Sin Chong-kàu Kio̍k-pún_03
|
新宗教劇本_03 |
|---|---|
| Bô Chù-bêng | 無注明 |
|
Sè-kan tē-it iàu-kín ê sī sím-mi̍h?
|
世間第一要緊--ê是甚mi̍h？ |
|
(Khah tōa hàn ê 8 miâ)
|
（較大漢--ê 8名） |
|
Lia̍t-ūi chhin-ài ê hiaⁿ ché pêng-an. Goán chit kúi ê sī tông-ha̍k, goán ê lāu-su ū chhut chi̍t ê siok-tê hō͘ goán, chiū-sī kóng: “Sè-kan tē it iàu-kín ê sī sím-mi̍h”? Taⁿ goán kok-kok ū chún-pī hó lah, ài beh chi̍t ê chi̍t ê kóng hō͘ tāi-ke thiaⁿ, ǹg-bāng tit-tio̍h kok-ūi ê chí-kàu.
|
列位親愛ê兄姐平安。阮這幾個是同學，阮ê老師有出一個習題hō͘阮，就是講：「世間第一要緊--ê是甚mi̍h」？今阮各各有準備好--lah，ài beh一個一個講hō͘大家聽，向望得著各位ê指教。 |
|
A): Góa siūⁿ sè-kan tē-it iàu-kín sī chîⁿ, sio̍k-gú kóng “Ū chîⁿ sái kúi ē e-bō”, á-sī kóng “Chîⁿ nā bô, lâng chiū sô”. Chhiáⁿ lí siūⁿ khah chin, bô lūn beh chò sím-mi̍h, kiám ū chi̍t-hāng m̄-bián chîⁿ ē ēng tit ê, bô chîⁿ chiū kiâⁿ bô lō͘, kim-chîⁿ sī bān-lêng. só͘-í góa tōa-hàn ê sî, beh piàⁿ-sè thàn chîⁿ, thang chiâⁿ chò tōa pù-ong.
|
A）：我想世間第一要緊是錢，俗語講：「有錢駛鬼會e磨」，抑是講：「錢若無，人就趖」。請你想較真，無論beh做甚mi̍h，kiám有一項m̄免錢會用得--ê,無錢就行無路，金錢是萬能。所以我大漢ê時，beh拚勢趁錢，thang成做大富翁。 |
|
B): Góa siūⁿ sè-kan tē it iàu-kín tio̍h ū ha̍k-būn, sio̍k-Gú kóng “Chi̍t jī ta̍t chhian-kim”, ū chîⁿ chin chē, nā m̄ bat jī, mā sī chheⁿ-mê gû, “Jîn put ha̍k, put ti gī”, lâng nā m̄-bat jī, siá phoe iā chin put piān. Só͘-í góa beh piàⁿ sè tha̍k chheh, āu-lâi chò phok-sū, chog3 âu-lâng .........
|
B）：我想世間第一要緊著有學問，俗語講：「一字值千金」，有錢真濟，若m̄-bat字，mā是青瞑牛，「人不學，不知義」人若m̄-bat字，寫批也真不便。所以我beh拚勢讀冊，後來做博士，做gâu人....... |
|
C): Góa siūⁿ sin-thé kiān-khong ióng-kiāⁿ tē it iàu-kín, ū chîⁿ ū ha̍k-būn, nā lám-sin-miā, ta̍k-ji̍t teh chia̍h io̍h, thái ū sím-mi̍h hēng-hok? Só͘-í góa beh kò͘ góa ê seng-khu hō͘ i ióng-kiāⁿ, thang chia̍h kàu lāu khok-khok.
|
C）：我想身體健康勇健第一要緊，有錢有學問，若lám身命，逐日teh食藥，thái有甚mi̍h幸福？所以我beh顧我ê身軀hō͘伊勇健，thang食到老khok-khok。 |
|
D): Góa siūⁿ sè-kan thit-thô siāng iàu-kín, kó͘-chá lâng kóng “Jîn-seng jio̍k bōng, ūi-hoan ki hô?” ì-sù chiū sī, jîn-seng ná chhin-chhiūⁿ chi̍t tiûⁿ ê bîn-bāng, hoaⁿ-hí ê sî bô kúi pái, só͘-í góa beh piàⁿ-sè lâi thit-thô, in-ūi chi̍t sì lâng bô lōa kú.
