Tek-io̍k ê kò͘-sū_01
|
德育ê故事_01 |
| Bô chù-bêng |
無注明 |
|
Thâu-sū
|
頭序 |
|
Lán lâi káng-kiù Kū-iok ê Sèng-keng, ài pâi-lia̍t chhù- sū, tio̍h chai tē-it kó͘-chá tiàm sè-kan sī sím-mi̍h lâng, sím-mi̍h sū. Lán tio̍h bêng-pe̍k chai sī Tāu-í-lí, á-sī A-pek-lia̍p-hán, á-sī Tāi-pi̍t, á-sī Í-lī-a, tah-lo̍h chi̍t lâng khah kó͘-chá, chhut-sì? Tah-lo̍h chi̍t ê khah lō͘-bé? Koh Kū- iok ê Le̍k-sú tio̍h chai sím-mi̍h hāng khah kó͘-chá? Sím-mi̍h hāng khah lō͘-bé? Phì-lūn sī tōa chúi, á-sī Í-sek-lia̍t cho̍k tī Ai-ki̍p, á-sī saⁿ lâng tī hé-lô͘, á-sī Só͘-to-má Gô-mô͘-lia̍p hō͘ jiû-n̂g hé tùi thiⁿ lâi sio khì; tah-lo̍h chi̍t hāng sī khah chá, tah-lo̍h chi̍t hāng khah āu-lâi? Chit pún sī beh chān lán thang chiàu chhù-sū pâi-lia̍t Kū-iok só͘ kì kúi-nā hāng iàu-kín ê sū.
|
咱來講究舊約 ê 聖經，ài 排列次序，著知第一古早 tiàm 世間是甚物人、甚物事。咱著明白知是但以理、抑是亞伯拉罕、抑是大衛、抑是以利亞，佗落一人較 古早、出世？佗落 一個較 路尾？Koh舊約 ê 歷史著知甚物項 較古早？甚物 項較路尾？譬論是大水、抑是以色列族 tī 埃及、抑是 3人 tī 火爐、抑是所多瑪、俄摩拉 hō͘ 硫磺火tùi天來燒--去；佗落 一項是較 早、佗落一項較後來？這本是beh 贊咱thang照次序排列舊約所記幾若項要緊 ê事。 |
|
Tē-it chiuⁿ. Lūn Gín-ná.
|
第一章 論囡仔 |
|
Lô-pòe ê Ióng-kám
|
Lô-pòe ê 勇敢 |
|
Hoat-kok ū chi̍t ê gín-ná miâ kiò Lô-pòe, i ê pē-bú sī kèng-khiân ê sìn-tô͘. Lô-pòe tùi sòe-hàn ōe hiáu kî-tó gîm-si. Gō͘ la̍k hè ê sî, i khòaⁿ ta̍k ji̍t ê chá-àm tē-it iàu-kín ê sū chiū-sī kî-tó siā-un, ho̍k-sāi Thiⁿ Pē. Chhin-chhiūⁿ án-ni chiū chiām- chiām chiâⁿ chòe si̍p-koàn.
|
法國有一個囡仔名叫 Lô-pòe,伊 ê 父母是敬虔 ê 信徒。Lô-pòe tùi細漢 會曉祈禱吟詩。5、6歲 ê 時，伊看逐日ê 早暗第一要緊 ê事就是祈禱謝恩，服事天父。親像 án-ni 就漸漸成做習慣。 |
|
Cha̍p-jī hè pē-bú sàng i ji̍p Tiong-o̍h-tn̂g. Khí- thâu kàu, hit ê-hng, i put-chí siū khún-pek, in-ūi sin ha̍k-seng ji̍p o̍h siông-siông hō͘ lâng khòaⁿ sông, Lô-pòe iû-goân chiàu tiāⁿ-tio̍h ê hoat-tō͘ kî- tó. Beh khùn ê tāi-seng, chiū kong-hêng kūi tī bîn-chhn̂g chêng, kî-tó kóng, "To-siā Thiⁿ Pē sàng góa lâi chia tha̍k chheh, sì chiu-ûi lóng sī sin kau- pôe--ê, kiû Chú Iâ-so͘ pang-chān góa, kín-sīn sió- sim, tī in ê tiong-kan, phín-hēng toan-chiàⁿ, tì-kàu bô lêng-jio̍k Lí ê miâ. Ba̍k-chiu chêng ê lō͘ ke̍k- kî hn̄g, kiû Chú chhōa góa, ióng-kám ti̍t-ti̍t chìn- chêng, koh kiû Chú pì-iū góa ê pē-bú, pêng-an bô siáⁿ-sū, A-bēng." Kî-tó soah chiūⁿ bîn-chhn̂g chiū beh khùn. Chiah ê ha̍k-seng chhiò--ê chhiò, hoah--ê hoah, koh chôe-chôe ēng chím-thâu tùi i ê thâu- khak kap ka-chiah ti̍t-ti̍t hmh, sè chhin-chhiūⁿ phah kàu beh piàn-sūi. In hì-lāng kàu chi̍t khùn- á pá, to̍k-to̍k Lô-pòe lóng bô siū-khì, sòa koh kî- tó kóng, "Kiû Chú sià-bián in ê chōe, in-ūi in só͘ chòe sī tùi bōe bêng."
|
12歲父母送伊入中學堂。起頭到，hit ê-hng，伊不只受窘迫，因為新學生入學常常 hō͘人看sông,Lô-pòe 猶原照 也著 ê 法度祈禱。Beh 睏 ê 第先，就弓型跪tī 眠床前，祈禱講：「多謝天父送 我來chia 讀冊，四周圍攏是新交陪--ê,求主耶穌幫贊我，謹慎小心，tī in ê 中間，品行端正，致到無凌辱你ê 名。目珠前 ê路極崎遠，求主 chhōa 我，勇敢直直進前，koh 求主庇佑我 ê 父母，平安無啥事，阿門。」 祈禱煞上眠床就 beh 睏。chiah ê 學生笑--ê 笑、喝--ê 喝，koh 齊齊用枕頭對伊ê 頭殼佮ka-chiah 直直 hmh，勢親像 拍到 beh piàn-sūi。In 戲弄到一睏仔飽，獨獨 Lô-pòe 攏無受氣，續 koh祈禱講：「求主赦免 in ê 罪，因為in 所做是對 bōe明。」 |
|
Ta̍k ji̍t chá-àm, Lô-pòe chiàu siông kî-tó, bô kúi ji̍t āu, i chiū bô siū khún-pek, sòa ū jōa chōe lâng jīn i ê m̄-tio̍h, iā koh sòa hoán-hóe lâi sìn Chú Iâ- so͘. Khòaⁿ chit ê gín-ná ūi Chú Iâ-so͘ chòe kan- chèng, chin-chiàⁿ eng-kai tio̍h o-ló Chú.
|
逐日早暗，Lô-pòe 照常祈禱，無幾日後，伊就無受窘迫，續有偌濟人 認伊ê m̄著，也koh續反悔來信主耶穌。看這個囡仔為主耶穌做干證，真正應該著 o-ló 主。 |
|
Pi-su ê Sìn-sim.
