khah kā lí la̍p.
|
16.雅各：我用一支豺狼ê腳kā你買--lah好--m̄?明仔再我若掠著khah kā你納。 |
|
17 雅各：Hńg! Tàng-sng-kâu, chiong soaⁿ-n̍i̍h lóng-chóng ê chhâi-lông kā góa bé góa mā bô-ài.
|
17.雅各：Hńg!凍霜猴，將山--n̍i̍h 攏總ê豺狼kā我買我mā無ài。 |
|
18 以掃：Lí ū iáⁿ bô ài tio̍h m̄, hó án-ni góa beh kā lí phah, beh kā lí iōng chhiúⁿ ê. Góa sī lí ê hiaⁿ-ko lí m̄-chai tio̍h m̄? Sī Siōng-tè só͘ chiok-hok ê tōa-kiáⁿ, nā bô beh thiaⁿ góa ê chhùi góa sī ū koân-lī thang kā lí phah sí oh.
|
18.以掃：你有影無ài著--m̄,好án-ni我beh kā你扑，beh kā你用搶--ê。我是你ê兄哥你m̄知著--m̄?是上帝所祝福ê大子，若無beh聽我ê嘴我是有權利thang kā扑死oh。 |
|
19 雅各：Hó lah, bān-chiah leh lah, Tú-tio̍h lí chit ê thó͘-lâng bô hoat-tō͘.
|
19.雅各：好--lah，慢且--leh-lah，tú著你這個土人無法度。 |
|
20 以掃：Án-ni taⁿ iōng chhâi-lông kha chi̍t-ki beh bē góa hòⁿ.
|
20.以掃：Án-ni今用豺狼腳一支beh 賣--我hòⁿ。 |
|
21 雅各：Bô no̍h he sī bē tàng no̍h, ā-ū hiah-n̍i̍h sio̍k ê.
|
21.雅各：無--no̍h,he是bē tàng-- no̍h,ā有hiah-n̍i̍h sio̍k--ê。 |
|
22 以掃：Bô tio̍h iōng sím-mi̍h hòe tah beh bē góa neh, khah-kín leh lah, góa iau kah tōa-tn̂g teh kò sió-tn̂g lí m̄ chai hohN.
|
22.以掃：無著用甚mi̍h貨tah beh賣我--neh，較緊--leh-lah，我枵kah大腸teh告小腸你m̄知--hohN。 |
|
23 雅各：Án-ni lah hohN, lí nā-sī kam-goān chiong lí chím-má só͘ kóng hit ê tōa-hiaⁿ ê koân lâi kā góa bé, góa chiah beh kam-goān bē lí.
|
23.雅各：Án-ni--lah hohN，你若是甘願將你chím-má所講hit個大兄ê權來kā我買，我才beh甘願賣--你。 |
|
24 以掃：Lí kóng sím-mi̍h hòe! Iōng tōa-hiaⁿ ê koân kā lí bé hohN. Hǹg! Che ū kàu-gia̍h kî-koài ê bé-bē. Tī chit ê sî-tāi iā ū lâng teh iōng miâ-hūn chò seng-lí. Chóng-sī bô iàu-kín lah, pak-tó͘ nā kah iau kàu-teh lah, iōng sìⁿ-miā mā tio̍h kā lí bé. Kiat-kio̍k iā sī bô sím-mi̍h sún-hāi lah. Taⁿ khah-kín phâng-lâi leh, beh iōng tōa-hiaⁿ ê koân kā lí bé lah.
|
24.以掃：你講甚mi̍h貨！用大兄ê權kā你買hohN。Hǹg!Che有夠額奇怪ê買賣。Tī這個時代也有人teh用名份做生理。總--是無要緊--lah，腹肚若kah枵--到底lah，用甚mi̍h mā著kā你買。結局也是無甚mi̍h損害--lah。今較緊捧--來leh，beh用大兄ê權kā你買--lah。 |
|
25 雅各：Saⁿ bān-chiah leh góa nā bē lí, lí tùi kin-á-ji̍t khí tio̍h kiò góa a-hiaⁿ hohN, iā bô koân-lī thang phah góa lah hohN. Lí í-āu chiū m̄-sī Siōng-tè só͘ chiok-hok ê tōa-kiáⁿ lah hohN. Án-ni lí iā kam-goān tio̍h m̄.
