Sèng-ke̍k tē 1 chi̍p_02
|
聖劇第一集_02 |
| N̂g Hoâi-un |
黃懷恩 |
|
第三幕
|
第三幕 |
|
出場人物: 富人, 米勒, 以東, 夫人, 小爺, 醫師.
|
出場人物：富人、米勒、以東、夫人、小爺、醫師。 |
|
場面: 富人的客廳. (和第一幕相同)
|
場面：富人的客廳。（和第一幕相同） |
|
開幕: 富人坐在安樂椅, 以東 teh lia̍h i ê me̍h, 米勒 teh lia̍h i ê kha.
|
開幕：富人坐在安樂椅，以東 teh 掠伊 ê 脈，米勒 teh 掠伊 ê 腳。 |
|
1 富人: Bí-le̍k, chòe-kīn tī lán ê kok-lāi ū sím-mi̍h siau-sit á-bô?
|
1 富人：米勒，最近 tī 咱 ê 國內有甚mi̍h 消息抑無？ |
|
2 米勒: Tùi chit pái ê tōa iân-siah í-lâi, tī Iû-thài tiong chē-chē lâng teh gī-lūn góa ê chú ê pù-ū ê sū.
|
2 米勒：Tùi 這擺 ê 大筵席以來，tī 猶太中濟濟人 teh 議論我 ê 主 ê 富有 ê 事。 |
|
3 以東: Góa ê chú-lâng ê pù-ū, kīn tī Iû-thài cho̍k-tiong, hn̄g kàu Lô-má, tōa-tōa tit-tio̍h lâng ê chù-ba̍k.
|
3 以東：我 ê 主人 ê 富有，近 tī 猶太族中，遠到羅馬，大大得著人 ê 注目。 |
|
4 富人: Che sī chi̍t-ê choa̍t-biāu ê ki-hōe, góa taⁿ tī sè-kài sǹg m̄-sī sió-khóa ê lâng lah. Iáu ū sím-mi̍h siau-sit á-bô?
|
4 富人：Che 是一個絕妙 ê 機會，我今 tī 世界 算 m̄是小可 ê 人--lah ，Iáu 有甚mi̍h 消息抑無？ |
|
5 米勒: Chòe-kīn tī lán ê kok-lāi ū hoat-seng lēng-gōa chi̍t-kiāⁿ tōa-sū, chiū-sī tùi Ná-sat-le̍k ū ba̍k-kang Iok-sek ê kiáⁿ Iâ-so͘ chhut-lâi tī kok-lāi ê ta̍k tōe-hng teh thoân thian-kok ê hok-im, kiò lâng hoán-hóe.
|
5 米勒：最近 tī 咱 ê 國內有發生另外1 件大事，就是 tùi 拿撒勒有木工約瑟 ê 子耶穌出來 tī 國內 ê 逐地方 teh 傳天國 ê 福音，叫人反悔。 |
|
6 以東: I iā ōe kiâⁿ sîn-jiah, ōe kóaⁿ-kúi i-pīⁿ . I ê hong-siaⁿ í-keng chín-tōng choân-kok ê peh-sèⁿ, tì-kàu peh-sèⁿ lóng kun-tòe kàu tī hái-piⁿ, kàu tī khòng-iá.
|
6 以東：伊也會行神蹟、會趕鬼醫病。伊 ê 風聲已經振動全國 ê 百姓，致到百姓攏跟tòe 到 tī 海邊、到 tī 曠野。 |
|
7 米勒: Tī Í-sek-lia̍t ê le̍k-sú tiong iáu-kú m̄-bat khòaⁿ-tio̍h ū sím-mi̍h sian-ti chhin-chhiūⁿ i ê koân-pèng kap lêng-le̍k.
|
7 米勒：Tī 以色列 ê 歷史中 iáu-kú m̄-bat 看著有甚mi̍h 先知親像伊 ê 權柄 kap 能力。 |
|
8 以東: Ū hong-siaⁿ kóng, i sī beh lâi ê Bí-sài-a, beh tùi Lô-má lâng ê chhiú lâi kiù-sio̍k Í-sek-lia̍t ê peh-sèⁿ.
|
8 以東：有風聲講，伊是 beh 來 ê 彌賽亞，beh tùi 羅馬人 ê 手來救贖以色列 ê 百姓。 |
|
9 富人: Che khak-si̍t sī chi̍t kiāⁿ thang saⁿ-pí ê tōa-sū. Chóng-sī ba̍k-kang ê kiáⁿ ōe-thang chò sím-mi̍h, put-kò sī chiām-sî ê hi-hán nā-tiāⁿ. Iáu ū sím-mi̍h siau-sit bô?
|
9 富人：Che 確實是 1 件 thang 相比 ê 大事。總--是木工 ê 子會thang 做甚mi̍h，不過是暫時 ê 稀罕nā-tiāⁿ。Iáu 有甚mi̍h消息--無？ |
|
10 米勒: Lâng ū chiong chi̍t ê khit-chia̍h khǹg tī lán ê tōa mn̂g-kháu, hit ê khit-chia̍h miâ kiò chòe Lia̍p-sat-lō͘, sī piàn-sūi koh choân-sin seⁿ thiàⁿ, sī ǹg-bāng khioh lán toh-kha ê sut-á lâi tō͘-pá.
