Chhut-sí-sòaⁿ_10
|
出死線_10 |
|---|---|
| Tēⁿ Khe-phoàn | 鄭溪泮 |
|
30 Lí tùi tó-ūi lâi?
|
30你 tùi 佗位來？ |
|
Khiok-soat Chin-seng bōe tńg-lâi ê sî, Hui-chú tiàm-tī chhù-lāi, hit-sî í-keng 1-ê hāu-siⁿ kap chi̍t-ê 3 goe̍h-jit ê cha-bó͘-kiáⁿ, àm-sî lé-pài liáu, chiū koaiⁿ-mn̂g khì khùn.
|
卻說真聲未轉來ê時，惠子tiàm-tī厝內，hit時已經1個後生 kap 1個3月日ê查某子，暗時禮拜了，就關門去睏。 |
|
Chhit-goe̍h 30 mê iok-lio̍k 11 tiám, Hūi-chú khùn tiām-chēng ê sî, ke iā bô thî, káu iā bô pūi chí-ū sī piah-lāi chit-kóa si̍h-si̍h ê chàu-ke-á siaⁿ, chóng-pho͘ lāi khùn-ka̍h tiām-chut-chut. Hūi-chú tng-tī hē gin-ná-liáu, an-bîn hó-khùn ê sî, bô ì-sek hut-jiân chi̍t-ê siàu-liân-ke, sin-chhēng Tâi-oân-ho̍k, thâu boah kùi-hoe-iû, móa-sin hùi phang-chúi, ē kek-lâng ê phīⁿ-khang. M̄-chai ēng A-pho-lûn ê tāi-mô͘-su̍t á m̄-sī, cháiⁿ-iūⁿ ē-tit ji̍p-pâng, peh chiūⁿ Hūi-chú ê bîn-chhn̂g, chiū-kín tó-tī i ê sin-piⁿ, beh o̍h Am-lūn ê hêng-ûi. Hūi-chú chit-sî kiaⁿ-chhéⁿ, kín-mé chhia--khí-lâi, sim-koaⁿ pe̍h-kó͘ phi̍h-phi̍h-chhoah, tāi-seng lia̍h-chún hiông-chha̍t; thí-khui chi̍t-khòaⁿ; chiah-chai sī tē-2 a-pho-lûn. Siàu-liân-ke chek-sî chhiú gīm kúi-cha̍p tiuⁿ ê kim-phiò, tu-hō͘ Hūi-chú, Hūi-chú siūⁿ-khì tàn-hiat-ka̍k. Ná-chún mô͘-kúi chhì Iâ-so͘, ēng thiⁿ-ē chun-kùi hē-tī I ê bīn-chêng, nā phak-lo̍h-pài--i, chiū beh hō͘ I. Khòaⁿ i tàn thó-ka̍k, chiū koh khioh hō͘ i, kóng, Lín chò chit-hō kang, góa chai khah khiàm-khoeh, chiah-ê hō͘ li ēng. Hūi-chú kóng, Kin-ná-ji̍t lí tō kui chhù-keng góa iā m̄-siu. Lí nā-chai góa chò Chú ê kang, siūⁿ beh pang-chān góa, ū pa̍t-sî thang chò, siáⁿ-sū àm-chēⁿ chiūⁿ góa ê bîn-chhn̂g? Lí ê ì-sù góa lóng chai. Kóng liáu chiū siám-pī tī í-ni̍h chē. A-pho-lûn ê ì-sù chhin-chhiūⁿ bé, sim-koaⁿ chhin-chhiūⁿ kâu, mòa-sin chhin-chhiūⁿ hóe, siang-chhiú ná-chún tōa-soh beh pa̍k Hūi-chú ê sin-khu. Hūi-chú chin kiaⁿ, chi̍t-bīn kiaⁿ-liáu hō͘ i ēng bú-le̍k, tí-tng bē tiâu; chi̍t-bīn kiaⁿ-liáu hō͘-lâng khóaⁿ-kìⁿ, tian-tò soah giâu-gî pún-sin ê pháiⁿ, sòa ē liân-lūi Chin-seng ê kang; nā ē-tit hō͘ i kín-kín chhut-khì sī tē-it hó. Sim-koaⁿ àm-chīⁿ kî-tó Siōng-tè. Chiū kā i kóng, Lí tùi tô-ūi lâi? A-pho-lûn chhiò-chhiò, kóng, Góa m̄ kā lí kóng, góa óng-lâi bô-tiāⁿ-tio̍h. Hūi-chú kóaⁿ--i, kóng Tio̍h kín-kín chhut-khì, sió-thēng lâng ē chai, lí chiū kiàn-siàu. Ìn kóng, Mài--lah, góa ē chò-sū ke̍k kî-bit, thiⁿ-ē bô lâng ē chai, góa tùi kúi-nā-nî chêng chiū ì-ài bē tit-tio̍h, góa kin-mê-hng sī ūi-tioh ‘Ài’ chiah lâi. Hūi-chú chit-sî lóng bô-kiaⁿ, chek-pī i kóng, Lí teh kóng sáⁿ? Lí sī mô͘-kúi ê kiáⁿ, Kong-gī ê tùi-te̍k; thiⁿ-ē bô lâng chai, to̍k-to̍k Siōng-tè chai, góa sī sím-mi̍h-lâng, lí káⁿ ji̍p-góa ê pâng! Lí tio̍h kín khì; nā-bô, góa beh jīn lí chò chha̍t, lâi táⁿ-pān. A-pho-lûn khòaⁿ sū bē-sêng, chiū khui-mn̂g chhut-khì.
|
7月30暝約略11點，惠子睏恬靜ê時，雞也無啼，狗也無吠只有是壁內一寡si̍h-si̍h ê chàu-ke-仔聲，總舖內睏ka̍h恬-chut-chut。惠子當tī hē囡仔了，安眠好睏ê時，無意識忽然1個少年家，身穿台灣服，頭抹桂花油，滿身hiù芳水，會激人ê鼻孔。M̄知用A-pho-lûn ê大魔術抑m̄是，怎樣會得入房？Peh上惠子ê眠床，就緊倒tī伊ê身邊，beh學暗lūn ê行為。惠子這時驚醒，緊猛chhia--起來，心肝peh-kó͘ phi̍h-phi̍h-chhoah，第先掠準雄賊；thí開一看；才知是第2 A-pho-lûn。少年家即時手gīm幾十張ê金票，tu-hō͘惠子，惠子受氣tàn-hiat-ka̍k。若準魔鬼試耶穌，用天下尊貴下tī伊ê面前，若仆落拜--伊，就beh hō͘--伊。看伊tàn thó-ka̍k,就koh拾hō͘--伊，講：「Lín做這號工，我知較欠缺，chiah-ê hō͘你用」。惠子講：「今仔日你就歸厝間我也m̄收。你若知我做主ê工，想beh幫贊--我，有別時thang做，啥事暗-chēⁿ上我ê眠床？你ê意思我攏知。講了就閃避tī椅--ni̍h坐。」A-pho-lûn ê意思親像馬，心肝親像猴，滿身親像火，雙手若準大索beh 縛惠子ê身軀。惠子真驚，一面驚了hō͘伊用武力，tí-tng bē tiâu;一面驚了hō͘人看--見，顛倒煞蟯疑本身ê歹，煞會連累真聲ê工；若會tit hō͘伊緊緊出--去是第1好。心肝暗chīⁿ祈禱上帝。就kā伊講：「你tùi 佗位來？」A-pho-lûn笑笑，講：「我m̄ kā你講。我往來無定著。」惠子趕--伊，講：「著緊緊出--去，小停人會知，你就見笑。」應講：「Mài--lah，我ê 做事極其密，天下無人會知，我tùi 幾若年前就意愛bē得--著，我今暝昏是為著『愛』才來。」惠子這時攏無驚，責備伊講：「你teh講啥？你是魔鬼ê子，公義ê對敵；天下無人知，獨獨上帝知，我是甚物人，你敢入我ê房！你著緊--去；若無，我beh認你做賊，來打扮」。A-pho-lûn看事bē成，就開門出--去。 |
|
Chhut-khì liáu, Hūi-chú kín koaiⁿ-mn̂g, bô khùn-kàu thiⁿ-kng. Teh siūⁿ kai-chài Siōng-chú hō͘ góa tit-tio̍h khah iâⁿ, tio̍h kám-siā I.
