Chhì-á-lāi ê pek-ha̍p-hoe_04
|
刺仔內ê百合花_04 |
| Lōa Jîn-seng |
賴仁聲 |
|
7
|
7 |
|
IV. Loân-ài kap kiat-hun.
|
四、戀愛kap結婚。 |
|
1. Sím-mi̍h kiò-chòe “Loân-ài”?
|
1、甚物叫做「戀愛」？ |
|
Hun-in sī Siōng-tè só͘ phòe-ha̍p, lâm tōa ài chhōa, lú tōa ài-kè, tùi án-ni chiah ē chiâⁿ-ke chiâⁿ-sek. Lâm lú kiat-hun kì-jiân sī jîn-seng pit-jiân ê sū, ta̍k-lâng khòaⁿ chòe eng-kai chīn ê jîn-lûn, (tû sin-thé phòa-siùⁿ, kap te̍k-pia̍t iú-só͘-kám, m̄-kè m̄-chhōa ê lâng í-gōa). Nā-sī án-ni loân-ài chiū cháiⁿ-iūⁿ?
|
婚姻是上帝所配合，男大ài娶、女大ài嫁，tùi án-ni 才會成家，成室。男女結婚既然是人生必然ê 事，逐人看做應該盡ê人倫，（除身體破siùⁿ，kap特別有所感，m̄嫁 m̄娶e人以外）。若是án-ni 戀愛就怎樣？ |
|
“Loân-ài” chit kù ōe hong-kiàn su-siúⁿ ê lâng thiaⁿ liáu chin ài-chhiò, chin khòaⁿ-khin, sim-chì ū lâng siūⁿ chòe chin kiàn-siàu, ū ê sòa siūⁿ chòe put-eng-kai kóng, sī chōe-ok. Si̍t-chāi sī tōa chhò-gō͘. Tāi-khài sī in-ūi lâng bô bêng-pe̍k loân-ài sī sím-mi̍h chiah án-ni. Kî-si̍t loân-ài che-sī hu-hū īⁿ-sèng ê tiong-kan pit-jiân tio̍h ū ê sū, nā bô, hu-hū ê koan-hē sī bē-tit thang sêng-li̍p.
|
「戀愛」這句話，封建思想ê 人聽了真愛笑、真看輕，甚至有人想做真見笑，有ê 煞想做不應該講，是罪惡。實在是大錯誤！大概是因為人無明白戀愛是甚物才án-ni。其實戀愛che 是夫婦異性ê 中間必然著有ê 事；若無，夫婦ê 關係是bē 得thang 成立。 |
|
Lán nā tha̍k Chhòng-sè-kì tē 2 chiuⁿ, lán ū tha̍k tio̍h hū-jin-lâng sī tùi ta-po͘-lâng chhut. A-tong kóng “Chit ê sī góa kut-lāi ê kut, bah-lāi ê bah, beh chheng chòe cha-bó͘-lâng, in-ūi i sī tùi ta-po͘-lâng the̍h chhut.” Chóng-sī āu-tāi ê ta-po͘-lâng sī tùi cha-bó͘-lâng chhut. Án-ni hu-hū pún sī chi̍t-thé, lú tùi lâm chhut, lâm tùi lú chhut, sī put-khó hun-lī ê chi̍t-thé. Án-ni lí kiò i bē saⁿ-loân bē saⁿ-ài, á-sī kóng m̄-thang saⁿ-loân m̄-thang saⁿ-ài che sī tian-tò ge̍k-sèng. Nā chhin-chhiūⁿ khip thi̍h lí kiò i mài khip thi̍h, che sī put-khó-lêng, á-sī kiò chí-lâm-chiam m̄-thang pí lâm-pêng, che iā-sī chin ûi-lân ê sū. Chhin-chhiūⁿ án-ni lí kiò lú m̄-thang loân lâm, lâm m̄-thang ài lú, che iā-sī chin ge̍k chū-jiân ê thian-sèng. Chiàu Bí-kok sèng ê ha̍k-chiá(性學) ê gián-kiù eⁿ-á chiū ū sèng ê ì-sek, chha-put-to tùi 2, 3 hòe khí chiū chin bêng-hián. Sek kap chia̍p che sī lâng ê chū-jiân thian-sèng. Tùi sèng ê būn-tê lâm--ê tāi-seng hoat-ta̍t, ......, kàu 40 gōa hòe ê sî ....... Khiok iā ū chhî-sio̍k ....... Lú--ê ......, chóng-sī beh ....... Āu-lâi kàu ...... chiū ià-siān khì. Lú--ê tùi sèng-io̍k ê iàu-kiû ū chiu-kî-sèng chiū-sī ...... ê sî. Chiū-sī ūi-tio̍h thoân-chéng lâi ....... Lâm--ê m̄-sī, lâm--ê sī chin hòng-sù, sui-sui piān-piān khòaⁿ tio̍h sím-mi̍h, thiaⁿ-kìⁿ, ...... chiū tōng-khí io̍k-chèng. Lú--ê thiàⁿ tiōng-hu sī chin khoah, chiū-sī tùi chē-chē hong-bīn lâi thiàⁿ tiōng-hu. Lâm--ê thiàⁿ lú--ê, sī chiong ...... iàu-kiû chòe tiong-sim, ...... nā bē hô, bô chhèng-ì, ta̍k-hāng to loān liáu-liáu. Lú--ê tùi chit-hāng khah ū thun-lún, nā chū-thâu bô kè, mài phah-chhíⁿ--i, it-seng khó-í chòe ko͘-niû, khiok ū sî sim-sèng ē pìⁿ khah kip, tùi sin-thé bô sím-mi̍h kàu gōa tōa ê éng-hióng. Lâm--ê khah oh-lún, in-ūi tùi lâm-sèng ......, chū-jiân ē iàu-kiû ......, nā m̄-sī chin sīn-tiōng, chū-chè, chiū ài poa̍h-tó, jîn-keh ê siu-ióng chiū-sī chāi tī chia.
