Bí-kok O͘-lâng ha̍k-hāu hióng-siū Hia̍p-khek hu-jîn ê ûi-sán
|
美國烏人學校享受Hia̍p-khek夫人ê 遺產 |
| Lîm Chài-thiam |
林再添 |
|
Chit phiⁿ siau-sit, chiū-sī tùi Bí-kok Sin-bûn-chhù ê tiān-kó hoan-e̍k--ê, “Í-keng kè-óng ê Bí-kok châi-chèng-ka, iā-sī chû-siān-ka Hia̍p-khek (Harkness) ê hu-jîn, tī A. D. 1950 nî 6 goe̍h 6 ji̍t kè-óng, kun-kù i ê ûi-giân, ū chiong 6,000 bān-gûn ê bí-kim, koan-sàng hō͘ ta̍k-khoán ê kong-kiōng thoân-thé kap chû-siān ki-koan.
|
這篇消息，就是tùi美國新聞處ê電稿翻譯--ê:「已經過往ê美國財政家，也是慈善家Hia̍p-khek（Harkness）ê夫人，tī A. D. 1950年6月6日過往，根據伊ê遺言，有將6000萬銀ê美金，捐送hō͘ 逐款ê公共團体kap 慈善機關。 |
|
“Chhut-miâ ê O-lâng ha̍k-hāu Thah-sū-ki-kia̍t (Tuskegee) kap phó͘-thong ê kang-gia̍p ha̍k-hāu, iā ū thang hióng-siū hit tiong-kan ê 2,500 bān-gûn bí-kim, Niú-iok chhī ê Tiúⁿ-ló kàu-hōe pīⁿ-īⁿ kap Eng-jî pīⁿ-īⁿ, iā ōe thang chiap-siū i ê ûi-sán ê chi̍t pō͘-hūn.
|
「出名ê烏人學校Thah-sū-ki-kia̍t(Tuskegee） kap普通ê 工業學校，也有 thang享受hit中間ê 2500萬銀美金；紐約市ê長老教會病院kap嬰兒病院，也會thang 接受伊ê遺產ê一部份。 |
|
“Thak-sū-ki-kia̍t ha̍k-hāu, chiū-sī tī Bí-kok ê lâm-pō͘ A-la̍h-pa-má chiu (Alabama). Sī A. D. 1881 nî, tùi chhut-miâ ê O͘-lâng kàu-io̍k-ka Pò͘-khek (Bocker) só͘ chhòng-li̍p.
|
「Thak-sū-ki-kia̍t學校，就是tī美國ê南部阿拉巴馬州（Alabama）。是A. D. 1881年，tùi 出名ê烏人教育家Pò͘-khek（Bocker）所創立。 |
|
“Hia̍p-khek Sian-siⁿ pún-sin tī A. D. 1940 nî kè-óng hit-sî, iā ū chiong 93,514,887 koan-sàng hō͘ kok chû-siān, chong-kàu kàu-io̍k ê thoân-thé.” Í-siōng.
|
「Hia̍p-khek先生本身tī A. D. 1940年過往hit時，也有將$93,514,887 捐送hō͘ 各慈善、宗教教育ê團体。」以上。 |
|
Hia̍p-khek hu-jîn só͘ koan-hiàn ê 6,000 bān-gûn bí-kim, nā chiàu sî-kè ōaⁿ sǹg sin tâi-pè chóng-gia̍h ê 3 pōe í-siōng. Lán Tiong-kok ê hù-hō͘-ka lâng-lâng nā hoaⁿ-hí chhin-chhiūⁿ án-ni chòe, góa siong-sìn Tiong-kok ê ōe-seng, kàu-io̍k, kàu-hōe ún-tàng ōe ke chin tōa chìn-pō͘. Hia̍p-khek Sian-siⁿ kap hu-jîn; in sī gâu lī-iōng chîⁿ khì chòe hó-sū, nā-sī lán hoán-tńg sī hō͘ chîⁿ kā lán koán-chè, tì-kàu sim-koaⁿ put-sî bōe pêng-an, Chú kóng, “Hō͘ lâng--ê, pí tùi lâng the̍h ê khah ū hok-khì” (Hēng-toān 20:35). Hiān-tāi ê le̍k-sú í-keng teh ` chèng-bêng chit kù ōe ê chin-si̍t sèng, chiū-sī hō͘ lâng--ê, put-sî ū-thang hō͘ lâng, iáu-kú put-sî ū chhun, nā-sī tùi lâng the̍h--ê, put-sî teh-the̍h, iáu-kú put-sî bô kàu. Lūn che sū-si̍t, sī lán só͘ chai; ū thiaⁿ-tio̍h, iā ū khòaⁿ-tio̍h. Hiān-sî chin liû-hêng ê sin-ōe, chiū-sī “Bí-oān,” ǹg-bāng tùi Chú ê thiàⁿ ê ín-chhōa, lán Ki-tok-tô͘ nā chòe-thâu lâi o̍h Hia̍p-khek Sian-siⁿ kap hu-jîn ê bô͘-iūⁿ, jiân-āu choân kok ê jîn-bîn lóng chiàu-iūⁿ án-ni chòe, góa siong-sìn bī-lâi ê sin-ōe, chiū-sī “Tiong-oān” tek-khak ōe liû-hêng tī choân sè-kài!
|
Hia̍p-khek夫人所捐獻ê 6000萬銀美金，若照時計換算新台幣總額ê 3倍以上。中國ê富戶家人人若歡喜親像án-ni做，我相信中國ê衛生、教育、教會穩當會加真大進步。Hia̍p-khek 先生kap夫人，in是gâu利用錢去做好事，但是咱反轉是hō͘錢kā咱管制，致到心肝不時bōe平安。主講：「Hō͘--人--ê,比tùi人提--ê較有福氣（行傳20:35）。」現代ê歷史已經teh 証明這句話ê 真實性，就是hō͘--人-- ê,不時有thang hō͘ --人，iáu-kú不時有chhun；若是tùi人提--ê,不時teh提，iáu-kú 不時無夠。論che事實，是咱所知；有聽--著，也有看--著。現時真流行ê新話就是「美援」，向望tùi主ê疼ê引chhōa,咱基督徒若做頭來學Hia̍p-khek 先生kap夫人ê 模樣，然後全國ê人民攏照樣án-ni做，我相信未來ê新話，就是「中援」的確會流行tī全世界。 |
|
(Tâi-oân Kàu-hōe-kong-pò 749 koàn; 1951 nî 5 goe̍h)
|
（台灣教會公報749卷，1951年5月） |
