Kiù-un Sī Siōng-tè ê Lé-Mi̍h_02
|
救恩是上帝ê禮Mi̍h_02 |
|---|---|
| Iûⁿ Chiong-hùn e̍k | Iûⁿ Chiong-hùn譯 |
|
Āu-lâi, góa kiû i ún-chún góa mn̄g i kúi-ê būn-tôe. Góa kóng: “Chú-kàu, sím-mi̍h lâng siū tèng tī Si̍p-jī-kè-téng chín-kiù lí kap góa neh?”
|
後來，我求i允准我問i幾ê問題。我講：「主教，sím-mi̍h人受釘tī十字架頂拯救你kap我neh？」 |
|
I ìn kóng: “Iâ-so͘ Ki-tok.”
|
I應講：「耶穌基督。」 |
|
“Sím-mi̍h lâng lâu-chhut I ê hui̍h lâi kiáu-la̍p lí góa ê chè? Sī Má-lī-a á-sī Iâ-so͘?”
|
「Sím-mi̍h人流出I ê血來繳納你我ê債？是Sī Má-lī-a á是耶穌？」 |
|
I kóng: “Iâ-so͘ Ki-tok.”
|
I講：「耶穌基督。」 |
|
“Chú-kàu, Iâ-so͘ kap Má-lī-a tī sè-kan ê sî, sím-mi̍h lâng khah thiàⁿ chōe-jîn? Sī Má-lī-a á-sī Iâ-so͘?”
|
「主教，耶穌kap Má-lī-a tī世間ê時，sím-mi̍h人khah疼罪人？是Má-lī-a á是耶穌？」 |
|
I koh ìn kóng: “Sī Iâ-so͘.”
|
I koh應講：「是耶穌。」 |
|
“Sè-kan só͘ ū ê chōe-jîn nā lâi chiū-kūn Má-lī-a chiū ōe tit kiù mah?”
|
「世間所有ê罪人若來就近Má-lī-a就ōe得救mah？」 |
|
“Bōe.”
|
「Bōe。」 |
|
“Lí ōe kì-tit jīm-hô chōe-jîn nā lâi kàu Iâ-so͘ ê bīn-chêng lóng ōe tit-tio̍h kiù mah?”
|
「你ōe記得任何罪人若來到耶穌ê面前lóng ōe得tio̍h救mah？」 |
|
“Sī, chin chōe.”
|
「是，真chōe。」 |
|
“In ū siū chek-pī bô?”
|
「In有受責備無？」 |
|
“Bô, bōe-bat siū chek-pī.”
|
「無，bōe-bat受責備。」 |
|
“Lí ōe kì-tit Iâ-so͘ bat tùi chōe-jîn kóng lâi chiū-kūn Má-lī-a, i beh chín-kiù lí, á-bô?”
|
「你ōe記得耶穌bat對罪人講來就近Má-lī-a，i beh拯救你，á無？」 |
|
“Bô,” i ìn kóng.
|
「無，」I應講。 |
|
“Lí ōe kì-tit Iâ-so͘ bat tùi khó-lîn ê chōe-jîn kóng, Lâi chiū-kūn góa bô?”
|
「你ōe記得耶穌bat對可憐ê罪人講，來就近我無？」 |
|
“Sī, I bat án-ni kóng.”
|
「是，I bat án-ni講。」 |
|
“I bat chhú-siau chiah ê ōe bô?”
|
「I bat取消chiah ê話無？」 |
|
“Bô.”
|
「無。」 |
|
“Nā-sī án-ni, sím-mi̍h lâng khah ū khùi-la̍t thang chín-kiù chōe-jîn neh?” Góa mn̄g.
|
「若是án-ni，sím-mi̍h人khah有氣力thang拯救罪人neh？」我問。 |
|
“Ah! Sī Iâ-so͘.”
|
「Ah！是耶穌。」 |
|
“Chú-kàu, hiān-chāi Iâ-so͘ kap Má-lī-a lóng tī thiⁿ-téng, lí kiám ōe thang tùi Sèng-keng tiong chhōe-chhut, chèng-bêng Iâ-so͘ bat sit-lo̍h I chín-kiù chōe-jîn ê goān-bōng kap koân-pèng, á-sī I ū chiong chit-ê koân-pèng úi-thok Má-lī-a neh?”
|
「主教，現在耶穌kap Má-lī-a lóng tī天頂，你kiám ōe thang tùi聖經中chhōe出，證明耶穌bat失落I拯救罪人ê願望kap權柄，á是I有將chit-ê權柄委託Má-lī-a neh？」 |
|
Chú-kàu ìn kóng: “Bô.”
|
主教應講：「無。」 |
|
“Nā-sī án-ni, chú-kàu.” Góa mn̄g: “Cháiⁿ-iūⁿ lán bô beh cchí-ū khì chiū-kūn Iâ-so͘ leh? Lí í-keng sêng-jīn Má-lī-a bô-lūn tī koân-pèng, tī chû-ài, kap tī lîn-bín chōe-jîn hong-bīn lóng bōe thang kap Chú Iâ-so͘ saⁿ pí-kàu, ūi sím-mi̍h lán beh kiò hiah ê khó-lîn ê chōe-jîn khì chiū-kūn Má-lī-a leh?”
|
「若是án-ni，主教。」我問：「Cháiⁿ樣lán無beh只有去就近耶穌leh？你已經承認Má-lī-a無論tī權柄，tī慈愛，kap tī憐憫罪人方面lóng bōe thang kap主耶穌saⁿ比較，為sím-mi̍h lán beh叫hiah ê可憐ê罪人去就近Má-lī-a leh？」 |
|
Khó-lîn ê chú-kàu chhin-chhiūⁿ chi̍t ê siū soan-kò sí-hêng ê lâng. I tī góa ê bīn-chêng phi̍h8-phi̍h8-chhoah, in-ūi i bōe thang ìn-tap góa ê būn-tê, chiū chià-sû kóng, i ū tāi-chì, lâi lī-khui góa. I ê “tāi-chì” chiū-sī i bōe thang ìn-tap góa.
|
可憐ê主教親像chi̍t ê受宣告死刑ê人。I tī我ê面前phi̍h8-phi̍h8-chhoah，因為i bōe thang應答我ê問題，就chià-sû講，i有tāi-chì，來離開我。I ê「tāi-chì」就是i bōe thang應答我。 |
|
Chóng-sī góa iû-goân bô kái-chong. Iáu ū chin chōe ê só-liān iû-goân kā góa liān tī Kàu-hông ê kha-ē. Beh phòa-khui góa só͘ siū khu-sok ê só-liān, góa iáu ū pa̍t-ê chiàn-cheng tio̍h cheng-chiàn.