|
10 米勒：人有將1 個乞食囥 tī 咱 ê 大 門口， hit 個乞食名叫做拉撒路，是半遂 koh 全身生thiàⁿ，是向望拾咱桌腳 ê 屑仔來度飽。 |
|
11 以東: Hit-ê khit-chia̍h sī chi̍t ê kèng-khiân sìn-hōng Iâ-hô-hoa ê lâng, iā sī chi̍t ê jia̍t-jia̍t ê lâi-sè chú-gī chiá.
|
11 以東：Hit個乞食是1 個敬虔信奉耶和華 ê 人，也是1 個熱熱 ê 來世主義者。 |
|
12 米勒: I kóng 現世 ê kan-khó͘ sī chiām-sî, khiok tī 來世 ū éng-oán ê hēng-hok kap khoài-lo̍k. Chhin-chhiūⁿ án-ne 現世 ê khoài-lo̍k iā sī chiām-sî, khiok tī 來世 beh siū-tio̍h éng-oán ê thòng-khó͘.
|
12 米勒：伊講現世 ê 艱苦是暫時，卻 tī 來世有永遠 ê 幸福 kap 快樂。親像 án-ne 現世 ê 快樂也是暫時，卻 tī 來世 beh 受著永遠 ê 痛苦。 |
|
13 以東: I kóng lâng tī 現世 ê só͘-chòe lóng tī 來世 beh tú-tio̍h sím-phòaⁿ, hit ê 來世 chiah ū chin-si̍t ê bûn-bêng.
|
13 以東：伊講人 tī 現世 ê 所做攏 tī 來世 beh tú著審判，hit 個來世才有真實 ê 文明。 |
|
14 富人: Gû-gōng ê thâng-thōa, èng-kai chiù-chó͘ thiⁿ-tōe lâi sí chiah tio̍h, ū sím-mi̍h 來世 noh, sím-phòaⁿ noh?
|
14 富人：愚憨 ê 蟲豸，應該咒詛天地來死才著，有甚來世-- noh ，審判--noh ？ |
|
(小爺出場)
|
（小爺出場） |
|
15 小爺: Tōa-hiaⁿ, goān lí chheng-chá khoài-lo̍k.
|
15 小爺：大兄，願你清早快樂。 |
|
16 富人: Ah, goân-lâi sī sió-tī, lí chiah-n̍i̍h chá lâi chhōe góa sī m̄-sī ū sím-mi̍h te̍k-pia̍t ê sū hoat-seng mah?
|
16 富人：Ah，原來是小弟，你 chiah-n̍i̍h 早來 chhōe 我 是 m̄是有甚mi̍h特別 ê 事發生--mah ？ |
|
17 小爺: Sī lah, chā-ji̍t ū chiap-tio̍h Lô-má chóng-tok-hú lâi ê siau-sit, kóng beh tùi lán it-chhè ê ke-gia̍p lâi thiu-sòe-kim lah. (The̍h chóa hō͘ i khòaⁿ, 富人 chiap chóa chiū khiā khí-lâi.)
|
17 小爺：是--lah ，昨日有接著羅馬總督府來 ê 消息，講 beh tùi 咱一切 ê 家業來抽稅金--lah 。（提紙 hō͘ 伊看，富人接紙就企--起-來。） |
|
18 富人: Lí teh kóng sím-mi̍h! Kiám ū chit-khoán ê sū-si̍t mah!
|
18 富人：你 teh 講甚mi̍h ！Kiám 有這款 ê 事實--mah ！ |
|
19 小爺: Liân lán ê pâng-ok, thó͘-tōe, châi-pó í-ki̍p hiah ê gû-iûⁿ, lô͘-lē iā lóng beh chiàu sò͘-gia̍h lâi kā lán thiu-sòe, chiàu án-ne, lán múi-nî ê chóng seng-sán lâi hō͘ in tú-á hó.
|
19 小爺：連咱 ê 房屋、土地、財寶以及 hiah ê 牛羊、奴隸也攏 beh 照數額來 kā 咱抽稅，照 án-ne，咱每年 ê 總生產來 hō͘--in tú仔好。 |
|
20 富人: Ná-lí ū chit-chióng iá-bân, bô-lí ê sū! Lô-má chèng-hú ū ì-sù beh chhiúⁿ-toa̍t góa ê châi-sán lah! Lô-má sī chha̍t mah! sī hiông-hoān mah! Ah, góa ê it-chhè taⁿ kàu chia lah, góa beh koh kóng sím-mi̍h, góa ê choân-sin lóng gī-gī chhoah lah. (chē lo̍h-khì)
|
20 富人：那裡有這種野蠻、無理 ê 事！羅馬政府有意思 beh 搶奪我 ê 財產--lah！羅馬是賊--mah！是凶犯--mah！Ah，我 ê 一切今 到 chia--lah ，我 beh koh 講甚mi̍h，我 ê 全身 攏 gī-gī chhoah lah。（坐--落-去） |
|
21 小爺: Tōa-hiaⁿ, lí m̄-thang hiah-n̍i̍h hùn-khài tio̍h-kip,Lô-má chèng-hú pèng m̄-sī ū ì-sù beh chhiúⁿ lán ê châi-sán, sī ài beh thiu lán só͘ ū ê ê sòe-kim nā-tiāⁿ.