|
25.雅各：Saⁿ慢且--leh，我若買--你，你tùi今仔日起著叫我阿兄--hohN，也無權利thang扑--我lah hohN。你以後就m̄是上帝所祝福ê大兄--lah hohN。Án-ni你也甘願著--m̄。 |
|
26 以掃：Hǹg! Bô thò-tòng, bô thò-tòng. Chóng-sī bô iàu-kín lah, kā lí bé lo̍h-khì ah. Iau kah pòaⁿ-sió-sí teh ham lí ko ko tîⁿ.
|
26.以掃：Hǹg!無妥當，無妥當。總--是無要緊--lah，kā你買--落去ah。枵Kah半小死teh hām你膏膏。 |
|
27 雅各：Hòⁿ! Án-ni hohN, bô lâi chhì kiò khòaⁿ māi koh, kiò góa a-hiaⁿ khòaⁿ-māi-á.
|
27.雅各：Hòⁿ！Án-ni--hohN，無來試叫看māi-- koh，叫我阿兄看māi仔。 |
|
28 以掃：Hǹg lí chit ê ū-iáⁿ cha̍p-hun ū káu-koài. Pak-tó͘ iau kàu teh, hō͘ lí khah pheⁿ teh bô iàu-kín. Taⁿ beh kiò, lí tio̍h thiaⁿ hō͘ chim-chiok hohN. “A-hiaⁿ.” Án-ni hó lah hohN taⁿ khah-kín phâng-lâi.
|
28.以掃：Hǹg你這個有影實在有狡怪。腹肚枵--到底，hō͘你較pheⁿ--leh無要緊。今beh叫，你著聽hō͘斟酌--hohN。 “阿兄。” Án-ni好--lah hohN 今較緊捧--來。 |
|
29 雅各：Án-ni hó chin sóng-khoài, chin sóng-khoài. Thiⁿ-tē khai-chó͘ m̄-bat ū ê sóng-khoài, taⁿ phâng-khì chia̍h, phâng-khì chia̍h, góa chit ê sió-tī-á ê bīn thái-ē seⁿ-choh chiah m̄ khah gōng koh khám leh.
|
29.雅各：Án-ni好，真爽快，真爽快。天地開祖m̄-bat有ê爽快，今捧去食，捧去食，我這個小弟仔ê面thái會生作chiah m̄ 較憨koh khám--leh。 |
|
30 以掃：Sím-mi̍h hòe ah! Hó-hó lí tio̍h kā góa kì leh hohN. Khah-thêng-á tah koh hō͘ lí kiò kiù lâng. Ū-iaⁿ chin hó-chia̍h to-tio̍h, goán-lâi chiū-sī âng-tāu-á thng hohN, lóng hō͘ lí phiàn-phiàn khì. Pak-tó͘ iau si̍t-chāi sī ū kàu kan-khó͘. Só͘-í chiah-tio̍h hō͘ lí chhiáⁿ kah pá koh chùi. Taⁿ lí tio̍h kā góa kì leh hohN. (以掃退場)
|
30.以掃：甚mi̍h貨--ah！好好你著kā我記--leh hohN。較停仔tah koh hō͘你叫救人。有影真好食都著，原來就是紅豆仔湯，攏hō͘你騙騙--去。腹肚枵實在是有夠艱苦。所以才著hō͘你請kah飽koh醉，今你著kā我記--leh hohN。(以掃退場) |
|
31 雅各：Hńg! Chin sóng-khoài, chin sóng-khoài. Bô sió-khóa kā kà-sī leh lóng bē sài-tit. Tiāⁿ kóng i sī tōa-kiáⁿ iā iōng tōa-kiáⁿ ê koân lâi beh khi-hū góa, bô sió-khóa kà-sī chi̍t-ē lóng bē sài-tit. Chóng-sī m̄-thang hō͘ i kòe-thâu siū-khì. Nā hō͘ i khí thó͘-phiah khí-lâi chiū hùi-khì. Taⁿ góa tio̍h lâi-khì pang-chān góa ê a-bó ê kang.
