Chhân-eⁿ lí ū siông khòaⁿ tio̍h bô
|
田嬰你有常看--著無？ |
| Phian-chip-sek |
編輯室 |
|
Kiàn-ha̍k
|
見學 |
|
Siông, bô kui-nî lóng ū. Put-lūn tī Tâi-oân, á-sī Tn̂g-soaⁿ to lóng ū khòaⁿ-tio̍h. Seng-khu ū 6 ki kha; nn̄g-tùi si̍t, tōa koh po̍h-tiah. Sek-tī ū-ê chhiah, ū-ê le̍k. Poe ê la̍t chin tōa, kín chhin-chhiūⁿ hong. Thâu-khak ū nn̄g-lúi ba̍k-chiu phòng-chhut koh thang-kng. Che ba̍k-chiu sī ké--ê, chhòng án-ni, sī beh phah chhiⁿ-kiaⁿ pa̍t-mi̍h ê oa̍h-mi̍h. Chin ba̍k-chiu tī chhùi-phóe ni̍h, chin sè. Chhùi khoah, chhùi-phóe tēng, só͘-í gâu kā mi̍h.
|
常，無歸年攏有。不論tī台灣，抑是唐山都攏有看著。身軀有六枝腳，兩對翅，大koh薄tiah。色緻有ê赤、有ê綠。飛ê力真大、緊親像風。頭殼有兩蕊目珠膨出koh thang光。Che 目珠是假--ê,創 án-ni，是beh扑生驚別物ê活物。真目珠tī嘴phóe--ni̍h，真細。嘴闊，嘴phóe tēng,所以gâu咬物。 |
|
I só͘ chia̍h ê mi̍h, sī báng-á, hô͘-sîn, bóe-ia̍h, hit khoán ê thâng-thōa. Sèng-chêng tham chia̍h, chi̍t-tiám cheng kú, ē chia̍h kúi-nā cha̍p chiah. Gín-ná siông-siông ài liam chhân-eⁿ, tio̍h khǹg i m̄-thang. In-ūi chhân-eⁿ sī teh chia̍h hāi- thâng, ū lī-ek lán.
|
伊所食ê物，是蚊仔、胡蠅、尾蝶，hit 款 ê蟲豸。性情貪食，一點鐘久，會食幾若十隻。囡仔常常ài拈田嬰，著勸伊m̄-thang。因為田嬰是teh 食害蟲，有利益咱。 |
|
Lán bat khòaⁿ tio̍h chhân-eⁿ teh poe, kīn chúi-bīn, seng-khu áu-khiau, ēng bóe-á tam-chúi. He sī teh siⁿ nn̄g. I chhiu-thiⁿ pàng nn̄g, kàu mê-nî chhun-thiⁿ chiah pū-chhut. Nn̄g lo̍h tī chúi-lāi, he̍k-sī liâm tī chio̍h-ni̍h, á-sī tiâu tī chháu-téng; tī hia pū-chhut chò sè-bóe thâng. I ū 6 ki kha, chiām-chiām tōa, chiū hoat-si̍t. Che thâng miâ chúi-khit-chia̍h. Seng-khu tn̂g nn̄g-chhùn, khoah nn̄g-hun pòaⁿ khah ke, sek-tī bô súi, khah óa chang-sek. Sèng-chêng hiong-ok, siông-siông kā sè-bé thâng khì chia̍h. Kàu ū chi̍t-ê sî-chūn, sin-thé ià-siān bô la̍t, chia̍h-liōng kiám chió, chiū sô khì óa chúi-piⁿ ê chháu-téng, khî tī hia, ka-chiah pit-li̍h8, ū pa̍t-khoán ê hêng-thé nǹg chhut-lâi; si̍t chiū hoat tn̂g. Che chiū-sī lán só͘ khòaⁿ ê chhân-eⁿ. Súi-súi ê sin-thé, chū-iû chū-chāi, poe-lâi poe-khì. Lán ū him-bō͘, beh tit-tio̍h chit-khoán bô? E̍k-chiá Tân Hiàn-kok
|
咱bat看著田嬰teh飛，近水面，身軀áu曲，用尾仔tam水。He是teh生卵。伊秋天放卵，到明年春天才孵出。卵落tī 水內，或是粘tī石--ni̍h，抑是tiâu tī 草頂；tī hia孵出做細尾蟲。伊有6 支腳，漸漸大，就發翅。Che 蟲名水乞食。身軀長兩寸，闊兩分半較加，色緻無súi,較倚棕色。性情兇惡，常常咬細尾蟲去食。到有一個時陣，身体厭siān無力，食量減少，就趖去倚水邊ê草頂，khî tī hia，ka-chiah pit裂，有別款ê形体nǹg --出來；翅就發長。Che 就是咱所看ê田嬰。Súi-súi ê身体，自由自在，飛來飛去。咱有欣慕，beh得著這款--無？ 譯者 陳憲國 |
|
(Tâi-oân Kàu-hōe Kong-pò tē 708 hō, 1947 nî 12 ge̍h)
|
(台灣教會公報第708號，1947年12月) |