|
總是我iû-goân無改宗。Iáu有真chōe ê鎖鍊iû-goân kā我鍊tī教皇ê kha下。Beh破開我所受拘束ê鎖鍊，我iáu有別ê戰爭tio̍h爭戰。 |
|
Tī hit kúi-ji̍t, góa sui-jiân hām-lo̍h tī kan-lân ê tiong-kan, iā bô sòng-sit góa tùi Kàu-hōe ê jia̍t-chêng. Chú-kàu hō͘ góa chin tōa ê sè-le̍k kap koân-pêng, Kàu-hōe iā ko-seng góa tī chōe-chōe lâng ê téng-bīn, koh góa kap góa ê tâng-kang ū chi̍t-ê ǹg-bāng, chiū-sī beh chiām-chiām tī kok hong-bīn kái-kek Kàu-hōe.
|
Tī hit幾日，我雖然陷落tī艱難ê中間，也無喪失我對教會ê熱情。主教hō͘我真大ê勢力kap權柄，教會也高昇我tī chōe-chōe人ê頂面，koh我kap我ê同工有chi̍t-ê ǹg望，就是beh漸漸tī各方面改革教會。 |
|
1851 nî, góa khì Í-lī-lo̍k (Illinois) kiàn-li̍p Hoat-lân-se î-bîn-khu. Góa ū chhōa 75000 ê Hoat-kok che̍k ê Ka-ná-tāi lâng khì kià-ku tī Í-lī-lo̍k ê tōa pêng-goân, koh pān-lí ji̍p Lô-má Thian-chú-kàu ê kàu-che̍k. Tī chit-ê tōa î-bîn ê kang-chok sêng-kong liáu-āu, góa pìⁿ-chòe chi̍t-ê hó-gia̍h lâng. Góa bóe chin chōe ê Sèng-keng sàng hō͘ kok ka-têng. Chú-kàu chin siū-khì góa chòe chit-hāng tāi-chì, chóng-sī góa m̄ koán--i. Góa bô lī-khui Lô-má Thian-chú-kàu ê ì-sù, chóng-sī góa ài chīn-só͘-ōe, ēng Ki-tok ê hong-hoat lâi ín-chhōa in.
|
1851年，我去Í-lī-lo̍k (Illinois)建立法蘭西移民區。我有chhōa 75000 ê法國籍ê加拿大人去寄居tī Í-lī-lo̍k ê大平原，koh辦理入羅馬天主教ê教籍。Tī chit-ê大移民ê工作成功了後，我pìⁿ做chi̍t-ê好額人。我買真chōe ê聖經送hō͘各家庭。主教真siū-khì我做chit項tāi-chì，總是我m̄管--i。我無離開羅馬天主教ê意思，總是我ài盡所ōe，用基督ê方法來引chhōa in。 |
|
Tng-sî Chi-ka-ko (Chicago) khu ê chú-kàu chòe chi̍t-hāng goán Hoat-kok lâng só͘ bōe thang khoan-iông ê sū. I hoān-tio̍h chin tōa ê chōe, só͘-í goán chiū siōng-su hō͘ Kàu-hông lâi kā i pā-bián. Lēng-gōa ū koh phài chi̍t-ê chú-kàu lâi chiap-jīm, i ū thok Hù-chú-kàu lâi hóng-būn góa.
|
Tng時Chi-ka-ko (Chicago)區ê主教做chi̍t項goán法國人所bōe thang寬容ê事。I犯tio̍h真大ê罪，所以goán就上書hō͘教皇來kā i罷免。另外有koh派chi̍t-ê主教來接任，i有託傅主教來訪問我。 |
|
Hù-chú-kàu tùi góa kóng: “Ki-nî-kui, góa chin hoaⁿ-hí lí ōe thang chiong í-chêng ê chú-kàu pā-bián, in-ūi i sī chi̍t-ê pháiⁿ-lâng. Chóng-sī tùi chin chōe hong-bīn khòaⁿ khí--lâi, lí kah-ná chhin-chhiūⁿ í-keng thoat-lī Lô-má Thian-chú-kàu lah. Lí í-keng siū hoâi-gî chòe chi̍t-ê īⁿ-toan-chiá, sī chit-ê sin-kàu-tô͘. Lí m̄-chai ōe thang hō͘ góa chi̍t-ê chèng-kù thang tī choân sè-kài chèng-bêng lí kap lí ê kàu-iú iû-goân sī hó ê Lô-má Thian-chú-kàu-tô͘ á-bōe?”
|
副主教對我講：「Ki-nî-kui，我真歡喜你ōe thang將以前ê主教罷免，因為i是chi̍t-ê pháiⁿ人。總是tùi真chōe方面看起--來，你kah-ná親像已經脫離羅馬天主教lah。你已經受懷疑做chi̍t-ê異端者，是chit-ê新教徒。你m̄知ōe thang hō͘我chi̍t-ê證據thang tī全世界證明你kap你ê教友iû-goân是好ê羅馬天主教徒á-bōe？」 |
|
Góa kóng: “Góa pèng bô īⁿ-gī.”
|
我講：「我並無異議。」 |
|
I koh kóng: “Che sī Kàu-hông só͘ phài ê sin chú-kàu ê hi-bōng, ài tùi lí tit-tio̍h hit ê chèng-bêng.”
|
I koh講：「Che是教皇所派ê新主教ê希望，ài tùi你得tio̍h hit ê證明。」 |
|
Góa chiū the̍h chi̍t-tiuⁿ chóa khí-lâi------Che kah-ná chhin-chhiūⁿ beh siau-bia̍t hit-ê mî-ji̍t tùi góa kóng, jiáu-loān góa sìn-gióng ê siaⁿ-im chò pó-pòe ê ki-hōe. Góa chin ài soat-ho̍k ka-kī kóng, goán sui-jiân tī Lô-má Thian-chú kàu-hōe ê ē-bīn iā ōe kun-tòe Siōng-tè ê Ōe, m̄-sī cchí-ū sūn-thàn “Lâng ê thoân-thóng.” Góa siá ē-bīn chiah-ê ōe:
|
我就the̍h chi̍t張紙khiā起來------Che kah-ná親像beh消滅hit-ê暝日對我講，擾亂我信仰ê聲音做寶貝ê機會。我真愛說服ka-kī講，goán雖然tī羅馬天主教會ê下面也ōe跟tòe上帝ê話，m̄是只有順thàn「人ê傳統。」我寫下面chiah-ê話： |
|
“Góa ê chú-kàu, goán chiah-ê tiàm tī Í-lī-lo̍k ê Hoat-kok che̍k Ka-ná-tāi lâng ê î-bîn, goān-ì sio̍k tī Sîn-sèng ê Thian-chú-kàu, Kàu-hông kap Lô-má Kàu-hōe, tû chit-ê í-gōa bô ū kiù-un, ūi-tio̍h beh tùi lí ê chú-koân chèng-bêng, goán sē-io̍k beh chiàu Siōng-tè ê Ōe, chiū-sī goán tī Ki-tok ê Hok-im-su só͘ khòaⁿ ê, lâi ho̍k-chiông lí ê koân-le̍k.”
