Gûn Peng-ôe_03
|
銀冰鞋_03 |
|---|---|
| Mary Mapes Dodge | Mary Mapes Dodge |
|
Tē 5 chiuⁿ Phok I-seng koah chèng. |
第5章 博醫生割症 |
|
Koh sì ji̍t Phok i-seng kap chi̍t ê siàu-liân koâiⁿ-tōa ê hù-chhiú kàu Hêng-sū ê ke-lāi khòaⁿ i ê lāu-pē. I-seng ēng sòe siaⁿ kap hù-chhiú tâm-lūn, Hêng-sū khiā tī thang-á piⁿ, kiong-kèng thèng-hāu i-seng siat-hoat kiù i ê lāu-pē. Āu-lâi i-seng kóng, “ Góa chhim-sìn chit ê pīⁿ sī hut-jiân chi̍t ē poa̍h-tó khì tōng-tio̍h náu, tì-kàu chi̍t ê e̍k-lông kap chi̍t ê sòe liû siⁿ tī náu-lāi, náu-chhé siū teh, só͘-í sit-liáu ti-kak, eng-kai tio̍h liâm-piⁿ koah.”
|
Koh四日博醫生kap一個少年懸大ê副手到Hêng-sū ê家內看伊ê 老父。醫生用細聲kap副手談論，Hêng-sū企tī 窗仔邊恭敬聽候醫生設法救伊ê 老父。後--來醫生講：「我深信這個病是忽然一下跋倒去tōng著腦，致到這個液囊kap一個細瘤生tī 腦內，腦髓受teh，所以失了知覺應該著liâm-piⁿ 割。」 |
|
Hù-chhiú kóng, “Lí kin-á-ki̍t í-keng hō͘ lâng chhiáⁿ behchòe saⁿ hāng sū, (1) tī kiaⁿ-siâⁿ, ū saⁿ ê kha beh koah, (2)tī Phok-lo̍k-khek ê só͘-chāi, ū chi̍t lúi ba̍k-chiu beh iah khí-lâi, (3) tī Hô piⁿ, ū chi̍t ê liû beh koah, cháiⁿ-iūⁿ ōe koh i chit ê pīⁿ n̍i̍h ?”
|
副手講：「你今仔日已經hō͘ 人請beh做三項事，(1) tī 京城，有三個腳beh割，(2)tī Phok-lo̍k-khek ê所在，有一蕊目珠beh挖--起來，(3) tī 河邊，有一個瘤beh割，怎樣會koh醫這個病--n̍i̍h? |
|
I-seng kóng, “Hit ê kha kap ba̍k-chiu to bōe hāi-tio̍h sin-khu, chit ê sī kî-koài ê pīⁿ, eng-kai tio̍h tāi-seng i-tī, lâi chhì-khòaⁿ góa ê chhiú-tōaⁿ, lí khòaⁿ chit ê Pek chím, nn̄g ge̍h ji̍t bô kia̍h thâu lah, chin khó-lîn ah, chit hāng chèng khiok sī chin tōa ê.” Chit sî i-seng chin tōa siaⁿ kóng chhin-chhiūⁿ bōe-kì-tit sī tī sím-mi̍h só͘-chāi, in-ūi tit-tio̍h chit ê kî-koài ê pīⁿ thang i-tī, cha̍p-hun ê ko-hèng. Hù-chhiú kóng, “Lí siūⁿ chit sî ōe liâm-piⁿ kiù chit ê khó-lîn ê pīⁿ lâng mah ?”
|
醫生講：「Hit ê腳kap目珠都bōe害著身軀，這個是奇怪ê病，應該著代先醫治，來試看我ê 手段，你看這個Pek嬸，兩月日無kia̍h頭--lah，真可憐--ah，這項症卻是真大--ê。」這時醫生真大聲講親像bōe記得是甚mi̍h所在，因為得著這個奇怪ê病thang醫治，十分ê高興。副手講：「你想這時會liâm-piⁿ救這個可憐ê病人--mah？」 |
|
I-seng kóng, “Góa siūⁿ tiāⁿ-tio̍h ōe kiù i.”
|
醫生講：「我想定著會救伊。」 |
|
Hù-chhiú chiū láu-si̍t kóng, “Góa siūⁿ Hô-lân bô lâng ōe i chit téng-hō ê pīⁿ, to̍k-to̍k khiám-chhái li ōe.”
|
副手就老實講：「我想荷蘭無人會醫這等號ê病，獨獨kiám-chhái你會。」 |
|
I-seng thiaⁿ liáu chiū bô hoaⁿ-hí kóng, “Lí m̄ bián ke kóng-ōe.” Chiū kiò Hêng-sū lâi tī bīn-chêng kap i kóng-ōe.”
|
醫生聽了就無歡喜講：「你m̄免加講話就叫Hêng-sū來tī 面前kap伊講話。」 |
|
Phok i-seng chòe lâng sī kî-koài, pún m̄ ài kap cha-bó͘ lâng kóng-ōe, koh m̄ ài hù-chhiú kóng kàu koah chèng ê sū, kiaⁿ-liáu cha-bó͘ lâng thiaⁿ-kìⁿ beh koah, chiū kiaⁿ beh hūn-khì, á-sī tōa khàu, só͘-i kap Hêng-sū kóng i ê lāu-pē ê chêng-hêng, koh kā i kóng, i ka-kī chhim-sìn ōe kiù chit ê pīⁿ. Hêng-sū kiong-kèng thiaⁿ chi̍t pái, bīn chi̍t pái pe̍h, chi̍t pái âng, ba̍k-chiu chù-ì khòaⁿ i ê lāu-pē, oa̍t-thâu tōa siaⁿ mn̄g i-seng “Lí kiám m̄-sī kóng, kiám-chhái thâi-koah liáu góa ê lāu-pē ōe sí mah ?”
|
博醫生做人是奇怪，本m̄ 愛kap查某人講話，koh m̄ 愛副手講到割症ê事，驚了查某人聽見beh割，就驚beh暈--去，抑是大哭，所以伊kap Hêng-sū講伊ê 老父ê情形，koh kā伊講，伊家己深信會救這個病。Hêng-sū恭敬聽一擺，面一擺白，一擺紅，目珠注意看伊ê老父，越頭大聲問醫生：「你kiám m̄ 是講，kiám-chhái thâi割了我ê 老父會死--mah ?」 |
|
I-seng kóng, “Kiám-chhái, chóng-sī góa chhim-sìn ōe i-tī i, bōe tì-kàu sí.”
|
醫生講：「Kiám-chhái,總--是我深信會醫治伊，bōe致到死。」 |
|
Hêng-sū kóng, “Nā bô koah, chit ê pīⁿ ōe tì-kàu sí mah ?”
|
Hêng-sū講：「若無割，這個病會致到死--mah？」 |
|
I-seng kóng, “Chi̍t ji̍t kè chi̍t ji̍t ná siong-tiōng, kàu lō͘-bé e̍k-lông teh-tio̍h náu, liâm-piⁿ chiū sí.”