|
咱若讀創世紀第2章，咱有讀著婦人人是tùi 查甫人出。亞當講：「這個是我骨內ê 骨，肉內ê 肉，beh 稱做查某人，因為伊是tùi 查甫人提出。」總是後代ê 查甫人是tùi 查某人出。Án-ni 夫婦本是一體，女tùi 男出、男tùi 女出，是不可分離ê 一體。Án-ni 你叫伊bē 相戀bē 相愛；抑是講m̄-thang 相戀，m̄-thang 相愛，che 是顛倒逆性。那親像吸鐵，你叫伊mài 吸鐵，che 是不可能；抑是叫指南針m̄-thang 比南爿，che 也是真為難ê 事。親像án-ni，你叫女 m̄-thang 戀男，男m̄-thang 愛女，che 也是真逆自然ê 天性。照米國性ê 學者（性學）ê 研究，嬰仔就有性ê 意識，差不多tùi 兩、三歲起就真明顯。色kap食，che 是人ê 自然天性。Tùi 性ê 問題男--ê 代先發達，……，到40偌歲ê 時……。卻也有持續……。女--ê ……，總是beh ……。後來到……就厭siān--去。女--ê tùi 性慾ê 要求有週期性，就是……ê 時。就是為著傳種來……。男--ê m̄ 是，男--ê 是真放肆，隨隨便便看著甚物，聽見，……就動起慾性。女--ê 疼丈夫是真闊，就是tùi 濟濟方面來疼丈夫。男--ê 疼女--ê,是將……要求做中心，……若bē 和，無稱意，逐項都亂了了。女--ê tùi 這項較有吞忍，若自頭無嫁，mài 扑醒伊，一生可以做姑娘，卻有時心性會變較急，tùi 身體無甚物到偌大ê 影響。男--ê 較oh忍，因為tùi 男性……，自然會要求……，若m̄ 是真慎重、自制，就ài跋倒，人格ê 修養就是在tī chia。 |
|
Tùi án-ni kā i khòaⁿ, tùi seng-lí-ha̍k siōng ê li̍p-tiûⁿ lâm-lú nn̄g-ê īⁿ-sèng, siong kiû-ài, kiû-ha̍p che iā-sī chin chū-jiân, tùi án-ni bí-móa ê jîn-seng, liông-hó ê ka-têng sêng-li̍p, chéng-cho̍k tit-tio̍h liû-thoân. Só͘-í Sèng-keng kóng:
|
Tùi án-ni kā 伊看，tùi 生理學上ê 立場，男女兩個異性，相求愛、求合，che 也是真自然；tùi án-ni 美滿ê 人生，良好ê 家庭成立，種族得著流傳。所以聖經講： |
|
“Lí beh kan-khó͘ siⁿ-kiáⁿ, lí beh loân-bō͘ lí ê tiōng-hu, i beh koán-hat lí. (Chhòng 3:16)
|
「你beh艱苦生子，你beh戀慕你ê丈夫，伊beh管轄你。」（創3：16） |
|
“Án-ni tiōng-hu tio̍h thiàⁿ i ê hū-jîn-lâng chhin-chhiūⁿ ka-kī ê sin-thé. Thiàⁿ ka-kī ê hū-jîn-lâng chiū-sī thiàⁿ ka-kī.”(Í-hut-só͘ 5:28)
|
「Án-ni 丈夫著疼伊ê 婦人人，親像家己ê 身體。疼家己ê 婦人人就是疼家己。」（以弗所 5：28） |
|
Tio̍h saⁿ-thiàⁿ kàu sím-mi̍h thêng-tō͘? Tio̍h thiàⁿ kàu hō͘-siōng hiàn-chhut ka-tī ê sìⁿ-miā lâi kiat-ha̍p chiâⁿ-chòe chi̍t-thé chīn it-seng. Nā-sī lâm tio̍h tiōng-gī , lú tio̍h tiōng-chiat. Cháiⁿ-iūⁿ án-ni kóng? Lán lâi seng kóng “Loân-ài” sī sím-mi̍h?
|
著相疼到甚物程度？著疼到互相獻出家己ê 生命，來結合成做一體盡一生。但是男著重義，女著重節。怎樣án-ni 講？咱來先講「戀愛」是甚物？ |
|
“Loân” sī loân-bō͘, “Ài” sī thiàⁿ-sioh, chiū-sī hū-jîn-lâng loân-bō͘ i ê tiōng-hu, ta-po͘-lâng thiàⁿ-sioh i ê hū-jîn-lâng. Án-ni kiò-chòe loân-ài. Loân-ài tio̍h ū nn̄g ê lâm-lú īⁿ-sèng chiah ē sêng-li̍p. Kan-ta chi̍t ê bē sêng-li̍p, iā nn̄g ê nā lóng tông-sèng chiū-sī pêⁿ-pêⁿ cha-po͘--ê, pêⁿ-pêⁿ cha-bó͘--ê, án-ni sī tông-sèng-ài, sī piàn-thài ê ài, m̄-sī loân-ài.
|
「戀」是戀慕；「愛」是疼惜，就是婦人人戀慕伊ê 丈夫，查甫人疼惜伊ê 婦人人。Án-ni 叫做戀愛。戀愛著有兩個男女異性才會成立。Kan-ta一個bē 成立，也兩個攏同性就是平平查甫--ê,平平查某--ê,an-ni 是同性愛，是變態ê 愛，m̄ 是戀愛。 |
|
Koh loân-ài m̄-nā sī tio̍h ū lâm, lú nn̄g-ê īⁿ-sèng chiah ē sêng-li̍p, koh tio̍h ū lêng, jio̍k ê it-tì chiah ê sêng-li̍p.
|
Koh 戀愛m̄-nā 是著有男女兩個異性才會成立，koh 著有靈、肉ê 一致才會成立。 |
|
Khó-pí chia ū nn̄g ê lâm, lú īⁿ-sèng chòe chin hó ê pêng-iú lâi kau-pôe, hit ê chhin-bi̍t ū pôaⁿ-kòe pêng-siông ê chhin-bi̍t. Chóng-sī m̄-bat ū jio̍k-thé ê koan-hē, kàu bóe kiám-chhái jīn chòe hiaⁿ, moāi, án-ni iā-sī iu-goân sī iú-gî-tek ê kau-pôe, iú-gî-tek ê saⁿ-thiàⁿ. Bē thang kóng in nn̄g-lâng ū loân-ài.
|
可比chia 有兩個男女異性做好ê 朋友來交陪，hit個親密有pôaⁿ過平常ê 親密。總是m̄-bat 有肉體ê 關係，到尾kiám-chhái 認做兄妹，án-ni 也是猶原是友誼的ê 交陪，友誼的ê 相疼。Bē thang 講in 兩人有戀愛。 |
|
Koh khó-pí chia ū nn̄g ê lâm, lú īⁿ-sèng, in ū tâng-chhn̂g, chóng-sī in ê sim m̄-sī chhut tùi saⁿ-thiàⁿ, ......, á-sī tī hoa-ke liú-hāng ê bōe chhiò. Sui-jiân ū jio̍k-thé ê it-tì, cheng-sîn thiàⁿ-sim bô it-tì, án-ni iā m̄-sī loân-ài.
|
Koh可比chia 有兩個男女異性，in 有同床，總是in ê 心m̄ 是出tùi 相疼，……，抑是tī 花街柳巷ê 賣笑。雖然有肉體ê 一致，精神疼心無一致，án-ni 也m̄ 是戀愛。 |
|
Chin ê loân-ài sī cheng-sîn, jio̍k-thé lóng-chóng it-tì, chòe hó chiū-sī lêng-bēng, chiū-sī sìn-gióng iā it-tì. Che sī lán sìn-chiá, kap sè-sio̍k lâng ê hun-piat. Chhin-chhiūⁿ chi̍t ê kim-lô͘ ū saⁿ-ki kha tú-leh. M̄-nā lâng kap lâng koh tiàm tī Sîn, Sîn ê thiàⁿ koàn-chhoàn tī lâng kap lêng ê tiong-kan lâi sêng-li̍p. Chit-khoán ê hu-hū-ài chiū chin-chiàⁿ ē éng-oán kian-kò͘.
|
真ê 戀愛是精神、肉體攏總一致，最好就是靈命，就是信仰也一致。Che 是咱信者，kap世俗人ê 分別。親像一個金爐有三隻腳tú--leh。M̄-nā 人kap人koh tiàm tī 神，神ê 疼貫串tī 人kap人ê 中間來成立。這款ê 夫婦愛就真正會永遠堅固。 |
|
Taⁿ loân-ài kì-jiân sī án-ni, “M̄-sī hu-hū ê tiong-kan chiū bô loân-ài thang kóng á m̄-sī?” “Sī.” Chheng-liân-lâng bōe-chhōa, bōe-kè chiū sio loân-ài, che sī chhò-gō͘ á m̄-sī? Sī. Kiám-chhái sī pôaⁿ-kòe iú-gî-ài, lâi ji̍p tī īⁿ-sèng ê kiû-ài kai-tōaⁿ. Chóng-sī m̄-thang kóng sī loân-ài. Hit ê kau-pôe tek-khak tio̍h chí î lé, bû-siâ. Nā-sī kàu chit ê thêng-tō͘ tio̍h chù-ì.
