Sin chong-kàu
|
新宗教 |
| Lâu Kî-súi |
劉奇水 |
|
Tī Oa̍t-lâm lâm-pō͘ ê kau-chí(交趾) ê só͘-chāi, ū chi̍t ê sin-heng ê chong-kàu, kiò-chò Ko-tâi-kàu (高台教) ū 150 bān ê sìn-tô͘.
|
Tī越南南部ê交趾ê所在，有一個新興ê宗教，叫做高台教，有150 萬ê信徒。 |
|
Ko-tâi-kàu ê siat-li̍p sī A. D. 1926 nî. Tùi chi̍t lâng, miâ Ńg Bûn-kiû (阮文裘) só͘ chhòng-siat--ê, Ńg Bûn-kiû tī 1919 nî, chū-chheng Ko-tâi-jîn, siông-siông siū sîn ê kám-tiàu, 1925 nî tī Se-kòng (西貢), tī chi̍t pái kong-bū jîn-oân chi̍p-hōe tiong, chiūⁿ-tâng lâi kóng, I sī Tiong-kok ê si-jîn Lí Thài-pe̍k (李太白) lâi hián-sèng, kóng, “Ko-tâi sī ú-tiū ê Chú.” Lí Thài-pe̍k khó͘-khǹg chham-ka ê lâng, tio̍h siông-siông kap Ńg Bûn-kiû chiap-chhiok, tùi i lâi chí-sī kàu-gī, lâi cho͘-chit ê sin ê chong-kàu, kiò-chò Hoān-kong-tek (范公德).
|
高台教ê設立是 A. D. 1926 年。Tùi一人，名阮文裘所創設--ê, 阮文裘tī 1919年，自稱高台人，常常受神ê感召，1925年tī西貢，tī一擺公務人員集會中，上tâng來講，伊是中國ê詩人李太白來顯聖，講：「高台是宇宙ê主。」李太白苦勸參加ê人，著常常kap 阮文裘接觸，tùi伊來指示教義，來組織ê新ê宗教，叫做范公德。 |
|
Ko-tâi-kàu tī Se-kòng sêng-li̍p í-āu, thoân-pò͘ hui-siông kín, 20 gōa nî kú, in ê sìn-tô͘ í-keng ū 150 bān lâng. In jīn “Sù-hái kai hiaⁿ-tī.” Chú-tiuⁿ lâng sí-āu lûn-hôe choán-sè, chong-siōng ài bu̍t, kìm-chí sat-seng, thê-chhiòng chū-chè chō͘-jîn. In ê kàu-tiâu kap kài-lu̍t, m̄-sī tùi kó͘-tāi ê tù-chok the̍h-lâi--ê, sī tùi Tiong-sè-kí Hoat-kok kap Oa̍t-lâm ê bêng-tù chhau chhut--lâi-ê, nā ū sìn-tô͘ hoat-chhut gî-būn, thang tùi só͘ chí-tēng 12 chéng ê goân-su khì chhōe kái-tap.
|
高台教tī西貢設立以後，傳播非常緊，20外年久，in ê信徒已經有150 萬人。In 認「四海皆兄弟。」主張人死後輪迴轉世，崇尚愛物，禁止殺生，提倡自濟助人。In ê教條kap誡律，m̄是 tùi古代ê著作提來--ê,是tùi 中世紀法國kap 越南ê名著抄--出來ê,若有信徒發出疑問，thang tùi所指定12種ê原書去chhōe 解答。 |
|
Ko-tâi hiān-sî ê kàu-chú, kong-khai khip-siu Hu̍t-kàu, Tō-kàu, Jû-kàu kap Ki-tok-kàu ê kàu-gī, tông-sî iā sìn-hōng chiah ê chong-kàu ê kàu-chú. In ūi kui-tēng it-tēng ê sî-kan kî-tó. Ko-tâi ê léng-siù kóng, “Goán ê sim-lêng ū siū-tio̍h kiâⁿ sé-lé Iok-hān, Sng Tiong-san Sian-seⁿ, Khêng-a-hu-khek (施洗約翰、孫中山先生、瓊阿夫克) ê sé-lé. Chit ê chong-kàu ū chèng-tī-tek ê sek-chhái tī-teh.
|
高台現時ê教主，公開吸收佛教、道教、儒教、kap 基督教ê教義，同時也信奉chiah ê宗教ê教主。因為規定一定ê時間祈禱。高台ê領袖講：「阮ê心靈有受著行洗禮約翰，孫中山先生，Khêng-a-hu-khek(施洗約翰、孫中山先生、瓊阿夫克)ê 洗禮。」這個宗教有政治的ê 色彩tī--teh。 |
|
(Tâi-oân Kàu-hōe Kong-pò tē 799 hō, 1955 nî 7 ge̍h)
|
(台灣教會公報第799號，1955年7月) |
