Sòng Siōng-chiat Phok-sū
|
宋尚節博士 |
| Koa Siat-kai |
柯設偕 |
|
Sòng Siōng-chiat Phok-sū, ū-tēng beh lâi Tâi-oân, iā chiâⁿ ge̍h ji̍t kú ê tiong-kan tī Pún-tó Lâm, Pak-pō͘ kài-lāi kúi-nā ūi ê tōa só͘-chāi, thoân-pò Chú ê Hok-im.
|
宋尚節博士有訂beh 來台灣，也成月日久ê中間tī本島南、北部界內幾若位ê大所在，傳報主ê福音。 |
|
Ǹg-bāng chit pái Sòng Phok-sū tī Lâm Pak-pō ta̍k ūi, ōe hùn-heng Í-keng sìn Chú ê hiaⁿ-tī chí-bē koh-khah jia̍t-sim, iā ōe ín-chhōa chōe-chōe iáu-bē sìn ê lâng koat-sim lâi sìn Chú.
|
向望這擺宋博士tī 南、北部逐位，會奮興已經信主ê兄弟姊妹koh較熱心，也會引chhōa濟濟iáu-bē信ê人決心來信主。 |
|
Lūn Sòng Phok-sū ūi Chú ê kang-chok, tāi-ke ún-tàng Í-keng ū thiaⁿ-kìⁿ, á-sī ū tha̍k-tio̍h, só͘-Í put-chí chai-iáⁿ.
|
論宋博士為主ê工作，大家穩當已經有聽見，抑是有讀著，所以不止知影。 |
|
Tī chia ài siá tām-po̍h hō͘ tāi-ke chòe chham-khó.
|
Tī chia ài寫淡薄hō͘逐家做參考。 |
|
Khiok tī 1933 nî 3 ge̍h ê Kàu-hōe-pò, Kai Sian-siⁿ iā Í-keng ū siá chi̍t phiⁿ “Tāi-ha̍k chèng-su hiat-lo̍h hái” tāi-ke iā Í-keng tha̍k-liáu.
|
卻tī 1933年3 月ê教會報，偕--先生也已經有寫1篇「大學証書hiat 落海」大家也已經讀了。 |
|
Sòng Phok-sū sī khì Bí-kok liû-ha̍k, tit-tio̍h Ha̍k-sū, Phok-sū ê ha̍k-ūi, iā chū-jiân ū tit-tio̍h kúi-nā tiuⁿ chèng-su. Tē-ūi, chîⁿ-châi, miâ-siaⁿ, piān-piān teh tán I, siat-sú I nā him-bō͘ chiah-ê, chiū sûi-sî ōe tit-tio̍h. Chóng-sī I ū siū Chú ê tiàu, ūi Chú thoân Hok-im, chòe Chú ê kan-chèng.
|
宋博士是去美國留學，得著學士、博士ê學位，也自有得著幾若張証書。地位、錢財、名聲便便teh 等--伊，設使伊若欣慕chiah-ê,就隨時會得--著。總--是伊有受主ê召，為主傳福音，做主ê干証。 |
|
Só͘-Í I tùi Bí-kok beh tńg-khì Tiong-kok ê sî, I ū chiong I só͘ tit-tio̍h hiah ê chèng-su, hiat-lo̍h hái, in-ūi ài choan-sim tī thoân Hok-im ê kang, kiaⁿ-liáu hiah ê chèng-su nā iáu the̍h-teh, ōe chó͘-tòng i.
|
所以伊對美國beh 轉去中國ê時，伊有將伊所得著ê 証書hiat 落海，因為ài專心tī傳福音ê工，驚了hiah-ê 証書若iáu 提--leh，會阻擋--伊。 |
|
Sòng Phok-sū chit khoán ê bô͘-iūⁿ, put-chí hō͘ lán thang o̍h. Chiū-sī I khòaⁿ thoân-pò Chú ê Hok-im chòe tē-it, iā chiong sè-kan ê ha̍k-būn, tì-sek, tē-ūi, chîⁿ-châi khòaⁿ chòe bô iàu-kín.