|
31.雅各：Hńg!真爽快，真爽快。無小可kā教示--leh 攏bē使得。定講伊是大子也用大子ê權來beh欺負--我，無小可教示--一下攏bē使得。總--是m̄-thang hō͘伊過頭受氣。若hō͘伊起土癖--起來就費氣。今我著來去幫贊我ê阿母ê工。 |
|
(退場)
|
(退場) |
|
第二場 父與子
|
第二場 父與子 |
|
場所同樣 以撒出場
|
場所同樣 以撒出場 |
|
1 以撒：Lâng nā chia̍h lāu si̍t-chāi sī pháiⁿ kòe-ji̍t. Nn̄g, saⁿ pah nî chá-chèng góa siàu-liân ê sî-chūn, kap góa ê lāu-pē A-pek-lia̍p-hán phiau-liû chi̍t-kok kòe chi̍t-kok kàu kin-ná-ji̍t í-keng chiâⁿ-chò chi̍t-ê lāu-lâng. Lāu kah bē chhoán-khùi. Ba̍k-chiu iā bô khòaⁿ-kiⁿ. Chia̍h kah chiah-n̍i̍h-á chē hōe ia̍h sī kan-khó͘. Taⁿ chí-ū sī kan-taⁿ tán-hāu sí, Siōng-tè tiàu góa tńg-khì kìⁿ góa ê chó͘-sian nā-tiāⁿ. Sè-hàn ê sî-chūn góa ê lāu-pē A-pek-lia̍p-hán iōng chhâ hō͘ góa phāiⁿ tī kha-chiah-phiaⁿ chhōa góa kàu tī Mô͘-lī-a ê soaⁿ hit ê tāi-chì chhin-chhiūⁿ chā-hng ê sū iáu-kú tī ba̍k-chiu chêng hō͘ góa bô bē kì-tit. Si̍t-chāi ji̍t-chí teh kòe sī chin-kín. Tī hit-sî èng-kai tio̍h sí ê, siū Siōng-tè ê un-hūi ū oa̍h kàu kin-ná-ji̍t, chóng-sī kiat-kio̍k ia̍h sī tio̍h sí. Bô sí ia̍h bē soah tit. Chí-ū sī lōng-hùi lâng ê khùi-la̍t nā-tiāⁿ, si̍t-chāi jîn-seng sī khang-hi, sī lia̍h-iáⁿ, kai-chài tùi thiⁿ ū siúⁿ-sù, Í-sò͘ kap Ngá-kok thang chò hō͘-sû hō͘ góa tām-po̍h an-sim. Taⁿ chóng-sī goán ê sî-tāi sī í-keng kòe-khì lah. Góa hó thang kā Í-sò͘ chiok-hok, ia̍h thang lâi khì chhōe góa ê bōng, éng-oán thang hioh-khùn. Taⁿ Í-sò kin-ná-ji̍t sī án-chóaⁿ kah iáu-bōe tò-lâi, m̄-chai ū tú-tio̍h sím-mi̍h tāi-chì á-bô. Góa tio̍h lâi kā i kiò khòaⁿ-māi-á. “Í-sò-à, Í-sò-à.”
|
1.以撒：咱若食老實在是歹過日。2、300年早前我少年ê時陣，kap我ê老父阿伯拉罕漂流一國過一國到今仔日已經成做一個老人。老kah bē喘氣。目珠也無看見。食kah chiah-ni̍h 仔濟歲亦是艱苦。今只有時間等候死，上帝召我等去見我ê祖先nā-tiāⁿ。細漢ê時陣我ê老父阿伯拉罕用柴hō͘ phāiⁿ tī ka-chiah-phiāⁿ chhōa我到tī摩利亞ê山hit個代誌親像cha-hng ê事iáu-kú tī目珠前hō͘我無bē記得。實在日子teh過是真緊。Tī hit時應該著死ê,受上帝ê恩惠有活到今仔日，總--是結局亦是著死。無死亦bē煞--tit。只有是浪費人ê氣力nā-tiāⁿ，實在人生是空虛，是掠影，佳哉tùi天有賞賜，以掃kap雅各thang做後嗣hō͘我淡薄安心。今總--是阮ê時代是已經過去--lah。我好thang kā以掃祝福，亦thang來去做我ê墓，永遠thang歇睏。今以掃今仔日是án-chóaⁿ kah iáu未倒--來，m̄知有tú著甚mi̍h代誌抑無。我著來kā伊叫看māi仔。「以掃--ah！以掃--ah！」 |
|
(以掃出場)
|
(以掃出場) |
|
2 以掃：A-pa sím-mi̍h tāi-chì lah, hiah-n̍i̍h-á tōa-siaⁿ sī án-chóaⁿ lah? Lí sin-thé kan-khó͘ á-bô? Á-sī lí ài chia̍h sím-mi̍h sī bô?
