Le̍k-Sú Kò͘-Sū_Khit-chia̍h hē Tōa-goān
|
歷史故事_乞食下大願 |
| Liāu Tit |
廖得 |
|
Tâi-oân Sèng Sîn
|
台灣聖神 |
|
Óa 70 nî chêng, tī Sió-thian-tông ū chi̍t ê sìⁿ Chng ê chí-mōe, bōe sìn Chú ê sî, kiáⁿ chi̍t ê seⁿ, chi̍t ê sí; kàu sìn Chú liáu, seⁿ lōa-chē ê, iā lóng sí !
|
倚70年前，tī 小天堂有一個姓莊ê 姊妹，未信主ê 時，子一個生，一個死；到信主了，生偌濟個，也攏死！ |
|
Āu-lâi tiōng-hu khì Tâi-lâm kā Thô͘ Bo̍k-su chú-chia̍h; pún-sin sī tī pún só͘-chāi, kā hōe-iú e-lâng cheng-bí, in-chhâ la̍k-chháu, ōaⁿ chhùi-chia̍h. Ji̍t-mê siūⁿ-tio̍h ka-tī ê pháiⁿ-miā, sàn-hiong, ko͘-to̍k; put-sî lâu ba̍k-sái!
|
後--來丈夫去台南kā 涂牧師煮食；本身是tī 本所在，kā 會友ê 人舂米，in柴la̍k 草，換嘴食。日暝想著家己ê歹命、散hiong、孤獨；不時流目屎！ |
|
Thâu-ke-má khòaⁿ-liáu tang-chêng, an-ùi i kóng, ”Lí mài khàu, goán cha-bó͘-sun-á chiah pun lí thiàⁿ!” Ū chi̍t ji̍t, i chiū mn̄g thâu-ke-má kóng, “Lín cha-bó͘-sun-á kóng beh hō͘ góa, ū iáⁿ bô?” Thâu-ke-má ìn kóng, “Goán cha-bó͘-sun-á hō͘ lí, lí kiám ū thang hō͘ i chia̍h?”
|
頭家媽看了同情，安慰伊講:「你mài 哭，阮查某孫仔才分你疼！」有一日，伊就問頭家媽講：「Lín查某孫仔 講beh hō͘ 我，有影--無？」頭家媽應講：「阮查某孫仔hō͘ 你，你kiám有thang hō͘ 伊食？」 |
|
Chit ê pháiⁿ-miā chí-mōe thiaⁿ-tio̍h án-ni, chiū tōa-khàu kî-tó kóng,“Siōng-tè ah! Lí nā siúⁿ-sù góa kiáⁿ-jî, bô-lūn lâm-lú, lóng beh hiàn chò Chú ê kang. Nā hō͘ góa ū chîⁿ thang Chioh--lâng, góa beh pàng lâng ka-jī-lāi chiū hó.”
|
這個歹命姊妹聽著án-ni，就大哭祈禱講： 「上帝--ah！你若賞賜我子兒，無論男女，攏beh獻做主ê 工，若hō͘ 我有錢thang借--人，我beh放人加二利就好。」 |
|
Bô lōa-kú, tiōng-hu sî thâu-lō͘ tńg--lâi, ang-bó͘ tâng-sim keng-êng. Liân-liân seⁿ nn̄g ê cha-bó͘, kap nn̄g ê ta-po͘--ê. Sū-gia̍p iā chiām-chiām hoat-tián. Tiōng-hu bô tha̍k-chheh, chí-ū bat pe̍h-ōe-jī; múi-mê khah bô êng,beh khùn ê sî, iā tio̍h seng tha̍k kúi chiuⁿ ê Sèng-keng, á-sī Thian-lō͘ le̍k-thêng; sui-jiân m̄-bat hàn-bûn, iáu-kú āu-lâi tng cha̍p-it hāng kong-chit, tû-khì tiúⁿ-ló kap pó-chèng nn̄g-hāng í-gōa, kî-û lóng ū thàn-chîⁿ. Taⁿ chit ê chí-mōe, sī chi̍t ê “Khí thiàⁿ chiah chai khí thiàⁿ lâng”--ê, tùi tī sàn-hiong lâng, ū tōa liōng! Hó khoán-thāi chhut-gōa lâng, bô-lūn hōe-lāi hōe-gōa, ná chhin-chhiūⁿ hit chng ê kong-koán. Hó khoán-thāi thoân-kàu-ka, nā kàu-hōe lāi ê lâng-kheh lâi,sòa chhiáⁿ khì chò pôe-pin, siu-sêng ê sî, bí sàng kui chio̍h, chhâ sàng kui chhia.