|
Pi-su ê 信心 |
|
Tī Lûn-tun lâm-sì chhit-cha̍p lí, Bí-lí-su ê hiuⁿ- siā tiong, ū chi̍t ūi Pi-su Bo̍k-su, hit tia̍p tī bó͘ siâⁿ thoân tō-lí, tē-it chhut-miâ. Chit lâng sòe hàn ê sî ê kéng-gū, hui-siông ê kan-khó͘. La̍k hè pē sí, chhit hè bú sí, ū sî óa-khò gōa chhek, ū sî óa-khò lāu-pē ê pêng-iú, sì-kòe liû tī sì-hng, lóng bô ióng-sin tiāⁿ-tio̍h ê só͘-chāi.
|
Tī 倫敦南勢70哩，Bí-lí-su ê 鄉社中，有一位Pi-su 牧師，hit-tia̍p tī 某城傳道理，第一 出名。這人細漢 ê 時 ê 境遇，非常 ê 艱苦。6歲父死、7歲母死，有時倚靠外戚、有時倚靠 老父 ê 朋友，四界留tī 四方，攏無養身定著 ê 所在。 |
|
Cha̍p-it hè ê sî, chi̍t ji̍t tī koe-lō͘ kap sòe-hàn gín-ná teh thit-thô, hut-jiân ū chi̍t ê lú thoân-tō tùi Pi-su kóng, "Lí chit ê gín-ná, cháiⁿ-iūⁿ m̄ ji̍p- o̍h tha̍k-chheh?" Pi-su ìn kóng, "Góa bô chîⁿ, koh bô pêng-iú, iā bô lâng thang pang-chān, beh cháiⁿ-iūⁿ ū thang tha̍k-chheh ni̍h?" Lú thoân-tō kóng, "Lí nā goān-ì, kiû chit ūi tek-khak èng-ún kî-tó ê Iâ-so͘ Ki-tok, I tek-khak pang-chān lí." Pi-su kóng, "Iâ-so͘ Ki-tok tī tah-lo̍h?" Lú thoân- tō kóng, "I sī tī Thian-tông, ūi-tio̍h kiù-sio̍k lâng ê chōe, kàng-seng tī Iû-thài kok, taⁿ iû-goân koh tò-khì Thian-tông."
|
11歲 ê 時，一日tī 街路佮細漢 囡仔 teh thit-thô,忽然有一個女傳道 對 Pi-su講：「 你這個 囡仔，怎樣 m̄ 入學讀冊？」 Pi-su應講：「我無錢、koh 無朋友、也無人thang幫贊，beh怎樣有thang讀冊-- ni̍h？」 女傳道 講：「你若願意，求這位的確應允祈禱 ê 耶穌基督，伊的確幫贊你。」 Pi-su講：「耶穌基督 tī 佗落？」 女傳道講：「伊是tī 天堂，為著救贖人 ê 罪，降生 tī 猶太國，今猶原 koh 倒去天堂。」 |
|
Lú thoân-tō khì liáu-āu, Pi-su ka-kī siūⁿ kóng, "Thian-tông kiù kèng tī tah-lo̍h, góa nā chhin-sin khì chhē I, ū chōe-chōe put piān, m̄ ta̍t tio̍h siá phoe kiû I." Chiū chhiáⁿ chi̍t ê pí i khah tōa ê ha̍k-seng, Pi-su kóng ì-sù, hit ê ha̍k-seng chiū thòe siá. Siá liáu chiū hong--khí--lâi, sàng kàu Iû-chèng. Iû-chèng ê lâng chi̍t ē khòaⁿ bīn-téng siá--ê, sī beh kià kàu Thian-tông Iâ-so͘ Ki-tok siu, chiū gông- ngia̍h kóng, "Chit ê phoe bōe kià-tit" Pi-su kóng, "the̍h phoe sī lí ê chit hūn, cháiⁿ-iūⁿ kóng bōe?" Kóng soah la̍p iû-hùi, chiū chòe i khì.
|
女傳道去了後，Pi-su 家己想講：「 天堂究竟 tī 佗落，我若親身去chhē伊，有濟濟不便，m̄值著寫批求伊。」就請一個比伊較大 ê 學生，Pi-su講意思，hit個學生就替寫。 寫了就封--起--來，送到郵政。郵政 ê人一下看面頂寫--ê,是beh 寄到天堂耶穌基督收，就 gông-ngia̍h講：「這個批 bōe寄--得」 Pi-su 講：「提批是你 ê 職份，怎樣講 bōe?」 講煞納郵費，就做伊去。 |
|
Liáu-āu Pi-su siông-siông teh ǹg-bāng hê-phoe, ǹg-bāng kàu chin tio̍h-kip. Kè nn̄g lé-pài ū chi̍t ūi Bo̍k-su kàu Iû-chèng-ke̍k kià phoe, hut-jiân khòaⁿ-kìⁿ tī kià bōe kàu phoe-sìn a̍h-lāi ū Pi-su kià hō͘ Chú Iâ-so͘ ê phoe. (Chit ê kià bōe kàu phoe-sìn a̍h, sī in hit ūi nā phoe kià bōe kàu, chūi koh the̍h tò-tńg ēng hit ê a̍h tóe) Bo̍k-su chin hi-kî, Chiū lâi mn̄g i ê lâi-le̍k. Iû-chèng ê lâng lóng-chóng kā i kóng-bêng. Bo̍k-su kóng. "Góa beh thiah khí-lâi khòaⁿ." Í-keng thiah khui, khòaⁿ-kìⁿ lāi-bīn siá--ê sī, "Góa só͘ thiàⁿ ê Iâ-so͘ Ki- tok ah, thiaⁿ-kìⁿ kóng, Lí khoán-thāi sè-kan lâng nā ū kiû tek-khak èng-ún, it-chhè ê hó-sū, bô m̄ pang-chān. Góa chit ê bô pē-bú, bô chîⁿ-châi, bô tè óa-khò ê sòe-hàn gín-ná, thiâu-tî lâi kiû Lí lîn-bín, hō͘ góa ū ki-hōe ōe tit-tio̍h thang ji̍p o̍h tha̍k- chheh. Lí sī lāu sian-siⁿ, bô lūn cháiⁿ-iūⁿ an-pâi góa lóng thiaⁿ-thàn bēng-lēng, chit tia̍p góa í-keng pī-pān, kiû Lí chhōa góa ji̍p o̍h. Bô lō͘-ēng ê Pi-su kiok-kiong." Bo̍k-su khòaⁿ liáu, kóng, "Iâ-so͘ Ki- tok ún i só͘ kiû lah." Hit ê Bo̍k-su chiū khì chhē Pi-su, tôe chîⁿ lâi hō͘ i ji̍p o̍h. Pi-su pit-gia̍p liáu saⁿ nî, chiū hō͘ chhut miâ ê tông-hōe chhiáⁿ i chòe Bo̍k-su. Chit tia̍p tī Eng-kok ê Bo̍k-su tiong i chòe tē-it chhut-miâ--ê.