|
出去了，惠子緊關門，無睏到天光。Teh想佳哉上主hō͘我得著較贏，著感謝伊。 |
|
Bô-phah-sǹg Tē-jī-mê Chin-seng iû-goân bōe tńg-lâi, Hui-chú chin kiaⁿ, í-keng àm, chiū tiám-kiám mn̂g-hō͘, ta̍k-hāng thò-tòng, chiah khì khùn, hit-mê, koh lâi, teh khui thoah-mn̂g ê sî, Hūi-chú chiū chhéⁿ, kóaⁿ-kín tùi chóng-pho͘ lo̍h-lâi, chē-tī keh-piah ê í, sim-koaⁿ it-hoat kiaⁿ-hiâⁿ, siūⁿ i cha-mê siū chek-pī, kin-mê káⁿ koh-lâi, ún-tàng ū pī-pān. Kó-jiân beh ēng kiông-chè chip-hêng. Hūi-chú sī nńg-chiáⁿ ê lâng, kai-chài iû-goân tit-tio̍h bô-hān ê Sîn-la̍t, iáⁿ-liáu kúi-hun kú, bô si-hô ê sit-pāi. Hit-sî A-pho-lûn chin siū-khì, kóng, Beh sī ū to tī chia, góa tek-khak thâi lí. Kóng-liáu iā chē-tī hia thêng-chhoán. Thêng ū--hiah-kú, Hūi-chú tiām-tiām, kî-kiû Siōng-tè tio̍h pang-chān i khah iâⁿ. A--pho-lûn koh kóng. Góa sī ūi-tio̍h Ài-chêng chiah ū lâi; chóng bô lí, bô chêng, bô chêng kàu án-ni?! Hūi-chú ìn kóng, sáⁿ-lâng beh tông-chêng lí ê pháiⁿ, ... ... ... ... Lí m̄ chai-chōe kàu án-ni? Bô siūⁿ góa kap góa ê tiong-hu sī chò sím-mi̍h kang, lí káⁿ lâi beh chhim-hoān; iā lí pún-sin kòa Ki-tok-tô͘ ê kì-hō, chhùi liām Ki-tok ê Chin-tō, cháiⁿ-iūⁿ gōa-phôe iûⁿ-ko, lāi-sim chhâi-lông. Khó͘-o͘N3 kàu-ke̍k! Lí nà m̄ hoan-hóe, lí ū chai-eh ah! Hūi-chú chiah-ê ōe giâm-giâm kóng liáu, A-pho-lûn chit-sî chhin-chhiūⁿ chiàn-pāi ê peng, kiû i kóng, Hui-chú ah! Góa taⁿ chai-iaⁿ góa ê m̄-tio̍h. Put-kò góa sī in-ūi le̍k-ài kòe-thâu, chiah ū chiah gû-gōng, taⁿ kiû lí sià-bián góa, bo̍h-tit chiong chit-chân sū pò-iông hō͘-lâng chai. Hūi-chú kóng, Góa khòaⁿ lí iáu-bōe thiat-té chai-chōe, lí tio̍h kín chhut-khì, o̍h Pí-tek khì chhim-chhim thòng-hóe. A-pho-lûn kóng, Taⁿ ló͘-la̍t leh, chhiáⁿ lí khui-mn̂g hō͘ góa khí. Hūi-chú kóng, He tō chin kî, lí khòaⁿ tùi tó-ūi ji̍p, iā tio̍h ka-tī tùi hia chhut; khòaⁿ tùi tó-ūi poa̍h-tó, tio̍h tùi hia peh--khí-lâi, chhin-chhiūⁿ khí-thâu, lí Sèng-chheh hiah gâu thak, chit-kù bē-kì-tit mah? Kóng soah sî-cheng tan 1-tiám, A-pho-lûn chiū li-khui khì. Hūi-chú chek-sî tōa-tōa kam-siā, chiàⁿ chhin-chhiūⁿ si kóng,
|
無扑算第2暝真聲猶原未轉來，惠子真驚，已經暗，就點檢門戶，逐項妥當，才去睏，hit暝，koh來，teh開thoah門ê時，惠子就醒，趕緊tùi 總舖落--來，坐tī隔壁ê椅，心肝一發驚惶，想伊昨瞑受責備，今暝敢koh來，穩當有備辦。果然beh用強制執行。惠子是軟chiáⁿ ê人，佳哉猶原得著無限ê神力，偃了幾分久，無絲毫ê失敗。Hit時A-pho-lûn真受氣，講：「Beh是有刀tī chia，我的確thâi--你。」講了也坐tī-hia停喘。停有--hiah-久，惠子恬恬，祈求上帝著幫贊伊較贏。A-pho-lûn koh講：「我是為著愛情才有來；總無你…無情！無情到án-ni?！」惠子應講：「啥人beh同情你ê歹，……你m̄知罪到án-ni?無想我 kap 我ê丈夫是做甚物工，你敢來beh侵犯；也你本身掛基督徒ê記號，嘴唸基督ê真道，怎樣外皮羊羔，內心豺狼。可惡到極！你若m̄反悔，你有災厄--ah！」惠子chiah-ê話嚴嚴講了，A-pho-lûn這時親像戰敗ê兵，求伊講：「惠子--ah！我今知影我ê m̄著。不過我是因為溺愛過頭，才有chiah愚憨，今求你赦免我，莫得將這層事報揚hō͘人知。」惠子講：「我看你iáu-bōe徹底知罪，你著緊出--去，學彼得去深深痛悔。」A-pho-lûn講：「今勞力--leh，請你開門hō͘我去。」惠子講：「He就真奇，你看tùi 佗位入，也著家己tùi hia--出；看tùi 佗位跋倒，著tùi hia peh--起來，親像起頭，你聖冊hiah gâu讀，這句bē記tit--mah?」講煞時鐘tân一點，A-pho-lûn就離開--去。惠子即時大大感謝。正親像詩講： |
|
Ji̍t chhià sai-soaⁿ; goān Chú lí kap góa tòa, Am-mî ná chhim, kiû lí bô pang-sak góa, Choân bô i-óa, tâng-phōaⁿ lī-pia̍t góa khì; Chān lâng ê Chú, goān lí kap góa khiā-khí. Kiû-chú kīn-óa, góa sim chiū lóng bián-kiaⁿ, Ba̍k-sái bē khó͘, chai-eh bē hāi sèⁿ-miā; Sí-sit bē hāi, kui-thó͘ iā bián khòa-lū, Góa ùn-tàng iâⁿ, tùi-khò choân-lêng ê chú |
日斜西山； 願主你 kap 我tòa， 暗暝那深，求你無放sak--我， 全無依倚，同伴離別我去； 贊人ê主，願你 kap 我企起。 求主近倚，我心就攏免驚， 目屎bē苦，災厄bē害生命； 死失bē害，歸土也免掛慮， 我穩當贏，tùi 靠全能ê主 |
|
Thiⁿ-kng, Hūi-chú kim-kim khòaⁿ, m̄-chai Chin-seng ê-po͘ ē kàu-ūi bē, kàu-àm ê sî Chin-seng chiū tńg-lâi. Í-keng chia̍h-àm, chiū kā Hūi-chú kóng, i tī Pe̍h-hô kiô chhut-sí-sòaⁿ ê chêng-hêng, Hūi-chú thiaⁿ-liáu chin lún, chiū kóng, i 2-mê-hng khah-iâⁿ A-pho-lûn ê khó͘-chiàn hō͘ Chin-seng thiaⁿ. Chin-seng thiaⁿ-liáu chin kám-ho̍k, kóng, Lí si̍t-chāi ū khah-iâⁿ Thiⁿ-sài ê khùi-la̍t, (Chhòng 32:35) hō͘ góa thang o̍h. Mô͘-kúi ê lī-hāi kàu án-ni; m̄-kú Siōng-tè ê khùi-la̍t bô-hān. I móe-pái ū kiù góa tùi si-sòaⁿ chhut-lâi, iā taⁿ ū chān lí chhut-sí ji̍p-oa̍h, tio̍h o-ló I bô soah. Kóng soah 2-lâng chiū kūi-lo̍h kî-tó, kám-siā Siōng-tè, hit-sî í-keng àm-mê. Kàu āu-lâi A-pho-lûn ū chhim-chhim hoán-hóe, iû-goân jia̍t-sim lé-pài, Chin-seng kap Hūi-chú iā bô khioh-hīn, iû-goân kèng-thiàⁿ i.