|
21 小爺：大兄，你 m̄-thang hiah-n̍i̍h 憤慨著急，羅馬政府並m̄是有意思 beh 搶咱 ê 財產，是 ài beh 抽咱所有--ê ê 稅金 nā-tiāⁿ 。 |
|
22 富人: Lí m̄-bián kóng, lí m̄-bián kóng! Góa lóng bêng-pe̍k, góa lóng bêng-pe̍k! Che sī thâu chi̍t-pō͘, kiat-kio̍k sī ōe hō͘ Lô-má chhiúⁿ-toa̍t khì, (háu) ah, góa ê chó͘-kong só͘ lâu hō͘ goán ê gia̍p kàu chia oân-lah. Goán kú-kú só͘ ló͘-le̍k, só͘ kiàn-li̍p ê kàu chia lóng soah lah, oh, khó͘-òⁿ siū chiù-chó͘ ê Lô-má, góa kap lí ū sím-mi̍h oan-siû! Góa ê sèⁿ-miā tek-khak ōe hō͘ lí siu-si̍p khì lah! (夫人出場)
|
22 富人：你 m̄免講，你 m̄免講！我攏明白，我攏明白！Che 是頭1 步，結局是會 hō͘ 羅馬搶奪去，（哮）ah ，我 ê 祖公所留 hō͘ 阮 ê 業到 chia 完--lah 。阮久久所努力、所建立--ê 到 chia 攏煞 lah，oh，可惡受咒詛 ê 羅馬，我 kap 你有甚mi̍h 冤仇！我 ê 生命的確會 hō͘ 你收拾去--lah ！（夫人出場） |
|
23 夫人: Tàu-té sī sím-mi̍h tāi-chì! Góa ê chú-lâng ah, góa ê chú-láng ah, lí sī án-chóaⁿ?
|
23 夫人：到底是甚mi̍h 代誌！我 ê 主人--ah，我 ê 主人--ah，你是 án-chóaⁿ？ |
|
24 小爺: Lô-má chèng-hú chhâ-chhut lán ê châi-sán, tī lán só͘-ū it-chhè ê mi̍h ê téng-bīn khai-sí beh kā lán thiu sòe-kim. (chiong chóa hō͘ i khòaⁿ, 夫人 khóaⁿ liáu)
|
24 小爺：羅馬政府查出咱 ê 財產，tī 咱 所有一切 ê 物 ê 頂面開始 beh kā 咱抽稅金。（將紙 hō͘ 伊看，夫人看了） |
|
25 夫人: Góa ê chú-lâng ah, án-ne ū sím-mi̍h thang hō͘ lí hùn-khài choa̍t-bāng, lí siūⁿ-khòaⁿ lán ê châi-sán kin-á-ji̍t ōe-thang tit-tio̍h pó-choân ê thâu chi̍t ê goân-in kiám m̄-sī in-ūi Lô-má ê tì-ìm, nā bô Lô-má chèng-hú tī lán ê kok-lāi teh pang-chān lán ê tī-an, lí siūⁿ lán ê châi-sán beh án-chóaⁿ tùi chiah ê Í-sek-lia̍t ê tông-pau, í-ki̍p gōa-pang lâng ê thó͘-húi lâi tit-tio̍h pó-choân, só͘-í kó-jiân sī Lô-má ê tì-ìm lán tùi lán só͘ ū ê tiong-kan lâi thiu tām-po̍h hō͘ in, chhin-chhiūⁿ kā in seh to-siā ê ì-sù, án-ne kiám m̄-sī chin tong-jiân ê sū. Tùi chá kàu hiān-kim bô ū chi̍t ê pù-lâng ōe-thang tùi thó͘-húi hiông-hoān ê chhiú lâi pó-choân in ê châi-sán, pó-pòe, tû-khì hiān-kim lán tī Lô-má ê pó-hō͘-ē chiah ū chit ê an-ún. Só͘-í m̄-thang ūi-tio̍h chit ê sū lâi seⁿ chhut sím-mi̍h put-hēng ê sū.
|
25 夫人：我 ê 主人--ah，án-ne 有甚mi̍h thang hō͘ 你憤慨絕望，你想看咱 ê 財產今仔日會thang 得著保全 ê 頭1 個原因 kiám m̄是因為羅馬 ê 致蔭，若無羅馬政府tī 咱 ê 國內 teh 幫贊咱 ê 治安。你想咱 ê 財產 beh án-chóaⁿ tùi chiah ê 以色列 ê 同胞，以及外邦人 ê 土匪來得著保全，所以果然是羅馬 ê 致蔭咱 tùi 咱所有 ê 中間來抽淡薄 hō͘ in，親像 kā in 說多謝 ê 意思，án-ne kiám m̄是真當然 ê 事。Tùi 早到現今無有一個富人會thang tùi 土匪凶犯 ê 手來保全 in ê 財產、寶貝，除去現今咱 tī 羅馬 ê 保護下才有這個安穩。所以 m̄-thang 為著這個事來生出甚mi̍h 不幸 ê 事。 |
|
30 富人: (khiā khí-lâi) Góa lóng bô teh thiaⁿ lí ê ōe! Lô-má tú-tú sī thó͘-húi, sī hiong-hoān! Góa ê só͘ ū tek-khak ōe ūi-tio̍h Lô-má lâi bô-khì! Góa taⁿ bô beh kap lí khì Lô-má khòaⁿ in ê chha̍t-thâu, khòaⁿ in ê chha̍t-siū. Góa ōe khì-sí, góa ōe khì-sí! (tó lo̍h-khì)
|
30 富人：（企--起-來）我攏無 teh 聽你 ê 話！羅馬 tú-tú 是土匪、是凶犯！我 ê 所有的確會為著羅馬來無--去！我今無 beh kap 你去羅馬看 in ê 賊頭，看 in ê 賊siū。我會氣死，我會氣死！（倒--落-去） |
|
31 夫人: Bí-le̍k, kín-kín khì chhiáⁿ i-seng lâi. Í-tong, lí kap sió-iâ hû lāu-iâ khí-lâi chhn̂g-n̍i̍h.
