Chháu-tui-téng ê Bîn-bāng_03
|
草堆頂ê 眠夢_03 |
| N̂g Hoâi-un |
黃懷恩 |
|
Khap-nî kap Chin-ní, A-ko͘ lóng ēng kî-koài ê bīn, lâi khòaⁿ Má-lī teh kî-tó. Nā-sī Chin-ní khòaⁿ tio̍h i ê kî-tó, i chiū chin bô hoaⁿ-hí, bīn-phòng thâu-kat, bô chia̍h chiū chàm kha lī-khui toh khì i ka-kī ê pâng-keng.
|
恰尼kap珍妮、阿姑攏用奇怪ê面，來看瑪莉teh祈禱。若是珍妮看著伊ê祈禱，伊就真無歡喜，面phòng頭結，無食就chàm腳離開桌去伊家己ê房間。 |
|
Khap-nî chiū kóaⁿ-kín jio̍k-kàu i ê pâng-keng khì,
|
恰尼就趕緊jio̍k到伊ê房間去， |
|
“Lí chai Má-lī sī sím-mi̍h khoán ê lâng á-m̄-chai?”
|
「你知瑪莉是甚mi̍h款ê人抑m̄知？」 |
|
Chin-ní khòaⁿ tio̍h Khap-nî jio̍k lâi chiū tùi-bīn lâi mn̄g i, siū-khì ê hóe tī i ê ba̍k-chiu lāi teh to̍h, i ê bīn chin pháiⁿ-khòaⁿ.
|
珍妮看著恰尼jio̍k來就對面來問伊，受氣ê火tī伊ê目珠內teh著，伊ê面真歹看。 |
|
“Lí sī kóng Má-lī sī chi̍t ê Ki-tok-tô͘ tio̍h m̀?!” Khap-nî chiū bô khòaⁿ i chē tī í-n̍i̍h án-ni kóng:
|
「你是講瑪莉是一個基督徒，著--m̀?！」恰尼就無看伊坐tī椅--n̍i̍h án-ni講： |
|
“Sī lah! Lí kiám m̄-chai góa ê chhù tāi-tāi sī hoán Ki-tok-kàu ê ka-têng, lí chiah chiong chit ê tāng-tàⁿ lâi hō͘ góa taⁿ, taⁿ lí tio̍h ài phah-sǹg chiah hó! Góa choa̍t-tùi bô iông-ún Ki-tok-tô͘ tī góa ê chhù-lāi! Hit-khoán bông-in pōe-gī ê lâng bô iông-ún tī góa ê chhù-lāi! Lí tio̍h ài siat-hoat!” Chin-ní chhin-chhiūⁿ háu-sai lâi tōa-siaⁿ jiáng.
|
「是--lah！你kiám m̄知我ê厝代代是反基督教ê家庭，你chiah將這個重擔來hō͘我擔，今你著ài扑算chiah好！我絕對無容允基督徒tī我ê厝內！Hit款忘恩背義ê人無容允tī我ê厝內！你著ài設法！」珍妮親像吼獅來大聲嚷。 |
|
“Chin-ní lí m̄-thang kóng chit-khoán ōe, Má-lī sī góa ê sun-á, m̄-sī kap lán oân-choân bô koan-hē ê lâng, pang-chān i sī lán ê gī-bū. Só͘-í sui-jiân i sī Ki-tok-tô͘ lán bōe-thang kóng sím-mi̍h.” Khap-nî lia̍h Chin-ní ê chhiú lâi beh chó͘-chí i ê heng-hùn.
|
「珍妮你m̄-thang講這款話，瑪莉是我ê孫仔，m̄是kap咱完全無關係ê人，幫贊伊是咱ê義務。所以雖然伊是基督徒咱bōe-thang講甚mi̍h。」恰尼掠珍妮ê手來beh阻止伊ê興奮。 |
|
“Goán ê ka-têng bô ū hit-khoán lâng, lí tio̍h ài siat-hoat! Hō͘ goán m̄-bián tú-tio̍h kiàn-siàu.”
|
「阮ê家庭無有hit款人，你著ài設法！Hō͘阮m̄免tú著見笑。」 |
|
Khap-nî lóng bô hoat-tō͘, chí-ū koh chiūⁿ-lâu khì thàm Má-lī.
|
恰尼攏無法度，只有koh上樓去探瑪莉。 |
|
“Má-lī lí chia̍h ū pá á-bô?”
|
「瑪莉你食有飽抑--無？」 |
|
Khap-nî khòaⁿ-kìⁿ Má-lī ka-kī chi̍t ê put-chí bô-phōaⁿ, koh sit-chì, iu-siong ê bīn tī thang-á teh khòaⁿ lō͘-chiūⁿ ê lâng ê sî i chiū mn̄g i.
|
恰尼看見瑪莉家己一個不止無伴，koh失志、憂傷ê面tī窗仔teh看路上ê人ê時，伊就問伊。 |
|
“Ū lah A-kū!”
|
「有--lah，阿舅！」 |
|
“Má-lī, lí chin koai, lí ū khì Chú-ji̍t-o̍h tha̍k-chheh á-bô?” Khap-nî chē tī i ê bîn-chhn̂g mn̄g i.
|
「瑪莉，你真乖，你有去主日學讀冊抑--無？」恰尼坐tī伊ê眠床問伊。 |
|
“Ū lah!” Má-lī ê bīn piàn-chiâⁿ hoaⁿ-hí, ba̍k-chiu iā kim khí-lâi.
|
「有--lah！」瑪莉ê面變成歡喜，目珠也金--起來。 |
|
“Góa ê Ma-ma ta̍k lé-pài lóng ū chhōa góa khì, Hôa sian-siⁿ-niû sī góa ê sian-siⁿ, i lóng kóng thiⁿ-téng ê kò͘-sū hō͘ góa thiaⁿ.”
|
「我ê媽媽逐禮拜攏有chhōa我去，華先生娘是我ê先生，伊攏講天頂ê故事hō͘我聽。」 |
|
“Hó! Lí sī Chú-ji̍t-o̍h ha̍k-seng! Lí ê Ma-ma kà lí kî-tó tio̍h m̀?!”
|
「好！你是主日學學生！你ê媽媽教你祈禱，著--m̀?！」 |
|
“Sī lah! Ma-ma kóng chia̍h pn̄g tio̍h ài kî-tó, kám-siā, nā bô Siōng-tè bô hoaⁿ-hí.”
|
「是--lah！媽媽講食飯著ài祈禱、感謝，若無上帝無歡喜。」 |
|
Khap-nî sui-jiân ū sim beh kiò i m̄-bián kî-tó, nā-sī khòaⁿ-tio̍h Má-lī ê jia̍t-chhiat kap i ê sìn-sim soah hō͘ i hòng-khì chit ê tiong-kò.
