Tek-io̍k ê kò͘-sū_06
|
德育ê故事_06 |
| Bô chù-bêng |
無注明 |
|
Ji̍t-chí Kú-tn̂g Só͘ Tit ê Hāu-giām
|
日子久長所得 ê 效驗 |
|
Se-le̍k chit-chheng káu-pah cha̍p-saⁿ nî, Bí-kok Chhek Pò͘-bûn Bo̍k-su tī So͘-kek-lân ê Lek-teng siâⁿ thoân-tō, ta̍k ji̍t ū la̍k chheng gōa lâng thiaⁿ tō-lí, iā ū kúi-nā ūi ê siàu-liân sìn-tô͘ pang-chān chū-hōe ê sū. Chit ji̍t sòaⁿ hōe ê sî, Bo̍k-su tú-tio̍h chit ê saⁿ-cha̍p-poeh nî chêng, thiaⁿ i kóng tō-lī ê lāu sian-siⁿ, kā i chhéng-an. Bo̍k-su bōe jīn-tit sī sím-mi̍h lâng. Lāu Sian-siⁿ kóng, "Chi̍t-chheng poeh-pah chhit-cha̍p-gō͘ nî cha̍p-it ge̍h cha̍p-poeh ji̍t, góa bat tī bó͘ só͘-chāi thiaⁿ lí thoân tō-lí, tôe- ba̍k tī Má-thài 5 : 20. Tī hit sî siū tōa kám-tōng, góa sìn chiū tit-tio̍h kiù un. Bo̍k-su chhâ kū ê ji̍t- kì phō͘, kó-jiân bô chhò.
|
西曆1913年，美國 Chhek Pò͘-bûn 牧師 tī 蘇格蘭 ê Lek-teng 城傳道，逐日有6000外人聽道理，也有幾若位ê 少年信徒幫贊聚會 ê事。這日散會 ê 時，牧師 tú著 這個38年前，聽伊講道理 ê 老先生，kā伊請安。 牧師 bōe 認得是甚物人。 老 先生講：「1875 年11月18日，我 bat tī 某所在聽你傳道理，題目 tī 馬太 5 : 20。Tī hit時受大感動，我信就得到救恩。牧師查舊 ê 日記簿，果然無錯。 |
|
Thêng tia̍p-á kú, hit ê Lāu Sian-siⁿ tòa i ê sòe kiáⁿ kàu Chhek Bo̍k-su ê bīn-chêng kóng, "Che sī góa tē-it sòe-hàn ê kiáⁿ, kin-nî cha̍p-káu hè, téng lé-pài saⁿ pái thiaⁿ Bo̍k-su lí ê tō-lí, chiū siū kám-tōng, chiong ka-kī kau hō͘ Iâ-so͘, góa iáu ū gō͘ ê gín-ná lóng í-keng kui Chú, kî-tiong ū chi̍t ê í-keng khì gōa-kok thoân tō-lí lah."
|
停 tia̍p仔久，hit個老先生 tòa伊ê細子 到 Chhek 牧師 ê 面前講：「Che是我第一細漢 ê 子，今年19歲，頂禮拜3 擺 聽牧師你ê 道理，就受感動，將家己交 hō͘ 耶穌，我猶有五個囡仔攏已經歸主，其中有一個已經去外國傳道理-- lah。」 |
|
Kóng ê sî cha̍p hun ê hoaⁿ-hí. Chhek Bo̍k-su koh khah hoaⁿ-hí, só͘-í siá phoe chiūⁿ pò, hō͘ lâng chai i saⁿ-cha̍p-poeh nî chêng, cháiⁿ-iūⁿ chhōa chit lâng kui Chú, í-āu só͘ tit-tio̍h ê hāu-kó. Chiàu Thoân- tō ê chheh 11 : 1 kóng, "Lí tio̍h chiong chéng-chí hē tī chúi-bīn, ji̍t-chí kú-tn̂g tek-khak ū só͘ tit- tio̍h." Iā chéng-chí chāi tī lâng, hoat gê kiat chí chāi tī Siōng-tè. Góa nā chīn-tiong ê sim óa-khò Chú thoân tō-lí, ji̍t-chí kàu kú tek-khak ū só͘ tit- tio̍h.