|
31 夫人：米勒，緊緊去請醫生來。以東，你kap 小爺扶老爺起來床--n̍i̍h。 |
|
32 醫師: Lāu-iâ ū sím-mi̍h bô hó-sè ê sū?
|
32 醫師：老爺有甚mi̍h 無好勢 ê 事？ |
|
(khài-sí bong-me̍h, kiám-cha sin-thé)
|
（開始摸脈，檢查身體） |
|
33 夫人: I-seng, m̄-chai ū iàu-kín bô?
|
33 夫人：醫生，m̄知有要緊--無？ |
|
34 醫師: Chhiong-tio̍h náu-kin, pēⁿ-sè put-chí giâm-tiōng, tio̍h choa̍t-tùi ê an-hioh. (富人 chhéⁿ khí-lâi)
|
34 醫師：沖著腦筋，病勢不止嚴重，著絕對 ê 安歇。（富人醒--起-來） |
|
35 富人: Góa ài lim-chúi, kín-kín hō͘ góa chi̍t-poe léng-chúi. (夫人令米勒 phâng chúi lâi, lim-liáu) Hu-jîn tī tó-ūi?
|
35 富人；我 ài lim水，緊緊 hō͘ 我一杯冷水。（夫人令米勒捧水來，lim-了)夫人 tī tó位？ |
|
36 夫人: Góa ê chú-lâng ah, góa tī chia, lí ū sím-mi̍h tāi-chì beh kā góa kóng bô?
|
36 夫人：我 ê 主人--ah，我 tī chia，你有甚mi̍h 代誌 beh kā 我講--無？ |
|
37 富人: Tú-chiah lí só͘ kā góa soat-bêng ê sū, si̍t-chāi ū lí-khì, góa put-chí pōe-ho̍k lí ê ko-bêng, góa si̍t-chāi bô èng-kai lâi chiah-n̍i̍h kah siū-khì. Chóng-sī lí chai, góa ūi-tio̍h góa ê châi-pó mê-ji̍t khòa-lū bô pêng-an kàu án-ne, góa si̍t-chāi chin gōng! Góa beh chiàu í-chêng lán ê kè-e̍k, lâi-khì chiu-iû Lô-má, nā bô thit-thô hióng-siū kiaⁿ-liáu bô ki-hōe lah. Chhiáⁿ lín hō͘ góa khiā khí-lâi. Góa taⁿ chin sóng-khoài lah.
|
37 富人：Tú-chiah 你所 kā 我說明 ê 事，實在有理氣，我不止佩服你 ê 高明，我實在無應該來 chiah-n̍i̍h kah 受氣。總--是你知，我為著我 ê 財寶暝日掛慮無平安到án-ne，我實在真憨！我 beh 照以前咱 ê 計劃，來去周遊羅馬，若無 thit-thô 享受驚了無機會-- lah。請 lín hō͘ 我企--起-來。 我今真爽快--lah。 |
|
38 醫師: Lāu-iâ, chhiáⁿ lí m̄-thang tín-tāng, lí tio̍h ài choa̍t-tùi ê an-chēng, nā bô kiaⁿ-liáu ū sím-mi̍h put-hēng ê sū.
|
38 醫師：老爺，請你 m̄-thang 振動，你著 ài 絕對 ê 安靜，若無驚了有甚mi̍h 不幸 ê 事。 |
|
39 富人: Goân-lâi sī Hô-lī, chhiáⁿ lí pang-chān góa khiā khí-lâi, góa tio̍h ài tiông-sin lâi oa̍h,ūi-tio̍h góa ê hēng-hok ê iân-kò͘, góa su-iàu góa ê oa̍h-miā.
|
39 富人：原來是 Hô-lī,請你幫贊我企--起-來，我著 ài 重新來活，為著我 ê 幸福 ê 緣故，我需要我 ê 活命。 |
|
40 醫師: Lāu-iâ, lí nā ài oa̍h-miā lí tio̍h ài chun-tiōng i-ha̍k-siōng ê kui-kú, m̄-thang tín-tāng, tio̍h choa̍t-tùi ê an-chēng.
|
40 醫師：老爺，你若 ài 活命你著 ài 尊重醫學上 ê 規矩，m̄-thang 振動，著絕對 ê 安靜。 |
|
41 富人: Góa hiān-sî bô hit ê û-tē thang koh thiaⁿ jīm-hô ê ha̍k-soat. Chhiáⁿ lín hō͘ góa khiā khí-lâi. (khiā khí-lâi) Góa si̍t-chāi chin-gōng, góa án-chóaⁿ ló͘-le̍k lâi kiàn-li̍p góa ê ka-gia̍p, siat-sú góa nā án-ne lâi sí, góa ê chò lâng kiám m̄-sī chin m̄-ta̍t mah? Só͘-í góa su-iàu tiông-sin ê oa̍h-miā, thang hióng-siū jîn-seng, tú-tú chiàu góa ê hu-jîn-lâng só͘ kiàn-gī ê......