|
醫生講：「一日過一日那傷重，到路尾液囊teh 著腦，liâm-piⁿ 就死。」 |
|
Hêng-sū kóng, “Nā koah kiám-chhái ōe kiù i, nā-sī tio̍h lōa-kú chiah ōe chai ōe hó bōe ?”
|
Hêng-sū講：「若割kiám-chhái會救伊，但是著偌久才會知會好--bōe?」 |
|
Chit sî Phok i-seng chiū hoat siū-khì kóng, “Kiám-chhái chi̍t ji̍t á-sī chi̍t tiám cheng, kín-kín kap lí ê lāu-bú siong-liông, góa ê sî-kan chin té, bô êng thang tâm-lūn.” Hêng-sū chiū kap i ê lāu-bú siong-liông, āu-lâi i ê lāu-bú kóng,“I-seng ah, ōe hō͘ i thiàⁿ mah ?” Ìn kóng, “Góa m̄ chai, kiám-chhái ōe thiàⁿ, kiám-chhái bōe thiàⁿ.”
|
這時博醫生就發受氣講：「Kiám-chhái一日抑是一點鐘，緊緊kap你ê 老母商量，我ê 時間真短，無閒thang談論。」Hêng-sū就kap伊ê 老母商量，後--來伊ê 老母講：「醫生--ah，會hō͘ 伊疼--mah？」應講：「我m̄ 知，kiám-chhái會疼，kiám-chhái bōe疼。」 |
|
Lāu-bú koh mn̄g kóng, “Koah ōe kiù i hó mah, lí ōe pau mah ? Lí kā góa ê kiáⁿ kóng, Kiám-chhái, kiám chhái.” Pek chím ōe kóng bē liáu, i-seng kóng, “Sī, góa kā i kóng koah kiám-chhái ōe sí, to̍k-to̍k ǹg-bāng ōe kiù i.” Tùi án-ni chiū chiong pio-á khòaⁿ chi̍t ē kóng, “Thang koah á m̄ thang koah, kín-kín chú-ì.”
|
老母koh問講：「割會救伊好mah，你會包mah？你kā我ê 子講，Kiám-chhái,kiám-chhái」百嬸話講未了，醫生講：「是我kā伊講割kiám-chhái會死，獨獨向望會救--伊。」Tùi án-ni就將錶仔看一個講：「Thang割抑m̄ thang割，緊緊主意。」 |
|
Pek chím oa̍t bīn kā Hêng-sū kóng, “Eⁿ-á, beh cháiⁿ-iūⁿkóng n̍i̍h ?”
|
Pek嬸越面kā Hêng-sū講：「嬰仔，beh怎樣講n̍i̍h?」 |
|
Hêng-sū kóng, “Siōng-tè ōe hō͘ lí chai.” I ê lāu-bú àⁿ-thâu kî-tó kóng, “Kiû Siōng-tè chí-sī góa tio̍h cháiⁿ-iūⁿ kóng.” Liâm-piⁿ chhin-chhiūⁿ i ê kî-tó tī i ê sim lāi hō͘ i koat-tēng, chiū kia̍h thâu ǹg i-seng kóng, “Góa kam goān, thang lâi koah.” I-seng chiū bōe-bián-tit kóng, “Cháiⁿ-iūⁿ chiah kú tiāⁿ-tio̍h ?” Tùi án-ni Phok i-seng kap i ê hù-chhiú ê saⁿ-kap gī-lūn, chiū tùi phê-pau-lāi the̍h chhut chi̍t ki kng-ku̍t ê to. Chit sî Kat-la-tí khiā tī thang-á chêng, chi̍t ē khòaⁿ i-seng kia̍h to, chìn-chêng khì khòaⁿ, chiū kiò i ê lāu-bú kóng, “Lāu-pē bô hoān-chōe, chā-ji̍t koh m̄-sī ūi-sù beh sio lí, cháiⁿ-iūⁿ in beh thâi sí i n̍i̍h ?” I ê lāu-bú kan-khó͘ ê siaⁿ kóng, “Góa m̄ chai, góa bōe hiáu-tit.” I-seng kóng, “Án-ni bōe-chòe tit, lí kap lí ê cha-bó͘ kiáⁿ tio̍h chhut-khì, chí-ū lí ê kiáⁿ tī chit lāi chiū hó.” Pek chím put-tek-í chiū tńg bīn-sek, lún-khì thun siaⁿ, nā-sī ba̍k-chiu sui-jiân âng, siaⁿ-im sui-jiân kē, kóng-ōe khiok chhin-chhiūⁿ ū chú-kian ê lâng, chiū kóng, “I-seng chhiáⁿ lí hō͘ góa kap góa ê tiōng-hu tiàm-teh.”
|
Hêng-sū講：「上帝會hō͘ 你知。」伊ê 老母àⁿ頭祈禱講：「求上帝指示我著怎樣講。」Liâm-piⁿ 親像伊ê 祈禱tī 伊ê心內hō͘ 伊決定，就kia̍h頭向醫生講：「我甘願，thang來割。」醫生就bōe 免得講：「怎樣chiah久定著？」Tùi án-ni博醫生kap伊ê 副手ê相kap議論，就tùi皮包內提出一枝光滑ê刀。這時Kat-la-tí企tī窗仔前，一下看醫生kia̍h刀，進前去看，就叫伊ê 老母講：「老父無犯罪，昨日koh m̄ 是有意思beh燒你，怎樣in beh thâi死伊--n̍i̍h?」伊ê 老母艱苦ê聲講：「我m̄ 知，我bōe曉--得。」醫生講：「Án-ni bōe做得，你kap你ê 查某子著出去，只有你ê 子tī 這內就好。」Pek嬸不得已就轉面色，忍氣吞聲，但是目珠雖然紅，聲音雖然低，講話卻親像有主見ê人，就講：「醫生請你hō͘我kap我ê 丈夫tiàm--teh。」 |
|
I-seng kóng, “Thang, to̍k-to̍k lí m̄ thang chòe siaⁿ.”
|
醫生講：「Thang，獨獨你m̄ thang做聲。」 |
|
Ìn kóng, “Hó.”
|
應講：「好。」 |
|
Chit sî Kat-la-tí kiaⁿ, chiū cháu-khì lâu-téng, hit lāi óa piah ū chi̍t tiuⁿ sòe bîn-chhn̂g, i chiū tó tī chi̍t só͘-chāi, kèng-jiân bô lâng chai. I-seng chiū chiong gōa-saⁿ thǹg-khí-lâi, ēng chi̍t ê phûn tóe chúi hē tī pīⁿ lâng ê piⁿ-á, oa̍t-bīn tùi Hêng-sū kóng, “Gín-ná góa ōe óa-khò lí mah ?”
|
這時Kat-la-tí驚，就走去樓頂，hit 內倚壁有一張細眠床，伊就倒tī一所在，竟然無人知。醫生就將外衫褪--起來，用一個盆tóe水hē tī 病人ê邊仔，越面對Hêng-sū講：「囡仔我會倚靠你mah？」 |
|
Ìn kóng, “Ōe.”
