Kì-liām Sūi-hūi Tē-it tāi ê Sìn-tô͘--Kò͘ Tiuⁿ Thô͘-kui hiaⁿ
|
紀念Sūi-hūi第一代ê信徒--故張Thô͘-kui 兄 |
| Gô͘ Êng-siông |
吳榮松 |
|
Só͘ siàu-liām ê Thô͘-kui hiaⁿ, tī Bûn-san-kūn tōe-hng chhut-sì, sī Hok-kiàn-jîn, chit-gia̍p sī lông-gia̍p kap cha̍p-hòe, chòe piáⁿ ê seng-lí. Jī-cha̍p-it hòe ê sî, kap Lí--sī Îⁿ chí kiat-hun. In sī ho̍k-sāi cha̍p-sîn kàu, ū choán-ki lâi Sūi-hūi-chhoan 38 nî kú, tī Chiau-hô 9 nî 2 ge̍h tiong, thiaⁿ-tio̍h Ki-tok-kàu, hoaⁿ-hí lâi sìn Chú Iâ-so͘, pek-chhiat kî-tó, i ê kha ū siⁿ lia̍p-á 33 nî kú, tit Chú ê un-tián oân-choân hó. Chiau-hô 9 nî 8 ge̍h 12 ji̍t, in ang-bó͘ kap Lîm--sī Phín chí, N̂g Pún-lâi hiaⁿ, N̂g--sī Chhun-hoe chí, Tân Sûn-sûi hiaⁿ, 6 lâng chòe-tīn khì Gio̍k-lí kàu-hōe niá sóe-lé. Ài ū chi̍t ê só͘-chāi thang ho̍k-sāi Siōng-tè, chiū chiong i ê tōa-thiaⁿ hiàn chòe chi̍p-hōe-só͘; N̂g Pún-lâi hiaⁿ ê chhù, hiàn 3 keng chòe siok-sià, ū kap pa̍t-ūi î-ki khì hia tòa ê Ki-tok-tô͘ chham-siông, lâi pín-chhéng Thoân-tō-kio̍k phài chi̍t ê sian-siⁿ tī-hia thoân Hok-im.
|
所數念ê Thô͘-kui兄，tī文山郡地方出世。是福建人，職業是農業kap雜貨、做餅ê生理。21歲ê時kap李--氏圓姊結婚。In 是服事雜神教，有轉居來Sūi-hūi村38年久，tī昭和9 年2 月中，聽著基督教，歡喜來信主耶穌，迫切祈禱，伊ê腳有生粒仔33年久，得主ê恩典完全好。昭和9年8 月12 日，in 翁某kap林--氏品姊、黃本來兄、黃--氏春花姊、陳純隨兄，6 人做陣去玉里教會領洗禮。Ài有1個所在thang 服事上帝，就將伊ê大廳獻做集會所；黃本來兄ê厝獻3間做宿舍，有kap別位以及去hia tòa ê基督徒參詳，來稟請傳道局派1個先生tī hia 傳福音。 |
|
Lūn Káng-gī-só͘, siok-sià, cha̍p-hùi, in beh hū-tam. Tī Chiau-hô 10 nî 4 ge̍h 3 ji̍t, Thoân-tō-kio̍k bēng-lēng siáu-seng khì tiàm hia thoân Ho̍k-im, Thô͘-kui hiaⁿ in ang-bó͘, kap í-gōa ê sìn-tô͘, siông-siông tùi kò-jîn chèng-bêng tō-lí, lâi sìn Chú--ê ū ná ke-thiⁿ. Thô͘-kui hiaⁿ, Lí--sī Îⁿ chí, N̂g Pún-lâi hiaⁿ, bat tú-tio̍h pek-hāi, ū siū-siong, iā bô sit-chì, ióng-kám sìn-khò Ki-tok, khì-sak siâ-kàu, ūi-tio̍h Sèng-hōe ài hō͘ i hoat-tián, hoaⁿ-hí chhut chîⁿ, chhut kang, tàu kó͘-bú. Tī Chiau-hô 10 nî 11 ge̍h 14 àm khí, ló-ek-hiat pīⁿ, 15 ji̍t ē-po͘ 6 tiám kui thian, bīn-iông hó khòaⁿ, 18 ji̍t ē-po͘ nn̄g-tiám chòe kò-pia̍t-sek.
|
論講議所、宿舍、雜費，in beh 負擔。Tī 昭和10年4 月3 日，傳道局命令小生去tiàm hia 傳福音，Thô͘-kui兄in 翁某kap以外ê信徒，常常對個人証明道理，來信主--ê有那加添。Thô͘-kui兄、李氏圓姊、黃本來兄，bat tú著迫害，有受傷，也無失志，勇敢信託基督，棄sak 邪教，為著聖會ài hō͘ 伊發展，歡喜出錢、出工鬥鼓舞。Tī 昭和10年11 月14 暗起，腦溢血病，15日e晡6點歸天，面容好看，18日e晡2點做告別式。 |
|
(Tâi-oân Kàu-hōe Kong-pò tē 616 hō, 1936 nî 7 ge̍h)
|
(台灣教會公報第616號，1936年7月) |
