Phoe
|
批 |
| Tè Ek-gî |
戴Ek-gî |
|
[Chit tuiⁿ phoe sī Tè I-seng ê Lēng-chun kap Lēng-tông siá lâi kā Má-kai Pīⁿ-īⁿ ê hoān-chiá seh-siā--ê; taⁿ ài lo̍h tī chia, sòa hō͘ lia̍t-ūi chai hoān-chiá ê hó-ì].
|
「這張批是戴醫生ê令尊佮令堂寫來kā馬偕病院ê患者說謝--ê;今ài落tī chia，續hō͘列位知患者ê好意。」 |
|
Phoe kià hō͘ tiàm tī Tâi-oân só͘ thiàⁿ ê pêng-iú hiaⁿ-chí siu, pêng-an.
|
批寄hō͘ tiàm tī 台灣所疼ê朋友兄姊收，平安。 |
|
Lín ū kià nn̄g ki chin súi kim ê Si̍p- jī-kè lâi sàng goán, iā kā goán nn̄g lâng kiong-hō; goán kàu-ke̍k hoaⁿ-hí.
|
Lín 有寄2枝真súi 金ê十字架來送阮，也kā阮2 人恭賀；阮到極歡喜。 |
|
Chit nn̄g ki kim Si̍p-jī-kè, goán lia̍h- chòe ke̍k pó-pòe, iā sī thang sî-sî hián- bêng lín thiàⁿ-thàng ê Kì-liām-phín. Tùi chia thang chai, lín iû-goân ū teh thiàⁿ lán ê Chú Iâ-so͘ Ki-tok, chiū-sī hiàn-sin chòe lán ke̍k-tōa ê Kiù-chú. Taⁿ tio̍h ióng-kiāⁿ, iā tio̍h hó-táⁿ, in-ūi Kiù-chú Iâ-so͘ sī lín chīn-tiong ê pêng-iú. Tio̍h kia̍h-ba̍k khòaⁿ Kiù-chú kóng, Chú Iâ- so͘ ah, goán to̍k-to̍k teh óa-khò Lí, chiū- sī tōa kap pe̍h-pe̍h ê Kiù-chú; goán óa- khò Lí âng ê pó-hui̍h lâi tit-tio̍h chheng-khì koh chiâⁿ sèng.
|
這2枝金十字架，阮掠做極寶貝，也是thang 時時顯明lín 疼痛ê紀念品。Tùi chia thang 知，lín 猶原有teh 疼咱ê主耶穌基督，就是獻身做咱極大ê救主。今著勇健，也著好膽，因為救主耶穌是lín 盡忠ê朋友。著舉目看救主講：「主耶穌--ah，阮獨獨teh 倚靠你，就是大佮白白 ê救主；阮倚靠你紅ê寶血來得著清氣koh成聖。」 |
|
Siat-sú lín kiaⁿ, lín ê chōe-kòa hō͘ lín kap Sèng ê Siōng-tè saⁿ-lī, tio̍h hó-táⁿ, in-ūi ū khui chi̍t káng ê pó-chôaⁿ, thang lâi sóe-chheng lín ê chōe; iā tī Si̍p-jī-kè- kha, ū I i-tī ê só͘-chāi. Chhin-chhiūⁿ Sèng- si ū kóng, tī Si̍p-jī-kè-téng ū 5 ê siong-jiah:
|
設使lín 驚，lín ê坐掛hō͘ lín佮聖ê上帝相離，著好膽，因為有開一káng ê寶泉，thang 來洗清lín ê罪；也tī 十字架腳，有伊醫治ê所在。親像聖詩有講，tī 十字架頂有5個傷跡： |
|
Chiū-sī tī Kok-kok-thaⁿ só͘ siū--ê. Chiah ê siong thòe góa teh Kî-tó,
|
「就是tī 各各他 所受--ê。Chiah-ê 傷替我teh 祈禱， |
|
Bô m̄-sī ū kong-hāu ê Kî-tó, Chiū-sī thòe góa chhut-thâu ê Kî-tó.
|
無m̄ 是有功效的祈禱，就是替我出頭ê祈禱。 |
|
Chiah ê siong ia̍h teh kóng, tio̍h sià- bián ah, tio̍h sià-bián.