|
應講：「會。」 |
|
I-seng kóng, “Lí thang khiā tī lí ê lāu-pē ê thâu-piⁿ, lí ê lāu-bú ōe tī i ê chiàⁿ-pêng.” koh tùi Pek chím kóng, “Lí tio̍h kì-tit, m̄ thang khàu chi̍t siaⁿ, ia̍h m̄ thang hūn-khì.”
|
醫生講：「你thang企tī 你ê 老父ê頭邊，你ê老母會tī 伊ê正爿。」Koh對Pek嬸講：「你著記--得，m̄ thang哭一聲，亦m̄ thang暈--去。」 |
|
Pek chím ìn kóng, “Chai.” Chiū chē tī chhn̂g-piⁿ. Chit sî sī tē-it thang kiaⁿ ê sî, hù-chhiú iā tī hit lāi-bīn pang-chān. Kat-la-tí tī lâu-téng ēng i ê kim-kim ê ba̍k-chiu thau-khòaⁿ, khòaⁿ-kìⁿ chit ê kong-kéng, lún put-chū, chiū tùi lâu-téng cháu lo̍h-lâi, chē tī mn̂g-gōa sng-seh ê tōe, thiaⁿ thang-á-lāi ê siaⁿ, put-chí tōa, siūⁿ hit nn̄g ê ku-koài ê i-seng tiāⁿ-tio̍h chiong góa ê lāu-pē hāi-sí liáu, chiū khàu kàu bô siaⁿ; āu-lâi koh choán-siūⁿ góa ê lāu-bú iā tī hit lāi, Hêng-sū iâ tī hit lāi, in tek-khak ōe chiàu-kò͘ góa ê lāu-pē, koh siūⁿ góa ê lāu-bú ê bīn m̄ chai piàn-chòe cháiⁿ-iūⁿ lah. Tú-tú teh siūⁿ ê sî hut-jiân-kan chai ka-kī ê sin-khu hui-siông ê kôaⁿ-léng, koh chai sin-thé cha̍p-hun ê ià-siān, chiū ka-kī kóng góa khah hó tio̍h khùn; tú-tú teh khùn ê sî, chai ū chi̍t lâng chiong chhiú hōaⁿ tī i ê keng-thâu téng, un-jiû ê siaⁿ kóng, “Gín-ná kín khí-lâi, kín khí-lâi, lí tichiā bōe-ōe khùn, kiaⁿ-liáu ōe tàng-sí.”
|
百嬸應講：「知。」就坐tī床邊。這時是第一thang驚ê 時，副手也tī hit內面幫贊。Kat-la-tí tī 樓頂用伊ê 金金ê目珠偷看，看見這個光景，忍不住，就tùi樓頂走落來，坐tī 門外霜雪ê地，聽窗仔內ê聲，不止大，想hit兩個古怪ê醫生定著將我ê 老父害死了，就哭到無聲，後--來koh轉想我ê 老母也tī hit內，Hêng-sū也tī hit內，in的確會照顧我ê 老父，koh想我ê 老母ê面m̄ 知變做怎樣--lah。Tú-tú想ê 時忽然間知家己ê身軀非常ê寒冷，koh知身體十分ê厭siān,就家己講我較好著睏；tú-tú睏ê時，知有一人將手hōaⁿ tī 伊ê 肩頭頂，溫柔ê聲講：「囡仔緊起--來，緊起--來，你tichiā bōe會睏，驚了會凍死。」 |
|
Kat-la-tí bān-bān kia̍h-thâu beh thí ba̍k-chiu khòaⁿ, kan-khó͘ thí bōe khui, kàu thí-khui sòe-jī chi̍t ē khòaⁿ, goân-lâi sī Hek-tek sió-chiá, sim-siūⁿ chit ê sū ia̍h bô kî-koài, in-ūi siông-siông sī bāng-kìⁿ Hek-tek, chit sî siūⁿ iā tī bāng-tiong. Hek-tek sió-chiá iû-goân liân-liân kiò Kat-la-tí bô soah, kóng, “Lí tek-khak tio̍h kóaⁿ-kín khí-lâi.” Kat-la-tí koh thí-khui ba̍k, chi̍t ē khòaⁿ sī chin ê, pèng m̄-sī bāng-kìⁿ, chí-ū khòaⁿ siàu-liân khó-ài ê sió-chiá, ēng chhiú iô i chhíⁿ, bián-kióng i khí-lâi. Kat-la-tí chiām-chiām cheng-sîn, ēng siang-chhiú jê ba̍k-chiu, ka-kī chīn kiàn-siàu kóng, “Góa cháiⁿ-iūⁿ khùn-khì n̍i̍h ?”
|
Kat-la-tí慢慢kia̍h頭beh thí目珠看，艱苦thí bōe開，到thí 開細膩一下看，原來是Hek-tek小姐，心想這個事亦無奇怪，因為常常是夢見Hek-tek，這時想也tī 夢中。Hek-tek小姐猶原連連叫Kat-la-tí無煞，講：「你的確著趕緊起--來。」Kat-la-tíkoh thí開目，一下看是真--ê,並m̄ 是夢見，只有看少年可愛ê小姐，用手搖伊醒，勉強伊起--來。Kat-la-tí漸漸精神，用雙手jê 目珠，家己盡見笑講：「我怎樣睏--去n̍i̍h?」 |
|
Hek-tek chhiò kóng, “Lí chin ià-siān, lí ê chhùi-tûn í-keng chhin-chhiūⁿ seh ê pe̍h, chit tia̍p lí kui sin-khu óa tī góa, tâm-po̍h ūn-tōng, hō͘ sin-thé khah sio, jiân-āu góa chiah chhōa lí kàu ke-lāi.”
|
Hek-tek笑講：「你真厭siān,你ê 嘴唇已經親像雪ê白，這tia̍p你歸身軀倚tī我，淡薄運動，hō͘身體較燒，然後我才chhōa你到家內。」 |
|
Kat-la-tí kóng, “M̄, m̄, m̄, i-seng m̄ ún góa ji̍p-khì.” Hek-tek sim-lāi put-chí kî-koài kóng, “Án-ni lán m̄ thang ji̍p-khì, chiū tī chia kiâⁿ-kiâⁿ lah.” Koh mn̄g kóng, “Sī cháiⁿ-iūⁿ m̄ thang ji̍p-khì ?”
|
Kat-la-tí：「M̄,m̄ m̄,醫生m̄允我入去。」Hek-tek心內不止奇怪講：「Án-ni咱m̄ thang入去，就tī chia 行行--lah。」 Koh問講：「是怎樣m̄ thang入去？」 |
|
Ìn kóng, “I-seng kóng m̄ thang, góa ê lāu-pē sī koah chèng, chit sî tī hit lāi teh tāng-chhiú, lí siūⁿ góa ê lāu-pē í-keng sí mah ?”