|
了後 Pi-su 常常 teh 向望回批，向望到真著急。過兩禮拜有一 位牧師到郵政局寄批，忽然 看見 tī 寄 bōe到批信盒內有Pi-su寄 hō͘ 主耶穌 ê 批。 (這個寄 bōe到 批信盒，是in hit位若批寄 bōe到，就 koh 提倒轉用hit個盒tóe) 牧師真 稀奇，就來問伊ê 來歷。郵政 ê人 攏總kā 伊講明。 牧師講：「 我 beh 拆起來看。」 已經拆開，看見內面寫--ê 是：「我所疼 ê 耶穌基督--ah，聽見講，你款待世間人若有求的確應允，一切ê 好事，無m̄ 幫贊。我這個無父母、無錢財、無tè 倚靠 ê 細漢囡仔，thiâu-tî 來求你憐憫，hō͘ 我有機會會得到thang入學讀冊。你是老先生，無論怎樣安排 我攏聽趁命令，這tia̍p 我已經 備辦，求你chhōa 我入學。無路用 ê Pi-su 鞠躬。」牧師看了，講：「耶穌基督允伊所求-- lah。」hit個牧師就去 chhē Pi-su，tôe 錢來hō͘伊入學。Pi-su 畢業了3年，就hō͘ 出名ê 堂會請伊做牧師。這tia̍p tī 英國 ê 牧師中伊做第一出名--ê。 |
|
Chú Iâ-so͘ ê ōe kóng, "Lín hōng Góa ê miâ, bô lūn kiû sím-mi̍h, Góa tek-khak beh chiâⁿ." Chit kù ōe chin-chiàⁿ thang sìn.
|
主 耶穌 ê 話講：「Lín 奉我 ê 名，無論求甚物，我的確 beh 成。」 這句話真正thang信。 |
|
Tè Tek-seng Sòe-hàn Hiàn Sim hō͘ Chú.
|
戴德生細漢獻心hō͘ 主 |
|
Lōe-tē-hōe ê Tè-kong, chòe gín-ná ê sî, i ê lāu-bú in-ūi ū iàu-kín ê sū, khì pa̍t ūi chi̍t lé-pài kú. Tò- lài ê sî, i ê kiáⁿ chiū khì ngiâ-chi̍h i. Í-keng khòaⁿ-kiⁿ, chiū hoaⁿ-hoaⁿ hí-hí, tùi i ê lāu-bú kóng, "Góa tī chit lé-pài lāi í-keng chiong sim hiàn hō͘ Chú." I ê lāu-bú móa bīn tài chhiò kóng, "Góa ê kiáⁿ, lí chit hāng-sū, góa chá-chá í-keng chai." Tè-kong kóng, "Lāu-bú cháiⁿ-iūⁿ ōe chai leh? Ún-tàng sī góa ê tōa-chí kā lí kóng." Lāu- bú kóng, "M̄ sī, sī Siōng-tè kā góa kóng, góa lī- khui ke liáu-āu, ū chi̍t ji̍t ēng chi̍t po͘ kang, ūi- tio̍h lí kî-tó, āu--lâi Sèng Sîn kā góa kóng, góa ê kiáⁿ í-keng tit-tio̍h kiù lah, só͘-í góa chá-chá chai, lí chiong sim hiàn hō͘ Chú."
|
內地會 ê 戴公，做囡仔 ê 時，伊 ê 老母 因為有要緊 ê事，去別位一 禮拜久。倒--來 ê 時，伊 ê 子就去迎接--伊 。已經 看見，就歡歡喜喜，對伊ê 老母 講：「我 tī 這禮拜內已經將心獻 hō͘ 主。」伊ê 老母滿面tài 笑講：「 我 ê 子，你這項事，我早早已經 知。」 戴公講：「老母怎樣會知--leh？穩當是我 ê 大姊 kā 你講。」老母講：「M̄是，是上帝 kā 我講，我離開家了後，有一日用一晡工，為著你祈禱，後--來聖神kā 我講，我 ê 子已經得到救--lah，所以我早早知，你將心獻 hō͘ 主。」 |
|
Āu-lâi chha chai lāu-bú ūi i kî-tó ê sî, i tī ke- lāi tú-á teh khòaⁿ chi̍t phiⁿ tō-lí; liông-sim tōa tín-tāng, chai Siōng-tè beh ēng i, chiū liâm-piⁿ kūi --lo̍h--khì, chiong sim kau hō͘ Kiù-chú. Koh chiong chit ê kong-kéng kā i ê tōa-chí kóng, koh kóng lāu-bú nā tò-lâi, iā tek-khak beh kín kā i kóng- To̍k-to̍k i ê lāu-bú í-keng chai lah. Gâu kî-tó ê sìn-tô͘ ōe bêng Chú ê chí-ì, chhiáⁿ khòaⁿ Lōe-tē-hōe kin-á-ji̍t ê kong-hāu, lóng sī tùi hit ē-po͘ khí-tiám. Kî-tó ê kong-hāu cháiⁿ-iūⁿ kàu hiah kî-biāu. Chòe lāu-bú--ê chhiáⁿ chù-ì.
|
後--來chha知老母為伊祈禱 ê 時，伊tī 家內抵仔 teh 看 一篇道理﹔良心大 振動，知上帝beh用伊，就liâm-piⁿ跪--落--去，將心 交 hō͘ 救主。Koh 將 這個光景 kā伊ê 大姊講，koh講 老母若倒--來，也的確 beh 緊 kā 伊講獨獨伊ê 老母已經知--lah。Gâu 祈禱 ê 信徒會明主 ê 旨意，請 看內地會今仔日ê 功效，攏是tùi hit下晡起點。 祈禱 ê 功效怎樣 到 hiah 奇妙。做老母--ê 請注意。 |
|
Má-lī Tha̍k Sèng-keng Kóaⁿ Chha̍t.
|
Má-lī 讀聖經趕賊 |
|
Eng-kok ū chit ê sìⁿ Ông ê choh-chhân lâng. I ū tōe gō͘-cha̍p bó͘, khiā-khí tī phian-phiah ê hiuⁿ- siā, ke-lāi ê hū-jîn-lang kap kiáⁿ-jî, pēng-an tō͘ ji̍t. Sìⁿ Ông--ê sī chi̍t ê jia̍t-sim ê sìn-tô͘, siông-siông tùi ke-lāi ê lâng kóng, "Lâng oa̍h tē-it iàu-kín ê sū, tio̍h kà-sī kiáⁿ cha-bó͘-kiáⁿ kèng-khiân ho̍k-sāi Chú." Só͘-í ta̍k lé-pài, tû lâu chi̍t lâng kò͘ mn̂g í- gōa, kî-û--ê lóng tio̍h khì lé-pài.