|
「我ê主教，goán chiah-ê tiàm tī Í-lī-lo̍k ê法國籍加拿大人ê移民，願意屬tī神聖ê天主教、教皇kap羅馬教會，除chit-ê以外無有救恩，為tio̍h beh對你ê主權證明，goán世俗beh照上帝ê話，就是goán tī基督ê福音書所看ê，來服從你ê權力。」 |
|
Góa chhiam-miâ liáu, iā kiò góa ê kàu-iú chhiam-miâ. Āu-lâi chiū the̍h hō͘ Hù-chú-kàu, koh mn̄g i ê ì-kiàn cháiⁿ-iūⁿ. I kóng: “Che chiū-sī góa só͘ ài ê.” I kā góa pó-chèng kóng, Sin chú-kàu tek-khak beh chiap-la̍p chit-ê pó-chèng, it-chhè tek-khak ōe hó-sè.
|
我簽名了，也叫我ê教友簽名。後來就the̍h hō͘副主教，koh問i ê意見cháiⁿ樣。I講：「Che就是我所愛ê。」I kā保證講，新主教的確beh接納chit-ê保證，一切的確ōe好勢。 |
|
Chú-kàu tha̍k liáu góa ê pó-chèng-su ê sî, i iā siūⁿ kóng án-ni tio̍h, iā hoaⁿ-hí kàu lâu ba̍k-sái kóng: “Lí siá chi̍t-ê pó-chèng-su hō͘ góa, góa chin hoaⁿ-hí, in-ūi góa kiaⁿ-liáu lí kap lí ê kàu-iú ōe pìⁿ-chò Sin kàu-tô͘.
|
主教讀了我ê保證書ê時，i也想講án-ni tio̍h，也歡喜到流目屎講：「你寫chi̍t-ê保證書hō͘我，我真歡喜，因為我驚了你kap你ê教友ōe pìⁿ做新教徒。 |
|
Pêng-iú, góa chin kiàn-siàu, góa sêng-jīn góa ê bông-bo̍k, góa bōe kap Siōng-tè hô-hó chiū hoaⁿ-hí kap chit ê lâng ê chú-kàu káng-hô. Chú-kàu hō͘ góa chi̍t-tiuⁿ “Hô-pêng-su,” tùi chit-ê, i toàn-tēng góa sī chi̍t-ê hó ê sîn-hū, jiân-āu góa chiū tńg-khì góa ê kàu-iú hia, koat-sim beh tiàm tī hia. Chóng-sī Siōng-tè khiok tī I ê chû-ài tiong khòaⁿ-kò͘ góa. I beh tû-khì góa hit ê cchí-ū sūn-thàn lâng, bô sūn-thàn Siōng-tè ê hô-pêng ê khè-iok.
|
朋友，我真kiàn-siàu，我承認我ê盲目，我bōe kap上帝和好就歡喜kap chit ê人ê主教講和。主教hō͘我chi̍t張「和平書」，tùi chit-ê，i斷定我是chi̍t-ê好ê神父，然後我就tńg去我ê教友hia，決心beh tiàm tī hia。總是上帝卻tī I ê慈愛中看顧我。I beh除去我hit ê只有順thàn人，無順thàn上帝ê和平ê契約。 |
|
Góa lī-khui chú-kàu liáu āu, i chiū khì Tiān-sìn-kio̍k, chiong góa ê pó-chèng-su ēng tiān-pò thong-ti kî-thaⁿ ê chú-kàu, koh mn̄g in ê ì-kiàn cháiⁿ-iūⁿ. In tī siâng chi̍t-ji̍t īⁿ-khàu tông-im hôe-tap kóng: “Lí kiám m̄-chai Ki-nî-kui sī chi̍t-ê pì-bi̍t ê Sin kàu-tô͘, i iā beh hō͘ lí pìⁿ chiâⁿ chi̍t-ê Sin kàu-tô͘ mah? I só͘ siá ê pó-chèng-su, m̄-sī tùi lí, sī tùi Siōng-tè ê ōe ê pó-chèng. Lí nā bô chiong lí hō͘ i ê hô-pêng-su húi-tiāu, lí pún-sin iā beh hō͘ i éng-hióng chiâⁿ-chòe chi̍t-ê Sin kàu-tô͘.”
|
我離開主教了後，i就去電信局，將我ê保證書用電報通知其他ê主教，koh問in ê意見cháiⁿ樣。In tī siâng chi̍t日異口同因回答講：「你kiám m̄知Ki-nî-kui是chi̍t-ê祕密ê新教徒，i也beh hō͘你pìⁿ chiâⁿ chi̍t-ê新教徒mah？I所寫ê保證書，m̄是對你，是對上帝ê話ê保證。你若無將你hō͘ i ê和平書廢掉，你本身也beh hō͘ i影響chiâⁿ做chi̍t-ê新教徒。」 |
|
Cha̍p-ji̍t āu, góa chiap-tio̍h chi̍t-tiuⁿ chú-kàu ê phoe, góa khì chhōe i ê sî, i mn̄g góa khòaⁿ ū the̍h chêng-ji̍t i hō͘ góa hit-tiuⁿ “Hô-pêng-su” lâi á-bô? Góa chiū the̍h hō͘ i, i khòaⁿ-tio̍h sī chêng-ji̍t hit-tiuⁿ, chiū sûi-sî cháu-khì hóe-lô͘ piⁿ kā i hiat-lo̍h hóe ni̍h, Góa chin gông-ngia̍h. Góa kóaⁿ-kín cháu khì hóe-lô͘ piⁿ siūⁿ beh kā i the̍h khí-lâi, chóng-sī í-keng siuⁿ-bān lah. Hit-tiūⁿ hô-pêng-su í-keng sio khì lah.