|
Chiah-ê 傷亦teh 講，著赦免ah，著赦免。 |
|
Ia̍h m̄-chún chi̍t-ê í-keng bōe tò-tńg ê chōe-jîn lâi sí-bô.
|
亦m̄ 准1個已經bōe倒轉ê罪人來死無。」 |
|
Chòng lín ê táⁿ, tī chia lín ū ke̍k-tōa ê I-seng, iā ū ke̍k tōa khùi-la̍t ê Pang- chō͘-chiá. Tio̍h kim-kim khòaⁿ I, sòa kóng, Ki-tok ah ! goán to̍k-to̍k him-bō͘ Lí, goán só͘ khiàm-kheh--ê, tī Lí lāi-bīn ū chhē--tio̍h. Ki-tok ah ! Kiû Lí hû-chhî poa̍h-tó ê lâng, hû-chō͘ ià-lán ê lâng, i-tī ū pīⁿ ê ,iā kiû Lí tio̍h ín-chhōa chhiⁿ-mî--ê.
|
壯lín ê膽，tī chia lín有極大ê醫生，也有極大氣力ê幫助者。著金金看伊，續講：「基督--ah！阮獨獨欣慕你，阮所欠缺--ê,tī 你內面有chhē--著。基督ah！求你扶持跋倒ê人，扶助厭懶ê人，醫治有病--ê,也求你著引chhōa青瞑--ê。」 |
|
Goán nn̄g lâng ji̍t-ji̍t teh kî-tó siàu- liām lín; iā ū teh ǹg-bāng lín ê sin-thé chiām-chiām ná ióng-kiāⁿ. Iā m̄-nā teh thòe lín kî-tó, chiū-sī goán nn̄g lâng ū koat-tēng beh khí chi̍t keng pīⁿ-sek tī Ngāu-san I-īⁿ, thang ha̍h tī 4 ê lâng ê lō͘-ēng, che sī beh nî-nî chòe hoān-chiá ê lō͘-ēng. Kàu goán nā tò-khì kìⁿ Thiⁿ Pē liáu-āu, chit keng chhù thang chòe goán ê Kì-liām-sek.
|
阮2人日日teh 祈禱數念lín;也有teh 向望lín ê身體漸漸那勇健。也m̄-nā teh 替lín 祈禱，就是阮2人有決定beh起1間病室tī Ngāu-san醫院，thang 合tī 4 個人ê路用，che 是beh年年做患者ê路用。到阮若倒去見天父了後，這間厝thang 做阮ê紀念室。 |
|
Taⁿ goán só͘ thiàⁿ, só͘ chun-kèng ê kiáⁿ kap sim-pū, nā tī goán nî-lāu koh loán- jio̍k ê sî, hoaⁿ-hí kap goán saⁿ-kap tòa, khiok goán khah sóng-khoài. Chóng-sī in nn̄g lâng teh pang-chān lín, goán ê sim si̍t-chāi boán-chiok; só͘-í ūi-tio̍h in nn̄g lâng goán kám-siā Thiⁿ Pē, iā kiû Siōng-tè, hō͘ in ōe chòe lín tōa-tōa ê lī- ek lâi hióng-hok.
|
今阮所疼、所尊敬ê子佮新婦，若tī 阮年老koh軟弱ê 時，歡喜佮阮相佮tòa,卻阮較爽快。總--是in 2人teh 幫贊lín ，阮ê心實在滿足；所以為著in 2人阮感謝天父，也求上帝，hō͘ in會做lín 大大ê利益來享福。 |
|
Ài koh kóng, goán lia̍h chit nn̄g ki Tâi-oân ê kim Si̍p-jī-kè chòe kùi-khì ê sàng-phín; iā ài pò lín chai, goán sî-sî teh ǹg-bāng lín tit-tio̍h hok-khì. Tī lán ê Chú Iâ-so͘ ê kau-pôe ê pêng-iú.
|
Ài koh講，阮掠這2枝台灣ê金十字架做貴氣ê送品；也ài報lín 知，阮時時teh向望lín得著福氣。Tī 咱ê主耶穌ê交陪ê朋友。 |
|
Tè Ek-gî, Tè Jîn-lí.
|
戴Ek-gî,戴Jîn-lí。 |
|
(Tâi-oân Kàu-hōe-pò tē 537 koàn,1929 nî 12 ge̍h)
|
(台灣教會報第537卷，1929年12月) |