|
無偌久，丈夫辭頭路轉--來，翁某同心經營。連連生兩個查某，kap兩個查甫--ê。事業也漸漸發展。丈夫無讀冊，只有bat白話字；每暝較無閒，beh睏ê 時，也著先讀幾章ê 聖經，抑是天路歷程；雖然m̄ bat漢文，iáu-kú 後--來當11項公職，除去長老kap保正兩項以外，其餘攏有趁錢。今這個姊妹，是一個「齒疼才知齒疼人--ê」，對tī 散hiong人，有大量！好款待出外人，無論會內會外，那親像hit 庄ê 公館。好款待傳教家，若教會內ê 人客來，續請去做陪賓，收成ê 時，米送歸石，柴送歸車。 |
|
Tùi tī hōng-hiàn, ang-bó͘ lóng chin kam. Khí pài-tn̂g ê sî, kheh kam-chià ê chîⁿ la̍k-chhit-pah kho͘ lóng the̍h khì kau; hiàn-tn̂g-sek ê sî, cha-bó͘-kiáⁿ ê sai-khia ti lia̍h khì thâi. Hiàn hn̂g chò kàu-hōe ê ki-pún châi-sán. Ta̍k khoán iân-hāng, ang-bó͘ sûi-lâng hiàn.
|
對tī 奉獻，翁某攏真甘。起拜堂ê 時，kheh甘蔗ê 錢6、700箍攏提去交；獻堂式ê時，查某子ê sai-khia豬掠去thâi。獻園做教會ê 基本財產。逐款iân項，翁某隨人獻。 |
|
Nn̄g ê cha-bó͘-kiáⁿ ūi-tio̍h beh kè thoân-tō, lóng hō͘ in tha̍k 7 goe̍h-ji̍t ê Hū-o̍h.
|
兩個查某子為著beh 嫁傳道，攏hō͘ in讀7月日ê婦學。 |
|
Nn̄g ê hāu-seⁿ ūi-tio̍h beh hō͘ in chò thoân-tō, lóng hō͘ in tha̍k Tiong-o̍h.
|
兩個後生為著beh hō͘ in做傳道，攏hō͘ in讀中學。 |
|
Āu-lâi kàu 80 gōa hòe lîm-chiong.
|
後--來到80外歲臨終。 |
|
Hiān-sî ê hō͘-è óa pah-it lâng, kî-tiong í-keng hōng-hiàn chò Thian-kok ê te̍k-kong-tūi, kám-sú-kun, koat-sí-tūi, kap phó͘-thong-peng--ê, kiōng ū 11 lâng, ǹg-bāng bô kú ē ke kàu 14 miâ. Í-gōa iā ū nn̄g-miâ tng kòe lîm-sî-peng--ê.
|
現時ê 後裔倚百一人，其中已經奉獻做天國ê 特攻隊、敢死隊、決死隊，kap普通兵--ê,共有11 人，向望無久會加到14名。以外也有兩名當過臨時兵--ê。 |
|
(Tâi-oân Kàu-hōe Kong-pò tē 820 hō, 1957 nî 4 goe̍h)
|
(台灣教會公報第820號，1957年4月) |
