Sèng-ke̍k tē 1 chi̍p_03
|
聖劇第一集_03 |
| N̂g Hoâi-un |
黃懷恩 |
|
第五幕
|
第五幕 |
|
出場人物: 富人, 夫人, 醫師, 小爺, 米勒, 以東.
|
出場人物：富人、夫人、醫師、小爺、米勒、以東 |
|
場面: 富人華美的客廳 開幕: 富人 tó tī 安樂椅, 醫師 teh 診斷i, 夫人, 小爺站在傍邊.
|
場面：富人華美 ê 客廳 開幕：富人倒 tī 安樂椅，醫師 teh 診斷--伊，夫人、小爺企tī邊仔。 |
|
1 夫人: Hô-lī, lāu-iâ chá-khí chêng-hêng án-chóaⁿ? Tùi chā-mê lóng bô chhéⁿ ê khoán, m̄-chai ū iàu-kín á-bô?
|
1 夫人：Hô-lī,老爺早起情形 án-chóaⁿ？Tùi 昨暝攏無醒 ê 款，m̄知有要緊抑無？ |
|
2 醫師: Chiàu-khòaⁿ sī put-chí giâm-tiōng, nā ū an-chēng sī khah-hó, nā bô kiaⁿ-liáu sī chin gûi-hiám.
|
2 醫師：照看是不止嚴重，若有安靜是較好，若無驚了是真危險。 |
|
3 夫人: Kiám bô ū sím-mi̍h khah hó ê io̍h á-sī i-hoat thang kiù i mah, lí chai nā-sī chîⁿ goán lóng bô khiàm-kheh.
|
3 夫人：Kiám 無有甚mi̍h 較好 ê 藥抑是醫法 thang 救--伊 mah，你知若是錢阮攏無欠缺。 |
|
4 醫師: Sī, góa ū chīn góa ê pún-hūn teh chiàu-kò͘ i, khiok sio̍k-gú só͘ kóng "Chin-sian iā bōe thang kiù bô-miā lâng. Sèⁿ-miā nā kai-chiong, chîⁿ-châi iā sī bōe kiù lâng.
|
4 醫師：是，我有盡我 ê 本分 teh 照顧--伊，卻俗語所講：「真仙也 bōe thang 救無命人。」生命若該終，錢財也是 bōe 救人。 |
|
5 夫人: Sió-iâ, chiàu-khòaⁿ chit ê chêng-hêng lán tio̍h chhiáⁿ 5 ê sió-iâ lóng lâi chū-chi̍p tī lāu-iâ ê sin-piⁿ thang su-hāu i, í-ki̍p tiàu-chi̍p hiah ê sī-tōa, sī-sòe, kap lóng-chóng ê chhin-cho̍k pêng-iú lâi.
|
5 夫人：小爺，照看這個情形咱著請5 個小爺攏來聚集 tī 老爺 ê 身邊 thang 侍候--伊，以及召集 hiah ê 序大、序細，kap 攏總 ê 親族朋友來。 |
|
6 小爺: Tōa-só, beh tiàu-chi̍p chiah ê lâng chòe-chió iā tio̍h ēng 7 ji̍t ê kang, í-ki̍p 500 gōa lâng ê jîn-bu̍t.
|
6 小爺：大嫂，beh 召集 chiah ê 人最少也著用 7 日 ê 工，以及 500 外人 ê 人物。 |
|
7 夫人: Kó-jiân sī án-ne, chhiáⁿ lí sûi-sî khai-sí siat-hoat hō͘ ta̍k-lâng lóng thang chhut-hoat khì.
|
7 夫人：果然是 án-ne，請你隨時開始設法hō͘ 逐人攏 thang 出發--去。 |
|
(小爺退場) (米勒, 以東出場)
|
（小爺退場）（米勒、以東出場） |
|
8 米勒: Chú-bó, lán tōa-mn̂g kháu ê khit-chia̍h Lia̍p-sat-lō͘ in-ūi chā-mê ê tōa-seh kôaⁿ-sí tī hia.
|
8 米勒：主母，咱大門口 ê 乞食拉撒路因為昨暝 ê 大雪寒死 tī hia。 |
|
9 夫人: Lia̍p-sat-lō͘ kôaⁿ-sí mah, sí sī èng-kai ê hūn-gia̍h. Lín siat-hoat thang chiong sin-si the̍h-cháu.
|
9 夫人：拉撒路寒--死 mah，死是應該 ê 份額。Lín 設法 thang 將身屍提走。 |
|
(兩人退場)
|
（兩人退場） |
|
10 夫人: Hô-lī i-su, Lia̍p-sat-lō͘ sī chi̍t-ê chiong-lâi ê chú-gī-chiá, taⁿ i sí, lí siūⁿ i ê lêng-hûn hiān-sî tī tó-ūi?