|
D）：我想世間thit-thô上要緊，古早人講：「人生若夢，為歡幾何？」意思就是，人生若親像一場ê眠夢，歡喜ê時，無幾擺，所以我beh拚勢來thit-thô,因為一世人無偌久。 |
|
E): Góa siūⁿ sè-kan tē-it iàu-kín tio̍h lâu miâ-siaⁿ, sio̍k-gú kóng: “Hó͘ sí lâu phê, lâng sí lâu miâ”, ū chîⁿ, ū ha̍k-būn, ū ióng-kiāⁿ ê seng-khu, thang ta̍k-ji̍t thit-thô, sí liáu āu, nā pháiⁿ miâ-siaⁿ, sī chin bô kè-ta̍t. Só͘-í góa beh chhut-la̍t siu-ióng, lâu miâ-siaⁿ kàu āu sè-tāi.
|
E）：我想世間第一要緊著留名聲，俗語講：「虎死留皮，人死留名」，有錢、有學問、有勇健ê身軀，thang逐日thit-thô,死了後，若歹名聲，是真無價值。所以我beh出力修養，留名聲到後世代。 |
|
F): Góa siūⁿ sè-kan pak-tó͘ ē pá siāng tē it iàu-kín, miâ-siaⁿ bô lō͘ ēng, sio̍k-gú kóng: “Chia̍h lo̍h pak, ún-tak-tak”, ta̍k ji̍t nā ū hî, ū bah, hō͘ góa thang chia̍h kàu pá, góa chiū chin boán-chiok, nā beh sí lah, mā beh chia̍h hō͘ i chi̍t tō͘ pá-pá thang chò pá kúi.
|
F）：我想世間腹肚會飽上第一要緊，名聲無路用，俗語講：「食落腹，穩tak-tak」，逐日若有魚、有肉，hō͘我thang食到飽，我就真滿足，若beh死--lah，mā beh食hō͘伊一肚飽飽thang做飽鬼。 |
|
G): Chu-ūi, góa khòaⁿ lín chiah ê lóng sī hiān-sè chú-gī, bu̍t-chit chú-gī kap hióng-lo̍k chú-gī, lóng bô teh siūⁿ āu-lâi ê tāi-chì ...... góa siūⁿ sè-kan tē it iàu-kín tio̍h sìn Iâ-so͘ chiah ū éng-oán ê hok-khì, ū chîⁿ, ū ha̍k-būn, ióng-kiāⁿ, hó miâ-siaⁿ, ta̍k ji̍t thang chia̍h hî, chia̍h bah, sí liáu-āu lêng-hûn hā lo̍h tē-ge̍k, ū sím-mi̍h lī-ek?
|
G）：諸位，我看lín chiah ê攏是現世主義，物質主義kap享樂主義，攏無teh想後來ê代誌....我想世間第一要緊著信耶穌才有永遠ê福氣。有錢、有學問、勇健、好名聲，逐日thang食魚、食肉，死了後靈魂下落地獄，有甚mi̍h利益？ |
|
Kin-á-ji̍t sī kiù-chú-tàn, góa khó͘-khǹg lín ta̍k lâng tio̍h lâi sìn Iâ-so͘. In-ūi chāi-seⁿ sìn Ki-tok, sí-āu, chiah ōe thang kàu thian-kok.
|
今仔日是救主誕，我苦勸lín逐人著來信耶穌。因為在生信基督，死後才會thang到天國。 |
|
Lia̍t-ūi chhin-ài ê hiaⁿ-ché, goán chiah ê hó pêng-iú só͘ kóng ê tó chi̍t ê khah tio̍h, tá chi̍t-hāng sī tē-it iàu-kín? Goān lán ōe kéng tio̍h chin-chiàⁿ tē-it iàu-kín ê.