|
Cha̍p日後，我接tio̍h chi̍t張主教ê phoe，我去chhōe i ê時，i問我看有the̍h前日i hō͘我hit張「和平書」來á無？我就the̍h hō͘ i，i看tio̍h是前日hit張，就隨時走去火爐邊kā i hiat落火ni̍h，我真gông-ngia̍h。我趕緊走去火爐邊想beh kā i the̍h khiā起來，總是已經siuⁿ慢lah。Hit張和平書已經燒去lah。 |
|
Góa chiū tùi chú-kàu kóng: “Chú-kàu, lí cháiⁿ-iūⁿ káⁿ chiong góa ê khè-iok, chiū-sī góa ê sán-gia̍p, bô keng-kòe góa ê tông-ì chiū hiat-lo̍h hóe-lô͘?”
|
我就對主教講：「主教，你cháiⁿ樣敢將我ê契約，就是我ê產業，無經過我ê同意就hiat落火爐？」 |
|
In ìn kóng: “Ki-nî-kui, góa sī lí ê siōng-si, góa tùi lí pèng bô ū gī-bū.”
|
In應講：「Ki-nî-kui，我是你ê上司，我對你並無有義務。」 |
|
“Chú-kàu, sī, lí si̍t-chāi sī góa ê siōng-sī, iā góa put-kò sī chi̍t-ê sòng-hiong ê sîn-hū, chóng-sī tī lí góa ê téng-bīn ū chi̍t-ūi úi-tāi ê Siōng-tè, chit-ê siōng-tè í-keng siúⁿ-sù góa chèng-gī, hō͘ góa bô beh thó lâng ê hoaⁿ-hí, tī hit-ê Siōng-tè ê bīn-chêng góa beh khòng-gī lí ê chōe-ok.”
|
「主教，是，你實在是我ê上司，也我不過是chi̍t-ê sòng-hiong ê神父，總是tī你我ê頂面有chi̍t位偉大ê上帝，chit-ê上帝已經賞賜我正義，hō͘我無beh討人ê歡喜，tī hit-ê上帝ê面前我beh抗議你ê罪惡。」 |
|
“Hó,” i kóng: “Lí beh lâi chia kā góa soat-jū mah?”
|
「好，」I講：「你beh來chia kā我說jū mah？」 |
|
Góa ìn kóng: “M̄-sī, chú-kàu; góa ài chai tàu-tí lí kiò góa lâi chia sī beh bú-jio̍k góa á m̄-sī?”
|
我應講：「M̄是，主教；我愛知到底你叫我來chia是beh侮辱我á m̄是？」 |
|
“Ki-nî-kui,” i kóng: “Góa kiò lí lâi sī in-ūi lí hō͘ góa hit-tiuⁿ khè-iok, chiàu lí só͘ chai, m̄-sī chi̍t-ê pó-chèng.”
|
「Ki-nî-kui，」I講：「我叫你來是因為你hō͘我hit張契約，照你所知，m̄是chi̍t-ê保證。」 |
|
Góa chiū ìn i kóng: “Kā góa kóng, tàu-tí lí ài tùi góa iàu-kiû sím-mi̍h khoán ê pó-chèng?”
|
我就應i講：「Kā我講，到底你愛對我要求sím-mi̍h款ê保證？」 |
|
I kóng: “Lí tio̍h seng san-tû (Chiàu Siōng-tè ê Ōe, chiū-sī Ki-tok Hok-im-su só͘ kóng ê) chit kúi-kù ōe, koh tio̍h thán-pe̍k sē-iok kóng, lí beh bô tiâu-kiāⁿ sūn-ho̍k góa ê koân-le̍k: iā tio̍h iok-sok bô-lūn góa hoan-hù lí sím-mi̍h, lí lóng chiàu án-ni khì chòe.”
|
I講：「你tio̍h先刪除(照上帝ê話，就是基督福音書所講ê) chit幾句話，koh tio̍h坦白誓約講，你beh無條件順服我ê權力：也tio̍h約束無論我hoan-hù你sím-mi̍h，你lóng照án-ni去做。」 |
|
Góa chiū kūi-teh, kóng: “Chú-kàu, lí tùi góa iàu-kiû ê m̄-sī chi̍t-chióng khè-iok siōng ê pó-chèng, sī chi̍t-chióng kèng-pài, só͘-í góa beh kū-choa̍t lí ê iàu-kiû.”
|
我就跪teh，講：「主教，你對我要求ê m̄是chi̍t種契約上ê保證，是chi̍t種敬拜，所以我beh拒絕你ê要求。」 |
|
I kóng: “Lí nā sī bōe thang hō͘ góa chit-chióng ê pó-chèng, lí chiū bōe thang koh-chài chòe Lô-má Thian-chú-kàu ê sîn-hū.”
|
I講：「你若是bōe thang hō͘我chit種ê保證，你就bōe thang koh再做羅馬天主教ê神父。」 |
|
Góa ǹg Siōng-tè, kia̍h-khí chhiú kóng: “Goán choân-lêng ê Siōng-tè éng-oán siū chheng-chàn,” Jiân-āu the̍h góa ê bō͘-á lī-khui chú-kàu.
|
我ǹg上帝，kia̍h起手講：「Goán全能ê上帝永遠受稱讚，」 然後the̍h我ê帽á離開主教。 |
|
Góa tńg-khì lú-koán, ji̍p-khì góa ê pâng-keng, chiong mn̂g só khí--lâi, góa chiū kūi tī Siōng-tè ê bīn-chêng séng-chhat góa só͘ chòe ê. Hit sî góa thâu chi̍t-pái bêng-bêng khòaⁿ chhut Lô-má Thian-chú kàu-hōe pèng m̄-sī Ki-tok ê Kàu-hōe. Góa bêng-pe̍k chi̍t-hāng thang kiaⁿ-hiâⁿ ê chin-lí, pèng m̄-sī tùi Sin-kàu-tô͘ á-sī i ê tùi-te̍k ê chhùi-tiong, sī tùi Lô-má Thian-chú-kàu pún sin ê chhùi tiong tit-tio̍h ê. Góa í-keng khòaⁿ-chhut tû-liáu góa tī chit-tiuⁿ hêng-sek siōng ê khè-iok-su, hòng-khì Siōng-tè ê ōe í-gōa, góa bōe thang koh tiàm tī in tiong-kan. Hit-sî góa chai góa tio̍h sûi-sî hòng-khì Lô-má Thian-chú kàu-hōe. Chóng-sī, oh! góa ê pêng-iú, ū chi̍t-phìⁿ o͘-hûn khàm-ba̍t góa! Tī chit-ê o͘-àm tiong, góa âu-kiò kóng, “Góa ê Siōng-tè, góa ê Siōng-tè, góa ê lêng-hûn ūi sím-mi̍h hō͘ chiah-ni̍h o͘ ê hûn pau-ûi leh?”