|
天光，惠子金金看，m̄知真聲下晡會到位--bē?到暗ê時真聲就轉--來。已經食暗，就kā惠子講伊tī白河橋出死線ê情形，惠子聽了真lún,就講伊2暝昏較贏A-pho-lûn ê苦戰hō͘真聲聽。真聲聽了真感服，講：「你實在有較贏天使ê氣力，（創32：35）hō͘我thang學。魔鬼ê厲害到án-ni;m̄-kú上帝ê氣力無限。伊每擺有救我tùi 死線--出來，也今有贊你出死入活，著o-ló伊無煞。」講煞2人就跪落祈禱，感謝上帝，hit時已經暗暝。到後來A-pho-lûn有深深反悔，猶原熱心禮拜，真聲 kap 惠子也無拾恨，猶原敬疼--伊。 |
|
31 Chhù-Kak-Thâu Ê Tōa-Hóe
|
31厝角頭 ê 大火 |
|
Keh-nî chiaⁿ-goe̍h-chhe, Chin-seng thiⁿ-phú-kng khiâ-chhia khì kòe-khe sûn hōe-iú, hut-jiân thiⁿ-khì piàn-ōaⁿ, Chin-seng soah kám-mō͘. Tńg-lâi ê sî, hit-mê lâu phīⁿ-hoeh, chit-sî o͘-àm, thâu-khak tit-hîn, áu-thò͘ bô-soah, kha-chhiú ti̍t-ti̍t, bô-la̍t thang kóng, iā bē tin-tāng, án-ni kúi-nā ji̍t. Chin-seng siūⁿ-tio̍h tī Soa-tó kàu-hōe, iáu-bōe chò-chhut sím-mi̍h kang, Siōng-tè nā beh thó i ê lêng-hûn, si̍t-chāi bô kóe-chí thang hō͘ Siōng-tè kéng; siūⁿ liáu chin kiàn-siàu; khòaⁿ tio̍h 2-ê sè-kiáⁿ, 1-ê ē-kiâⁿ, 1-ê ēng-phō, bô lâng liāu-lí, soah ba̍k-sái sì-lâm-sûi. Kàu-hōe thè i pek-chhiat kî-tó.
|
隔年正月初，真聲天昲光騎車去過溪巡會友，忽然天氣變換，真聲煞感冒。轉--來ê時，hit暝流鼻血，一時烏暗，頭殼直暈，嘔吐無煞，腳手直直，無力thang講，也bē振動，án-ni幾若日。真聲想著tī沙島教會，iáu-bōe做出甚物工，上帝若beh討伊ê靈魂，實在無果子thang hō͘上帝揀；想了真見笑；看著2個細子，1個會行，1個用抱，無人料理，煞目屎四-lâm-垂。教會替伊迫切祈禱。 |
|
Hit-sî chiū kiò Hūi-chú siá-phoe kiò It-iông lâi tàu-kò͘, iā kòng-tiān khì Tang-kiaⁿ kiò Chì-khîn tńg-lâi, ín-ūi ku-nî in kap Lō͘-ka īⁿ-tiúⁿ ê ke-koàn khì tī-hia.
|
Hit時就叫惠子寫批叫一陽來鬥顧，也kòng電去東京叫至勤轉--來，因為舊年in kap 路加院長ê家眷去tī-hia。 |
|
Chì-khîn chiap-tio̍h tiān-pò, jiàu-peh-peh chiū tò-lâi, beh sī ū-si̍t ē thang poe, iáu khah hó.
|
至勤接著電報，jiàu-peh-peh就倒--來，beh是有si̍t會thang飛，iáu較好。 |
|
It-iông lâi ê sî, Chin-seng tng teh gûi-kip, i ūi-tio̍h i cháu-tang cháu-sai, an-ùi Hūi-chú, si̍t-chai sī saⁿ-pang-chān. Chi̍t-ji̍t khì Thô-lí-san chhōe i-seng, mn̄g-io̍h beh hō͘ Chin-seng chia̍h, chē-chhia kàu Pêng-tó í-keng ji̍t lo̍h-soaⁿ, āu-lâi khiâ-chhia kàu Soa-tó, tī pòaⁿ-lō͘ ū chi̍t-ê kiô, chit-ê kiô sī thiah khí-lâi siu-lí, in-ūi àm lah, It-iông sòa bē-kì-tit, kai-chài bô tōa sún-siong. Chin-seng tī pēⁿ-chhn̂g siūⁿ i hiah àm m̄-chai siaⁿ-sū, kàu-ūi chiah chai It-iông ūi-tio̍h i hiám sàng sèⁿ-miā.