|
講 ê 時十分 ê 歡喜。Chhek 牧師 koh 較歡喜，所以寫批上報，hō͘人知伊38年前，怎樣 chhōa 這人歸主，以後所得到 ê 效果。照傳道 ê 冊 11 : 1講：「你著將種籽hē tī 水面，日子久長的確有所得--著。」 掖種籽在 tī人，發芽結籽在 tī 上帝。我若盡忠 ê 心倚靠 主傳道理，日子到久的確有所得--著。 |
|
Káu-cha̍p Hè ê Hū-jîn-lâng Kui Chú
|
90歲 ê 婦人人歸主 |
|
Tī Soaⁿ-tang Chiu-chhoan ê tōe, ū chi̍t ūi lú kàu-sū, sìⁿ Sìn, siông-siông lo̍h hiuⁿ-siā kóng tō- lí, hō͘ lú kàu-iú thiaⁿ. Chi̍t pái tú-á kóng soah, hut-jiân chi̍t ê lāu hū-jîn-lâng ji̍p--lâi, khiau-ku, jiâu-bīn, sng-seh móa thâu-khak. Sui sī kūn káu- cha̍p hè, i ê ba̍k-chiu iáu-kú kng. Chiàu Tiong-kok ê lé, i mn̄g Sìn Lú kàu-sū jōa-chōe hè? Tùi tah-lo̍h lâi? Ū siáⁿ tāi-chì? Sìn Kàu-sū lóng bô kî-koài, chi̍t hāng chi̍t hāng kā i kóng.
|
Tī 山東 Chiu-chhoan ê 地，有一位女教士，姓信，常常落鄉社講道理，hō͘ 女教友聽。一擺抵仔講煞，忽然一個老婦人人入--來，khiau痀、jiâu面、霜雪滿頭殼。雖是近90歲，伊 ê 目珠 iáu-kú 光。照中國ê 禮，伊問信女教士偌濟歲？對佗落來？有啥事誌？信教士攏無奇怪，一項一項 kā 伊講。 |
|
Chit ê lāu tōa-niû lóng bē bat thiaⁿ-kìⁿ hok-im, thâu pái chhin-chhiūⁿ thiaⁿ bōe hiáu-tit. Lú kàu- sū chiū kà i liām chi̍t kù "Siōng-tè thiàⁿ góa," koh kóng-bêng hō͘ i thiaⁿ. Khí-thâu i chhin-chhiūⁿ bô tōa sìn-ho̍k.
|
這個老大娘攏 bē bat 聽見福音，頭 擺 親像聽 bōe曉得。女教士就教伊念一句 「上帝疼--我」 koh 講明 hō͘伊聽。起頭伊親像無大信服。 |
|
Kàu ji̍t-tàu tò-khì ke-n̍i̍h, ē-po͘ koh-chài lâi, iû- goân sī liām hit kù. Beh kiâⁿ ê sî, oa̍t-tńg-sin kóng, "Lí kà góa liām hit kù, sī si̍t ōe mah?" Kàu- sū ìn kóng, "Sī si̍t ōe." Chit ê lāu tōa-niû kiâⁿ kàu mn̂g kháu, koh liām "Siōng-tè thiàⁿ góa," koh mn̄g kàu-sū kóng, "Lí it-tēng chai che sī si̍t ōe mah?" Kàu-sū chhiat-chhiat kóng, "Sī si̍t ōe."
|
到日晝 倒去家--n̍i̍h,下晡 koh再來，猶原是念hit句。Beh 行 ê 時，越轉身講：「你教我念hit句，是實話--mah？」 教士應講：「是實話。」 這個老大娘行到門口，koh 念「上帝疼--我，」koh 問教士講：「你一定知che是實話-- mah？」教士切切講：「是實話。」 |
|
Kè kàu sì ge̍h, kàu-sū koh khì hit ê hiuⁿ-siā ê sî, hit ê lāu tōa-niû lâi chhéng-an, iû-goân hoaⁿ- hoaⁿ hí-hí kóng, "Siōng-tè thiàⁿ góa, góa chin sìn- ho̍k." I thiaⁿ-kìⁿ Hok-im, hit iūⁿ ê jia̍t-sim, tì-kàu kap kàu-sū saⁿ-thiàⁿ bōe pàng-lī, m̄ khéng tò-khì ke-lāi.
