Tìn-tiān Chiong-kun Pa Phok-sū
|
鎮殿將軍巴博士 |
| Liāu Tit |
廖得 |
|
Tìn-tiān Chiong-kun Pa Phok-sū
|
鎮殿將軍巴博士 |
|
Pa Phok-sū chó͘-che̍k Hoat-kok; chó͘-sian ūi-tio̍h sìn-gióng ê chū-iû, chiū poaⁿ-khì So͘-kek-lân.
|
巴博士祖籍法國；祖先為著信仰ê自由 就搬去蘇格蘭。 |
|
Pa Phok-sū 16 hòe teh tha̍k tōa-o̍h ê sî, tit-tio̍h lêng-kám, chiū koat-sim hiàn-sin. Kàu pit-gia̍p ê sî, tōa-o̍h beh lâu i tòa bó-hāu chò chō͘-kàu; chóng-sī i koat-sim beh lâi Tâi-oân chò soan-kàu-su. Tāi-ke chin gông-ngia̍h! chi̍t ê ū cháiⁿ-siòng-châi ê lâng beh khì kàu chi̍t ê phian-phiah, tòa pah-gōa bān cha̍p-sek lâng, bô bûn-bêng ê sió hái-sū, thoân-tō chiâⁿ-cha̍p nî kú ê soan-tō-tē chò soan-kàu-su! Si̍t-chāi chin bô chhái!! Thang kóng “Thâi-ke ēng gû-to.” [Āu-lâi tī Siōng-hái choân Tiong-kok 500 gōa ê soan-kàu-su tōa hōe-khó ê sî, Pa Phok-sū tio̍h jī miâ; i ê mōe-sài tòa tī Sòaⁿ-thâu ê Khip Bo̍k-su tio̍h it miâ.]
|
巴博士16歲teh讀大學ê時，得著靈感，就決心獻身。到畢業ê時，大學 beh留伊tòa母校做助教；總是伊決心beh來台灣做宣教師。大家真gông-ngia̍h!一個有宰相才ê人beh去到一個偏僻，tòa百外萬雜色人，無文明ê小海嶼，傳道成十年久ê 宣道地做宣教師！實在真無彩！！Thang講「Thâi雞用牛刀。」 【後來tī上海全中國500外個宣教師大會考ê時，巴博士著二名；伊ê 妹婿 tòa tī汕頭ê Khip 博士著一名。】 |
|
Káu-cha̍p-saⁿ nî chêng, Má I-seng lâi chò Sian-hong.
|
93年前，馬醫生來做先鋒。 |
|
Peh-cha̍p-chhit nî chêng, Kam Bo̍k-su lâi Kòa-sòe.
|
87年前，甘牧師來掛帥。 |
|
Peh-cha̍p-sì nî chêng, Pa Phok-sū lâi Tìn-siú.
|
84年前，巴博士來鎮守。 |
|
Pa Phok-sū lâi Tâi-oân thâu-bóe 62 nî kú, i lâi ê sî Tâi-oân tú-á siat-kàu 10 nî, i tī Tâi-lâm pia̍t-sè, kàu taⁿ 23 nî.
|
巴博士來台灣頭尾62年久，伊來ê 時台灣tú仔設教10年，伊tī台南別世，到今23年。 |
|
Bó-hōe tī 93 nî kú só͘ phài lâi ê:—
|
母會tī 93年久所派來ê:— |
|
1. Bo̍k-su 22 lâng: Kap Pa Phok-sū tâng sî-chūn sī 17 miâ; í-chêng nn̄g miâ, í-āu 3 miâ.
|
1. 牧師22 人：Kap巴博士同時陣是17名；以前兩名，以後3名。 |
|
2. I-seng 15 lâng: Kap Pa Phok-sū tâng sî-chūn 12 miâ; í-chêng nn̄g miâ, í-āu chi̍t miâ.
|
2. 醫生15人：Kap 巴博士同時陣12名：以前兩名，以後1名。 |
|
3. Tiong-o̍h sian-siⁿ 4 lâng: Lóng tī Pa Phok-sū ê sî-tāi.
|
3. 中學先生4人：攏tī巴博士ê時代。 |
|
4. Lú soan-kàu-su 21 miâ: Kap Pa Phok-sū tâng sî-chūn 18 miâ; í-āu 3 miâ.
|
4. 女宣教師21名：Kap 巴博士同時陣18名；以後3名。 |
|
5. Hō͘-sū 8 miâ: Kap Pa Phok-sū tâng sî-chūn 7 miâ; í-āu chi̍t miâ.
|
5. 護士8名：Kap巴博士同時陣7名，以後1名。 |
|
Í-siōng lâm soan-kàu-su 41 lâng, lú soan-kàu-su 29 lâng; kiōng 71 lâng tiong chí-ū 9 miâ kap i bô siāng sî-chūn.