|
10 夫人：Hô-lī 醫師，拉撒路是 1 個將來 ê 主義者，今伊死，你想伊 ê 靈魂現時 tī tó-位？ |
|
11 醫師: I ê lêng-hûn chiūⁿ kàu tī Siōng-tè éng-oán ê kok khì, sī lâng ê jio̍k-gán só͘ khòaⁿ bōe tio̍h--ê.
|
11 醫師：伊 ê 靈魂上到 tī 上帝永遠 ê 國去，是人 ê 肉眼所看 bōe 著--ê。 |
|
12 夫人: Lí beh án-chóaⁿ chèng-bêng, Lia̍p-sat-lō͘ ê lêng-hûn hiān-chāi tī Siōng-tè ê kok?
|
12 夫人：你 beh án-chóaⁿ 證明，拉撒路 ê 靈魂現在 tī 上帝 ê 國？ |
|
13 醫師: Tùi tī goán kiōng-tông ê sìn-sim, góa khak-sìn Lia̍p-sat-lō͘ ê lêng-hûn tī Siōng-tè ê kok. Sìn-sim í-gōa tī sè-kan bô ū pa̍t-ê mi̍h ōe-thang chèng-bêng chit ê sū.
|
13 醫師：Tùi tī 阮共同 ê 信心，我確信拉撒路 ê 靈魂 tī 上帝 ê 國。信心以外tī 世間無有別個物會thang 證明這個事。 |
|
14 富人: Ah, ah, lín beh lâi hāi góa tio̍h bô! Góa kap lí ū sím-mi̍h kan-sia̍p, lī-khui góa khì, lī-khui góa khì!!
|
14 富人：Ah，ah，lín beh 來害我著--無！我 kap 你有甚mi̍h 干涉，離開我去，離開我去！！ |
|
15 醫師: Lāu-iâ lí sī án-chóaⁿ, lí sī án-chóaⁿ?
|
15 醫師：老爺你是 án-chóaⁿ，你是 án-chóaⁿ？ |
|
16 富人: Oh, góa goân-lâi sī teh chò-bāng! Hit ê bāng sī hô-téng thang kiaⁿ-hiâⁿ, thang iàm-khì ê bāng.
|
16 富人：Oh，我原來是 teh 做夢！Hit 個夢是何等 thang 驚惶、thang 厭棄 ê 夢。 |
|
17 夫人: Góa ê chú ah, lí ê sim ū sím-mi̍h bô pêng-an mah, nā bô ná-lí ū chit ê ok-bāng lâi kiáu-jiáu lí.
|
17 夫人：我 ê 主-- ah，你 ê 心有甚mi̍h 無平安 mah， 若無那裡有這個惡夢來攪擾--你。 |
|
18 富人: Góa ū bāng-kìⁿ chin-chē thang kiaⁿ ê pháiⁿ-mi̍h tī góa ê sì-ûi teh kiáu-jiáu góa. Che sī chi̍t ê pháiⁿ tiāu-thâu.
|
18 富人：我有夢見真濟 thang 驚 ê 歹物tī 我 ê 四圍 teh 攪擾--我。Che 是 1 個歹兆頭。 |
|
19 醫師: Lāu-iâ, lí hiān-chāi iā sìn chit-khoán ê sū mah! Lāu-iâ chhiáⁿ lí tio̍h pàng-sim, chhiáⁿ lí tio̍h ū pêng-an, tio̍h an-chēng.
|
19 醫師：老爺，你現在也信這款 ê 事 mah！老爺請你著放心，請你著有平安、著安靜。 |
|
20 夫人: Tú-chiah, hiah ê lô͘-pok ū lâi pò kóng, tī lán tōa-mn̂g kháu ê khit-chia̍h Lia̍p-sat-lō͘ chā-mê hō͘ sng-seh kôaⁿ sí lah. Góa tú-tú chiong chit ê sū teh mn̄g Hô-lī, sī m̄-sī Lia̍p-sat-lō͘ ê lêng-hûn chiàu i ê 信心 kàu thian-tông khì.
|
20 夫人：Tú-chiah，hiah ê 奴僕有來報講，tī 咱大門口 ê 乞食拉撒路昨暝 hō͘ 霜雪寒--死 lah。我 tú-tú 將這個事 teh 問 Hô-lī,是 m̄是拉撒路 ê 靈魂照伊 ê 信心到天堂去。 |
|
21 富人: Sím-mi̍h, Lia̍p-sat-lō͘ sí-khì tio̍h bô?!