|
今戀愛既然是án-ni，「M̄ 是夫婦ê 中間就無戀愛thang 講抑m̄ 是？」「是。」青年人未娶、未嫁就相戀愛，che 是錯誤抑m̄ 是？是。Kiám-chhái 是pôaⁿ過友誼愛，來入tī 異性ê 求愛階段。總是m̄-thang 講是戀愛，hit 個交陪的確著止於禮、無邪。但是到這個程度著注意。 |
|
Lâm-lú īⁿ-sèng khí-thâu saⁿ-bat.
|
男女異性起頭相bat。 |
|
Chia̍p-chia̍p chiap-chhiok chiū tùi saⁿ-bat seⁿ-khí kám-chêng iú-ài.
|
捷捷接觸就tùi 相bat 生起感情友愛。 |
|
Tùi iú-ài chiū seⁿ-chhut saⁿ pang-chān, saⁿ hōng-sū.
|
Tùi 友愛就生出相幫贊、相奉事。 |
|
Kàu chia sī iú-chêng, iú-gî ê kau-pôe.
|
到chia 是友情、友誼ê 交陪。 |
|
Āu-lâi seⁿ-khí chi̍t-khoán put-khó͘ su-gī ê ài ê khip-ín-la̍t, ná chiap kīn chiū pìⁿ chòe chêng-tâu ì-ha̍p.
|
後來生起一款不可思議ê 愛ê 吸引力，那接近就變做情投意合。 |
|
Nā saⁿ-kìⁿ chin hoaⁿ-hí, khah-kú bô saⁿ-kìⁿ chin sim-būn. Chin him-bō͘ kín ài koh saⁿ-kìⁿ, chhōe ki-hōe, chò ki-hōe, saⁿ-oan nn̄g-tńg ài saⁿ-kìⁿ. Kìⁿ tio̍h chin hoaⁿ-hí, m̄-kam pun-khui, hīn saⁿ-kìⁿ siuⁿ-bān, hīn pun-khui siuⁿ-kín. Saⁿ-kìⁿ ê sî sim hoaⁿ-hí, sim chhiáng, bīn âng, sīm-chì ē ná-chún hoat-jia̍t, beh pun-khui sòa iu-būn sòa háu. Nā kàu chit ê thêng-tō͘ í-keng m̄-sī kán-tan ê iú-gî-ài. Chiū-sī thong-sio̍k kiò-chòe “Loân-ài”. Kàu chia tio̍h chù-ì. Tio̍h kian-koat, tio̍h chhim-siūⁿ, tio̍h kî-tó. Nā chhim-chhim siūⁿ liáu tio̍h kā pē-bó kóng, he̍k-chiá tùi tióng-pòe ê ti-kí lâi chham-siông. Nā chai chit ê sū bô ha̍p, chiū tio̍h kín tiong. Iā m̄-thang bô kóng, bô kóng chiū kiaⁿ-liáu ē piàn-chòe su-thong, kan-îm.
|
若相見真歡喜，較久無相見真心悶。真欣慕緊愛koh 相見，chhōe 機會、做機會，三彎兩轉ài相見。見著真歡喜，m̄ 甘分開，恨相見siuⁿ慢、恨分開siuⁿ緊。相見ê 時心歡喜、心chhiáng、面紅，甚至會那準發熱；beh 分開煞憂悶、煞哮。若到這個程度已經m̄ 是簡單ê 友誼愛。就是通俗叫做「戀愛」。到chia 著注意。著堅決，著深想、著祈禱。若深深想了著kā 父母講，或者tùi 長輩ê 知己來參詳。若知這個事無合，就著緊張。也m̄-thang 無講，無講就驚了會變做私通、姦淫。 |
|
Lâng eng-kai tio̍h ū chhù-sū, bô chhù-sū loān-lâi, án-ni sī “loān-ài” loān-loān ài, m̄-sī loân-ài. Ū-sî tùi tì bô tēng-sèng sòa pìⁿ chòe saⁿ-kak loân-ài. Chiū-sī chi̍t ê lú siāng chi̍t-sî ài nn̄g ê lâm, á-sī chi̍t ê lâm siāng chi̍t sî ài nn̄g ê lú, á-sī loān-loān chhap. Che lóng sī tùi ài-chêng ê bô kín-sīn sio̍k-bē ê só͘-tì. Thó͘-ōe kóng ín-khí “Kâu kā-kâu,” á-sī saⁿ-chhōa khì sí, che lóng sī chin tōa ê chhò-gō͘. Chòe chheng-liân tek-khak m̄-thang hām-lo̍h tī bô chhù-sū ê só͘ ūi-chi “siâ-loân.” Chòe pē-bó ê m̄-sī kìm-chí lâm-lú ê kau-gî, sī ài kā i siān-tō. Thòe in chhōe hó ê tâng-phōaⁿ, lán tio̍h chòe sī-sè ê léng-tō-chiá, in sī chhin-chhiūⁿ chāi-tiûⁿ teh kèng-ki ê lâng, lán tiàm piⁿ-á khòaⁿ, thòe in tàu siūⁿ, án-chóaⁿ chiah ē cháu tī sì-chiàⁿ ê lō͘.
|
人應該著有次序，無次序亂來，án-ni 是「亂愛」，亂亂愛，m̄ 是戀愛。有時tùi tī無定性，煞變做三角戀愛（三角、多角戀愛）。就是一個女siāng 一時兩個男；抑是一個男siāng 一時愛兩個女；抑是亂亂chhap。Che 攏是tùi 愛情ê 無謹慎、俗賣ê 所致。土話講引起「猴咬猴」，抑是相chhōa 去死，che 攏是真大ê 錯誤。做青年的確m̄-thang 陷落tī 無次序--ê 所謂之「邪戀」。做父母--ê m̄ 是禁止男女ê 交誼，是愛kā 伊善導。替in chhōe 好ê 同伴，咱著做序細ê 領導者，in 是親像在場teh 競技ê 人，咱tiàm 邊仔看，替in 鬥想，án-chóaⁿ 才會走tī 四正ê 路。 |
|
Iu-sèng loat-pāi, kéng thâu-tùi che iā-sī chi̍t hāng iu-sèng loat-pāi ê kèng-cheng. Cheⁿ iâⁿ--ê chiū seng kè, kèng-cheng iâⁿ--ê chiū seng chhōa. Ū ê lo̍h tiûⁿ loān chông, te̍k-pia̍t ang-bó͘ sī chhin-chhiūⁿ nn̄g-lâng pa̍k saⁿ-kha ê tàu-cháu, it-tàn kéng m̄-tio̍h kâⁿ, cháu liáu kha-pō͘ bē hô, cháu-cháu phak-phak lo̍h-khì, ū ê sòa phùi-bīn cháu bô kàu-bóe chiū tháu-khui, chi̍t lâng liu chi̍t lō͘. Che sī chin sit-pāi thang kiàn-kiàu ê ūn-tōng-oân. Pòaⁿ-lō͘ lî-hun iā-sī án-ni.
|
優勝劣敗，揀頭對che 也是一項優勝劣敗ê 競爭。爭贏--ê 就先嫁，競爭贏--ê 就先娶。有ê 落場亂chông,特別翁某是親像兩人縛三腳ê 鬥走，一但揀m̄著kâⁿ，走了腳步bē 和，走走仆仆--落-去，有ê 煞phùi面，走無到尾就tháu 開，一人溜一路。Che 是真失敗，thang 見笑ê 運動員。半路離婚也是án-ni。 |
|
Chhin-ài ê chheng-liân hiaⁿ-tī, lín tùi lú-sèng nā m̄-sī ū àn-sǹg beh chhōa i chòe bó͘. M̄-thang siuⁿ chhin-bi̍t, tio̍h tī iú-gî ê só͘-chāi thêng pō͘. Chhin-ài ê chheng-liân chí-moāi sió-chiá. Lín nā bô àn-sǹg beh chiong bó͘-kun chòe lí ê tiōng-hu, lí m̄-thang kap lâm-sèng siuⁿ chhin-bi̍t. Tio̍h tī iú-gî ê ūi thêng-pō͘, koh chìn-khì lí chiū tōa khek-khui.