|
41 富人：我現時無 hit 個餘地 thang koh 聽任何 ê 學說。請 lín hō͘ 我企--起-來。（企--起-來） 我實在真憨，我 án-chóaⁿ 努力來建立 我 ê 家業，設使我若 án-ne 來死，我 ê 做人 kiám m̄是真 m̄值 mah？所以我需要重新 ê 活命，thang 享受人生，tú-tú 照我 ê 夫人人所建議--ê…… |
|
42 夫人: Góa ê chú-lâng ah, khiok hiān-sî lán kò͘-put-chiong tio̍h pàng-sak chit ê kiàn-gī, hiān-sî lán só͘ tio̍h koan-sim ê m̄-sī beh án-chóaⁿ lâi hióng-siū oa̍h-miā, chiū-sī beh án-chóaⁿ lâi pó-siú oa̍h-miā lah.
|
42 夫人：我 ê 主人--ah，卻現時咱姑不chiong 著放sak 這個建議，現時咱所著關心 ê m̄是 beh án-chóaⁿ 來享受活命，就是 beh án-chóaⁿ 來保守活命--lah。 |
|
43 醫師: Lâng tī chit sè-kan ê êng-kng, phí-jū chháu-hōe, khoài-siā, phí-jū hái-éng, bô sî-tiāⁿ. Lâng èng-kai tio̍h tui-chhōe hit ê éng-kiú ê oa̍h-miā. Lāu-iâ lí kiám m̄-chai chòe-kīn tī lán ê kok-lâi só͘ hoat-seng ê sū? Chiū-sī Siōng-tè ū tùi I ê peh-sèⁿ tiong heng-khí chi̍t ê kiù-sè Chú, lâi beh tùi o͘-àm, put-sìn ê gōa-pang tiong lâi Kiù-sio̍k lán. I ê hong-siaⁿ í-keng kàu tī choân-kok. Góa pêng-siông iā lóng teh kun-tè I, I ê miâ kiò chò Iâ-so͘.
|
43 醫師：人 tī 這世間 ê 榮光，譬喻草花，快謝；譬喻海湧，無時定。人應該著追chhōe hit 個永久 ê 活命。老爺你 kiám m̄知 最近 tī 咱 ê 國來所發生 ê 事？就是上帝有 tùi 伊 ê 百姓中興起一個救世主，來 beh tùi 烏暗、不信 ê 外邦中來救贖咱。伊 ê 風聲已經到 tī 全國。我平常也攏 teh 跟tè--伊，伊 ê 名叫做耶穌。 |
|
44 富人: I sī sím-mi̍h téng-hō ê lâng, tī peh-sèⁿ tiong teh chò sím-mi̍h?
|
44 富人：伊是甚等號 ê 人，tī 百姓中 teh 做甚mi̍h？ |
|
45 醫師: Sī ba̍k-kang Iok-sek ê kiáⁿ, I tī peh-sèⁿ tiong teh thoân thian-kok kīn lah ê siau-sit, koh kiò peh-sèⁿ tio̍h hoán-hóe lâi sìn Siōng-tè ê kiù-sio̍k.
|
45 醫師：是木工約瑟 ê 子，伊 tī 百姓中 teh 傳天國近 lah ê 消息，koh 叫百姓著反悔來信上帝 ê 救贖。 |
|
46 富人: Ba̍k-kang ê kiáⁿ ōe-thang chò sím-mi̍h? Tī lán Í-sek-lia̍t tiong kiám m̄-sī ū Mô͘-se kap lu̍t-hoat mah, Hô-lī, lí iā sìn i mah?
|
46 富人：木工 ê 子會thang 做甚mi̍h？Tī 咱以色列中 kiám m̄是有摩西 kap 律法 mah，Hô-lī,你也信伊 mah？ |
|
47 醫師: Sī, in-ūi i nā m̄-sī tùi Siōng-tè lâi, tek-khak bô hiah-n̍i̍h tōa ê koân-pèng kap lêng-le̍k, tì-hūi. Koh si̍t-chāi lán iā tioh7 chhéⁿ khí-lâi lâi sìn Siōng-tè ê kok kap I ê kiù-sio̍k.
|
47 醫師：是，因為伊若 m̄是 tùi 上帝來，的確無 hiah-n̍i̍h 大 ê 權柄 kap 能力、智慧。Koh 實在咱也著醒--起-來來信上帝 ê 國 kap 伊 ê 救贖。 |
|
48 富人: Chhiáⁿ lí m̄-thang hō͘ góa ū hūn tī hiah ê hó-chhiò ê gōng-lâng ê tiong-kan. Lí iā tek-khak chai, góa sī Sat-thó͘-kai tóng ê lâng.
|
48 富人：請你 m̄-thang hō͘ 我有份 tī hiah ê 好笑 ê 憨人 ê 中間。你也的確知，我是撒都該黨 ê 人。 |
|
49 醫師: Góa chai lāu-iâ lí goân-lâi sī bô sìn chiong-lâi ê lâng. Chóng-sī góa siūⁿ sū-si̍t-siōng nā ū 來世, hit ê 來世 bōe-thang ūi-tio̍h lán ê bô sìn lâi piàn-ōaⁿ. Koh góa khòaⁿ tī lāu-iâ lí hiān-si̍t ê bīn-chêng 信, 不信 sī chi̍t ê chòe tiōng-tāi ê bûn-tê, in-ūi nā bô tùi 信 chiū bô ū 得救的希望, 將來 tùi tī lí sī chi̍t ê o͘-àm, kiaⁿ-hiâⁿ ê sè-kài.