|
我tńg去旅館，入去我ê房間，將門鎖起--來，我就跪tī上帝ê面前省察我所做ê。Hit時我頭chi̍t-pái明明看出羅馬天主教會並m̄是基督ê教會。我明白chi̍t項thang驚惶ê真理，並m̄是tùi新教徒á是i ê對敵ê嘴中，是tùi羅馬天主教本身ê嘴中得tio̍h ê。我已經看出除了我tī chit張形式上ê契約書，放棄上帝ê話以外，我bōe thang koh tiàm tī in中間。Hit時我知我tio̍h隨時放棄羅馬天主教會。總是，oh！我ê朋友，有chi̍t片烏雲khàm-ba̍t我！Tī chit-ê烏暗中，我âu叫講，「我ê上帝，我ê上帝，我ê靈魂為sím-mi̍h hō͘ chiah-ni̍h烏ê雲包圍leh？」 |
|
Góa lâu ba̍k-sái kiû-kiò Siōng-tè chí-sī góa ê lō͘, chóng-sī chin-kú lóng bô tit-tio̍h ìn-tap. Góa í-keng pàng-sak Lô-má Thian-chú Kàu-hōe. Góa í-keng hòng-khì góa ê tē-ūi, bêng-ū, góa ê hiaⁿ-tī kap chí-mōe, chiū-sī múi chi̍t-hāng góa só͘ ài ê, góa lóng pàng-sak lah. Góa khòaⁿ-kìⁿ Kàu-hông tī bûn-jī-siōng, tī káng-tôaⁿ téng teh kong-kek góa. Góa khòaⁿ-kìⁿ in beh chiong góa ê miâ, góa ê tē-ūi sīm-chì liân góa ê sìⁿ-miā, kā góa the̍h cháu. Góa khòaⁿ-kìⁿ tī góa kap Lô-má Thian-chú Kàu-hōe ê tiong-kan siⁿ-sí ê chiàn-cheng í-keng khai-sí, iā góa teh chhōe khòaⁿ ū pêng-iú thang pang-chān góa chok-chiàn á-bô? Chóng-sī bô pòaⁿ ê, góa khòaⁿ-kìⁿ liân góa chò hó ê pêng-iú iā lâi chiù-chó͘ góa, koh khòaⁿ góa sī chi̍t-ê hā-téng ê pōe-ge̍k-chiá. Góa khòaⁿ-kìⁿ góa ê kàu-iú lóng kū-choa̍t góa, tī góa só͘ thiàⁿ ê kò͘-hiong só͘-ū hiah-n̍i̍h chōe ê pêng-iú iā lóng chiù-chó͘ góa, só͘-í góa pìⁿ chòe sè-kan lâng só͘ iàm-o͘N3 ê tùi-siōng.
|
我流目屎求叫上帝指示我ê路，總是真久lóng無得tio̍h應答。我已經放sak羅馬天主教會。我已經放棄我ê地位、名譽、我ê兄弟kap姐妹，就是每chi̍t項我所愛ê，我lóng放sak lah。我看見教皇tī文字上、tī講壇頂teh攻擊我。我看見in beh將我ê名、我ê地位甚至連我ê性命，kā我the̍h走。我看見tī我kap羅馬天主教會ê中間生死ê戰爭已經開始，也我teh chhōe看有朋友thang幫贊我作戰á無？總是無半ê，我看見連我最好ê朋友也來chiù俎我，koh看我是chi̍t-ê下等ê背逆者。我看見我ê教友lóng拒絕我，tī我所疼ê故鄉所有hiah-n̍i̍h chōe ê朋友也lóng chiù俎我，所以我pìⁿ做世間人所厭惡ê對象。 |
|
Āu-lâi góa chiū siūⁿ khòaⁿ tī Sin kàu-tô͘ ê tiong-kan ū chi̍t-kóa pêng-iú á bô, chóng-sī chiàu góa só͘ kóng, só͘ siá ê, tī góa ê seng-gâi tiong góa sī kap in tùi-li̍p ê, só͘-í góa bô pêng-iú tī in tiong-kan. Góa khòaⁿ-kìⁿ cchí-ū sī góa chi̍t-ê teh èng-chiàn. Tī hit-ê thang kiaⁿ-hiâⁿ ê sî-kan tiong, nā m̄-sī Siōng-tè kiâⁿ sîn-jiah, góa it-tēng bōe thang tam-tng hit-ê chek-jīm. Hit-sî góa kah-ná chhin-chhiūⁿ bōe thang lī-khui góa chit-keng pâng-keng chìn-ji̍p hân-léng ê sè-kài, tī hia bô lâng thang lâi kap góa ak-chhiú, iā bô lâng beh ēng chhiò-iông khòaⁿ góa, tī hia góa chí-ū khòaⁿ-kìⁿ hiah-ê khòaⁿ góa chòe poān-tô͘ ê lâng nā-tiāⁿ.
|
後來我就想看tī新教徒ê中間有chi̍t-kóa朋友á無，總是照我所講、所寫ê，tī我ê生涯中我是kap in對立ê，所以我無朋友tī in中間。我看見只有是我chi̍t-ê teh迎戰。Tī hit-ê thang驚惶ê時間中，若m̄是上帝行神跡，我一定bōe thang擔當hit-ê責任。Hit時我kah-ná親像bōe thang離開我chit間房間進入寒冷ê世界，tī hia無人thang來kap我握手，也無人beh用笑容看我，tī hia我只有看見hiah-ê看我最叛徒ê人nā-tiāⁿ。 |
|
Hit-sî Siōng-tè kah-ná chhin-chhiūⁿ lī-khui góa chin hn̄g, kî-si̍t I tī góa ê sin-piⁿ. Hut-jiân ū chit-ê su-sióng chìn-ji̍p góa ê sim: “Lí ū Hok-im-su, tio̍h tha̍k, lí chiū beh tit-tio̍h kng.” Góa kūi-lo̍h-khì, ēng góa phi̍h8-phi̍h8-chhoah ê chhiú lâi hian-khui hit-pún chheh. M̄-sī góa pún-sin khì hian, sī Siōng-tè ín-chhōa góa hian-khui hō͘ góa khòaⁿ tio̍h. Ko-lîm-to chiân-su 7 chiuⁿ 23 chat: “Lín sī ēng kè-chîⁿ só͘ bóe ê, m̄-thang chiâⁿ-chòe lâng ê lô͘-châi.”