|
親愛ê 青年兄弟，lín 對女性若m̄ 是有按算beh 娶伊做某，M̄-thang siuⁿ親密，著tī 友誼ê 所在停步。親愛ê 青年姊妹小姐，lín 若無按算beh 將某君做你ê 丈夫，你m̄-thang kap男性siuⁿ親密。著tī 友誼ê 位停步，koh 進去你就大克虧。 |
|
Sió-chiá lí sī khiā tī “Sêng-siū” ê li̍p-tiûⁿ, lâm--ê thau-chia̍h, liáu-āu chhùi chhit-chhit-leh, tèⁿ m̄-chai. Lí--neh, lí pó-kùi ê lé-chóa, chhù-lú ê chun-kùi, êng-kng, khoa-kháu, thang hiàn hō͘ lí ê tiōng-hu chòe pó-kùi êng-ū ê lé-mi̍h sit-lo̍h lah. Kiám-chhái ūi-tio̍h án-ni lí ê hēng-ūn lóng-chóng si̍t-lo̍h. Bô tiuⁿ-tî-á chu-thai àm-kiat, gia̍t-chéng puh-gê, lí chiū chin kai-sí.
|
小姐你是企tī 「承受」ê 立場，男--ê 偷食，了後嘴拭拭--leh，tèⁿ m̄ 知；你--neh，你寶貴ê lé-chóa,處女ê 尊貴、榮光、誇口，thang 獻hō͘ 你ê 丈夫做寶貴榮譽ê 禮物失落--lah。Kiám-chhái 為著án-ni，你ê 幸運攏總失落。無張持仔珠胎暗結，孽種puh 芽，你就真該死。 |
|
Só͘-í chheng-liân hiaⁿ-tī, chheng-liân chí-moāi tio̍h tī sìn-gióng-ni̍h tōa-tōa chiat-chè, kín-sīn lán ê phín-tek. M̄-sī hu, hū m̄-thang kóng loân-ài. Nā kau-pôe kàu tī pôaⁿ-kòe iú-gî tio̍h chù-ì, tio̍h kā pē-bó kóng, m̄-thang àm-chīⁿ, bô tia̍t-sū.（異性之愛，發乎感情，應止於禮，禮者敬也，互相尊重人格，不亂為是).
|
所以青年兄弟，青年姊妹著tī 信仰--ni̍h 大大節制、謹慎咱ê 品德。M̄ 是夫、婦m̄-thang 講戀愛。若交陪到tī pôaⁿ過友誼著注意，著kā 父母講，m̄-thang 暗chīⁿ，無秩序。（異性之愛，發乎感情，應止於禮，禮者敬也，互相尊重人格，不亂為是）。 |
|
Cháiⁿ-iūⁿ kóng lâm tiōng gī, lú tiōng chiat.. Iâ-so͘ chāi-sè ê sî, ū lâng chiong hiān-tiûⁿ kiâⁿ kan-îm ê lâng lia̍h lâi kìⁿ Iâ-so͘, khòaⁿ tio̍h cháiⁿ-iūⁿ pān? Iâ-so͘ khí-thâu m̄-chhap, tiām-tiām, bîn-chiòng ti̍t-ti̍t mn̄g, put-tek-í I chiū ēng chhiú-chéng-thâu-á siá-jī tī thô͘-kha, koh ti̍t-ti̍t mn̄g ko͘-put-chiong Iâ-so͘ chiah khui-chhùi lâi ìn. Cháiⁿ-iūⁿ Iâ-so͘ thái bô chin ióng-io̍k lâi chhap chit chân tāi-chì? In-ūi chit chân sū thang kóng sī tūi-lo̍h ê lâng ê chū-jiân-sèng. Nā m̄-sī têng-thâu-siⁿ, chū-kak tio̍h siú-kí, kèng-jiân sèng-kiat. Lí tùi îm-loān ê lâng lâi kóng sī óng-jiân. Koh kóng khí--lâi iā-sī kiàn-siàu sū. Koh sī bô kong-tō, in-ūi îm-loān m̄-sī chi̍t ê ē sêng-li̍p, tek-khak ài nn̄g ê. Kan-ta lia̍h lú--ê lâi, lâm--ê pàng i khì, che-sī tiōng lâm kheng lú. Só͘-í Iâ-so͘ tiām-tiām. Iâ-so͘ ê ì-sù lú--ê tio̍h tiōng chiat.
|
怎樣講男重義、女重節？耶穌在世ê 時，有人將現場行姦淫ê 人掠來見耶穌，看著怎樣辦？耶穌起頭m̄-chhap，恬恬，民眾直直問，不得已伊就用手指頭仔寫字tī 塗腳；koh 直直問，姑不chiong 耶穌才開嘴來應。怎樣耶穌thái 無真踴躍來chhap 這層代誌？因為這層事thang 講是墮落ê 人ê 自然性。若m̄-是重頭生，自覺著守矩，敬然聖潔。理對淫亂ê 人來講是枉然。Koh 講起來也是見笑事。Koh 是無公道，因為淫亂m̄ 是一個會成立，的確ài兩個。Kan-ta掠女--ê 來，男--ê 放伊去，che 是重男輕女。所以耶穌恬恬。耶穌ê 意思女--ê 著重節。 |
|
Cheng-chiat sī hū-lú ê sèⁿ-miā sio-siāng, nā ū cheng-chiat, put-lūn i sī hó-gia̍h, sàn, gâu, han-bān, lāu, siàu-liân, súi, bái, chāi-sek-lú, bōe-kè, kè-liáu chòe lâng ê bó͘, á-sī lāu-bú, chiú-kóaⁿ, lāu-pô lah to sī chin pó-pòe. In-ūi i ū siú cheng-chiat. Nā bô cheng-chiat i sī súi kàu ná-chún goa̍t-lí-siông-ngô͘, gâu kàu ē poe-thiⁿ to sī hō͘ lâng iàm-chiān, chhàu-mi̍h. I ē hō͘ pē-bó iu-būn, ē hō͘ pêng-iú khòaⁿ-khin, ē hō͘ tiōng-hu hiat-ka̍k, ē hō͘ kiáⁿ-jî put-hàu--i, ē hō͘-siā-hōe ê lâng kū-choa̍t, phùi-nōa. Chí-moāi-ah! Lí tio̍h kì-tit lí ê pó-pòe chiū-sī siú cheng-chiat. Nā sit-lo̍h cheng-chiat lí chiū bô ta̍t-chîⁿ.
|
貞節是婦女ê 生命相像，若有貞節，不論伊是好額、散；gâu、han-bān;老、少年；súi、bái;在室女、未嫁；嫁了做人ê 某、抑是老母；守寡、老婆--lah 都是真寶貝。因為伊有守貞節。若無貞節伊是súi 到那準月裡嫦娥，gâu 到會飛天都是hō͘ 人厭賤、臭物。伊會hō͘ 父母憂悶，會hō͘ 朋友看輕，會hō͘ 丈夫hiat-ka̍k,會hō͘ 子兒不孝伊，會hō͘ 社會ê 人拒絕，phùi瀾。姊妹--ah！你著記得你ê 寶貝就是守貞節。若失落貞節你就無值錢。 |
|
Hiaⁿ-tī ah! Lâm--ê tio̍h siú chêng-gī. M̄-thang bô chêng bô gī. Lú-sèng chiong i tē-it pó-kùi ê thiàⁿ hiàn hō͘ lí, lí chiah pōe--i, bô chêng pōe gī, lí si̍t-chāi pí khîm-siù khah sí. (Khòaⁿ hún-chiáu ê ài-chêng). I tē-it pó-pòe ê jio̍k-thé, sim-sîn sèⁿ-miā lóng hiàn hō͘ lí. It-seng it-sì beh kau-tài lí, lí chiah koh pōe--i, hō͘ lú-sèng sit-lo̍h i ê sim, sin tī lí, hō͘ i chiân-tô͘ o͘-àm, cháu-thâu bô lō͘. Hō͘ i ê sin-thé sim-sîn siū tāng ê siong-hûn, he̍k-chiá tì-kàu chū án-ni tūi-lo̍h, á-sī chū-pō, chū-khì, lí si̍t-chāi chek-tek kai-sí.
