Kiàn-ha̍k_Tē thài ē tín-tāng
|
見學:地thài會振動？ |
| Phian-chip-sek |
編輯室 |
|
Tiau-cha tē-tāng ê hoat-siⁿ, Sè-kài ta̍k-kok ê phó-piàn ke̍k bô pêng-téng; só͘ hoat-hiān ê hôe-sò͘ kap I ê kiông-jio̍k, ta̍k só͘-chāi chám-jiân bô siāng. Chhin-chhiūⁿ tī Ji̍t-pún kap Lâm A-bi-lī-ka ê sai-pêng-hōaⁿ, tē-tāng chòe tē-it chē. Ngô͘-lô-su Sai-pí-lī-a ê pak-pō͘, kap A-hui-lī-ka ê tiong-pō͘ sī chòe chió; chiū nā ū, iā-sī chin bî-jio̍k. Só͘-Í U-te̍k-su Sian-siⁿ, chiong Sè-kài ê tē tín-tāng, pun chò saⁿ tōa khu-he̍k.
|
調查地動ê發生，世界逐國ê 普遍極無平等；所發現ê 回數kap伊ê強弱，逐所在chám然無像。親像tī日本kap南亞美利加ê西爿岸，地動最第一濟。俄羅斯西比利亞ê北部kap阿非利加中部是最少；就若有，也是真微弱。所以U-te̍k-su 先生，將世界ê地振動，分做三大區域。 |
|
1.Chē chín (多震). Hoat-siⁿ tē- tāng chòe tē-it chē ê só͘-chāi.
|
1.濟震（多震）。發生地動最第一濟ê 所在。 |
|
2.Chió chín (寡震). Hoat-siⁿ tē- tāng chòe tē-it chió ê só͘-chāi.
|
2.少震(寡震)。發生地動最第一少ê 所在。 |
|
3.Bô chín (無震). Sī bô tē-tāng ê só͘-chāi.
|
3.無震(無震)。是無地動ê 所在。 |
|
Tē-tāng chòe tē-it chē koh kiông ê só͘-chāi sī Thài-pêng-iûⁿ ê chiu-ûi, kap hoâiⁿ kòe Ò-kok Au-chiu kap Tiong Bí ê Tē-tiong-hái. Sè-kài ê tē-tāng, thóng-kè chò 10 hūn. Tē-tiong-hái choân-thé iok chiàm 5 hūn. Thài-pêng-iûⁿ chiu- ûi iok chiàm 4 hūn, Kî-û chi̍t-hūn sòaⁿ- sòaⁿ pun tī Sè-kài ta̍k kok. Tùi án-ni lâi khòaⁿ, tōa tē-chín tài (地震帶). Kap oa̍h hóe-soaⁿ pûn-chhut chòe kek-lia̍t- tài (激烈帶) kap khut-khiok ê soaⁿ-niá tē, ū chòe bi̍t-chhiat ê koan-hē.
|
地動最第一濟koh 強ê 所在是太平洋ê 周圍，kap橫過奧國歐洲kap中美ê 地中海。世界ê 地動，統計做十份。地中海全体約佔5份。太平洋周圍約佔4份，其餘一份散散分tī世界逐國。Tùi án-ni 來看，大地震帶，kap活火山pûn出最激烈帶kap khut曲ê山嶺地，有最密切ê 關係。 |
|
Sè-kài, ū chi̍t-chōa lō͘, kīn tī hia ê tē-hng, siông-siông tú-tio̍h tē-tāng, hō-miâ Tē-chín tài, Tài, ké-soeh, sī tòa, chhin-chhiūⁿ io-tòa, khò͘-tòa hit-hō, ì-sù, sī hit chōa ê tē-hng.
|
世界，有一chōa路，近tī hia ê地方，常常tú 著地動，號名地震帶，帶，解說是tòa,親像腰帶、褲帶hit號，意思，是hit chōa ê 地方。 |
|
(Tâi-oân Kàu-hōe Kong-pò tē 699 hō, 1947 nî 3 ge̍h)
|
(台灣教會公報第699號，1947年3月) |