|
恰尼雖然有心beh叫伊m̄免祈禱，若是看著瑪莉ê熱切kap伊ê信心煞hō͘伊放棄這個忠告。 |
|
Kòe-ji̍t Má-lī lo̍h-khì si̍t-tn̂g beh chia̍h pn̄g ê sî, i chiū chiàu-siông beh kî-tó. Chóng-sī hut-jiân A-kīm chin tōa-siaⁿ kóng:
|
隔日瑪莉落去食堂beh食飯ê時，伊就照常beh祈禱。總--是忽然阿妗真大聲講： |
|
“Má-lī, lí bōe-sái tī góa ê chhù-lāi kî-tó! Lí chai sím-mi̍h lâng teh hō͘ lí chia̍h, hō͘ lí tòa, lí teh kám-siā sím-mi̍h lâng? Lí bōe-sái tit kî-tó!”
|
「瑪莉，你bōe使tī我ê厝內祈禱！你知甚mi̍h人teh hō͘你食，hō͘你tòa,你teh感謝甚mi̍h人？你bōe使得祈禱！」 |
|
Má-lī chin tōa-kiaⁿ tì-kàu sin-khu phī-phī chhoah, chha-put-to beh háu chhut-lâi, i chiū m̄-káⁿ kî-tó, iā m̄-káⁿ phâng-óaⁿ khí-lâi chia̍h!
|
瑪莉真大驚致到身軀phī-phī chhoah，差不多beh哮--出-來，伊就m̄敢祈禱，也m̄敢捧碗起來食！ |
|
“Má-lī, lí phâng khí-lâi chia̍h! Kín phâng khí-lâi chia̍h! M̄-bián kî-tó bô iàu-kín!” A-ko͘ chiū khan Má-lī ê chhiú lâi the̍h tī kap óaⁿ. Nā-sī chit ê sūn-ho̍k ê Má-lī chiū in-ūi kiaⁿ Chin-ní ê koan-hē phâng-óaⁿ khí-lâi beh chia̍h, chóng-sī i ê sim kám-kak hui-siông bô pêng-an, sim chin pé-pa̍k, iā hut-jiân khòaⁿ-tio̍h i ê lāu-bú ê iáⁿ tī i ê bīn-chêng teh kóng:
|
「瑪莉，你捧起來食！緊捧起來食！M̄免祈禱無要緊！」阿姑就牽瑪莉ê手來提箸kap碗。但是這個順服ê瑪莉就因為驚珍妮ê關係捧碗起來beh食，總--是伊ê心感覺非常無平安，心真pé-pa̍k,也忽然看著伊ê老母ê影tī伊ê面前teh講： |
|
“Má-lī! M̄-thang chia̍h! Lí nā bô kî-tó m̄-thang chia̍h, Chú Iâ-so͘ bô ài hit hō ê gín-ná.” Má-lī hut-jiân tōa gōng-giah, koh ū Hôa sian-siⁿ-niû ê bīn, iā ū tiàu tī lāu-bú pâng-keng hit ê Iâ-so͘ ê siōng ê bīn, lóng hián-hiān tī i ê bīn-chêng chi̍t-lâng chi̍t-chhùi kiò Má-lī nā bô kî-tó m̄-thang chia̍h.
|
「瑪莉！M̄-thang食！你若無祈禱m̄-thang食，主耶穌無ài hit號ê囡仔。」瑪莉忽然大憨giah，koh有華先生娘ê面，也有吊tī老母房間hit個耶穌ê像ê面，攏顯現tī伊ê面前一人一嘴叫瑪莉若無祈禱m̄-thang食。 |
|
Má-lī soah tio̍h kiaⁿ, chiong i só͘ the̍h ê tī ka-la̍uh tī thô͘-kha, sòa háu chhut-lâi.
|
瑪莉煞著驚，將伊所提ê箸ka-落tī塗腳，續哮--出-來。 |
|
“A-ko͘ lí chhōa Má-lī khì pâng-keng.”
|
「阿姑，你chhōa瑪莉去房間。」 |
|
Khap-nî kóng. A-ko͘ chiū ēng hó-ōe lâi khoán-khǹg Má-lī, soah chhōa i chiūⁿ-lâu.
|
恰尼講。阿姑就用好話來款勸瑪莉，煞chhōa伊上樓。 |
|
“Chin-ní, chhiáⁿ lí tio̍h ūi-tio̍h góa tām-po̍h khoan-iông Má-lī, i iáu-kú sī chi̍t ê sòe-sòe ê gín-ná, lí hit-khoán ê thài-tō͘ sī bô jîn-tō.”
|
「珍妮，請你著為著我淡薄寬容瑪莉，伊iáu-kú是一個細細ê囡仔，你hit款ê態度是無仁道。」 |
|
Liáu-āu Khap-nî chin bô hoaⁿ-hí án-ni kóng.
|
了後恰尼真無歡喜án-ni講。 |
|
“Sím-mi̍h hō-chòe bô-jîn-tō? Lí koh ēng chit ê tio̍h-tak lâi hē tī góa ê kha-chêng, lí lóng sī beh hāi góa sí, góa choa̍t-tùi bô iông-ún Má-lī kap góa tâng-toh, lí nā sī bô beh siat-hoat góa chiah ka-kī siat-hoat.” Chin-ní e siaⁿ chhin-chhiūⁿ hoat-kông ê khoán, chin hiáng, tì-kàu tī lâu-téng ê Má-lī kap A-ko͘ lóng ū thiaⁿ-kìⁿ. Má-lī soah lóng bô koh háu, i tan-sûn ê sim kám-kak chi̍t-chióng chheⁿ-léng kiaⁿ-hiâⁿ.
|
「甚mi̍h號做無仁道？你koh用這個tio̍h-tak來下tī我ê腳前，你攏是beh害我死，我絕對無容允瑪莉kap我同桌，你若是無beh設法我chiah家己設法。」珍妮e聲親像發狂ê款，真響，致到tī樓頂ê瑪莉kap阿姑攏有聽見。瑪莉煞攏無koh哮，伊單純ê心感覺一種生冷驚惶。 |
|
Tùi chit ê sū liáu-āu Má-lī chiū kap lú-pī Na-lah kap chú-pn̄g ê A-peh, sóe-saⁿ ê A-ḿ tī tû-pâng ê lēng-gōa chia̍h-sek chia̍h-pn̄g. Chóng-sī Má-lī lóng bô lia̍h chit ê chò khó͘-sim, hoán-tńg tī hia ū chū-iû, ōe-thang kòe-sio̍k kám-siā kî-tó.
