Lí Bêng-tē Tiúⁿ-ló ê Sió-toān
|
李明地長老ê小傳 |
| Tân Chheng-gī |
陳清議 |
|
Lí Tiúⁿ-ló sī Choân-chiu ê lâng. I lâi tī Báng-kah chòe kim-á-tiàm, ū lâi thiaⁿ tō-lí. 1900 nî ū niá sóe-lé, sī Kai Bo̍k-su kā i niá sóe-lé, āu-lâi ū chòe chip-sū. Kàu 1905 nî ū seng chòe Tiúⁿ-ló. I siông-siông hù Sió-hōe, Tiong-hōe, Tāi-hōe, iā kúi-nā pái khì Tâi-lâm. 1934 nî 12 ge̍h 6 ji̍t pia̍t-sè, án-ni thâu kàu bé, chòe Tiúⁿ-ló 29 nî. Lí Tiúⁿ-ló tùi pài Siōng-tè khí, chin jia̍t-sim, hán-tit bô kàu pài-tn̂g chòe lé-pài, i lâi lé-pài, sî-kan chin chún.
|
李長老是泉州ê人。伊來tī艋舺做金仔店，有來聽道理。1900年有領洗禮，是偕牧師kā伊領洗禮，後--來有做執事。到1905年有升做長老。伊常常赴小會、中會、大會，也幾若擺去台南。1934年12月6日別世，án-ni 頭到尾做長老29年。李長老對拜上帝起，真熱心，罕得無到拜堂做禮拜，伊來禮拜做禮拜，伊來禮拜，時間真準。 |
|
1904 nî, chiū-sī 31 nî chêng, i ū thê-chhiòng kàu-hōe tio̍h to̍k-li̍p. I chiū kap chèng tiúⁿ-ló, chip-sū chham-siông, hit-tia̍p Pak-pō͘ iáu-bē ū Tiong-hōe. I kap chèng tióng-chip, khì Tām-súi kap Hôa Bo̍k-su, Gô͘ Bo̍k-su chham-siông, in chin hoaⁿ-hí, chiū thòe in pín Ka-ná-tāi ê Bú-hōe, chún in siat Tiong-hōe tī Pak-pō͘. Bú-hōe ū chún, chiū tēng hit nî 10 ge̍h 4 ji̍t, tī Tām-súi Sîn Ha̍k-hāu khui Pak-pō͘ ê Tiong-hōe, tùi hit-tia̍p khí, chiū kéng kúi-nā lâng lâi khó kàu-su. Kàu 1906 nî 4 ge̍h 3 ji̍t, Báng-kah Kàu-hōe chiū thâu-chi̍t ūi to̍k-li̍p chhiáⁿ bo̍k-su. Kàu chit-tia̍p bo̍k-su iáu tī-teh. I-keng keng-kè 29 nî kú, chit ê sī Lí Tiúⁿ-ló ê kó͘-chhui. Taⁿ i í-keng bô tī sè-kan, Báng-kah ê Kàu-hōe tio̍h siàu-liām i. Taⁿ i í-keng kè-óng, Lí Tiúⁿ-ló-niû tī 10 ge̍h 29 ji̍t iā kè-óng, nn̄g ê pîⁿ-pîⁿ 69 hè. Hu-hū chin hô-bo̍k, Lí Tiúⁿ-ló-niû chin un-sûn, m̄-bat thiaⁿ-kìⁿ i kap lâng oan-ke, nn̄g ê chòe-tīn tńg-khì, chin ū hok-khì. Taⁿ i ū chi̍t ê hāu-siⁿ, í-keng kè-óng, ū chi̍t ê sim-pū iáu tī-teh. Koh ū chi̍t ê tōa-sun, hiān-sî tī Tām-súi Tiong-o̍h teh tha̍k-chheh, iáu ū 3 ê cha-bó͘-sun, i ê ka-cho̍k lóng ū lâi lé-pài, chhiáⁿ tāi-ke thòe in kî-tó.
|
1904年，就是31年前，伊有提倡教會著獨立。伊就kap眾長老、執事參詳，hit-tia̍p北部iáu-bē有中會。伊kap眾長執，去淡水kap華牧師、吳牧師參詳，伊真歡喜，就替in稟加拿大ê 母會，準in設中會ti北部。母會有准，就定hit年10 月4 日，tī淡水神學校開北部中會，對hit-tia̍p起，就揀幾若人來考教師。到1906年4月3 日，艋舺教會就頭1位獨立請牧師。到這tia̍p牧師iáu tī--leh。已經經過29年久，這個是李長老ê 鼓吹。今伊已經無tī世間，艋舺ê 教會著數念--伊。今伊已經過往，李長老娘tī 10 月29 日也過往，兩個平平69歲。夫婦真和睦，李長老娘真溫純，m̄-bat聽見伊kap人冤家，兩個做陣轉--去，真有福氣。今伊有1個後生，已經過往，有1個新婦iáu tī--leh。Koh 有1個大孫，現時淡水中學teh讀冊，iáu有 3個查某孫，伊ê 家族攏有來禮拜，請大家替in祈禱。 |
|
(Tâi-oân Kàu-hōe Kong-pò tē 599 koàn, 1935 nî 2 ge̍h)
|
(台灣教會公報第599卷，1935年2月) |