|
一陽來ê時，真聲當teh危急，伊為著伊走東走西，安慰惠子，實在是相幫贊。一日去桃李山chhōe醫生，問藥beh hō͘真聲食，坐車到平島已經日落山，後來騎車到沙島，tī半路有1個橋，這個橋是拆起來修理，因為暗--lah，一陽sóa bē記--tit，佳哉無大損傷。真聲tī病床想伊hiah暗m̄知啥事，到位才知一陽為著伊險送生命。 |
|
Kàu-hōe ê sìn-chiá chē-chē lâi thàm-pēⁿ, ū-ê sàng-mi̍h, ū-ê sàng-chîⁿ, Chin-seng lâu ba̍k-sái kā in kám-siā. Siūⁿ hit-kù
|
教會ê信者濟濟來探病，有--ê送物，有--ê送錢，真聲流目屎kā in感謝。想hit句 |
|
Jîn-gī bo̍k kau-châi, Kau-châi jîn-gī choa̍t. |
仁義莫交財， 交財仁義絕。 |
|
(Ké-soeh sī kóng, Jîn-gī bo̍h-tit ēng-chîⁿ saⁿ-kau-pôe; nā ēng-chîⁿ saⁿ-kau-pôe, jîn-gī ē choa̍t-tn̄g.) Siūⁿ chiah-ê lâng ēng án-ni thiàⁿ-góa; āu-lâi nā hoah siaⁿ kóng, Tèng i tī si̍p-jī-kè, chiū it-hoat gûi-hiám.
|
（解說是講「仁義莫得用錢相交陪；若用錢相交陪，仁義會絕斷。」想chiah-ê人用án-ni疼--我；後來若喝聲講：「釘伊tī十字架，就一發危險。」 |
|
Tiong-kan ū pù-lâng siông-siông lâi kóng, Thài m̄ hō͘ i khì ji̍p-īⁿ khah hó. Hūi-chú kóng, Góa chai sī hó; chóng-sī bô-la̍t. Hit-sî pa̍t-lâng sī 10 kho͘ 8 kho͘, 3 thâu 2 kho͘ lâi khòaⁿ--i; nā-sī chit-ê pù-lâng ê thiàⁿ Chin-seng sī 2-pau ngāu-hún. Chin-seng ūi-tio̍h i tōa kan-khó͘; m̄-sī ài i chē-chē mi̍h chiah hoaⁿ-hí. Pó-lô kóng, Hō͘ lâng mi̍h ê lâng, pí the̍h lâng mi̍h ê lâng khah ū hok-khì; nā-sī siat-sú i kan-ta pek-chhiat thè i kî-tó, iáu khah iaⁿ-kòe i ê lé-mi̍h. I só͘ hiàn ê lé-mi̍h, kàu-gia̍h thang khòaⁿ-chhut i ê chû-ài lōa-tōa. Sèng-chheh kóng, Bē-ē thiàⁿ ū khòaⁿ-kiⁿ ê hiaⁿ-tī, thài-thó ē thiàⁿ bōe khòaⁿ-kiⁿ ê Siōng-tè. I sī chhin-chhiūⁿ khang-khang tùi hiaⁿ-tī kóng, Hiaⁿ-tī ah, goān lín tit-tio̍h sio-pá. Koh kóng, Lín ê saⁿ-thiaⁿ m̄-thang ēng òe ēng chi̍h; sī tio̍h ēng kiâⁿ, ēng chin-si̍t. I tùi-thāi góa án-ni, tùi pa̍t-lâng m̄-chai siáⁿ-khoán. I ê bu̍t-chit sī hó-gia̍h; nā-sī i ê sim-sîn sī sàn-hiong. Chin-seng put-chí ūi-tio̍h i ê sàn-hiong lâi khòa-lū; iā kiû Chú kám-tōng i ê sim-koaⁿ. Chin-seng pēⁿ-sè ná gûi-kip, Hūi-chú tī i ê sin-piⁿ, khan i ê chhiú teh lâu ba̍k-sái. Chin-seng sè-siaⁿ Kóng, M̄-bián hoân-ló; ná gûi-hiám, tio̍h ná pek-chhiat kî-tó. Seng-chheh kóng, Ū-sìn ê kî-tó, beh kiù phòa-pīⁿ ê lâng, Chú beh hō͘ i khí-lâi; i nā u-chōe beh sià-bián i (Ngá-kok 5:15, 16).
|
中間有富人常常來講：「Thài m̄ hō͘伊去入院較好。」惠子講：「我知是好；總是無力。」Hit時別人是10箍、8箍，3頭2箍來看--伊；但是這個富人ê疼真聲是2包藕粉。真聲為著伊大艱苦；m̄是愛伊濟濟物才歡喜。保羅講「Hō͘人物ê人，比提人物ê人較有福氣；但是設使伊kan-ta迫切替伊祈禱，iáu較贏過伊ê禮物。伊所獻ê禮物，夠額thang看出伊ê慈愛偌大。」聖冊講「Bē會疼有看--見ê兄弟，thài-thó會疼bē看--見ê上帝。」伊是親像空空tùi 兄弟講：「兄弟--ah，願lín得著燒飽。」Koh講「Lín ê 相疼m̄通用話、用舌；是著用行、用真實。」伊對待我án-ni，對別人m̄知啥款？伊ê物質是好額；但是伊ê心神是散hiong。真聲不止為著伊ê散hiong來掛慮；也求主感動伊ê心肝。真聲病勢那危急，惠子tī伊ê身邊，牽伊ê手teh流目屎。真聲細聲講：「M̄免煩惱；那危險，著那迫切祈禱。聖冊講『有信ê祈禱，beh救破病ê人，主beh hō͘伊起--來；伊若有罪beh赦免--伊』」（雅各5：15，16）。 |
|
Kam-siā Siōng-tè, tùi án-ni Chin-seng chiām-chiām khah hó, kàu lāu-bó tńg-lâi ê sî, Chin-seng lio̍h-á ē peh-khí-lâi kiáⁿ, nā-si bô-la̍t.
|
感謝上帝，tùi án-ni真聲漸漸較好，到老母轉--來ê時，真聲略仔會peh起來行，但是無力。 |
|
Chi̍t mê-hng hut-jiân-kan keh-piah teh hoah hóe-sio-chhù, gê-mn̂g ê cheng khiang-khiang-kiò, chúi-lêng lòng-lòng-háu, ke-lō͘ ê lâng cháu kah pìn-piàng-kiò, hóe è siaⁿ pit-pia̍k-kiò, Chin-seng chheⁿ-kiaⁿ chiū peh-khí-lâi, àⁿ-thâu chi̍t-khòaⁿ sī tī chhù-kak-thâu teh to̍h. Hit-sî hóe-ian chhèng khí, hóe-chiah âng-phà-phà, tī keh-piah ê chháu-chhù phoah-chúi phoah kah lī-lo̍k-chhāⁿ. Chin-seng lia̍h-kiò beh sio-tioh pài-tn̂g ê sió-chhù, sim-lāi chin kiaⁿ. Pún-té sī hōaⁿ lî óa-piah teh kiâⁿ, it-tàn ū chit-hō gûi-kip ê sū, chiū peh-khí-lâi, chiū-kín tùi hong-khîm hû teh lōng, ka-tī chi̍t-ê hû tùi ke-lō͘ chhut-khì, pìn-piàng-kiò koh ji̍p-lâi giâ kúi-ná hāng chin tāng ê mi̍h chhut-khì. Sió-thêng hóe phah-hoa, hiah-ê mi̍h bô-la̍t thang hû, tio̍h pa̍t-lâng ûn-á kng chiah ē-iâⁿ.