|
Tùi這個事了後瑪莉就kap女婢娜拉kap煮飯ê阿伯、洗衫ê阿姆tī廚房ê另外食室食飯。總--是瑪莉攏無掠這個做苦心，反轉tī hia有自由，會thang繼續感謝祈禱。 |
|
Má-lī ê seng-oa̍h lóng bô piàn-ōaⁿ, ta̍k-ji̍t lóng sī tī ka-kī ê pâng-keng ê thang-á piⁿ teh khòaⁿ kè-lō͘ teh óng-lâi ê lâng. Ū-sî nā chai A-kīm chhut-gōa khì thit-thô, i chiū kám-kak tām-po̍h pêng-an kap pàng-sim. Ū-sî soah chhut-lâi tī āu-bīn ê liâng-tâi khòaⁿ soaⁿ-kéng, hut-jiân nā siūⁿ-tio̍h i ê kò͘-hiong, i só͘ tòa ê to͘-chhī kap kàu-hōe, i ê lāu-bú, i só͘ bat hiah ê lâng, koh siūⁿ-tio̍h i hiān-chāi ê kéng-gū, bô chū-iû, kiaⁿ-hiâⁿ, ko͘-to̍k ê sî sòa siàu-liām hit ê lāu-bú ê heng-chêng, sim-chhiat lâi lâu ba̍k-sái. Hit ê só͘-chāi sī hô-téng khoài-lo̍k, pêng-an. Taⁿ lóng chiâⁿ-chò bāng-tiong ê sè-kài lah!
|
瑪莉ê生活攏無變換，逐日攏是tī家己ê房間ê窗仔邊teh看過路teh往來ê人。有時若知阿妗出外去thit-thô,伊就感覺淡薄平安kap放心。有時煞出來tī後面ê涼台看山景，忽然若想著伊ê故鄉，伊所tòa ê都市kap教會，伊ê老母，伊所bat hiah ê人，koh想著伊現在ê境遇，無自由、驚惶，孤獨ê時續數念hit個老母ê胸前，心切來流目屎。Hit個所在是何等快樂、平安。今攏成做夢中ê世界--lah！ |
|
Má-lī ê sim, tī chit ê kan-khó͘ ê hiān-si̍t chhiong-móa tio̍h su-liām.
|
瑪莉ê心，tī這個艱苦ê現實充滿著思念。 |
|
Góa ê Ma-ma tī tó-ūi? Góa ê Ma-ma tī hit pêng, Hn̄g-hn̄g pôaⁿ-kè soaⁿ, Hn̄g-hn̄g pôaⁿ-kè hái, Tī hia góa ê Ma-ma teh kiò góa, “Góa ê Má-lī, góa ê Má-lī!” Sím-mi̍h lâng beh chhōa góa khì.
|
我ê媽媽tī tó位？我ê媽媽tī hit爿，遠遠盤過山，遠遠盤過海，Tī hia我ê媽媽teh叫我，「我ê瑪莉，我ê瑪莉！」甚mi̍h人beh chhōa我去。 |
|
Chhin-ài ê lâm-hong, Lí chhōa góa khì hó-m̄? Chhin-ài ê chhek-chiáu, Lí chhōa góa khì hó-m̄? Góa ài chhōe góa ê Ma-ma,
|
親愛ê南風，你chhōa我去，好--m̄?親愛ê雀鳥，你chhōa我去，好--m̄?我ài chhōe我ê媽媽， |
|
Sui-jiân ji̍t-chí kòe-khì chiâⁿ pòaⁿ-nî, Má-lī ê sim iû-goân chhin-chhiūⁿ tī chá-ji̍t ê sū, lâi teh siàu-liām i ê lāu-bú kap kòe-khì ê seng-oa̍h.
|
雖然日子過去chiâⁿ半年，瑪莉ê心猶原親像tī早日ê事，來teh數念伊ê老母kap過去ê生活。 |
|
Nā-sī Chin-ní A-kīm ê bīn hō͘ Má-lī it-hoat kiaⁿ-ùi. Só͘-í A-kīm nā tī chhù-n̍i̍h ê sî, i liân chhut-siaⁿ to m̄-káⁿ, chí-ū bi̍h tī i ê ba̍t-pâng, óa tī hiòng tōa-lō͘ hit ê thang-á lâi khòaⁿ-lâng.
|
若是珍妮阿妗ê面hō͘瑪莉一發驚畏。所以阿妗若tī厝--n̍i̍h ê時，伊連出聲都m̄敢，只有bi̍h tī伊ê密房，倚tī向大路hit個窗仔來看人。 |
|
Ū chi̍t-ji̍t, Má-lī khòaⁿ-tio̍h tī lō͘-n̍i̍h ū chi̍t-tōa-tīn ê gín-ná teh chiau-that chi̍t-chia̍h káu-á kiáⁿ. Ūe teh that i, ū ê ēng chio̍h-thâu tìm i, ū ê kā i jiok. Hit chiah káu-á kiáⁿ iap i ê bóe khì bi̍h tī lō͘-piⁿ ê chhiū-thâu, gín-ná lóng hán-hoah kóng:
|
有一日，瑪莉看著tī路--n̍i̍h有一大陣ê囡仔teh蹧踢一隻狗仔子。有--ê teh踢伊，有--ê用石頭tìm伊，有--ê kā伊jiok。Hit隻狗仔子iap伊ê尾去bi̍h tī路邊ê樹頭，囡仔攏喊喝講： |
|
“Khit-chia̍h káu-á! Khit-chia̍h káu-á!” Hit chiah khó-lîn ê káu-á kiáⁿ cháu-lâi cháu-khì lóng bô só͘-chāi thang bi̍h. Má-lī thiaⁿ-tio̍h káu-á kiáⁿ teh háu ê siaⁿ, hō͘ i ê sim-lāi chin kan-khó͘.
|
「乞食狗仔！乞食狗仔！」Hit隻可憐ê狗仔子走來走去攏無所在thang bi̍h。瑪莉聽著狗仔子teh哮ê聲，hō͘伊ê心內真艱苦。 |
|
“Khó-lîn ê káu-á kiáⁿ! m̄-thang kā i khi-hū lah! gín-ná pêng-iú! m̄-thang lah!”
|
「可憐ê狗仔子！M̄-thang kā伊欺負--lah！囡仔朋友！M̄-thang lah！」 |
|
I ê sim hui-siông ê peh-pak, chóng-sī hit-chiah káu-á kiáⁿ kàu-bóe hō͘ in tui lâi kàu Má-lī só͘ tòa ê chhù chit-pêng, káu-á chiū cháu-ji̍p hit ê tōa-mn̂g lâi bi̍h tī chi̍t châng chhiū-kha, lóng bô koh háu. Hia ê gín-ná chiū bô hoat-tō͘ thang ji̍p hit ê koaiⁿ-ba̍t ê tōa-mn̂g, chí-ū tī hia teh tán. Āu-lâi chiū lóng tńg-khì.