|
2.以掃：阿爸甚mi̍h代誌--lah，hiah-n̍i̍h仔大聲是án-chóaⁿ--lah？你身体艱苦抑無？抑是你ài食甚mi̍h是--無？ |
|
3 以撒：Í-sò-à! Lí khòaⁿ a-pa chiah-n̍i̍h-á lāu, kin-ná-ji̍t beh sí bîn-ná-ji̍t beh sí mā m̄ chai-iáⁿ, só͘-í góa siūⁿ kóng kin-á ji̍t ài tī Siōng-tè ê bin-thâu-chêng kā lí chiok-hok, nā bô mā sī bē an-sim. Taⁿ lí khì gia̍h lí ê chhiuⁿ kap lí ê bú-khì, iā khì soaⁿ-iá, kā góa lia̍h chi̍t-chiah pûi-pûi ê lo̍k-káng lâi chú-chú leh phâng lâi hō͘ lí ê a-pa chia̍h. Hō͘ góa ê sim-sîn chia̍h hō͘ sóng-khoài thang chiok-hok lí ê chiân-tô͘ Taⁿ khah-kín khì thang khah-kiú tò-lâi.
|
3.以撒：以掃ah！你看阿爸chiah-n̍i̍h仔老，今仔日beh 死，明仔日beh死mā m̄知影，所以我想講今仔日ài tī上帝ê面頭前kā你祝福，若無mā是bē安心。今你去gia̍h你ê槍kap你ê武器，也去山野，kā我掠一隻肥肥ê鹿káng來煮煮--leh捧來hō͘你ê阿爸食。Hō͘我ê心神食hō͘爽快thang祝福你ê前途。今較緊去thang較緊倒--來。 |
|
4 以掃：A-pa kiám ū-iáⁿ, ah chin hoaⁿ-hí, A-peh-lia̍p-hán ê Siōng-tè, Í-sat ê Siōng-tè taⁿ beh chiâⁿ-chò góa só͘ to̍k-chiàm ê Siōng-tè lah hòⁿ. Ah! Góa ê Siōng-tè, í-āu sè-kan lâng iā beh kiò Í-sò ê Siōng-tè lah hohN.
|
4.以掃：阿爸kiám有影，ah！真歡喜，阿伯拉罕ê上帝，以撒ê上帝今beh 成做我所獨佔ê上帝--lah hòⁿ。Ah！我ê上帝，以後世間人也beh 叫以掃ê上帝--lah hohN。 |
|
5 以撒：M̄-thang kín-kip, tio̍h ài chū-chāi sî sī iáu-bē kàu lah. Kàu a-pa beh kā lí chiok-hok ê sî-chūn lí tio̍h ài kín-sīn. M̄-thang án-ni hòng-hòng, taⁿ khah kín khì.
|
5. 以撒：M̄-thang緊急，著ài自在時是iáu未到--lah。到阿爸beh kā你祝福ê時陣你著ài緊慎。M̄-thang án-ni放放，今較緊去。 |
|
(利百加出場)
|
(利百加出場) |
|
6 以掃：Ah! Chin hoaⁿ-hí, taⁿ góa chiâⁿ-chò chi̍t ê lâng lah. Beh chiâⁿ-chò chē-chē kok-bîn ê pē, beh chò chē-chē peh-sèⁿ ê Ông lah. Góa ê kiáⁿ-sun beh chhin-chhiūⁿ hái ê soa, ia̍h beh chhin-chhiūⁿ kiông-chhong ê chheⁿ bû-sò͘ put-chí. Taⁿ góa khah-kín lâi khì thang khah-kín tò-lâi siū chiok-hok.
