Kám-siā Bú-chhin
|
感謝母親 |
| Gô͘ Éng-hôa |
吳永華 |
|
Siā-lūn--
|
社論-- |
|
Ū chi̍t só͘-chāi chi̍t ê ka-têng, ū chi̍t ê tōa-chí kap sió-tī. I ê pē-bú lâu chit nn̄g ê bô thang i-óa ê sió pêng-iú, sio-sòa lī-khui sè-kan.
|
有一所在一個家庭，有一個大姊kap 小弟。伊ê父母留一兩個無thang依倚ê小朋友，相續離開世間。 |
|
Bô i-óa ê chit nn̄g ê sió pêng-iú chiū hō͘ i ê a-chek siu-liû lâi ióng-io̍k. I ê a-chek iā sī ū kúi-nā ê kiáⁿ-jî. Tī a-chek ê ke ū thang chia̍h kap chhēng-sio, iáu-kú in si̍t-chāi sī bōe thang kè tio̍h chin ê ka-têng ê khoài-lo̍k, in-ūi in a-chím ū sî bô sím-mi̍h hó khoán-thāi in. In-ūi i ka-kī ū kiáⁿ-jî tī-teh.
|
無依倚ê這2個小朋友就hō͘伊ê阿叔收留來養育。伊ê阿叔也是有幾若個子兒。Tī 阿叔ê家有thang 食 kap穿燒，iáu-kú in實在是bōe thang過著真ê家庭ê快樂，因為in 阿嬸有時無甚mi̍h好款待--in。因為伊家己有子兒tī--teh。 |
|
Ū chi̍t ji̍t, chit ê a-chek bóe chi̍t chiah saⁿ-lián ê gín-á chhia tńg-khì hō͘ i ê kiáⁿ thit-thô.
|
有一日，這個阿叔買一隻三lián ê 囡仔車轉去hō͘伊ê子thit-thô。 |
|
Chit ê ko͘-jî in tōa-chí í-keng tit-tio̍h a-chek ê thiàⁿ, tī chho͘-tiong teh tha̍k-chheh, i ê sió-tī iáu sī kok-bîn ha̍k-hāu ê it-liân seng. Khòaⁿ-tio̍h a-chek ê kiáⁿ ū saⁿ-lián-chhia thang thit-thô, beh kā i chioh, iā bô thang pun i thit-thô, khiā teh gōng-gōng khòaⁿ, iā m̄-káⁿ tùi a-chek thó. Siūⁿ kóng, goán a-bú nā ū tī-teh, góa tek-khak iā ū chit khoán ê chhia thang thit-thô. Sim chin ài, só͘-í tùi i ê a-chí kóng, “A-chí, lí bóe chi̍t chiah hō͘ góa hó mah?”
|
這個孤兒in大姊已經得著阿叔ê 疼，tī初中teh 讀冊，伊ê小弟 iáu 是國民學校ê一年生。看著阿叔 ê子有三lián車thang thit-thô,beh kā伊借，也無thang分伊thit-thô,企teh憨憨看，也m̄敢對阿叔討。想講：「阮阿母若有tī--leh，的確也有這款ê車thang thit-thô。」 心真愛，所以對伊ê 阿姊講：「阿姊，你買一隻 hō͘--我好--mah？」 |
|
I ê a-chí khòaⁿ liáu ba̍k-sái lâu ji̍p-khì, siūⁿ-tio̍h i kap i ê sió-tī ê ūn-bēng, hiān-chāi sī hō͘ a-chek teh kā lán khòaⁿ-kò͘, beh thài ū chîⁿ thang bóe neh! Iā m̄-káⁿ tùi a-chek thó, m̄-kú siūⁿ-tio̍h i ê sió-tī chit khoán ê ì-ài, chiū kā i ê sió-tī kóng, “Hó, góa chiah bóe chi̍t chiah hō͘ lí, m̄-kú tio̍h tán kàu saⁿ lé-pài āu chiah ōe thang bóe hō͘ lí.”