|
英國有這個姓王 ê 作田人。伊有地50畝，企起 tī 偏僻 ê 鄉社，家內 ê 婦人人佮子兒，平安渡日。姓王--ê 是一個熱心 ê 信徒，常常對家內 ê人講：「人活第一要緊 ê事，著教示子查某子敬虔服事主。」 所以逐禮拜，除留一人顧門以外，其餘--ê 攏著去禮拜。 |
|
I ū chit ê sòe cha-bó͘ kiáⁿ miâ-kiò Má-lī, tú-á sī cha̍p hè, chiū ū tōa lâng ê khì-khài, siông-siông tùi lāu-pē kóng, "A-tia góa thang tiàm teh kò͘- mn̂g á m̄ thang?" Sìⁿ Ông ê in-ūi i sòe-hàn, só͘-í m̄ káⁿ ún. Gín-ná ta̍uh-ta̍uh mn̄g, i chiū ta̍uh ta̍uh sî.
|
伊有這個細查某 子名叫 Má-lī,抵仔 是10歲，就有大人 ê 氣慨，常常 對老父講：「阿爹，我thang tiàm teh 顧門 抑 m̄-thang？」 姓王--ê 因為伊細漢，所以 m̄ 敢允。囡仔 ta̍uh-ta̍uh 問，伊就 ta̍uh ta̍uh 辭。 |
|
In hit ūi lóng bô chha̍t, só͘-í sìⁿ Ông--ê āu-lâi ū chi̍t lé-pài kóng, "Má-lī siông-siông thó beh tiàm teh kò͘-mn̂g, m̄ ta̍t-tio̍h hō͘ i chhì khòaⁿ, koh ū káu thang chòe phōaⁿ, liōng káⁿ bô iàu-kín." Tùi án-ni Má-lī chiū chiâⁿ i ê sim-goān hō͘ pē-bú lóng khì lé-pài.
|
In hit位攏無賊，所以姓王--ê 後來有一 禮拜講：「Má-lī 常常討 beh tiàm teh 顧門，m̄值著 hō͘伊試看，koh有狗thang做伴，量敢無要緊。」對án-ni Má-lī 就成伊ê 心願 hō͘ 父母攏去禮拜。 |
|
In khì bô jōa kú, Má-lī tāi-seng chin hoaⁿ-hí, āu- lâi siūⁿ bô-phōaⁿ, sûi-sî hian khui Sèng-keng, hian kàu Si-phian 34 phiⁿ chū-chū jiân-jiân chiū tha̍k liām koh-chài liām, tit kàu ōe oa̍t-liām. Āu-lâi chin bô sio̍h, chiū chhōa káu kàu hoe-hn̂g thit-thô.
|
In 去無偌久，Má-lī 第先真歡喜，後--來想無伴，隨時掀開聖經，掀 到詩篇 34 篇自自然然就讀 念 koh再念，致到會閱唸。後--來真無sio̍h ，就chhōa 狗到花園 thit-thô。 |
|
Hit sî tú-á cha̍p-it tiám, sìⁿ Ông--ê kap i ê bó-kiáⁿ tio̍h cha̍p-jī tiám chiah ōe tò-lâi. Má-lī tī hoe-hn̂g lāi thit-thô kàu tuh-ka-chē, kàu chhíⁿ ji̍p chhù beh pī-pān pn̄g. Hut-jiân ka-kī kóng, "Káu tah-lo̍h khì?" Chhut-lâi kiò ê sî, lóng bô tōng-chēng. Hit sî liâm-piⁿ ū pháiⁿ lâng, kàu Má-lī ê bīn-chêng, mn̄g Má-lī kóng, "Lí ê lāu-pē tī ke-lāi bô?" Ìn kóng, "Bô, góa ê pē bô tī ke-lāi, chí-ū góa kap káu nā-tiāⁿ. Lín beh chhòng sím-mi̍h?" In chhiò kóng, "Lí bōe ōe koh khòaⁿ-kìⁿ lí ê káu lah." Má- lī m̄ chai káu í-keng hō͘ in hāi-sí.
|
Hit時 抵仔 11點，姓王--ê 佮伊ê 母子著12點才會倒來。 Má-lī tī 花園 內 thit-thô到 tuh-ka-chōe ，到醒入厝beh 備辦飯。忽然家己講：「狗佗落去？」 出來叫 ê 時，攏無動靜。Hit時 liâm-piⁿ有歹人，到 Má-lī ê 面前，問 Má-lī講：「你 ê 老父 tī 家內無？」 應講：「無，我 ê 父無tī 家內，只有我佮狗nā-tiāⁿ。Lín beh 創甚物？」In 笑 講：「你bōe會koh 看見你ê 狗--lah。」 Má-lī m̄知狗已經 hō͘ in 害--死。 |
|
I siông-siông khòaⁿ-kìⁿ lāu-bú un-khûn khoán- thāi lâng-kheh, só͘-í tùi hit nn̄g lâng kóng, "Chhiáⁿ ji̍p chhù-lāi, góa beh pī-pān pn̄g-tǹg lâi chhiáⁿ lín chia̍h, lín tio̍h thèng-hāu kàu góa ê pē tò-lâi." In ji̍p lâi, Má-lī pī-pān pn̄g hó, chiū pâi tī toh-téng, Má-lī kóng, "Kî-tó, lán tāi-ke chiū chia̍h." In nn̄g lâng lóng chhiò, chi̍t ê kóng, "Góa bōe hiáu-tit, hō͘ lí kî-tó." Tùi án-ni Má-lī chiū ēng kán ê ōe, kám-siā Thiⁿ Pē. Kám-siā liáu chiū chia̍h. In chia̍h hui-siông kín, koh tùi Má-lī iā put-chí chho͘- ló͘, Má-lī hit sî chiah giâu-gî, in m̄ sī hó lâng. Ū chi̍t ê kóng, "Lí tio̍h kā goán kóng. Lí ê pē chá- ji̍t bōe ti ê chîⁿ hē tī tah-lo̍h?" Má-lī tú-á beh ìn. Hit chi̍t ê kóng, "Lí bô kiaⁿ goán mah? Phì- jū goán sī chha̍t, lí kiám bô kiaⁿ mah?" Má-lī kóng, "Góa put-chí kiaⁿ, to̍k-to̍k góa tú-á tha̍k ê Sèng-keng, hō͘ góa chai, Thiⁿ Pē tek-khak chiàu- kò͘ góa, kap góa ê chhù, nā-sī lí kam-goān thiaⁿ, góa beh in-ūi lín koh-chài tha̍k." Sûi-sî liām kóng, "Kèng-ùi Chú ê lâng, sì-ûi ū Chú ê sù-chiá, chat iâⁿ chín-kiù."