|
列位親愛ê兄姐，阮chia ê好朋友所講--ê tó一個較著，tá一項是第一要緊？願咱會揀著真正第一要緊--ê。 |
|
Chhiáⁿ lán tāi-ke saⁿ-kap lâi gîm: “Lâi sìn Iâ-so͘” ê si.
|
請咱大家相kap來吟：「來信耶穌」ê詩。 |
|
(oân)
|
（完） |
|
(Chù-ì, tio̍h “F” tāi seng kóng, “E” lō͘-bóe)
|
（注意：著「F」代先講，「E」路尾） |
|
LÛ-Á Ê HOAⁿ-HÍ
|
驢仔ê歡喜 |
|
(Sè-hàn--ê 8 miâ)
|
（細漢--ê 8名） |
|
Chhù-chiáu-á 5, Thò͘-á 1, Thiⁿ-sài 1. Lû-á 1. (Sè-chiah chiáu-á 5 miâ chhiùⁿ-koa, tī chhiū-ki teh hìⁿ-lâi hìⁿ-khì.)
|
厝鳥仔 5、兔仔 1、天使 1、驢仔 1。（細隻鳥仔5名唱歌，tī樹枝teh hìⁿ來hìⁿ去） |
|
C: (Thò͘-á tī tiong-ng teh thiàu, kàu koa chhiùⁿ liáu ê sî, lóng-chóng kóng) Chin-gâu, chin-gâu.
|
C：（兔仔tī中央teh跳，到歌唱了ê時，攏總講）真gâu,真gâu。 |
|
C-1: Thò͘-á hiaⁿ, lí thái ōe hiah gâu thiàu-bú ne?
|
C-1：兔仔兄，你thái會hiah gâu跳舞ne？ |
|
T: Bô ah, lín chin gâu chhiùⁿ-koa, góa thiaⁿ liáu chin hoaⁿ-hí, só͘-í chiah ti̍t-ti̍t thiàu lah.
|
T：無--ah，lín真gâu唱歌，我聽了真歡喜，所以才直直跳--lah。 |
|
C-2: Taⁿ chin òaⁿ lah, lán tio̍h kín lâi khì.
|
C-2：今真晏--lah，咱著緊來去。 |
|
L: (Kóaⁿ-kín chhut lâi) Hó pêng-iú ah, lín beh khì tó-ūi?
|
L：（趕緊出來）好朋友--ah，lín beh去tó位？ |
|
C-3: Goán beh lâi khì Iû-thài kok ê Pek-lī-hêng.
|
C-3：阮beh來去猶太國ê伯利恆。 |
|
L: Beh khì chhòng sím-mi̍h?
|
L：Beh去創甚mi̍h？ |
|
C-4: Lí m̄ chai hâⁿ? Kin-á-ji̍t tī hia Ki-tok chhut-sì, goán beh lâi khì khèng-hō.
|
C-4：你m̄知hâⁿ？今仔日tī hia基督出世，阮beh來去慶賀。 |
|
L: Ki-tok sī sím-mi̍h lâng?
|
L：基督是甚mi̍h人？ |
|
C-5: Sī sè-kài jîn-lūi ê kiù-chú.
|
C-5：是世界人類ê救主。 |
|
T: Goán lóng beh lâi khì pài I.
|
T：阮攏beh來去拜伊。 |
|
C: (Lóng chóng) Goán beh khì chhiùⁿ-koa hō͘ Ki-tok thiaⁿ.
|
C：（攏總）阮beh去唱歌hō͘基督聽。 |
|
L: Hō͘ góa tòe hó m̄?
|
L：Hō͘我tòe好--m̄? |
|
T: Lí kiám ōe hiáu thiàu bú?
|
T：你kiám會曉跳舞？ |
|
L: Bē ah.
|
L：Bē--ah。 |
|
C-1: Ia̍h bô lí kiám ōe hiáu chhiùⁿ-koa?