|
伊ê心非常ê擘腹，總--是hit隻狗仔子到尾hō͘ in追來到瑪莉所tòa ê厝這爿，狗仔就走入hit個大門來bi̍h tī一欉樹腳，攏無koh哮。Hia ê囡仔就無法度thang入hit個關密ê大門，只有tī hia teh等。後--來就攏轉去。 |
|
Kàu hit ē-hng, Má-lī lóng bô lī-khui hit ê thang-á piⁿ, lâi teh khòaⁿ hit chiah káu-á kiáⁿ ū chhut-lâi á-bô. Nā-sī hit-chiah káu-á lóng bô koh chhut-lâi, iā lóng bô thiaⁿ-kìⁿ i teh háu ê siaⁿ. Tì-kàu Má-lī siūⁿ kóng i sī cháu-bô-khì.
|
到hit e昏，瑪莉攏無離開hit個窗仔邊，來teh看hit隻狗仔子有出來抑無。若是hit隻狗仔攏無koh出來，也攏無聽見伊teh哮ê聲。致到瑪莉想講伊是走無--去。 |
|
“Khó-liân ê káu-á tek-khak ōe hō͘ lâng phah-sí” Má-lī tī hit-mê soah ūi-tio̍h hit-chiah káu-á lâi kan-khó͘ sim lâu ba̍k-sái, “Chú Iâ-so͘ kiû lí tio̍h chiàu-kò͘ hit-chiah káu-á kiáⁿ” I iā án-ni lâi kî-tó. Kàu pòaⁿ-mê ê sî, Má-lī ū thiaⁿ-tio̍h hn̄g-hn̄g ê só͘-chāi ū káu-á teh háu ê siaⁿ. Má-lī chiū kín-kín khí-lâi thiaⁿ “???” Hit-chiah káu-á kiáⁿ kó͘-jiân bô cháu-bô-khì, sī bi̍h-teh, kàu pòaⁿ-mê lâng lóng teh khùn ê sî, káu-á chiah chin sòe-siaⁿ teh háu, kiaⁿ-liáu hō͘ lâng thiaⁿ-kìⁿ ê khoán.
|
「可憐ê狗仔的確會hō͘人扑死。」瑪莉tī hit暝煞為著hit隻狗仔來艱苦心流目屎，「主耶穌，求你著照顧hit隻狗仔子。」伊也án-ni來祈禱。到半暝ê時，瑪莉有聽著遠遠ê所在有狗仔teh哮ê聲。瑪莉就緊緊起來聽「？？？」Hit隻狗仔子果然無走無--去，是bi̍h--teh，到半暝人攏teh睏ê時，狗仔chiah真細聲teh哮，驚了hō͘人聽見ê款。 |
|
Má-lī ê sim chhin-chhiūⁿ hō͘ tiān-khì tiān-tio̍h chi̍t-iūⁿ lâi tio̍h-kip.
|
瑪莉ê心親像hō͘電氣電--著一樣來著急。 |
|
“Khó-lîn ê káu-á teh bô-phōaⁿ! káu-á pak-tó͘ teh iau! káu-á teh háu Ma-ma!”
|
「可憐ê狗仔teh無伴！狗仔腹肚teh枵！狗仔teh哮媽媽！」 |
|
Má-lī sòa háu chhut-lâi. Chin put-jím sim, iáu-kú tī chit ê pòaⁿ-mê bô ū pān-hoat. Kàu tī thiⁿ beh kng chiū lóng bô thiaⁿ-kìⁿ káu-á háu ê siaⁿ, chhin-chhiūⁿ cháu-bô-khì ê khoán.
|
瑪莉續哮--出來。真不忍心，iáu-kú tī這個半暝無有辦法。到tī天beh光就攏無聽見狗仔哮ê聲，親像走無--去ê款。 |
|
Chóng-sī Má-lī sé-bīn liáu-āu tī pâng-keng teh thit-thô ê sî, hut-jiân koh thiaⁿ-tio̍h hit-chiah káu-á tī lâu-ē hō͘ lâng phah teh háu ê siaⁿ. Má-lī kín-kín cháu-kàu liâng-tâi beh khòaⁿ-lo̍h lâu-ē. Tī hia Má-lī khòaⁿ-tio̍h Na-lah teh phah chi̍t-chia̍h pe̍h-sek ê sòe-chiah káu-á kiáⁿ.
|
總--是瑪莉洗面了後tī房間teh thit-thô ê時，忽然koh聽著hit隻狗仔tī樓下hō͘人扑teh哮ê聲。瑪莉緊緊走到涼台beh看落樓下。Tī hia瑪莉看著娜拉teh扑一隻白色ê細隻狗仔子。 |
|
“Thái-ko káu, chhut-khì lah! m̄-chhut-khì beh phah hō͘ lí sí!” Má-lī ê sim chin m̄-kam, chiū tùi lâu-téng lâi chhut-siaⁿ. “Na-lah A-ché! m̄-thang kāi phah lah! Khó-lîn ê káu-á kiáⁿ m̄-thang kā i phah lah!” Iáu-kú káu-á ê siaⁿ kaiⁿ-kaiⁿ háu hō͘ Má-lī ê siaⁿ lóng bô kàu lâu-ē.
|
「Thái-ko狗，出去--lah！M̄出去beh扑hō͘你死！」瑪莉ê心真m̄甘，就tùi樓頂來出聲。「娜拉阿姐！M̄-thang kā伊扑--lah！可憐ê狗仔子m̄-thang kā伊扑--lah！」Iáu-kú狗仔ê聲kaiⁿ-kaiⁿ哮hō͘瑪莉ê聲攏無到樓下。 |
|
“Khit-chia̍h káu, m̄-thang hō͘ i ji̍p-lâi lāi-bīn, tio̍h kā phah hō͘ sí.”
|
「乞食狗，m̄-thang hō͘伊入來內面，著kā扑hō͘死。」 |
|
Hut-jiân tû-pâng ê A-peh chhut-lâi, chiū ēng ie kha lâi tōa-la̍t that hit-chiah káu-á kiáⁿ.
|
忽然廚房ê阿伯出來，就用伊ê腳來大力踢hit隻狗仔子。 |
|
“Ah!”
|
「Ah！」 |
|
Má-lī in-ūi kiaⁿ-hiâⁿ sòa ng ba̍k-chiu m̄-káⁿ khòaⁿ.
|
瑪莉因為驚惶續掩目珠m̄敢看。 |
|
“Chú ah, kiû Lí kiù hit-chiah káu-á!”
|
「主--ah！求你救hit隻狗仔！」 |
|
Káu-á lóng bô háu, Má-lī ê sim chin tio̍h-kip,“Kiám ōe sí-khì???”
|
狗仔攏無哮，瑪莉ê心真著急，「Kiám會死--去？？？」 |
|
“Sí-khì lah! soah bōe tín-tāng” Ū thiaⁿ-kìⁿ Na-lah ê siaⁿ tī lâu-ē án-ni kóng, “Na-lah lí kín-kín ēng pùn-ki kā i put-khì āu-bīn tâi.” iā ū A-peh ê siaⁿ án-ni kóng.
