Hân Bûn-kong ê佛骨表
|
韓文公ê 佛骨表 |
| Ô͘ Bûn-tî |
胡文池 |
|
Hân Bûn-kong ê miâ Hân Jú (韓 愈) (A. D. 768-823) sī Tông-tiâu ê tōa ha̍k-chiá, iā sī bûn-chiuⁿ ka. Chū sè chhong-bêng, toan-chèng, ài tha̍k-chheh. Bô kiaⁿ koân-sè, ūi-tio̍h gī chin ióng-kám, chóng-sī iā bē khòaⁿ-khin lâng.
|
韓文公ê 名韓愈（A.D. 768-823）是唐朝ê 大學者，也是文章家。自細聰明，端正，愛讀冊。無驚權勢，為著義真勇敢，總--是也bē看輕--人。 |
|
Hu̍t-kàu tī Hō͘-hàn ê sî thoân-ji̍p Tiong-kok. Tī 法翔 (Hoat-siông) ê Hoat-bûn-sī ū thah (護國真身塔), thah-lāi ū Sek-kia ê chńg-thâu-á kut chi̍t chat, chit ê thah 30 nî ū khui chi̍t pái. Hit-sî ê hông-tè Hiàn-chong, chhe lâng khì giâ chit ê hu̍t-kut lâi kiong-lāi khǹg 3 ji̍t. Hân Bûn-kong hit-sî chò 刑部侍郎 ê koaⁿ. Khòaⁿ hông-tè só͘ chò ē hāi lán Tiong-kok, só͘-í hó-táⁿ chò chàu-chiuⁿ kan-chèng. Āu-lâi kó-jiân jiá hông-tè ê siū-khì, siū pián khì chò Tiō chiū chhì-sú, hit-sî sī 819 nî chiaⁿ-goe̍h, kòe chin-chē kan-khó͘, kòe Chîn-léng ê sng-seh, só͘ chò ê si ū tī 千家詩 lán lóng chai. Taⁿ chiong i ê Hu̍t-kut-pió lâi kài-siāu hō͘ tāi-ke chai.
|
佛教tī 後漢ê時傳入中國。Tī法翔 (Hoat-siông) ê 法門寺有塔 (護國真身塔)，塔內有釋迦ê 指頭仔骨一節，這個塔30 年有開一擺。Hit時ê皇帝憲宗，差人去giâ這個佛骨來宮內囥3 日。韓文公hit時做刑部侍郎ê官。看皇帝所做會害咱中國，所以好膽做奏章干証。後來果然惹皇帝ê 受氣，受貶去做潮州刺史。Hit時是819年正月，過真濟艱苦，過秦嶺ê霜雪，所做ê詩有tī千家詩咱攏知。今將伊ê佛骨表來介紹hō͘逐家知。 |
|
(Chit ūi Sian-siⁿ ài chiong Hu̍t-kut- pió, ēng Hân-bûn, ìn chiūⁿ pò; khó- sioh pún kio̍k, Hàn-bûn bô oân-choân, só͘-í góa hoan-e̍k pe̍h-ōe-jī ìn tī chia, lâi piáu-bêng hoan-gêng sian-siⁿ oān-chō͘. Kong-pò ê hó-ì. Koh ūi-tio̍h chóa-bīn iú-hān, bē thang hoan-e̍k siuⁿ tn̂g, chí- ū chi̍t-pō͘-hūn nā-tiāⁿ).
|
(這位先生ài將佛骨表，用韓文，印上報；可惜本局，漢文無完全，所以我翻譯白話字印tī chia，來表明歡迎先生援助公報ê好意。Koh為著紙面有限，bē thang翻譯siuⁿ長，只有一部份 nā-tiāⁿ)。 |
|
Chiàu sîn só͘ siūⁿ, ho̍k-sāi Pu̍t, sī hoan-á ê hoat-tō͘. Tùi Hō͘-hàn ê sî, Pu̍t ê tāi-chì, chiū thoân ji̍p Tiong-kok, chóng-sī tī kó͘-chá lán chia, lóng bô chit-hō. Chá nî, N̂g-tè chē ū chi̍t-pah nî, chia̍h 110 hòe; Siàu-hō chē ūi peh-cha̍p nî, chia̍h 100 hòe; Chhoan-hiok chē ūi chhit-cha̍p-káu nî, chia̍h 98 hòe; Tè Khok chē ūi chhit-cha̍p nî, chia̍h 105 hòe; Tè Giâu chē ūi káu-cha̍p-peh nî, chia̍h 118 hòe; Tè Sùn kap Ú, lóng chia̍h káng pah hòe, chit-sî thiⁿ-ē thài- pêng, peh-sìⁿ an-lo̍k tn̂g hòe-siū, hit- tia̍p Tiong-kok lóng bô Pu̍t.