|
過到4月，教士 koh 去hit個鄉社 ê 時，hit個老大娘來請安，猶原歡歡喜喜講：「上帝疼--我，我真信服。」 伊聽見福音，hit樣ê 熱心，致到 佮 教士相疼 bōe 放離，m̄肯倒去家內。 |
|
Kàu chhiu-thiⁿ Sìn Kàu-sū tē saⁿ pái kàu hit ê hiuⁿ-siā. Tōa-niû chhiáⁿ kàu-sū kàu i ê ke, khòaⁿ in mn̂g-kháu chin chōe lâng, tōa-kiáⁿ í-keng chhit- cha̍p-saⁿ hè, iā bat tō-lí ê chu-bī. Sìn Kàu-sū tī i ê hn̂g-lāi chhōa chèng lâng lé-pài. Thiaⁿ tō-lí ê chin chōe, iā lóng an-chēng, nā-sī lóng lia̍h chòe lāu-tōa niû sī siáu, in-ūi i cha̍p-cha̍p kóng, "Siōng-tè thiàⁿ góa." I sim-lāi ê khoài-lo̍k kóng bōe chīn.
|
到秋天信教士第三 擺到hit個鄉社。大娘請教士到伊ê 家，看 in 門口真濟人，大子已經73歲，也 bat 道理 ê 滋味。信教士 tī伊ê 園內 chhōa 眾人禮拜。聽道理 ê 真濟，也攏安靜，若是攏掠做老大娘是痟，因為伊雜雜講：「上帝疼--我。」伊心內 ê 快樂講 bōe 盡。 |
|
Kàu-sū kóng, chin thang ǹg-bāng Siōng-tè chioh káu-cha̍p hè ê lāu lâng, tī hit ê hiuⁿ-siā khui thoân- tō ê mn̂g.
|
教士講，真thang向望上帝借90歲 ê 老人，tī hit個鄉社開傳道 ê 門。 |
|
Chéng-chí Chá-òaⁿ Tek-khak Siu-sêng
|
種籽早晏的確收成 |
|
Hoat-kok bó͘ ê thoân-tō sian-siⁿ, chi̍t ji̍t tī Thó͘- liông ê só͘-chāi pun chheh. Ū chi̍t ê peng mn̄g kóng, "Chheh-tiong só͘ kì ê sī sím-mi̍h sū?" Ìn kóng, "Siōng-tè ê ōe." Peng kóng, "Góa beh chi̍t pún," chiū hō͘ i. Bô phah-sǹg kau i ê chhiú, pah iūⁿ ê mē chhiò, kóng, "Chit ê mi̍h chòe chia̍h hun-chóa put-chí hó." Thoân-tō --ê í-keng hō͘ --i, bōe koh thó tò-tńg, nā-sī sim-lāi kan-khó͘ peh-pak, ûn-ûn-á kiâⁿ chiū tò-khì.
|
法國某個傳道先生，一日tī Thó͘-liông ê 所在分冊。有一個兵問講：「 冊中所記--ê是甚物事？」應講：「上帝 ê話。」 兵講：「我 beh 一 本」 就 hō͘ 伊。無扑算交伊ê 手，百樣 ê 罵笑，講：「這個物做食薰紙不只好。」 傳道--ê已經 hō͘ --伊，bōe koh 討倒轉，若是心內艱苦peh腹 ，勻勻仔行就 倒--去。 |
|
Tē jī nî, koh kàu Hoat-kok tiong-kài, tī ji̍t-àm beh hioh ê sî, khoàn-kìⁿ kheh-tiàm gōa ū chi̍t kûn ê lâng, ūi-tio̍h tú-á sí ê peng ai-siong. I ê lāu-bú kóng, "Góa ê kiáⁿ tī chiàn-tōe siū siong tò-lâi ke- n̍i̍h sí, nā-sī góa hui-siông ê pêng-an, in-ūi i hō͘ góa kap i ê pē tōa-tōa hoaⁿ-hí."