|
兄弟--ah！男--ê 著守情義。M̄-thang 無情無義。女性將伊第一寶貴ê 疼獻hō͘ 你，你chiah背伊，無情背義，你實在比禽獸較死。（看粉鳥ê 愛情）。伊第一寶貝ê 肉體、心神、生命攏獻hō͘ 你。一生一世beh 交代你，你才koh 背伊，hō͘ 女性失落伊ê 心、身tī 你；hō͘ 伊前途烏暗，走頭無路。Hō͘ 伊ê 身體心神受重ê 傷痕，或者致到自án-ni 墮落，抑是自暴，自棄，你實在即得該死。 |
|
Iâ-so͘ cháiⁿ-iūⁿ chú-tiuⁿ îm-loān chiū thang lî-hun. In-ūi kan-îm chiū-sī hu-hū thiàⁿ ê chêng-hūn, thiàⁿ ê iân, liú-tòa í-keng tn̄g-khì lah. Hu-hū ê saⁿ-thiàⁿ sī ka-têng ê tiong-sim, liú-tòa. Tiong-sim í-keng pheng-hoāi, liú-tòa í-keng tn̄g, si̍t-chāi bô ta̍t-chîⁿ. Hu-hū ê kiat-ha̍p sī chù-tiōng tī sûn-kiat, chiū-sī lú cheng-chiat, lâm chêng-gī ê seng-oa̍h. Só͘-í bí-móa ê hu-hū seng-oa̍h sī lâm-lú ài kiōng-tông hū-chek. Bē ēng-tit kok-lâng ka-tī hòng-sù. Lú--ê sī tiōng-hu ê, lâm--ê sī hū-jîn-lâng ê. Tāi-ke ū hō͘-siōng koán-sok ê koân-lī. Khah-siông lâng sī siūⁿ lú ê kap lâng su-thong, âng-hēng chhut-chiûⁿ tio̍h ài siū lî-iân. Lâm--ê khì chhōe sin ê hoaⁿ-hí, iā bô siū chek-pī. Che-sī tiōng-lâm kheng-lú, piàn-thài ê lâm-lú chè-tō͘. Lâm, lú sī pêng-téng, kiōng-tông hū-chek, kiōng-tông koán-sok. Lâi saⁿ-kap pó-siú, cheng-chìn hu-hū-kan sèng-kiat, saⁿ-thiàⁿ ê seng-oa̍h. Nā phò-hoāi chit ê kui-chún lóng sī îm-loān. Siōng-tè éng bô chiok-hok.
|
耶穌怎樣主張淫亂就thang 離婚。因為姦淫就是夫婦疼ê 情分、疼ê 緣，紐帶已經斷--去--lah。夫婦ê 相疼是家庭ê 中心、紐帶。中心已經pheng壞，紐帶已經斷，實在無值錢。夫婦ê 結合是注重tī 純潔，就是女貞節、男情義ê 生活。所以美滿ê 夫婦生活是男女ài共同負責。Bē用tit各人家己放肆。女--ê 是丈夫ê,男--ê 是婦人人ê。大家有互相管束ê 權利。較常人是想女--ê kap人私通、紅杏出牆著ài受離緣。男--ê 去chhōe 新ê 歡喜，也無受責備。Che 是重男輕女，變態ê 男女制度。男女是平等，共同負責、共同管束。來相kap保守，增進夫婦間聖潔、相疼ê 生活。若破壞這個規準攏是淫亂。上帝永無祝福。 |
|
8
|
8 |
|
B. Lâm-lú sèng ê chhióng-tōng.
|
B. 男女性ê chhióng動。 |
|
Lâm-lú sèng ê chhióng-tōng, che-sī kiān-khong-thé ê lâm lú jio̍k-thé seng-lí-tek sêng-se̍k(kàu-se̍k ná kóe-chí pá-chúi kàu-hun) ê chū-jiân hiān-siōng. Lâm chiong-chêng , lú su-chhun . Lâm-lú kàu hit sî put-lūn jio̍k-thé, siaⁿ-im, su-siúⁿ lóng ē keng-kòe tong-jiân ê it-tāi piàn-hòa. Che m̄-sī chōe-ok, iā m̄-sī piàn-thài, iā m̄-sī thang kiàn-siàu ê sū. Chū-jiân m̄-thang chè-chí, chóng-sī tio̍h siān-tō. Hō͘ i hoat-ta̍t tī chèng-kui ê lō͘, lâi kiat hó ê sêng-kó.
|
男女性ê chhióng動，這是健康體ê 男女肉體生理的成熟（到熟，若果子飽水到分）ê 自然現象。男鍾情、女思春。男女到hit 時，不論肉體、聲音、思想攏會經過當然ê 一大變化。Che m̄ 是罪惡，也m̄ 是變態，也m̄ 是thang 見笑ê 事。自然m̄-thang 制止，總是著善導。Hō͘ 伊發達tī 正歸ê 路，來結好ê 成果。 |
|
Lâm chiong-chêng, lú su-chhun, put-ti put-kak ē ài saⁿ chiap-kīn. Tùi se̍k-sāi chiū chìn-ji̍p iú-gî, tùi iú-gî chiū chìn-kàu tông-chêng. Tùi tông-chêng chiū chìn-kàu ài-bō͘, kiû-ài. Tùi ài-bō͘ chiū seⁿ-chhut saⁿ pang-chān, saⁿ pó-hō͘. Kàu-bóe chiū seⁿ-khí kam-goān ūi i hi-seng, chun-kèng ê sim, ài chòe-hóe, thiàⁿ ê to̍k-chiàm, kiat-hun.
|
男鍾情、女思春，不知不覺會愛相接近。Tùi 熟悉就進入友誼，tùi 友誼就進到同情；Tùi 同情就進到愛慕、求愛；Tùi 愛慕就生出相幫贊、相保護。到尾就生起甘願為伊犧牲、尊敬ê 心，愛做伙，疼 ê 獨占，結婚。 |
|
Cha-po͘--ê ū cha-po͘ ê ióng-kám, khóng-khài ê khì-khài. Lú--ê ū lú ê ùi-siáu-lé, sai-nai, iú-bí ê piáu-chêng. Tùi chia ài-chêng chiū puh-íⁿ, chiū seⁿ-chhut kiû-ài, kiat-hun ê sū-si̍t. Tùi kiat-hun chiū chiâⁿ-chòe ka-têng, ū pē kiáⁿ, bó kiáⁿ ê thiàⁿ seⁿ-chhut. Chiū ū ka-têng seng-oa̍h, ka-têng kàu-io̍k ê pit-iàu, tī hia seⁿ-khí hiaⁿ-tī, chí-moāi ê hô-bo̍k, kiáⁿ-jî hàu-sūn ê lûn-lí. Āu-lâi chiū seⁿ-chhut pêng-iú siā-hōe ê tō-tek, chiū hêng-sêng kok-ka ū kun-sîn ê gī-bū koân-lī. Kàu bóe chiū seⁿ-chhut kok-chè ê kau-gî, seⁿ chhut sè-kài tāi-tông ê liân-bêng. Tùi án-ni jîn-lūi ê bûn-hòa, sán-gia̍p, si-koa, le̍k-sú ti̍t-ti̍t ián-piàn chhoan-liû put-sek ê chiap-sòa lo̍h khì.