|
「死去--lah！煞bōe振動」有聽見娜拉ê聲tī樓下án-ni講。「娜拉你緊緊用畚箕kā伊put去後面埋。」也有阿伯ê聲án-ni講。 |
|
Má-lī thiaⁿ-tio̍h chia ê ōe ê sî, i chhin-chhiūⁿ tio̍h-kiaⁿ kap siong-sim kàu beh o͘-àm-hîn soah tó-lo̍h-khì. Má-lī khui i ê ba̍k-chiu khòaⁿ ê sî, Na-lah í-keng chiong káu-á kiáⁿ khǹg-tī pùn-ki-tiong beh put-khì tâi. Hit-sî Má-lī lóng bô siūⁿ-tio̍h sím-mi̍h,chí-ū ióng-kám tùi lâu-téng ti̍t-ti̍t cháu-kàu lâu-ē lâi beh ai-kiû Na-lah m̄-thang tâi hit-chiah káu, in-ūi i sim iáu-kú ǹg-bāng káu-á ōe koh oa̍h khí-lâi.
|
瑪莉聽著chiah ê話ê時，伊親像著驚kap傷心到beh烏暗眩煞倒--落去。瑪莉開伊ê目珠看ê時，娜拉已經將狗仔子囥tī畚箕中beh put去埋。Hit時瑪莉攏無想著甚mi̍h，只有勇敢tùi樓頂直直走到樓下來beh哀求娜拉m̄-thang埋hit隻狗，因為伊ê心iáu-kú向望狗仔會koh活--起來。 |
|
“Na-lah A-ché, chhiáⁿ lí m̄-thang tâi hit-chiah káu-á kiáⁿ! Na-lah A-ché, chhiáⁿ lí kiù káu-á lah.”
|
「娜拉阿姐，請你m̄-thang埋hit隻狗仔子！娜拉阿姐，請你救狗仔--lah。」 |
|
Má-lī tui-kàu Na-lah ê sî, chiū thoa i ê saⁿ lâi kiû i. Nā-sī Na-lah soah tōa-siaⁿ hoah i, soah chiong i ōe-tó tī tōe-n̍i̍h.
|
瑪莉追到娜拉ê時，就拖伊ê衫來求伊。若是娜拉煞大聲喝伊，煞將伊ōe倒tī地--n̍i̍h。 |
|
“Chit-ê khit-chia̍h gín-ná, lí teh kóng sím-mi̍h! Khì-lah, bô lí ê koan-hē lah!”
|
「這個乞食囡仔，你teh講甚mi̍h！去--lah，無你ê關係--lah！」 |
|
“Khit-chia̍h gín-ná!” Má-lī thiaⁿ-tio̍h chit ê siaⁿ,koh siūⁿ-tio̍h hit-chiah káu-á kiáⁿ ê sî, soah in-ūi siong-pi lâi háu. I kín-kín chiūⁿ-lâu, tò-tńg kàu i ê pâng-keng lâi tó teh háu.
|
「乞食囡仔！」瑪莉聽著這個聲，koh想著hit隻狗仔子ê時，煞因為傷悲來哮。伊緊緊上樓，倒轉到伊ê房間來倒teh哮。 |
|
Má-lī thong-ji̍t lóng chin iu-siong, i ê sim longs2? teh siūⁿ hit-chiah khó-lîn ê káu-á, liân chia̍h-pn̄g ê sî i iā teh siūⁿ. Má-lī khòaⁿ Na-lah kap A-peh soah chin-kiaⁿ, kám-kak chit lāi-bīn ê lâng lóng sī chin koh-iūⁿ, koh thang kiaⁿ. Má-lī teh chia̍h pn̄g ê sî lóng m̄-káⁿ khòaⁿ in ê bīn. I siūⁿ chhut ū chit-khoán chân-jím ê lâng, chiong hit ê sòe-sòe ê oa̍h-miā lâi that hō͘ i sí, si̍t-chāi sī chin thang kiaⁿ ê sè-kài.
|
瑪莉通日攏真憂傷，伊ê心攏是teh想hit隻可憐ê狗仔，連食飯ê時伊也teh想。瑪莉看娜拉kap阿伯煞真驚，感覺這內面ê人攏是真各樣，koh thang驚。瑪莉teh食飯ê時攏m̄敢看in ê 面。伊想出有這款殘忍ê人，將hit個細細ê活命來踢hō͘伊死，實在是真thang驚ê世界。 |
|
Hit ē-po͘, ta̍k-lâng lóng teh hioh tiong-tàu ê sî, Má-lī chiū lo̍h-lâi chêng-tiâⁿ, bán 2, 3 lúi ê chháu-hoe, siūⁿ beh khì thàm-hóng hit-chiah khó-lîn ê káu-á ê bōng. I chiū khì kàu āu-bīn ê kóe-chí hn̂g lâi beh chhōe hit ê káu-á bōng. Chhiū-á kha chhōe-lâi chhōe-khì lóng bô khòaⁿ-kìⁿ hit ê bōng ê só͘-chāi. Má-lī chhōe-kàu ba̍k-tâm ba̍k jiân Má-lī khòaⁿ-tio̍h chit ê kong-kéng hō͘ i chin tio̍h-kiaⁿ koh tōa hoaⁿ-hí. I khòaⁿ-kìⁿ tī chi̍t-châng iûⁿ-tô chhiū-kha ê pùn-sò tui ê téng-bīn, ū chi̍t ê pùn-ki, tī hit lāi-bīn ū chē chi̍t-chiah káu-á, káu-á ê ba̍k-chiu îⁿ-îⁿ teh khòaⁿ Má-lī. I chē chin sì-chiàⁿ hit ê khoán-sit chhin-chhiūⁿ tùi tāng-bîn khùn-chhíⁿ ê gín-ná chi̍t-iūⁿ.
|
Hit e晡，逐人攏teh hioh中晝ê時，瑪莉就落來前埕，挽2、3蕊ê草花，想beh去探訪hit隻可憐ê狗仔ê墓。伊就去到後面ê果子園來beh chhōe hit個狗仔墓。樹仔腳chhōe來chhōe去攏無看見hit個墓ê所在。瑪莉chhōe到目tâm目滴也chhōe無。瑪莉到尾有chhōe到後面ê所在去。忽然瑪莉看著這個光景hō͘伊真著驚koh大歡喜。伊看見tī一叢楊桃樹腳ê糞圾堆ê頂面，有一個畚箕，tī hit內面有坐一隻狗仔，狗仔ê目珠圓圓teh看瑪莉。伊坐真四正hit個款式親像tùi重眠睏醒ê囡仔一樣。 |
|
“Hǹg! Chia koh ū chi̍t ê cha-bó͘ gín-ná tī chia teh chhòng sím-mi̍h?” Káu-á ê ba̍k-chiu chhin-chhiūⁿ án-ni kóng. Má-lī chiong i ê hoe ka-la̍uh tī tōe-n̍i̍h, cháu-kàu káu-á ê só͘-chāi chiū kā i phō tī heng-chêng lâi sioh i.