|
一暝昏忽然間隔壁teh喝火燒厝，衙門ê鐘khiang-khiang-叫，水龍lòng-lòng-哮，街路ê人走ka̍h pìn-piàng-叫，火ê聲pit-pia̍k-叫，真聲青驚就peh--起來，àⁿ頭--一看是tī厝角頭teh著。Hit時火煙chhèng起，火舌紅-phà-phà,tī隔壁ê草厝潑水潑ka̍h lī-lo̍k-chhāⁿ。真聲掠叫beh燒著拜堂ê小厝，心內真驚。本底是hōaⁿ 離倚壁teh行，一旦有這號危急ê事，就peh--起來，就緊tùi 風琴扶teh lōng,家己1個扶tùi 街路--出去，pìn-piàng-叫koh入來舉幾若項真重ê物--出去。小停火扑hoa，hiah ê物無力thang扶，著別人勻仔扛才會贏。 |
|
Chin-seng chiū siūⁿ, pēⁿ-khì sī chi̍t-khoán bô hêng-siōng ê tùi-te̍k teh kiáu-jiáu cheng-sîn. Cheng-sîn nā hō͘ i kiáu-jiáu chiū siⁿ-chhut ià-siān kan-khó͘ chhut-lâi. Só͘-í beh pēⁿ tùi cheng-sîn sún-siong; beh hó iā tùi cheng-sîn tiâu-ióng. Chia̍h io̍h, sī tùi ūi-tn̂g khip-siu io̍h-liāu, hiah-ê io̍h-liāu chiū kap hoeh saⁿ-kap kiâⁿ-chiūⁿ téng-bīn chhì-kek náu, hō͘ náu ê cheng-sîn koh oa̍h-tāng, ná-chún kia̍h tek-á lā beh hoa ê hóe-pû hō͘ i koh to̍h. Chóng-sī lo̍h-á ê í-gōa ēng cheng-sîn ti̍t-chiap ê liâu-hoat, tùi goân-thâu chóng kong-kek, iā sī sio-tâng koh khah kín lah. Chiū-sī tùi ū-sìn ê Kî-tó, che-sī hoān-chiá ka-tī ê cheng-sîn siū Sèng-Sîn ti̍t-chiap kám-tōng, ê hó hoat-tō͘ lah! Iâ-so͘ i-hó lâng, iā-sī khòaⁿ i ū-sìn, chiū ēng Sèng-ê koân-lèng kám-tōng i, hō͘ i tit-tio̍h hó, kóng, Lí Sìn ū kiù lí, an-jiân tò-khì. Hit-sî pēⁿ chiū hó. Chim-giân kóng, Sim-koaⁿ hoaⁿ-hí phòa-pēⁿ chiū hó, (17:22) si̍t-chai ū-lí.
|
真聲就想：病氣是一款無形象ê對敵teh攪擾精神。精神若hō͘伊攪擾就生出厭siān、艱苦--出來。所以beh病tùi 精神損傷；beh好也tùi 精神調養。食藥，是tùi 胃腸吸收藥料，hiah-ê藥料就 kap 血相 kap 行上頂面刺激腦，hō͘腦ê精神koh活動，若準舉竹仔lā beh hoa ê火-pû hō͘伊koh著。總是藥仔ê以外用精神直接ê療法，tùi源頭總攻擊，也是相同koh較緊--lah。就是tùi 有信ê祈禱，這是患者家己ê精神受聖神直接感動 ê好法度--lah！耶穌醫好人，也是看伊有信，就用聖ê權能感動--伊，hō͘伊得著好，講「你ê信有救--你，安然倒--去。」Hit時病就好。箴言講「心肝歡喜破病就好」，（17：22）實在有理。 |
|
Che, sī Chin-seng tī peⁿ-chhn̂g si̍t-tē liān-si̍p ê Chin-lí.
|
Che，是真聲tī病床實地練習ê真理。 |
|
* * *
|
* * * |
|
Chin-seng í-keng chiām-chiām ióng, chiàu-kū tī-lí kàu-hōe. Ūi-tio̍h phòaⁿ-pēⁿ ū khai-liáu chē-chē chîⁿ, sòa pin-chò hū-chè-chiá; koh ke-lāi thâu-chhùi chē, put-tek-í tio̍h chioh-chîⁿ lâi tō͘-ji̍t. Hó-kòe ê hōe-iú, lia̍h-chún Chin-seng bo̍k-su sī ū-chîⁿ ê lâng, tian-tò beh kā i chioh-chîⁿ. Chin-seng kóng, Hiaⁿ-tī ah, chit-tia̍p góa bô, pa̍t-ji̍t nā ū, chiū hō͘ lí iā thang, mi̍h-sái chioh.
|
真聲已經漸漸勇，照舊治理教會。為著破病有開了濟濟錢，煞變做負債者；koh家內頭嘴濟，不得已著借錢來度日。好過ê會友，掠準真聲牧師是有錢ê人，顛倒beh kā伊借錢。真聲講：「兄弟--ah，這tia̍p我無，別日若有，就hō͘你也thang，mi̍h-sái借。」 |
|
Chi̍t-ji̍t chi̍t-ê chhin-ài hiaⁿ-tī lâi, tām-lūn kàu Chin-seng ka-têng seng-oa̍h lân ê sū, teh kóng, thoân-kàu-su chin nńg-lō͘, ū-ê chhun-chîⁿ chhun ka̍h. Chāi góa siūⁿ, lí chit goe̍h-ji̍t 30 kho͘, chi̍t-ke kiōng 8 lâng, kap Ná-a pêⁿ chē, ún-tàng sī bô kàu; m̄-kú bat thiaⁿ i teh kóng, kóng lí ū chhun-chîⁿ. Lí thài m̄ ké-chò kā i chioh-chîⁿ, hō͘ i chai-iáⁿ ū-kàu á-bô? Chin-seng kóng, Góa ài kóng chin-si̍t, m̄-ài ēng ké-chò; eng-kai ū chiū kóng ū; bô chiū kóng bô. Góa tit-tio̍h kàu-hōe ê thiàⁿ, án-ni káu-gia̍h; tān-gāi tùi chit-pang ê phòa-pēⁿ iáu hū-chè 50 kho͘. Hiaⁿ-tī kóng, Án-ni beh àn-chóaⁿ? Chin-seng kóng, Góa bô hoân-ló: in-ūi kì-tit góa bô chîⁿ thang tha̍k-chheh, chiū thàu-chá khioh ti-sái lâi bē; au-lâi bô kàu-giah thang kau sok-siu, chiū giâ tiáⁿ khì chò chún-tǹg, góa iû-goân ē-tit chut-gia̍p. Góa sìn Siōng-tè ē pang-chān góa. Hit-ê hiaⁿ-tī thiaⁿ liáu tiām-tiām.