|
伊常常看見老母 un-khûn 款待人客，所以對hit 2人講：「請入厝內，我 beh 備辦飯頓 來請 lín 食，lín 著聽候到我 ê 父倒--來。」 In 入來，Má-lī 備辦飯好，就排tī 桌頂，Má-lī講：「祈禱，咱逐家就食。」In 2人攏笑，一個講：「我 bōe曉--得，hō͘你祈禱。」tùi án-ni Má-lī 就用簡 ê 話，感謝天父。 感謝了就食。 In 食非常緊，koh對 Má-lī 也 不只粗魯，Má-lī hit時 才 giâu疑，in m̄是好人。有一個講：「你著 kā 阮講。你ê 父早日賣豬 ê 錢 hē tī 佗落？」 Má-lī 抵仔 beh 應。 Hit一個講：「你無驚 阮--mah？譬喻阮是賊，你敢無驚--mah？」 Má-lī 講：「我不只 驚，獨獨我抵仔讀 ê 聖經，hō͘ 我知，天父的確照顧我、佮我 ê 厝，若是你甘願聽，我 beh 因為lín koh再讀。」隨時念講：「敬畏主 ê人，四圍有主 ê 使者，紮營拯救。」 |
|
In khòaⁿ-kìⁿ Má-lī hit iūⁿ ê sìn-sim. Tiong-kan chi̍t ê, liông-sim tōa tín-tāng, chiū tùi tâng-phōaⁿ kóng, "Kín kiâⁿ, góa m̄ pang-chān lí thau chit hō lâng ê chîⁿ, khòaⁿ chit ê sòe-hàn cha-bó͘ gín-ná, thang chai in sī hó lâng, góa iā m̄ káⁿ thau --in, in- ūi Thiⁿ Pē khòaⁿ-kò͘ --in." Koh chi̍t ê chiù-chōa kóng, "Nā bô thau tām-po̍h chîⁿ, koat-toàn m̄ khì." I ê tâng-phōaⁿ m̄ hō͘ i chòe chit hō sū, sûi-sî chiū chhut mn̂g-gōa, kap Má-lī saⁿ-sî. Oa̍t-thâu kóng, "Goán m̄ thèng-hāu lí ê lāu-pē."
|
In 看見 Má-lī hit 樣ê 信心。中間 一個，良心大振動，就對同伴 講：「緊行，我m̄ 幫贊你偷這號 人 ê 錢，看這個細漢查某囡仔，thang知in是好人，我也 m̄敢偷--in，因為天父 看顧--in。」 Koh 一個咒chōa 講：「若無偷淡薄錢，決斷 m̄ 去。」伊ê 同伴 m̄ hō͘伊做這號事，隨時就 出門外，佮Má-lī 相辭。越頭講：「阮 m̄ 聽候你ê 老父。」 |
|
Sìⁿ Ông--ê kap ke-lāi ê lâng tùi lé-pài tn̂g tò-lâi chi̍t ē ji̍p mn̂g khòaⁿ-kìⁿ sòe chiah káu sí, chiū chin kiaⁿ, phah-sǹg í-keng hō͘ chha̍t thau.
|
姓王--ê佮家內 ê人tui禮拜堂倒--來一下入門看見細隻狗死，就真驚，扑算已經 hō͘ 賊偷。 |
|
Kàu ji̍p chhù, khòaⁿ-kìⁿ Má-lī ê pn̄g í-keng pī- pān hó, chiū sòe-jī mn̄g hit ê in-toaⁿ. Mn̄g soah, chiū kap i ê hū-jîn-lâng saⁿ-kap siā un, in-ūi i ê sòe cha-bó͘ kiáⁿ tha̍k Sèng-keng, ū tit-tio̍h chit ê hó ê hāu-hó.
|
到入厝，看見 Má-lī ê 飯已經備辦好，就細膩問hit個因端。問煞，就 佮伊ê 婦人人相佮 謝恩，因為伊ê 細查某 子 讀聖經，有得到這個 好 ê 效果。 |
|
Hok-tek Kóng Sêng-si̍t
|
福德講誠實 |
|
Tī Bi-kok bó͘ o̍h-tn̂g, ū chi̍t ê sòng-hiong ê ha̍k- seng, miâ kiò Hok-tek, tha̍k chheh bô chōe, koh bô put-chí chhang-miâ, to̍k-to̍k i ê siá jī, bōe su chèng lâng. I ū chi̍t kho, kek-gōe ê ēng kang, ka-kī phah-sǹg kàu khó ê sî, pa̍t kho ê pò-siúⁿ m̄ káⁿ ǹg-bāng, siá jī chit kho, ū thang hūn chi̍t hūn.
|
Tī 美國某學堂，有一個散hiong ê 學生，名叫福德，讀冊無濟，koh 無不只聰明，獨獨伊ê 寫字，bōe輸眾人。伊有一科， kek-gōe ê用工，家己扑算到考 ê 時，別科 ê 報賞 m̄ 敢向望，寫字這科，有thang分一份。 |
|
Kàu nî-bé khó chheh ê sî, Kam-tok lâi-pin lóng khì chham-koan, pún o̍h ê sian-siⁿ tāi-seng kiò ha̍k-seng chiàu ūi chē, āu-lâi chiong ta̍k ê ha̍k- seng ê siá-jī-phō͘, pun hō͘ ta̍k lâng, kiò in hiān siá, bián tit ū su sim ê pē-pēng. Khòaⁿ chit tia̍p siá ê chī-chūi khah hó, chiū hō͘ i pò-siúⁿ. Khó- sioh sian-siⁿ bô sòe-jī, chiong Hok-tek ê siá-jī-phō͘ the̍h hō͘ Hí-tek, Hí-tek ê hō͘ Hok-tek. Ta̍k ê ha̍k-seng siá liáu, Kam-tok ta̍k ê ta̍k ê khòaⁿ; kéng chhut nn̄g pún hó --ê, chi̍t bīn khòaⁿ, chi̍t bīn tùi chèng lâng kóng, "Kin-nî siá jī ê pò-siúⁿ beh kui tī chí nn̄g ê ha̍k-seng."
|
到年尾考冊 ê 時，Kam-tok來賓攏去參觀，本學 ê 先生第先叫 學生照位坐，後--來將逐個學生 ê 寫字簿，分hō͘ 逐人，叫 in 現寫，免得有私心 ê弊病。 看這tia̍p 寫 ê 是誰較 好，就hō͘伊報賞。可惜先生無細膩，將福德 ê 寫字簿 提hō͘ 喜德，喜德 ê hō͘ 福德。逐個學生寫了，Kam-tok逐個逐個看﹔ 揀 出2本好--ê,一面看，一面tui 眾人講：「今年寫字 ê 報賞 beh 歸tī 這兩個學生。」 |
|
Tng hit sî Hok-tek khòaⁿ-kìⁿ hí nn̄g pún ê tiong-kan, ū chi̍t pún sī i ê, sim-lāi chiū cha̍p hun ê hoaⁿ-hí. Khah thêng sian-siⁿ chiong pò-siúⁿ kap siá-jī-phō͘ pun hō͘ ta̍k ê ha̍k-seng. Hok-tek chi̍t ē khòaⁿ, phō͘-á sī ka-kī ê, jī sī Hí-tek siá--ê, chiū kā sian-siⁿ kóng, "Góa m̄ eng-kai tit-tio̍h pò- siúⁿ, in-ūi che m̄ sī góa siá--ê, sī Hí-tek siá--ê." Sian-siⁿ kóng, "Án-ni sī góa bô sió sim, chiong phō͘-á ōaⁿ chhò." Ìn kóng, "Bô lūn cháiⁿ-iūⁿ, góa m̄ eng-kai tit-tio̍h siúⁿ." Sian-siⁿ chiū chiong pò-siúⁿ hō͘ Hí-tek.