|
照臣所想，服事佛，是番仔ê法度。Tùi 後漢ê時，佛ê代誌，就傳入中國，總--是tī古早咱chia，攏無這號。早年，黃帝坐位一百年，食110歲；少昊坐位80年，食100歲；顓頊坐位79年，食98歲；帝嚳坐位70年，食105 歲；帝堯坐位98年，食118歲；帝舜kap禹，攏食到百歲，這時天下太平，百姓安樂長歲壽，hit-tia̍p中國攏無佛。 |
|
Āu-lâi Un-tiâu Thong-ông iā chia̍h 100 hòe. Thong ê sun, Thài-bō͘ chē- chhit-cha̍p-gō͘ nî, Bú-teng chē ūi gō͘- cha̍p-káu nî, Sú-kì bô kóng chia̍h lōa- chē hòe, chhui-chhek in ê nî ê siàu-gia̍h, iā sī lóng bô kiám-chió 100 hòe. Chiu Bûn-ông chia̍h 97 hòe, Bú-ông chia̍h 93 hòe, Bo̍k-ông chē ūi chi̍t-pah nî. Chit- sî Pu̍t ê hoat-tō͘ iáu-bōe thoân-ji̍p Tiong-kok, téng-bīn hiah-ê, m̄-sī in-ūi ho̍k-sāi Pu̍t chiah tì-kàu án-ni.
|
後來殷朝湯王也食100歲。湯ê孫，太茂坐75年，武丁坐位59年，史記無講食偌濟歲，推測in ê年ê數額，也是攏無減少100歲。周文王食97歲，武王食93 歲，穆王坐位100年，這時佛ê法度iáu-bōe傳入中國，頂面 hiah-ê,m̄是因為服事佛才致到án-ni。 |
|
Hàn Bêng-tè ê sî, chiah ū ho̍k-sāi Pu̍t ê hoat-tō͘. Bêng-tè chē ūi, tú-á cha̍p-peh nî, āu-lâi jiáu-loān sí-sit sio-sòa, kok-ūi bô kú-tn̂g. Sòng, Chê, Liông, Tîn, Goân, Gūi, chiah ê tiâu-tē í-āu, lâng ho̍k-sāi Pu̍t chiām-chiām kín-sīn, nî-tāi koh-khah té. Chí-ū Liông Bú-tè chē ūi 48 nî, chêng āu 3 pái, pàng-sak seng-khu, hiàn hō͘ Pu̍t. Chong-biō ê chè-sū chiū bô ēng gû iûⁿ, ji̍t-sî chia̍h chi̍t-tǹg, chí-ū sī chhài kap kóe-chí, āu- lâi sòa hō͘ Hō͘-kèng só͘ koaⁿ-tio̍k, gō-sí tī Tâi-siâⁿ (sī tng-sî ê kiong-siâⁿ), kok iā bia̍t-bô. Ho̍k-sāi Pu̍t sī beh kiû hok- khì, sòa tú-tio̍h chai-hō. Tùi án-ni lâi khòaⁿ, chiū chai Pu̍t, m̄-thang ho̍k-sāi.
|
漢明帝ê時，才有服事佛ê法度。明帝坐位，tú仔18年，後來擾亂死失相續，國位無久長。宋、齊、梁、陳、元、魏，chiah ê 朝代以後，人服事佛漸漸謹慎，年代koh較短。只有梁武帝坐位48 年，前後3擺，放sak身軀，獻hō͘佛。宗廟ê 祭祀就無用牛羊，日時食一頓， 只有是菜kap果子，後--來續hō͘ Hō͘-kèng 所趕逐，餓死tī 臺城(是當時ê宮城)，國也滅無。服事佛是beh求福氣，續 tú著災禍。Tùi án-ni來看，就知佛，m̄-thang服事。 |
|
Kin-á-ji̍t lán Tiong-kok ē siông-siông tú-tio̍h thian-chai, jîn-chai chē-chē ê chhi-chhám, siat-sú nā Hân Bûn-kong iáu tī-teh, i kiám m̄-sī ē chek-pī Tiong- kok lâng teh pài Pu̍t mah?
|
今仔日咱中國會常常tú著天災，人災濟濟ê 悽慘，設使若漢文公iáu tī--leh，伊kiám m̄是會責備中國人teh拜佛--mah？ |
|
“Chóng-sī góa bat chhe góa ê chèng lô͘-po̍k, sian-ti chiū-kīn lín; sī chá-chá khí-lâi chhe i, kóng, Chhiat-chhiat goān-lín m̄-thang kiâⁿ chit ê khó-o͘N3 ê sū, góa só͘ oàn-hīn ê. To̍k-to̍k in bô thiaⁿ, ia̍h bô àⁿ hī-khang, bô oa̍t-tńg lī-khui in ê pháiⁿ, iû-goân sio hiuⁿ tī pa̍t-hō ê siōng- tè. In-ūi án-ni, Góa ê tōa siū-khì piàⁿ- chhut tī Iû-tāi chiah ê siâⁿ” (Iâ-lī-bí 44:4).
|
「總--是我bat差我ê 眾奴僕，先知就近 lín;是早早起來差伊，講切切願lín m̄-thang行這個可惡ê事，我所怨恨ê。獨獨in無聽，亦無àⁿ耳空，無越轉離開in ê歹，猶原燒香tī別號ê上帝。因為án-ni，我ê大受氣拚出tī猶大 chiah ê siâⁿ。」(耶利米44:4) 譯者 陳憲國 |
|
(Tâi-oân Kàu-hōe Kong-pò tē 704 hō, 1947 nî 8 ge̍h)
|
(台灣教會公報第704號，1947年8月) |