|
一日1個親愛ê兄弟來，談論到真聲家庭生活難ê事，就講：「牧師--ah，我bat聽某執事teh講傳教師真軟路，有--ê 偆錢偆ka̍h。在我想，你一月日30箍，一家共8人， kap 挪亞平濟，穩當是無夠；m̄-kú bat聽伊teh講，講你有偆錢。你thài m̄假做kā伊借錢，hō͘伊知影有夠抑無？」真聲講：「我愛講真實，m̄愛用假做；應該有就講有；無就講無。我得著教會ê疼，án-ni夠額；但礙tùi chit-pang ê破病iáu負債50箍。」兄弟講：「Án-ni beh àn-chóaⁿ？」真聲講：「我無煩惱。因為記得我無錢thang讀冊，就透早khioh豬屎來賣；後--來無夠額thang交束脩，就舉鼎去做準當，我猶原會得卒業。我信上帝會幫贊--我。」Hit個兄弟聽了恬恬。 |
|
Keh-ji̍t chhè-lâng lâi kiò Chin-seng khì, kóng beh kā i kóng-ōe. Kàu-ūi chiū kóng, Bo̍k-su, góa cha-hng thiaⁿ-kìⁿ lí hū-chè 50 kho͘, góa chá-khí beh kā lí thè-hêng, hō͘ lí an-sim chò-kang. Chin-seng kóng, Ha̍p-gia̍h chā-ji̍t m̄-thang tùi lí kóng chit-chân sū. Hiaⁿ-tī kóng, Góa chai lí sī chin-si̍t ê khiàm-khoeh; chóng-sī góa í-keng chai, m̄-thang tiām-tiām. Iū-koh Sèng-chheh ū kóng, Chiàⁿ-chhiú ê só͘-chò, m̄-thang hō͘ tò-chhiú chai, só͘-í góa chá-khí só͘ beh thè lí chò-ê, iā bô hō͘ ke-lāi ê lâng chai. Chin-seng kóng, To-siā lí ê in, Goān Choân-lêng ê Siōng-tè ke-thiⁿ hok-khì hō͘ lí, hō͘ lí ū-chhun. In-ūi ū-ê beh hō͘ i ū-chhun; bô-ê liân i só͘ ū-ê iā beh chhiúⁿ the̍h-khì. Kóng, To-siā.
|
隔日差人來叫真聲--去，講beh kā伊講話。到位就講：「牧師，我昨昏聽見你負債50箍，我早起beh kā你替還，hō͘你安心做工。」真聲講：「Ha̍p-gia̍h 昨日m̄通對你講這層事。」兄弟講：「我知你是真實ê欠缺；總--是我已經知，m̄通恬恬。Koh聖冊有講『正手ê所做，m̄通hō͘倒手知』所以我早起所beh替你做--ê,也無hō͘家內ê人知。」真聲講：「多謝你ê恩，願全能ê上帝加添福氣hō͘--你，hō͘你有偆。因為有--ê beh hō͘伊有偆；無--ê連伊所有--ê也beh搶提去。」講：「多謝。」 |
|
32 Chin Kî-Koài!
|
32真奇怪！ |
|
Khiok-soat kàu It-iông, tī bōe khì Tang-kiaⁿ ê tāi-seng, ū tī Siong-tong-chng, siū-tioh hit-tah sian-siⁿ ê siāu-kài, tēng-iok chi̍t-chân chhin-sū. Āu-lâi tú-tioh chéng-chéng ê sū-chêng, It-iông siuⁿ beh hòe-iok, sim-koaⁿ oh-tit phah-sǹg, chiū tùi Chin-seng chham-siông. Chin-seng mn̄g i kóng, Sī sím-mi̍h in-toaⁿ? Kóng, Chit-ê chhin-chiâⁿ sī hit mê-hng ngó͘-jiân ê tiāⁿ-tio̍h; iû-koh hit-sī bô teh siūⁿ beh khì Tang-kiaⁿ, taⁿ tioh-koh kúi-nā nî; hòng-kiàm ná siūⁿ ná bô-hah. Chin-seng kóng, Án-ni hàⁿ, iā i pún-lâng ê í-kiàn cháiⁿ-iūⁿ? Kóng, Góa khòaⁿ i m̄-kam pàng-soah: In-ūi góa koat-tēng beh khì Lōe-tē ê sî, ū siá-phoe kā i sî, kóng-liáu khah ngē, i iā bô piàn-ōaⁿ i ê sim-chì; iū-koh góa beh chhut-hoat ê sî, i iā chhin-sin tī chhia-thâu, sáng góa khí-sin, koh theh 5-kho͘ gîn hē-tī góa ê chhiú. Góa àn-chóaⁿ beh hêng--i, i tō sī koh hiat-tó-tńg. Tùi hit-tiap kàu-taⁿ, góa ē sim chin bô pêng-an, put-sî teh siūⁿ tio̍h-soah; nā-sī i sī éng bô lī-khui. M̄-chai hiân-heng lí táⁿ-sǹg cháiⁿ-iūⁿ?
|
卻說到一陽，tī bē去東京ê第先，有tī嵩東庄，受著hit搭先生ê紹介，定約一層親事。後--來抵著種種ê事情，一陽想beh廢約，心肝難得扑算，就tùi 真聲參詳。真聲問伊講：「是甚物因端？」講：「這個親情是hit暝昏偶然ê定著；又koh hit時無teh想beh去東京，今著koh幾若年；hòng-kiàm那想那無合」。真聲講：「Án-ni--hàⁿ，也伊本人ê意見怎樣？」講：「我看伊m̄甘放煞。因為我決定beh去內地ê時，有寫批kā伊辭，講了較ngē,伊也無變換伊ê心志；koh我beh出發ê時，伊也親身tī車頭，送我起身，koh提5箍銀下tī我ê手。我àn-chóaⁿ beh還--伊，伊就是koh hiat倒轉。Tùi hit-tia̍p到今，我ê心真無平安，不時teh想著煞；但是伊是永無離開。M̄知賢兄你打算怎樣？」 |
|
Chin-seng kóng, Góa siūⁿ-tio̍h chìn-hêng; In-ūi nā siūⁿ kóng sī ngó͘-jiân tiāⁿ-tio̍h, tùi án-ni m̄-ài, che-sī hián-bêng lán ê bô chhim-su oán-lū; iū-koh ūi-tioh beh koh liû-hak, kî-kan khah kú, che-sī m̄-tio̍h. I kì-jiân ū liáu-kái, chàn-sêng lí thak-chheh, tek-khak sī bô hiâm kú; siōng-chhiáⁿ hak-būn ná kú, jîn-keh kap sìn-si̍t sī ná tāng. Siat-sú lí nā kó-jiân soah, bē-bián-tit lâng ài phoe-phêng, hit-sî lán ê jîn-keh sit-lo̍h, sìn-si̍t phah bô, jīm lí lōa ū hak-būn, to-sī chhin-chhiuⁿ o͘-hûn-tà-bū. Siok-gú kóng, “Lâm-chú-hàn, tāi-tiōng-hu, it-giân hòng-chhut, sù-má lân-tui” hô-hòng lán sī Ki-tok ê chhe-sài, eng-kai chū-tiōng jîn-keh. It-tàn kóng-chhut, tioh chiàu án-ni kiâⁿ, chiàⁿ-sī ha̍p-lí. Ki-tok kóng I beh tèng si̍p-jī-kè, Pó-lô chú-tiuⁿ beh ūi-tio̍h Chú, bô-lūn lōa kan-khó͘, kàu-bóe to-sī bô piàn-ōaⁿ in ê sim-chì. Só͘-í góa goān lí, góa, iā-tioh ū chit-khoán ê sim.
