Chín-chai ê Chhám-kéng
|
震災ê 慘境 |
| Lâu A-siù |
劉阿秀 |
|
Sì goe̍h 21 ji̍t chá-khí 6 tiám khòng-cheng, hut-jiân tōe tōa tāng, hit ji̍t góa tī Sai-thâm, tòa tī So͘ Chhun-sēng Chip-sū tau, i ê chhù sī nn̄g-chàn echh5u, góa tī lâu-kha khùn, tú beh khí-chhn̂g, tú-tio̍h tōe tōa tāng, i ê chhù liâm-piⁿ tó--lo̍h-lâi, góa kín bi̍h tī mn̂g-khiā, chiah bián siū-sí, i ê ke-lāi kap góa kiōng 11 lâng, chí-ū góa kap Chhun-sēng ê tōa-kiáⁿ 12 hè siū-siong, kî-û--ê 9 lâng lóng bô siū-siong, che bêng-bêng sī Siōng-chú ê pó-hō͘. Sai-thâm ê chng ū kúi-cha̍p hō͘ nā-tiāⁿ, thang kóng chhù lóng tó--khì, lán ê pài-tn̂g iā tó--khì. Hit só͘-chāi ū hiān sí kúi-nā lâng, góau siū-siong tī thâu-khak kap chhiú,Chhun-sēng ê kiáⁿ iā-sī tī thâu-khak kap seng-khu siū-siong, jîn-sū put-séng.Chhù tó ê sî, góa tī lâu-kha oa̍h-tâi,tōe-tāng soah, chiah tùi chhù-khang pê--chhut-lâi, góa ê siong keng-kè cha̍p-gōa ji̍t, chiū lóng hó, chin kám-siā Siōng-tè.
|
4月21日早起6 點khòng 鐘，忽然地大動，hit日我tī 獅潭，tòa tī 蘇春盛執事兜，伊ê 厝是2層ê厝，我tī 樓腳睏，抵beh 起床，抵著地大動，伊ê 厝liâm-pin倒--落來，我緊匿tī 門企，才免受死，伊ê 家內佮我共11人，只有我佮春盛ê 大子12歲受傷，其餘--ê 9人攏無受傷，這明明是上主ê 保護。獅潭ê 庄有幾十戶nā-tiāⁿ，thang講厝攏倒--去，咱ê 拜堂也倒--去，hit所在有現死幾若人，我有受傷tī 頭殼佮手，春盛ê 子也是tī 頭殼佮身軀受傷，人事不省。厝倒ê 時，我tī 樓腳活埋，地動煞，才對厝孔爬--出來，我ê 傷經過10外日，就攏好，真感謝上帝。 |
|
Tōe-tāng āu tiám-gōa cheng, lio̍h-á khah chū-chāi, teh khòa-lū Kong-koán-chng ê kàu-hōe kap ke-lāi, chiū thoa-miā kiâⁿ-lō͘ pôaⁿ-soaⁿ tńg-khì, kiâⁿ-lō͘5 tiám cheng kú, in-ūi iáu-bē khí-chhn̂g, góa ê saⁿ-khò͘, bō-á, sî-pió, ôe, Sèng-keng, Sèng-si, it-khài tâi tī góa khùn ê só͘-chāi, kan-ta chhēng lāi-saⁿ lāi-khò͘ pê--chhut-lâi, seng-khu bô chi̍t-sián, bô io̍h thang kô͘, ài kiâⁿ-lō͘, bô chhēng ôe bōe kiâⁿ, chiah kā lâng pun chi̍t-siang ūn-tōng-ôe lâi chhēng. Bô io̍h, bô io̍h-pò͘ thang pau, chiah kā lâng pun bīn-kun lâi pau.