|
伊ê阿姊看了目屎流--入去，想著伊kap伊ê小弟ê運命，現在是 hō͘阿叔teh kā咱看顧，beh thài 有錢thang買--neh！也m̄敢對阿叔討，m̄-kú 想著伊ê小弟這款ê意愛，就kā 伊ê小弟講：「好，我才買一隻hō͘你，m̄-kú 著等到三禮拜後才會thang買hō͘ --你。」 |
|
In sió-tī thiaⁿ liáu sim kàu-ke̍k hoaⁿ-hí teh thèng-hāu. In a-chí ūi-tio̍h i ê sió-tī, chiū tī ha̍k-hāu tùi tông-o̍h ê tiong-kan te̍k-pia̍t tùi lâng ín chhau-siá ê kang lâi chòe, thong-ji̍t thong-mî ūi-tio̍h ài thàn tām-po̍h chîⁿ lâi bóe saⁿ-lián-chhia hō͘ i ê sió-tī. Ló͘-le̍k chòe kang saⁿ lé-pài kú. Iok-sok ê ji̍t í-keng kàu, chóng-sī a-chí thàn iáu bōe kàu hiah chōe chîⁿ, hit ji̍t te̍k-pia̍t-chòe kang chòe khah àm, ài thàn kàu-gia̍h ê chîⁿ thang bóe chhia tńg-khì hō͘ i ê sió-tī.
|
In小弟聽了心到極歡喜teh聽候。In阿姊為著伊ê小弟，就tī學校tùi同學ê 中間特別tùi人引抄寫ê工來做，通日通暝為著 ài趁淡薄錢來買三lián車hō͘伊ê 小弟。努力做工三禮拜久。約束ê 日已經到，總是阿姊趁iáu未到hiah濟錢，hit日特別做工做較暗，ài趁到額ê錢thang 買車轉去hō͘ 伊ê小弟。 |
|
I ê sió-tī tī chhù-ni̍h ti̍t-ti̍t thèng-hāu, chóng-sī i ê a-chí lóng iáu bē tńg-lâi. Sió-tī tán kui ji̍t, tán bô; só͘-í chiū chhut-khì koe-lō͘ ê gōa-bīn lâi tán i ê a-chí.
|
伊ê小弟tī厝--ni̍h直直聽候，總--是伊ê阿姊攏iáu未轉--來。小弟等歸日，等無；所以就出去街路ê外面來等伊ê阿姊。 |
|
Tán kàu pòaⁿ-mî, hit ji̍t tú teh lo̍h hō͘. Só͘-í chin kôaⁿ, iā sòa ak tâm i ê seng-khu. In-ūi ài hit chiah saⁿ-lián-chhia, chiū ti̍t-ti̍t tiàm hia tán i ê a-chí. I ê a-chí kó-jiân kàu chin àm chiah tit-tio̍h kàu-gia̍h ê chîⁿ, chiū bóe chi̍t chiah súi-súi ê saⁿ-lián-chhia tńg--lâi. Tī lō͘-tiong khòaⁿ-tio̍h i ê sió-tī hō͘ hō͘ ak-tâm teh thèng-hāu i ê chhia. Khòaⁿ-tio̍h saⁿ-lián-chhia, sim kàu-ke̍k hoaⁿ-hí. M̄-kú i ê sió-tī siū hō͘ ak tâm, tì-kàu hit àm hoat jia̍t, sòa khí hì-iām.
|
等到半暝，hit日tú teh落雨。所以真寒，也續沃tâm伊ê身軀。因為ài hit隻三lián車，就直直tiàm hia等伊ê阿姊。伊ê阿姊果然到真暗才得著夠額ê錢，就買一隻 súi-súi ê 三lián車轉--來。Tī 路中看著伊ê小弟hō͘雨沃tâm teh聽候伊ê車。看著三lián車，心到極歡喜。M̄-kú伊ê小弟受雨沃tâm,致到hit暗發熱，續起肺炎。 |
|
Só͘ ài ê saⁿ-lián-chhia ū tit-tio̍h, chóng-sī iáu bōe thit-thô--tio̍h, chit ê khó-lîn ê gín-ná lâu i ê a-chí kap saⁿ-lián-chhia, tùi hì-iām chiū lī-khui sè-kan lah!
|
所愛 ê三lián車有得--著，總是iáu未thit-thô著，這個可憐ê 囡仔留伊ê阿姊kap三lián車，tùi肺炎就離開世間--lah！ |
|
Ah! chit ê gín-á cháiⁿ-iūⁿ ōe án-ni, in ê ūn-miā thài ōe chiah chhiⁿ-chhám, kiám m̄-sī in-ūi i sī ko͘-jî mah!