|
真聲講：「我想著進行；因為若想講是偶然定著，tùi án-ni m̄愛，這是顯明咱ê無深思遠慮；koh為著beh koh留學，期間較久，這是m̄著。伊既然有了解，贊成你讀冊，的確是無嫌久；尚且學問那久，人格 kap 信實是那重。設使你若果然煞，bē免tit人ài批評。Hit時咱ê人格失落，信實扑無，任你偌有學問，都是親像烏雲罩霧。俗語講『男子漢、大丈夫，一言放出，駟馬難追。』何況咱是基督ê差使，應該自重人格。一旦講出，著照án-ni行，正是合理。基督講伊beh釘十字架，保羅主張beh為著主，無論偌艱苦，到尾都是無變換in ê心志。所以我願你、我，也著有這款ê心。」 |
|
It-iông thiaⁿ-liáu, kóng, Hiân-heng, lí só͘ kóng put-chí ū-lí, góa siūⁿ iā-sī án-ni. Pún-jiân góa ê sim-lāi, Boeh kap M̄; 2 hāng tōa kau-chiàn, tùi kin-ná-ji̍t, kái-koat pêng-hô lah. Hó, lâi chìn-hêng!!
|
一陽聽了，講：「賢兄，你所講不止有理，我想也是án-ni。本然我ê心內，beh kap m̄,2項大交戰，tùi 今仔日，解決平和--lah。好，來進行！！」 |
|
* * *
|
* * * |
|
Keng-kòe ū--hiah-kú, It-iông ê sin-thé ū khah ióng lah, chiū mn̄g Chin-seng kóng, Hiân-heng, Taⁿ góa tī-sî thang koh khì Tang-kiaⁿ? Chin-seng siūⁿ-liáu chiū kóng, Lūn lí khì Lōe-tē thak-chheh, pún-té góa chin chàn-sêng lí tio̍h khì, chit-tiap ia-sī án-ni. Chóng-sī tī-sî thang khì, che lán chham-siông khòaⁿ-māi. Chiàu góa teh siūⁿ, beh chhut-gōa liû-hak, tio̍h-ài 3-hāng chn̂g:
|
經過有--hiah-久，一陽ê身體有較勇--lah，就問真聲講：「賢兄，今我tī時thang koh去東京？」真聲想了就講：「論你去內地讀冊，本底我真贊成你著去，這tia̍p 也是án-ni。總是tī時thang去，這咱參詳看覓。照我teh想，beh出外留學，著愛三項全： |
|
(1). Ū só͘-hùi. (2). Ū ióng-kiāⁿ. (3). Ū bián-kióng. |
（1）有所費。 （2）有勇健。 （3）有勉強。 |
|
Chit 3-hāng nā khiàm chi̍t-hāng, sī bē-tit sêng-kong. Chóng-sī góa khòaⁿ chit-sî í-keng khiàm 2-hāng---chiū-sī bô kàu-gia̍h só͘-hùi, iā bô-sáⁿ ióng-kiāⁿ Lūn só͘-hùi, nā-sī ka-kī ū, sī khah thò-tòng, chóng-sī lán chhin-chhiuⁿ I-lī-a tio̍h hō͘ O͘-lī-pêng-cho̍k chhiáⁿ, iā hō͘ chú-kóaⁿ-lâng iúⁿ-chhī. Pún-té hiah-ê teh chàn-chō͘ ê lâng, kin-ná-ji̍t ū-ê sit-pāi, bô-thang chhut-la̍t, bān-it, í-āu nā koh lí ê sin-thé, siat-sú nā khì liáu koh lám-sin, chiū jīm lí lōa ū chîⁿ, ū bián-kióng ê sim-chì, iā bô lō͘-ēng. Kì-jiân sī án-ni, góa teh siūⁿ sî-kan chin khoài kòe, put-jû tùi-chia tiong-chí, chiong lán it-seng hiàn-ji̍p thoân-tō-kài, chhut-lâi thoân-tō sī khah hó, án-ni iā-sī êng-kng Siōng-tè.
|
這3項若欠1項，是bē得成功。總是我看這時已經欠2項，就是無夠額所費，也無啥勇健。論所費，若是家己有，是較妥當。總--是咱親像以利亞著hō͘ O͘-lī-peng族請，也hō͘守寡人養飼。本底hiah-ê teh贊助ê人，今仔日有ê失敗，無thang出力。萬一，以後若koh你ê身體，設使若去了koh lám身，就任你偌有錢，有勉強ê心志，也無路用。既然是án-ni，我teh想時間真快過，不如tùi-chia中止，將咱一生獻入傳道界，出來傳道是較好，án-ni也是榮光上帝。」 |
|
It-iông kóng, Soán-bîn hiaⁿ iā-sī án-ni kóng, góa siūⁿ iā-sī ū-iáⁿ, siat-sú chhú-khì poàn-tô͘ koh tōng-tu̍t, put-tàn hùi liáu só͘-hùi, iā phah-sǹg sî-kan, se-kok-lâng kóng, Sî-kheh sī n̂g-kim. Chin-seng kóng, Án-ni tio̍h.
|
一陽講：「選明兄也是án-ni講。我想也是有影，設使此去半途koh撞突，不但廢了所費，也扑損時間，西國人講『時刻是黃金。』」真聲講：「Án-ni著。」 |
|
Nn̄g-lâng tâm-lūn ū--hiah-kú, chiū koat-tēng bô koh khì Lōe-tē, hiaⁿ-tī-á 2-lâng put-chí ū chham-siông.
|
兩人談論有--hiah-久，就決定無koh去內地，兄弟仔二人不止有參詳。 |
|
* * *
|
* * * |
|
Í-keng beh khì thoân-tō, Thoân-tō-kio̍k chiū phài i thâu-jīm khì tòa Thô-lí-san ê kàu-hōe. Hit-sî chiū chham-siông hap-hun, koat-tēng beh tī Soa-tó-chng, kiâⁿ khan-chhiú ê lé. Chin-seng ūi-tio̍h i pī-pān hun-in ê sū, sek-tiûⁿ chin nāu-jia̍t, gōa-ūi bo̍k-su 3-lâng lâi hù, í-gōa iā kài-chē lâng lâi saⁿ-kap hoaⁿ-hí. Chin-seng jīn i chò chhin hiaⁿ-tī, lâi kiâⁿ chiah-ê tāi-chì. It-iông keh 3-ji̍t beh chhōa-khì tiàm kàu-hōe ê sî, kám-kek Chin-seng ê thiàⁿ, lâu bak-sái saⁿ-sî. Chin-seng iā ēng kúi kù ōe bián-lē in, tùi án-ni chiū khí-sin. Kòe 3 goe̍h-ji̍t tùi Thô-lí-san, hut-jiân ū tiān-pò.
|
已經beh去傳道，傳道局就派伊頭任去tòa桃李山ê教會。Hit時就參詳合婚，決定beh tī沙島庄，行牽手ê禮。真聲為著伊備辦婚姻ê事，式場真鬧熱，外位牧師3人來赴，以外也kài濟人來相 kap 歡喜。真聲認伊做親兄弟，來行chiah-ê事誌。一陽隔3日beh chhōa去tiàm教會ê時，感激真聲ê疼，流目屎相辭。真聲也用幾句話勉勵--in，tùi án-ni就起身。過3月日tùi 桃李山，忽然有電報。 |
|
(日語kana) chiū-sī kóng, It-iông gûi-hiám, lí tio̍h kóaⁿ-kín lâi. Chin-seng chiap-tio̍h chit-tiuⁿ tiān-pò, chai-iáⁿ It-iông sī phòa-pēⁿ siong-tiōng, thiⁿ-kng chiū beh khì khòaⁿ--i. Chai-iaⁿ tio̍h ēng-chîⁿ, tú-tio̍h lāi-bīn iā-sī bô, lîm-sî kā chi̍t-ê lāu chí-mōe chhoah 20 kho͘, khí-kiâⁿ chiū khì.