|
C-1：亦--無，你kiám會曉唱歌？ |
|
L: Sió khóa.
|
L：小可。 |
|
C: (lóng-chóng) Chhiùⁿ khòaⁿ māi lè.
|
C：（攏總）唱看māi lè。 |
|
L: Hi hi ......... Hu hu .........
|
L：Hi hi.......Hu hu....... |
|
C: (lóng-chóng tōa chhiò) Án-ni bē ēng tit là.
|
C：（攏總大笑）Án-ni bē用得là。 |
|
T: Taⁿ lán kín lâi khì bô ē siuⁿ-òaⁿ. (C kap T ná chhiùⁿ koa ná thiàu ji̍p khì .........Chú-ji̍t-o̍h Sèng-si 34)
|
T：今咱緊來去，無，會siuⁿ晏。（C kap T 那唱歌那跳入去.......主日學聖詩34） |
|
L: (Lâu ba̍k-sái)
|
L：（流目屎） |
|
S: Lû-á hiaⁿ, lí tī chia teh háu án-chóaⁿ?
|
S：驢仔兄，你tī chia teh哮án-chóaⁿ？ |
|
L: Kin-á-ji̍t Kiù-chú Iâ-so͘ chhut sì, sè chiah chiáu-á beh khì chhiùⁿ-koa hō͘ I thiaⁿ, Thò͘-á beh khì thiàu-bú hō͘ Iâ-so͘ khòaⁿ, góa bē hiáu chhiùⁿ koa, iā bē hiáu thiàu-bú, in m̄ hō͘ góa tòe, chò in khì.
|
L：今仔日救主耶穌出世，細隻鳥仔beh去唱歌hō͘伊聽，兔仔beh去跳舞hō͘耶穌看，我bē曉唱歌，也bē曉跳舞，in m̄ hō͘我tòe,做in去。 |
|
S: Lû-á hiaⁿ, lí bián hoân-ló, góa beh chhōa lí lâi khì.
|
S：驢仔兄，你免煩惱，我beh chhōa你來去。 |
|
L: Ū iáⁿ bô?
|
L：有影無？ |
|
S: Ū iáⁿ noh, koh bô kúi ji̍t Iok-sek beh chhōa eⁿ-á Iâ-so͘ lo̍h khì Ai-ki̍p, góa teh chhōe 1 chiah lû-á thang hō͘ in khiâ.
|
S：有影noh，koh無幾日約瑟beh chhōa嬰仔耶穌落去埃及，我teh chhōe 1隻驢仔thanghō͘ in騎。 |
|
L: Chhōe tio̍h á bē?
|
L：Chhōe著抑--bē? |
|
S: Chhōe tio̍h lah, chiū-sī lí.
|
S：Chhōe著--lah，就是你。 |
|
L: Ū iáⁿ, kài hoaⁿ-hí góa thang kap Kiù-chú saⁿ-kìⁿ.
|
L：有影，kài歡喜我thang kap救主相見。 |
|
S: Taⁿ lán kín lâi khì.
|
S：今咱緊來去。 |
|
(oân)
|
（完） |
|
Iâ-so͘ ê chit-gia̍p
|
耶穌ê職業 |
|
A: Kīn-lâi Ki-tok-kàu chin chhiong-sēng, ta̍k só͘ chāi to ū kàu-hōe, siông-siông thiaⁿ-kìⁿ teh pò͘-tō, chóng-sī tàu tí Iâ-so͘ ê chit-gia̍p m̄-chai sī sím-mi̍h? Kài tú-hó Bo̍k-seng hiaⁿ tī hia teh lâi, lâi kā i mn̄g khòaⁿ māi.
|
A：近來基督教真昌盛，逐所在都有教會，常常聽見teh佈道，總是到底耶穌ê職業m̄知是甚mi̍h？Kài tú好木生兄tī hia teh來，來kā伊問看māi。 |
|
Bo̍k-seng hiaⁿ, kài tú-hó, góa beh chhéng-kàu lí.