|
第2年，koh到法國中界，tī 日暗beh 歇 ê 時，看見客店外有一群ê人，為著抵仔死 ê 兵哀傷。伊ê 老母 講：「我 ê 子 tī 戰地受傷倒來家--n̍i̍h死，若是我非常 ê 平安，因為伊hō͘ 我 佮伊ê父大大歡喜。」 |
|
Thoân-tō --ê kóng, "Goān mn̄g i ê siông-sè." I ê lāu-bú kóng, "Góa ê kiáⁿ ū sòe pún Sèng-keng, tòa tī i ê sin-khu, siông-siông tùi hit tiong-kan, tōa tit- tio̍h pêng-an." Thoân-tō the̍h lâi khòaⁿ i, khòaⁿ- kìⁿ sī chi̍t pún Sin-iok, thâu cha̍p-gō͘ tiuⁿ í-keng thiah-khì, phê ê lāi-bīn kì kū nî tī Thó͘-liông tùi bó͘ thoân-tō ê chhiú siū--lâi, khí-thâu khòaⁿ khin, āu-lâi tha̍k i, koh sìn i, lō͘-bé tit-tio̍h kiù-un.
|
傳道--ê講：「願問伊ê 詳細。」 伊ê 老母講：「我 ê 子有細本聖經，tòa tī伊ê 身軀，常常對hit中間，大得著平安。」 傳道提來看--伊，看見是一本新約，頭15張已經拆--去，皮 ê 內面記舊年 tī Thó͘-liông tùi某傳道 ê 手受--來，起頭看輕，後--來讀--伊，koh 信--伊，路尾得到救恩。 |
|
Thoân-tō ê khòaⁿ-kìⁿ tit-tio̍h chheh ê só͘-chāi kap ji̍t-kî, chiū chai chit pún chheh sī tùi i ê chhiú lâi tit-tio̍h--ê. Siūⁿ-khí tng nî ê iu-būn peh-pak, liâm- piⁿ hō͘ hoaⁿ-hí khoài-lo̍k thun-chia̍h--khì.
|
傳道 ê 看見得到冊 ê 所在佮日期，就知這本冊是tùi伊ê 手來得到--ê。 想起當年 ê憂悶peh腹，liâm-piⁿ hō͘ 歡喜快樂吞食--去。 |
|
Sèng-keng kóng, "Lâng chòe hó, nā bô pîn-tōaⁿ, sî kàu tek-khak beh siu-sêng." Chit ê ōe chin- chiàⁿ bô khang-khang.
|
聖經講：「人做好，若無貧憚，時到的確 beh 收成。」 這個話真正無空空。 |
|
Hiaⁿ-tī saⁿ-thiàⁿ saⁿ-chhin
|
兄弟相疼相親 |
|
Tī Eng-kok pak-piⁿ, ū chi̍t ūi bo̍k-su, sìⁿ Pu̍t miâ Iok-hān, chōe-chōe nî chòe chi̍t keng sòe kàu- hōe ê bo̍k-su. Tī chi̍t-chheng chhit-pah chhit-cha̍p jī nî, Lûn-tun chit ê tōa kàu-hōe, chhiáⁿ i kàu in hia chòe bo̍k-su. I chiū èng-ún, chiū soan-pò͘ sî- chit, chiong i ê chu-chheh mi̍h-kiāⁿ khì-kū hêng-lí, chng hē chhia lāi, pī-pān beh khí-sin.
|
Tī 英國北邊，有一位牧師，姓Pu̍t 名約翰，濟濟年做一間細教會 ê 牧師。Tī 1772年，倫敦這個大教會，請伊到 in hia 做牧師。伊就應允，就宣佈辭職，將伊ê 書冊物件器具行李，裝hē 車內，備辦 beh 起身。 |
|
Beh kiâⁿ ê sî, kàu-iú kā i ûi-lûi ba̍k-sái lâu kàu móa bīn, kiû i koh tiàm teh m̄ thang lī-khui. I ê bó͘ kóng, "Iok-hān ah, Iok-hān ah, góa khòaⁿ án- ni jím bōe tit kè." Tiong-hu ìn kóng, "Góa iā jím bōe kè, lán m̄ bián khì Lûn-tun." Chek sî chiū chiong chhia ê mi̍h sià--lo̍h--lâi. Kàu-iú hoaⁿ-hí kàu bōe kò͘-tit, āu-lâi tōa siū kám-tōng, tit-tio̍h Sèng- Sîn ê pang-chān, chòe chi̍t siú o-ló ê si.