|
Hit時上帝kah-ná親像離開我真hn̄g，其實I tī我ê身邊。忽然間有chit-ê思想進入我ê心：「你有福音書，tio̍h讀，你就beh得tio̍h光。」我跪落去，用我phi̍h8-phi̍h8-chhoah ê手來hian開hit本冊。M̄是我本身去hian，是上帝引chhōa我hian開hō͘我看tio̍h。哥林多戰士章23節：「Lín是用假錢所買ê，m̄-thang chiâⁿ做人ê奴才。」 |
|
Tùi chit-kù ōe, kng chiū ji̍p góa ê sim, che sī góa thâu chi̍t-pái khòaⁿ tio̍h úi-tāi kiù-un ê ò-biāu. Góa tùi ka-kī kóng, “Iâ-so͘ í-keng sio̍k góa, siat-sú Iâ-so͘ í-keng sio̍k góa, I iā beh kiù góa; góa í-keng tit-kiù lah! Iâ-so͘ sī góa ê Siōng-tè! Siōng-tè it-chhè ê kang-chok lóng oân-sêng lah! Iâ-so͘ bōe ōe cchí-ū chín-kiù góa chit-pòaⁿ, góa í-keng oân-choân tit-tio̍h kiù lah. Góa tùi Iûⁿ-ko ê Pó Hui̍h siū chín-kiù lah; góa tùi Iâ-so͘ ê sí tit-tio̍h kiù lah.” Chiah ê ōe tùi tī góa ū kóng bōe-chhut ê khoài-lo̍k, kah-ná chhin-chhiūⁿ oa̍h-miā ê chúi-chôaⁿ í-keng khui, sîn ê kng hoàn-lām chìn-ji̍p góa ê lêng-hûn. Góa koh tùi ka-kī kóng, “Chiàu góa siūⁿ, góa nā khì chiū-kūn Má-lī-a sī bōe tit-tio̍h kiù ê; góa iā m̄ sī tùi liān-ge̍k, á-sī tùi chhàm-hóe lâi sià-chōe, á-sī tùi khó͘-hēng lâi tit-kiù. Góa chí ū tùi Iâ-so͘ lâi tit-tio̍h kiù!” Tùi án-ni, Lô-má Thian-chú-kàu it-chhè hi-ké ê kàu-gī lóng tùi góa ê sim-tiong bô khì, chhin-chhiūⁿ chi̍t-ê thah, liân tē-ki lóng siū húi-hoāi tó-loh7-khì chi̍t-iūⁿ.
|
對chit句話，光就入我ê心，che是我頭chi̍t-pái看tio̍h偉大救恩ê奧妙。我對ka-kī講，「耶穌已經屬我，設使耶穌已經屬我，I也beh救我；我已經得救lah！耶穌是我ê上帝！上帝一切ê工作lóng完成lah！耶穌bōe ōe只有拯救我chit半，我已經完全得tio̍h救lah。我tùi羊羔ê寶血受拯救lah；我tùi耶穌ê死得tio̍h救lah。」Chiah ê話對tī我有講bōe出ê快樂，kah-ná親像活命ê水泉已經開，神ê光hoàn-lām進入我ê靈魂。我koh對ka-kī講，「照我想，我若去就近Má-lī-a是bōe得tio̍h救ê；我iā m̄是tùi煉獄，á是tùi懺悔來赦罪，á是tùi苦刑來得救。我只有tùi耶穌來得tio̍h救！」Tùi án-ni，羅馬天主教一切虛假ê教義lóng tùi我ê心中無去，親像chi̍t-ê塔，連地基lóng受毀壞倒落去chi̍t樣。 |
|
Hit-sî góa kám-kak chi̍t-chióng liân Siōng-tè ê thiⁿ-sài iā bōe-thang pí góa khah hēng-hok ê khoài-lo̍k kap pêng-an. Iûⁿ-ko ê Pó Hui̍h lâu-ji̍p góa chit-ê khó-lîn ū chōe ê lâng ê lêng-hûn.
|
Hit時我感覺chi̍t種連上帝ê天使也bōe-thang比我khah幸福ê快樂kap平安。羊羔ê寶血流入我chit-ê可憐有罪ê人ê靈魂。 |
|
Góa chin khoài-lo̍k tōa-siaⁿ kiò kóng, “Oh! chhin-ài ê Iâ-so͘, góa í-keng ū kám-kak, góa chai lah; Lí í-keng chín-kiù góa! Oh! Siōng-tè ê lé-mi̍h, góa chiap-la̍p Lí! Kiû Lí chìn-ji̍p góa ê sim, pó-siú kàu éng-oán. Siōng-tè ê lé-mi̍h, kiû Lí tiàm tī góa lāi-bīn, hō͘ góa chheng-khì koh ióng-chòng; kiû Lí tiàm tī góa ê lāi-bīn chòe góa ê lō͘, chòe góa ê kng, koh chòe góa oa̍h-miā; kiû Lí hō͘ góa tùi chit-tia̍p kàu éng-oán ōe thang tiàm tī Lí lāi-bīn! Chóng-sī chhin-ài ê Iâ-so͘ kiû Lí m̄-thang chí-ū chín-kiù góa chi̍t-ê: iā tio̍h chín-kiù góa ê tông-pau; kiû Lí iông-ún góa ōe thang chiong chit-ê lé-mi̍h pò in chai! Oh! In iā beh chiap-la̍p Lí, iā beh chhin-chhiūⁿ hiān-chāi ê góa, tit-tio̍h pù-ū kap hēng-hok.”
|
我真快樂大聲叫講，「Oh！親愛ê耶穌，我已經有感覺，我知lah；你已經拯救我！Oh！上帝ê禮mi̍h，我接納你！求你進入我ê心，保守到永遠。上帝ê禮mi̍h，求你tiàm tī我內面，hō͘我清氣koh勇壯；求你tiàm tī我ê內面做我ê路，做我ê光，koh做我活命；求你hō͘我tùi chit-tia̍p到永遠ōe thang tiàm tī你內面！總是親愛ê耶穌求你m̄-thang只有拯救我chi̍t-ê：也tio̍h拯救我ê同胞；求你容允我ōe thang將chit-ê禮mi̍h報in知！Oh！In也beh接納你，也beh親像現在ê我，得tio̍h庇佑kap幸福。」 |
|
Góa chiū-sī án-ni chhōe tio̍h hit-ê Kng kap kiù-un chòe-tōa ê ò-biāu, sī hiah-n̍i̍h kán-tan koh hiah-n̍i̍h bí-lē, hiah-n̍i̍h chòng-giâm, koh hiah-n̍i̍h úi-tāi. Góa í-keng chhun-khui góa lêng-hûn ê chhiú lâi chiap-siū chit-ê lé-mi̍h. Tī chi̍t ê lé-mi̍h ê lāi-bīn góa sī pù-ū. Pêng-iú, kiù-un chiū-sī lé-mi̍h; tû-khì chiap-la̍p i, thiàⁿ i, koh thiàⁿ hit-ê siúⁿ-sù lé-mi̍h ê Chú í-gōa, lí m̄-bián chòe sím-mi̍h. góa chiong chit ê Hok-im khǹg tī góa ê chhùi-tûn, koh li̍p-chì tû-liáu Iâ-so͘ í-gōa bô beh thoân pa̍t-ê.