|
21 富人：甚mi̍h，拉撒路死--去著--無？！ |
|
22 夫人: Lia̍p-sat-lō͘ ê sí sī ke̍k-kî èng-kai ê sū, nā bô, i ê oa̍h it-tēng sī pí sí khah hō͘ i oh-tit jím-siū.
|
22 夫人：拉撒路 ê 死是極其應該 ê 事，若無，伊 ê 活一定是比死較 hō͘ 伊 oh得忍受。 |
|
23 醫師: Lia̍p-sat-lō͘ tī sè-kan ū tú-tio̍h ge̍k-kéng kap put-hēng, i teh ǹg-bāng chiong-lâi ê hēng-hok, taⁿ i kàu tī hit ê thiàⁿ kiáⁿ ê kok khì, che sī put-chí ha̍p chin-lí ê sū.
|
23 醫師：拉撒路 tī 世間有 tú著逆境 kap 不幸，伊 teh 向望將來 ê 幸福，今伊到tī hit 個疼子 ê 國去，che 是不止合真理 ê 事。 |
|
24 富人: Chhiáⁿ lín m̄-thang koh thiaⁿ-tio̍h chiah ê sū, góa jím-siū bōe-tiâu, chhiáⁿ lín hō͘ góa khiā khí-lâi, hō͘ góa khiā khí-lâi.
|
24 富人：請 lín m̄-thang koh 聽著 chiah ê 事，我忍受 bōe-tiâu,請 lín hō͘ 我企--起-來，hō͘ 我企--起-來。 |
|
25 夫人: Góa ê chú-lâng ah, lí bōe ēng-tit khiā khí-lâi, án-ne ōe hāi-tio̍h lí ê sèⁿ-miā.
|
25 夫人：我 ê 主人 ah，你 bōe 用得 企--起-來，án-ne 會害著你 ê 生命。 |
|
26 醫師: Lāu-iâ, chhiáⁿ lí choa̍t-tùi an-chēng! Bōe ēng-tit khiā khí-lâi.
|
26 醫師：老爺，請你絕對安靜！Bōe 用得企--起-來。 |
|
27 富人: Lín m̄-thang chó͘-tòng góa. Góa ê sim beh án-chóaⁿ ū an-chēng, ū pêng-an, góa ê sim nā bô an-chēng, bô pêng-an, beh án-chóaⁿ kìm góa ê sin-thé m̄-thang tín-tāng, chhiáⁿ lín hō͘ góa khiā khí-lâi.
|
27 富人：Lín m̄-thang 阻擋--我。我 ê 心 beh án-chóaⁿ 有安靜、有平安，我 ê 心若無安靜、無平安，beh án-chóaⁿ 禁我 ê 身體 m̄-thang 振動，請 lín hō͘ 我企--起-來。 |
|
(夫人, 醫師幫助富人khiā khí-lâi)
|
（夫人、醫師幫助富人企--起-來） |
|
28 夫人: Chú-lâng ah, Lia̍p-sat-lō͘ ê sí kap lí ū sí-mi̍h kan-sia̍p, lí ūi-hô ūi-tio̍h i ê sū lâi iô-tāng, put-an. I sī chi̍t ê bô èng-kai siū kì-liām ê lâng.
|
28 夫人：主人--ah，拉撒路 ê 死 kap 你有甚mi̍h 干涉，你為何為著伊 ê 事來搖動、不安。伊是 1個無應該受記念 ê 人。 |
|
29 富人: Góa kap Lia̍p-sat-lō͘ oân-choân bô bīn-se̍k, góa m̄-sī ūi-tio̍h i, sī ūi-tio̍h ū chi̍t ê sū-si̍t......., chit ê sū-si̍t sī chòe thang kiaⁿ-hiâⁿ ê tùi-te̍k.
|
29 富人：我 kap 拉撒路完全無面熟，我 m̄是為著伊，是為著有 1 個事實……，這個事實是最 thang 驚惶 ê 對敵。 |
|
30 夫人: Chú-lâng ah, lí só͘ kóng ê sī sím-mi̍h, góa lóng bōe thang bêng-pe̍k.
|
30 夫人：主人ah，你所講 ê 是甚mi̍h，我攏 bōe thang 明白。 |
|
31 富人: Góa pún-sin iā bōe-thang bêng-pe̍k hit ê...., góa tú-tú ài beh chhiáⁿ Hô-lī lâi kā góa kái-tap hit ê sū.
|
31 富人：我本身也 bōe-thang 明白 hit 個…，我 tú-tú ài beh 請 Hô-lī 來 kā 我解答 hit 個事。 |
|
Hô-lī, lí sī kú-kú tī góa ê chhù hō͘ góa só͘ sìn-iōng ê i-seng, lí kiám ōe-thang kái-tap góa sòa-bóe chit ê būn-tê.