|
應講：「醫生講m̄ thang，我ê 老父是割症，這時tī hit內teh動手，你想我ê 老父已經死mah？」 |
|
Hek-tek thiaⁿ-kìⁿ kóng, chiū àⁿ hī-khang sòe-jī thiaⁿ, lóng bô lâng teh chòe siaⁿ, chiū cháu kàu thang-á chêng thau-khòaⁿ. Kat-la-tí kóng, “Hek-tek sió-chiá, hit lāi khòaⁿ bô kìⁿ, góa ê lāu-bú í-keng ēng iù-chóa kô͘ ba̍t lah, thang khì lâm-sì phòa-thang-á hit ūi khòaⁿ.” Hek-tek kín-kín cháu-khì, koh tùi Kat-la-tí kóng, “Lí iā thang laisâⁿ-kap khòaⁿ.” Nn̄g lâng chiū kàu phòa thang-á kháu, Hek-tek kiò Kat-la-tí tāi-seng khòaⁿ, Kat-la-tí khòaⁿ chi̍t tiap-á-kú, Hek-tek mn̄g kóng, “Lí khòaⁿ sím-mi̍h mah ?”
|
Hek-tek聽見講，就àⁿ耳空細膩聽，攏無人teh做聲，就走到窗仔前偷看。Kat-la-tí講：「Hek-tek小姐，hit內看無見，我ê 老母已經用幼紙糊密--lah，thang去南勢破窗仔hit 位看。」Hek-tek緊緊走--去，koh對Kat-la-tí講：「你也thang來相kap看。」兩人就到破窗仔口，Hek-tek叫Kat-la-tí代先看，Kat-la-tí看一tiap仔久，Hek-tek問講：「你看甚mi̍h --mah？」 |
|
Kat-la-tí kóng, “Sió-chiá, góa ê lāu-pē khùn khì lóng bô tín-tāng, thâu í-keng ēng pò͘ pau teh, kî-û ê lâng ba̍k-chiu lóng teh khòaⁿ i, góa beh ji̍p-khì khòaⁿ-khòaⁿ, lí beh ji̍p mah ?”
|
Kat-la-tí講：「小姐，我ê 老父睏--去攏無振動，頭已經用布包--teh，其餘ê人目珠攏teh看伊，我beh入去看看，你beh入--mah？」 |
|
Hek-tek kóng, “Chit sî góa m̄ thang ji̍p-khì, góa beh tò-khì lah, chài-hōe.” Kóng soah chiū khì.
|
Hek-tek講：「這時我m̄ thang入去，我beh倒--去lah，再會。」講煞就去。 |
|
Tē 6 chiuⁿ Lāu-pē Chhíⁿ |
第6章 老父醒 |
|
Kat-la-tí cháu ji̍p pâng-lāi, khòaⁿ-kìⁿ pâng-tiong lóng bô siaⁿ-seh liân hit ê lāu i-seng ho͘-khip, iā thiaⁿ ōe kìⁿ, Kat-la-tí chiū bong i ê lāu-bú ê chhiú chhin-chhiūⁿ sng ê léng, khòaⁿ-kìⁿ i ê bīn khiok sī hoat âng, kè bô lōa-kú khòaⁿ-kìⁿ pīⁿ lâng lio̍h-lio̍h á tín-tāng. Phok i-seng chiū chù ba̍k khòaⁿ i, kî-û ê lâng iā put-chí kî-koài, koh thêng chi̍t tiap-á-kú, i ê lāu-pē koh kia̍h i ê chhiú khí-lâi bong ka-kī ê thâu-hia̍h, chiām-chiām thí-khui ba̍k-chiu chhin-chhiūⁿ kiaⁿê khoán-sit, kóng, “Hit ê chháu-chhio̍h tio̍h khah koâiⁿ lah, taⁿ tio̍h thiⁿ chhiah-thô͘, chúi lâu chin kín lóng bô sî thang....” I ê lāu-bú ǹg chêng khan i ê chhiú khòaⁿ i mn̄g kóng,“Sī kā góa kóng á m̄-sī.”
|
Kat-la-tí走入房內，看見房中攏無聲說連hit ê老醫生呼吸，也聽會見，Kat-la-tí就摸伊ê 老母ê手親像霜ê冷，看見伊ê 面卻是發紅，過無偌久看見病人略略仔振動。博醫生就注目看伊，其餘ê人不止奇怪，koh停一tiap-á-kú,伊ê 老父koh kia̍h伊ê 手起來摸家己ê頭額，漸漸thí 開目珠親像驚ê款式講：「Hit ê草蓆著較懸--lah，今著添赤土，水流真緊攏無時thang…」伊ê 老母向前牽伊ê 手看伊問講：「是kā我講抑m̄ 是…」 |
|
Pīⁿ-lâng sòe-á siaⁿ kóng, “Sī lí mah ? góa khùn-khì, chit sî thâu ū tām-po̍h thiàⁿ, sòe Hêng-sū tī tah lo̍h ?”
|
病人細仔聲講：「是你--mah？我睏--去，這時頭有淡薄疼，細Hêng-sū tī tah落？」 |
|
Hêng-sū hoaⁿ-hí chiū tōa siaⁿ kiò kóng, “A-tia, góa tī chit lāi.”
|
Hêng-sū歡喜就大聲叫講：「阿爹，我tī這內。」 |
|
I-seng khòaⁿ-kìⁿ in chit iūⁿ kóaⁿ-kín poah in thè-khui, Pek chím kóng, “Kám-siā Siōng-tè, i chit sî ōe jīn-tit góa lah, Kat-la-tí kín lâi khòaⁿ lí ê lāu-pē.” Phok i-seng chit sî chīn la̍t kiò in m̄ thang chòe siaⁿ, bô lō͘-ēng, bián-kióng in lī khah hn̄g iā kōe-ōe kiâⁿ.
