Lāi-bīn ê Seng-oa̍h
|
內面ê生活 |
| Siau Lo̍k-siān |
蕭樂善 |
|
Ū chi̍t ê sàn-chhiah ê ūi-tô͘-ka chi̍t pái tī i ê thâu-ló-lāi ū siūⁿ-chhut chi̍t- tiuⁿ chin súi ê tô͘ beh ūi. I chiūⁿ-tâi ê sî chiū bōe kì-tit sè-kan ê sū. Kàu i lo̍h- lâi tâi-kha ê sî chiū siūⁿ-tio̍h bí-àng-lāi bô bí, koh bô lōa-chōe chhài, chóng-sī i koh chiūⁿ-tâi ê sî i ê thâu-ló-lāi koh siūⁿ-chhut hit tiuⁿ tô͘, oán-jiân chhin-chhiūⁿ ji̍p tī Thian-kok chi̍t-iūⁿ, chin pêng-an, chin hoaⁿ-hí, chin khoài-lo̍k, lóng bô thiaⁿ-kìⁿ sè-kan ê siaⁿ-im; chóng-sī nā koh lo̍h-lâi ê sî, chiū ū sàn-hiong ê kan- hó͘ kàu tī i. Chit nn̄g khoán seng-oa̍h hit ê cheng-chha sī chin-tōa.
|
有一個散赤ê畫圖家一擺tī伊ê頭腦內有想一張真súi ê圖beh畫。伊上台ê時就bōe記得世間ê事。到伊落來台腳ê時就想著米甕內無米，koh無偌濟菜，總是伊koh上台ê時伊ê頭腦內koh想出 hit張圖，宛然親像入tī天國一樣，真平安、真歡喜、真快樂，攏無聽見世間ê聲音；總是若koh落來ê時，就有散hiong ê艱若到tī伊。這兩款生活hit 個增差是真大。 |
|
Ta̍k ê chin-si̍t ê Ki-tok-tô͘ sī chi̍t ê ūi-tô͘-ka teh ūi éng-oán-oa̍h. Tī i ê sim- lāi só͘ siūⁿ--ê, chiū-sī thiàⁿ-thàng kap chèng-gī. I nā teh ūi che ê sî chiū bô sè-kan ê kiáu-jiáu. I nā lú chia̍p ūi, sè- kan ê khó͘-thàng lú bô kàu tī i, put-lūn cháiⁿ-iūⁿ i pîⁿ-pîⁿ hó kì-ji̍t. Sui-bóng siông-siông lo̍h tâi-kha siū sè-kan ê kan- khó͘, iáu-kú i siông-siông koh chiūⁿ khí- khì, chiū sè-kan-tāi lóng bōe kì-tit khì. Chit khoán ê sim beh ū Thian-kok tī-hia.
|
逐個真實ê基督徒是一個畫圖家teh畫永遠活。Tī伊ê心內所想--ê,就是疼痛佮正義。伊若teh畫這ê時就無世間ê攪擾。伊若愈捷畫，世間ê若痛愈無到tī伊，不論怎樣伊平平好過日。雖罔常常落台腳受世間ê艱苦，iáu-kú伊常常koh一起去，就世間事攏bōe記得--去。這款ê心beh有天國tī hia。 |
|
Kó͘-chá tī Tiong-kok ū chi̍t ê lâng siông-siông thiaⁿ-kìⁿ ge̍h ê kò͘-sū, sim chin ài khì khòaⁿ. I khòaⁿ-kìⁿ ge̍h siông- siông hioh tī tùi-bīn ê soaⁿ-téng, phah- sǹg nā kàu hit ê soaⁿ chiū ōe ji̍p tī ge̍h ê sè-kài, chiū bōe i ê gia̍p, khoán pau-ho̍k, tòa hō͘-sòaⁿ, chiū khí-sin. Kiâⁿ kúi-nā lé-pài kú ê lō͘, khòaⁿ-kìⁿ ge̍h bô koh-iūⁿ tī chhù-n̍i̍h só͘ khòaⁿ, lóng bô khah-kūn, sim-koaⁿ ná sit-chì. Chi̍t àm kau tī chi̍t châng tōa-chhiū-kha ià-siān beh tiàm hia kè-àm.