|
Hô-lī,你是久久 tī 我 ê 厝 hō͘ 我所信仰ê 醫生，你 kiám 會thang 解答我續尾這個問題。 |
|
32 醫師: Lāu-iâ, hit ê būn-tê sī sím-mi̍h?
|
32 醫師：老爺，hit 個問題是甚mi̍h？ |
|
33 富人: Sím-mi̍h kiò-chò SÍ? SÍ sī sím-mi̍h? Chit ê sū sī góa bōe thang bêng-pe̍k ê......
|
33 富人：甚mi̍h 叫做死？死是甚mi̍h？這個事是我bōe thang 明白--ê… |
|
34 醫師: Lāu-iâ, chit ê būn-tê khak-si̍t sī chin oh-tit lí-kái ê sū, iáu-kú sī múi chi̍t ê lang só͘ èng-kai tio̍h mn̄g lâi tit-tio̍h kái-tap ê būn-tê.
|
34 醫師：老爺，這個問題確實是真 oh得理解 ê 事，iáu-kú 是每 1 個人所應該著問來得著解答 ê 問題。 |
|
Tùi i-ha̍k-siōng lâi kóng, sí sī oa̍h-miā ê kiat-sok, chiū-sī oa̍h-miā kap jio̍k-sin beh hūn-lī, bô oa̍h-miā ê jio̍k-sin chiū khai-sí hú-pāi, bô lōa-kú chiū siau-bia̍t i ê hêng-thé. Tùi sè-kài siōng chiū oân-choân siau bô khì, lī-khui bó͘-kiáⁿ, lī-khui châi-pó, lī-khui ke-gia̍p, lī-khui it-chhè sim só͘ thiàⁿ ê.... lâi siau-bia̍t khì, éng-oán kàu éng-oán bô lâng ōe koh kì-liām i. Che sī 現實上 ê sí. Khiok tùi tī 信仰上 lâi kóng,sí sī tùi 現世 beh kàu tī來世 ê chi̍t ê mn̂g-koan. Chiū-sī 物質世界 beh ji̍p 靈性世界 ê chi̍t ê kiô. Iā-sī 暫時世界 beh sòa-chiap 永遠世界 ê chi̍t ê chìn-kháu.
|
Tùi 醫學上來講，死是活命 ê 結束，就是活命 kap 肉身 beh 分離，無活命 ê 肉身就開始腐敗，無偌久就消滅伊ê 形體。Tùi 世界上就完全消無去，離開某子、離開財寶、離開家業、離開一切心所疼--ê…來消滅去，永遠到永遠無人會 koh 記念--伊。Che 是現實上 ê 死。卻 tùi tī 信仰上來講，死是 tùi 現世 beh 到tī來世 ê 一個門關。就是物質世界 beh 入靈性世界 ê 1 個橋。也是暫時世界 beh 續接永遠世界 ê 1 個進口。 |
|
Só͘-í lâng bōe-bián tio̍h sìn ū chiong-lâi, nā bô sí, chit ê oân-choân o͘-àm, oân-choân 無智的世界 sī chi̍t ê thang-kiaⁿ, thang choa̍t-bāng ê sū.
|
所以人 bōe免著信有將來，若無死，這個完全烏暗、完全無智的世界是 1 個thang驚、thang 絕望 ê 事。 |
|
35 富人: Án-ne hó, góa í-keng bêng-pe̍k lah, chhiáⁿ lí m̄-bián koh kóng. Góa chun-chông lâng ko-kùi ê 理智 lâi kóng, góa sī bōe-thang sìn ū 將來 ê....Só͘-í tī góa oân-choân sī hit ê 現實上 ê pō͘-hūn nā-tiāⁿ. Hiah ê góa sìn.
|
35 富人：Án-ne 好，我已經明白--lah，請你 m̄-免koh 講。我尊崇人高貴 ê 理智來講，我是 bōe-thang 信有將來 ê…所以 tī 我完全是 hit 個現實上 ê 部份 nā-tiāⁿ。Hiah ê 我信。 |
|
Góa iā beh kap it-chhè ê 無神主義, 唯物主義者 lâi saⁿ kap oàn-thàn, thó͘-khùi 人生 ê khang-hu.
|
我也 beh kap 一切 ê 無神主義、唯物主義者來相 kap 怨嘆、吐氣人生 ê 空虛。 |
|
Sí ah, lí chiong góa it-seng só͘ ló͘-le̍k,kiàn-li̍p ê kā góa chhiúⁿ-toa̍t chhia-tó khì!
|
死-- ah，你將我一生所努力、建立--ê kā 我搶奪 chhia-倒--去！ |
|
36 醫師: Lāu-iâ, chhiáⁿ lí léng-chēng siūⁿ, tek-khak m̄-thang ngēⁿ lí ê sim.