|
木生兄，kài tú好，我beh請教你。 |
|
B: Khí-kám, sím-mi̍h tāi-chì?
|
B：豈敢！甚mi̍h代誌？ |
|
A: M̄-chai Iâ-so͘ ê chit-gia̍p sī sím-mi̍h hòⁿ?
|
A：M̄知耶穌ê職業是甚mi̍h hòⁿ？ |
|
B: Ah, soah m̄-chai sī ba̍k-kang sai-hū, I ê iúⁿ-pē Iok-sek Sī Ná-sat-le̍k siâⁿ chhut miâ ê ba̍k-kang, só͘-í, soah tō koh siūⁿ?
|
B：Ah，煞m̄知是木工師父，伊ê養父約瑟是拿撒勒城出名ê木工，所以，煞tō koh想？ |
|
A: Góa ioh I sī kò͘ iûⁿ ê, in-ūi I bat kóng, góa sī hó ê bo̍k-chiá, góa beh ūi iûⁿ pàng-sak sèⁿ-miā.
|
A：我臆伊是顧羊--ê,因為伊bat講：我是好ê牧者，我beh為羊放sak生命。 |
|
B: Góa ioh ê khah tio̍h, lí ioh ê m̄-tio̍h lah, m̄-sìn Iú-sêng hiaⁿ tī hia teh lâi, lâi kā i chhéng-kàu. Iú-sêng hiaⁿ, tàu-tí Iâ-so͘ ê chit-gia̍p sī sím-mi̍h?
|
B：我臆--ê較著，你臆--ê m̄著--lah，m̄信有成兄tī hia teh來，來kā伊請教。有成兄，到底耶穌ê職業是甚mi̍h？ |
|
C: M̄-bián kóng mā-sī i-seng. In-ūi Iâ-so͘ bat i-hó chin-chē phòa-pēⁿ ê lâng, iā ū chheⁿ-mê--ê, pái-kha--ê, piàn-sūi--ê, mā bat hō͘ sí-lâng koh-oa̍h, iah bô lín sī kóng sím-mi̍h?
|
C：M̄免講嘛是醫生，因為耶穌bat醫好真濟破病ê人，也有青瞑--ê,跛腳--ê,半遂--ê,mā bat hō͘死人復活，亦--無，lín是講甚mi̍h？ |
|
A: Góa ioh sī bo̍k-chiá.
|
A：我臆是牧者。 |
|
B: Góa ioh sī ba̍k-kang.
|
B：我臆是木工。 |
|
C: Lín ioh ê khah m̄-tio̍h, góa ioh ê chiah tio̍h, m̄-sìn Piáⁿ-sin hiaⁿ tī hia teh lâi, lán lâi mn̄g i khòaⁿ māi. Piáⁿ-sin hiaⁿ, goán tāi-ke teh ioh, khòaⁿ Iâ-so͘ ê chit-gia̍p sī sím-mi̍h, chi̍t lâng ioh chi̍t khoán, taⁿ ài chhéng-kàu lí, m̄-chai lí ioh sī sím-mi̍h?
|
C：Lín臆--ê較m̄著，我臆m̂e才著，m̄信丙申兄tī hia teh來，咱來問伊看覓。丙申兄，阮大家teh臆，看耶穌ê職業是甚mi̍h，一人臆一款，今ài請教你，m̄知你臆是甚mi̍h？ |
|
D: Iâ-so͘ sī teh chò-piáⁿ, lín kiám m̄ bat thiaⁿ tio̍h Iâ-so͘ tī khòng-iá iōng piáⁿ hō͘ 5000 lâng chia̍h kàu pá, koh chhun 12 kheng, nā m̄-sī teh chò-piáⁿ thái ū thang hō͘ hiah chē lâng chia̍h, koh chhun hiah chē.