|
Beh 行 ê 時，教友 kā伊ûi-lûi 目屎流到 滿面，求伊koh tiàm teh m̄-thang離開。伊ê 某講：「約翰--ah、約翰-- ah，我看 án-ni 忍bōe 得過。」丈夫應講：「我也忍bōe過，咱m̄免去倫敦。」即時就將車 ê 物卸-- 落--來。教友歡喜到 bōe顧--得，後--來大受感動，得到聖神 ê 幫贊，做一首 o-ló ê 詩。 |
|
Ba̍k-chhiūⁿ Êng-kng Chú
|
木匠榮光主 |
|
Ū chi̍t ê Tiuⁿ ba̍k-chhiūⁿ sī kèng-khiân ê sìn-tô, tī kàu gōa chòe kang, put-chí siū khún-pek, bô lūn siáⁿ sî, tâng chòe kang ê lâng nā khòaⁿ-kìⁿ, chiū chhiò i, mē i, bú-bān hì-lāng i.
|
有一個張木匠是敬虔 ê 信徒，tī到外做工，不只受窘逼，無論啥時，同做工 ê人若看--見，就笑--伊、罵--伊、侮慢戲弄--伊。 |
|
Ū chi̍t pái in khòaⁿ-kìⁿ i kóng, "Koh lâi ah, lāu kam-tok ah," koh hì-hāng kàu chi̍t khùn-á-pá.
|
有一 擺 in 看見伊講：「Koh 來--ah，老 監督-- ah，」 koh 戲弄到一睏仔飽。 |
|
Ba̍k-chhiūⁿ chha-put-to bōe ōe thun-lún, chiū bi̍h tī kūi-lāi, thî-khàu kiû Chú pang-chān i iâⁿ chit ê khún-pek. Kî-tó liáu, hut-jiân siūⁿ Sèng-kēng kóng, "Lí tio̍h chīn-tiong kàu sí, Góa tek-khak hō͘ lí éng-oa̍h ê bián-liû." Siūⁿ liáu liâm-piⁿ ke-thiⁿ sin ê la̍t, tò-lâi kàu kang-tiûⁿ. In koh siat-to̍k. Tiuⁿ ba̍k-chhiūⁿ kóng, "Góa bōe ōe koh thun-lún." In kóng, "Bōe thun-lún, beh siáⁿ-sū? Kiám sī beh phah goán mah? Tiuⁿ ba̍k-chhiūⁿ kóng, "Sī, to̍k- to̍k góa ê phah-hoat, lín bōe hiáu-tit. Ta̍k pái tú- tio̍h lín khui chhùi mē, góa chiū khui chhùi kóng tō-lí." Tùi án-ni kóng-khí hok-im. Bô kú choân tiûⁿ ê chòe kang lâng, hoán-hóe kóe-pìⁿ, sìn Chú.
|
木匠差不多 bōe會吞忍，就bi̍h tī 櫃--內，啼哭求主幫贊伊嬴這個khún逼。祈禱了，忽然想聖經 講：「你著盡忠到死，我的確 hō͘ 你永活 ê bián-liû 。」 想了 liâm-piⁿ 加添 新 ê 力，倒來到工場。 In koh siat-to̍k 。張木匠講：「我 bōe會 koh 吞忍。」In講：「Bōe 吞忍，beh 啥事？敢是beh 扑阮-- mah？張木匠講：「是，獨獨我 ê 扑法，lín bōe曉--得。逐擺抵著 lín 開嘴罵，我就開嘴講道理。」 Tùi án-ni講起福音。 無久全場 ê 做工人，反悔改變，信主。 |
|
Chián Phiò--ê Bô Kiaⁿ Mē.