|
「Hǹg!Chia koh有一個查某囡仔tī chiateh創甚mi̍h？」狗仔ê目珠親像án-ni講。瑪莉將伊ê花ka落tī地--n̍i̍h,走到狗仔ê所在就kā伊抱tī胸前來惜伊。 |
|
“Kai-chài bô-sí. Kám-siā Chú!” Má-lī ê sim chin hoaⁿ-hí, chiū kūi-teh gia̍h-ba̍k lâi kám-siā. Iáu-kú i kiaⁿ-liáu chhù-n̍i̍h ê lâng chai-iáⁿ chit ê sū, chiū-sī káu-á bô sí-khì ê sū, chiū kóaⁿ-kín phō káu, cháu-kàu hn̄g-hn̄g àm-sàm ê āu-bīn khì, sī kiaⁿ-liáu in koh lâi hāi-sí chit-chiah káu-á.
|
「佳哉無死。感謝主！」瑪莉ê心真歡喜，就跪teh gia̍h目來感謝。Iáu-kú伊驚了厝--n̍i̍h ê人知影這個事，就是狗仔無死去ê事，就趕緊抱狗，走到遠遠暗sàm ê後面去，是驚了in koh來害死這隻狗仔。 |
|
“Khó-lîn ê káu-á, lí kín-kín cháu-khì, m̄-thang lâi chit ê só͘-chāi, nā lâi lí chiū ōe hō͘ lâng phah-sí, kín-kín cháu chhut-khì!” Má-lī khòaⁿ bô lâng tī hit ê āu-bīn lō͘ ê sî, kóaⁿ-kín pàng káu-á khì. Káu-á chhin-chhiūⁿ chai Má-lī ê ì-sù, chiū kín-kín cháu-khì. Má-lī khiā-tī mn̂g-kháu lâi khòaⁿ káu-á ê āu-bīn. I ê sim chin peh-pak, chiū sim-lāi koh ūi-tio̍h káu-á kî-tó. Chóng-sī káu-á cháu-kàu chi̍t-tīn gín-ná ê sin-piⁿ kòe-khì ê sî gín-ná soah kā i jiok, ēng chhôe-á phah i, kàu chi̍t ê lāu-lâng ê sin-piⁿ kòe,hit ê lāu-lâng soah iā ēng kha that i. Cháu-lâi cháu-khì lóng hō͘ lâng phah. Má-lī khòaⁿ-tio̍h chit ê chêng hêng, chiū kín-kín cháu-khì.
|
「可憐ê狗仔，你緊緊走去，m̄-thang來這個所在，若來你就會hō͘人扑死，緊緊走--出去！」瑪莉看無人tī hit個後面路ê時，趕緊放狗仔去。狗仔親像知瑪莉ê意思，就緊緊走去。瑪莉企tī門口來看狗仔ê後面。伊ê心真擘腹，就心內koh為著狗仔祈禱。總--是狗仔走到一tīn囡仔ê身邊過去ê時，囡仔煞kā伊jiok，用箠仔扑伊，到一個老人ê身邊過，hit個老人煞也用腳踢伊。走來走去攏hō͘人扑。瑪莉看著這個情形，就緊緊走--去。 |
|
“M̄-thang kā i phah.” Má-lī jiok-kàu ê sî chiū phō chit-chiah bô lâng ài ê káu-á, koh tò-tńg lâi tī hit ê āu-bīn ê hn̂g-lāi. Má-lī lám-óa káu-á chē tī hit ê àm-sàm ê chháu-á téng lâi ka-kī thó͘-khùi, iu-siong.
|
「M̄-thang kā伊扑。」瑪莉jiok到ê時就抱這隻無人ài ê狗仔，koh倒轉來tī hit個後面ê園內。瑪莉攬倚狗仔坐tī hit個暗sàm ê草仔頂來家己吐氣，憂傷。 |
|
“Khó-lîn ê káu-á lí ê chhù tī tó-ūi? Lí chiah-n̍i̍h sán, sī bô chia̍h pn̄g tio̍h-m̄? Lóng bô chi̍t ê lâng thang khó-lîn lí tio̍h-m̄? Bô iàu-kín Iâ-so͘ beh pó-hō͘ lán. Taⁿ góa chhōa lí khí-lâi góa ê pâng-keng, lí tio̍h m̄-thang háu, nā-bô lí tek-khak ōe hō͘ lâng phah-sí. Má-lī chiū chiong káu-á pau-tī i ê saⁿ-á-lāi, khòaⁿ lâng bô tī āu-bīn tiâⁿ ê sî, chiū kín-kín cháu-kàu i ê pâng-keng, soah chiong mn̂g koaiⁿ khí-lâi. Má-lī hō͘ káu-á chē tī i ê bîn-chhn̂g kha, sim-lāi khiok hui-siông put-an. Hit chi̍t ē-po͘ Má-lī lóng kap káu-á thit-thô. Má-lī tī ē-hng ê sî chiū khiām i ê pn̄g lâi hō͘ káu-á chia̍h. Má-lī put-chí sió-sim lâi chiàu-kò͘ i.
|
「可憐ê狗仔，你ê厝tī tó位？你chiah-n̍i̍h瘦，是無食飯，著--m̄?攏無一個人thang可憐你，著--m̄?無要緊耶穌beh保護咱。今我chhōa你起來我ê房間，你著m̄-thang哮，若無你的確會hō͘人扑--死。」瑪莉就將狗仔包tī伊ê衫仔內，看人無tī後面埕ê時，就緊緊走到伊ê房間，續將門關起來。瑪莉hō͘狗仔坐tī伊ê眠床腳，心內卻非常不安。Hit一e晡瑪莉攏kap狗仔thit-thô。瑪莉tī e昏ê時，就儉伊ê飯來hō͘狗仔食。瑪莉不止小心來照顧--伊。 |
|
Chóng-sī kàu hit-mê káu-á chiū háu beh chhut-khì. Má-lī chin-kiaⁿ lâng chai chit ê sū, chiū khui mn̂g hō͘ káu-á chhut-khì. Nā-sī káu-á tī tōa-thiaⁿ, kap liâng-tâi se̍h-lâi se̍h-khì, kaiⁿ-kaiⁿ háu soah pàng lâ-sâm tī tōa-thiaⁿ. An-ná A-ko͘ khí-lâi ê sî chiū tōa-kiaⁿ, chiū kiò Má-lī chhut-lâi.