|
查甫--ê 有查甫ê 勇敢、慷慨ê 氣概；女--ê 有女ê ùi-siáu-lé、sai-nai、優美ê 表情。Tùi chia，愛情就puh-íⁿ，就生出求愛、結婚ê 事實；Tùi 結婚就成做 家庭，有父子、母子ê 疼生出。就有家庭生活、家庭教育ê 必要，tī hia 生起兄弟、姊妹ê 和睦，子兒孝順ê 倫理。後來就生出朋友社會ê 道德，就形成國家，有君神ê 義務權利。到尾就生出國際ê 交誼，生出世界大同ê 聯盟。Tùi án-ni，人類ê 文化、產業、詩歌、歷史直直演變，川流不息ê 接續--落-去。 |
|
Jû-kó kóng “Loân-ài” bē ēng-tit. Chiū ài tāi-seng choa̍t-tn̄g lâm-lú ê tōng-chêng. Kì-jiân lâm-lú tióng-sêng, jio̍k-thé seng-lí-tek sêng-se̍k chū-jiân ē tōng-chêng, kì-jiân ē tōng-chêng chū-jiân īⁿ-sèng lâm-lú ē tām-khí ài-chêng. Che thong-sio̍k chiū-sī kiò chòe loân-ài. Nā-sī án-ni loân-ài sī lâm-lú-kan pit-jiân ē hiān-siōng. Nā-bô loân-ài chiū kiat-hun put-lêng sêng-li̍p. Tùi án-ni lâng kap lâng ê tiong-kan chiū pìⁿ chòe ko͘-sò, bô liâu, ná ki-khì, bô chhio, bô khàu, bô ba̍k-sái, bô si-koa, bô seⁿ-thòaⁿ. Nā án-ni “Loân-ài” sī chì-siōng á-m̄-sī? Tī chia lâng-lâng tio̍h chún-chat, tio̍h siu-ióng, tio̍h ū chiâm-siu chū-chè. M̄-sī lām-sám chiong chit ê sîn-sèng, iàu-kín ê tō-tek khòaⁿ chòe pêng-siông, chho͘-sio̍k loān-lâi chiū chin kiàn-siàu. Ài-chêng sio̍k-bē, ēng chit ê sūn-sèng hó ê phín-tek lâi ēng tī ge̍k-sèng, thang, kiàn-siàu ê hêng-ûi, chiū pí sím-mi̍h tō khah chhàu.
|
如果講「戀愛」bē用--tit，就ài代先絕斷男女ê 動情。既然男女長成，肉體生理的成熟自然會動情；既然會動情，自然異性男女會動起愛情。Che 通俗就是叫做戀愛。但是án-ni 戀愛是男女間必然ê 現象。若無戀愛就結婚不能成立。Tùi án-ni，人kap人ê 中間就變做枯燥、無聊，若機器，無笑、無哭、無目屎，無詩歌，無生湠。若án-ni，「戀愛」是至上抑m̄ 是？Tī chia 人人著撙節、著修養、著有潛修自制。M̄ 是lām-sám將這個神聖、要緊ê 道德看做平常，粗俗亂來就真見笑。愛情俗賣，用這個順性、好ê 品德來用tī 逆性、貪、見笑ê 行為，就比甚物都較臭。 |
|
Thiaⁿ lâng kóng Loân-ài sī chì-siōng, chiū kiâⁿ bû-thí ê sū che-sī chin kai-sí. Lâm-lú ê kau-pôe chòe iú-gî sī-thang. Sui-jiân sī tiāⁿ-hun liáu ê bī-hun-hu, bī-hun-chhe tō m̄-thang.
|
聽人講戀愛是至上，就行無恥ê 事，che 是真該死。男女ê 交陪做友誼是thang。雖然是訂婚了ê 未婚夫、未婚妻都m̄-thang。 |
|
1. Kiám-chhái ūi-tio̍h m̄ èng chit ê iau-kiû chiū ti-káu hun-in phòa-li̍h8. Bô iàu-kín, hō͘ i phòa-li̍h8, iā m̄-thang kiâⁿ kiàn-siàu hoān-chōe ê sū.
|
1、Kiám-chhái 為著m̄ 應這個要求就致到婚姻破裂。無要緊！Hō͘ 伊破裂，也m̄-thang 行見笑、犯罪ê 事。 |
|
Hi-pek-lâi 13:4 “Hun-in lâng-lâng tio̍h chun-tiōng, chhn̂g bô lâ-sâm; in-ūi su-thong kiâⁿ-îm ê lâng, Siōng-tè beh sím-phòaⁿ i.”
|
希伯來 13：4 「婚姻人人著尊重，床無lâ-sâm;因為私通行淫ê 人，上帝beh 審判伊。」 |
|
2. M̄-sī kóng móa-chhùi kóng “Ài”; hiàn lí ê chêng-chho, lâng kiám chiu chin-chiàⁿ ē ài--lí? Che bô tek-khak. Kiám-chhái lâng sī tùi hoe-sim kā lí chhái-khì, jiân-āu kui-lúi hoe lóng kā-lí hiat-ka̍k. Lí khì tha̍k 2 Sat-bó-ní 13:7-29. khòaⁿ-māi. Àm-lùn teh loân Ap-sa-liông ê sió-moāi Thaⁿ-má, ēng chhian hong pek-kè ài kah bē-tit tit-tio̍h. It-tàn tit-tio̍h, móa-chiok i ê sim-goān, chiū kā i hiat-ka̍k. Chit-khoán sū tī siâ-îm ê hiān-sè bô hi-hán.
|
2、M̄ 是講滿嘴講「愛」；獻你ê 情操，人kiám 就真正會愛你？Che 無的確。Kiám-chhái 人是tùi 花心kā 你採--去，然後歸蕊花攏kā 你hiat-ka̍k。你去讀撒母耳下卷13：7-29看覓。暗嫩teh 戀押沙龍ê 小妹他瑪，用千方百計愛kah bē-tit得著。一旦得著，滿足伊ê 心願，就kā 伊hiat-ka̍k。這款事tī 邪淫ê 現世無稀罕！ |
|
3. Lú-sèng èng-kai tio̍h hián-bêng lí ê cheng-kia̍t, toàn-jiân kù-choa̍t. Tùi án-ni tùi-hong ê lâm-sèng ē it-hoat kèng-bō͘ lí ê phín-tek. Siat-sú ūi-tio̍h lí ê kú-choa̍t chiū siū-khì, beh hòe chhin, góa siūⁿ lēng-khó͘, hòe-chhin khah hó. In-ūi hit khoán lâm-sèng sī bô chū-chè, bô bêng-lóng, tham-io̍k ê lâng. Kin-tú lí kè--i iā bô tōa lō͘-ēng.
|
3、女性應該著顯明你ê 貞潔，斷然拒絕。Tùi án-ni，對方ê 男性會一發敬慕你ê 品德。設使為著你ê 拒絕就受氣，beh 廢親，我想寧可廢親較好。因為hit 款男性是無自制、無明朗，貪欲ê 人。根tù你嫁伊也無大路用。 |
|
C. “Tâng-pâng”
|
C、「同房」 |
|
Tī Má-thài 1:25 ū chit-kù “tâng-pâng” ê ōe. Chit-kù tùi chá kàu-taⁿ hoan-e̍k sèng-keng ê lâng liah chòe chin oh e̍k ê khoán. In-ūi ū e̍k-chòe chin chè khoán ê jī.