|
以上男宣教師41人，女宣教師29人；共71人中只有9名kap伊無siāng時陣。 |
|
Iā tùi Pa Phok-sū lâi liáu í-āu kàu kū-nî 80 nî kú, siū sîn-ha̍k kàu-io̍k ê kiōng 381 lâng; kî-tiong 294 lâng sī tī i ê sî-tāi lāi, 4 hūn tìn 3 hūn khah ke.
|
也tùi巴博士來了以後到舊年80年久，受神學教育ê共381人，其中294人是tī伊ê時代內，四份鎮三分較加。 |
|
Pa Phok-sū chin thiàⁿ ha̍k-seng: chhin-chhiūⁿ tī 40 gōa nî chêng, thǹg chhiah-kha liâu kòe Sai-lê khe, kàu Sai-lê ke khòaⁿ pè tông-chek Liāu Sam-tiōng ê pēⁿ.
|
巴博士真疼學生，親像tī 40外年前，褪赤腳liâu過西螺溪，到西螺街看敝同叔廖三重ê病。 |
|
Pa Phok-sū chin khek-kí! Goân-pún chì-goān to̍k-sin; āu-lâi in-ūi phòa-pīⁿ ji̍p-īⁿ, chiah kap kò͘ i ê hō͘-sū kiat-hun. Kàu i ê Phok-sū-niû kòe-sin liáu, i chiū bô niá sin-súi (38 nî chêng, Tâi-lâm sin-bûn pò Pa Phok-sū ê nî-hōng 360 pōng); koh chò to̍k-sin-chiá kàu it-seng.
|
巴博士真克己！原本志願獨身；後--來因為破病入院，才kap 顧伊ê護士結婚。到伊ê博士娘過身了，伊就無領薪水 (38 年前，台南新聞報巴博士ê年奉360鎊)；koh做獨身者到一生。 |
|
Pa Phok-sū sī chin khîn-khiām phok-sò͘ ê lâng! I m̄-nā kà chheh, i iā sî-sî tha̍k-chheh! I iā sûn kàu-hōe, iā tù-chok! I ū chài-pán Kam Jī-tián nn̄g piàn, kap thiam-pó͘ Eng Hôa Jī-tián! Kàu chhit peh-cha̍p hòe ê sî koh hoan-e̍k Sin Kū-iok ê pe̍h-ōe-jī Sèng-keng!! Sīm-chì kàu i 80 gōa hòe lîm-chiong í-chêng iáu teh tam-tng Tang-mn̂g í-ki̍p Thài-pêng-kéng nn̄g ūi tông-hōe ê gī-tiúⁿ, kap lâng chē-mê, chē-ji̍t!!
|
巴博士真勤儉樸素ê人！伊m̄-nā 教冊，伊也時時讀冊！也巡教會，也著作！伊有再版甘字典兩遍，kap添補英法字典！到7、80歲ê時，koh翻譯新舊約ê白話字聖經！！甚至到伊80外歲，臨終以前iáu teh擔當東門以及太平境兩位同會ê議長，kap人坐暝坐日！！ |
|
Pa Phok-sū chiong i ê hiaⁿ só͘ hiàn chi̍t bān kho͘ lâi khí sîn-ha̍k ê hāu-sià.
|
巴博士將伊ê兄所獻10000箍來起神學ê校舍。 |
|
I iā siat chheh-pâng, kà tô͘-tē khioh-jī ìn-soat; tùi chheh-pâng ū ióng-sêng kàu-hōe chin-chē ê jîn-châi.
|
伊也設冊房，教徒弟拾字印刷；tùi冊房有養成教會真濟ê人才。 |
|
Tī 28 nî chêng góa kap pè lōe-tē Lîm Chiàu Bo̍k-su tī Siōng-hái Kàu-sū kong-só͘ kap Pa Phok-sū teh chia̍h-pn̄g ê sî, goán nn̄g lâng sī chhin-chhiūⁿ iau-gō-sian, Pa Phok-sū iā sī sán kho̍k-kho̍k, bô thang chhin-chhiūⁿ lāi-bīn pa̍t ê lâng-kheh khah chē lóng chin pûi-phàng, pak-tó͘ iā chin pûi, bīn âng kiat-kiat. Chóng-sī Pa Phok-sū hán-tit phòa-pēⁿ, i ê kiān-khong tn̂g-siū-hoat kóng sī “Tōa chia̍h! Tōa khun!! Tōa chò kang!!!”