|
古早tī中國有一個人常常聽見月ê故事，心真愛去看。伊看見月常常歇tī對面ê山頂，扑算若到hit個山就會入tī月ê世界，就賣伊ê業，khoán包袱、tòa雨傘，就起身。行幾若禮拜久ê路，看見月無各樣tī厝--n̍i̍h所看，攏無較近，心肝愈失志。一暗到tī一欉大樹腳厭siān beh tiàm hia過暗。 |
|
Beh bîn-khì ê sî, hut-jiân ū chi̍t ê chhiū-sîn iô i kóng, “Lí beh khì tó-ūi?” I kóng, “Góa beh khì ge̍h ê sè-kài. Góa kiâⁿ kúi-nā lé-pài kú lóng bô khah-kūn, m̄-chai tio̍h kiâⁿ jōa-kú chiah kiâⁿ ōe kàu, ho͘N3?” Hit ê chhiū- sîn kóng, “Lí chin-gōng; bô lâng ōe kàu hia. Lí nā-sī ài khòaⁿ ge̍h lāi-bīn ê khoán, góa ū nn̄g lia̍p ê phòng-kiàⁿ lí nā tàu hó͘-sè chiū ōe khòaⁿ-kìⁿ.” Hit ê lâng kā i seh-siā, chiong-sìn chiong-gî chiū oat tò-tńg-khì. Āu-lâi kó-jiân tàu chòe bōng-oán-kiàⁿ, lāi-bī ta̍k hāng khòaⁿ chin-bêng, chiū hoaⁿ-hí kàu ke̍k, hoah kóng, ‘Ge̍h cháu ji̍p kiàⁿ-lāi lah?’”
|
Beh眠去 ê時，忽然有一個樹神搖伊講：「你beh去佗位？」伊講，「我beh去月ê世界。我行幾若禮拜久攏無較近，m̄知著行偌久才行會到，ho͘N2？」Hit個樹神講：「你真憨；無人會到hia。你若是ái看月內面ê款，我有兩粒ê膨鏡你若táu好勢就會看見。」Hit個人kā伊說謝，將信將疑就越倒轉去。後來果然tàu做望遠鏡，內面逐項看真明，就歡喜到極，喝講：「月走入鏡內--lah！」 |
|
Iâ-so͘ kóng, “Siōng-tè ê kok lîm-kàu m̄-sī hián-jiân, ia̍h bōe kóng tī-chia a-sī tī-hia, in-ūi Siōng-tè ê kok sī tī lín lāi- tiong.”
|
耶穌講：「上帝ê國臨到m̄是顯然，亦bōe講tī chia抑是tī hia，因為上帝ê國是tī lín內中。」 |
|
Lâng tùi gōa-bīn sì-kòe beh chhē Thian-kok. Thèng-hāu chiong-lâi beh tit-tio̍h Thian-kok, ū an-ùi nā-tiāⁿ, bô ū hoaⁿ-hí tī-teh, che sī bô ún-tàng, in-ūi hian-kok sī tī lâng ê sim-lāi. Chù-ì tī sim-lāi ê khoán-sit ê lâng, ài siám-pī sè-kan ê kiáu-jiáu, chona-sim ǹg Siōng- tè, sim-koaⁿ ài kap Iâ-so͘ ê sim saⁿ-hô ê lâng ū Thian-kok tī-teh.
|
人tùi外面四界beh chhē天國。聽候將來beh得著天國，有安慰nā-tiāⁿ，無有歡喜tī-teh，這是無穩當，因為天國是tī人ê心內。注意tī心內ê款式ê人，ài閃避世間ê攪擾，專心向上帝，心肝ài佮耶穌ê心相和ê人有天國tī-teh。 |
|
Thok-má-su Khún-phit-su (Thomasa Kempis) kóng, “Tio̍h choan-sim ǹg Siōng-tè, pàng-sak chit sè-kan, sim-koaⁿ ōe tit-tio̍h an-hioh. Tio̍h thoàn-liān khì-sak sè-chiūⁿ ê tāi-chì, ia̍h choan-sim khòa-jū lāi-sim ê sū, lí chiū chai Siōng- tè ê kok lîm-kàu tī lí sim-lāi.” “Siōng- tè ê kok sī gī kap pâng-an kap tī Sèng Sîn ê hoaⁿ-hí” (Lô-má 14:17). Siōng- tè ê kok bô beh kàu tī bô ài chiâⁿ-sèng ê sim.
|
Thok-má-su Khún-phit-su(Thomas a Kempis)講：「著專心向上帝，放sak這世間，心肝會得著安息。著鍛鍊棄sak世上ê事誌，亦專心掛慮內心ê事，你就知上帝ê國臨到tī你心內。」「上帝ê國是義佮平安佮tī聖神ê歡喜」（羅馬14:17）。上帝ê國無beh到tī無ài成聖ê心。 |
|
(Tâi-oân Kàu-hōe-pò tē 511 koàn,1927 nî 10 ge̍h)
|
(台灣教會報第511卷，1927年10月) |