|
醫生看見in這樣趕緊撥in退開，百嬸講：「感謝上帝，伊這時會認得我--lah，Kat-la-tí緊看你ê 老父。」博醫生這時盡力叫in m̄ thang做聲，無路用，勉強in 離較遠也kōe會行。 |
|
Hêng-sū kap i ê lāu-bú liân-khàu tòa-chhiò, bong hun-bê tu-2á chhíⁿ ê pīⁿ lâng, Kat-la-tí sui-jiân bô chòe siaⁿ, khòaⁿ i chin khoài-lo̍k, i ê ba̍k-chiu iā sī hoat kim, i ê lāu-pē koh sòe-á siaⁿ kóng, “Sió pó-pòe teh khùn mah ?” Sió pó-pòe sī in cha̍p-nî chêng kiò Kat-la-tí ê ōe; tāi-seng kiò sòe Hêng-sū iā sī in cha̍p nî chêng kiò Hêng-sū ê ōe. I khùn liáu cha̍p nî m̄ chai sòe-hàn gín-ná í-keng tōa-hàn lah, tùi án-ni i ê bó͘ kí Kat-la-tí kóng, “Chit ê chiū-sī.” Koh tùi i-seng kóng “Sian-siⁿ ah, lí kiù goán chiah ê, i cha̍p nî ê tiong-kan chi̍t hāng sū to m̄ chai, kiám-siā lí ê un i-hoí hiān-chāi chai sè-kan ê sū, si̍t-chāi kám-siā lí bô soah.”Koh tùi Hêng-sū, Kat-la-tí kóng, “Lí chòe sím-mi̍h, bô khah kín kám-siā i-seng n̍i̍h ?” Phok i-seng bô chòe siaⁿ, ǹg thiⁿ chi̍t ē kí, in lóng bêng-pe̍k i ê ì-sù, chi̍t ê chi̍t ê kūi-lo̍h, Phok i-seng thâu-khak àⁿ-lo̍h. Pek chím kî-tó ê sî iáu-kú khan i ê tiōng-hu ê chhiú, hù i-seng iā khiā tī hé-lô͘ piⁿ, Hêng-sū ê lāu-pē mn̄g kóng, “Kin-á-ji̍t sī lé-pài ji̍t mah ? Lin chiah ê teh kî-tó.” Pek chím àⁿ thâu bōe-ōe ìn i sī ūi-tio̍h sím-mi̍h iân-kò͘, in-ūi hit ji̍t pèng m̄-sī Chú-ji̍t. I ê tiōng-hu koh bān-bān kóng, “Lán thang lâi tha̍k chi̍t chiuⁿ ê Sèng-keng,” koh kóng, “Góa bōe hiáu-tit, góa cháiⁿ-iūⁿ ōe chiah loán-jio̍k, nā bô, chhiáⁿ hit ê bo̍k-su tha̍k hō͘ góa thiaⁿ.” I chhò-gō͘ jīn i-seng chòe bo̍k-su, só͘-í kóng chit chit hō ōe. Kat-la-tí thiaⁿ-kìⁿ kóng, tùi kè-á téng chiong tōa pún ê Sèng-chheh the̍h lâi. Phok i-seng chheng chòe bo̍k-su put-chí bô hoaⁿ-hí, chiū chiong Sèng-chheh the̍h hō͘ hù-chhiú ê kiò i tha̍k. Tha̍k bêng-pe̍k Phok i-seng kā in kóng, “Lín tio̍h cha̍p-hun ê an-chēng, m̄ thang kiáu-jiáu i, bô án-ni i iû-goân ōe sí.”
|
Hêng-sū kap伊ê 老母連哭帶笑，摸昏迷tú仔醒ê病人，Kat-la-tí雖然無做聲，看伊真快樂，伊ê 目珠也是發金，伊ê 老父koh細仔聲講：「小寶貝teh睏--mah？」小寶貝是in十年前叫Kat-la-tí ê話；代先叫細Hêng-sū也是in十年前叫Hêng-sū ê話。伊睏了十年m̄ 知細漢囡仔已經大漢--lah，tùi án-ni伊ê 某指Kat-la-tí講：「這個就是。」Koh對醫生講：「先生--ah，你救阮chiah ê,伊十年ê中間一項事to m̄知，感謝你ê 恩醫好醫伊現在知世間ê事，實在感謝你無煞。」Koh對Hêng-sū、Kat-la-tí講：「你做甚mi̍h，無較緊感謝醫生--n̍i̍h?」博醫生無做聲，向天一下指，in攏明白伊ê 意思，一個一個跪落，博醫生頭殼àⁿ 落。百嬸祈禱ê時iáu-kú牽伊ê 丈夫ê手，副醫生也企tī火爐邊，Hêng-sū ê老父問講：「今仔日是禮拜日--mah？Lín chiah ê teh祈禱。」Pek嬸àⁿ頭bōe會應伊是為著甚mi̍h緣故，因為hit 日並m̄ 是主日。伊ê 丈夫koh慢慢講：「咱thang來讀一章ê聖經，」koh講：「我bōe曉--得，我怎樣會chiah軟弱，若無，請hit ê牧師讀hō͘ 我聽。」伊錯誤認醫生做牧師，所以講這號話。Kat-la-tí聽見講：「tùi架仔頂將大本ê聖經冊提--來。博醫生稱做牧師不止無歡喜，就將聖冊提hō͘ 副手--ê,叫伊讀。讀明白博醫生kā in講：「Lín著十分ê安靜，m̄ thang攪擾伊，無án-ni伊猶原會死。」 |
|
Pek chím iô-chhiú kā i kóng, “Pīⁿ lâng í-keng teh khùn, m̄ thang chòe siaⁿ.”
|
Pek嬸搖手kā伊講：「病人已經teh睏，m̄ thang做聲。」 |
|
I-seng koh sòe-á siaⁿ kā Pek chím kóng, “Hoân sū choan-bū tio̍h an-chēng, lí ōe hiáu-tit mah? Chit ê chin sī chi̍t hāng ê tōa sū, kin-á-ji̍t m̄ thang hō͘ i chia̍h chi̍t tiám-á ê chia̍h mi̍h, bîn-á-ji̍t góa beh koh-lâi khòaⁿ i.” Kóng soah chiū kín-kín kap hù-chhiú tò-khì; in chin thé-biān ê bé-chhia tī gōa-bīn peng-khoe téng, kiâⁿ-lâi kiâⁿ-khì, í-keng thèng-hāu chin kú, Hêng-sū chiū sàng i-seng chhut-khì kiong-kèng kóng, “I-seng ah, goān Siōng-tè chiok-hok lí, góa lóng bōe pò-tap lí chit hō ê tōa un.”
|
醫生koh細仔聲kā Pek嬸講：「凡事專務著安靜，你會曉--得mah？這個真是一項ê大事，今仔日m̄ thang hō͘ 伊食一點仔ê食物，明仔日我beh koh來看伊。」講煞就緊緊kap副手倒--去；in真體面ê馬車tī 外面冰溪頂，行來行去，已經聽候真久，Hêng-sū就送醫生出--去恭敬講：「醫生--ah，願上帝祝福你，我攏bōe報答你這號ê大恩。」 |
|
I-seng kóng, “Pīⁿ lâng chhíⁿ ê sî chí-ū lí tio̍h chiàu lis2¯ ōe hiáu-tit ê pang-chān i, chiū-sī pò-tap góa lah, siat-sú in bô an-chēng, kiáu-jiáu ê siaⁿ-im, á-sī khàu ê siaⁿ hō͘ i thiaⁿ-kìⁿ, sui-jiân i-hó liáu lah, iā ōe sí, hô-hòng i chit sî tú-tú cha̍p-hun ê loán-jio̍k ê sî, nā-sī lí ài lāu-pē hó, choan-bū tek-khak hō͘ i an-chēng sī iàu-kín.” Kóng soah chiū chē bé-chhia, Hêng-sū khiā teh khòaⁿ, i ê chhia khì liáu chiah ji̍p-khì.
