T K C Lô-má-jī Chhui-hêng Pō͘-hōe Tiû-pī Úi-oân-hōe
|
T.K.C.羅馬字推行部會籌備委員會 |
| Tīⁿ Jî-gio̍k |
鄭兒玉 |
|
Chit-pang T. K. C. Hā-lēng-hōe, ū tit-tio̍h Gī-tiúⁿ í-ki̍p Tiû-pī Úi-oân-hōe ê hó-ì, ū te̍k-pia̍t khui koan-hē Lô-má-jī ê chi̍p-hōe 3 pái, hō͘ lán thang chai Tân Gī-tiúⁿ, í-ki̍p Tiû-pī Úi-oân-hōe ê chu-ūi sian-siⁿ ū “Sian-kiàn chi bêng.”
|
這pang T. K. C.夏令會，有得著議長以及籌備委員會ê好意，為特別開關係羅馬字ê集會三擺，hō͘ 咱thang知陳議長以及籌備委員會ê諸位先生有「先見之明。」 |
|
Tī chit 3 pái thó-lūn-hōe ê kiat-kó, Lô-má-jī sī tùi Tâi-oân Kàu-hōe ê chiong-lâi chin ū tiōng-iàu-sèng, só͘-í tio̍h ài tī T. K. C. ê lāi-bīn cho͘-chit Lô-má-jī Chhui-hêng Pō͘-hōe. (Siông-sê chhiáⁿ khòaⁿ Táng Kàu-siū só͘ pò--ê).
|
Tī這三擺討論會ê結果，羅馬字是tùi台灣教會ê將來真有重要性，所以著ài tī T. K. C. ê內面組一個羅馬字推行部會。 (詳細請看董教授所報--ê)。 |
|
In-ūi beh èng chit ê siaⁿ ê koan-hē, tī 7 ge̍h 30 ji̍t 13 tiám, tī Tâi-lâm Sîn-ha̍k-iⁿ ê káng-tn̂g, ū khui T. K. C. Lô-má-jī Chhui-hêng Pō͘-hōe Tiû-pī Úi-oân-hōe.
|
因為beh應這個聲ê關係，tī 七月30日13點，tī台南神學院ê講堂，有開T.K.C.羅馬字推行部會籌備委員會。 |
|
Chit ê pō͘-hōe ê chú-chí sī 1. Tī choân Tâi ê kàu-hōe chhui-hêng Lô-má-jī ê kàu-io̍k, hō͘ hoān-nā sio̍k tī Tâi-oân Ki-tok Tiúⁿ-ló Kàu-hōe ê lâng, bô chi̍t lâng bōe-hiáu tha̍k keng, si. 2. Kè-ōe beh hoat-hêng choân-bûn-tek, it-poaⁿ-tek, jî-tông-tek ê Lô-má-jī chheh, thang chò T. K. C. Bûn-khò͘.
|
這個部會ê主旨是：1.Tī全台ê教會推行羅馬字ê 教育，hō͘凡若屬tī台灣基督長老教會ê人，無一人bē曉讀經，詩。2.計劃beh 發行專文tek，一般tek，兒童tek ê羅馬字冊，thang做T.K.C.文庫。 |
|
Cho͘-chit sī tùi kok Tiong-hōe chhui-chiàn N̄g miâ í-siōng ê tāi-piáu lâi kiat-sêng chit ê Pō͘-hōe. Hit ê pō͘-oân chhin-chhiūⁿ ē-bīn:
|
組織是tùi各中會推荐兩名以上ê代表來結成這個部會。Hit個部員親像下面: |
|
An Bō͘-lí, Bêng Iú-tek, Chhî Bêng-hong, Gô͘ Iāu-bêng, Keh Hô-lia̍t, Khu Thian-teng, Khó͘ Iú-châi, Lí Ngá-kok, Lîm Chong-gī, Lîm Kok-hông, Lōa Ní-thui, Lū Jîn-tek, N̂g Chiong-hui, Niû Siù-tek, Siau Bêng-chiok, So͘ Thian-bêng, Tân Chheng-tiong, Tân Kong-hui, Tân Tiâu-kéng, Táng Tāi-sêng (Pō͘-tiúⁿ), Tēⁿ Jî-gio̍k (Su-kì), Tēⁿ Liân-khun.
|
安慕理，明有德，徐明芳，吳耀明，郭和烈，邱天登，許有才，李雅各，林宗義，林國皇，賴爾推，呂仁德，黃彰輝，梁秀德，蕭明爵，蘇天明，陳清忠，陳光輝，陳朝景，董大成 (部長)，鄭兒玉(書記)，鄭連坤。 |
|
Chit ê chi̍p-hōe sī Tiû-pī Úi-oân-hōe ê koan-hē, bōe tit thang sûi-sî chòe T. K. C. ê pō͘-hōe. M̄-kú hit-sî ū tit-tio̍h Tân Gī-tiúⁿ ê hó-ì, beh iōng phoe chhéng-mn̄g Chóng-hōe T. K. C. (í-keng thong-kòe, Ed) Pō͘-hōe, ū kè-ūi beh pài-thok Lâm, Pak lióng Sîn-ha̍k-īⁿ ê kàu-siū, í-ki̍p kî-thaⁿ ê lâng siá chōe-chōe ê goân-kó. Ǹg-bāng sio̍k tī Tâi-oân Kàu-hōe ê hiaⁿ-ché, lín nā ū hó ê goân-kó, pài-thok lín bô sè-jī kià khì hō͘ Tâi-pak chhī, Tiong-san lâm-lō͘, Tâi-oân Tāi-ha̍k I-ha̍k-īⁿ Seng-hòa-ha̍k kàu-sek, Táng Tāi-sêng Kàu-siū. I ōe kap Bêng Bo̍k-su liân-lo̍k thang lâi hoat-khan.
|
這個集會是籌備委員會ê關係，bē tit thang隨時做T. K. C. ê部會。M̄-kú hit時ū得著陳議長ê好意，beh用批請問總會T. K. C. (已經通過，Ed) 部會，有計劃beh拜託南，北兩神學院ê教授，以及其他ê 人寫濟濟ê原稿。向望屬tī台灣教會ê兄姊，lín若有好ê原稿，拜託lín無細膩寄去hō͘台北市，中山南路，台灣大學醫學院生化學教室，董大成教授。伊會kap明牧師連絡thang來發刊。 |
|
Ǹg-bāng tha̍k Pò ê hiaⁿ-ché, nā ū lâng te̍k-pia̍t tùi Lô-má-jī ū chhù-bī, á-sī ì-kiàn ê sî, chhiáⁿ m̄-thang sè-jī, kap Tēⁿ Jî-gio̍k (Tâi-lâm-koān Tang-chio̍h-khu Pò͘-tē Ki-tok-kàu Hok-im-tn̂g) liân-lo̍k.
|
向望讀報ê兄姊，若有人特別tùi羅馬字有趣味，抑是意見ê時，請m̄-thang細膩，kap鄭兒玉 (台南縣東石區布袋基督教福音堂)連絡。 |
|
(Tâi-oân Kàu-hōe-kong-pò tē 731 kî, 1949 nî 11 ge̍h)
|
(台灣教會公報第731期，1949年11月) |