|
D：耶穌是teh做餅，lín kiám m̄-bat聽著耶穌tī曠野用餅hō͘ 5000人食到飽，koh chhun 12筐，若m̄是teh做餅thái有thang hō͘ hiah濟人食，koh chhun hiah濟。 |
|
A: Ū-iáⁿ to tio̍h, chóng-sī góa bat khòaⁿ tio̍h ang-á tô͘ ōe Iâ-so͘ phō iûⁿ-á, khah kóng iā sī bo̍k-chiá khah tio̍h.
|
A：有影都著，總是我bat看著尪仔圖畫耶穌抱羊仔，較講也是牧者較著。 |
|
B: Góa ioh ba̍k-kang, Iú-sêng hiaⁿ ioh sī i-seng.
|
B：我臆木工，有成兄臆是醫生。 |
|
D: Lín ioh ê lóng m̄-tio̍h lah, góa ê chiah tio̍h lah.
|
D：Lín臆--ê攏m̄著--lah，我--ê才著--lah。 |
|
C: Hái-éng hiaⁿ tī hia teh lâi lah, lán lâi mn̄g i khòaⁿ-māi?
|
C：海湧兄tī hia teh來--lah，咱來問伊看māi? |
|
D: Hái-éng hiaⁿ, góa kóng Iâ-so͘ ê chit-gia̍p sī teh chò-piáⁿ, in kóng m̄-sī lah.
|
D：海湧兄，我講耶穌ê職業是teh做餅，in講m̄是--lah。 |
|
C: Góa ioh Iâ-so͘ sī teh chò i-seng.
|
C：我臆耶穌是teh做醫生。 |
|
B: Góa ioh Iâ-so͘ sī teh chò ba̍k-kang.
|
B：我臆耶穌是teh做木工。 |
|
A: Góa ioh Iâ-so͘ sī bo̍k-chiá.
|
A：我臆耶穌是牧者。 |
|
E: Lín lóng m̄-tio̍h, Iâ-so͘ ê chit-gia̍p chiū-sī teh lia̍h hî. Lín kiám m̄-bat kóng Iâ-so͘ kiò ha̍k-seng pha bāng lo̍h hái, liâm-piⁿ ûi-tio̍h hî chin chē, kàu bāng beh li̍h8. Nā m̄-sī lia̍h hî choan-ka, iā ē tàng án-ni, thó͘-siūⁿmā chai.
|
E：Lín攏m̄著，耶穌ê職業就是teh掠魚。Lín kiám m̄-bat聽講耶穌叫學生拋網落海，liâm-piⁿ圍著魚真濟，到網beh裂。若m̄是掠魚專家，也會tàng án-ni，土想mā知。 |
|
B: Lāu-su tī hia teh lâi, lâi chhéng-kàu i siāng tio̍h.
|
B：老師tī hia teh來，來請教伊上著。 |
|
*: (Lóng chóng) Lāu-su Pêng-an!
|
*：（攏總）老師平安！ |
|
S: Pêng-an. Lín chò hóe tī chia teh tâm-lūn sím-mi̍h?
|
S：平安！Lín做伙tī chia teh談論甚mi̍h？ |
|
E: Lāu-su, goán tāi-ke teh ioh Iâ-so͘ ê chit-gia̍p tàu-tí sī sím-mi̍h? Chi̍t lâng ioh chi̍t khoán, taⁿ m̄-chai sím-mi̍h lâng khah tio̍h?
|
E：老師，阮大家teh臆耶穌ê職業到底是甚mi̍h？一人臆一款，今m̄知甚mi̍h人較著？ |
|
S: Hòⁿ! Án-ni kài hó, tio̍h siông-siông án-ni gián-kiù chiah ē chìn-pō͘. Taⁿ lín só͘ ioh ê sī sím-mi̍h?
|
S：好！Án-ni kài好，著常常án-ni研究才會進步。今lín所臆--ê是甚mi̍h？ |
|
A: Góa ioh sī bo̍k-chiá.
|
A：我臆是牧者。 |
|
B: Góa ioh sī ba̍k-kang.
|
B：我臆是木工。 |
|
C: Góa ioh sī i-seng.
