Tân Hîm ê Sió-toān
|
陳熊ê小傳 |
| Phian-chip-sek |
編輯室 |
|
Tân Hîm sī Chúi-tńg-kha Kàu-hōe ê Tiúⁿ-ló, 14 hè chiū tī Saⁿ-têng-po͘ tit-tio̍h tō-lí. Āu-lâi tī Chúi-tn̂g-kha chòe seng-lí, i ê lāu-pē m̄-chún i sìn tō-lí, sòa khún-tio̍k i, pàng siaⁿ beh thâi sí i, nā lé-pài-ji̍t i ê pē khì pài-tn̂g sûn, nā khòaⁿ i tī-teh sûi-sî kiò I tò-khì. I chiū kap Chan Un Tiúⁿ-ló chham-siông, Chan Tiúⁿ-ló an-ùi i kóng, Siōng-tè ta̍k ūi tī-teh, lí tī ta̍k ūi thang ho̍k-sāi Siōng-tè.
|
陳熊是水返腳教會ê長老，14歲就tī三重埔得著道理。後--來tī水返腳做生理，伊ê老父m̄准伊信道理，續窘逐--伊，放聲beh thâi死伊，若禮拜日伊ê父去拜堂巡，若看伊tī--leh隨時叫倒--去。伊就kap曾溫長老參詳，曾長老安慰伊講，上帝逐位tī--leh，你tī逐位thang服事上帝。 |
|
Hoat-kok phah Tâi-oân ê sî, lé-pài-ji̍t beh khì lé-pài tú-tio̍h lâng chhiúⁿ pài-tn̂g, i chiū chhōa Chhòa Seng Thoân-tō cháu, ka-kī ê seng-lí tiàm lóng hō͘ lâng chhiúⁿ liáu-liáu, pháiⁿ-lâng chhut siúⁿ-keh, kia̍h chhèng sì-kòe chhē, āu-lâi chiah cháu khì Tām-chúi, tī-hia chòe sêng-lí, sòa ji̍p Sîn-ha̍k, āu-lâi ū siū phài khì tiàm Lūn-á-téng, Tāi-lí-kán thoân-tō. Liáu-āu chiū hioh-khùn tī Chúi-tńg-kha chòe seng-lí. I tī 1904 nî chòe Chúi-tńg-kha Tiúⁿ-ló kàu taⁿ, chin jia̍t-sim tī kàu-hōe, gâu kan-chèng tō-lí, sui-jiân khah lāu ê sî ū tú-tio̍h chōe-chōe ê pháiⁿ kéng gū, iáu-kú bô sit-chì.
|
法國扑台灣ê時，禮拜日beh去禮拜tú著人搶拜堂，伊就chhōa蔡昇傳道走，家己ê生理店攏hō͘人搶了了，歹人出賞格，kia̍h銃四界chhōe,後--來才走去淡水，tī hia做生理，續入神學，後--來有受派去tiàm崙仔頂、大里簡傳道。了後就歇睏tī水返腳做生理。伊tī 1904年做水返腳長老到今，真熱心tī教會，gâu干証道理，雖然較老ê時有tú著濟濟ê歹境遇，iáu-kú無失志。 |
|
Pak-pō͘ Tiong-hōe sêng-li̍p ê sî, ū tam-tng Tiong-hōe ê Kì-sū. I ê seng-khu chin ióng-chòng, chin gâu ūn-tōng. Bô phah-sǹg tī 4 ge̍h 20 hō ū khí phòa-pīⁿ, āu-lâi ji̍p Má-kai I-īⁿ, tī 5 ge̍h 14 hō téng po͘ 5 tiám hō͘ Chú kéng-tiàu an-jiân kui-thian, hióng-siū 69 hè. Lé-pài- tn̂g kú-hêng chòng-sek, ū Soan-kàu-su, Ko͘-niû, Bo̍k-su, Thoân-tō kap hiaⁿ-tī chí-bē chōe-chōe lâi hù. I ū pang Tiúⁿ-ló-niû kap i 4 ê kiáⁿ, 4 ê cha-bó͘-kiáⁿ，kiû Chú an-ùi i ê ka-cho̍k, koh hō͘ in ōe o̍h i ê hó só͘ kiâⁿ. A-bēng.
|
北部中會成立ê時，有擔當中會ê記事。伊ê身軀真勇壯，真gâu動。無扑算tī 4月20 號有起破病，後--來入馬偕醫院，tī 5月14號頂晡5點hō͘主揀召安然歸天，享壽69歲。禮拜堂舉行葬式，有宣教師、姑娘、牧師、傳道kap兄弟姊妹濟濟來赴。伊有幫長老娘kap伊4個子、4個查某子，求主安慰伊ê家族，koh hō͘ in 會學伊ê好所行。阿們！ |
|
( Tâi-oân Kàu-hōe-pò tē 544 koàn,1930 nî 7 ge̍h)
|
(台灣教會報第544卷，1930年7月) |