|
Ah！這個囡仔怎樣會án-ni，in ê 運命thài會chiah悽慘，kiám m̄是因為伊是孤兒-- mah！ |
|
Só͘-í tī Bú-chhin-cheh ê sî, góa siông-siông siūⁿ-tio̍h chit ê kò͘-sū, kek-tōng góa ū kám-siā ê sim móa-móa.
|
所以tī母親節ê時，我常常想著這個故事，激動我有感謝ê心滿滿。 |
|
Tē-it, ài kám-siā Siōng-tè, in-ūi ū Siúⁿ-sù lán chiah thang chun-tiōng ê bú-chhin.
|
第一，ài感謝上帝，因為有賞賜咱chiah thang 尊重ê 母親。 |
|
Tē-jī, sī ài kám-siā bú-chhin, in-ūi i ê chûn-chāi ū hō͘ lán tit-tio̍h chōe-chōe ê an-ùi. Bú-chhin, ūi-tio̍h lán cháiⁿ-iūⁿ hi-seng, jím-nāi, chòe kang. Siat-sú lán nā bô lāu-bú, m̄-chai lán ōe tú-tio̍h sím-mi̍h kéng-gū.
|
第二、是ài感謝母親，因為伊ê存在有hō͘咱得著濟濟ê安慰。母親，為著咱怎樣犧牲，忍耐，做工。設使咱若無老母，m̄知咱會tú著甚mi̍h境遇。 |
|
Ah! Lāu-bú chiū-sī jîn-lūi hēng-hok ê kì-hō.
|
Ah！老母就是人類幸福ê記號。 |
|
Bô lāu-bú ê gín-á, in ê kéng-ū sī cháiⁿ-iūⁿ? Ū lāu-bú, koh gâu ê lāu-bú éng-hióng i ê kiáⁿ kàu cháiⁿ-iūⁿ?
|
無老母ê囡仔，in ê境遇是怎樣? 有老母，koh gâu ê 老母影響伊ê 子到怎樣? |
|
Chhì khòaⁿ St. Augustine ê lāu-bú kiám m̄-sī hō͘ chit ê hòng-tōng ê kiáⁿ piàn-chòe chi̍t ê sèng-jîn mah?
|
試看聖奧古斯丁ê老母kiám m̄ 是hō͘這個放蕩ê子變做一個聖人-- mah？ |
|
Úi-jîn ê tiong-kan ū sím-mi̍h lâng bô i ê lāu-bú ê kám-hòa, éng-hióng tī-teh neh?
|
偉人ê中間有甚mi̍h人無伊ê老母ê感化，影響tī--teh neh? |
|
Chit ê úi-tāi, thiàⁿ-thàng móa-móa gâu thun-lún ê bú-chhin, lán sī kan-ta tī Bú-chhin-cheh ê ji̍t lâi siūⁿ-khí, lâi kám-siā, lâi siàu-liām, chàn-iông chiū kàu-gia̍h mah!
|
這個偉大、疼痛滿滿gâu吞忍ê 母親，咱是kan-ta tī母親節ê日來想起，來感謝，來數念，讚揚就夠額mah！ |
|
Chim-giân 10:1, “Tì-hūi ê kiáⁿ hō͘ lāu-pē hoaⁿ-hí; gû-gōng ê kiáⁿ hō͘ lāu-bú iu-būn.”
|
箴言10:1：「智慧ê子hō͘ 老父歡喜，愚憨ê子hō͘老母憂悶。」 |
|
Chim-giân 15:20, “Tì-hūi ê kiáⁿ hō͘ lāu-pē hoaⁿ-hí; gōng-lâng khòaⁿ-khin i ê lāu-bú.”
|
箴言15:20：「智慧ê子hō͘ 老父歡喜，憨人看輕伊ê老母。」 |
|
Tio̍h kám-siā lán múi chi̍t ūi ê bú-chhin, chun-tiōng i. Kiû Siōng-tè sù-hok tī lán ê bú-chhin ê téng-bīn hō͘ i tn̂g hè-siū, hoaⁿ-hí khoài-lo̍k.
|
著感謝咱每一位ê母親，尊重--伊。求上帝賜福tī咱ê母親ê頂面 hō͘伊長歲壽，歡喜快樂。 |
|
(Tâi-oân Kàu-hōe Kong-pò tē 785 hō, 1954 nî 5 ge̍h)
|
(台灣教會公報第785號，1954年5月) |