|
宋博士這款ê模樣，不止hō͘ 咱 thang學。就是伊看傳報主ê福音做第一，也將世間ê學問、智識、地位、錢財看做無要緊。 |
|
Lán kì-tit Pó-lô ū kóng, “Nā-sī pêng-sò͘ chòe góa ê lī-ek ê, góa ūi-tio̍h Ki-tok Í-keng khòaⁿ I chòe sún-hāi. M̄-nā án-ni, góa chin-chiàⁿ khòaⁿ bān-sū chòe sún-hāi, in-ūi góa lia̍h bat góa ê Chú Ki-tok Iâ-so͘ chòe tē-it hó; góa ūi-tio̍h I bat sún-sit it-chhè, iā khòaⁿ chòe pùn-sò, sī ài tit-tio̍h Ki-tok, lâi tn̂g-tn̂g tiàm tī I, m̄-sī ū ka-kī ê gī chhut tī lu̍t-hoat ê, chiū-sī ū tùi sìn Ki-tok ê gī, Siōng-tè ūi-tio̍h sìn só͘ siúⁿ-sù ê”m̂(Hui-li̍p-pí 3:7-9).
|
咱記得保羅有講：「若是平素做我ê利益ê,我為著基督已經看伊做損害。M̄-nā án-ni，我真正看萬事做損害，因為我掠bat我ê主基督耶穌做第一好；我為著伊bat損失一切，也看做糞垃，是ài得著基督，來長長tiàm tī 伊，m̄是有家己ê義出tī律法ê,就是有對信基督ê義，上帝為著信所賞賜ê」---（腓立比 3:7-9） |
|
Sòng Siōng-chiat Phok-sū chiū-sī o̍h Pó-lô ê bô͘-iūⁿ, pàng-sak sè-kan ê tē-ūi, tì-sek, ha̍k-būn, chiah-ê, iā choan-sim ūi-tio̍h Chú Si̍p-jī-kè ê Hok-im teh chhut-la̍t soan-thoân.
|
宋尚節博士就是學保羅ê模樣，放sak世間ê地位、智識、學問chiah-ê,專心為著主十字架ê福音teh出力宣傳。 |
|
Bô-lūn sī gōa-kok ê Soan-kàu-su, á-sī pún-tōe ê Thoân-kàu-su, Í-ki̍p ūi Chú chòe-kang tī chōe-chōe hong-bīn ê lâng, iû-goân iā sī án-ni.
|
無論是外國ê宣教師，抑是本地ê傳教師，以及為主做工tī濟濟方面，猶原也是án-ni。 |
|
In ūi-tio̍h Chú ê Hok-im, bô lia̍h sio̍k sè-kan ê ha̍k-būn, tì-sek, tē-ūi, kim-chîⁿ, chòe iàu-kín, sī it-bī choan-sim ūi-tio̍h Chú Si̍p-jī-kè ê Hok-im, kam-goān kan-khó͘, chhut-la̍t kang-chok.
|
In 為著主ê福音，無掠俗世間ê學問、智識、地位、金錢做要緊，是一味專心為著主十字架ê福音，甘願艱苦、出力工作。 |
|
M̄-sī hiah ê lâng, pa̍t hong-bīn bô lō͘ thang khì, á-sī bô pa̍t hāng chit-gia̍p thang chòe, chiah teh thoân Hok-im. M̄-sī án-ni !!!
|
M̄是hiah-ê人別方面無路thang去，抑是無別項職業thang做，才teh傳福音。M̄是án-ni！ |
|
Sī in hiah ê lâng khòaⁿ Chú Si̍p-jī-kè ê Hok-im chòe tē-it iàu-kín, chiah pàng-sak kî-û hiah-ê.