|
我就是án-ni chhōe tio̍h hit-ê光kap救恩最大ê奧妙，是hiah-n̍i̍h簡單koh hiah-n̍i̍h美麗，hiah-n̍i̍h莊嚴，koh hiah-n̍i̍h偉大。我已經chhun開我靈魂ê手來接受chit-ê禮mi̍h。Tī chi̍t ê禮mi̍h ê內面我是庇佑。朋友，救恩就是禮mi̍h；除去接納i，疼i，koh疼hit-ê賞賜禮mi̍h ê主以外，你m̄免做sím-mi̍h。我將chit ê福音khǹg tī我ê嘴唇，koh立志除了耶穌以外無beh傳別ê。 |
|
Tī lé-pài-ji̍t chá-khí, góa tńg-khì kàu goán ê î-bîn-khu tiong. Choân-thé ê peh-sìⁿ chin heng-hùn cháu lâi mn̄g góa khòaⁿ ū sím-mi̍h siau-sit. Tng in lóng chū-chi̍p tī Kàu-hōe lāi ê sî, góa chiong chit-ê lé-mi̍h thoân hō͘ in. Góa pò in chai Siōng-tè cháiⁿ-iūⁿ chiong I ê Kiáⁿ Iâ-so͘ chòe lé-mi̍h siúⁿ-sù hō͘ góa, koh thong-kòe Iâ-so͘ lâi sià-bián góa ê chōe, iā chit-ê lé-mi̍h hō͘ góa tit-tio̍h éng-oán ê oa̍h-miā. Hit-sî góa m̄-chai in-ūi beh chiap-la̍p chit-ê lé-mi̍h á-m̄, chiū tùi in kóng, “Góa ê pêng-iú, hiān-chāi sī góa tio̍h lī-khui lín ê sî, Góa éng-oán beh thoat-lī Lô-má Thian-chú-kàu. Góa í-keng chiap-la̍p Ki-tok ê lé-mi̍h, in-ūi góa cha̍p-hun chun-tiōng lín, chiah beh chiong pún-sin só͘ tit-tio̍h ê thoân hō͘ lín; Siat-sú lín nā siūⁿkóng kun-tòe Kàu-hông sī pí kun-tòe Ki-tok khah hó, koh ūi-tio̍h beh tit-tio̍h kiù, hōng Má-lī-a ê miâ kiû, sī pí hōng Iâ-so͘ ê miâ kiû khah hó, chhiáⁿ khiā khí-lâi piáu-sī.”
|
Tī禮拜日早起，我tńg去到goán ê移民區中。全體ê百姓真興奮走來問我看有sím-mi̍h消息。Tng in lóng聚集tī教會內ê時，我將chit-ê禮mi̍h傳hō͘ in。我報in知上帝cháiⁿ樣將I ê Kiáⁿ耶穌做禮mi̍h賞賜hō͘我，koh通過耶穌來赦免我ê罪，也chit-ê禮mi̍h hō͘我得tio̍h永遠ê活命。Hit時我m̄知因為beh接納chit-ê禮mi̍h á-m̄，就對in講，「我ê朋友，現在是我tio̍h離開lín ê時，我永遠beh脫離羅馬天主教。我已經接納基督ê禮mi̍h，因為我cha̍p分尊重lín，chiah beh將本身所得tio̍h ê傳hō͘ lín；設使lín若想講跟tòe教皇是比跟tòe基督khah好，koh為tio̍h beh得tio̍h救，奉Má-lī-a ê名求，是比奉耶穌ê名求khah好，請khiā khiā起來表示。」 |
|
Hō͘ góa hui-siông gông-ngia̍h ê, chiū sī choân-thé ê hōe-chiòng lóng iû-goân chē teh, tāi-ke lóng thî-khàu lâu ba̍k-sái. Góa siūⁿ kóng in tiong-kan ū lâng ōe kiò góa lī-khui, chóng-sī bô lâng án-ni chòe. Tng góa chù-sîn khòaⁿ in ê sî, góa khòaⁿ chhut ū chi̍t-chióng kái-piàn lîm-chāi tī in tiong-kan, chiū-sī ēng chū-jiân ê hong-hoat só͘ bōe thang soat-bêng ê kî-biāu kái-piàn, tùi án-ni góa chiū ēng hoaⁿ-hí khoài-lo̍k ê siaⁿ tùi in kóng:
|
Hō͘我非常gông-ngia̍h ê，就是全體ê會眾lóng iû-goân坐teh，tāi-ke lóng啼哭流目屎。我想講in中間有人ōe叫我離開，總是無人án-ni做。Tng我注神看in ê時，我看出有chi̍t種改變臨在tī in中間，就是用自然ê方法所bōe thang說明ê奇妙改變，tùi án-ni我就用歡喜快樂ê聲對in講： |
|
“Choân-lêng ê Siōng-tè chā-ji̍t chín-kiù góa, kin-á-ji̍t iā beh chín-kiù lín. Lín beh kap góa saⁿ-kap keng-kòe Ang-hái, lâi chìn-ji̍p só͘ èng-ún ê thó͘-tōe. Lín beh kap góa saⁿ-kap chiap-siū hit-ê chòe-tōa ê lé-mi̍h, tùi chit ê lé-mi̍h lín beh tit-tio̍h khoài-lo̍k kap pù-ū. Góa beh ēng pa̍t-ê hong-hoat chiong chit-ê būn-tôe hō͘ lí. Siat-sú lín nā siūⁿ kóng kun-tòe Ki-tok sī pí kun-tòe Kàu-hông khah hó; cchí-ū kiû-kiò Iâ-so͘ ê miâ sī pí kiû-kiò Má-lī-á ê miâ khah hó, cchí-ū sìn-khò ūi-tio̍h lín ê chōe tī Si̍p-jī-kè téng só͘ lâu Iûⁿ-ko ê hui̍h, sī pí sìn-khò Lô-má Thian-chú-kàu só͘ thoân sí āu keng-kòe liān-ge̍k chiah ōe tit-tio̍h kiù khah hó; koh lín nā siūⁿ kóng góa tī chia chiong sûn-chūi ê Ki-tok ê Hok-im thoân hō͘ lín sī pí tit-tio̍h chi̍t ê sîn-hū chiong Lô-má Thian-chú-kàu ê kàu-gī thoân hō͘ lín khah hó, chhiáⁿ lín khiā khí lâi kā góa kóng------góa chiū sī sio̍k tī lín ê lâng!”