|
總--是到hit暝狗仔就哮beh出去。瑪莉真驚人知這個事，就開門hō͘狗仔出去。若是狗仔tī大廳，kap涼台se̍h來se̍h去，kaiⁿ-kaiⁿ哮煞放lâ-sâm tī大廳。安娜阿姑起來ê時就大驚，就叫瑪莉出來。 |
|
“Má-lī chit-chiah káu-á lí chhōa ji̍p-lâi tio̍h-m̄?” “Lí ōe hō͘ lí ê A-kīm phah-sí, kín-kín chhōa chhut-khì pàng-seⁿ!” A-ko͘ chai chit ê sī Má-lī ê só͘-chòe,chiū thòe Má-lī chin hoân-ló. Má-lī kín-kín phō káu-á tī i ê heng-chêng, chhin-chhiūⁿ bōe-thang pàng-sak i ê khoán. “A-ko͘ chhiáⁿ lí iông-ún chit-chiah káu-á kap góa tòa, in-ūi i sī bô chhù ê káu-á!”
|
「瑪莉，這隻狗仔你chhōa入來著--m̄?」「你會hō͘你ê阿妗扑死，緊緊chhōa出去放生！」阿姑知這個是瑪莉ê所做，就替瑪莉真煩惱。瑪莉緊緊抱狗仔tī伊ê胸前，親像bōe-thang放sak伊ê款。「阿姑，請你容允這隻狗仔kap我tòa,因為伊是無厝ê狗仔！」 |
|
Má-lī tùi i ê sim-lāi ai-kiû. Chóng-sī hit-sî lâu-ē ū Chin-ní ê siaⁿ teh óa-lâi.
|
瑪莉tùi伊ê心內哀求。總--是hit時樓下有珍妮ê聲teh倚來。 |
|
“An-ná A-ko͘! Sím-mi̍h lâng lia̍h káu-á khí-lâi lâu-téng?” An-ná A-ko͘ chin tio̍h-kip, sûi-sî binsit7-sek. I kiaⁿ-liáu Má-lī ōe tú-tio̍h sím-mi̍h tāi-chì, in-ūi Khap-nî bô tńg-lâi Chin-ní ê sim tú-tú sī put-chí àu-náu. A-ko͘ siūⁿ beh kín-kín lâi put hit ê lâ-sâm ê sî, Chin-ní í-keng khí-lâi, chhut-hiān tī Má-lī kap A-ko͘ ê bīn-chêng.
|
「安娜阿姑！甚mi̍h人掠狗仔起來樓頂？」安娜阿姑真著急，隨時面失色。伊驚了瑪莉會tú著甚mi̍h代誌，因為恰尼無轉來珍妮ê心tú-tú是不止懊惱。阿姑想beh緊緊來put hit個lâ-sâm ê時，珍妮已經起來，出現tī瑪莉kap阿姑ê面前。 |
|
A-kīm khòaⁿ-kìⁿ Má-lī phō chit-chiah thái-ko káu-á, koh khòaⁿ-kìⁿ bīn-chêng ū ú-òe ê sî, i ê bīn chiū chhin-chhiūⁿ hóe hoat chhut-lâi.
|
阿妗看見瑪莉抱這隻thái-ko狗仔，koh看見面前有污穢ê時，伊ê面就親像火發--出來。 |
|
“A-ko͘, lí án-chóaⁿ iông-ún chit ê khit-chia̍h gín-ná phō chit-chiah lah-sap káu khí-lâi chia lah! Ai-ah, góa ê ke bêng-bêng sī teh-beh pāi lah!”
|
「阿姑，你án-chóaⁿ容允這個乞食囝仔抱這隻垃圾狗起來chia-- lah！唉--ah！我ê家明明是teh-beh敗--lah！」 |
|
“Na-lah! Na-lah! kín khí-lâi, chiong chit ê khit-chia̍h gín-ná kap khit-chia̍h káu kóaⁿ chhut-khì āu-bīn lah!” Chin-ní ê siaⁿ chhin-chhiūⁿ kông-hong chin siū-khì. I chiū cháu-kàu lâu-kha khì kiò Na-lah lâi.
|
「娜拉！娜拉！緊起來，將這個乞食囡仔kap乞食狗趕出去後面lah！」珍妮ê聲親像狂風真受氣。伊就走到樓腳去叫娜拉來。 |
|
Má-lī thiaⁿ-tio̍h chit ê thang kiaⁿ ê A-kīm teh jióng, teh âu-kiò ê sî i ê sin-khu in-ūi kiaⁿ-hiâⁿ khū-khū-chhoah, i kám-kak chhù-lāi it-chhè lóng sī thang kiaⁿ. Iáu-kú i bô pàng-sak hit-chiah káu-á, i koh-khah chhut-la̍t lám i tī i ê heng-chêng. Chin-ní A-kīm soah tī i ê pâng-keng teh tōa-siaⁿ háu.
|
瑪莉聽著這個thang驚ê阿妗 teh嚷，teh喉叫ê時，伊ê身軀因為驚惶khū-khū-chhoah，伊感覺厝內一切攏是thang驚。Iáu-kú伊無放sak hit隻狗仔，伊koh較出力攬伊tī伊ê胸前。珍妮阿妗煞tī伊ê房間teh大聲哮。 |
|
Na-lah chiū beh tùi Má-lī ê chhiú lâi chhiúⁿ hit-chiah káu. Chóng-sī Má-lī phoe-miā lâi beh pó-hō͘ i, in ūi siūⁿ kóng Na-lah tek-khak ōe phah-sí hit-chiah káu.
|
娜拉就beh tùi瑪莉ê手來搶hit隻狗。總--是瑪莉phoe命來beh保護伊，因為想講娜拉的確會扑死hit隻狗。 |
|
“Na-lah A-ché, m̄-thang phah-sí lah, chit-chiah sig7oa ê káu lah” Má-lī lâu ba̍k-sái lâi ai-kiû. Nā-sī Na-lah iā bô iông-ún, i chhut-la̍t phah-tó Má-lī tī thô͘-kha lâi beh kiông-chhiúⁿ hit-chiah káu-á.
|
「娜拉阿姐，m̄-thang扑死--lah，這隻是我ê狗--lah」瑪莉流目屎來哀求。若是娜拉也無容允，伊出力扑倒瑪莉tī塗腳來beh強搶hit隻狗仔。 |
|
“Ma-ma! Ma-ma lâi kiù goán lah!” Má-lī chiū tōa-siaⁿ ho͘-kiù Ka-liân.
|
「媽媽！媽媽來救阮--lah！」瑪莉就大聲呼救嘉蓮。 |
|
“Má-lī, Má-lī chit-chiah m̄-hó lah, lí kín-kín pàng-khì, lán bōe-sái tī chit ê só͘-chāi chhī káu-á, lí tio̍h pàng-khì!” An-ná chiū ēng hó-ōe lâi beh pang-chān Má-lī khì-sak káu-á. Chóng-sī Má-lī chí-ū chi̍t-sim beh pó-hō͘ káu-á ê sìⁿ-miā.