|
是in hiah-ê人看主十字架ê福音做第一要緊，才放sak 其餘hiah-ê。 |
|
Lán kì-jiân chòe Ki-tok ê ha̍k-seng, tio̍h khòaⁿ Si̍p-jī-kè Hok-im chòe tē-it iàu-kín, kî-û--ê sī chòe pó͘-chō͘-ê lō͘-ēng nā-tiāⁿ.
|
咱既然做基督ê學生，著看十字架福音做第一要緊，其餘ê是做補助ê路用nā-tiāⁿ。 |
|
M̄-sī kóng, ha̍k-būn, tì-sek, tē-ūi, kim-chîⁿ, chu-keh, chèng-su, chiah ê lóng bô lō͘-ēng; m̄-sī án-ni, chiah-ê iû-goân put-chí chòe lán ê lō͘-ēng. Nā ū, bô hiâm; put-kò lán m̄-thang kè-thâu ūi-tio̍h chiah ê lâi tì-Ì, sòa lâi chòe lán ê chó͘-tòng, á-sī tùi án-ni lâi siū bê-he̍k.
|
M̄ 是講學問、智識、地位、金錢、資格、証書chiah-ê攏無路用，m̄是án-ni，chiah-ê猶原不止做咱ê路用。若有，無嫌；不過咱m̄-thang 過頭為著chiah-ê來致意，煞來做咱ê阻擋，抑是對án-ni來受迷惑。 |
|
Lán tio̍h ōe-hiáu-tit gâu lī-ēng chiah-ê, lâi chòe lán ūi Chú kang-chok ê pó͘-chō͘ ê lō͘-ēng. Nā-sī án-ni, chiū lán ê kang-chok ōe chin ū Ì-gī, iā chin ū kè-ta̍t.
|
咱著會曉得gâu利用chiah-ê來做咱為著工作ê補助ê路用。若是án-ni就咱ê工作會真有意義，也真有價值。 |
|
Kiám-chhái gōa-kàu ê lâng, sī ài khoa-kháu ū sím-mi̍h tì-sek, tē-ūi, chîⁿ-châi, ái-sī ài phín chu-keh, jîn-bu̍t, sè-thâu.
|
Kiám-chhái 外教ê人，是ài誇口有甚mi̍h智識、地位、錢財抑是ài品資格、人物、勢頭。 |
|
Chóng sī lán Ki-tok-tô͘,chiū m̄-sī án-ni, Si̍p-jī-kè Í-gōa lán bô beh khoa-kháu sím-mi̍h. M̄-sī lán bô thang phín sím-mi̍h pa̍t hāng, m̄-sī án-ni. Lán nā beh phín, mā sī ū thang phín. Sī lán tio̍h khòaⁿ Chú Si̍p-jī-kè ê Hok-im chòe tē-it.
|
總--是咱基督徒就m̄ 是án-ni，十字架以外咱無beh 誇口甚mi̍h。M̄是咱無thang品甚mi̍h別項，m̄是án-ni。咱若beh品，mā是有thang品。是咱著看主十字架ê福音做第一。 |
|
Tī chit ê nî-thâu ê hó sî-kî, iā tng tāi-ke the hoaⁿ-hí ngiâ-chi̍h Sòng Siōng-chiat Phok-sū ê sî-kî, ǹg-bāng lán tāi-ke o̍h I ê hó bô͘-iūⁿ, saⁿ-kap chhut-la̍t ūi Chú chòe kang, hō͘ Lâm Pak ê Kàu-hōe ōe tōa hoat-tián, sī só͘ ǹg-bāng.
|
Tī 這個年頭ê好時期，也當大家teh 歡喜迎接宋尚節博士ê時期，向望咱大家學伊好模樣，相kap出力為主做工，hō͘南北ê教會發展，是所向望。 |
|
(Tâi-oân Kàu-hōe Kong-pò tē 611 hō, 1936 nî 2 ge̍h)
|
(台灣教會公報第611號，1936年2月) |