|
49 醫師：我知老爺你原來是無信將來 ê 人。總--是我想事實上若有來世，hit 個來世 bōe-thang 為著咱 ê 無信來變換。Koh 我看tī 老爺你現實 ê 面前信、不信是 1 個最重大 ê 問題，因為若無 tùi 信就無有得救 ê希望，將來 tùi tī 你是 1 個烏暗、驚惶 ê 世界。 |
|
50 富人: Chhiáⁿ lí m̄-thang koh hō͘ góa thiaⁿ-tio̍h lí hiah ê gōng-ōe. Góa bōe-thang jím-siū koh siūⁿ tī Í-sek-lia̍t tiong chhin-chhiūⁿ lí chit-téng-hō ê lâng iā khì kun-tòe hit ê ba̍k-kang ê kiáⁿ Iâ-so͘, koh sòa sìn i lóng-chóng ê ōe. Che sī Í-sek-lia̍t ê 終局, sī Í-sek-lia̍t ê 滅亡 !
|
50 富人：請你 m̄-thang koh hō͘ 我聽著你 hiah ê 憨話。我 bōe-thang 忍受 koh 想 tī 以色列中親像你這等號 ê 人也去跟tòe hit 個木工 ê 子耶穌，koh 煞信伊攏總 ê 話。Che 是以色列 ê 終局，是以色列 ê 滅亡！ |
|
(幕)
|
（幕） |
|
第四幕
|
第四幕 |
|
出場人物: 拉撒路, 天使a, 天使b, 米勒, 以東.
|
出場人物：拉撒路、天使a、天使b、米勒、以東 |
|
場面: 富人的大門口 (和第二幕同樣) 開幕: 拉撒路在黑暗的雪夜中在祈禱吟聖詩236首的第四節
|
場面：富人的大門口（和第二幕同樣） 開幕：拉撒路tī 黑暗 ê 雪夜中tī 祈禱吟聖詩236首 ê 第四節 |
|
1 拉撒路: Iâ-hô-hoa góa ê chó͘ A-pek-lia̍p-hán, Í-sat, Ngá-kok ê Siōng-tè ah, Lí chāi-chá án-chóaⁿ ēng Lí ê koân-lêng kî-sū ín-chhōa Lí ê peh-sèⁿ thoat-chhut Ai-ki̍p ê hêng-hoa̍t, ín-chhōa goán ê chó͘ keng-kòe Âng-hái, le̍k-iû 40 nî tī khòng-hān ê soa-bô͘ tiong, tùi tùi-te̍k ê chhiú, tùi chē-chē kan-lân Lí ū ín-chhōa in kàu tī Lí só͘ èng-ún ê Ka-lâm lâi, tī lâu ni, lâu bi̍t ê Ka-lâm tōe, Lí hō͘ goán ê chó͘ tōa-tōa heng-khí, sòa tī chit ê tōe kiàn-li̍p in ê ông-kok. Lí ū kú-khí Lí ê peh-sèⁿ, chhin-chhiūⁿ êng-iāu ê kî tī lia̍t-pang tiong. Khiok tī un-tián ê ji̍t goán ê chó͘ sòa pōe-ge̍k Lí, khì kūi-pài gōa-pang ê ngó͘-siōng, kap put-sìn ê peh-sèⁿ saⁿ-chhin, kiat-iok, tì-kàu jiá-tio̍h lí ê siū-khì, kok-bông, bîn-pāi, kàu kin-á-ji̍t sòa tī gōa-pang ê chhiú-ē, chiâⁿ-chò gōa-pang só͘ thún-ta̍h ê mi̍h.
|
1 拉撒路：耶和華我 ê 祖亞伯拉罕、以撒、雅各 ê 上帝--ah，你在早 án-chóaⁿ 用你 ê 權能奇事引chhōa 你 ê 百姓脫出埃及ê 刑罰，引chhōa 阮 ê 祖經過紅海、歷遊 40 年 tī 炕旱 ê 沙漠中，tùi 對敵 ê 手，tùi 濟濟艱難你有引chhōa in 到 tī 你所應允 ê 迦南來，tī 流奶、流蜜 ê 迦南地，你 hō͘ 阮 ê 祖大大興起，續 tī 這個地建立in ê 王國。你有舉起你 ê 百姓，親像榮耀 ê 旗 tī 列邦中。卻 tī 恩典 ê 日阮 ê 祖煞背逆你，去跪拜外邦ê 偶像，kap 不信 ê 百姓相親、結約，致到惹著你 ê 受氣，國亡、民敗，到今仔日煞tī 外邦 ê 手下，成做外邦所 thún踏 ê 物。 |
|
Ah, góa ê Chú, góa ê Siōng-tè ah, Lí beh pàng-sak Lí ê peh-sèⁿ kàu sím-mi̍h sî ah! Kiû Lí koh chi̍t-pái ēng Lí ê chhôe lâi piⁿ-phah in, hō͘ in ōe hóe-kái chhíⁿ-gō͘ lâi kui-ǹg Lí. Kiû Lí kín-kín kiù-sio̍k goán.
|
Ah，我 ê 主，我 ê 上帝--ah，你 beh 放sak 你ê 百姓到甚mi̍h 時--ah！求你 koh 一擺用你 ê chhôe 來 鞭扑--in，hō͘ in 會悔改醒悟來歸向你。求你緊緊救贖阮。 |
|
Kiû Lí iā kì-liām Lí siū-khó͘ ê kiáⁿ-jî lóng-chóng ê âu-kiò, kiû Lî sià-bián góa tī chit ê oa̍h-lâng ê tōe só͘ ū bōe-thang êng-iāu Lí ê seng-oa̍h.