|
C：我臆是醫生。 |
|
D: Góa ioh sī teh chò-piáⁿ.
|
D：我臆是teh做餅。 |
|
E: Góa ioh sī thó-hái lâng.
|
E：我臆是討海人。 |
|
S: Án-ni lín só͘ ioh ê lóng bô m̄-tio̍h. In-ūi Iâ-so͘ sī hó ê bo̍k-chiá, teh chiàu-kò͘ lán, chhin-chhiūⁿ bo̍k-chiá chiàu-kò͘ iûⁿ-á; iā sī gâu kā lán siu-chéng lán pháiⁿ-khòaⁿ ê phín-hēng, chiâⁿ-chò ke̍k hó khòaⁿ ê ba̍k-kang; iā sī gâu i lán lêng-hûn ê pēⁿ-chèng ê tōa i-seng; iā sī chhin-chhiūⁿ thó-hái lâng gâu lia̍h hî. I chin gâu chio ha̍k-seng. Chóng-kóng I siāng kin-pún ê chit-gia̍p chiū-sī beh kiù lâng, iáu-kú sī tùi chē-chē hong-bīn ê piáu-hiān, lín chiah ē ioh hiah chē khoán lah. (chit chām chiap * ê só͘ chāi; iā sī chiong oa̍h-miā ê piáⁿ, beh hō͘ lán ê.)
|
S：Án-ni lín所臆ê攏無m̄著。因為耶穌是好ê牧者，teh照顧咱，親像牧者照顧羊仔，也是gâu kā咱修整咱歹看ê品行，成做極好看ê木工。也是gâu醫咱靈魂ê病症ê大醫生；也是將活命ê餅，beh hō͘咱--ê;也是親像討海人gâu掠魚。伊真gâu招學生。總講伊上根本ê職業就是beh救人，iáu-kú是tùi濟濟方面ê表現，lín chiah會臆hiah濟款--lah。 |
|
A: Án-ni góa tōa-hàn beh chò bo̍k-su, lâi ū hūn tī Iâ-so͘ ê kiù-lâng, lâi chiàu-kò͘ Siōng-tè ê iûⁿ-kûn.
|
A：Án-ni我大漢beh做牧師，來有份tī耶穌ê救人，來照顧上帝ê羊群。 |
|
B: Góa tōa-hàn beh chò ba̍k-kang, lâi khí lé-pài tn̂g.
|
B：我大漢beh做木工，來起禮拜堂。 |
|
C: Góa tōa-hàn beh chò i-seng, lín nā pak-tó͘ thiàⁿ, thâu-khak hîn, chhàu kha phīⁿ-liâm lóng lâi chhōe góa, bián chîⁿ beh kā lín hōng-sū, kiám-chió lâng-lâng ê kan-khó͘.
|
C：我大漢beh做醫生，lín若腹肚疼、頭殼眩、臭腳鼻黏攏來chhōe我，免錢beh kā lín奉侍，減少人人ê艱苦。 |
|
E: Góa tōa-hàn beh lia̍h-hî, iā beh ūi Chú lâi thoân tō-lí.
|
E：我大漢beh掠魚，也beh為主來傳道理。 |
|
D: Góa beh khui piáⁿ-tiàm, lâi hō͘ iau ê lâng thang tit-tio̍h pá.
|
D：我beh開餅店，來hō͘枵ê人thang得著飽。 |
|
S: Án-ni chin-hó, ē[e]-hng tú-hó sī Chú ê seⁿ-ji̍t, iā sī lín ê koat-sim ê ji̍t, lín tio̍h siông-siông ē kì-tit. Chhiáⁿ lâi gîm chi̍t siú si lâi o-ló Chú.
|
S：Án-ni真好，e昏tú好是主ê生日，也是lín ê決心ê日，lín著常常會記得。請來吟一首詩來o-ló主。 |
|
(Chú-ji̍t-o̍h Sèng-si tē 2 pō͘ 20 siú.)
|
（主日學聖詩第2部20首） |
|
Oân.
|
完 |