|
36 醫師：老爺，請你冷靜想，的確 m̄-thang 硬你 ê 心。 |
|
37 富人: Lí m̄-bián kóng, góa ê sî kàu lah. Góa ê sin-khu teh phī-phī-chhoah, góa ê ba̍k-chiu chiām-chiām teh o͘-àm lah.
|
37 富人：你 m̄免講，我 ê 時到--lah。我 ê 身軀 teh phī-phī-chhoah，我 ê 目珠漸漸 teh 烏暗--lah。 |
|
38 夫人: Hô-lī, lí kiám bô hoat-tō͘ thang kiù i? Chhiáⁿ lí kín-kín kiù i lah.
|
38 夫人：Hô-lī,你 kiám 無法度 thang 救--伊？請你緊緊救--伊 lah。 |
|
39 醫師: Tû-khì Siōng-tè í-gōa, bô lâng ōe-thang kiù i .
|
39 醫師：除去上帝以外，無人會thang 救--伊。 |
|
40 夫人:Goán ê chîⁿ kiám bōe-thang kiù i ,chhiáⁿ lí thòe goán siat-hoat chi̍t-ē!
|
40 夫人：阮 ê 錢 kiám bōe-thang 救--伊，請你替阮設法--一下！ |
|
41 醫師: Tû-khì Siōng-tè í-gōa bô chi̍t-hāng mi̍h-kiāⁿ ōe-thang kiù i .
|
41 醫師：除去上帝以外無 1 項物件會thang 救--伊。 |
|
42 富人: Khó-òⁿ ê sí, góa kap lí ū sím-mi̍h kan-sia̍p! Lí sī phòa-hāi chiá! Lí sī hiông-hoān! Lí sī kiông-tō! Oh, góa ê ka-gia̍p! Góa ê châi-pó! Góa ê it-chhè long beh tī chit ê kiaⁿ-hiâⁿ, oàn-chheh ê tiong-kan lâi soah lah! O͘-àm kàu lah, ah, ah!! (富人 tó-lo̍h--khì, 夫人, 醫師, liân-kiò i).
|
42 富人：可惡 ê 死，我 kap 你有甚mi̍h 干涉！你是破害者！你是凶犯！你是強盜！ Oh，我 ê 家業！我 ê 財寶！我 ê 一切攏beh tī 這個驚惶、怨慼 ê 中間來煞lah！烏暗到 lah，ah，ah！！ （富人倒--落-去，夫人、醫師，連叫--伊） |
|
(幕)
|
（幕） |
|
第六幕
|
第六幕 |
|
出場人物: 富人, 拉撒路, 亞伯拉罕.
|
出場人物：富人、拉撒路、亞伯拉罕。 |
|
場面: Hun-hóe ê 地獄.
|
場面：薰火 ê 地獄。 |
|
開幕: 富人 sàm thâu-mn̂g, thǹg-theh, sin-khu ū 血 kap thâng, hun-hóe ê 地獄 lāi, khut-sin, siang-chhiú kè-sio̍k choán-gia̍h, teh 苦悶.
|
開幕：富人散頭毛、thǹg-theh ，身軀有血 kap 蟲，薰火 ê 地獄內，屈身，雙手繼續轉gia̍h,teh 苦悶。 |
|
1 富人: Khó͘-thàng, choa̍t-bāng ê tōe-kài! Thâng kā, hóe sio ê tōe-ge̍k! Chē chiū-sī 不信的結局 !
|
1 富人：苦痛、絕望 ê 地界！蟲 kā、火燒ê 地獄！Chē 就是不信 ê 結局！ |
|
Sím-mi̍h lâng beh kiù góa! Góa ê bak2-chiu chiong-ji̍t gia̍h-koân, teh chhōe-kiû chín-kiù, góa ê chhiú chhun-chhut ho͘-kiù bô soah! Thòng-khó͘ ê tōe-ge̍k, lí ēng lí ê iām-hóe sî-khek khó͘-chhó͘ góa ê sèⁿ-miā! Oh, sím-mi̍h lâng chai, chit ê thòng-khó͘ ê chhim, koân, khoah! Nā siat-sú chai, lâng ēng bān-poaⁿ ê hoat-tō͘ beh tô-thoat chit ê hêng-hoa̍t. Ū sím-mi̍h lâng ōe-thang jím-siū chit ê éng-oán ê thòng-khó͘.