|
地動後點外鐘，略仔較自在，teh 掛慮公館庄ê 教會佮家內，就拖命行路盤山轉去，行路5點鐘久，因為iáu-bōe起床，我ê 衫褲、帽仔、時錶、鞋、聖經、聖詩，一概埋tī 我睏ê 所在，kan-ta穿內衫、內褲爬--出來，身軀無一sián ，無藥thang 糊，愛行路，無穿鞋bē 行，才kā 人分一雙運動鞋來穿；無藥，無藥布thang 包，才kā 人分面巾來包。 |
|
Hit ji̍t bô lo̍h-hō͘, sì-kè pang-soaⁿ, tì-kàu bô lō͘ thang kiâⁿ,khoe-chúi iā lô-lô, chhin-chhiūⁿ chòe hong-thai ê lô-chúi, che sī bōe-bat khòaⁿ-kìⁿ ê sū. Chi̍t-ē tńg kàu-ūi, khòaⁿ-kìⁿ Kong-koán ê chhù choân-bia̍t, khòaⁿ-kìⁿ pài-tn̂g lóng phòa-liáu-liáu, góa ê ka-cho̍k khiā tī hū-kūn ê thiⁿ-tiong-ng, bōe kìm-tit chhut-siaⁿ thî-khàu; góa ê cha-bó͘-kiáⁿ Chhun-kiau chhōa góa khì Kong-ha̍k-hāu ho͘kīu-hō͘-pan ho̍k-io̍h. Chhù tó, koe-lo͘b7o lō͘ thang kiâⁿ, tio̍h kiâⁿ chhân-hōaⁿ kàu Kong-ha̍k-hāu, khòaⁿ-kìⁿ tī ūn-tōng-tiâⁿ ê siū-siong-chiá móa-tiâⁿ, sí--ê iā kui-tui, koan-bo̍k iā chin-chōe, ū-ê bô koan-bo̍k thang tóe, ēng pang tèng chòe koan-bo̍k, iā ū-ê ēng chháu-chhio̍h pau,thî-khàu ê siaⁿ, ai-chhan ê siaⁿ móa hī-khang kìⁿ-tio̍h pêng-iú chhin-lâng long lâu ba̍k-sái. Chit pái góa só͘ lâu ê ba̍k-sái, pí sí pē-bú só͘ lâu--ê khah chōe, só͘-ū ê chhám-kéng, m̄-sī ēng pit siá ōe chīn. Kong-koán-chng só͘ sún-sit ê châi-sán sǹg bōe liáu, lâng siū-siong--ê 1000 gōa, sí--ê óa 300 lâng, kàu kin-á-jit (5: 14 ), siong-tiōng ê siū-siong-chiá iáu chin-chōe, lîm-sî pīⁿ-īⁿ iáu kúi-nā ūi,hiān-sî ta̍k lâng iáu tòa tī lîm-sî ê liâu-á.
|
Hit日無落雨，四界崩山，致到無路thang 行，溪水也濁濁，親像做風颱ê 濁水，這是bē bat看見ê 事。一下轉到位，看見公館ê 厝全滅，看見拜堂攏破了了，我ê 家族企tī 附近ê 天中央，bē 禁得出聲啼哭；我ê 查某子春嬌chhōa 我去公學校hō͘救護班服藥。厝倒，街路無路thang 行，著行田岸到公學校，看見tī 運動埕ê 受傷者滿埕，死--ê 也規堆，棺木也真濟，有ê 無棺木thang té,用枋釘做棺木，也有ê 用草蓆包，啼哭ê 聲，哀呻ê 聲滿耳孔，見著朋友親人攏流目屎，這擺我所流ê 目屎，比死父母所流--ê 較濟，所有ê 慘境，m̄ 是用筆寫會盡。公館庄所損失ê 財產算bē 了，人受傷--ê 1000外，死--ê 倚300人，到今仔日（5：14），傷重ê 受傷者猶真濟，臨時病院猶幾若位，現時逐人猶tòa tī 臨時ê 寮仔。 |
|
Lán ê kàu-hōe iā tōa sún-hāi, hōe-iú jī-cha̍p gōa hō͘, chí-ū nn̄g-hō͘ tò tī khah lāi-soaⁿ ê, chhù bô tó, ū jī-cha̍p hō͘ chhù tó, bô chhù thang tòa; hōe-iú siū teh-sí ê chi̍t miâ, siū-siong ê gō͘ miâ, hiān-sî nn̄g-miâ tiōng-tiong ê, iáu-bōe hó, tī lîm-sî pīⁿ-īⁿ tī-liâu, sui-sī án-ni, lán hōe-iú ê sí-siong-sò͘ khah chió, che-sī Siōng-chú ê te̍k-pia̍t un-kò͘.