|
6.以掃：Ah！真歡喜，今我成做一個人--lah。Beh 成做濟濟國民ê父，beh 做濟濟百姓ê王--lah。我ê子孫beh親像海ê沙，亦beh親像穹蒼ê星無數不止。今我較緊來去thang 較緊倒來受祝福。 |
|
(以掃與以撒退場)
|
(以掃與以撒退場) |
|
第三場 母與子
|
第三場 母與子 |
|
1 利百加：Ngá-kok ah! Ngá-kok ah! Chit ê gín-ná m̄-chai tī tó-ūi teh chok-gia̍t. Si̍t-chāi sī chin-chiàⁿ bô hoat-tō͘. Ngá-kok ah! Ngá-kok ah!
|
1.利百加：雅各--ah！雅各--ah！這個囡仔m̄知tī toh位teh作孽。實在是真正無法度。雅各--ah！雅各--ah！ |
|
2 雅各：Sím-mi̍h leh a-bú, chhut kah hit hō chhâ-pê siaⁿ beh hō͘ lâng kiaⁿ sí sī bô. Sī sím-mi̍h tāi-chì tio̍h m̀? A-pa teh kan-khó͘ tio̍h m̀?
|
2.雅各：甚mi̍h--leh 阿母，出kah hit 號柴耙聲beh hō͘人驚--死是--無。是甚mi̍h代誌著--m̀?阿爸teh艱苦著--m̀? |
|
3 利百加：Lí chit ê gín-ná ū-iáⁿ chin bô lō͘-ēng. Tōa tāi-chì lah lí chai m̀. Lí iáu-kú gōng-gōng.
|
3.利百加：你這個囡仔有影真無路用。大代誌--lah你知--m̀。你iáu-kú憨憨。 |
|
4 雅各：Sím-mi̍h hòe, tōa tāi-chì hohN. Tī lán chit ê goân-sí sî-tāi tōa tāi-chì sī chin hán-tit, nā sī tòa tī hit ê 20 sè-kí ê sî-chūn ū sè-kài tāi-chiàn á-sī goân-chú-tân beh tùi thâu-khak téng kā lí poa̍h lo̍h-lâi, che phah-sǹg sī tōa tāi-chì. Chóng-sī tī lán chit ê sî-tāi sī ē-tàng an-sim kòe-ji̍t chiah tio̍h. Sī tùi thiⁿ-n̍i̍h lo̍h hóe lo̍h-lâi tio̍h m̀ neh. Á-sī tē-bīn piak-khui n̍i̍h?
|
4.雅各：甚mi̍h貨，大代誌--hohN。Tī 咱這個原始時代大代誌是真罕得，若是tòa tī hit個20世紀ê時陣有世界大戰抑是原子彈beh tùi頭殼頂kā你跋落來，che扑算是大代誌。總--是tī咱這個時代是會當安心過日子才著。是tùi天--n̍i̍h落火--落來著--m̀-neh。抑是地面piak開--n̍i̍h? |
|
5 利百加：Lí chit ê gín-n2 sī teh kóng sím-mi̍h hòe. Lí tiām-tiām thiaⁿ a-bó ê ōe, tú-chiah góa ū thiaⁿ-kìⁿ lí ê a-pa kiò Í-sò tio̍h chú hó-chia̍h ê liāu-lí phâng-lâi hō͘ i chia̍h. I beh thang kā chiok-hok. Tī Siōng-tè ê bīn-thâu-chêng ê chiok-hok sī chi̍t ê thang-kiaⁿ ê tōa tāi-chì, lí chai-iáⁿ bô. Só͘-í lí ê a-pa tī i bōe sí ê í-chêng ài beh kín-kín kā Í-sò chiok-hok.