|
求你也記念你受苦 ê 子兒攏總 ê 喉叫，求你赦免我 tī 這個活人 ê 地所有bōe-thang 榮耀你 ê 生活。 |
|
Kiû Lí chiap-la̍p góa ê lêng-hûn kui tī Lí éng-oán thiàⁿ kiáⁿ ê kok. A-men.
|
求你接納我 ê 靈魂歸 tī 你永遠疼子 ê 國。阿們。 |
|
(吟聖詩244首第一節, gîm-liáu khai-sí thàng-thiàⁿ)
|
（吟聖詩244首第一節，吟了開始痛疼） |
|
Góa ê Chú, góa ê Siōng-tè ah, kiû Lí chiap-la̍p góa ê lêng-hûn. Oh, góa ū khòaⁿ-kìⁿ thiⁿ-khui êng-kng chhàn-lān ê thó͘-tē, thiⁿ-sài chū-chi̍p tī hia. Oh, góa só͘ him-bō͘ ê chó͘-ke! (拉撒路死, 聖歌隊繼續吟244首2節, 有2個天使出現)
|
我 ê 主，我 ê 上帝--ah，求你接納我 ê 靈魂。Oh，我有看見天開榮光燦爛 ê 土地，天使聚集 tī hia。Oh，我所欣慕ê 祖家！（拉撒路死，聖歌隊繼續吟244首2節，有2個天使出現） |
|
2 天使a: Siū-khó͘ ê kiáⁿ Lia̍p-sat-lō͘, Iâ-hô-hoa, lí ê Chú,lí ê Siōng-tè, í-keng kàm-chhat lí khùn-lân ê ji̍t-chí, khòaⁿ-kìⁿ lí ê jím-siū. Lí tī ke̍k-kî pi-chhám ê ji̍t iáu-kú jia̍t-jia̍t ê sim sìn-gióng Chú lí ê Siōng-tè, gia̍h-ba̍k ǹg-thiⁿ tán-hāu I ê kok, taⁿ Chú lí ê Siōng-tè beh chiap-la̍p lêng-hûn kàu tī I thiàⁿ kiáⁿ ê kok.
|
2 天使a：受苦 ê 子拉撒路，耶和華，你 ê 主，你ê 上帝，已經鑒察你困難 ê 日子，看見你 ê 忍受。你 tī 極其悲慘 ê 日 iáu-kú 熱熱 ê 心信仰主你 ê 上帝，gia̍h目向天等候伊ê 國，今主你 ê 上帝 beh 接納靈魂到伊疼子 ê 國。 |
|
3 天使b: Hiaⁿ-tī Lia̍p-sat-lō͘ ah, lí ê siū-khó͘, lí ê pi-chhám lóng soah lah. Lí m̄-bián koh tī chit ê chhiⁿ-chhìn, léng-chēng ê ke-lō͘ chiūⁿ ko͘-toaⁿ khùn-khó͘ lah. Lí lóng-chóng ê ba̍k-sái iā soah lah, lí èng-kai ji̍p tī lí ê chó͘ A-pek-lia̍p-hán ê hoâi-lāi, lâi tit-tio̍h an-hioh.
|
3 天使b：兄弟拉撒路--ah，你 ê 受苦、你 ê 悲慘 攏煞--lah。你 m̄免 koh tī 這個 chhiⁿ-chhìn 、冷靜 ê 街路上孤單困苦 --lah。你攏總 ê 目屎也煞--lah，你應該入 tī 你 ê 祖亞伯拉罕 ê 懷內，來得著安歇。 |
|
(聖歌隊幕後繼續吟第三節, 天使引拉撒路的靈魂昇天, 米勒, 以東 the̍h sut-á ê pôaⁿ 出場)
|
（聖歌隊幕後繼續吟第三節，天使引拉撒路 ê 靈魂昇天， 米勒、以東提屑仔 ê 盤出場） |
|
4 米勒: Kàu kin chá-khí tōa-seh iáu lóng bô soah.
|
4 米勒：到今早起大雪 iáu 攏無煞。 |
|
5 以東: Iû-thài soaⁿ-me̍h hō͘ seh khàm-ba̍t hoat-chhut chin-súi ê pe̍h-kng sek!
|
5 以東：猶太山脈 hō͘ 雪 khàm-ba̍t 發出真súi ê 白光色！ |
|
6 米勒: Tùi chā-mê khí lāu-iâ ê sin-thé ū koh-khah siong-tiōng.
|
6 米勒：Tùi 昨暝起老爺 ê 身體有 koh較傷重。 |
|
7 以東: Chiu-iû Lô-má ê tōa lú-hêng í-keng bô ǹg-bāng lah, kòe-khì ê ǹg-bāng kiám-chhái sī chiu-iû im-kan.
|
7 以東：周遊羅馬 ê 大旅行已經無向望--lah，過去 ê 向望 kiám-chhái 是周遊陰間。 |
|
8 米勒: Náu-chhiong-hiat sī chi̍t-chióng ê sí-pīⁿ, chí-ū sī sî-kan ê būn-tê nā-tiāⁿ.
|
8 米勒：腦充血是一種 ê 死病，只有是時間 ê 問題 nā-tiāⁿ。 |
|
9 以東: Lán ê kan-khó͘ iā bô gōa-kú lah, koh kín-sīn iā bô gōa-kú lah!