|
「全能ê上帝昨日拯救我，今á日也beh拯救lín。Lín beh kap我 saⁿ-kap經過紅海，來進入所應允ê土地。Lín beh kap我saⁿ-kap接受hit-ê最大ê禮mi̍h，tùi chit ê禮mi̍h lín beh得tio̍h快樂kap庇佑。我beh用別ê方法將chit-ê問題hō͘你。設使lín若想講跟tòe基督是比跟tòe教皇khah好；只有求叫耶穌ê名是比求叫Má-lī-á ê名khah好，只有信靠為tio̍h lín ê罪tī十字架頂所流羊羔ê血，是比信靠羅馬天主教所傳死後經過煉獄chiah ōe得tio̍h救khah好；koh lín若想講我tī chia將純粹ê基督ê福音傳hō͘ lín是比得tio̍h chi̍t ê神父將羅馬天主教ê教義傳hō͘ lín khah好，請lín khiā起來kā我講------我就是屬tī lín ê人！」 |
|
Choân-thé, bô chi̍t-ê lē-gōa, lóng-chóng khiā khí lâi, koh lâu ba̍k-sái iàu-kiû góa tio̍h kè-sio̍k tiàm tī in tiong-kan.
|
全體，無chi̍t-ê例外，lóng總khiā起來，koh流目屎要求我tio̍h繼續tiàm tī in中間。 |
|
Chit-ê úi-tāi ê lé-mi̍h, chiū-sī ēng ōe bōe-thang kóng chhut ê lé-mi̍h, thâu chi̍t-pái tī in ê ba̍k-chiu chêng hián-chhut i ê bí-lē; in hoat-kiàn tio̍h pó-pòe, in chiap-la̍p chit-ê lé-mi̍h, tī chiah-ê kûn-chiòng ê tiong-kan, ū kóng bōe chhut ê khoài-lo̍k. Tùi chit-ê lé-mi̍h, in iā chhin-chhiūⁿ góa kak-tit pù-ū kap hēng-hok. Góa siong-sìn tī hit-ji̍t 1000 ê lêng-hûn ê miâ-jī í-keng kì tī Oa̍h-miā chheh ê lāi-bīn. La̍k-ge̍h ji̍t āu, goán í-keng ū 2000 ê kái-chong-chiá; chi̍t-nî āu ke-thiⁿ kàu 4000 ê, Hiān-chāi goán í-keng ū kūn 25000 lâng thǹg-khì in ê kū-saⁿ, tùi Iûⁿ-ko ê pó-hui̍h lâi tit-tio̍h sóe chheng-khì.
|
Chit-ê偉大ê禮mi̍h，就是用話bōe-thang講出ê禮mi̍h，頭chi̍t-pái tī in ê目chiu前顯出i ê美麗；in發見tio̍h寶貝，in接納chit-ê禮mi̍h，tī chiah-ê群眾ê中間，有講bōe出ê快樂。Tùi chit-ê禮mi̍h，in也親像我覺得庇佑kap幸福。我相信tī hit日1000 ê靈魂ê名字已經記tī活命冊ê內面。La̍k月日後，goán已經有2000 ê改宗者；chi̍t年後加添到4000 ê，現在goán已經有近25000人thǹg去in ê舊衫，tùi羊羔ê寶血來得tio̍h洗清氣。 |
|
Chit-ê siau-sit chin kín chiū thoân-piàn choân Bí-kok, sīm-chì thoân kàu Hoat-kok kap Eng-kok, kóng------hit ê Ka-ná-tāi chhut-miâ ê sîn-hū Ki-nî-kui tī chit-kûn ko-siōng ê jîn-sū bīn-chêng thoat-lī Lô-má Thian-chú-kàu. Koh tò-chhù thoân kóng Iâ-so͘ Ki-tok sī thang chheng-chàn ê, góa ǹg-bāng lín kin-ná-ji̍t iā ōe thang kap góa saⁿ-kap o-ló hit-ūi chû-pi thang chun-kèng ê Kiù-chú, che sī góa ê te̍k-koân tio̍h kā lín kóng, I ūi-tio̍h góa ê lêng-hûn chòe sím-mi̍h.
|
Chit-ê消息真緊就傳遍全美國，甚至傳到法國kap英國，講------hit ê加拿大出名ê神父Ki-nî-kui tī chit群高尚ê人士面前脫離羅馬天主教。Koh到處傳講耶穌基督是thang稱讚ê，我ǹg望lín今ná日也ōe thang kap我saⁿ-kap o-ló hit位慈悲thang尊敬ê救主，che是我ê特權tio̍h kā lín講，I為tio̍h我ê靈魂做sím-mi̍h。 |
|
Chhiáⁿ lín ūi-tio̍h tī Bí-kok í-kip kok só͘-chāi ê Lô-má Thian-chú kàu-tô͘ kî-tó, kiû chû-ài ê Siōng-tè hō͘ góa chòe I ê khì-kū khì chiū-kūn in; hō͘ in lóng-chóng ōe thang kap lín saⁿ-kap lâi chiap-la̍p chit-ê kóng bōe chīn ê lé-mi̍h. Goān Siōng-tè thiàⁿ-thàng kap êng-kng ê lé-mi̍h lîm-chāi tī lán tiàm chit sè-kan chiām-sî ê lō͘-thêng, ti̍t-kàu éng-pán. A-men.
|
請lín為tio̍h tī美國以及各所在ê羅馬天主教徒祈禱，求慈愛ê上帝hō͘我做I ê器具去就近in；hō͘ in lóng總ōe thang kap lín saⁿ-kap來接納chit-ê講bōe盡ê禮mi̍h。願上帝疼thàng kap榮光ê禮mi̍h臨在tī lán tiàm chit世間暫時ê路程，直到永pán。A-men。 |
|
Iûⁿ Chiong-hùn hoan-e̍k 1954 nî 5 goe̍h 22 ji̍t Tī Tâi-pak |
Iûⁿ Chiong-hùn翻譯 1954年5月22日 Tī台北 |