|
剪票--ê 無驚罵 |
|
Tī Niú-iok siâⁿ ū chi̍t ê chhia-chām, kui-kú ke̍k kî giâm-kìm, hoān-nā beh tùi hit ê chām chiūⁿ chhia--ê, tek-khak tāi-seng bóe chhia-phiò, āu-lâi tī tōa-thiaⁿ thèng-hāu, chiah tùi sòe mn̂g chhut--khì. kè giām phiò --ê chiah chún i chiūⁿ chhia.
|
Tī 紐約城有一個車站，規矩極其嚴禁，凡若 beh對hit個站上 車--ê,的確第先買車票，後--來 tī 大廳聽候，才tùi細門出--去。過驗票--ê 才准伊上車。 |
|
Tang-kùi lâng chōe-chōe ēng phiò hē tī pò͘-tē-á, ū sî hē tī saⁿ pau ê lāi-bīn, iā ū ê khòaⁿ-khin giām phiò ê kui-kú. Chhia lâi ê sî, chèng lâng-khek chi̍t chôe chiūⁿ chhia. In-ūi chhē phiò bô lī-piān siū chōe-chōe kiaⁿ-hiâⁿ, koh tah bōe tio̍h chhia --ê iā bô chió.
|
冬季人濟濟用票hē tī 布袋仔，有時 hē tī 衫包 ê 內面，也有--ê 看輕驗票 ê 規矩。車來ê 時，眾人客一齊上車。因為chhē票無利便受濟濟驚惶，koh 搭bōe 著車--ê 也無少。 |
|
Tng hit sî sui-jiân kiû chêng kóng, "Góa í-keng ū phiò, put-kò hē tī pau lāi, beh the̍h chin hùi-khì, chhiáⁿ pàng góa kè--khì." Nā-sī bô lūn cháiⁿ-iūⁿ kóng, chián-phiò--ê lóng m̄ thiaⁿ, tek-khak beh khòaⁿ phiò chiah beh soah. Tùi án-ni chián phiò--ê siông-siông hō͘ lâng oàn-hūn. Ū sî lâng khǹg i kóng, "Chiūⁿ chhia ê lâng lóng tek-khak ū phiò, mi̍h-sái tio̍h ta̍k ê giām lâi tam-gō͘ kang-hu, lâi siⁿ-khí lâng ê oàn-hūn? Sìn góa ê ōe iā thang séng tām-po̍h-á kang kiám bô hó mah?" Chián-phiò ê ìn kóng, "Góa put-koán lâng ū oàn-hūn á bô oàn- hūn, góa chí ū beh chiàu kui-kú, chīn pún-hūn, hō͘ chóng-pān hoaⁿ-hí."
|
當hit時雖然求情講：「我已經 有票，不過 hē tī 包內，beh 提真費氣，請放我過--去。」 若是無論怎樣講，剪票--ê 攏 m̄ 聽，的確 beh 看票chiah beh煞。Tùi án-ni 剪票--ê 常常 hō͘人怨恨。有時人勸伊講：「上車 ê人攏的確有票，mi̍h-sái 著逐個驗來耽誤工夫，來生起人 ê 怨恨？信我 ê話也thang省淡薄仔工敢無好-- mah？」 剪票--ê 應講：「 我不管人有怨恨抑無怨恨，我只有beh 照規矩、盡本份、hō͘ 總辦歡喜。」 |
|
Ū jōa-chōe sìn-tô͘, in-ūi hō͘ lâng hoaⁿ-hí, chiū ûi-pōe tō-lí, sūn-thàn su-ì chòe tāi-chì, bōe kì- tit thiⁿ-téng ū chi̍t ūi tōa Chú-cháiⁿ, teh lūn lán ê tio̍h m̄ tio̍h, tēng lán ê pò-siúⁿ hêng-hoa̍t, kiám thang pōe i khì chiap hiah ê bô lō͘-ēng ê miâ-siaⁿ mah?
|
有偌濟信徒，因為hō͘人歡喜，就違背道理，順趁私意做事誌，bōe記得天頂有一位大主宰，teh 論咱ê 著 m̄ 著，定咱ê 報賞刑罰，敢 thang背伊去接hiah ê 無路用 ê 名聲--mah？ |