|
當 hit 時福德 看見hit兩本 ê 中間，有一 本是伊 ê,心內就十分ê 歡喜。較 thêng 先生將報賞 佮寫字簿分hō͘ 逐個 學生。福德一下看，簿仔是家己--ê,字是喜德寫--ê,就 kā 先生講：「我 m̄應該得到報賞，因為che m̄是我寫--ê,是喜德寫--ê。」 先生講：「Án-ni是我無小心，將 簿仔換錯。」 應講：「無論怎樣，我 m̄應該得著賞。」先生就將報賞 hō͘ 喜德。 |
|
Ha̍k-seng tiong ū ê kóng, "Hok-tek chin gōng, nā bô chòe siaⁿ, pò-siúⁿ kiám m̄ sī i ê mah?" Iā ū ê kóng, "Hok-tek chin-chiàⁿ sī hó-lâng, lêng- khó͘ sit-lo̍h pò-siúⁿ, m̄ khéng kóng pe̍h-chha̍t lâi sún-hāi --lâng." Hok-tek sui-jiân sit-lo̍h ōe khòaⁿ- kìⁿ ê pò-siúⁿ, chóng--sī i ún-tàng ōe tit-tio̍h bōe khòaⁿ-kìⁿ ê pò-siúⁿ.
|
學生中有ê講：「福德真憨，若無做聲，報賞 敢 m̄是伊 ê--mah？」也 有 ê 講：「福德真正是好人，寧可失落報賞，m̄肯講白賊來損害--人。」 福德雖然失落會看見 ê 報賞，總--是伊穩當會得到 bōe 看見 ê 報賞。 |
|
Chú Iâ-so͘ kóng, "Lín ê ōe, sī chiū kóng sī, m̄ sī chiū kóng m̄ sī, nā-sī kóng kè-thâu, chiū-sī tùi pháiⁿ siⁿ chhut-lâi."
|
主耶穌講：「Lín ê 話，是就講是，m̄是就講 m̄是，若是講過頭，就是tui 歹生--出--來。」 |
|
Hok-tek í-keng chiàu chit ê ōe kiâⁿ. Iâ-so͘ hō͘ i pêng-an khoài-lo̍k, kiám m̄ sī tē-it pó-kùi ê pò- siúⁿ mah? Sòe-kiáⁿ tio̍h thiaⁿ ah, tio̍h bián-lē ah.
|
福德已經照這個話行。 耶穌 hō͘ 伊平安快樂，敢 m̄是第一寶貴 ê 報賞--mah？細子著聽--ah，著勉勵--ah！ |
|
Chheng-khì Chin Hó
|
清氣真好 |
|
Ū chi̍t ê gín-ná tú-á gō͘ hè, chit pái kap i ê sòe- hàn sió-tī, tī chhù-lāi teh thit-thô. Hut-jiân tú- tio̍h hé-sio, hé-ian chin tōa chhèng--khí--lâi, sè-bīn teh-beh sio sí lâng. Hit ê gín-ná iû-goân chū-chū jiân-jiân, chiong sió-tī nn̄g chhiú phō--khí--lâi, khut- sin jím khì chiū cháu.
|
有一個囡仔抵仔5歲，這擺佮伊ê 細漢小弟，tī 厝內 teh thit-thô。忽然抵著火燒，火煙真大 chhèng--起--來， 勢面 teh-beh 燒死人。Hit個囡仔猶原自自然然，將小弟2手抱--起--來，屈身忍氣就走。 |
|
Tú-á kàu mn̂g-kháu, ū nn̄g lâng cháu lâi, i kap i ê sió-tī lóng siū kiù chhut. Chi̍t ē kàu gōa-bīn, chhoán chi̍t ê tōa khùi kóng, "Hāi ah! Chheng ê khì chin hó, chheng ê khì chin hó." Piⁿ--á ū chi̍t lâng chhap chhùi kóng, "Lí pêng-ji̍t kiám m̄ sī siông-siông khip chheng ê khong-khì mah? Cháiⁿ- iūⁿ kin-á-ji̍t chiah chai hó n̍i̍h?" I chiū ìn kóng, "Góa kin-á-ji̍t nā m̄ sī tùi hé-ian lāi cháu--chhut--lâi, chheng ê khì sui-jiân hó kàu cháiⁿ-iūⁿ iā m̄ chai."
|
抵仔到門口，有2人走來，伊佮伊ê 小弟攏受救 出。一下到外面，喘一個大氣講：「害--ah！清 ê 氣真好，清 ê 氣真 好。」 邊--仔有一 人 chhap 嘴講：「你平日敢m̄是常常吸清 ê 空氣-- mah？怎樣今仔日才 知好--n̍i̍h?」伊就應講：「 我今仔日若 m̄是tui火煙內走--出--來，清 ê 氣雖然好到怎樣也 m̄ 知。」 |
|
Sèng-tô͘ siông-siông tī Thiⁿ Pē ê un-tián tiong, lóng bōe hiáu kám-un. Kàu tú-tio̍h kan-khó͘ í-āu, hiah chai pêng-ji̍t tit-tio̍h un bô chió, si̍t-chāi chin khó-sioh khó-sioh.
|
聖徒常常 tī 天父 ê 恩典中，攏 bōe曉感恩。到抵著艱苦以後，才知平日得到恩無少，實在真可惜可惜。 |
|
Lí Sêng-bí kóng Pe̍h-chha̍t.
|
Lí Sêng-bí講白賊 |
|
Lí Sêng-bí cha̍p-jī hè, i ê pē-bú sī jia̍t-sim ê kàu- iú, hoân-sū chiàu liông-sim, iā kà-sī gín-ná pó-siú liông-sim.
|
Lí Sêng-bí 12歲，伊 ê 父母是熱心 ê 教友，凡事照良心，也教示囡仔保守良心。 |
|
Chi̍t ji̍t Lí Su-niû kóaⁿ-kín beh khì bóe kúi kun hān-chû, hoan-hù Sêng-bí tī ke-lāi kò͘-mn̂g, m̄ thang chhut-khì thit-thô, kiaⁿ-liáu ū lâng lâi thau- the̍h mi̍h. Sêng-bí ìn, "Hó". Lí Su-niû chiū kōaⁿ tek- láng-á chhut--khì.