|
甚mi̍h 人 beh 救--我！我 ê 目珠終日gia̍h懸，teh chhōe求拯救，我 ê 手 chhun-出呼救無煞！ 痛苦 ê 地獄，你用你 ê 炎火時刻苦楚我 ê 生命！Oh，甚mi̍h 人知，這個痛苦 ê 深、懸、闊！若設使知，人用萬般 ê 法度 beh 逃脫這個刑罰。有甚mi̍h 人會thang 忍受這個永遠 ê 痛苦。 |
|
Tī chia í-keng iā bô sí thang hō͘ lâng thang tô-siám chit ê thòng-khó͘. Tī chit ê tōe-kài sí sòa chiâⁿ-chò thang him-bō͘ ê.....Ah, ah, tī thiⁿ ū sím-mi̍h chín-kiù, tī tōe ū sím-mi̍h pang-chān! Oh, góa ê chhùi-lāi ta sò-sò kàu jím-siū lóng bōe-tiâu. Góa ê choân-sin lóng sī thâng kā ê siong-hûn, góa tī chia chiâⁿ-chò tōe-ge̍k ê hóe-chhâ, ok-thâng ê chia̍h-mi̍h! (亞伯拉罕, 拉撒路吟聖詩255首出場, khiā tī半空中, in pâi tī tò-pêng, A-pek-lia̍p-hán phō Lia̍p-sat-lō͘ tī heng-chêng. 半空中 ēng tn̂g-í pâi-lia̍t, í ê chêng-bīn ēng 白布 am khí-lâi. In chiah kiâⁿ tī tn̂g-í téng. Gîm-si liáu.)
|
Tī chia 已經也無死 thang hō͘ 人 thang 逃閃這個痛苦。Tī 這個地界死煞成做thang 欣慕--ê……Ah，ah，tī 天有甚mi̍h 拯救，tī 地有甚mi̍h 幫贊！Oh，我 ê 嘴內礁燥燥到忍受攏 bōe-tiâu。我 ê 全身攏是蟲 kā ê 傷痕，我 tī chia 成做地獄 ê 火柴、惡蟲 ê 食物！（亞伯拉罕、拉撒路吟聖詩255首出場，企 tī半空中，in 排 tī 倒爿，亞伯拉罕抱拉撒路 tī 胸前。半空中用長椅排列，椅 ê 前面用白布 掩--起-來。In 才行 tī 長椅頂。吟詩了。） |
|
2 富人: Oh, hit ê sī sím-mi̍h? Thian-tông chàn-bí ê siaⁿ! Ū chē-chē thiⁿ-sài tī hit ê koân-koân ê thiⁿ-khong teh iû-hêng. Oh, hit ê kiám m̄-sī góa ê chó͘ A-pek-lia̍p-hán mah, koh phō tī i ê heng-chêng hit ê lâng sī sím-mi̍h lâng, thái-ōe bīn-se̍k bīn-se̍k? Ah, hit ê kiám m̄-sī chāi-seⁿ tī góa ê chhù ê tōa-mn̂g kháu hit ê khit-chia̍h Lia̍p-sat-lō͘ ah! Oh, tī chit ê tōe-kài ū hô-téng ê chha-pia̍t! Góa ê chó͘ A-pek-lia̍p-hán ah, lí tio̍h tài-liām lí ê kiáⁿ ê siū-khó͘, kiû lí chhun-chhut lí ê chhiú lâi kiù góa! khó-lîn góa ê âu-kiò!
|
2 富人：Oh，hit 個是甚mi̍h？天堂讚美 ê 聲！有濟濟天使 tī hit 個懸懸 ê 天空 teh 遊行。Oh，hit 個 kiám m̄是我 ê 祖亞伯拉罕mah，koh 抱 tī 伊 ê 胸前 hit 個人是甚mi̍h 人，thái會面熟面熟？ Ah，hit 個 kiám m̄是在生 tī 我 ê 厝 ê 大門口 hit 個乞食拉撒路 ah！Oh，tī 這個地界有何等 ê 差別！ 我 ê 祖亞伯拉罕--ah，你著帶念你 ê 子 ê 受苦，求你 chhun出你 ê 手來救--我！可憐我 ê 喉叫！ |
|
3 亞伯拉罕: Kiáⁿ ah, lí tī hiā teh oàn-thàn sím-mi̍h, teh kiû-kiò sím-mi̍h? Lí bô siūⁿ, lí chāi-seⁿ án-chóaⁿ chhia-hôa hióng-lo̍k kòe-ji̍t, khiā-khí tī put-gī put-sìn ê chōe-ok tiong, lí hiān-chāi tī hit ê iām-hóe thòng-khó͘ ê tōe-kài sī èng-kai ê sū.