|
Tī 馬太 1：25有這句「同房」ê 話。這句tùi 早到今，翻譯聖經ê 人掠做真oh譯ê 款。因為有譯做真濟款ê 字。 |
|
1. Kū lô-má-jī e̍k; e̍k chòe “Sêng-chhin”.
|
1、 舊羅馬字譯，譯做「成親」。 |
|
2. Pe̍h-ōe bûn kok-gú; e̍k-chòe “tâng-pâng”.
|
2、 白話文國語譯做「同房」。 |
|
3. Hàn-bûn bûn-lí; e̍k-choe “tông-sek”（男以女為室，女以男為家）
|
3、 漢文文理，譯做「同室」（男以女為室，女以男為家）。 |
|
4. Kū ji̍t-pún-bûn; e̍k-chòe “床(??)?=同 (??) =” “tâng chhn̂g”.
|
4、 舊日本文，譯做「床（ ） ＝同（ ）＝」「同床」。 |
|
5. Sin ji̍t-pún-bún; e̍k-chòe “相知 ?”(sio-bat, sio chai-iáⁿ).
|
5、 新日本文：譯做「相知 」（相bat，相知影）。 |
|
6. Eng-gú khim-tēng e̍k; e̍k-chòe “Knew her”(bat i). “Tâng-pâng” Chiū-sī lâm-lú chiâⁿ-chòe chi̍t-thé.
|
6、 英語欽定譯，譯做「Knew her」（bat 伊）。「同房」就是男女成做一體。 |
|
Tī 1 Lîm 6:16-18.
|
Tī伊林6：16-18。 |
|
“À-sī lín m̄-chai kap chhiong-ki liân-ha̍p ê, sī kap i chòe chi̍t-thé? In-ūi kóng, Nn̄g-ê beh chiáⁿ-chòe chi̍t-thé. To̍k-to̍k kap Chú liân-ha̍p ê sī chi̍t ê sîn. Tio̍h siám-pī îm-hēng. Lâng só͘ hoān ta̍k-hāng ê chòe lóng sī seng-khu gōa ê; nā-sī kiâⁿ kan-îm ê sī hoān-chōe kàu tī ka-kī ê seng-ku.”
|
「À是lín m̄ 知kap充飢連合--ê,是kap伊做一體？因為講，兩個beh 成做一體。獨獨kap主連合--ê 是一個神。著閃避淫行。人所犯逐項ê 罪攏是身軀外--ê;但是行姦淫--ê 是犯罪到tī 家己ê 身軀。」 |
|
Ang-bó͘ ê koan-hē Chhòng-sè-kì 2:24-25
|
翁某ê 關係。創世紀 2：24-25 |
|
“Só͘-í lâng beh lī-khui i ê pē-bú, kiat-liân i ê bó͘, in chiū chiâⁿ-chòe chi̍t-thé. Ang-bó͘ nn̄g-lâng pîⁿ-pîⁿ thǹg-pak-theh (kok-gú e̍k-chòe “chhiah-sin lō͘-thé”) iā bô kiàn-siàu.”
|
「所以人beh 離開伊ê 父母，結連伊ê 某，in 就成做一體。翁某兩人平平thǹg-pak-theh（譯做「赤身露體」）也無見笑。」 |
|
Tī chia só͘-í e̍k-chòe “Sio-bat, Sio chai-iáⁿ” si̍t-chāi ê liân-ha̍p sio-bat. Tùi chia tit-tio̍h hu-hū-kan chin ê sio lí-kái, saⁿ an-ùi, sio-lō ê thiàⁿ chêng. Tī hia ū hoaⁿ-hí, ū thiàⁿ-chêng, ū ùi siáu-lé, ū an-ùi, chit ê thiàⁿ ò-biáu ah! Che chiū-sī jo̍k-thé-te̍k ka-têng thiàⁿ ê liú-tòa. Tùi an-ni hu-hū saⁿ kiat-liân, seⁿ kiáⁿ seⁿ sun lâi ke-thiⁿ “Jîn-seng ê hēng-hok.” Oân-chiâⁿ Sîn ê chiok-hok. Chiong chi̍t ê chòe chho͘-sio̍k, chòe ge̍k-sèng, îm-loān, siâ-ok, hi̍h-hiauh lâi kún-chhiò. Phò-hoāi ka-têng, hú-hòa siā-hōe, gûi-hāi kok-ka, chit ê chōe m̄-sī sió-khóa. Só͘-í Sèng-keng kóng lâng-lâng ê “chhn̂g tio̍h chheng-khì, bô lâ-sâm”.
|
Tī chia 所以譯做「相bat、相知影」實在ê 連合相bat。Tùi chia 得著夫婦間真ê 相理解、相安慰、燒lō ê 疼情。Tī hia 有歡喜、有疼情，有ùi siáu-lé、有安慰，這個疼奧妙--ah！Che 就是肉體的家庭疼ê 紐帶。Tùi án-ni 夫婦相結連，生子生孫來加添「人生ê 幸福。」完成神ê 祝福。將一個最粗俗、最逆性，淫亂、邪惡、hi̍h-hiauh 來kún 笑。（性的遊戲）破壞家庭、腐化社會、危害國家，這個罪m̄ 是小可。所以聖經講人人ê「床著清氣，無lâ-sâm」。 |
|
Thang kiaⁿ ê kéng-kò!!
|
Thang 驚ê 警告！！ |
|
“Só͘-í chiàu in sim-lāi ê su-io̍k, Siōng-tè kau-hù in tī bô chheng-khì, hō͘ in ê seng-khu saⁿ lêng-jio̍k; in-ūi an-ni Siōng-tè kau-hu in tī kiàn-siàu ê chêng; in ê hū-jîn-lâng ēng sūn-sèng ê lō͘-ēng pìⁿ chòe ge̍k-sèng ê lō͘-ēng, saⁿ ì-ài, io̍k-hóe tōng-sim, ta-po͘ kap ta-po͘ kiâⁿ bô chèng-keng ê sū; tī in pún-sin siū in ê chha-biū só͘ èng-kai tú-tio̍h ê pò-èng,”(Lô-má 1:24-27).
|
「所以照in 心內ê 私慾，上帝交付in tī 無清氣，hō͘ in ê 身軀相凌辱；…… 因為án-ni 上帝交付in tī 見笑ê 情；in ê 婦人人用順性ê 路用變做逆性ê 路用，相意愛，慾火動心，查甫kap查甫行無正經ê 事；tī in 本身受in ê 差謬所應該tu著ê 報應。」（羅馬 1：24-27）。 |
|
“Nā-sī hia̍h ê ... ... ... îm-loān ê, ... ... ... in ê hūn-gia̍h sī tī hit ê ēng hé kap jiu-n̂g teh sio ê Ô͘; chit ê chiū-sī tē jī pái ê sí”(khé-sī-lio̍k 21:8).
|
「但是hiah-ê ……淫亂--ê,……in ê 份額是tī hit個用火kap硫磺teh 燒ê 壺；這個就是第二擺ê 死」（啟示錄 21：8）。 |
|
Hiaⁿ-tī, chí-moāi, chheng-liân lâm-lú, lán tio̍h sè-jī m̄-thang siū bê-ha̍k. Chi̍t-ē sit-chiok ē tú-tio̍h chhian-kó͘-hīn, hoán-hóe put-ki̍p ê kan-khó͘. Îm-loān, kó͘-ha̍p ( ; bô chek-jīm, chhìn-chhái ê chòe-hóe) , su-thong, che m̄-nā sin-thé, chiū sim-sîn, phín-tek, lêng-sèng lóng siū-siong. M̄-nā jîn-keh tūi-lo̍h, sī ē hō͘ Siōng-tè chiù-chó͘, tio̍h siū sím-phòaⁿ. Lán tio̍h chûn-siú Siōng-tè ê ōe. Sio̍k-gú kóng “Bān-ok îm ûi siú”, chit hāng tāi-chì loān, bān-sū lóng loān liáu-liáu.