|
一日Lí Su-niû 趕緊 beh 去買幾斤番藷，吩咐Sêng-bí tī 家內顧門，m̄ thang出去thit-thô,驚了有人來偷提物。 Sêng-bí應：「好」 。Lí Su-niû 就 kōaⁿ 竹籠仔出--去。 |
|
Sêng-bí tī ke-lāi bô jōa kú, chiū siūⁿ bô sio̍h, chiū khì khui thoah, loān-loān hiau kàu chi̍t khùn- á pá. Koh khui óaⁿ-tû, khòaⁿ-kìⁿ ū kúi tè piáⁿ- koaⁿ, tóe tī kong-thi̍h a̍h-lāi, chi̍t ē khòaⁿ-kìⁿ chiū liâm-piⁿ ài beh chia̍h. Liông-sim kóng, "M̄ thang, tio̍h hē-teh, m̄ thang phah tín-tāng." Sat-tàn kóng,"Tio̍h chia̍h, tio̍h chia̍h." Sêng-bí m̄ thiaⁿ liông-sim, kéng-jiân thiaⁿ Sat-tàn. Bô jōa kú chiong kong- thi̍h a̍h-lāi ê piáⁿ-koaⁿ lóng chia̍h liáu-liáu. Liông-sim koh kah i tio̍h hoán-hóe. Sat-tàn kóng, "Bô iàu-kín, chiong chńg-thâu-á chhit chheng-khì lí ê chhùi, óaⁿ-tû iû-goân koaiⁿ teh, lí ê lāu-bú tò-lâi, beh thái ōe chai."
|
Sêng-bí tī 家內無偌久，就想無sio̍h,就去開屜，亂亂hiau到一睏仔飽。 Koh 開碗櫥，看見有幾塊餅乾，tóe tī 鋼鐵盒內，一下看見就 liâm-piⁿ ài beh 食。良心講：「M̄-thang，著 hē-teh，m̄-thang扑振動。」 撒旦講：「著食、著食。」 Sêng-bí m̄聽良心，竟然聽撒旦。 無偌久將鋼鐵盒內 ê 餅乾攏食了了。良心 koh 教伊著反悔。撒旦講：「無要緊，將指頭仔拭清氣你ê 嘴，碗櫥猶原關--teh，你 ê 老母倒--來，beh thái會知。」 |
|
Liông-sim kóng, "Lāu-bú tò-lâi tio̍h kóng sêng- si̍t, m̄ thang pe̍h-chha̍t." Sêng-bí koh m̄ thiaⁿ, cháu kàu tiâⁿ lâi kap chhù-piⁿ ê gín-ná thit-thô. To̍k-to̍k liông-sim ta̍uh-ta̍uh koh-chài kek-tōng i, kóng, "Lí só͘ chòe m̄-tio̍h, thèng-hāu lāu-bú tò-lâi, iàu-kín tio̍h kóng sêng-si̍t."
|
良心講：「老母倒--來著講誠實，m̄-thang 白賊。」 Sêng-bí koh m̄ 聽，走到埕--來佮 厝邊 ê 囡仔 thit-thô。獨獨良心 ta̍uh-ta̍uh koh再 擊動伊，講：「你所做m̄著，聽候老母 倒--來，要緊著講誠實。」 |
|
Lí Su-niû tò-lâi ê sî, in-ūi chin ià-siān, tùi Sêng- bí kóng, "Kā góa phàu chi̍t poe tê lâi, tī óaⁿ-tû lāi ū kúi tè piáⁿ-koaⁿ, the̍h lâi hō͘ góa chia̍h."
|
Lí Su-niû 倒--來ê 時，因為真厭siīn,tùi Sêng-bí講：「Kā 我泡一杯茶--來，tī 碗櫥內有幾tè餅乾，提來hō͘ 我食。」 |
|
Sêng-bí the̍h gō͘ ê lui, chhut khì bóe tê-sim phàu chi̍t koàn tê. Chit sî sim-lāi í-keng chin kan-khó͘ chòe. Liông-sim kóng, "Tio̍h kóng sêng- si̍t." Sat-tàn kóng, "M̄ bián, tio̍h kóng piáⁿ-koaⁿ hō͘ niau chia̍h --khì."
|
Sêng-bí 提五個lui ，出去買茶心泡一罐茶。這時心內已經真 艱苦做。 良心講：「著講誠實。」 撒旦講：「M̄免，著講餅乾hō͘ 貓食--去。」 |
|
Tê í-keng phàu hó, Lí Su-niû kóng, "Piáⁿ-koaⁿ tī óaⁿ-tû lāi, kín khì the̍h--chhut--lâi."
|
茶已經泡好，Lí Su-niû講：「餅乾 tī 碗櫥內，緊去提--出--來。」 |
|
Sêng-bí chiū khì khui óaⁿ-tû khòaⁿ, kóng, "Bô piáⁿ-koaⁿ."
|
Sêng-bí 就去開碗櫥看，講：「無餅乾。」 |
|
Liông-sim kóng, "Kín jīn m̄ tio̍h."
|
良心講：「緊認 m̄ 著。」 |
|
Sat-tàn kóng, "M̄ thang, chí-ū tio̍h kóng niau chia̍h khì."
|
撒旦講：「M̄-thang，只有著講貓食--去。」 |
|
Sêng-bí hit sî í-keng hō͘ Sat-tàn lōng-tó, bōe ōe bô thiaⁿ i kiau-so, chiū kóng, "Piáⁿ-koaⁿ hō͘ niau chia̍h khì."
|
Sêng-bí hit時已經 hō͘ 撒旦 lōng-tó ，bōe會無聽伊kiau-só，就講：「餅乾 hō͘ 貓食--去。」 |
|
Liông-sim thiaⁿ-kìⁿ i kóng pe̍h-chha̍t, tī lāi-bīn chhut-la̍t ti̍t-ti̍t ku̍t, ku̍t, kàu hō͘ i bīn chin âng, sòa kiò i tio̍h kín sêng-jīn.
|
良心聽見伊講白賊，tī 內面 出力直直掘、掘，到 hō͘伊面真紅，煞叫伊著緊承認。 |
|
Lí Su-niû kóng, "Sòe chiah niau chia̍h khì, lí ê bīn cháiⁿ-iūⁿ ōe âng?"
|
Lí Su-niû講：「細隻貓食--去，你ê 面怎樣會紅？」 |
|
Sêng-bí ê liông-sim tī lāi-bīn, koh-chài chhut-la̍t kong-kek, kā i kong-kek kàu hō͘ i háu, chiah si̍t- si̍t kóng, "Piáⁿ-koaⁿ sī góa chia̍h --khì, kiû lāu-bú tio̍h khoan-sù --góa."
|
Sêng-bí ê 良心 tī 內面，koh再出力 攻擊，kā伊攻擊到 hō͘伊哮，才實實講：「餅乾是我食--去，求老母著寬恕--我。」 |
|
Lí Su-niû in-ūi i thâu pái tú chòe m̄-tio̍h, koh ka-kī chai chōe, chí-ū khó͘-khǹg --i, kiò i ē-pái m̄ thang koh kóng pe̍h-chha̍t, iā bô hêng-hoa̍t --i, án- ni chit ê tāi-chì chiū bêng-pe̍k.