|
5.利百加：你這個囡仔是teh講甚mi̍h貨。你恬恬聽阿母無ê話，tú-chiah我有聽見你ê阿爸叫以掃著煮好食ê料理捧來hō͘伊食。伊beh thang kā 祝福。Tī上帝ê面頭前ê祝福是一個thang驚ê大代誌，你知影--無。所以你ê阿爸tī伊未死ê以前ài beh緊緊kā以掃祝福。 |
|
6 雅各：Án-ni sī án-chóaⁿ neh, a-bó lí sī chin-chiàⁿ kip-sèng lí kóng tōa tāi-chì hō͘ góa lia̍h chún sī tùi thiⁿ lo̍h hóe á-sī thian-kun lo̍h-lâi leh. Goán-lâi chiū-sī ūi-tio̍h chit ê tāi-chì hohN. Hāi góa kiaⁿ chi̍t-tiô.
|
6.雅各：Án-ni是án-chóaⁿ--neh，阿母你是真正急性你講大代誌hō͘我掠準是tùi天落火抑是天君落--來leh。原來就是為著這個代誌--hohN。害我驚一tiô。 |
|
7 利百加：Lí chiū-sī chit-khoán ê, só͘-í bān-sì to bē chhut-thoat. Taⁿ tiām-tiām thiaⁿ góa kā lí kóng, a-bó sī khah thiàⁿ lí, só͘-í chiah beh ūi-tio̍h lí án-ni lâi khòa-lū. Nā sī Í-sò hit khoán ê iá-sèng góa chiū kiaⁿ, só͘-í góa chhian-bān ài lí tī Siōng-tè ê bīn-chêng tit-tio̍h chiok-hok.
|
7.利百加：你就是這款ê,所以萬世都bē出脫。今恬恬聽我kā 你講，阿母是較疼你，所以才beh 為著你án-ni來掛慮。若是以掃hit款ê野性我就驚，所以我千萬ài你tī上帝ê面前得著祝福。 |
|
8 雅各：Tī Siōng-tè ê bīn-chêng, tit-tio̍h chiok-hok sī ū sím-mi̍h lī-ek leh, kiám ōe ēng-kiú bē sí tio̍h m̀.
|
8.雅各：Tī上帝ê面前，得著祝福是有甚mi̍h利益--leh，敢會永久bē死著--m̀。 |
|
9 利百加：Lí chit ê gín-ná chin-chiáⁿ ló͘. Tī Siōng-tè ê bīn-chêng tit-tio̍h chiok-hok sī chhin-chhiūⁿ tit-tio̍h Siōng-tè chi̍t-iuⁿ. A-pek-lia̍p-hán a-kong ê Siōng-tè, Í-sat a-pa ê Siōng-tè, chím-má chiū chiâⁿ-chò lí ê Siōng-tè lah, Siōng-tè nā ū kap lí tī-teh, lí ê seng-gâi ōe-thang tit-tio̍h I ê chiok-hok kap pò-siúⁿ.
|
9.利百加：你這個囡仔真正ló͘。Tī上帝ê面前得著祝福是親像得著上帝一樣。阿伯拉罕阿公ê上帝，以撒阿爸ê上帝chit-má就成做你ê上帝--lah，上帝若有kap你tī--teh，你ê生涯會thang得著伊ê祝福kap報賞。 |
|
10 雅各：Ū-iáⁿ to tio̍h, án-ni bē bái.
|
10.雅各：有影都著，án-ni bē bái。 |
|
11 利百加：Siōng-tè kàu tó-ūi to beh kap lí tī-teh. Beh pó-hō͘ lí thoat-lí gûi-hiám kap chai-ē. Beh hō͘ lí chiâⁿ-chò sè-kài ê ông. Hō͘ lí chiâⁿ-chò jîn-lūi ê pē.
|
11.利百加：上帝到tó位都beh kap你tī--teh。Beh保護你脫離危險kap災厄。Beh hō͘你成做世界ê王。Hō͘你成做人類ê父。 |
|
12 雅各：Án-ni góa bêng-pe̍k lah, A-bó taⁿ lán tio̍h án-chóaⁿ chò khah-hó?