|
「瑪莉，瑪莉這隻m̄好--lah，你緊緊放去，咱bōe使tī這個所在飼狗仔，你著放去！」安娜就用好話來 beh幫贊瑪莉棄sak狗仔。總是瑪莉只有一心beh保護狗仔ê生命。 |
|
Hut-jiân Chin-ní chhōa A-peh lâi. Kiò A-peh chiong Má-lī kap káu-á phō chhut-khì. A-peh chiū phō Má-lī chhut-khì. Chin-ní sòa bēng-lēng Na-lah chiong Má-lī ê pâng-keng ê mi̍h-kiāⁿ the̍h chhut-khì āu-bīn, sòa chiong i ê pâng-keng só khí-lâi.
|
忽然珍妮chhōa阿伯來。叫阿伯將瑪莉kap狗仔抱出去。阿伯就抱瑪莉出去。珍妮續命令娜拉將瑪莉ê房間ê物件提出去後面，續將伊ê房間鎖--起來。 |
|
“Chin-ní, lí sī beh hō͘ Má-lī khì tó-ūi?” A-ko͘ chiū tio̍h-kiaⁿ lâi mn̄g Chin-ní.
|
「珍妮，你是beh hō͘瑪莉去tó位？」阿姑就著驚來問珍妮。 |
|
“Góa taⁿ bōe-thang iông-ún i tī góa ê chhù-lāi”
|
「我今bōe-thang容允伊tī我ê厝內」 |
|
“Lí sī beh kā i kóaⁿ-khì tó-ūi? Má-lī hiah-n̍i̍h sòe-hàn kiám ū lō͘ thang khì tio̍h m̄!! Lí tio̍h siūⁿ-khòaⁿ, m̄-thang án-ni chò!”
|
「你是beh kā伊趕去tó位？瑪莉hiah-n̍i̍h細漢kiám有路 thang去，著--m̄!！你著想看，m̄-thang án-ni做！」 |
|
“A-ko͘, lí m̄-bián kan-sia̍p góa!”
|
「阿姑，你m̄免干涉我！」 |
|
Chin-ní sòa pìⁿ-bīn lâi tùi An-ná ìn. An-ná chiū ji̍p-khì i ê pâng-keng lâi háu.
|
珍妮續變面來tùi安娜應。安娜就入去伊ê房間來哮。 |
|
A-peh phō Má-lī kàu āu-bīn tiâⁿ ê chi̍t-keng phòa chháu-chhù, chiong Má-lī kap káu-á lâi hiat-ji̍p tī hit lāi-bīn ê chháu-á-tui.
|
阿伯抱瑪莉到後面埕ê一間破草厝，將瑪莉kap狗仔來hiat入tī hit內面ê草仔堆。 |
|
“Taⁿ lí tio̍h ài tòa chia” A-peh án-ni kóng, chiū koaiⁿ hit ê mn̂g chhut-khì. Koh Na-lah soah tùi hit-ê thang-á hiat-ji̍p Má-lī ê saⁿ kap ê, koh kóng,
|
「今你著ài tòa chia。」阿伯án-ni 講，就關hit個門出去。Koh娜拉續tùi hit個窗仔hiat入瑪莉ê衫kap鞋，koh講： |
|
“Iâ-so͘ gín-ná, chhiáⁿ lí kap lí ê khit-chia̍h káu tòa chit só͘-chāi, bô lâng beh koh kā lín pun-khui.”
|
「耶穌囡仔，請你kap你ê乞食狗tòa這所在，無人beh koh kā lín分開。」 |
|
Má-lī phō káu-á tó tī tiū-chháu ê téng-bīn. Chi̍t-sim kám-kak tio̍h chin hoaⁿ-hí, in-ūi ōe-thang kiù-tio̍h káu-á. Chi̍t-sim kám-kak tio̍h chin put-an, in-ūi chit-keng chhù sī put-chí lâ-sâm koh thang-kiaⁿ, lāi-bīn sī o͘-o͘ àm-àm, chin-chē phòa koh pháiⁿ ê mi̍h-kiāⁿ khǹg tī hit ê lāi-bīn.
|
瑪莉抱狗仔倒tī稻草ê頂面。一心感覺著真歡喜，因為會thang救著狗仔。一心感覺著真不安，因為這間厝是不止lâ-sâm koh thang驚，內面是烏烏暗暗，真濟破koh歹ê物件囥tī hit個內面。 |
|
“Khó-lîn ê káu-á, lí tit-tio̍h kiù lah! Lán tī chit ê só͘-chāi bô lâng ōe koh hāi lán lah!”
|
「可憐ê狗仔，你得著救--lah！咱tī這個所在無人會koh害咱--lah！」 |
|
Má-lī chiū ēng chhiú bong káu-á ê thâu-khak. Má-lī ê thiàⁿ-sim chhin-chhiūⁿ ū thàu-ji̍p tī káu-á ê sim, chiū hoaⁿ-hí thó͘-chhut i ê chi̍h8 lâi chīⁿ Má-lī ê chhiú.
|
瑪莉就用手摸狗仔ê 頭殼。瑪莉ê疼心親像有透入tī狗仔ê心，就歡喜吐出伊ê舌來chīⁿ瑪莉ê手。 |
|
Má-lī kám-kak tio̍h chit ê só͘-chāi tú-hó thang pó-hō͘ in nn̄g lâng bô i-óa ê sìⁿ-miā. I khòaⁿ choân sè-kài lóng-sī thang-kiaⁿ ê sè-kài. Tī chit ê bô lâng kiâⁿ-kàu àm-sàm ê phòa-chhù tú-hó sī Má-lī kap káu-á thang tô-siám sè-kài chân-jím ê lâng ê só͘-chāi, chit-khoán ê kám-kak chiū am-ba̍t i it-chhè ê put-an.
|
瑪莉感覺著這個所在tú好thang保護in兩人無依倚ê生命。伊看全世界攏是thang驚ê世界。Tī這個無人行到暗sàm ê破厝tú好是瑪莉kap狗仔thang逃閃世界殘忍ê人ê所在，這款ê感覺就掩密伊一切ê不安。 |
|
Só͘-í sui-jiân kàu hit ē-po͘ lóng bô chia̍h, iáu-kú Má-lī lóng bô kám-kak tio̍h kan-khó͘. I in-ūi ià-siān soah khùn tī hit ê tiū-chháu téng, káu-á iā tiī ê sin-piⁿ teh khùn. Tùi thang-á ū chi̍t-tiâu ê kng-sòaⁿ chiò tī Má-lī ê bīn.
|
所以雖然到hit e晡攏無食，iáu-kú瑪莉攏無感覺著艱苦。伊因為厭siān煞睏tī hit個稻草頂，狗仔也tī伊ê身邊teh睏。Tùi窗仔有一條ê光線照tī瑪莉ê面。 |
