Âng--sī Chin ê Sió-toān
|
洪氏真ê小傳 |
| Phian-chip-sek |
編輯室 |
|
Âng--sī Chin khah siông kiò-chò Ho͘-ḿ, sī Tè Hoán Bo̍k-su ê lēng sian-bó. Chú-āu 1854 nî chhut-sì, kàu kin-nî ( = 1940 nî), tú hióng-siū 86 hòe. 46 hòe ê sî sìn Chú, kiōng 40 nî kú keng- kòe sìn ê seng-oa̍h. Ē lâi chiū-kīn Chú ê tōng-ki, sī tùi tī tú-tio̍h pīⁿ-thiàⁿ, kám-kak pêng-sî só͘ chong-pài ê sîn- pu̍t, bē thang hō͘ i ê sim pêng-an, chiū siū khó͘-khǹg koat-sim chun-thàn tō-lí ji̍p sìn-gióng kèng-pài Siōng-tè. I chin chiàu pún-hūn ho̍k-sāi Siōng-tè, Siōng- tè si-in sù-hok hō͘ i, hō͘ i kiáⁿ-sun chin heng-ōng, kiáⁿ-jî sim-pū, lāi gōa sun chóng sǹg chiâⁿ pah lâng. Lūn kàu i ê seng-pêng chin khó-chhú, ū chē-chē bí-tiám. Chit-tia̍p kì kúi-nā hāng hō͘ lán chò siàu-liām :---
|
洪--氏真較常叫做Ho͘姆，是戴返牧師ê令先母。主後1854年出世，到今年（＝1940年），tú享受86歲。46歲ê時信主，共40年久經過信ê生活。會來就近主ê動機，是tùi tī tú著病痛，感覺平時所崇拜ê神佛，bē thang hō͘伊ê心平安，就受苦勸決心尊趁道理入信仰敬拜上帝。伊真照本份服事上帝，上帝施恩賜福hō͘伊，hō͘伊子孫真興旺，子兒新婦，內外孫總算成百人。論到伊ê生平真可取，有濟濟美點。這tia̍p記幾若項hō͘咱做數念：-- |
|
1. Sìn-gióng kian-kò͘ : Sìn Chú liáu, sui siū lâng kong-kek, phí-po̍k, iàm-chiān, ki-chhì, í-ki̍p tú-tio̍h hoān- lān khùn-khó͘, iā-sī iú-chìn bô thè.
|
1、信仰堅固：信主了，隨受人攻擊，phí-po̍k ，厭賤，譏刺，以及tú著患難困苦，也是有進無退。 |
|
2. Tì ì ka-têng : Chin kî-biāu ! ! ! Kiáⁿ-sun tōa to-sò͘ kap i tâng-sim kèng- pài Siōng-tè kiâⁿ thiⁿ-lō͘. Ē an-ni, cha- khó khí-lâi, bô m̄-sī tùi tī i ê sìn-sim kap sìn ê hó só͘ kiâⁿ só͘ kám-hòa lâi chiâⁿ--ê.
|
2、致意家庭：真奇妙！！！子孫大多數kap伊同心敬拜上帝行天路。會an-ni，查考起來，無m̄是tùi tī伊ê信心kap信ê好所行所感化來成--ê。 |
|
3. Gâu thiàⁿ Chú : Sî-siông chiàu só͘ ē hōng-sū kàu-hōe, koan-sim tī Chú. Te̍k-pia̍t thang hián-chhut i ê thiàⁿ--ê, chiū-sī hiàn kiáⁿ hō͘ Siōng-tè. Cha-bó͘ kiáⁿ hiàn chò Siōng-tè ê lú chhe-ēng, chiū-sī khng Hoán Sian-siⁿ-niû. Hāu- siⁿ hiàn chò Siōng-tè ê lô͘-po̍k, chiū-sī Tè Hoán Bo̍k-su.
|
3、Gâu疼主：時常照所會奉事教會，關心tī主。特別thang顯出伊ê疼--ê,就是獻子hō͘上帝。查某子獻做上帝ê女差用，就是康返先生娘。後生獻做上帝ê奴僕，就是戴返牧師。 |
|
4. Jîn-ài hô-pêng : I ê chò lâng, tùi lāi tùi gōa chin oân-boán. Ta̍k-lâng to o-ló i ê hó lú-tek, hō͘ kiáⁿ-jî sim-pū chin hàu-sūn.
|
4、仁愛和平：伊ê做人，tùi內tùi外真圓滿。逐人都o-ló伊ê好女德，hō͘子兒新婦真孝順。 |
|
5. Ài kî-tó : Hoān ū tú-tio̍h tōa sió sū gâu óa-khò Siōng-tè, kau-hù I chhui-pâi. I tī 3 goe̍h chhe 8 ji̍t khí- pīⁿ ; tī 3 goe̍h 15 ji̍t chá-khí chiū siū Chú kéng-tiàu tńg-khì Thiⁿ Pē ê ke. Tng tī pēⁿ chin loán-jio̍k ê sî, iáu-kú kî-tó, kiû kóng “Chú ah kiù góa, Chú ah kiù góa.”
|
5、Ài祈禱：凡有tú著大小事gâu倚靠上帝，交付伊推排。伊tī 3月初8日起病；tī 3月15日早起就受主揀召轉去天父ê家。Tng tī病真軟弱ê時，iáu-kú祈禱，求講：「主ah救我，主ah救我。」 |
|
Phí-jîn chiàu só͘ chai kì chiah--ê, chin siū kám-kek. Chhim-bāng i ê ûi- cho̍k kap lán tāi-ke ē o̍h i ê hó bô͘- hoān ! ! !
|
鄙人照所知記chiah--ê,真受感激。深望伊ê遺族kap咱大家會學伊ê好模範！！！ |
|
(Tâi-oân Kàu-hōe Kong-pò tē 663 hō, 1940 nî 6 goe̍h)
|
(台灣教會公報第663號，1940年6月) |