|
12.雅各：Án-ni我明白--lah，阿母今咱著án-chóaⁿ做較好？ |
|
13 利百加：Lí tio̍h thiaⁿ góa ê chhùi kín-kín khì ti-tiâu kā góa lia̍h nn̄g-chiah pûi ê ti-á lâi hō͘ góa. A-bó beh thang liāu-lí kàu chin hó-chia̍h, hō͘ lí thang phâng-khì hō͘ lí ê a-pa chia̍h thang tùi Í-sò lâi chhiúⁿ-toa̍t i ê chiok-hok.
|
13.利百加：你著聽我ê嘴緊緊去豬tiâu kā我掠兩隻肥ê豬仔來hō͘我。阿母beh thang料理到真好食，hō͘你thang捧去hō͘你ê阿爸食thang tùi以掃來搶奪伊ê祝福。 |
|
14 雅各：Chóng-sī A-bó sui-bóng a-pa ba̍k-chiu bô khòaⁿ-kìⁿ chóng-sī i ē ēng bong ê, Í-sò sī chin-chē mn̂g, góa lóng bô mn̂g, só͘-í nā hō͘ a-pa khòaⁿ-phòa ê sî-chūn, góa chiū m̄-sī beh siū chiok-hok, soah hō͘ chiù-chó͘ chi̍t-ê éng-oán bē chhiau-thian, soe kah lak thâu-mn̂g toh hùi-khì. Khòaⁿ nā hō͘ a-pa chiù-chó tio̍h góa chiū hùi-khì.
|
14.雅各：總是阿母雖罔阿爸目珠無看--見，總是伊會用摸--ê,以掃是真濟毛，我攏無毛，所以若hō͘阿爸看破ê時陣，我就m̄是beh受祝福，煞hō͘咒詛一個永遠bē超天，衰kah落頭毛倒費氣。看若hō͘阿爸咒詛--著我就費氣。 |
|
15 利百加：M̄-bián kiaⁿ lah, lí nā siū chiù-chó͘ a-bó tah kā lí tam-tng, put-jī kò͘ lí tiām-tiām thiaⁿ góa só͘ kā lí kóng ê khì chò.
|
15.利百加：M̄免驚--lah，你若受咒詛阿母tah kā你擔當，不而過你恬恬聽我所kā你講--ê去做。 |
|
16 雅各：Lí nā-sī kóng án-ni góa lâi khì.
|
16.雅各：你若是講án-ni我來去。 |
|
17 利百加：Khah-kín lâi leh hohN, phah-sǹg Í-sò ia̍h liam-piⁿ teh beh tò-lâi lah.
|
17.利百加：較緊來--leh hohN，扑算以掃亦liâm-mi teh beh倒--來-lah。 |
|
18 雅各：Chin bô thò-tòng, Í-sò nā chai-iáⁿ chit ê tāi-chì m̄-chai beh kàu gōa-n̍i̍h siū-khì, nn̄g-pêng chhùi-phóe tio̍h hō͘ i siàn kah chéng-chéng khí-lâi, hit ê mn̂g sian-seⁿ góa sī chin-chiàⁿ kiaⁿ. Taⁿ góa lâi khì. A-bó lí kín-kín pī-pān hō͘ hó-sè.
|
18.雅各：真無妥當，以掃若知影這個代誌m̄知beh到偌n̍i̍h受氣，兩爿嘴phóe著hō͘伊搧kah 腫腫--起來，hit個毛--先生我是真正驚。今我來去。阿母你緊緊備辦hō͘好勢。 |
|
19 利百加：Hó lah, khah-kín leh, khah-kín leh. (雅各退場,利百加準備起火,雅各出場)
|
19.利百加：好--lah，較緊--leh，較緊--leh。(雅各退場，利百加準備起火，雅各出場) |
|
20 雅各：A-bó ah, chit nn̄g-chiah ū iu-siù bô, che sī Tiong-kok te̍k-sán ê hó-chéng.
|
20.雅各：阿母--ah！這兩隻有優秀--無，che是中國特產ê好種。 |
|
21 利百加：Khah-kín kā góa lia̍h ji̍p-khì chàu-kha m̄-thang cháu, thang kap góa tàu kha-chhiú.
|
21.利百加：較緊kā我掠入去灶腳m̄-thang走，thang kap我鬥腳手。 |