|
（日語）就是講：「一陽危險，你著趕緊來。」真聲接著這張電報，知影一陽是破病傷重，天光就beh去看--伊。知影著用錢，抵著內面也是無，臨時kā 1個老姊妹chhoah 20箍，起行就去。 |
|
Kàu-ūi kó-jiân sī siong-tiōng-chèng; Soán-bîn hiaⁿ iā tī-hia. I-seng chín-toàn sī tn̂g-á hoat-iām, tio̍h tiām-tiām tó-chhn̂g, ji̍t-mê ù-peng, khùn-peng, iā chhut-hoeh 2-pái, sī ke̍k gûi-hiám. Thô-lí-san kàu-hōe ê i-seng chin thiàⁿ--i, chhin-chhiat sûn-sī, kóng, Chit-hō pēⁿ, i-io̍h bô lō͘-ēng; io̍h-á put-kò sī pang-chān sin-thé khah ū-la̍t thang tí-tng hit-ê peⁿ nā-tiāⁿ. Tio̍h kàu pēⁿ-kî kòe, sin-thé í-keng iâⁿ-kòe pēⁿ-sè ê la̍t, jia̍t-tō͘ chiah ē thè. Phó͘-thong thâu-bóe sī 3-lé-pài ê jia̍t, tāi-seng sió-khóa, tē 2 lé-pài tōa-jia̍t, tē 3 le-pài chiām-chiām ē thè, it-poaⁿ ê tńg-iām sī án-ni.
|
到位果然是傷重症；選明兄也tī-hia。醫生診斷是腸仔發炎，著恬恬倒床，日暝ù冰、睏冰，也出血2擺，是極危險。桃李山教會ê醫生真疼--伊，親切巡視，講：「這號病，醫藥無路用；藥仔不過是幫贊身體較有力 thang tí-tng hit個病--nā-tiāⁿ。著到病期--過，身體已經贏過病勢ê力，熱度才會退。普通頭尾是三禮拜ê熱，第先小可，第2禮拜大熱，第3禮拜漸漸會退，一般ê肺炎是an-ni。」 |
|
Bô-phah-sǹg 3 lé-pài kòe-liáu, 4 lé-pài kòe-liáu, 5 lé-pài 6 lé-pài iû-goân sī teh jia̍t, lâng sī ti̍t-ti̍t jio̍k, nā beh khì Iá-má ji̍p-īⁿ, bē-tit thang chē-chhia, iā bē-tit chē-kiō, poaⁿ-poaⁿ iô-iô, ún-tàng gûi-hiám. Taⁿ, chóng-sī tiàm-tī chia, chhut-chiā Thiⁿ-Pē chí-ì chiū-sī.
|
無扑算3禮拜過了，4禮拜過了，5禮拜、6禮拜猶原是teh熱，人是直直弱，若beh去Iá-má入院，bē得thang坐車，也bē得坐轎，poaⁿ-poaⁿ搖搖，穩當危險。今，總是tiàm-tī chia，出在天父旨意就是。 |
|
Hit-tia̍p ê kong-kéng chin chhám-tām, put-sî chhi̍h8-chhi̍h8-chhia̍k-chhia̍k, sī tok-peng ê siaⁿ; àm-sî ū hōe-iú pek-chhiat teh thè i kî-tò. Ko-bú-chng ê sian-siⁿ, iā tiâu-kang lâi i ê chhn̂g-chêng kî-tó. Á!.......chiong-lâi iú-bōng ê chheng-liân, kin-ná-ji̍t i ê teng beh hoa lah.......Hit-tia̍p só͘ óa-khò sī bān-koân-lêng ê Chú nā-tiāⁿ. Lâi khòaⁿ ê lâng bô-m̄ lâu ba̍k-sái. Ta̍k chá-khí thiⁿ bōe kng ê sî, Chin-seng kap Soán-bîn hiaⁿ í-ki̍p kúi-nā lâng tī pài-tn̂g lāi, thàu-chá chò kî-tó hōe, in ê kî-tó sī hui-siông ê pek-chhiat; hit-ê chêng-kéng, sī chhin-chhiūⁿ tī Im-hú teh kiû-kiò Chú, kî-tó ê sî, ē chheⁿ-chhìn khí ka-iam, iáu-kú pek-chhiat bô choat-bāng; ta̍k mê-hng ū hōe-iú ê kî-tó-hōe iā-sī chin jia̍t.
|
Hit-tia̍p ê光景真慘淡，不時chhi̍h8-chhi̍h8-chhia̍k-chhia̍k,是tok冰ê聲；暗時有會友迫切teh替伊祈禱。高舞庄ê先生，也刁工來伊ê床前祈禱。Á!.........將來有望ê青年，今仔日伊ê燈beh hoa--lah..........hit-tia̍p所倚靠是萬權能ê主--nā-tiāⁿ。來看ê人無m̄流目屎。逐早起天未光ê時，真聲 kap 選明兄以及幾若人tī拜堂內，透早做祈禱會，in ê祈禱是非常ê迫切；hit個情景，是親像tī陰府teh求叫主，祈禱ê時，會青-chhìn起交陰，iáu-kú迫切無絕望；逐暝昏有會友ê祈禱會也是真熱。 |
|
Chin kî-koài!
|
真奇怪！ |
|
Ta̍k-pái kî-tó soah, khì kiám i ê jia̍t, lóng ke kú-nā hun, án-ni keng-kòe 2, 3 goe̍h-ji̍t. Chin-seng teh siūⁿ, lâng jú tì-ì, mô͘-kúi iā jú ēng-kang; chóng-sī tāi-ke it-hoat tâng-sim ki-tó, kàu bóe chiū tit-tio̍h Sèng-lī. Sui-jiân sí-sí hun-sûi ê It-iông, iā-sī tùi hia koh khí-lâi. Tú-tú hit lé-pài ê Chú-ji̍t Sîn-liông, sī Ngá-kok 5:16 kóng, “Lín tio̍h saⁿ-thè jīn-chōe, saⁿ-thè kî-tó, thang tit-tio̍h i-hó”. Chi̍t-ji̍t It-iông ū khí-lâi o̍h-kiâⁿ. Chit-ê siau-sit chi̍t-ē thoân, tāi-ke bô-m̄ kám-siā Siōng-tè. Hit-goe̍h ê Kî-tok-kàu-Pò ū kì kóng, It-iông chhut-sí-ji̍p-oa̍h. Yo Bok-su lâi kā i kóng, Taⁿ lí tio̍h hē-goān.
|
逐擺祈禱煞，去檢伊ê熱，攏加幾若分，án-ni經過2、3月日。真聲teh想，人愈致意，魔鬼也愈用工；總--是逐家一發同心祈禱，到尾就得著勝利。雖然死死昏垂ê一陽，也是tùi hia koh起--來。抵抵hit禮拜ê主日神糧，是雅各5：16講「Lín著相替認罪，相替祈禱，thang得著醫好」。這日一陽有起來學行。這個消息一--下傳，逐家無m̄感謝上帝。Hit月ê基督教報有記講：「一陽出死入活。」Yo牧師來kā伊講：「今你著下願。」 |
|
* * *
|
* * * |