|
醫生講：「病人醒ê 時只有你著照你所會曉--得ê幫贊伊，就是報答我--lah，設使in 無安靜，攪擾ê聲音，抑是哭ê聲hō͘伊聽--見，雖然醫好了--lah，也會死，何況醫這時tú-tú十分ê軟弱ê 時，若是你ài老父好，專務的確hō͘ 伊安靜是要緊。」講煞就坐馬車，Hêng-sū企teh看，伊ê 車去了才入去。 |
|
Tē 7 chiuⁿ Sòng-hiong ê Khòa-lū |
第七章 散hiong ê掛慮 |
|
Kè ji̍t Phok i-seng kàu Pek chím ê ke, chit ē ji̍p chhù, chiū khòaⁿ-kìⁿ choân ke ê lâng lóng khoài-lo̍k ê khoán-sit, ka-kī sim-lāi iā chin an-ùi. Pek chím chē tī pīⁿ lâng ê sin-piⁿ teh chhiah be̍h, i ê tiōng-hu an-ún khùn tī bîn-chhn̂g n̍i̍h, Kat-la-tí tī chhù-kak ê toh-téng teh chòe mī-pau. I-seng ji̍p-khì tāi-lio̍k mn̄g kúi-kù pīⁿ lâng ê chêng-hêng, inìn ê sî hián-chhut khoài-lo̍k ê iūⁿ. I-seng khì bong pīⁿ lâng ê me̍h, chiū tùi Pek chím kóng, “Iáu-kú cha̍p-hun ê loán-jio̍k, hiān-sî thang hō͘ i chia̍h tām-po̍h, to̍k-to̍k m̄ thang siuⁿ chōe, iàu-kín i tio̍h chia̍h pó͘ ê mi̍h.”
|
過日博醫生到Pek嬸ê家，這下入厝，就看見全家ê人攏快樂ê款式，家己心內也真安慰。Pek嬸坐tī病人ê身邊teh刺襪，伊ê 丈夫安穩睏tī 眠床--n̍i̍h,Kat-la-tí tī 厝角桌頂teh做麵包。醫生入去大略問幾句病人ê情形，in應ê時顯出快樂ê樣。醫生去摸病人ê脈，就對Pek嬸講：「Iáu-kú十分ê軟弱，現時thang hō͘ 伊食--淡薄，獨獨m̄ thang傷濟，要緊伊著食補ê物。」 |
|
Pek chím hoaⁿ-hoaⁿ hí-hí kóng, “Goán ū o͘ ê mī-pau, iáu ū ám-bê, sī i pêng-siông chia̍h ê.”
|
百嬸歡歡喜喜講：「阮有烏ê麵包，iáu有ám糜，是平常食--ê。」 |
|
I-seng iu-bīn kóng, “Bô ū pí chit ê khah hó mah? Hit ê mi̍h bōe ēng-tit, pīⁿ lâng tio̍h chia̍h gû-bah chiap, pe̍h mī-pau, hang ê piáⁿ koe-nn̄g, gû-ni, koe thng, phû-tô chiap, chiah ê mi̍h.” Teh kóng ê sî khòaⁿ-kìⁿ pīⁿ lâng chhin-chhiūⁿ léng ê khoán-sit, sûi-sî kí kóng “I kah ê phē, iàu-kín tio̍h khin iā sio ê chiah hó.” Kóng soah koh mn̄g Hêng-sū tī tah-lo̍h, Pek chím ìn kóng, “I chhut-khì chhē kang thang chòe, sian-siⁿ chhiáⁿ lí chē.”
|
醫生憂面講：「無有比這個較好--mah？Hit ê物bōe用--得，病人著食牛肉汁、白麵包、烘ê餅雞卵、牛奶、雞湯、葡萄汁，chiah ê物。」Teh講ê 時看見病人親像冷ê款式，隨時指講：「伊kah ê被，要緊著輕也燒才好。」講煞koh問Hêng-sū tī tah落，Pek嬸應講：「伊出去chhē工thang做，先生請你坐。」 |
|
I-seng kín-kín kóng, “M̄ bián chē, m̄ bián chē.” Pīⁿ lâng khòaⁿ liáu Pek chím chit kù iáu-bē kóng chhut, i chiū khì. Pek chím chiū kóaⁿ-kín kàu i ê tiōng-hu ê bîn-chhn̂g-chêng khòaⁿ i ê tiōng-hu, àm-àm lâu ba̍k-sái. Chit sî Hêng-sū tò-lâi khòaⁿ i ê lāu-bú ê khoán-sit, chiū kiaⁿ kóng, “A-bú cháiⁿ-iūⁿ ah ? lāu-pē ê pīⁿ ū khah siong-tiōng mah ?”
|
醫生緊緊講：「M̄ 免坐，m̄ 免坐。」病人看了Pek嬸這句iáu-bē講出，伊就去。Pek嬸就趕緊到伊ê 丈夫ê眠床看伊ê 丈夫，暗暗流目屎。這時Hêng-sū倒--來看伊ê 老母ê款式，就驚講：「阿母怎樣--ah？老父有較傷重--mah？」 |
|
I ê lāu-bú chiū oa̍t-thâu lâi tùi i ê kiáⁿ kóng, “Sī ah, lí ê lāu-pē teh-beh gō-sí lah.”
|
伊ê 老母就越頭來對伊ê 子講：「是--ah，你ê老父teh beh餓死--lah。」 |
|
Hêng-sū thiaⁿ-kìⁿ kóng, bīn sūi-sî piàn-sek kóng, “Sī sím-mi̍h ì-sù n̍i̍h? I nā iau chit sî kóaⁿ-kín thang hō͘ i chia̍h.” Chiū kiò Kat-la-tí kóng, “Lí thang the̍h tām-po̍h bê lâi hō͘ lāu-pē chia̍h.”
|
Hêng-sū聽見講，面隨時變色講：「是甚mi̍h意思--n̍i̍h?伊若枵這時趕緊thang hō͘ 伊食。」就叫Kat-la-tí講：「你thang提淡薄糜來hō͘ 老父食。」 |
|
I ê lāu-bú kín hoah kóng, “M̄ thang, m̄ thang, nā hō͘ i chia̍h bê, chiū ōe sí lah, lán chit hō ê khó͘ lim chia̍h, i sī bōe-ōe chia̍h ê. Hêng-sū ah, lí ê lāu-pē beh gō-sí lah, i-seng kóng i it-tēng tio̍h chia̍h bah, koe-nn̄g, koe thng, gû-ni,pe̍h mī-pau, phû-tô chiap, chit téng-hō ê pó͘-mi̍h chiah hó, ai-ah, chit sî ke-lāi bô pòaⁿ îⁿ, beh cháiⁿ-iūⁿ n̍i̍h ?”
|
伊ê 老母緊喝講：「M̄ thang，m̄ thang，若hō͘伊食糜，就會死--lah，咱這號ê苦lim食，伊是bōe會食ê。Hêng-sū--ah，你ê 老父beh餓--死lah，醫生講伊一定著食肉，雞卵、雞湯、牛奶、白麵包、葡萄汁，這等號ê補物才好，ai --ah，這時家內無半圓，欲怎樣--n̍i̍h?」 |
|
Hêng-sū kóng, “A-bú, i-seng kóng i tek-khak tio̍h chia̍h chit hō ê mi̍h mah ?”
|
Hêng-sū講：「阿母，醫生講伊的確著食這號ê物--mah？」 |
|
I ê lāu-bú kóng, “Tio̍h.”
|
伊ê 老母講：「著。」 |
|
Hêng-sū kóng, “A-bú, hiān-chāi lí m̄ thang tio̍h-ki̍p, iā m̄ thang khàu, i beh chia̍h chiah ê mi̍h, góa kin-á-ji̍t kàu àm thang chīn góa ê le̍k-liōng thàn tò-lâi bóe hō͘ i chia̍h, tāi-seng chiong góa hit tiuⁿ bîn-chhn̂g ê phē hō͘ i kah, góa ē-hng thang khùn tī chháu-lāi.”