|
Lí Su-niû 因為伊頭 擺抵做m̄著，koh 家己知罪，只有苦勸--伊，叫伊下擺 m̄-thang koh講白賊，也無刑法--伊，án-ni 這個事誌就明白。 |
|
Tok-sìn Kî-tó Hō͘-sòaⁿ
|
Tok-sìn祈禱雨傘 |
|
Ū chi̍t ê sòe-hàn cha-bó͘ gín-ná, miâ-kiò Tok-sìn. Chi̍t ji̍t kap i ê lāu-bú tùi koe-lō͘ tò-lâi, chi̍t-ê ji̍p pâng-mn̂g, lāu-bú kóng, "Ai-ioh, tī koe-lō͘-ni̍h, góa só͘ ài ê hō͘-sòaⁿ phah m̄ kìⁿ lah, góa kiaⁿ-liáu chhē bô."
|
有一個細漢查某囡仔，名叫Tok-sìn。一日佮伊ê 老母對街路倒--來，一個入 房門，老母講：「Ai-ioh，tī 街路--ni̍h，我 所愛 ê 雨傘扑m̄見--lah，我驚了 chhē 無。」 |
|
Sòe-hàn cha-bó͘ gín-ná kóng, "Lán thang ūi-tio̍h chit ê kî-tó, Chú Iâ-so͘ ōe the̍h tò-lâi."
|
細漢查某囡仔講：「咱thang為著 這個祈禱，主耶穌會提--倒--來。」 |
|
Lāu-bú chhiò kóng, "Hó." To̍k-to̍k sim-lāi khiok giâu-gî, Chú Iâ-so͘ bē tek-khak ūi-tio̍h chit ê sió-khóa sū hùi sim.
|
老母笑講：「好。」 獨獨心內卻僥疑，主耶穌 bē 的確為著這ê 小可事費心。 |
|
Tok-sìn chiū kūi-lo̍h khì kî-tó, kî-tó soah chiū khì khùn. Tē jī ji̍t chá-khí, ū lâng kàu in tau kóng, "Chā-ji̍t khioh-tio̍h chi̍t ki hō͘-sòaⁿ, m̄ chai sī lín ê á m̄ sī?"
|
Tok-sìn就跪落去祈禱，祈禱煞就去睏。 第二早起，有人到 in 兜 講：「昨日拾著一支雨傘，m̄ 知是lín ê 抑 m̄ 是？」 |
|
Tok-sìn kap i ê lāu-bú chi̍t ē khòaⁿ, gông-ngia̍h kóng, "Chin sī hi-kî, chin-chiàⁿ tio̍h o-ló Thiⁿ Pē, liân chit ê sió-khóa sū, I iā pang-chān lán."
|
Tok-sìn佮伊ê 老母一下看，gông-ngia̍h 講：「真是稀奇，真正著 o-ló 天父，連這個小可事，伊也幫贊-- lán。」 |
|
Hoān-nā ū kan-khó͘, bô lūn tōa sòe, lóng tio̍h kā Thiⁿ Pē kóng, in-ūi I sī chû-ài oân-choân ê Siōng-tè, tōa sū sòe sū lóng-chóng teh koan-sim.
|
凡若有艱苦，無論大細，攏著kā 天父講，因為伊是慈愛完全 ê 上帝，大事細事攏總teh 關心。 |
|
Sòe Iok-sek ê Kî-tó
|
細約瑟ê 祈禱 |
|
Eng-kok ū nn̄g ê gín-ná, chi̍t ê miâ Iok-pek, chi̍t ê miâ Iok-sek. Chi̍t ji̍t khì thàm i lāu ê a-má, tiàm hia kúi-nā ji̍t, sì-kòe khòaⁿ kong-kéng. Iok-pek siⁿ-ji̍t beh kàu, chiàu Se-kok ê hong-sio̍h, bô lūn tōa lâng gín-ná, siⁿ-ji̍t hit ji̍t chhin lâng ū sî sàng lé-mi̍h. Iok-pek put-chí ǹg- bāng i ê a-má ōe sàng i mi̍h thang tòa tò-lâi ke- lāi kè siⁿ-ji̍t.
|
英國有2個囡仔，一個名約伯、一個名瑟。一日去探伊老 ê 阿媽，tiàm hia 幾若日，四界看 光景。 約伯 生日beh到，照西國 ê 風俗，無論大人囡仔，生日hit日親人有時送禮物。約伯不只向望伊ê 阿媽會送伊物thang tòa 倒來家內過生日。 |
|
Hit ê-hng beh chiūⁿ bîn-chhn̂g ê sî, a-má kóng, "Lóng kūi --lo̍h--khì, góa tāi-seng kî-tó, lín nn̄g ê chiah liân sòa kî-tó." Iok-pek kî-tó ê sî, tōa siaⁿ kóng, "Kiû Chú Iâ- so͘, tē-it iàu-kín m̄ thang bōe kì-tit góa āu--ji̍t siⁿ- ji̍t, kiû lí sàng góa chi̍t lia̍p tōa lia̍p phê-kiû, iā tio̍h tēng koh hó ê."
|
Hit ê-hng beh 上眠床 ê 時，阿媽講：「 攏跪--落--去，我第先祈禱，lín 2個才連續祈禱。」約伯祈禱 ê 時，大聲講：「求主耶穌，第一要緊 m̄ thang bōe記得 我後--日生日，求你送 我一粒大粒皮球，也著 tēng koh 好-- ê。」 |
|
Iok-sek kóng, "Ho͘hN, mi̍h-sái ēng kàu chiah tōa siaⁿ, Siōng-tè m̄ sī chhàu-hī lâng."
|
約瑟講：「Ho͘hN，mi̍h-sái 用到chiah大聲，上帝 m̄是臭耳人。」 |
|
Iok-pek ìn kóng, "M̄ kú, a-má sī chhàu-hī lâng."
|
約伯應講：「M̄-kú,阿媽是臭耳人。」 |
|
Che sui-jiân sī chi̍t ê gín-ná ê kò͘-sū, to̍k-to̍k kî- tiong ū tōa kà-sī tī-teh.
|
Che 雖然是一個囡仔 ê 故事，獨獨其中有大教示 tī-teh。 |
|
Ū chōe-chōe lâng kî-tó, m̄ sī ǹg-bāng Siōng-tè thiaⁿ, to̍k-to̍k kiû lâng chai, miâ sui sī kî-tó, khiok tōa sit-lo̍h kî-tó ê goân-ì, bô kî-koài kî-tó ê lâng bô chió, tit-tio̍h èng-ún ê lâng bô chōe, in-ūi in bô chiàu lí kî-tó.
|
有濟濟人祈禱，m̄是向望上帝 聽，獨獨求人知，名雖是祈禱，卻 大失落祈禱 ê 原意，無奇怪祈禱 ê人無少，得著應允 ê人 無濟，因為in 無照你祈禱。 |