|
兄弟、姊妹、青年男女，咱著細膩，m̄-thang 受迷惑。一下失足會tu著千古恨，反悔不及ê 艱苦。淫亂、苟合（無責任，chhìn-chhái ê 做伙）、私通，che m̄ 若身體，就心神、品德、靈性攏受傷。M̄ 若人格墮落，是會hō͘ 上帝咒詛，著受審判。咱著遵守上帝ê 話。俗語講：「萬惡淫為首」，這項代誌亂，萬事攏亂了了。 |
|
Tùi ka-tī ê hū-jîn-lâng, tùi ka-tī ê tiōng-hu kiû sèng ê an-ùi, boán-chiok ū chōe á bô? Bô. Chóng-sī iā m̄-thang kòe-thâu, Kòe-thâu iā-sī ē hāi tio̍h sin-thé, sū-gia̍p. Kiám-chhái sòa bē seng-io̍k chú-lú, só͘-í sui-jiân bô chōe, iáu-kú tio̍h chún-chat. Sian-siⁿ lí tek-khak m̄-thang hō͘ ian-chi, phang-chúi tiû toān, koân-kiā-á ê, Só͘ ūi-chi jio̍k-thé ê khiok-sòaⁿ-bí, iô-iô pái-pái a-ná to-chu ê mī-thài só͘ bê.
|
Tùi 家己ê 婦人人，tùi 家己ê 丈夫求性ê 安慰，滿足有罪抑無？無。總是也m̄-thang 過頭，過頭也是會害著身體、事業。Kiám-chhái 煞bē 生育子女，所以雖然無罪，iáu-kú著撙節。先生，你的確m̄-thang hō͘ 胭脂、芳水、綢緞、懸kiā仔--ê,所謂之肉體ê 曲線美，搖搖擺擺阿娜多姿ê 媚態所迷。 |
|
Sió-chiá lí tek-khak m̄-thang hō͘ châi, sè, le̍k ê la̍t só͘ khip-ín. Tio̍h khiā-khí-chāi chòe sìn-gióng ê tāi-tiōng-hu. Tī sìn, ǹg-bāng, jîn-ài lâi kéng lí ê phit-phòe. Sèng-io̍k sī lâng só͘ ài, chóng-sī m̄-thang lia̍h hit hāng chòe tùi-siōng, chòe kiat-hun î-it ê bo̍k-te̍k. kiat-hun nā chiū thêng-chí tī hia, lí khó-lêng ē ià-siān, āu-lâi he̍k-chiá ē phòa-li̍h8. A-sī ài ōaⁿ sin bī, sin ê hoaⁿ-hí, sin ê thit-thô, lia̍h sèng chòe chi̍t khoán ê iû-hì. Kai-sí, chit ê chhò-gō͘ tōa ah? Ang-bó͘ ê kiat-ha̍p tû jio̍k-thé sêng ê kiat-ha̍p iáu ū khah iáu-kín ê liú-tòa chiū sī tâng sìn, tâng ǹg-bāng, tâng jîn-ài. Tùi chiah-ê chiah-ē hō͘ Ki-tok-tô͘ ê ka-têng tit-tio̍h chin ê bí-móa. Sè-sio̍k lâng ê ka-têng chiū-sī chí-ū tī jio̍k-thé ê chêng-io̍k, kap keng-chè ê lông-pōe siong-i, á-sī tùi jî-lú tī hit tiong-kan lâi chòe liân-hê ê liú-tòa, chóng-kóng lóng sī sio̍k sè-kan sū ê liân-hê. Bô sio̍k sîn, sio̍k téng-bīn ê liân-hê. Só͘-í sio̍k-sè ê liân-hê nā tn̄g-khì, ka-têng ang-bó͘ ê koan-hē chiū óa-kái pheng-li̍h8 khì.
|
小姐，你的確m̄-thang hō͘ 財、勢、利 ê 力所吸引。著企起在做信仰ê 大丈夫。Tī 信、向望、仁愛來揀你ê 匹配。性慾是人所愛，總是m̄-thang 掠hit項做對象，做結婚唯一ê 目的。結婚若就停止tī hia，你可能會厭siān,後來或者會破裂。抑是愛換新味，新ê 歡喜、新ê thit-thô,掠性做一款ê 遊戲。該死！這個錯誤大ah？翁某ê 結合除肉體性ê 結合，iáu 有較要緊ê 紐帶就是同信、同向望、同仁愛。Tùi chiah-ê 才會hō͘ 基督徒ê 家庭得著真ê 美滿。世俗人ê 家庭就是只有tī 肉體ê 情慾，kap經濟ê 狼狽相依，抑是tùi 兒女tī hit中間來做聯繫ê 紐帶，總講攏是屬世間事ê 聯繫。無屬神，屬頂面ê 聯繫。所以俗世ê 聯繫若斷--去，家庭翁某ê 關係就瓦解pheng裂--去。 |
|
Nā chin-chiàⁿ tī Sìn-gióng, ǹg-bāng, jîn-ài lâi kiat-ha̍p ê hu-hū. Sûi-jiân hu-hū kan ū chi̍t ê sin-thé loán-jio̍k, tì-kàu bē boán-chiok siong-hong sèng ê khoài-lo̍k, á-sī kim-chîⁿ phò-sán, sàn-chhiah, koh nn̄g-lâng ê tiong-kan bô kiáⁿ-jî. Sèng ê khoài-lo̍k bô, chîⁿ, seng-oa̍h ê só͘-khò iā bô, iā bô kiáⁿ, chiàu-khòaⁿ in nn̄g-ê ē lī-khui. Bô tek-khak, nā tī Sìn-gióng, ū tâng pō͘-tiau ê ǹg-bāng, koh ū tī Chú ê thiàⁿ lâi ak-chhiú, hit tùi hu-hū beh hoaⁿ-hí tī téng-bīn ê hoaⁿ-hí, jím-siū it-chhè ê thòng-khó͘, khó͘-tò͘ lâi chīn in hu-hū bí-móa ê seng-oa̍h. Só͘-í chin ê hu-hū ài-chêng ê éng-kò͘, nā m̄-sī tī Sìn-gióng it-tì sī put-khó-lêng, m̄-sī kóng hōe-gōa ê lâng chiū bô hu-hū pek-liân kai-ló ê lâng, iā-sī ū, chóng-sī hit ê lāi-bīn-te̍k ê sim-chêng, thiàⁿ ê li̍p-khiok-tiám bô sio-tâng. Nā-sī Ki-tok-tô͘ kiat-hun ê sî sin-lông, sin-hū, nn̄g ê khan-chhiú, iā bo̍k-su hōaⁿ-chhiú tī hit téng-bīn lâi kî-tó chiok-hok, hit ê ò-biāu, ì-gī tōa ah!
|
若真正tī 信仰、向望、仁愛來結合ê 夫婦。雖然夫婦間有一個身體軟弱，致到bē 滿足雙方性ê 快樂；抑是金錢破產、散赤，koh 兩人ê 中間無子兒。性ê 快樂無，錢、生活ê 所靠也無；也無子，照看in 兩個 會離開。無的確，若tī 信仰，有同步調ê 向望，koh 有tī 主ê 疼來握手，hit 對夫婦beh 歡喜tī 頂面ê 歡喜，忍受一切ê 痛苦、苦妒，來盡in 夫婦美滿ê 生活。所以真ê 夫婦愛情ê 永固，若m̄ 是tī 信仰一致是不可能，m̄ 是講會外ê 人就無夫婦百年偕老ê 人，也是有，總是hit 個內面的ê 心情，疼ê 立足點無相同。但是基督徒結婚ê 時，新郎、新婦，兩個牽手，也牧師換手tī hit頂面來祈禱祝福，hit 個奧妙，意義大--ah！ |