|
3 亞伯拉罕：子-- ah，你 tī hiā teh 怨嘆甚mi̍h，teh 求叫甚mi̍h？你無想，你在生 án-chóaⁿ 奢華享樂過日，企起 tī 不義不信 ê 罪惡中，你現在 tī hit 個炎火痛苦 ê 地界是應該 ê 事。 |
|
4 富人: Góa ê chó͘ ah, lí tio̍h tài-liām lí ê kiáⁿ án-chóaⁿ tī chit ê hóe-iām tiong thòng-khó͘ chhiⁿ-chhám, chhiáⁿ lí hō͘ Lia̍p-sat-lō͘ ēng i ê chhńg-thâu-á ùn-chúi lâi sip góa ê nâ-âu, in-ūi góa ta-sò kàu beh choa̍t-khì lah.
|
4 富人：我 ê 祖 ah，你著帶念你 ê 子 án-chóaⁿ tī 這個火炎中痛苦悽慘，請你hō͘ 拉撒路用伊 ê 指頭仔 ùn水來溼我ê 嚨喉，因為我礁燥到 beh 絕--去--lah。 |
|
5 亞伯拉罕: Góa ê kiáⁿ ah, lí m̄ èng-kai lâi kiáu-jiáu tio̍h Lia̍p-sat-lō͘ ê pêng-an. Lí bô siūⁿ chāi-seⁿ Lia̍p-sat-lō͘ tī i ê siū-khó͘ tiong lí tī lí ê pù-ū ê sì, lí bat ēng lí ê chńg-thâu-á lâi pang-chān i á-bô? Lia̍p-sat-lō͘ tī lí ê tōa-mn̂g kháu, siū-chīn liáu pah-poaⁿ ê kan-khó͘, i hiān-sî ji̍p tī i ê an-hioh, che sī èng-kai ê..., só͘-í lí m̄-thang lâi kiáu-jiáu i ê sim. Koh tī lí ê tōa-mn̂g kháu ê sî lí ōe-thang sûi-sî kàu tī Lia̍p-sat-lō͘ hia khì, khiok tī chia ū chi̍t ê tōa chhim-ian keh-khui tī lí góa ê tiong-kan, bô hoat-tō͘ thang hō͘ goán kàu lí ê ūi.
|
5 亞伯拉罕：我 ê 子--ah，你 m̄ 應該來攪擾著拉撒路 ê 平安。你無想在生拉撒路tī 伊 ê 受苦中你 tī 你 ê 富有 ê 死，你 bat 用你 ê 指頭仔來幫贊--伊抑無？ 拉撒路 tī 你 ê 大門口，受盡了百般 ê 艱苦，伊現時入 tī 伊 ê 安歇，che 是應該--ê…不所以你 m̄-thang 來攪擾伊 ê 心。Koh tī 你 ê 大門口 ê 時你會thang 隨時到 tī 拉撒路 hia 去，卻 tī chia 有 1 個大深淵隔開 tī 你我 ê 中間，無法度 thang hō͘ 阮到你 ê 位。 |
|
6 富人: Ah, góa ê chhám beh ēng sím-mi̍h ōe lâi piáu-bêng, góa ê thòng-khó͘ beh ēng sím-mi̍h giân-gú lâi kóng chhut. Góa kiám thang koh khòaⁿ sím-mi̍h pa̍t-lâng tī chit ê tōe-kài siū thòng-khó͘ mah!
|
6 富人：Ah，我 ê 慘 beh 用甚mi̍h 話來表明，我 ê 痛苦 beh 用甚mi̍h 言語來講出。我 kiám thang koh 看甚mi̍h 別人 tī 這個地界受痛苦--mah！ |
|
Góa ê chó͘ A-pek-lia̍p-hán ah, chhiáⁿ lí koh thiaⁿ góa chòe-āu chit ê iau-kiû,kó-jiân chit ê tōe-kài sī lī-khui liáu it-chhè ê ǹg-bāng, koh sī chiah-n̍i̍h thòng-khó͘, chhiáⁿ lí chhe-khián Lia̍p-sat-lō͘ khì góa pē ê ke, in-ūi góa ū 5 ê hiaⁿ-tī tī hoān-kan, thang hō͘ Lia̍p-sat-lō͘ tùi in chò kiàn-chèng, kiò in sìn, tio̍h sìn chiong-lâi, m̄-bián hō͘ in iā kap góa tâng chi̍t-iūⁿ kòe-liáu put-sìn, put-gī ê it-seng, tì-kàu lâi kàu chit ê thòng-khó͘, ai-chhám ê hóe-ô͘ lāi.