|
9 以東：咱 ê 艱苦也無偌久--lah，koh 謹慎也無偌久--lah！ |
|
10 米勒: Chò lô͘-lē ê lâng m̄-bián siūⁿ ū sím-mi̍h chhut-thoat ê ji̍t-chí, kàu sí chiah sī chin-si̍t ê tháu-pàng.
|
10 米勒：做奴隸 ê 人 m̄免想有甚mi̍h 出脫ê 日子，到死才是真實 ê tháu-放。 |
|
11 以東: Sū-si̍t sī án-ne, iáu-kú tī chit ê khùn-lân tiong bōe-bián tio̍h ǹg-bāng.
|
11 以東：事實是 án-ne，iáu-kú tī 這個困難中 bōe免著向望。 |
|
12 米勒: Chā-mê ê tōa-seh, Lia̍p-sat-lō͘ m̄-chai ū pêng-an bô? Pháiⁿ-miā lâng khah siông lóng sī khah nāi-miā.
|
12 米勒：昨暝 ê 大雪，拉撒路 m̄知有平安--無？歹命人較常攏是較耐命。 |
|
13 以東: Lia̍p-sat-lō͘, khí-lâi oh, lí ū kiaⁿ kôaⁿ á-bô? Khí-lâi chia̍h lí ê chá-tǹg oh.
|
13 以東：拉撒路，起--來 oh，你有驚寒抑無？起來食你 ê 早頓 oh。 |
|
14 米勒: Kî-koài, lóng bô ìn. Ah, Lia̍p-sat-lō͘ kôaⁿ-sí lah! Lí khòaⁿ, choan-sin lóng bōe tín-tāng lah, koh i ê bah léng chhìn-chhìn.
|
14 米勒：奇怪 ，攏無應。Ah，拉撒路寒死-- lah！你看，全身攏 bōe 振動 lah，koh 伊 ê 肉冷凊凊。 |
|
15 以東: Ū iáⁿ to-tio̍h......, Lia̍p-sat-lō͘ kiat-kio̍k tī i ê siū-khó͘ tiong lâi sí lah, bô chi̍t ê chhin-lâng, pêng-iú tī sin-piⁿ, oân-choân ê ko͘-toaⁿ, chit-chióng ê chhám-sí sī 先代未有的....Khó-lîn,khó-lîn!!
|
15 以東：有影 to-著……，拉撒路結局 tī 伊 ê 受苦中來死--lah，無 1 個親人、朋友tī 身邊，完全 ê 孤單，這種 ê 慘死是先代未有 ê ……可憐，可憐！！ |
|
16 米勒: Khiok lán m̄-thang sûi-piān toàn-tēng i sī chi̍t ê khó-lîn ê lâng. Khiā tī koân-lâu tāi-hā, móa-móa ê chhin-lâng pêng-iú ûi-óa tī chhn̂g-piⁿ ê lâng ê sí iā bô it-tēng ōe pí i khah bô chhám. In-ūi Lia̍p-sat-lō͘ ū i ê Siōng-tè, ū i ê chiong-lâi. Lí khòaⁿ i ê bīn ū hián-chhut kî-biāu ê pêng-an kap hoaⁿ-hí tī-teh.
|
16 米勒：卻咱 m̄-thang 隨便斷定伊是一個可憐 ê 人。企 tī 懸樓大廈，滿滿 ê 親人朋友圍倚 tī 床邊 ê 人 ê 死也無一定會比伊較無慘。因為拉撒路有伊 ê 上帝，有伊 ê 將來。你看伊 ê 面有顯出奇妙 ê 平安 kap 歡喜 tī-leh。 |
|
17 以東: Chit ê sí kàu-gia̍h chèng-bêng ū chi̍t ê chiong-lâi, nā bô, si̍t-chāi chit sè-kan ê put-gī put kong-pêng hō͘ lâng ōe choa̍t-bāng kàu tī m̄-ài oa̍h. Chí-ū sìn ū chiong-lâi, chiah ōe-thang jím-siū tit.
|
17 以東：這個死到額證明有 1 個將來，若無，實在這世間 ê 不義不公平 hō͘ 人會絕望到 tī m̄-ài 活。只有信有將來，才會thang 忍受得。 |
|
18 米勒: Lán tī chit sè-kan só͘ ū ê sok-pa̍k, nā m̄-sī tùi chit ê ǹg-bāng, iā sī hō͘ lán só͘ tam-tng bōe-khí ê..., tùi tī chē-chē hong-bīn, lán iā bô khah-iâⁿ Lia̍p-sat-lō͘. In-ūi i ū chū-iû, khiok lán éng-oán sit-lo̍h hit ê chū-iû.
|
18 米勒：咱 tī 這世間所有 ê 束縛，若 m̄是 tùi 這個向望，也是 hō͘ 咱所擔當bōe起--ê…，tùi tī 濟濟方面，咱也無較贏拉撒路。因為伊有自由，卻咱永遠失落 hit 個自由。 |
|
19 以東: Lán kín ji̍p lâi khì, chiong chit ê sū pò hō͘ chú-lâng chai-iáⁿ, ǹg-bāng siat-hoat lâi kā i bâi-chòng.
|
19 以東：咱緊入--來-去，將這個事報 hō͘ 主人知影，向望設法來 kā 伊埋葬。 |
|
(幕)
|
（幕） |