|
咱ê 教會也大損害，會友20外戶，只有兩戶tòa tī 較內山--ê ，厝無倒，有20戶厝倒，無厝thang tòa;會友受teh 死--ê 一名，受傷--ê 5名，現時兩名重傷--ê ，iáu未好，tī 臨時病院治療，雖是án-ni，咱會友ê 死傷數較少，這是上主ê 特別恩顧。 |
|
Goán siū chai-hāi, ū tit-tio̍h lia̍t-ūi ê thiàⁿ chin chōe, ū Úi bo̍k-su, Kai sian-siⁿ, Tè i-seng, Chhî bo̍k-su, Ji̍t-ki Chheng-liân-hōe, Tâi-lâm Ki-tok-kàu Chheng-liân-hōe, Tâi-lâm Sîn-ha̍k-hāu sian-siⁿ kap ha̍k-seng, iā Khó͘ Hông-bô͘ sian-siⁿ, Tēⁿ Chhong-kok sian-siⁿ, Tâi-pak Sîn-ha̍k-hāu sian-siⁿ kap ha̍k-seng, Koa sian-siⁿ-niû téng, kok thoân-thé ló͘-la̍t kàu chai-hāi-tōe lâi ūi-mn̄g goán, iā-ū chōe-chōe hē-sù kiàn-hú-kim kap bu̍t-phín, iā tit-tio̍h Má-kai pīⁿ-īⁿ Sû i-seng sàng i-phín lâi pang-chān goán, iā ū tit-tio̍h chōe-chōe ūi-būn ê phoe.
|
阮受災害，有得著列位ê 疼真濟，有韋牧師，偕先生，戴醫生，徐牧師，日Ki青年會，台南基督教青年會，台南神學校先生佮學生，也許宏謀先生，鄭聰國先生，台北神學校先生佮學生，柯先生娘等，各團體勞力到災害地來慰問阮，也有濟濟下賜見撫金佮物品，也得著馬偕病院Sû醫生送藥品來幫贊阮，也有得著濟濟慰問ê 批。 |
|
Taⁿ góa chòe pì-hōe ê tāi-piáu, siá kúi-jī kèng-ì lâi kā lia̍t-ūi soah-siā, góa hiān-sî iáu tòa tī chhit, peh chhioh khoah ê liâu-á, ū tit-tio̍h kàu-sū-hōe ê thiàⁿ, thòe góa siat-hoat khí lîm-sî a-iân, pang-á ê sok-siā kap lé-pài-só͘, ǹg-bāng koh bô kúi-ji̍t, hōe khí hó, iā ǹg-bāng lia̍t-ūi ōe thòe goán kî-tó, kiû Siōng-chú khui-lō͘, hō͘ goán ū ho̍k-heng ê kî.
|
今我做敝會ê 代表，寫幾字敬意來kā 列位說謝，我現時猶tòa tī 7、8呎闊ê 寮仔，有得著教士會ê 疼，替阮設法起臨時亞鉛，枋仔ê 宿舍佮禮拜所，向望 koh 無幾日，會起好，也向望列位會替阮祈禱，求上主開路，hō͘阮有復興ê 期。 |
|
(Kòa-chhài-chí tē 113 hō (Kong-pò tē 603 hō), 1935 nî 6 goe̍h)
|
(芥菜子第113號（公報第603號），1935年6月) |
