Siàu-liām Kò͘ Lîm Lîn Tiúⁿ-ló
|
數念故林Lîn 長老 |
| Tīⁿ Thi̍h |
鄭鐵 |
|
Lîm Lîn Tiúⁿ-ló sī Lí-lāng Kàu-hōe-oân Lîm Su-siong hiaⁿ ê lāu-pē. Khòaⁿ kiáⁿ-jî ê jia̍t-sim kap sìn-tek, chiū chai lāu-pē ê sìn-tek kap jia̍t-sim, thang siàu-liām lâi kui êng-kng Chú Siōng-tè.
|
林Lîn長老是里港教會員林書襄兄ê老父。看子兒ê熱心kap信德，就知老父ê信德kap熱心，thang數念來歸榮光主上帝。 |
|
Tī 3 ge̍h 7 ji̍t, i ê tē-saⁿ kiáⁿ Lîm Su-khé kun kap Phoaⁿ--sī Goa̍t-kim lú-sū beh kú-hêng kiat-hun-sek. Kin-nî tú sī i 61 hòe, sūn chit ê kî-hōe i ê kiáⁿ beh kā i chiok-siū. Put-hēng tī bōe hióng-siū siang-hí ê chêng chhe-sì, àm-chhia khì Gio̍k-lí bóe-pān, hit-àm tī lí-koán khí-pīⁿ, (náu-ek-hiat.) Kàu thiⁿ-kng chhe-gō͘ chá-khí 8 tiám, khòaⁿ-tio̍h Tiúⁿ-ló niû kap i ê kiáⁿ ê sî, an-sim éng-bîn hó-khùn, hióng-siū 61 hòe. 3 ge̍h chhe 6 ē-po͘ 2 tiám, tī i ê chhù kú-hêng kò-pia̍t-sek; hù-sek ê lâng ū 200 chó-iū.
|
Tī 3月7日，伊ê第3子林書啟君kap潘--氏月金女士beh舉行結婚式。今年tú是伊61歲，順這個機會伊ê子beh kā 伊祝壽。不幸tī bē享受雙喜ê前初4，暗車去玉里買辦，hit暗tī旅館起病 (腦溢血)。到天光初5 早起 8點，看著長老娘kap伊ê子ê時，安心永眠好睏，享壽61歲。3月初6 e晡2點，tī伊ê厝舉行告別式；赴式ê人有200左右。 |
|
Nā-sī kóng-khí Lîm Lîn Tiúⁿ-ló, chiū Lâm-pō͘ khah lāu ê sian-siⁿ á-sī bo̍k-su, lóng bat--i. In-ūi i 18 hòe ê sî lī-khui pún-hiuⁿ khì Táu-la̍k, hit-sî kap Lâu Bān-kiàm Tiúⁿ-ló, Gô͘ Lo̍k Tiúⁿ-ló chòe pêng-iú; tùi án-ni jia̍t-sim ho̍k-sāi Siōng-tè. Tī 22 hòe ê sî, siū kú-chiàn tha̍k Sîn-ha̍k. Tī 26 hòe chhut-lâi thoân Chú ê Hok-im. Tī 32 hòe ê sî, tú-tio̍h Sian-siⁿ-niû kè-óng; koh ū 3 ê kiáⁿ, cha-bó͘-kiáⁿ, put-tek-í tio̍h sî Thoân-tō ê kang, lâi Tang-pō͘ tòa tī Bān-jîn-po͘; tī-hia koh tit-tio̍h hiān-sî ê Tiúⁿ-ló-niû. I ū 7-ê kiáⁿ 4-ê cha-bó͘-kiáⁿ; lūn i ê kiáⁿ-jî tī Bān-jîn-po͘ sī thang o-ló ê bô͘-hoān chheng-liân, tē-it tōa ka-cho̍k koh jia̍t-sim. Chú kóng, “Pháiⁿ-chhiū bōe-ōe kiat hó ké-chí.” Si̍t-chāi, khòaⁿ i ê kiáⁿ-jî chiū thang siàu-liām Lîm Tiúⁿ-ló ê sìn-tek kap jia̍t-sim.
|
若是講起林Lîn長老，就南部較老ê先生抑是牧師攏bat--伊。因為伊18 歲ê時離開本鄉去斗六，hit時kap劉Bān-kiàm長老，吳Lo̍k長老做朋友；對án-ni熱心服事上帝。Tī 22歲ê時，受舉荐讀神學。Tī 26歲出來傳主ê福音。Tī 32歲ê時，tú著先生娘過往；koh有3個子、查某子，不得已著辭傳道ê工，來東部tòa tī 萬人埔；tī hia koh 得著現時ê長老娘。伊有7個子、4個查某子；論伊ê子兒tī萬人埔是thang o-ló ê模範青年，第一大家族koh熱心。主講：「歹樹bē會結好果子。」實在看伊ê子兒就thang數念林長老ê信德kap熱心。 |
|
(Tâi-oân Kàu-hōe Kong-pò tē 604 koàn, 1935 nî 7 ge̍h)
|
(台灣教會公報第604卷，1935年7月) |