|
我 ê 祖亞伯拉罕--ah，請你 koh 聽我最後這個要求，果然這個地界是離開了一切 ê 向望，koh 是 chiah-n̍i̍h 痛苦，請你差遣拉撒路去我父 ê 家，因為我有 5 個兄弟 tī 凡間，thang hō͘ 拉撒路 tùi in 做見證，叫 in 信，著信將來，m̄免hō͘ in 也 kap 我 tâng 一樣過了不信、不義ê 一生，致到來到這個痛苦、哀慘 ê 火湖內。 |
|
7 亞伯拉罕: Góa ê kiáⁿ ah, lí hô-khó͘ ūi-tio̍h hān-kan ê lâng lâi tam-iu neh? Tī in ê tiong-kan, Iâ-hô-hoa Siōng-tè kiám bô û-pī liáu Mô͘-se kap chiah ê sian-ti thang kà-sī in, sòa kiò in kiâⁿ kèng-khiân tit-kiù ê lō͘ mah? Lí ê hiaⁿ-tī kiám bô thiaⁿ Mô͘-se kap sian-ti ê kà-sī mah?
|
7 亞伯拉罕：我 ê 子--ah，你何苦為著凡間 ê 人來擔憂 neh？Tī in ê 中間，耶和華上帝kiám 無預備了摩西 kap chiah ê 先知 thang 教示--in，續叫 in 行敬虔得救 ê 路 mah？你 ê 兄弟 kiám 無聽摩西 kap 先知 ê 教示 mah？ |
|
8 富人: Góa ê chó͘ ah,nā siat-sú ū lâng tùi sí-lâng tiong koh-oa̍h, khì tùi in kiàn-chèng chiah ê sū in chiū beh hoán-hóe lâi sìn lah.
|
8 富人：我 ê 祖--ah，若設使有人 tùi 死人中復活，去 tùi in 見證 chiah ê 事 in 就 beh 反悔來信 lah。 |
|
9 亞伯拉罕: Bô chhái-kang, lâng nā sī ngēⁿ-sim, sui-bóng ū lâng tùi sí-lâng tiong koh khí, khì tùi in kiàn-chèng, in iā sī m̄ sìn.
|
9 亞伯拉罕：無采工，人若是硬心，雖罔有人 tùi 死人中 koh 起，去 tùi in 見證， in 也是 m̄ 信。 |
|
Kèng-thiàⁿ ê hiaⁿ-tī chí-mōe, Siōng-tè ū chhe-khián I ê kiáⁿ Iâ-so͘ lâi kàu sè-kan teh thoân thian-kok ê tō-lí, hō͘ kìⁿ-nā sìn I ê lâng ōe-thang tit-tio̍h éng-oán oa̍h, m̄-bián tú-tio̍h bia̍t-bông, kho tī kin-á-ji̍t Siōng-tè ū ēng chē-chē bû-sò͘ ê thoân-kàu ê lâng tī ke-thâu hāng-bóe teh thoân chit ê tit-kiù ê lō͘, chhiáⁿ lán tio̍h thàn iáu-ū ki-hōe lâi sìn chit ê tō-lí, thang siám-bián chiong-lâi ê hêng-hoa̍t. Lán nā hut-lio̍k chiah-n̍i̍h tōa ê kiù-un, lán chiong-lâi beh tī tó-ūi lâi siám-bián chit ê thang-kiaⁿ ê hêng-hoa̍t ah. Lia̍t-ūi hiaⁿ-ché, tī chit sé-kan ū 2 tiâu lō͘, chiū-sī sìn kap m̄-sìn. Tī chiong-lâi ū 2 ê tōe-kài, chiū-sī thian-tông kap tē-ge̍k. Lia̍t-ūi hiaⁿ-ché, lí beh kéng tó-ūi chi̍t-tiâu, á-sī lí hiān-sî teh kiâⁿ tó-ūi chi̍t-tiâu ê lō͘, lí chai-iáⁿ bô? (幕後聖詩隊吟聖詩103首)
|
敬疼 ê 兄弟姊妹，上帝有差遣伊 ê 子耶穌來到世間 teh 傳天國 ê 道理，hō͘ 見若信伊 ê 人會thang 得著永遠活，m̄免 tú著滅亡，koh tī 今仔日上帝有用濟濟無數 ê 傳教 ê 人 tī 街頭巷尾teh 傳這個得救 ê 路，請咱著趁 iáu有 機會來信這個道理，thang 閃免將來 ê 刑罰。咱若忽略 chiah-n̍i̍h 大 ê 救恩，咱將來 beh tī tó位來閃免這個 thang驚 ê 刑罰-- ah。列位兄姊，tī 這世間有 2 條路，就是信 kap m̄信。Tī 將來有 2 個地界，就是天堂 kap 地獄。列位兄姊，你 beh 揀 tó位 1 條，抑是你現時 teh 行 tó位 1條 ê 路，你知影--無？（幕後聖詩隊吟聖詩103首） |
|
(幕) OÂⁿ
|
（幕）完 |