|
Tī 28年前我kap敝內弟林照牧師tī上海教士公所kap巴博士teh食飯ê時，阮兩人是親像枵餓仙，巴博士也是sán kho̍k-kho̍k,無thang親像內面別個人客較濟攏真肥胖，腹肚也真肥，面紅kiat-kiat。總是巴博士罕得破病，伊ê健康長壽法講是「大食！大睏！！大做工！！！」 |
|
Pa Phok-sū ê bo̍k-phiau: To̍k-to̍k Iâ-so͘! Éng-oán Iâ-so͘!! I m̄ khò sè! I chin kiaⁿ Hōng-soaⁿ, A-kâu kap Gô͘ Á-chhiûⁿ hit hō sū-kiāⁿ chài hoat, tì-kàu Tâi-oân tit-tio̍h “Bîn-kàu siong-an.” I iā bô bō͘-bêng kiû-lī; sui-jiân hit sî ê chèng-hú ū ēng hun-chiong sàng i, chóng-sī i sí-chiong it-koàn sī “Chèng-kàu hun-lī,” só͘-í kàu-hōe bô siū chèng-piàn ê éng-hióng.
|
巴博士ê目標：獨獨耶穌！永遠耶穌！！伊m̄靠勢！伊真驚鳳山、阿猴kap 吳Á-chhiûⁿ hit 號事件再發，致到台灣得著「民教相安」 伊也無慕名求利；雖然hit時ê政府有用勳章送伊，總是伊始終一貫是「政教分離」，所以教會無受政變ê影響。 |
|
Sui-jiân Tâi-lâm Saⁿ-kau kóng beh hiàn in ê kong-chîⁿ hō͘ kàu-hōe keng-êng “Tiong-se-o̍h,” kap Tâi-tiong Lîm Hiàn-tông Sian-seⁿ hiah ê sin-sū chiong in kúi-cha̍p-bān kho͘ beh hō͘ kàu-hōe siat Eng Hôa su-īⁿ; chóng-sī Pa Phok-sū m̄ káⁿ “Ēng pa̍t-lâng ê kûn-thâu-bó cheng chio̍h-sai,” iā “M̄ káⁿ pa̍t-lâng toh-ni̍h ngeh bah chhī ta-ke.” Pa Phok-sū m̄ káⁿ kiâⁿ hit hō “Bô chîⁿ siūⁿ beh chò thâu-ke” á-sī “Chiù-chōa hō͘ pa̍t-lâng sí” ê lō͘. I choa̍t-tùi beh kiâⁿ “Thian-chō͘ chū-chō͘” ê lō͘! Sui-jiân bô hō͘-sû iā kam-goān!!
|
雖然台南三郊講beh 獻in ê公錢hō͘ 教會經營「中西學」，kap 台中林獻堂先生hiah ê紳士將in幾十萬kho͘ beh hō͘教會設英華書院；總是巴博士m̄ 敢「用別人ê拳頭母cheng石獅」，也 「M̄ 敢別人桌 ni̍h ngeh肉飼ta-ke。」巴博士m̄ 敢行hit號「無錢想beh做頭家」 抑是「咒chōa hō͘別人死」ê 路。伊絕對beh 行「天助自助」ê路！ 雖然無後嗣也甘願！！ |
|
Pa Phok-sū ê kàu-hōe keng-êng hoat:
|
巴博士ê教會經營法： |
|
(1)Nā m̄ sī Pē hō͘ i, bô lâng ē chiū-kīn Chú! (2) Chú ê iûⁿ thiaⁿ Chú ê siaⁿ! (3) Hô͘-lî ū khang, pe-chiáu ū siū, to̍k-to̍k Jîn-chú bô khòa thâu-khak ê só͘-chāi! (4) Bô ēng kim-gîn, chí-ū ēng Iâ-so͘ ê miâ hō͘ sìn ê lâng tit kiù! (5) Sìn-tô͘ ū jia̍t-sim, chū-jiân ū kàu-hōe! Thoân-kàu-ka ū jia̍t-sim, chū-jiân ū keng-hùi! (6) Sìn-tô͘ lóng sī “Sian-ti! Chè-si!! Kun-ông!!! (7) Kàu-hōe bô koân-kē! Kàu-chit bô tōa-sè! Ta̍k khoán ê hōe-gī sī Ki-tok pah-thé ê liân-lo̍k! Ta̍k khoán ê ki-koan sī Ki-tok-tô͘ ê hun-kang ha̍p-chok!!!
|
(1)若m̄ 是父hō͘伊，無人會就近主！(2)主ê羊聽主ê聲！(3) 狐狸有空，飛鳥有siū,獨獨人子無khòa頭殼ê所在！(4) 無用金銀，只有用耶穌ê名 hō͘信ê人得救！(5) 信徒有熱心，自然有教會！傳教家有熱心，自然有經費！(6)信徒攏是「先知！ 祭司！！君王！！！」(7) 教會無懸低！教職無大細！逐款ê會議是基督百体ê連絡！逐款ê機關是基督徒ê分工合作！！！ |
|
(Tâi-oân Kàu-hōe Kong-pò tē 826 hō, 1957 nî 10 goe̍h)
|
(台灣教會公報第826號，1957年10月) |