|
Hêng-sū講：「阿母，現在你m̄ thang著急，也m̄ thang哭，伊beh食ê物，我今仔日到暗thang盡我ê力量趁--倒來買hō͘伊食，代先將我hit 張眠床ê被hō͘ 伊蓋，我e 昏thang睏tī 草內。」 |
|
I ê lāu-bú kóng, “Hêng-sū ah, hit niá phē thài tāng, i-seng kóng it-tēng tio̍h ēng khin iā sio ê hō͘ i kah chiah hó.” Koh thó͘-khùi kóng, “Ai-ah, Hêng-sū ah, lí ê lāu-pē teh-beh tàng-sí lah, in-ūi hiān-chāi lán ê chhâ iā bô lah.”
|
伊ê 老母講：「Hêng-sū--ah，hit領被太重，醫生講一定著用輕也燒ê hō͘ 伊kah才好。」 Koh吐氣講：「Ai --ah，Hêng-sū--ah，你ê 老父teh-beh凍死--lah，因為現在咱ê柴也無--lah。」 |
|
Hêng-sū kóng, “Bô iàu-kín, góa chiong jû-chhiū ê ta ki chhò lo̍h-lâi sio, thang hō͘ chit ê pâng iā sio, góa chit sî beh chhut-khì, iáu-bē àm góa beh chiong chiah ê mi̍h bóe tò-lâi, nā-sī pún só͘-chāi bô tāi-chì thang chòe, góa chiū beh kàu kiaⁿ-siâⁿ khì chhē kang, a-bú, lí m̄ bián kiaⁿ, gûi-hiám í-keng kè-khì lah, lí khòaⁿ lāu-pē í-keng khah cheng-sîn lah, lán thang pàng sim chòe chiong-lâi ê sū.
|
Hêng-sū講：「無要緊，我將榆樹ê礁枝剉落來燒，thang hō͘ hit ê房也燒，我這時beh出去，iáu-bē暗我beh將chiah ê物買倒--來，若是本所在無代誌thang做，我就beh到京城去chhē工，阿母，你m̄免驚，危險已經過去--lah，你看老父已經較精神--lah，咱thang放心做將來ê事。 |
|
Pek chím koh thó͘-khùi kóng, “Bô chhò, bô chhò,” chiū chiong ba̍k-sái kín-kín chhit ta.
|
Pek嬸 koh吐氣講：「無錯，無錯，」就將目屎緊緊拭礁。 |
|
Hêng-sū kóng. “A-bú, lí m̄ thang kip, lí khòaⁿ lāu-pē khùn teh, khah hó lah, chhì-siūⁿ Siōng-tè í-keng chiong i sàng hôe-lâi, kiám khéng chit sî hō͘ i gō-sí mah ? I só͘ tio̍h chia̍h ê mi̍h góa kim-mî ōe bóe lâi, góa ê saⁿ tē-á lāi sui-jiân khang-khang, nā-sī chhin-chhiūⁿ móa-móa chîⁿ chi̍t iūⁿ, lí chhian-bān m̄ thang iu-būn.” Kóng soah chiū chhut-khì.
|
Hêng-sū講：「阿母，你m̄ thang急，你看老父睏--teh，較好--lah，試想上帝已經將伊送回來，kiám肯這時hō͘伊餓死--mah？伊所著食ê物我今暝會買--來，我ê衫袋仔內雖然空空，但是親像滿滿錢一樣，你千萬m̄ thang憂悶。」講煞就出去。 |
|
Pek chím ke-lāi chhin-chhiūⁿ chit iūⁿ ê sòng-hiong, tùi chá í-lâi iáu-bē ū tú-tio̍h, chit sî ke tiong ê kéng-hóng, tī chhù-piⁿ ê lâng khòaⁿ-liáu, iā sī chin bōe jím-tit, chhâ iā bô lah, bí-niû chí-ū chhun Kat-la-tí só͘ teh chòe ê mī-pau nā-tiāⁿ, chí kúi ji̍t, in ke-lāi chiū khiām-séng teh chia̍h. Pek chím pún-sin siūⁿ, mī-pau bē chia̍h liáu ê í-chêng i kap i ê gín-ná ōe thàn kúi ê chîⁿ thang kè ji̍t, koh khòaⁿ i ê tiōng-hu khah hó, sim-lāi chin khoài-lo̍k, só͘-í iā bô ū hō͘ Hêng-sū chai ke-lāi bô chîⁿ, bô phah-sǹg i-seng kiò i ê tiōng-hu tio̍h chia̍h hó ê mi̍h, ke-lāi iā lóng bô chi̍t îⁿ, só͘-í sim-lāi cha̍p-hun tio̍h-kip.
|
Pek嬸家內親像這樣ê散hiong，tùi早以來iáu-bōe有tú--著，這時家中ê景況，tī厝邊ê人看了，也是真bōe忍--得，柴也無--lah，米糧只有chhun Kat-la-tí所teh做ê麵包nā-tiāⁿ。這幾日，in 家內就儉省teh 食。Pek嬸本身想，麵包未食了ê以前，伊kap伊ê 囡仔會趁幾個錢thang過日，koh看伊ê 丈夫較好，心內真快樂，所以也無hō͘ Hêng-sū知家內無錢，無扑算醫生叫伊ê 丈夫著食好ê物，家內也攏無一圓，所以心內十分著急。 |
|
Hêng-sū chá-chá chhut-khì, kiâⁿ chi̍t pòaⁿ ji̍t bô ū chhē-tio̍h chi̍t hāng sū, sim-lāi í-keng sit-bāng, tò-lâi ke-n̍i̍h, koh khòaⁿ-kìⁿ, ke-tiong chit iūⁿ ê kong-kéng, sim-lāi koh khah ke-thiⁿ chhám-chhoeh, sui-jiân án-ni, i iáu sī chin ióng-kám, ài chīn ka-kī ê le̍k-liōng, pó͘-chō͘ i ê lāu-pē só͘ khiàm-ēng ê. Chit sî kóaⁿ-kín tùi kiaⁿ-siâⁿ, khì chhē sū, chi̍t lō͘ kiâⁿ chi̍t lō͘ siūⁿ, i-seng nā chai goán ke-lāi ê kan-khó͘ i bô tek khak kiò góa chiong chit ê hó chia̍h mi̍h hō͘ lāu-pē chia̍h, āu-lâi koh siūⁿ góa m̄ eng-kai siūⁿ án-ni, hiān-sî lāu-pē chit hō ê loán-jio̍k, sī eng-kai tio̍h chia̍h ê, góa eng-kai chīn góa ê le̍k-liōng chòe kang lâi thàn chîⁿ thang bóe, koh siūⁿ góa kàu siâⁿ-n̍i̍h chhē sū, chêng pái Pí-tek kā góa kóng nā-sī góa khiàm-ēng sím-mi̍h thang lâi kā i kóng, i ōe pang-chān, m̄ ta̍t-tio̍h lâi khì chhē i. Ai-ah, nā Pí-tek ê lāu-pē tī-teh chiū hó, i tek-khak ū kang thang hō͘ góa chòe, nā-sī chit sî hē-thiⁿ chiū hó lah, iā ū sū thang chòe. Hêng-sū siūⁿ-tio̍h, kè hô kóaⁿ-kín kiâⁿ khì Pí-tek ê ke, koh iu-būn sim siūⁿ kóng, lāu-pē chit sî teh thèng-hāu mi̍h thang chia̍h, góa beh chái-iūⁿ kin-á-ji̍t ōe thàn chîⁿ thang liâm-piⁿ bóe hō͘ i chia̍h n̍i̍h, nā-sī góa í-keng ún lāu-bú lah, hiān-sî bô hoat lah, chí hó tāi-seng khì Pí-tek ê ke thó tām-po̍h chia̍h mi̍h, Pí-tek iā lia̍h-chòe bô kî-koài; kin-á-ji̍t thang chiām-sî hō͘ lāu-pē chia̍h, góa koh-chài kàu siâⁿ-lāi thàn chîⁿ, liāu-lí bîn-á-ji̍t ê lim chia̍h. Koh siūⁿ chit ê sī thó-pn̄g ê sū chêng, chīn oh chòe. Chit sî sim-lāi kan-khó͘, bīn hián-chhut kiàn-siàu ê iūⁿ ka-kī siūⁿ sìⁿ So͘ ê ke, tùi chá í-lâi bô ū chi̍t lâng chòe khit-chia̍h, thang kóng góa chòe thâu chi̍t ê mah? Thang kóng góa ê lāu-pē sī tùi sí koh oa̍h khí-lâi, iáu beh kiû lâng chòe hó sū mah ? Hêng-sū siūⁿ kàu chia bōe kìm-tit khui siaⁿ tōa khàu kóng, “Ai-ah, góa ê lāu-pē sī chin chhang-miâ koh chin lêng-kàn ê lâng, i koat-toàn m̄ khéng tùi lâng kiû-thó, iā koat-toàn? khéng hō͘ góa chòe khit-chia̍h.”
|
Hêng-sū早早出去，行一半日無有chhē著一項事，心內已經失望，倒來家--n̍i̍h,koh看見，家中這樣ê光景，心內koh較加添慘慼，雖然án-ni，伊iáu是真勇敢，ài盡家己ê力量，補助伊ê 老父所欠用--ê。這時趕緊tùi京城，去chhē事，一路行一路想，醫生若知阮家內ê艱苦伊無的確叫我將這個好食物hō͘老父食，後--來koh想我m̄ 應該想án-ni，現時老父這號ê軟弱，是應該著食ê,我應該盡我ê 力量做工來趁錢thang買，koh想我到城--n̍i̍h chhē事，前擺彼得kā我講若是我欠用甚mi̍h thang 來kā伊講，伊會幫贊，m̄ 值著來去chhē伊。Ai --ah，若彼得ê老父tī--teh就好，伊的確有工thang hō͘我做，若是這時夏天就好--lah，也有事thang做。Hêng-sū想--著，過河趕緊行去彼得ê家，koh憂悶心想講，老父這時teh 聽候物thang食，我beh怎樣今仔日會趁錢thang liâm-piⁿ 買hō͘ 伊食物，但是我已經允老母--lah，現時無發--lah，只好代先去彼得ê家討淡薄食物，彼得也掠做無奇怪；今仔日thang暫時hō͘ 老父食，我koh再到城內趁錢，料理明仔日ê lim食。Koh想這個是討飯ê事情，chīn oh做。這時心內艱苦，面顯出見笑ê樣家己想姓So͘ ê家，tùi早以來無有一人做乞食，thang講我做頭一個mah？Thang講我ê老父是tùi死復活--起來，iáu beh求人做好事mah？Hêng-sū想到chia bōe禁得開聲大哭講：「Ai--ah，我ê 老父是真聰明koh真能幹ê人，伊決斷m̄ 肯對人求討，也決斷m̄ 肯hō͘ 我做乞食。」 |
|
Hêng-sū hut-jiân siūⁿ lâi kóng, “Góa hiān-chāi cháiⁿ-iūⁿm̄ chiong hit ê pió-á the̍h khì tǹg ah, nā the̍h kàu siâⁿ-lāi, chiū thang ōaⁿ chîⁿ lâi, iā bián-tit chòe chit ê hā-chiān ê kang, tùi lâng thó-chia̍h, āu-lâi góa koh-chài chòe kang thàn chîⁿ, chiong pió-á sio̍k-hôe lâi, kiám-m̄-sī hó mah? Ai-ah, lāu-pē hiān-chāi í-keng ōe-hiáu-tit, góa thang kap lāu-pē siong-liông.” Tùi án-ni khoài-lo̍k thiàu-khí-lâi, koh kóng nā-sī lāu-pē kā góa kóng chit ê pió-á bô sím-mi̍h koan-hē, chiū chiong i bōe iā thang, siūⁿ kàu chit ê liām thâu chiū tńg-sin tùi peng-khoe tò-lâi, ná-chhin-chhiūⁿ pe chi̍t iūⁿ, kàu in ê ke. Kúi hun cheng ê kang-hu, chiū kàu ke-lāi, khòaⁿ-kìⁿ i ê lāu-bú khiā tī mn̂g-kháu, móa bīn chhiò-iông, kiò Hêng-sū kóng, “Hek-tek sió-chiá lâi lah, tòa chi̍t nâ bah kap koe, mī-pau, gû-ni, koe-nn̄g chiah ê lâi, i-seng iā tùi siâⁿ-lāi chhe lâng sàng chi̍t tiuⁿ hó ê bîn-chhn̂g lâi, koh chin khin sio ê phē jio̍k-á-lâi, ai-ah, lí ê lāu-pē thang ǹg-bāng hó lah, goān Siōng-tè chiok-hok in chiahê.” Hêng-sū iā kóng, “Goān Siōng-tè chiok-hok in.”
|
Hêng-sū忽然想來講：「我現在怎樣m̄ 將hit ê錶仔去當--ah，若提到城內，就thang換錢來，也免得做這個下賤ê工，對人討食，後--來我koh再做工趁錢，將錶仔贖回來，kiám m̄ 是好mah？Ai--ah，老父現在已經會曉--得，我thang kap老父商量。」Tùi án-ni 快樂跳--起來，koh講若是老父kā我講這個錶仔無甚mi̍h關係，就將伊賣也thang，想到這個念頭就轉身對冰溪倒--來，那親像飛一樣，到in ê 家。幾分鐘ê工夫，就到家內，看見伊ê 老母企tī 門檻，滿面笑容，叫Hêng-sū講：「Hek-tek小姐來--lah，帶一籃肉kap雞、麵包、牛奶、雞卵chiah ê來，醫生也tùi城內差人送一張好ê眠床來，koh真輕燒ê被褥仔來，ai --ah，你ê 老父thang向望好--lah，願上帝祝福in chiah ê。」Hêng-sū也講：「願上帝祝福in。」 |
